| Library / Tipiṭaka / തിപിടക • Tipiṭaka / പടിസമ്ഭിദാമഗ്ഗപാളി • Paṭisambhidāmaggapāḷi |
൧. സോളസപഞ്ഞാനിദ്ദേസോ
1. Soḷasapaññāniddeso
൪. പഞ്ഞാപടിലാഭായ സംവത്തന്തീതി കതമോ പഞ്ഞാപടിലാഭോ? ചതുന്നം മഗ്ഗഞാണാനം, ചതുന്നം ഫലഞാണാനം, ചതുന്നം പടിസമ്ഭിദാഞാണാനം, ഛന്നം അഭിഞ്ഞാഞാണാനം, തേസത്തതീനം ഞാണാനം, സത്തസത്തതീനം ഞാണാനം ലാഭോ പടിലാഭോ പത്തി സമ്പത്തി ഫസ്സനാ 1 സച്ഛികിരിയാ ഉപസമ്പദാ. പഞ്ഞാപടിലാഭായ സംവത്തന്തീതി – അയം പഞ്ഞാ പടിലാഭോ.
4.Paññāpaṭilābhāya saṃvattantīti katamo paññāpaṭilābho? Catunnaṃ maggañāṇānaṃ, catunnaṃ phalañāṇānaṃ, catunnaṃ paṭisambhidāñāṇānaṃ, channaṃ abhiññāñāṇānaṃ, tesattatīnaṃ ñāṇānaṃ, sattasattatīnaṃ ñāṇānaṃ lābho paṭilābho patti sampatti phassanā 2 sacchikiriyā upasampadā. Paññāpaṭilābhāya saṃvattantīti – ayaṃ paññā paṭilābho.
പഞ്ഞാബുദ്ധിയാ സംവത്തന്തീതി കതമാ പഞ്ഞാബുദ്ധി? സത്തന്നഞ്ച സേക്ഖാനം പുഥുജ്ജനകല്യാണകസ്സ ച പഞ്ഞാ വഡ്ഢതി, അരഹതോ പഞ്ഞാ വഡ്ഢതി. വഡ്ഢിതവഡ്ഢനാ പഞ്ഞാബുദ്ധിയാ സംവത്തന്തീതി – അയം പഞ്ഞാബുദ്ധി.
Paññābuddhiyāsaṃvattantīti katamā paññābuddhi? Sattannañca sekkhānaṃ puthujjanakalyāṇakassa ca paññā vaḍḍhati, arahato paññā vaḍḍhati. Vaḍḍhitavaḍḍhanā paññābuddhiyā saṃvattantīti – ayaṃ paññābuddhi.
പഞ്ഞാവേപുല്ലായ സംവത്തന്തീതി കതമം പഞ്ഞാവേപുല്ലം? സത്തന്നം സേക്ഖാനം പുഥുജ്ജനകല്യാണകസ്സ ച പഞ്ഞാവേപുല്ലം ഗച്ഛതി. അരഹതോ പഞ്ഞാ വേപുല്ലഗതാ പഞ്ഞാവേപുല്ലായ സംവത്തന്തീതി – ഇദം പഞ്ഞാവേപുല്ലം.
Paññāvepullāya saṃvattantīti katamaṃ paññāvepullaṃ? Sattannaṃ sekkhānaṃ puthujjanakalyāṇakassa ca paññāvepullaṃ gacchati. Arahato paññā vepullagatā paññāvepullāya saṃvattantīti – idaṃ paññāvepullaṃ.
മഹാപഞ്ഞതായ സംവത്തന്തീതി കതമാ മഹാപഞ്ഞാ? മഹന്തേ അത്ഥേ പരിഗ്ഗണ്ഹാതീതി – മഹാപഞ്ഞാ. മഹന്തേ ധമ്മേ പരിഗ്ഗണ്ഹാതീതി – മഹാപഞ്ഞാ. മഹന്താ നിരുത്തിയോ പരിഗ്ഗണ്ഹാതീതി – മഹാപഞ്ഞാ. മഹന്താനി പടിഭാനാനി പരിഗ്ഗണ്ഹാതീതി – മഹാപഞ്ഞാ. മഹന്തേ സീലക്ഖന്ധേ പരിഗ്ഗണ്ഹാതീതി – മഹാപഞ്ഞാ. മഹന്തേ സമാധിക്ഖന്ധേ പരിഗ്ഗണ്ഹാതീതി – മഹാപഞ്ഞാ. മഹന്തേ പഞ്ഞാക്ഖന്ധേ പരിഗ്ഗണ്ഹാതീതി – മഹാപഞ്ഞാ. മഹന്തേ വിമുത്തിക്ഖന്ധേ പരിഗ്ഗണ്ഹാതീതി – മഹാപഞ്ഞാ . മഹന്തേ വിമുത്തിഞാണദസ്സനക്ഖന്ധേ പരിഗ്ഗണ്ഹാതീതി – മഹാപഞ്ഞാ. മഹന്താനി ഠാനാട്ഠാനാനി പരിഗ്ഗണ്ഹാതീതി – മഹാപഞ്ഞാ. മഹന്താ വിഹാരസമാപത്തിയോ പരിഗ്ഗണ്ഹാതീതി – മഹാപഞ്ഞാ. മഹന്താനി അരിയസച്ചാനി പരിഗ്ഗണ്ഹാതീതി – മഹാപഞ്ഞാ. മഹന്തേ സതിപട്ഠാനേ പരിഗ്ഗണ്ഹാതീതി – മഹാപഞ്ഞാ. മഹന്തേ സമ്മപ്പധാനേ പരിഗ്ഗണ്ഹാതീതി – മഹാപഞ്ഞാ. മഹന്തേ ഇദ്ധിപാദേ പരിഗ്ഗണ്ഹാതീതി – മഹാപഞ്ഞാ. മഹന്താനി ഇന്ദ്രിയാനി പരിഗ്ഗണ്ഹാതീതി – മഹാപഞ്ഞാ. മഹന്താനി ബലാനി പരിഗ്ഗണ്ഹാതീതി – മഹാപഞ്ഞാ. മഹന്തേ ബോജ്ഝങ്ഗേ പരിഗ്ഗണ്ഹാതീതി – മഹാപഞ്ഞാ. മഹന്തം അരിയമഗ്ഗം 3 പരിഗ്ഗണ്ഹാതീതി – മഹാപഞ്ഞാ. മഹന്താനി സാമഞ്ഞഫലാനി പരിഗ്ഗണ്ഹാതീതി – മഹാപഞ്ഞാ. മഹന്താ അഭിഞ്ഞായോ 4 പരിഗ്ഗണ്ഹാതീതി – മഹാപഞ്ഞാ. മഹന്തം പരമത്ഥം നിബ്ബാനം പരിഗ്ഗണ്ഹാതീതി – മഹാപഞ്ഞാ. മഹാപഞ്ഞതായ സംവത്തന്തീതി – അയം മഹാപഞ്ഞാ.
Mahāpaññatāya saṃvattantīti katamā mahāpaññā? Mahante atthe pariggaṇhātīti – mahāpaññā. Mahante dhamme pariggaṇhātīti – mahāpaññā. Mahantā niruttiyo pariggaṇhātīti – mahāpaññā. Mahantāni paṭibhānāni pariggaṇhātīti – mahāpaññā. Mahante sīlakkhandhe pariggaṇhātīti – mahāpaññā. Mahante samādhikkhandhe pariggaṇhātīti – mahāpaññā. Mahante paññākkhandhe pariggaṇhātīti – mahāpaññā. Mahante vimuttikkhandhe pariggaṇhātīti – mahāpaññā . Mahante vimuttiñāṇadassanakkhandhe pariggaṇhātīti – mahāpaññā. Mahantāni ṭhānāṭṭhānāni pariggaṇhātīti – mahāpaññā. Mahantā vihārasamāpattiyo pariggaṇhātīti – mahāpaññā. Mahantāni ariyasaccāni pariggaṇhātīti – mahāpaññā. Mahante satipaṭṭhāne pariggaṇhātīti – mahāpaññā. Mahante sammappadhāne pariggaṇhātīti – mahāpaññā. Mahante iddhipāde pariggaṇhātīti – mahāpaññā. Mahantāni indriyāni pariggaṇhātīti – mahāpaññā. Mahantāni balāni pariggaṇhātīti – mahāpaññā. Mahante bojjhaṅge pariggaṇhātīti – mahāpaññā. Mahantaṃ ariyamaggaṃ 5 pariggaṇhātīti – mahāpaññā. Mahantāni sāmaññaphalāni pariggaṇhātīti – mahāpaññā. Mahantā abhiññāyo 6 pariggaṇhātīti – mahāpaññā. Mahantaṃ paramatthaṃ nibbānaṃ pariggaṇhātīti – mahāpaññā. Mahāpaññatāya saṃvattantīti – ayaṃ mahāpaññā.
പുഥുപഞ്ഞതായ സംവത്തന്തീതി കതമാ പുഥുപഞ്ഞാ? പുഥുനാനാഖന്ധേസു ഞാണം പവത്തതീതി – പുഥുപഞ്ഞാ. പുഥുനാനാധാതൂസു ഞാണം പവത്തതീതി – പുഥുപഞ്ഞാ. പുഥുനാനാആയതനേസു ഞാണം പവത്തതീതി – പുഥുപഞ്ഞാ. പുഥുനാനാപടിച്ചസമുപ്പാദേസു ഞാണം പവത്തതീതി – പുഥുപഞ്ഞാ. പുഥുനാനാസുഞ്ഞതമനുപലബ്ഭേസു ഞാണം പവത്തതീതി – പുഥുപഞ്ഞാ. പുഥുനാനാഅത്ഥേസു ഞാണം പവത്തതീതി – പുഥുപഞ്ഞാ. പുഥുനാനാധമ്മേസു ഞാണം പവത്തതീതി – പുഥുപഞ്ഞാ. പുഥുനാനാനിരുത്തീസു ഞാണം പവത്തതീതി – പുഥുപഞ്ഞാ. പുഥുനാനാപടിഭാനേസു ഞാണം പവത്തതീതി – പുഥുപഞ്ഞാ. പുഥുനാനാസീലക്ഖന്ധേസു ഞാണം പവത്തതീതി – പുഥുപഞ്ഞാ. പുഥുനാനാസമാധിക്ഖന്ധേസു ഞാണം പവത്തതീതി – പുഥുപഞ്ഞാ. പുഥുനാനാപഞ്ഞാക്ഖന്ധേസു ഞാണം പവത്തതീതി – പുഥുപഞ്ഞാ. പുഥുനാനാവിമുത്തിക്ഖന്ധേസു ഞാണം പവത്തതീതി – പുഥുപഞ്ഞാ. പുഥുനാനാവിമുത്തിഞാണദസ്സനക്ഖന്ധേസു ഞാണം പവത്തതീതി – പുഥുപഞ്ഞാ. പുഥുനാനാഠാനാട്ഠാനേസു ഞാണം പവത്തതീതി – പുഥുപഞ്ഞാ. പുഥുനാനാവിഹാരസമാപത്തീസു ഞാണം പവത്തതീതി – പുഥുപഞ്ഞാ. പുഥുനാനാഅരിയസച്ചേസു ഞാണം പവത്തതീതി – പുഥുപഞ്ഞാ. പുഥുനാനാസതിപട്ഠാനേസു ഞാണം പവത്തതീതി – പുഥുപഞ്ഞാ. പുഥുനാനാസമ്മപ്പധാനേസു ഞാണം പവത്തതീതി – പുഥുപഞ്ഞാ. പുഥുനാനാഇദ്ധിപാദേസു ഞാണം പവത്തതീതി – പുഥുപഞ്ഞാ. പുഥുനാനാഇന്ദ്രിയേസു ഞാണം പവത്തതീതി – പുഥുപഞ്ഞാ. പുഥുനാനാബലേസു ഞാണം പവത്തതീതി – പുഥുപഞ്ഞാ. പുഥുനാനാബോജ്ഝങ്ഗേസു ഞാണം പവത്തതീതി – പുഥുപഞ്ഞാ. പുഥുനാനാഅരിയമഗ്ഗേസു ഞാണം പവത്തതീതി – പുഥുപഞ്ഞാ. പുഥുനാനാസാമഞ്ഞഫലേസു ഞാണം പവത്തതീതി – പുഥുപഞ്ഞാ. പുഥുനാനാഅഭിഞ്ഞാസു ഞാണം പവത്തതീതി – പുഥുപഞ്ഞാ. പുഥുജ്ജനസാധാരണേ ധമ്മേ അതിക്കമ്മ 7 പരമത്ഥേ നിബ്ബാനേ ഞാണം പവത്തതീതി – പുഥുപഞ്ഞാ. പുഥുപഞ്ഞതായ സംവത്തന്തീതി – അയം പുഥുപഞ്ഞാ.
Puthupaññatāya saṃvattantīti katamā puthupaññā? Puthunānākhandhesu ñāṇaṃ pavattatīti – puthupaññā. Puthunānādhātūsu ñāṇaṃ pavattatīti – puthupaññā. Puthunānāāyatanesu ñāṇaṃ pavattatīti – puthupaññā. Puthunānāpaṭiccasamuppādesu ñāṇaṃ pavattatīti – puthupaññā. Puthunānāsuññatamanupalabbhesu ñāṇaṃ pavattatīti – puthupaññā. Puthunānāatthesu ñāṇaṃ pavattatīti – puthupaññā. Puthunānādhammesu ñāṇaṃ pavattatīti – puthupaññā. Puthunānāniruttīsu ñāṇaṃ pavattatīti – puthupaññā. Puthunānāpaṭibhānesu ñāṇaṃ pavattatīti – puthupaññā. Puthunānāsīlakkhandhesu ñāṇaṃ pavattatīti – puthupaññā. Puthunānāsamādhikkhandhesu ñāṇaṃ pavattatīti – puthupaññā. Puthunānāpaññākkhandhesu ñāṇaṃ pavattatīti – puthupaññā. Puthunānāvimuttikkhandhesu ñāṇaṃ pavattatīti – puthupaññā. Puthunānāvimuttiñāṇadassanakkhandhesu ñāṇaṃ pavattatīti – puthupaññā. Puthunānāṭhānāṭṭhānesu ñāṇaṃ pavattatīti – puthupaññā. Puthunānāvihārasamāpattīsu ñāṇaṃ pavattatīti – puthupaññā. Puthunānāariyasaccesu ñāṇaṃ pavattatīti – puthupaññā. Puthunānāsatipaṭṭhānesu ñāṇaṃ pavattatīti – puthupaññā. Puthunānāsammappadhānesu ñāṇaṃ pavattatīti – puthupaññā. Puthunānāiddhipādesu ñāṇaṃ pavattatīti – puthupaññā. Puthunānāindriyesu ñāṇaṃ pavattatīti – puthupaññā. Puthunānābalesu ñāṇaṃ pavattatīti – puthupaññā. Puthunānābojjhaṅgesu ñāṇaṃ pavattatīti – puthupaññā. Puthunānāariyamaggesu ñāṇaṃ pavattatīti – puthupaññā. Puthunānāsāmaññaphalesu ñāṇaṃ pavattatīti – puthupaññā. Puthunānāabhiññāsu ñāṇaṃ pavattatīti – puthupaññā. Puthujjanasādhāraṇe dhamme atikkamma 8 paramatthe nibbāne ñāṇaṃ pavattatīti – puthupaññā. Puthupaññatāya saṃvattantīti – ayaṃ puthupaññā.
വിപുലപഞ്ഞതായ സംവത്തന്തീതി കതമാ വിപുലപഞ്ഞാ? വിപുലേ അത്ഥേ പരിഗ്ഗണ്ഹാതീതി – വിപുലപഞ്ഞാ. വിപുലേ ധമ്മേ പരിഗ്ഗണ്ഹാതീതി – വിപുലപഞ്ഞാ. വിപുലാ നിരുത്തിയോ പരിഗ്ഗണ്ഹാതീതി – വിപുലപഞ്ഞാ. വിപുലാനി പടിഭാനാനി പരിഗ്ഗണ്ഹാതീതി – വിപുലപഞ്ഞാ. വിപുലേ സീലക്ഖന്ധേ പരിഗ്ഗണ്ഹാതീതി – വിപുലപഞ്ഞാ. വിപുലേ സമാധിക്ഖന്ധേ പരിഗ്ഗണ്ഹാതീതി – വിപുലപഞ്ഞാ. വിപുലേ പഞ്ഞാക്ഖന്ധേ പരിഗ്ഗണ്ഹാതീതി – വിപുലപഞ്ഞാ. വിപുലേ വിമുത്തിക്ഖന്ധേ പരിഗ്ഗണ്ഹാതീതി – വിപുലപഞ്ഞാ. വിപുലേ വിമുത്തിഞാണദസ്സനക്ഖന്ധേ പരിഗ്ഗണ്ഹാതീതി – വിപുലപഞ്ഞാ. വിപുലാനി ഠാനാട്ഠാനാനി പരിഗ്ഗണ്ഹാതീതി – വിപുലപഞ്ഞാ. വിപുലാ വിഹാരസമാപത്തിയോ പരിഗ്ഗണ്ഹാതീതി – വിപുലപഞ്ഞാ. വിപുലാനി അരിയസച്ചാനി പരിഗ്ഗണ്ഹാതീതി – വിപുലപഞ്ഞാ. വിപുലേ സതിപട്ഠാനേ പരിഗ്ഗണ്ഹാതീതി – വിപുലപഞ്ഞാ. വിപുലേ സമ്മപ്പധാനേ പരിഗ്ഗണ്ഹാതീതി – വിപുലപഞ്ഞാ. വിപുലേ ഇദ്ധിപാദേ പരിഗ്ഗണ്ഹാതീതി – വിപുലപഞ്ഞാ. വിപുലാനി ഇന്ദ്രിയാനി പരിഗ്ഗണ്ഹാതീതി – വിപുലപഞ്ഞാ. വിപുലാനി ബലാനി പരിഗ്ഗണ്ഹാതീതി – വിപുലപഞ്ഞാ. വിപുലേ ബോജ്ഝങ്ഗേ പരിഗ്ഗണ്ഹാതീതി – വിപുലപഞ്ഞാ. വിപുലേ അരിയമഗ്ഗേ പരിഗ്ഗണ്ഹാതീതി – വിപുലപഞ്ഞാ. വിപുലാനി സാമഞ്ഞഫലാനി പരിഗ്ഗണ്ഹാതീതി – വിപുലപഞ്ഞാ. വിപുലാ അഭിഞ്ഞായോ പരിഗ്ഗണ്ഹാതീതി – വിപുലപഞ്ഞാ. വിപുലം പരമത്ഥം നിബ്ബാനം പരിഗ്ഗണ്ഹാതീതി – വിപുലപഞ്ഞാ. വിപുലപഞ്ഞതായ സംവത്തന്തീതി – അയം വിപുലപഞ്ഞാ.
Vipulapaññatāyasaṃvattantīti katamā vipulapaññā? Vipule atthe pariggaṇhātīti – vipulapaññā. Vipule dhamme pariggaṇhātīti – vipulapaññā. Vipulā niruttiyo pariggaṇhātīti – vipulapaññā. Vipulāni paṭibhānāni pariggaṇhātīti – vipulapaññā. Vipule sīlakkhandhe pariggaṇhātīti – vipulapaññā. Vipule samādhikkhandhe pariggaṇhātīti – vipulapaññā. Vipule paññākkhandhe pariggaṇhātīti – vipulapaññā. Vipule vimuttikkhandhe pariggaṇhātīti – vipulapaññā. Vipule vimuttiñāṇadassanakkhandhe pariggaṇhātīti – vipulapaññā. Vipulāni ṭhānāṭṭhānāni pariggaṇhātīti – vipulapaññā. Vipulā vihārasamāpattiyo pariggaṇhātīti – vipulapaññā. Vipulāni ariyasaccāni pariggaṇhātīti – vipulapaññā. Vipule satipaṭṭhāne pariggaṇhātīti – vipulapaññā. Vipule sammappadhāne pariggaṇhātīti – vipulapaññā. Vipule iddhipāde pariggaṇhātīti – vipulapaññā. Vipulāni indriyāni pariggaṇhātīti – vipulapaññā. Vipulāni balāni pariggaṇhātīti – vipulapaññā. Vipule bojjhaṅge pariggaṇhātīti – vipulapaññā. Vipule ariyamagge pariggaṇhātīti – vipulapaññā. Vipulāni sāmaññaphalāni pariggaṇhātīti – vipulapaññā. Vipulā abhiññāyo pariggaṇhātīti – vipulapaññā. Vipulaṃ paramatthaṃ nibbānaṃ pariggaṇhātīti – vipulapaññā. Vipulapaññatāya saṃvattantīti – ayaṃ vipulapaññā.
ഗമ്ഭീരപഞ്ഞതായ സംവത്തന്തീതി കതമാ ഗമ്ഭീരപഞ്ഞാ? ഗമ്ഭീരേസു ഖന്ധേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരാസു ധാതൂസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു ആയതനേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു പടിച്ചസമുപ്പാദേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു സുഞ്ഞതമനുപലബ്ഭേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു അത്ഥേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു ധമ്മേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരാസു നിരുത്തീസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു പടിഭാനേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു സീലക്ഖന്ധേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു സമാധിക്ഖന്ധേസു ഞാണം പവത്തതീതി – ഗമ്ഭീരപഞ്ഞാ . ഗമ്ഭീരേസു പഞ്ഞാക്ഖന്ധേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു വിമുത്തിക്ഖന്ധേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു വിമുത്തിഞാണദസ്സനക്ഖന്ധേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു ഠാനാട്ഠാനേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരാസു വിഹാരസമാപത്തീസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു അരിയസച്ചേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു സതിപട്ഠാനേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു സമ്മപ്പധാനേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു ഇദ്ധിപാദേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു ഇന്ദ്രിയേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു ബലേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു ബോജ്ഝങ്ഗേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു അരിയമഗ്ഗേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേസു സാമഞ്ഞഫലേസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരാസു അഭിഞ്ഞാസു ഞാണം പവത്തതീതി – ഗമ്ഭീരപഞ്ഞാ. ഗമ്ഭീരേ പരമത്ഥേ നിബ്ബാനേ ഞാണം പവത്തതീതി – ഗമ്ഭീരപഞ്ഞാ. ഗമ്ഭീരപഞ്ഞതായ സംവത്തന്തീതി – അയം ഗമ്ഭീരപഞ്ഞാ.
Gambhīrapaññatāya saṃvattantīti katamā gambhīrapaññā? Gambhīresu khandhesu ñāṇaṃ pavattatīti – gambhīrapaññā. Gambhīrāsu dhātūsu ñāṇaṃ pavattatīti – gambhīrapaññā. Gambhīresu āyatanesu ñāṇaṃ pavattatīti – gambhīrapaññā. Gambhīresu paṭiccasamuppādesu ñāṇaṃ pavattatīti – gambhīrapaññā. Gambhīresu suññatamanupalabbhesu ñāṇaṃ pavattatīti – gambhīrapaññā. Gambhīresu atthesu ñāṇaṃ pavattatīti – gambhīrapaññā. Gambhīresu dhammesu ñāṇaṃ pavattatīti – gambhīrapaññā. Gambhīrāsu niruttīsu ñāṇaṃ pavattatīti – gambhīrapaññā. Gambhīresu paṭibhānesu ñāṇaṃ pavattatīti – gambhīrapaññā. Gambhīresu sīlakkhandhesu ñāṇaṃ pavattatīti – gambhīrapaññā. Gambhīresu samādhikkhandhesu ñāṇaṃ pavattatīti – gambhīrapaññā . Gambhīresu paññākkhandhesu ñāṇaṃ pavattatīti – gambhīrapaññā. Gambhīresu vimuttikkhandhesu ñāṇaṃ pavattatīti – gambhīrapaññā. Gambhīresu vimuttiñāṇadassanakkhandhesu ñāṇaṃ pavattatīti – gambhīrapaññā. Gambhīresu ṭhānāṭṭhānesu ñāṇaṃ pavattatīti – gambhīrapaññā. Gambhīrāsu vihārasamāpattīsu ñāṇaṃ pavattatīti – gambhīrapaññā. Gambhīresu ariyasaccesu ñāṇaṃ pavattatīti – gambhīrapaññā. Gambhīresu satipaṭṭhānesu ñāṇaṃ pavattatīti – gambhīrapaññā. Gambhīresu sammappadhānesu ñāṇaṃ pavattatīti – gambhīrapaññā. Gambhīresu iddhipādesu ñāṇaṃ pavattatīti – gambhīrapaññā. Gambhīresu indriyesu ñāṇaṃ pavattatīti – gambhīrapaññā. Gambhīresu balesu ñāṇaṃ pavattatīti – gambhīrapaññā. Gambhīresu bojjhaṅgesu ñāṇaṃ pavattatīti – gambhīrapaññā. Gambhīresu ariyamaggesu ñāṇaṃ pavattatīti – gambhīrapaññā. Gambhīresu sāmaññaphalesu ñāṇaṃ pavattatīti – gambhīrapaññā. Gambhīrāsu abhiññāsu ñāṇaṃ pavattatīti – gambhīrapaññā. Gambhīre paramatthe nibbāne ñāṇaṃ pavattatīti – gambhīrapaññā. Gambhīrapaññatāya saṃvattantīti – ayaṃ gambhīrapaññā.
അസാമന്തപഞ്ഞതായ സംവത്തന്തീതി കതമാ അസാമന്തപഞ്ഞാ? യസ്സ പുഗ്ഗലസ്സ അത്ഥവവത്ഥാനതോ അത്ഥപടിസമ്ഭിദാ അധിഗതാ ഹോതി സച്ഛികതാ ഫസ്സിതാ പഞ്ഞായ, ധമ്മവവത്ഥാനതോ ധമ്മപടിസമ്ഭിദാ അധിഗതാ ഹോതി സച്ഛികതാ ഫസ്സിതാ പഞ്ഞായ, നിരുത്തിവവത്ഥാനതോ നിരുത്തിപടിസമ്ഭിദാ അധിഗതാ ഹോതി സച്ഛികതാ ഫസ്സിതാ പഞ്ഞായ, പടിഭാനവവത്ഥാനതോ പടിഭാനപടിസമ്ഭിദാ അധിഗതാ ഹോതി സച്ഛികതാ ഫസ്സിതാ പഞ്ഞായ, തസ്സ അത്ഥേ ച ധമ്മേ ച നിരുത്തിയാ ച പടിഭാനേ ച ന അഞ്ഞോ കോചി സക്കോതി അഭിസമ്ഭവിതും. അനഭിസമ്ഭവനീയോ ച സോ അഞ്ഞേഹീതി – അസാമന്തപഞ്ഞോ.
Asāmantapaññatāya saṃvattantīti katamā asāmantapaññā? Yassa puggalassa atthavavatthānato atthapaṭisambhidā adhigatā hoti sacchikatā phassitā paññāya, dhammavavatthānato dhammapaṭisambhidā adhigatā hoti sacchikatā phassitā paññāya, niruttivavatthānato niruttipaṭisambhidā adhigatā hoti sacchikatā phassitā paññāya, paṭibhānavavatthānato paṭibhānapaṭisambhidā adhigatā hoti sacchikatā phassitā paññāya, tassa atthe ca dhamme ca niruttiyā ca paṭibhāne ca na añño koci sakkoti abhisambhavituṃ. Anabhisambhavanīyo ca so aññehīti – asāmantapañño.
പുഥുജ്ജനകല്യാണകസ്സ പഞ്ഞാ അട്ഠമകസ്സ പഞ്ഞായ ദൂരേ വിദൂരേ സുവിദൂരേ ന സന്തികേ ന സാമന്താ. പുഥുജ്ജനകല്യാണകം ഉപാദായ അട്ഠമകോ അസാമന്തപഞ്ഞോ. അട്ഠമകസ്സ പഞ്ഞാ സോതാപന്നസ്സ പഞ്ഞായ ദൂരേ വിദൂരേ സുവിദൂരേ ന സന്തികേ ന സാമന്താ. അട്ഠമകം ഉപാദായ സോതാപന്നോ അസാമന്തപഞ്ഞോ. സോതാപന്നസ്സ പഞ്ഞാ സകദാഗാമിസ്സ പഞ്ഞായ ദൂരേ വിദൂരേ സുവിദൂരേ ന സന്തികേ ന സാമന്താ. സോതാപന്നം ഉപാദായ സകദാഗാമി അസാമന്തപഞ്ഞോ. സകദാഗാമിസ്സ പഞ്ഞാ അനാഗാമിസ്സ പഞ്ഞായ ദൂരേ വിദൂരേ സുവിദൂരേ ന സന്തികേ ന സാമന്താ. സകദാഗാമിം ഉപാദായ അനാഗാമീ അസാമന്തപഞ്ഞോ. അനാഗാമിസ്സ പഞ്ഞാ അരഹതോ പഞ്ഞായ ദൂരേ വിദൂരേ സുവിദൂരേ ന സന്തികേ ന സാമന്താ. അനാഗാമിം ഉപാദായ അരഹാ അസാമന്തപഞ്ഞോ. അരഹതോ പഞ്ഞാ പച്ചേകസമ്ബുദ്ധസ്സ 9 പഞ്ഞായ ദൂരേ വിദൂരേ സുവിദൂരേ ന സന്തികേ ന സാമന്താ. അരഹന്തം ഉപാദായ പച്ചേകബുദ്ധോ അസാമന്തപഞ്ഞോ. പച്ചേകബുദ്ധഞ്ച സദേവകഞ്ച ലോകം ഉപാദായ തഥാഗതോ അരഹം സമ്മാസമ്ബുദ്ധോ അഗ്ഗോ അസാമന്തപഞ്ഞോ.
Puthujjanakalyāṇakassa paññā aṭṭhamakassa paññāya dūre vidūre suvidūre na santike na sāmantā. Puthujjanakalyāṇakaṃ upādāya aṭṭhamako asāmantapañño. Aṭṭhamakassa paññā sotāpannassa paññāya dūre vidūre suvidūre na santike na sāmantā. Aṭṭhamakaṃ upādāya sotāpanno asāmantapañño. Sotāpannassa paññā sakadāgāmissa paññāya dūre vidūre suvidūre na santike na sāmantā. Sotāpannaṃ upādāya sakadāgāmi asāmantapañño. Sakadāgāmissa paññā anāgāmissa paññāya dūre vidūre suvidūre na santike na sāmantā. Sakadāgāmiṃ upādāya anāgāmī asāmantapañño. Anāgāmissa paññā arahato paññāya dūre vidūre suvidūre na santike na sāmantā. Anāgāmiṃ upādāya arahā asāmantapañño. Arahato paññā paccekasambuddhassa 10 paññāya dūre vidūre suvidūre na santike na sāmantā. Arahantaṃ upādāya paccekabuddho asāmantapañño. Paccekabuddhañca sadevakañca lokaṃ upādāya tathāgato arahaṃ sammāsambuddho aggo asāmantapañño.
൫. പഞ്ഞാപഭേദകുസലോ പഭിന്നഞാണോ അധിഗതപ്പടിസമ്ഭിദോ ചതുവേസാരജ്ജപ്പത്തോ ദസബലധാരീ പുരിസാസഭോ പുരിസസീഹോ പുരിസനാഗോ പുരിസാജഞ്ഞോ പുരിസധോരയ്ഹോ അനന്തഞാണോ അനന്തതേജോ അനന്തയസോ അഡ്ഢോ മഹദ്ധനോ ധനവാ നേതാ വിനേതാ അനുനേതാ പഞ്ഞാപേതാ നിജ്ഝാപേതാ പേക്ഖേതാ പസാദേതാ. സോ ഹി ഭഗവാ അനുപ്പന്നസ്സ മഗ്ഗസ്സ ഉപ്പാദേതാ, അസഞ്ജാതസ്സ മഗ്ഗസ്സ സഞ്ജനേതാ 11, അനക്ഖാതസ്സ മഗ്ഗസ്സ അക്ഖാതാ, മഗ്ഗഞ്ഞൂ മഗ്ഗവിദൂ മഗ്ഗകോവിദോ മഗ്ഗാനുഗാമീ 12 ച പനസ്സ ഏതരഹി സാവകാ വിഹരന്തി പച്ഛാ സമന്നാഗതാ.
5. Paññāpabhedakusalo pabhinnañāṇo adhigatappaṭisambhido catuvesārajjappatto dasabaladhārī purisāsabho purisasīho purisanāgo purisājañño purisadhorayho anantañāṇo anantatejo anantayaso aḍḍho mahaddhano dhanavā netā vinetā anunetā paññāpetā nijjhāpetā pekkhetā pasādetā. So hi bhagavā anuppannassa maggassa uppādetā, asañjātassa maggassa sañjanetā 13, anakkhātassa maggassa akkhātā, maggaññū maggavidū maggakovido maggānugāmī 14 ca panassa etarahi sāvakā viharanti pacchā samannāgatā.
സോ ഹി ഭഗവാ ജാനം ജാനാതി, പസ്സം പസ്സതി, ചക്ഖുഭൂതോ ഞാണഭൂതോ ധമ്മഭൂതോ ബ്രഹ്മഭൂതോ വത്താ പവത്താ അത്ഥസ്സ നിന്നേതാ അമതസ്സ ദാതാ ധമ്മസ്സാമീ തഥാഗതോ. നത്ഥി തസ്സ ഭഗവതോ അഞ്ഞാതം അദിട്ഠം അവിദിതം അസച്ഛികതം അഫസ്സിതം പഞ്ഞായ. അതീതം അനാഗതം പച്ചുപ്പന്നം 15 ഉപാദായ സബ്ബേ ധമ്മാ സബ്ബാകാരേന ബുദ്ധസ്സ ഭഗവതോ ഞാണമുഖേ ആപാഥം ആഗച്ഛന്തി. യം കിഞ്ചി നേയ്യം നാമ അത്ഥി തം സബ്ബം ജാനിതബ്ബം 16. അത്തത്ഥോ വാ പരത്ഥോ വാ ഉഭയത്ഥോ വാ ദിട്ഠധമ്മികോ വാ അത്ഥോ സമ്പരായികോ വാ അത്ഥോ ഉത്താനോ വാ അത്ഥോ ഗമ്ഭീരോ വാ അത്ഥോ ഗൂള്ഹോ വാ അത്ഥോ പടിച്ഛന്നോ വാ അത്ഥോ നേയ്യോ വാ അത്ഥോ നീതോ വാ അത്ഥോ അനവജ്ജോ വാ അത്ഥോ നിക്കിലേസോ വാ അത്ഥോ വോദാനോ വാ അത്ഥോ പരമത്ഥോ വാ അത്ഥോ, സബ്ബം തം അന്തോബുദ്ധഞാണേ പരിവത്തതി.
So hi bhagavā jānaṃ jānāti, passaṃ passati, cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato. Natthi tassa bhagavato aññātaṃ adiṭṭhaṃ aviditaṃ asacchikataṃ aphassitaṃ paññāya. Atītaṃ anāgataṃ paccuppannaṃ 17 upādāya sabbe dhammā sabbākārena buddhassa bhagavato ñāṇamukhe āpāthaṃ āgacchanti. Yaṃ kiñci neyyaṃ nāma atthi taṃ sabbaṃ jānitabbaṃ 18. Attattho vā parattho vā ubhayattho vā diṭṭhadhammiko vā attho samparāyiko vā attho uttāno vā attho gambhīro vā attho gūḷho vā attho paṭicchanno vā attho neyyo vā attho nīto vā attho anavajjo vā attho nikkileso vā attho vodāno vā attho paramattho vā attho, sabbaṃ taṃ antobuddhañāṇe parivattati.
സബ്ബം കായകമ്മം ബുദ്ധസ്സ ഭഗവതോ ഞാണാനുപരിവത്തി . സബ്ബം വചീകമ്മം ബുദ്ധസ്സ ഭഗവതോ ഞാണാനുപരിവത്തി. സബ്ബം മനോകമ്മം ബുദ്ധസ്സ ഭഗവതോ ഞാണാനുപരിവത്തി. അതീതേ ബുദ്ധസ്സ ഭഗവതോ അപ്പടിഹതം ഞാണം. അനാഗതേ ബുദ്ധസ്സ ഭഗവതോ അപ്പടിഹതം ഞാണം. പച്ചുപ്പന്നേ ബുദ്ധസ്സ ഭഗവതോ അപ്പടിഹതം ഞാണം. യാവതകം നേയ്യം താവതകം ഞാണം, യാവതകം ഞാണം താവതകം നേയ്യം. നേയ്യപരിയന്തികം ഞാണം, ഞാണപരിയന്തികം നേയ്യം. നേയ്യം അതിക്കമിത്വാ ഞാണം നപ്പവത്തതി. ഞാണം അതിക്കമിത്വാ നേയ്യപഥോ നത്ഥി. അഞ്ഞമഞ്ഞപരിയന്തട്ഠായിനോ തേ ധമ്മാ. യഥാ ദ്വിന്നം സമുഗ്ഗപടലാനം സമ്മാ ഫുസിതാനം 19 ഹേട്ഠിമം സമുഗ്ഗപടലം ഉപരിമം നാതിവത്തതി, ഉപരിമം സമുഗ്ഗപടലം ഹേട്ഠിമം നാതിവത്തതി, അഞ്ഞമഞ്ഞപരിയന്തട്ഠായിനോ; ഏവമേവ ബുദ്ധസ്സ ഭഗവതോ നേയ്യഞ്ച ഞാണഞ്ച അഞ്ഞമഞ്ഞപരിയന്തട്ഠായിനോ. യാവതകം നേയ്യം താവതകം ഞാണം, യാവതകം ഞാണം താവതകം നേയ്യം. നേയ്യപരിയന്തികം ഞാണം, ഞാണപരിയന്തികം നേയ്യം. നേയ്യം അതിക്കമിത്വാ ഞാണം നപ്പവത്തതി. ഞാണം അതിക്കമിത്വാ നേയ്യപഥോ നത്ഥി. അഞ്ഞമഞ്ഞപരിയന്തട്ഠായിനോ തേ ധമ്മാ. സബ്ബധമ്മേസു ബുദ്ധസ്സ ഭഗവതോ ഞാണം പവത്തതി.
Sabbaṃ kāyakammaṃ buddhassa bhagavato ñāṇānuparivatti . Sabbaṃ vacīkammaṃ buddhassa bhagavato ñāṇānuparivatti. Sabbaṃ manokammaṃ buddhassa bhagavato ñāṇānuparivatti. Atīte buddhassa bhagavato appaṭihataṃ ñāṇaṃ. Anāgate buddhassa bhagavato appaṭihataṃ ñāṇaṃ. Paccuppanne buddhassa bhagavato appaṭihataṃ ñāṇaṃ. Yāvatakaṃ neyyaṃ tāvatakaṃ ñāṇaṃ, yāvatakaṃ ñāṇaṃ tāvatakaṃ neyyaṃ. Neyyapariyantikaṃ ñāṇaṃ, ñāṇapariyantikaṃ neyyaṃ. Neyyaṃ atikkamitvā ñāṇaṃ nappavattati. Ñāṇaṃ atikkamitvā neyyapatho natthi. Aññamaññapariyantaṭṭhāyino te dhammā. Yathā dvinnaṃ samuggapaṭalānaṃ sammā phusitānaṃ 20 heṭṭhimaṃ samuggapaṭalaṃ uparimaṃ nātivattati, uparimaṃ samuggapaṭalaṃ heṭṭhimaṃ nātivattati, aññamaññapariyantaṭṭhāyino; evameva buddhassa bhagavato neyyañca ñāṇañca aññamaññapariyantaṭṭhāyino. Yāvatakaṃ neyyaṃ tāvatakaṃ ñāṇaṃ, yāvatakaṃ ñāṇaṃ tāvatakaṃ neyyaṃ. Neyyapariyantikaṃ ñāṇaṃ, ñāṇapariyantikaṃ neyyaṃ. Neyyaṃ atikkamitvā ñāṇaṃ nappavattati. Ñāṇaṃ atikkamitvā neyyapatho natthi. Aññamaññapariyantaṭṭhāyino te dhammā. Sabbadhammesu buddhassa bhagavato ñāṇaṃ pavattati.
സബ്ബേ ധമ്മാ ബുദ്ധസ്സ ഭഗവതോ ആവജ്ജനപ്പടിബദ്ധാ ആകങ്ഖപ്പടിബദ്ധാ മനസികാരപ്പടിബദ്ധാ ചിത്തുപ്പാദപ്പടിബദ്ധാ. സബ്ബസത്തേസു ബുദ്ധസ്സ ഭഗവതോ ഞാണം പവത്തതി. സബ്ബേസം സത്താനം ബുദ്ധോ ആസയം ജാനാതി, അനുസയം ജാനാതി, ചരിതം 21 ജാനാതി, അധിമുത്തിം ജാനാതി . അപ്പരജക്ഖേ മഹാരജക്ഖേ തിക്ഖിന്ദ്രിയേ മുദിന്ദ്രിയേ സ്വാകാരേ ദ്വാകാരേ സുവിഞ്ഞാപയേ ദുവിഞ്ഞാപയേ ഭബ്ബാഭബ്ബേ സത്തേ പജാനാതി. സദേവകോ ലോകോ സമാരകോ സബ്രഹ്മകോ സസ്സമണബ്രാഹ്മണീ പജാ സദേവമനുസ്സാ അന്തോബുദ്ധഞാണേ പരിവത്തതി.
Sabbe dhammā buddhassa bhagavato āvajjanappaṭibaddhā ākaṅkhappaṭibaddhā manasikārappaṭibaddhā cittuppādappaṭibaddhā. Sabbasattesu buddhassa bhagavato ñāṇaṃ pavattati. Sabbesaṃ sattānaṃ buddho āsayaṃ jānāti, anusayaṃ jānāti, caritaṃ 22 jānāti, adhimuttiṃ jānāti . Apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye bhabbābhabbe satte pajānāti. Sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati.
യഥാ യേ കേചി മച്ഛകച്ഛപാ, അന്തമസോ തിമിതിമിങ്ഗലം ഉപാദായ, അന്തോമഹാസമുദ്ദേ പരിവത്തന്തി, ഏവമേവം സദേവകോ ലോകോ സമാരകോ സബ്രഹ്മകോ സസ്സമണബ്രാഹ്മണീ പജാ സദേവമനുസ്സാ അന്തോബുദ്ധഞാണേ പരിവത്തതി. യഥാ യേ കേചി പക്ഖിനോ, അന്തമസോ ഗരുളം വേനതേയ്യം ഉപാദായ, ആകാസസ്സ പദേസേ പരിവത്തന്തി; ഏവമേവ യേപി തേ സാരിപുത്തസമാ പഞ്ഞായ തേപി ബുദ്ധഞാണസ്സ പദേസേ പരിവത്തന്തി. ബുദ്ധഞാണം ദേവമനുസ്സാനം പഞ്ഞം ഫരിത്വാ അതിഘംസിത്വാ തിട്ഠതി. യേപി തേ ഖത്തിയപണ്ഡിതാ ബ്രാഹ്മണപണ്ഡിതാ ഗഹപതിപണ്ഡിതാ സമണപണ്ഡിതാ നിപുണാ കതപരപ്പവാദാ വാലവേധിരൂപാ വോഭിന്ദന്താ 23 മഞ്ഞേ ചരന്തി പഞ്ഞാഗതേന ദിട്ഠിഗതാനി, തേ പഞ്ഹം അഭിസങ്ഖരിത്വാ അഭിസങ്ഖരിത്വാ തഥാഗതം ഉപസങ്കമിത്വാ പുച്ഛന്തി ഗൂള്ഹാനി ച പടിച്ഛന്നാനി ച, കഥിതാ വിസജ്ജിതാ ച തേ പഞ്ഹാ ഭഗവതാ ഹോന്തി നിദ്ദിട്ഠകാരണാ 24. ഉപക്ഖിത്തകാ ച തേ ഭഗവതോ സമ്പജ്ജന്തി. അഥ ഖോ ഭഗവാ തത്ഥ അതിരോചതി യദിദം പഞ്ഞായാതി. അഗ്ഗോ അസാമന്തപഞ്ഞോ, അസാമന്തപഞ്ഞതായ സംവത്തന്തീതി – അയം അസാമന്തപഞ്ഞാ.
Yathā ye keci macchakacchapā, antamaso timitimiṅgalaṃ upādāya, antomahāsamudde parivattanti, evamevaṃ sadevako loko samārako sabrahmako sassamaṇabrāhmaṇī pajā sadevamanussā antobuddhañāṇe parivattati. Yathā ye keci pakkhino, antamaso garuḷaṃ venateyyaṃ upādāya, ākāsassa padese parivattanti; evameva yepi te sāriputtasamā paññāya tepi buddhañāṇassa padese parivattanti. Buddhañāṇaṃ devamanussānaṃ paññaṃ pharitvā atighaṃsitvā tiṭṭhati. Yepi te khattiyapaṇḍitā brāhmaṇapaṇḍitā gahapatipaṇḍitā samaṇapaṇḍitā nipuṇā kataparappavādā vālavedhirūpā vobhindantā 25 maññe caranti paññāgatena diṭṭhigatāni, te pañhaṃ abhisaṅkharitvā abhisaṅkharitvā tathāgataṃ upasaṅkamitvā pucchanti gūḷhāni ca paṭicchannāni ca, kathitā visajjitā ca te pañhā bhagavatā honti niddiṭṭhakāraṇā 26. Upakkhittakā ca te bhagavato sampajjanti. Atha kho bhagavā tattha atirocati yadidaṃ paññāyāti. Aggo asāmantapañño, asāmantapaññatāya saṃvattantīti – ayaṃ asāmantapaññā.
൬. ഭൂരിപഞ്ഞതായ സംവത്തന്തീതി കതമാ ഭൂരിപഞ്ഞാ? രാഗം അഭിഭുയ്യതീതി – ഭൂരിപഞ്ഞാ. അഭിഭവിതാതി – ഭൂരിപഞ്ഞാ. ദോസം അഭിഭുയ്യതീതി – ഭൂരിപഞ്ഞാ. അഭിഭവിതാതി – ഭൂരിപഞ്ഞാ. മോഹം അഭിഭുയ്യതീതി – ഭൂരിപഞ്ഞാ. അഭിഭവിതാതി – ഭൂരിപഞ്ഞാ. കോധം…പേ॰… ഉപനാഹം … മക്ഖം… പളാസം… ഇസ്സം… മച്ഛരിയം… മായം… സാഠേയ്യം… ഥമ്ഭം… സാരമ്ഭം… മാനം… അതിമാനം… മദം… പമാദം… സബ്ബേ കിലേസേ… സബ്ബേ ദുച്ചരിതേ… സബ്ബേ അഭിസങ്ഖാരേ…പേ॰… സബ്ബേ ഭവഗാമികമ്മേ അഭിഭുയ്യതീതി – ഭൂരിപഞ്ഞാ. അഭിഭവിതാതി – ഭൂരിപഞ്ഞാ. രാഗോ അരി. തം അരിം മദ്ദനിപഞ്ഞാതി – ഭൂരിപഞ്ഞാ. ദോസോ അരി. തം അരിം മദ്ദനിപഞ്ഞാതി – ഭൂരിപഞ്ഞാ. മോഹോ അരി. തം അരിം മദ്ദനിപഞ്ഞാതി – ഭൂരിപഞ്ഞാ. കോധോ…പേ॰… ഉപനാഹോ… മക്ഖോ… പളാസോ… ഇസ്സാ… മച്ഛരിയം… മായാ… സാഠേയ്യം… ഥമ്ഭോ… സാരമ്ഭോ… മാനോ… അതിമാനോ… മദോ… പമാദോ… സബ്ബേ കിലേസാ… സബ്ബേ ദുച്ചരിതാ… സബ്ബേ അഭിസങ്ഖാരാ…പേ॰… സബ്ബേ ഭവഗാമികമ്മാ അരി. തം അരിം മദ്ദനിപഞ്ഞാതി – ഭൂരിപഞ്ഞാ. ഭൂരി വുച്ചതി പഥവീ 27. തായ പഥവിസമായ വിത്ഥതായ വിപുലായ പഞ്ഞായ സമന്നാഗതോതി – ഭൂരിപഞ്ഞാ. അപി ച, പഞ്ഞായ മേതം അധിവചനം. ഭൂരി മേധാ പരിണായികാതി – ഭൂരിപഞ്ഞാ. ഭൂരിപഞ്ഞതായ സംവത്തന്തീതി – അയം ഭൂരിപഞ്ഞാ.
6.Bhūripaññatāyasaṃvattantīti katamā bhūripaññā? Rāgaṃ abhibhuyyatīti – bhūripaññā. Abhibhavitāti – bhūripaññā. Dosaṃ abhibhuyyatīti – bhūripaññā. Abhibhavitāti – bhūripaññā. Mohaṃ abhibhuyyatīti – bhūripaññā. Abhibhavitāti – bhūripaññā. Kodhaṃ…pe… upanāhaṃ … makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ… mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe abhisaṅkhāre…pe… sabbe bhavagāmikamme abhibhuyyatīti – bhūripaññā. Abhibhavitāti – bhūripaññā. Rāgo ari. Taṃ ariṃ maddanipaññāti – bhūripaññā. Doso ari. Taṃ ariṃ maddanipaññāti – bhūripaññā. Moho ari. Taṃ ariṃ maddanipaññāti – bhūripaññā. Kodho…pe… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe abhisaṅkhārā…pe… sabbe bhavagāmikammā ari. Taṃ ariṃ maddanipaññāti – bhūripaññā. Bhūri vuccati pathavī 28. Tāya pathavisamāya vitthatāya vipulāya paññāya samannāgatoti – bhūripaññā. Api ca, paññāya metaṃ adhivacanaṃ. Bhūri medhā pariṇāyikāti – bhūripaññā. Bhūripaññatāya saṃvattantīti – ayaṃ bhūripaññā.
പഞ്ഞാബാഹുല്ലായ സംവത്തന്തീതി കതമം പഞ്ഞാബാഹുല്ലം? ഇധേകച്ചോ പഞ്ഞാഗരുകോ ഹോതി പഞ്ഞാചരിതോ പഞ്ഞാസയോ പഞ്ഞാധിമുത്തോ പഞ്ഞാധജോ പഞ്ഞാകേതു പഞ്ഞാധിപതേയ്യോ വിചയബഹുലോ പവിചയബഹുലോ ഓക്ഖായനബഹുലോ സമോക്ഖായനബഹുലോ 29 സമ്പേക്ഖായനധമ്മോ വിഭൂതവിഹാരീ തച്ചരിതോ തഗ്ഗരുകോ തബ്ബഹുലോ തന്നിന്നോ തപ്പോണോ തപ്പബ്ഭാരോ തദധിമുത്തോ തദധിപതേയ്യോ. യഥാ ഗണഗരുകോ വുച്ചതി ‘‘ഗണബാഹുലികോ’’തി, ചീവരഗരുകോ വുച്ചതി ‘‘ചീവരബാഹുലികോ’’തി, പത്തഗരുകോ വുച്ചതി ‘‘പത്തബാഹുലികോ’’തി, സേനാസനഗരുകോ വുച്ചതി ‘‘സേനാസനബാഹുലികോ’’തി; ഏവമേവം ഇധേകച്ചോ പഞ്ഞാ ഗരുകോ ഹോതി പഞ്ഞാചരിതോ പഞ്ഞാസയോ പഞ്ഞാധിമുത്തോ പഞ്ഞാധജോ പഞ്ഞാകേതു പഞ്ഞാധിപതേയ്യോ വിചയബഹുലോ പവിചയബഹുലോ ഓക്ഖായനബഹുലോ സമോക്ഖായനബഹുലോ സമ്പേക്ഖായനധമ്മോ വിഭൂതവിഹാരീ തച്ചരിതോ തഗ്ഗരുകോ തബ്ബഹുലോ തന്നിന്നോ തപ്പോണോ തപ്പബ്ഭാരോ തദധിമുത്തോ തദധിപതേയ്യോ. പഞ്ഞാബാഹുല്ലായ സംവത്തന്തീതി – ഇദം പഞ്ഞാബാഹുല്ലം.
Paññābāhullāyasaṃvattantīti katamaṃ paññābāhullaṃ? Idhekacco paññāgaruko hoti paññācarito paññāsayo paññādhimutto paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanabahulo 30 sampekkhāyanadhammo vibhūtavihārī taccarito taggaruko tabbahulo tanninno tappoṇo tappabbhāro tadadhimutto tadadhipateyyo. Yathā gaṇagaruko vuccati ‘‘gaṇabāhuliko’’ti, cīvaragaruko vuccati ‘‘cīvarabāhuliko’’ti, pattagaruko vuccati ‘‘pattabāhuliko’’ti, senāsanagaruko vuccati ‘‘senāsanabāhuliko’’ti; evamevaṃ idhekacco paññā garuko hoti paññācarito paññāsayo paññādhimutto paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanabahulo sampekkhāyanadhammo vibhūtavihārī taccarito taggaruko tabbahulo tanninno tappoṇo tappabbhāro tadadhimutto tadadhipateyyo. Paññābāhullāya saṃvattantīti – idaṃ paññābāhullaṃ.
സീഘപഞ്ഞതായ സംവത്തന്തീതി കതമാ സീഘപഞ്ഞാ? സീഘം സീഘം സീലാനി പരിപൂരേതീതി – സീഘപഞ്ഞാ. സീഘം സീഘം ഇന്ദ്രിയസംവരം പരിപൂരേതീതി – സീഘപഞ്ഞാ. സീഘം സീഘം ഭോജനേ മത്തഞ്ഞുതം പരിപൂരേതീതി – സീഘപഞ്ഞാ. സീഘം സീഘം ജാഗരിയാനുയോഗം പരിപൂരേതീതി – സീഘപഞ്ഞാ. സീഘം സീഘം സീലക്ഖന്ധം പരിപൂരേതീതി – സീഘപഞ്ഞാ. സീഘം സീഘം സമാധിക്ഖന്ധം പരിപൂരേതീതി – സീഘപഞ്ഞാ. സീഘം സീഘം പഞ്ഞാക്ഖന്ധം പരിപൂരേതീതി – സീഘപഞ്ഞാ . സീഘം സീഘം വിമുത്തിക്ഖന്ധം പരിപൂരേതീതി – സീഘപഞ്ഞാ. സീഘം സീഘം വിമുത്തിഞാണദസ്സനക്ഖന്ധം പരിപൂരേതീതി – സീഘപഞ്ഞാ. സീഘം സീഘം ഠാനാട്ഠാനാനി പടിവിജ്ഝതീതി – സീഘപഞ്ഞാ. സീഘം സീഘം വിഹാരസമാപത്തിയോ പരിപൂരേതീതി – സീഘപഞ്ഞാ. സീഘം സീഘം അരിയസച്ചാനി പടിവിജ്ഝതീതി – സീഘപഞ്ഞാ. സീഘം സീഘം സതിപട്ഠാനേ ഭാവേതീതി – സീഘപഞ്ഞാ. സീഘം സീഘം സമ്മപ്പധാനേ ഭാവേതീതി – സീഘപഞ്ഞാ. സീഘം സീഘം ഇദ്ധിപാദേ ഭാവേതീതി – സീഘപഞ്ഞാ. സീഘം സീഘം ഇന്ദ്രിയാനി ഭാവേതീതി – സീഘപഞ്ഞാ. സീഘം സീഘം ബലാനി ഭാവേതീതി – സീഘപഞ്ഞാ. സീഘം സീഘം ബോജ്ഝങ്ഗേ ഭാവേതീതി – സീഘപഞ്ഞാ. സീഘം സീഘം അരിയമഗ്ഗം ഭാവേതീതി – സീഘപഞ്ഞാ. സീഘം സീഘം സാമഞ്ഞഫലാനി സച്ഛികരോതീതി – സീഘപഞ്ഞാ. സീഘം സീഘം അഭിഞ്ഞായോ പടിവിജ്ഝതീതി – സീഘപഞ്ഞാ. സീഘം സീഘം പരമത്ഥം നിബ്ബാനം സച്ഛികരോതീതി – സീഘപഞ്ഞാ. സീഘപഞ്ഞതായ സംവത്തന്തീതി – അയം സീഘപഞ്ഞാ.
Sīghapaññatāya saṃvattantīti katamā sīghapaññā? Sīghaṃ sīghaṃ sīlāni paripūretīti – sīghapaññā. Sīghaṃ sīghaṃ indriyasaṃvaraṃ paripūretīti – sīghapaññā. Sīghaṃ sīghaṃ bhojane mattaññutaṃ paripūretīti – sīghapaññā. Sīghaṃ sīghaṃ jāgariyānuyogaṃ paripūretīti – sīghapaññā. Sīghaṃ sīghaṃ sīlakkhandhaṃ paripūretīti – sīghapaññā. Sīghaṃ sīghaṃ samādhikkhandhaṃ paripūretīti – sīghapaññā. Sīghaṃ sīghaṃ paññākkhandhaṃ paripūretīti – sīghapaññā . Sīghaṃ sīghaṃ vimuttikkhandhaṃ paripūretīti – sīghapaññā. Sīghaṃ sīghaṃ vimuttiñāṇadassanakkhandhaṃ paripūretīti – sīghapaññā. Sīghaṃ sīghaṃ ṭhānāṭṭhānāni paṭivijjhatīti – sīghapaññā. Sīghaṃ sīghaṃ vihārasamāpattiyo paripūretīti – sīghapaññā. Sīghaṃ sīghaṃ ariyasaccāni paṭivijjhatīti – sīghapaññā. Sīghaṃ sīghaṃ satipaṭṭhāne bhāvetīti – sīghapaññā. Sīghaṃ sīghaṃ sammappadhāne bhāvetīti – sīghapaññā. Sīghaṃ sīghaṃ iddhipāde bhāvetīti – sīghapaññā. Sīghaṃ sīghaṃ indriyāni bhāvetīti – sīghapaññā. Sīghaṃ sīghaṃ balāni bhāvetīti – sīghapaññā. Sīghaṃ sīghaṃ bojjhaṅge bhāvetīti – sīghapaññā. Sīghaṃ sīghaṃ ariyamaggaṃ bhāvetīti – sīghapaññā. Sīghaṃ sīghaṃ sāmaññaphalāni sacchikarotīti – sīghapaññā. Sīghaṃ sīghaṃ abhiññāyo paṭivijjhatīti – sīghapaññā. Sīghaṃ sīghaṃ paramatthaṃ nibbānaṃ sacchikarotīti – sīghapaññā. Sīghapaññatāya saṃvattantīti – ayaṃ sīghapaññā.
ലഹുപഞ്ഞതായ സംവത്തന്തീതി കതമാ ലഹുപഞ്ഞാ? ലഹും ലഹും സീലാനി പരിപൂരേതീതി – ലഹുപഞ്ഞാ. ലഹും ലഹും ഇന്ദ്രിയസംവരം പരിപൂരേതീതി – ലഹുപഞ്ഞാ. ലഹും ലഹും ഭോജനേ മത്തഞ്ഞുതം പരിപൂരേതീതി – ലഹുപഞ്ഞാ. ലഹും ലഹും ജാഗരിയാനുയോഗം പരിപൂരേതീതി – ലഹുപഞ്ഞാ. ലഹും ലഹും സീലക്ഖന്ധം …പേ॰… സമാധിക്ഖന്ധം … പഞ്ഞാക്ഖന്ധം… വിമുത്തിക്ഖന്ധം… വിമുത്തിഞാണദസ്സനക്ഖന്ധം പരിപൂരേതീതി – ലഹുപഞ്ഞാ. ലഹും ലഹും ഠാനാട്ഠാനാനി പടിവിജ്ഝതീതി – ലഹുപഞ്ഞാ. ലഹും ലഹും വിഹാരസമാപത്തിയോ പരിപൂരേതീതി – ലഹുപഞ്ഞാ. ലഹും ലഹും അരിയസച്ചാനി പടിവിജ്ഝതീതി – ലഹുപഞ്ഞാ. ലഹും ലഹും സതിപട്ഠാനേ ഭാവേതീതി – ലഹുപഞ്ഞാ. ലഹും ലഹും സമ്മപ്പധാനേ ഭാവേതീതി – ലഹുപഞ്ഞാ. ലഹും ലഹും ഇദ്ധിപാദേ ഭാവേതീതി – ലഹുപഞ്ഞാ. ലഹും ലഹും ഇന്ദ്രിയാനി ഭാവേതീതി – ലഹുപഞ്ഞാ. ലഹും ലഹും ബലാനി ഭാവേതീതി – ലഹുപഞ്ഞാ. ലഹും ലഹും ബോജ്ഝങ്ഗേ ഭാവേതീതി – ലഹുപഞ്ഞാ. ലഹും ലഹും അരിയമഗ്ഗം ഭാവേതീതി – ലഹുപഞ്ഞാ. ലഹും ലഹും സാമഞ്ഞഫലാനി സച്ഛികരോതീതി – ലഹുപഞ്ഞാ. ലഹും ലഹും അഭിഞ്ഞായോ പടിവിജ്ഝതീതി – ലഹുപഞ്ഞാ. ലഹും ലഹും പരമത്ഥം നിബ്ബാനം സച്ഛികരോതീതി – ലഹുപഞ്ഞാ. ലഹുപഞ്ഞതായ സംവത്തന്തീതി – അയം ലഹുപഞ്ഞാ.
Lahupaññatāya saṃvattantīti katamā lahupaññā? Lahuṃ lahuṃ sīlāni paripūretīti – lahupaññā. Lahuṃ lahuṃ indriyasaṃvaraṃ paripūretīti – lahupaññā. Lahuṃ lahuṃ bhojane mattaññutaṃ paripūretīti – lahupaññā. Lahuṃ lahuṃ jāgariyānuyogaṃ paripūretīti – lahupaññā. Lahuṃ lahuṃ sīlakkhandhaṃ …pe… samādhikkhandhaṃ … paññākkhandhaṃ… vimuttikkhandhaṃ… vimuttiñāṇadassanakkhandhaṃ paripūretīti – lahupaññā. Lahuṃ lahuṃ ṭhānāṭṭhānāni paṭivijjhatīti – lahupaññā. Lahuṃ lahuṃ vihārasamāpattiyo paripūretīti – lahupaññā. Lahuṃ lahuṃ ariyasaccāni paṭivijjhatīti – lahupaññā. Lahuṃ lahuṃ satipaṭṭhāne bhāvetīti – lahupaññā. Lahuṃ lahuṃ sammappadhāne bhāvetīti – lahupaññā. Lahuṃ lahuṃ iddhipāde bhāvetīti – lahupaññā. Lahuṃ lahuṃ indriyāni bhāvetīti – lahupaññā. Lahuṃ lahuṃ balāni bhāvetīti – lahupaññā. Lahuṃ lahuṃ bojjhaṅge bhāvetīti – lahupaññā. Lahuṃ lahuṃ ariyamaggaṃ bhāvetīti – lahupaññā. Lahuṃ lahuṃ sāmaññaphalāni sacchikarotīti – lahupaññā. Lahuṃ lahuṃ abhiññāyo paṭivijjhatīti – lahupaññā. Lahuṃ lahuṃ paramatthaṃ nibbānaṃ sacchikarotīti – lahupaññā. Lahupaññatāya saṃvattantīti – ayaṃ lahupaññā.
ഹാസപഞ്ഞതായ സംവത്തന്തീതി കതമാ ഹാസപഞ്ഞാ? ഇധേകച്ചോ ഹാസബഹുലോ വേദബഹുലോ തുട്ഠിബഹുലോ പാമോജ്ജബഹുലോ സീലാനി പരിപൂരേതീതി – ഹാസപഞ്ഞാ. ഹാസബഹുലോ വേദബഹുലോ തുട്ഠിബഹുലോ പാമോജ്ജബഹുലോ ഇന്ദ്രിയസംവരം പരിപൂരേതീതി – ഹാസപഞ്ഞാ. ഹാസബഹുലോ വേദബഹുലോ തുട്ഠിബഹുലോ പാമോജ്ജബഹുലോ ഭോജനേ മത്തഞ്ഞുതം പരിപൂരേതീതി – ഹാസപഞ്ഞാ. ഹാസബഹുലോ വേദബഹുലോ തുട്ഠിബഹുലോ പാമോജ്ജബഹുലോ ജാഗരിയാനുയോഗം പരിപൂരേതീതി – ഹാസപഞ്ഞാ. ഹാസബഹുലോ വേദബഹുലോ തുട്ഠിബഹുലോ പാമോജ്ജബഹുലോ സീലക്ഖന്ധം…പേ॰… സമാധിക്ഖന്ധം… പഞ്ഞാക്ഖന്ധം… വിമുത്തിക്ഖന്ധം… വിമുത്തിഞാണദസ്സനക്ഖന്ധം പരിപൂരേതീതി…പേ॰… ഠാനാട്ഠാനാനി പടിവിജ്ഝതീതി… വിഹാരസമാപത്തിയോ പരിപൂരേതീതി … അരിയസച്ചാനി പടിവിജ്ഝതീതി… സതിപട്ഠാനേ ഭാവേതീതി… സമ്മപ്പധാനേ ഭാവേതീതി… ഇദ്ധിപാദേ ഭാവേതീതി… ഇന്ദ്രിയാനി ഭാവേതീതി… ബലാനി ഭാവേതീതി… ബോജ്ഝങ്ഗേ ഭാവേതീതി … അരിയമഗ്ഗം ഭാവേതീതി…പേ॰… സാമഞ്ഞഫലാനി സച്ഛികരോതീതി – ഹാസപഞ്ഞാ. ഹാസബഹുലോ വേദബഹുലോ തുട്ഠിബഹുലോ പാമോജ്ജബഹുലോ അഭിഞ്ഞായോ പടിവിജ്ഝതീതി – ഹാസപഞ്ഞാ. ഹാസബഹുലോ വേദബഹുലോ തുട്ഠിബഹുലോ പാമോജ്ജബഹുലോ പരമത്ഥം നിബ്ബാനം സച്ഛികരോതീതി – ഹാസപഞ്ഞാ. ഹാസപഞ്ഞതായ സംവത്തന്തീതി – അയം ഹാസപഞ്ഞാ.
Hāsapaññatāya saṃvattantīti katamā hāsapaññā? Idhekacco hāsabahulo vedabahulo tuṭṭhibahulo pāmojjabahulo sīlāni paripūretīti – hāsapaññā. Hāsabahulo vedabahulo tuṭṭhibahulo pāmojjabahulo indriyasaṃvaraṃ paripūretīti – hāsapaññā. Hāsabahulo vedabahulo tuṭṭhibahulo pāmojjabahulo bhojane mattaññutaṃ paripūretīti – hāsapaññā. Hāsabahulo vedabahulo tuṭṭhibahulo pāmojjabahulo jāgariyānuyogaṃ paripūretīti – hāsapaññā. Hāsabahulo vedabahulo tuṭṭhibahulo pāmojjabahulo sīlakkhandhaṃ…pe… samādhikkhandhaṃ… paññākkhandhaṃ… vimuttikkhandhaṃ… vimuttiñāṇadassanakkhandhaṃ paripūretīti…pe… ṭhānāṭṭhānāni paṭivijjhatīti… vihārasamāpattiyo paripūretīti … ariyasaccāni paṭivijjhatīti… satipaṭṭhāne bhāvetīti… sammappadhāne bhāvetīti… iddhipāde bhāvetīti… indriyāni bhāvetīti… balāni bhāvetīti… bojjhaṅge bhāvetīti … ariyamaggaṃ bhāvetīti…pe… sāmaññaphalāni sacchikarotīti – hāsapaññā. Hāsabahulo vedabahulo tuṭṭhibahulo pāmojjabahulo abhiññāyo paṭivijjhatīti – hāsapaññā. Hāsabahulo vedabahulo tuṭṭhibahulo pāmojjabahulo paramatthaṃ nibbānaṃ sacchikarotīti – hāsapaññā. Hāsapaññatāya saṃvattantīti – ayaṃ hāsapaññā.
൭. ജവനപഞ്ഞതായ സംവത്തന്തീതി കതമാ ജവനപഞ്ഞാ? യം കിഞ്ചി രൂപം അതീതാനാഗതപച്ചുപ്പന്നം അജ്ഝത്തം വാ ബഹിദ്ധാ വാ ഓളാരികം വാ സുഖുമം വാ ഹീനം വാ പണീതം വാ യം ദൂരേ സന്തികേ വാ, സബ്ബം രൂപം അനിച്ചതോ ഖിപ്പം ജവതീതി – ജവനപഞ്ഞാ. ദുക്ഖതോ ഖിപ്പം ജവതീതി – ജവനപഞ്ഞാ. അനത്തതോ ഖിപ്പം ജവതീതി – ജവനപഞ്ഞാ. യാ കാചി വേദനാ…പേ॰… യാ കാചി സഞ്ഞാ… യേ കേചി സങ്ഖാരാ… യം കിഞ്ചി വിഞ്ഞാണം അതീതാനാഗതപച്ചുപ്പന്നം അജ്ഝത്തം വാ ബഹിദ്ധാ വാ ഓളാരികം വാ സുഖുമം വാ ഹീനം വാ പണീതം വാ യം ദൂരേ സന്തികേ വാ, സബ്ബം വിഞ്ഞാണം അനിച്ചതോ ഖിപ്പം ജവതീതി – ജവനപഞ്ഞാ. ദുക്ഖതോ ഖിപ്പം ജവതീതി – ജവനപഞ്ഞാ. അനത്തതോ ഖിപ്പം ജവതീതി – ജവനപഞ്ഞാ. ചക്ഖു…പേ॰… ജരാമരണം അതീതാനാഗതപച്ചുപ്പന്നം അനിച്ചതോ ഖിപ്പം ജവതീതി – ജവനപഞ്ഞാ. ദുക്ഖതോ ഖിപ്പം ജവതീതി – ജവനപഞ്ഞാ . അനത്തതോ ഖിപ്പം ജവതീതി – ജവനപഞ്ഞാ.
7.Javanapaññatāya saṃvattantīti katamā javanapaññā? Yaṃ kiñci rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ rūpaṃ aniccato khippaṃ javatīti – javanapaññā. Dukkhato khippaṃ javatīti – javanapaññā. Anattato khippaṃ javatīti – javanapaññā. Yā kāci vedanā…pe… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ aniccato khippaṃ javatīti – javanapaññā. Dukkhato khippaṃ javatīti – javanapaññā. Anattato khippaṃ javatīti – javanapaññā. Cakkhu…pe… jarāmaraṇaṃ atītānāgatapaccuppannaṃ aniccato khippaṃ javatīti – javanapaññā. Dukkhato khippaṃ javatīti – javanapaññā . Anattato khippaṃ javatīti – javanapaññā.
രൂപം അതീതാനാഗതപച്ചുപ്പന്നം അനിച്ചം ഖയട്ഠേന ദുക്ഖം ഭയട്ഠേന അനത്താ അസാരകട്ഠേനാതി തുലയിത്വാ തീരയിത്വാ വിഭാവയിത്വാ വിഭൂതം കത്വാ രൂപനിരോധേ നിബ്ബാനേ ഖിപ്പം ജവതീതി – ജവനപഞ്ഞാ. വേദനാ…പേ॰… സഞ്ഞാ… സങ്ഖാരാ… വിഞ്ഞാണം… ചക്ഖു…പേ॰… ജരാമരണം അതീതാനാഗതപച്ചുപ്പന്നം അനിച്ചം ഖയട്ഠേന ദുക്ഖം ഭയട്ഠേന അനത്താ അസാരകട്ഠേനാതി തുലയിത്വാ തീരയിത്വാ വിഭാവയിത്വാ വിഭൂതം കത്വാ ജരാമരണനിരോധേ 31 നിബ്ബാനേ ഖിപ്പം ജവതീതി – ജവനപഞ്ഞാ.
Rūpaṃ atītānāgatapaccuppannaṃ aniccaṃ khayaṭṭhena dukkhaṃ bhayaṭṭhena anattā asārakaṭṭhenāti tulayitvā tīrayitvā vibhāvayitvā vibhūtaṃ katvā rūpanirodhe nibbāne khippaṃ javatīti – javanapaññā. Vedanā…pe… saññā… saṅkhārā… viññāṇaṃ… cakkhu…pe… jarāmaraṇaṃ atītānāgatapaccuppannaṃ aniccaṃ khayaṭṭhena dukkhaṃ bhayaṭṭhena anattā asārakaṭṭhenāti tulayitvā tīrayitvā vibhāvayitvā vibhūtaṃ katvā jarāmaraṇanirodhe 32 nibbāne khippaṃ javatīti – javanapaññā.
രൂപം അതീതാനാഗതപച്ചുപ്പന്നം അനിച്ചം സങ്ഖതം പടിച്ചസമുപ്പന്നം ഖയധമ്മം വയധമ്മം വിരാഗധമ്മം നിരോധധമ്മന്തി തുലയിത്വാ തീരയിത്വാ വിഭാവയിത്വാ വിഭൂതം കത്വാ രൂപനിരോധേ നിബ്ബാനേ ഖിപ്പം ജവതീതി – ജവനപഞ്ഞാ. വേദനാ…പേ॰… സഞ്ഞാ… സങ്ഖാരാ… വിഞ്ഞാണം… ചക്ഖു…പേ॰… ജരാമരണം അതീതാനാഗതപച്ചുപ്പന്നം അനിച്ചം സങ്ഖതം പടിച്ചസമുപ്പന്നം ഖയധമ്മം വയധമ്മം വിരാഗധമ്മം നിരോധധമ്മന്തി തുലയിത്വാ തീരയിത്വാ വിഭാവയിത്വാ വിഭൂതം കത്വാ ജരാമരണനിരോധേ നിബ്ബാനേ ഖിപ്പം ജവതീതി – ജവനപഞ്ഞാ. ജവനപഞ്ഞതായ സംവത്തന്തീതി – അയം ജവനപഞ്ഞാ.
Rūpaṃ atītānāgatapaccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti tulayitvā tīrayitvā vibhāvayitvā vibhūtaṃ katvā rūpanirodhe nibbāne khippaṃ javatīti – javanapaññā. Vedanā…pe… saññā… saṅkhārā… viññāṇaṃ… cakkhu…pe… jarāmaraṇaṃ atītānāgatapaccuppannaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti tulayitvā tīrayitvā vibhāvayitvā vibhūtaṃ katvā jarāmaraṇanirodhe nibbāne khippaṃ javatīti – javanapaññā. Javanapaññatāya saṃvattantīti – ayaṃ javanapaññā.
തിക്ഖപഞ്ഞതായ സംവത്തന്തീതി കതമാ തിക്ഖപഞ്ഞാ? ഖിപ്പം കിലേസേ ഛിന്ദതീതി – തിക്ഖപഞ്ഞാ. ഉപ്പന്നം കാമവിതക്കം നാധിവാസേതി പജഹതി വിനോദേതി ബ്യന്തീകരോതി 33 അനഭാവം ഗമേതീതി – തിക്ഖപഞ്ഞാ. ഉപ്പന്നം ബ്യാപാദവിതക്കം നാധിവാസേതി പജഹതി വിനോദേതി ബ്യന്തീകരോതി അനഭാവം ഗമേതീതി – തിക്ഖപഞ്ഞാ. ഉപ്പന്നം വിഹിംസാവിതക്കം നാധിവാസേതി…പേ॰… ഉപ്പന്നുപ്പന്നേ പാപകേ അകുസലേ ധമ്മേ നാധിവാസേതി പജഹതി വിനോദേതി ബ്യന്തീകരോതി അനഭാവം ഗമേതീതി – തിക്ഖപഞ്ഞാ. ഉപ്പന്നം രാഗം നാധിവാസേതി പജഹതി വിനോദേതി ബ്യന്തീകരോതി അനഭാവം ഗമേതീതി – തിക്ഖപഞ്ഞാ. ഉപ്പന്നം ദോസം…പേ॰… ഉപ്പന്നം മോഹം … ഉപ്പന്നം കോധം… ഉപ്പന്നം ഉപനാഹം… മക്ഖം… പളാസം… ഇസ്സം… മച്ഛരിയം… മായം… സാഠേയ്യം… ഥമ്ഭം… സാരമ്ഭം… മാനം… അതിമാനം… മദം… പമാദം… സബ്ബേ കിലേസേ… സബ്ബേ ദുച്ചരിതേ… സബ്ബേ അഭിസങ്ഖാരേ…പേ॰… സബ്ബേ ഭവഗാമികമ്മേ നാധിവാസേതി പജഹതി വിനോദേതി ബ്യന്തീകരോതി അനഭാവം ഗമേതീതി – തിക്ഖപഞ്ഞാ. ഏകസ്മിം ആസനേ ചത്താരോ ച അരിയമഗ്ഗാ ചത്താരി ച സാമഞ്ഞഫലാനി ചതസ്സോ പടിസമ്ഭിദായോ ഛ അഭിഞ്ഞായോ അധിഗതാ ഹോന്തി സച്ഛികതാ ഫസ്സിതാ പഞ്ഞായാതി – തിക്ഖപഞ്ഞാ. തിക്ഖപഞ്ഞതായ സംവത്തന്തീതി – അയം തിക്ഖപഞ്ഞാ.
Tikkhapaññatāya saṃvattantīti katamā tikkhapaññā? Khippaṃ kilese chindatīti – tikkhapaññā. Uppannaṃ kāmavitakkaṃ nādhivāseti pajahati vinodeti byantīkaroti 34 anabhāvaṃ gametīti – tikkhapaññā. Uppannaṃ byāpādavitakkaṃ nādhivāseti pajahati vinodeti byantīkaroti anabhāvaṃ gametīti – tikkhapaññā. Uppannaṃ vihiṃsāvitakkaṃ nādhivāseti…pe… uppannuppanne pāpake akusale dhamme nādhivāseti pajahati vinodeti byantīkaroti anabhāvaṃ gametīti – tikkhapaññā. Uppannaṃ rāgaṃ nādhivāseti pajahati vinodeti byantīkaroti anabhāvaṃ gametīti – tikkhapaññā. Uppannaṃ dosaṃ…pe… uppannaṃ mohaṃ … uppannaṃ kodhaṃ… uppannaṃ upanāhaṃ… makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ… mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe abhisaṅkhāre…pe… sabbe bhavagāmikamme nādhivāseti pajahati vinodeti byantīkaroti anabhāvaṃ gametīti – tikkhapaññā. Ekasmiṃ āsane cattāro ca ariyamaggā cattāri ca sāmaññaphalāni catasso paṭisambhidāyo cha abhiññāyo adhigatā honti sacchikatā phassitā paññāyāti – tikkhapaññā. Tikkhapaññatāya saṃvattantīti – ayaṃ tikkhapaññā.
നിബ്ബേധികപഞ്ഞതായ സംവത്തന്തീതി കതമാ നിബ്ബേധികപഞ്ഞാ? ഇധേകച്ചോ സബ്ബസങ്ഖാരേസു ഉബ്ബേഗബഹുലോ ഹോതി ഉത്താസബഹുലോ ഉക്കണ്ഠനബഹുലോ അരതിബഹുലോ അനഭിരതിബഹുലോ. ബഹിമുഖോ ന രമതി സബ്ബസങ്ഖാരേസു. അനിബ്ബിദ്ധപുബ്ബം അപ്പദാലിതപുബ്ബം ലോഭക്ഖന്ധം നിബ്ബിജ്ഝതി പദാലേതീതി – നിബ്ബേധികപഞ്ഞാ. അനിബ്ബിദ്ധപുബ്ബം അപ്പദാലിതപുബ്ബം ദോസക്ഖന്ധം നിബ്ബിജ്ഝതി പദാലേതീതി – നിബ്ബേധികപഞ്ഞാ. അനിബ്ബിദ്ധപുബ്ബം അപ്പദാലിതപുബ്ബം മോഹക്ഖന്ധം നിബ്ബിജ്ഝതി പദാലേതീതി – നിബ്ബേധികപഞ്ഞാ . അനിബ്ബിദ്ധപുബ്ബം അപ്പദാലിതപുബ്ബം കോധം…പേ॰… ഉപനാഹം… മക്ഖം… പളാസം… ഇസ്സം… മച്ഛരിയം… മായം… സാഠേയ്യം… ഥമ്ഭം… സാരമ്ഭം… മാനം… അതിമാനം… മദം… പമാദം… സബ്ബേ കിലേസേ… സബ്ബേ ദുച്ചരിതേ… സബ്ബേ അഭിസങ്ഖാരേ…പേ॰… സബ്ബേ ഭവഗാമികമ്മേ നിബ്ബിജ്ഝതി പദാലേതീതി – നിബ്ബേധികപഞ്ഞാ. നിബ്ബേധികപഞ്ഞതായ സംവത്തന്തീതി – അയം നിബ്ബേധികപഞ്ഞാ.
Nibbedhikapaññatāya saṃvattantīti katamā nibbedhikapaññā? Idhekacco sabbasaṅkhāresu ubbegabahulo hoti uttāsabahulo ukkaṇṭhanabahulo aratibahulo anabhiratibahulo. Bahimukho na ramati sabbasaṅkhāresu. Anibbiddhapubbaṃ appadālitapubbaṃ lobhakkhandhaṃ nibbijjhati padāletīti – nibbedhikapaññā. Anibbiddhapubbaṃ appadālitapubbaṃ dosakkhandhaṃ nibbijjhati padāletīti – nibbedhikapaññā. Anibbiddhapubbaṃ appadālitapubbaṃ mohakkhandhaṃ nibbijjhati padāletīti – nibbedhikapaññā . Anibbiddhapubbaṃ appadālitapubbaṃ kodhaṃ…pe… upanāhaṃ… makkhaṃ… paḷāsaṃ… issaṃ… macchariyaṃ… māyaṃ… sāṭheyyaṃ… thambhaṃ… sārambhaṃ… mānaṃ… atimānaṃ… madaṃ… pamādaṃ… sabbe kilese… sabbe duccarite… sabbe abhisaṅkhāre…pe… sabbe bhavagāmikamme nibbijjhati padāletīti – nibbedhikapaññā. Nibbedhikapaññatāya saṃvattantīti – ayaṃ nibbedhikapaññā.
ഇമാ സോളസ പഞ്ഞായോ. ഇമാഹി സോളസഹി പഞ്ഞാഹി സമന്നാഗതോ പുഗ്ഗലോ പടിസമ്ഭിദപ്പത്തോ.
Imā soḷasa paññāyo. Imāhi soḷasahi paññāhi samannāgato puggalo paṭisambhidappatto.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / പടിസമ്ഭിദാമഗ്ഗ-അട്ഠകഥാ • Paṭisambhidāmagga-aṭṭhakathā / ൧. സോളസപഞ്ഞാനിദ്ദേസവണ്ണനാ • 1. Soḷasapaññāniddesavaṇṇanā
