| Library / Tipiṭaka / तिपिटक • Tipiṭaka / जातकपाळि • Jātakapāḷi |
४१०. सोमदत्तजातकं (७-२-५)
410. Somadattajātakaṃ (7-2-5)
१०५.
105.
सो न दिस्सति मातङ्गो, सोमदत्तो कुहिं गतो॥
So na dissati mātaṅgo, somadatto kuhiṃ gato.
१०६.
106.
भुम्या निपतितो सेति, अमरा वत कुञ्जरो॥
Bhumyā nipatito seti, amarā vata kuñjaro.
१०७.
107.
अनगारियुपेतस्स, विप्पमुत्तस्स ते सतो।
Anagāriyupetassa, vippamuttassa te sato;
समणस्स न तं साधु, यं पेतमनुसोचसि॥
Samaṇassa na taṃ sādhu, yaṃ petamanusocasi.
१०८.
108.
संवासेन हवे सक्क, मनुस्सस्स मिगस्स वा।
Saṃvāsena have sakka, manussassa migassa vā;
हदये जायते पेमं, तं न सक्का असोचितुं॥
Hadaye jāyate pemaṃ, taṃ na sakkā asocituṃ.
१०९.
109.
मतं मरिस्सं रोदन्ति, ये रुदन्ति लपन्ति च।
Mataṃ marissaṃ rodanti, ye rudanti lapanti ca;
तस्मा त्वं इसि मा रोदि, रोदितं मोघमाहु सन्तो॥
Tasmā tvaṃ isi mā rodi, roditaṃ moghamāhu santo.
११०.
110.
कन्दितेन हवे ब्रह्मे, मतो पेतो समुट्ठहे।
Kanditena have brahme, mato peto samuṭṭhahe;
सब्बे सङ्गम्म रोदाम, अञ्ञमञ्ञस्स ञातके॥
Sabbe saṅgamma rodāma, aññamaññassa ñātake.
१११.
111.
आदित्तं वत मं सन्तं, घतसित्तंव पावकं।
Ādittaṃ vata maṃ santaṃ, ghatasittaṃva pāvakaṃ;
वारिना विय ओसिञ्चं, सब्बं निब्बापये दरं॥
Vārinā viya osiñcaṃ, sabbaṃ nibbāpaye daraṃ.
११२.
112.
अब्बही वत मे सल्लं, यमासि हदयस्सितं।
Abbahī vata me sallaṃ, yamāsi hadayassitaṃ;
यो मे सोकपरेतस्स, पुत्तसोकं अपानुदि॥
Yo me sokaparetassa, puttasokaṃ apānudi.
११३.
113.
सोहं अब्बूळ्हसल्लोस्मि, वीतसोको अनाविलो।
Sohaṃ abbūḷhasallosmi, vītasoko anāvilo;
न सोचामि न रोदामि, तव सुत्वान वासवाति॥
Na socāmi na rodāmi, tava sutvāna vāsavāti.
सोमदत्तजातकं पञ्चमं।
Somadattajātakaṃ pañcamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४१०] ५. सोमदत्तजातकवण्णना • [410] 5. Somadattajātakavaṇṇanā
