| Library / Tipiṭaka / திபிடக • Tipiṭaka / தே²ரீகா³தா²-அட்ட²கதா² • Therīgāthā-aṭṭhakathā |
8. ஸோமாதே²ரீகா³தா²வண்ணனா
8. Somātherīgāthāvaṇṇanā
யங் தங் இஸீஹி பத்தப்³ப³ந்திஆதி³கா ஸோமாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயங் குஸலங் உபசினந்தீ ஸிகி²ஸ்ஸ ப⁴க³வதோ காலே க²த்தியமஹாஸாலகுலே நிப்³ப³த்தித்வா விஞ்ஞுதங் பத்வா அருணரஞ்ஞோ அக்³க³மஹேஸீ அஹோஸீதி ஸப்³ப³ங் அதீதவத்து² அப⁴யத்தே²ரியா வத்து²ஸதி³ஸங். பச்சுப்பன்னவத்து² பன அயங் தே²ரீ தத்த² தத்த² தே³வமனுஸ்ஸேஸு ஸங்ஸரந்தீ இமஸ்மிங் பு³த்³து⁴ப்பாதே³ ராஜக³ஹே பி³ம்பி³ஸாரஸ்ஸ ரஞ்ஞோ புரோஹிதஸ்ஸ தீ⁴தா ஹுத்வா நிப்³ப³த்தி. தஸ்ஸா ஸோமாதி நாமங் அஹோஸி. ஸா விஞ்ஞுதங் பத்தா ஸத்து² ராஜக³ஹபவேஸனே படிலத்³த⁴ஸத்³தா⁴ உபாஸிகா ஹுத்வா அபரபா⁴கே³ ஸஞ்ஜாதஸங்வேகா³ பி⁴க்கு²னீஸு பப்³ப³ஜித்வா கதபுப்³ப³கிச்சா விபஸ்ஸனாய கம்மங் கரொந்தீ ந சிரஸ்ஸேவ ஸஹ படிஸம்பி⁴தா³ஹி அரஹத்தங் பாபுணி. தேன வுத்தங் அபதா³னே (அப॰ தே²ரீ 2.1.71, 80-90) –
Yaṃtaṃ isīhi pattabbantiādikā somāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī sikhissa bhagavato kāle khattiyamahāsālakule nibbattitvā viññutaṃ patvā aruṇarañño aggamahesī ahosīti sabbaṃ atītavatthu abhayattheriyā vatthusadisaṃ. Paccuppannavatthu pana ayaṃ therī tattha tattha devamanussesu saṃsarantī imasmiṃ buddhuppāde rājagahe bimbisārassa rañño purohitassa dhītā hutvā nibbatti. Tassā somāti nāmaṃ ahosi. Sā viññutaṃ pattā satthu rājagahapavesane paṭiladdhasaddhā upāsikā hutvā aparabhāge sañjātasaṃvegā bhikkhunīsu pabbajitvā katapubbakiccā vipassanāya kammaṃ karontī na cirasseva saha paṭisambhidāhi arahattaṃ pāpuṇi. Tena vuttaṃ apadāne (apa. therī 2.1.71, 80-90) –
‘‘நக³ரே அருணவதியா, அருணோ நாம க²த்தியோ;
‘‘Nagare aruṇavatiyā, aruṇo nāma khattiyo;
தஸ்ஸ ரஞ்ஞோ அஹுங் ப⁴ரியா, வாரிதங் வாரயாமஹங்.
Tassa rañño ahuṃ bhariyā, vāritaṃ vārayāmahaṃ.
‘‘யாவதா…பே॰… கதங் பு³த்³த⁴ஸ்ஸ ஸாஸன’’ந்தி. –
‘‘Yāvatā…pe… kataṃ buddhassa sāsana’’nti. –
ஸப்³ப³ங் அப⁴யத்தே²ரியா அபதா³னஸதி³ஸங்.
Sabbaṃ abhayattheriyā apadānasadisaṃ.
அரஹத்தங் பன பத்வா விமுத்திஸுகே²ன ஸாவத்தி²யங் விஹரந்தீ ஏகதி³வஸங் தி³வாவிஹாரத்தா²ய அந்த⁴வனங் பவிஸித்வா அஞ்ஞதரஸ்மிங் ருக்க²மூலே நிஸீதி³. அத² நங் மாரோ விவேகதோ விச்சே²தே³துகாமோ அதி³ஸ்ஸமானுரூபோ உபக³ந்த்வா ஆகாஸே ட²த்வா –
Arahattaṃ pana patvā vimuttisukhena sāvatthiyaṃ viharantī ekadivasaṃ divāvihāratthāya andhavanaṃ pavisitvā aññatarasmiṃ rukkhamūle nisīdi. Atha naṃ māro vivekato vicchedetukāmo adissamānurūpo upagantvā ākāse ṭhatvā –
60.
60.
‘‘யங் தங் இஸீஹி பத்தப்³ப³ங், டா²னங் து³ரபி⁴ஸம்ப⁴வங்;
‘‘Yaṃ taṃ isīhi pattabbaṃ, ṭhānaṃ durabhisambhavaṃ;
ந தங் த்³வங்கு³லபஞ்ஞாய, ஸக்கா பப்போதுமித்தி²யா’’தி. – இமங் கா³த²மாஹ;
Na taṃ dvaṅgulapaññāya, sakkā pappotumitthiyā’’ti. – imaṃ gāthamāha;
தஸ்ஸத்தோ² – ஸீலக்க²ந்தா⁴தீ³னங் ஏஸனட்டே²ன ‘‘இஸீ’’தி லத்³த⁴னாமேஹி பு³த்³தா⁴தீ³ஹி மஹாபஞ்ஞேஹி பத்தப்³ப³ங், தங் அஞ்ஞேஹி பன து³ரபி⁴ஸம்ப⁴வங் து³ன்னிப்பா²த³னீயங். யங் தங் அரஹத்தஸங்கா²தங் பரமஸ்ஸாஸட்டா²னங், ந தங் த்³வங்கு³லபஞ்ஞாய நிஹீனபஞ்ஞாய இத்தி²யா பாபுணிதுங் ஸக்கா. இத்தி²யோ ஹி ஸத்தட்ட²வஸ்ஸகாலதோ பட்டா²ய ஸப்³ப³காலங் ஓத³னங் பசந்தியோ பக்குதி²தே உத³கே தண்டு³லே பக்கி²பித்வா ‘‘எத்தாவதா ஓத³னங் பக்க’’ந்தி ந ஜானந்தி, பக்குதி²யமானே பன தண்டு³லே த³ப்³பி³யா உத்³த⁴ரித்வா த்³வீஹி அங்கு³லீஹி பீளெத்வா ஜானந்தி, தஸ்மா த்³வங்கு³லிபஞ்ஞாயாதி வுத்தா.
Tassattho – sīlakkhandhādīnaṃ esanaṭṭhena ‘‘isī’’ti laddhanāmehi buddhādīhi mahāpaññehi pattabbaṃ, taṃ aññehi pana durabhisambhavaṃ dunnipphādanīyaṃ. Yaṃ taṃ arahattasaṅkhātaṃ paramassāsaṭṭhānaṃ, na taṃ dvaṅgulapaññāya nihīnapaññāya itthiyā pāpuṇituṃ sakkā. Itthiyo hi sattaṭṭhavassakālato paṭṭhāya sabbakālaṃ odanaṃ pacantiyo pakkuthite udake taṇḍule pakkhipitvā ‘‘ettāvatā odanaṃ pakka’’nti na jānanti, pakkuthiyamāne pana taṇḍule dabbiyā uddharitvā dvīhi aṅgulīhi pīḷetvā jānanti, tasmā dvaṅgulipaññāyāti vuttā.
தங் ஸுத்வா தே²ரீ மாரங் அபஸாதெ³ந்தீ –
Taṃ sutvā therī māraṃ apasādentī –
61.
61.
‘‘இத்தி²பா⁴வோ நோ கிங் கயிரா, சித்தம்ஹி ஸுஸமாஹிதே;
‘‘Itthibhāvo no kiṃ kayirā, cittamhi susamāhite;
ஞாணம்ஹி வத்தமானம்ஹி, ஸம்மா த⁴ம்மங் விபஸ்ஸதோ.
Ñāṇamhi vattamānamhi, sammā dhammaṃ vipassato.
62.
62.
‘‘ஸப்³ப³த்த² விஹதா நந்தீ³, தமொக்க²ந்தோ⁴ பதா³லிதோ;
‘‘Sabbattha vihatā nandī, tamokkhandho padālito;
ஏவங் ஜானாஹி பாபிம, நிஹதோ த்வமஸி அந்தகா’’தி. –
Evaṃ jānāhi pāpima, nihato tvamasi antakā’’ti. –
இதரா த்³வே கா³தா² அபா⁴ஸி.
Itarā dve gāthā abhāsi.
தத்த² இத்தி²பா⁴வோ நோ கிங் கயிராதி மாதுகா³மபா⁴வோ அம்ஹாகங் கிங் கரெய்ய, அரஹத்தப்பத்தியா கீதி³ஸங் விப³ந்த⁴ங் உப்பாதெ³ய்ய. சித்தம்ஹி ஸுஸமாஹிதேதி சித்தே அக்³க³மக்³க³ஸமாதி⁴னா ஸுட்டு² ஸமாஹிதே. ஞாணம்ஹி வத்தமானம்ஹீதி ததோ அரஹத்தமக்³க³ஞாணே பவத்தமானே. ஸம்மா த⁴ம்மங் விபஸ்ஸதோதி சதுஸச்சத⁴ம்மங் பரிஞ்ஞாதி³விதி⁴னா ஸம்மதே³வ பஸ்ஸதோ. அயஞ்ஹெத்த² ஸங்கே²போ – பாபிம, இத்தீ² வா ஹோது புரிஸோ வா, அக்³க³மக்³கே³ அதி⁴க³தே அரஹத்தங் ஹத்த²க³தமேவாதி.
Tattha itthibhāvo no kiṃ kayirāti mātugāmabhāvo amhākaṃ kiṃ kareyya, arahattappattiyā kīdisaṃ vibandhaṃ uppādeyya. Cittamhi susamāhiteti citte aggamaggasamādhinā suṭṭhu samāhite. Ñāṇamhi vattamānamhīti tato arahattamaggañāṇe pavattamāne. Sammā dhammaṃ vipassatoti catusaccadhammaṃ pariññādividhinā sammadeva passato. Ayañhettha saṅkhepo – pāpima, itthī vā hotu puriso vā, aggamagge adhigate arahattaṃ hatthagatamevāti.
இதா³னி தஸ்ஸ அத்தனா அதி⁴க³தபா⁴வங் உஜுகமேவ த³ஸ்ஸெந்தீ ‘‘ஸப்³ப³த்த² விஹதா நந்தீ³’’தி கா³த²மாஹ. ஸா வுத்தத்தா²யேவ.
Idāni tassa attanā adhigatabhāvaṃ ujukameva dassentī ‘‘sabbattha vihatā nandī’’ti gāthamāha. Sā vuttatthāyeva.
ஸோமாதே²ரீகா³தா²வண்ணனா நிட்டி²தா.
Somātherīgāthāvaṇṇanā niṭṭhitā.
திகனிபாதவண்ணனா நிட்டி²தா.
Tikanipātavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரீகா³தா²பாளி • Therīgāthāpāḷi / 8. ஸோமாதே²ரீகா³தா² • 8. Somātherīgāthā
