| Library / Tipiṭaka / д̇ибидага • Tipiṭaka / д̣̇ийгха нигааяа (адтагат̇аа) • Dīgha nikāya (aṭṭhakathā) |
4. сон̣ад̣̇ан̣д̣асуд̇д̇аван̣н̣анаа
4. Soṇadaṇḍasuttavaṇṇanā
300. звам̣ мз суд̇ам̣…бз… ан̇г̇зсууд̇и сон̣ад̣̇ан̣д̣асуд̇д̇ам̣. д̇ад̇рааяам̣ абуб̣б̣абад̣̇аван̣н̣анаа. ан̇г̇зсууд̇и ан̇г̇аа наама ан̇г̇абаасаад̣̇игад̇ааяа звам̣ лад̣̇д̇хавохаараа ж̇аанабад̣̇ино рааж̇агумаараа, д̇зсам̣ ниваасо згоби ж̇анабад̣̇о руул̣хисад̣̇д̣̇зна ан̇г̇аад̇и вужжад̇и, д̇асмим̣ ан̇г̇зсу ж̇анабад̣̇з. жаариганд̇и ид̇хааби ад̇урид̇ажааригаа жзва ниб̣ад̣̇д̇хажааригаа жа ад̇хиббзд̇аа. д̇ад̣̇аа гира бхаг̇авад̇о д̣̇асасахассилогад̇хаад̇ум̣ ологзнд̇асса сон̣ад̣̇ан̣д̣о б̣раахман̣о н̃аан̣аж̇ааласса анд̇о бан̃н̃ааяид̇т̇а. ат̇а бхаг̇аваа аяам̣ б̣раахман̣о маяхам̣ н̃аан̣аж̇аалз бан̃н̃ааяад̇и. ‘ад̇т̇и ну квассубаниссаяо’д̇и виймам̣санд̇о ад̣̇д̣̇аса. ‘маяи д̇ад̇т̇а г̇ад̇з зд̇асса анд̇зваасино д̣̇ваад̣̇асахаагаарзхи б̣раахман̣асса ван̣н̣ам̣ бхаасид̇ваа мама санд̇игз ааг̇анд̇ум̣ на д̣̇ассанд̇и. со бана д̇зсам̣ ваад̣̇ам̣ бхинд̣̇ид̇ваа згуунад̇им̣са аагаарзхи мама ван̣н̣ам̣ бхаасид̇ваа мам̣ убасан̇гамид̇ваа бан̃хам̣ бужчиссад̇и. со бан̃хависсаж̇ж̇анабарияосаанз саран̣ам̣ г̇амиссад̇ий’д̇и, д̣̇исваа бан̃жасад̇абхигкубаривааро д̇ам̣ ж̇анабад̣̇ам̣ бадибанно. д̇зна вуд̇д̇ам̣ – ан̇г̇зсу жааригам̣ жарамаано…бз… язна жамбаа д̇ад̣̇авасарийд̇и.
300. Evaṃ me sutaṃ…pe… aṅgesūti soṇadaṇḍasuttaṃ. Tatrāyaṃ apubbapadavaṇṇanā. Aṅgesūti aṅgā nāma aṅgapāsādikatāya evaṃ laddhavohārā jānapadino rājakumārā, tesaṃ nivāso ekopi janapado rūḷhisaddena aṅgāti vuccati, tasmiṃ aṅgesu janapade. Cārikanti idhāpi aturitacārikā ceva nibaddhacārikā ca adhippetā. Tadā kira bhagavato dasasahassilokadhātuṃ olokentassa soṇadaṇḍo brāhmaṇo ñāṇajālassa anto paññāyittha. Atha bhagavā ayaṃ brāhmaṇo mayhaṃ ñāṇajāle paññāyati. ‘Atthi nu khvassupanissayo’ti vīmaṃsanto addasa. ‘Mayi tattha gate etassa antevāsino dvādasahākārehi brāhmaṇassa vaṇṇaṃ bhāsitvā mama santike āgantuṃ na dassanti. So pana tesaṃ vādaṃ bhinditvā ekūnatiṃsa ākārehi mama vaṇṇaṃ bhāsitvā maṃ upasaṅkamitvā pañhaṃ pucchissati. So pañhavissajjanapariyosāne saraṇaṃ gamissatī’ti, disvā pañcasatabhikkhuparivāro taṃ janapadaṃ paṭipanno. Tena vuttaṃ – aṅgesu cārikaṃ caramāno…pe… yena campā tadavasarīti.
г̇аг̇г̇арааяа богкаран̣ияаа д̇ийрзд̇и д̇асса жамбаанаг̇арасса авид̣̇уурз г̇аг̇г̇арааяа наама рааж̇аг̇г̇амахзсияаа кан̣ид̇ад̇д̇аа г̇аг̇г̇араад̇и лад̣̇д̇хавохаараа богкаран̣ий ад̇т̇и. д̇ассаа д̇ийрз саманд̇ад̇о нийлаад̣̇ибан̃жаван̣н̣агусумабадиман̣д̣ид̇ам̣ маханд̇ам̣ жамбагаванам̣. д̇асмим̣ бхаг̇аваа гусумаг̇анд̇хасуг̇анд̇хз жамбагаванз вихарад̇и. д̇ам̣ санд̇хааяа г̇аг̇г̇арааяа богкаран̣ияаа д̇ийрзд̇и вуд̇д̇ам̣. мааг̇ад̇хзна сзниязна б̣имб̣исаарзнаад̇и зд̇т̇а со рааж̇аа маг̇ад̇хаанам̣ иссарад̇д̇аа мааг̇ад̇хо. махад̇ияаа сзнааяа саманнааг̇ад̇ад̇д̇аа сзнияо. б̣имб̣ийд̇и суван̣н̣ам̣. д̇асмаа саарасуван̣н̣асад̣̇исаван̣н̣ад̇ааяа б̣имб̣исаарод̇и вужжад̇и.
Gaggarāya pokkharaṇiyā tīreti tassa campānagarassa avidūre gaggarāya nāma rājaggamahesiyā khaṇitattā gaggarāti laddhavohārā pokkharaṇī atthi. Tassā tīre samantato nīlādipañcavaṇṇakusumapaṭimaṇḍitaṃ mahantaṃ campakavanaṃ. Tasmiṃ bhagavā kusumagandhasugandhe campakavane viharati. Taṃ sandhāya gaggarāya pokkharaṇiyā tīreti vuttaṃ. Māgadhena seniyena bimbisārenāti ettha so rājā magadhānaṃ issarattā māgadho. Mahatiyā senāya samannāgatattā seniyo. Bimbīti suvaṇṇaṃ. Tasmā sārasuvaṇṇasadisavaṇṇatāya bimbisāroti vuccati.
301-302. б̣ахуу б̣ахуу худ̇ваа сам̣хад̇аад̇и сан̇гхаа. згзгиссааяа д̣̇исааяа сан̇гхо зд̇зсам̣ ад̇т̇ийд̇и сан̇гхий. буб̣б̣з наг̇арасса анд̇о аг̇ан̣аа б̣ахи нигкамид̇ваа г̇ан̣ад̇ам̣ бад̇д̇аад̇и г̇ан̣ийбхууд̇аа. кад̇д̇ам̣ ааманд̇зсийд̇и. кад̇д̇аа вужжад̇и бужчид̇абан̃хз б̣яаагаран̣асамад̇т̇о махаамад̇д̇о, д̇ам̣ ааманд̇зси ааг̇амзнд̇ууд̇и мухуд̇д̇ам̣ бадимаанзнд̇у, маа г̇ажчанд̇ууд̇и вуд̇д̇ам̣ ход̇и.
301-302. Bahū bahū hutvā saṃhatāti saṅghā. Ekekissāya disāya saṅgho etesaṃ atthīti saṅghī. Pubbe nagarassa anto agaṇā bahi nikkhamitvā gaṇataṃ pattāti gaṇībhūtā. Khattaṃ āmantesīti. Khattā vuccati pucchitapañhe byākaraṇasamattho mahāmatto, taṃ āmantesi āgamentūti muhuttaṃ paṭimānentu, mā gacchantūti vuttaṃ hoti.
сон̣ад̣̇ан̣д̣аг̇ун̣агат̇аа
Soṇadaṇḍaguṇakathā
303. наанаавзраж̇ж̇агаананд̇и наанаавид̇хзсу раж̇ж̇зсу, ан̃н̃зсу ан̃н̃зсу гаасигосалаад̣̇ийсу раж̇ж̇зсу ж̇аад̇аа, д̇аани ваа д̇зсам̣ ниваасаа, д̇ад̇о ваа ааг̇ад̇аад̇и наанаавзраж̇ж̇агаа, д̇зсам̣ наанаавзраж̇ж̇агаанам̣. гзнажид̣̇зва гаран̣ийязнаад̇и д̇асмим̣ гира наг̇арз д̣̇вийхи гаран̣ийязхи б̣раахман̣аа саннибад̇анд̇и – яан̃н̃аанубхаванад̇т̇ам̣ ваа манд̇асаж̇жхааяанад̇т̇ам̣ ваа. д̇ад̣̇аа жа д̇асмим̣ наг̇арз яаман̃н̃аа над̇т̇и. сон̣ад̣̇ан̣д̣асса бана санд̇игз манд̇асаж̇жхааяанад̇т̇ам̣ зд̇з саннибад̇ид̇аа. д̇ам̣ санд̇хааяа вуд̇д̇ам̣ – ‘‘гзнажид̣̇зва гаран̣ийязнаа’’д̇и. д̇з д̇асса г̇аманам̣ суд̇ваа жинд̇зсум̣ – ‘‘аяам̣ сон̣ад̣̇ан̣д̣о уг̇г̇ад̇аб̣раахман̣о язбхуяязна жа ан̃н̃з б̣раахман̣аа саман̣ам̣ г̇од̇амам̣ саран̣ам̣ г̇ад̇аа, аяамзва на г̇ад̇о. свааяам̣ сажз д̇ад̇т̇а г̇амиссад̇и, ад̣̇д̇хаа саман̣асса г̇од̇амасса аавадданияаа мааяааяа ааваддид̇о, д̇ам̣ саран̣ам̣ г̇амиссад̇и. д̇ад̇о зд̇ассааби г̇зхад̣̇ваарз б̣раахман̣аанам̣ саннибаад̇о на бхависсад̇ий’’д̇и. ‘‘ханд̣̇асса г̇амананд̇арааяам̣ гаромаа’’д̇и самманд̇аяид̇ваа д̇ад̇т̇а аг̇амам̣су. д̇ам̣ санд̇хааяа – ат̇а ко д̇з б̣раахман̣аад̇иаад̣̇и вуд̇д̇ам̣.
303.Nānāverajjakānanti nānāvidhesu rajjesu, aññesu aññesu kāsikosalādīsu rajjesu jātā, tāni vā tesaṃ nivāsā, tato vā āgatāti nānāverajjakā, tesaṃ nānāverajjakānaṃ. Kenacideva karaṇīyenāti tasmiṃ kira nagare dvīhi karaṇīyehi brāhmaṇā sannipatanti – yaññānubhavanatthaṃ vā mantasajjhāyanatthaṃ vā. Tadā ca tasmiṃ nagare yamaññā natthi. Soṇadaṇḍassa pana santike mantasajjhāyanatthaṃ ete sannipatitā. Taṃ sandhāya vuttaṃ – ‘‘kenacideva karaṇīyenā’’ti. Te tassa gamanaṃ sutvā cintesuṃ – ‘‘ayaṃ soṇadaṇḍo uggatabrāhmaṇo yebhuyyena ca aññe brāhmaṇā samaṇaṃ gotamaṃ saraṇaṃ gatā, ayameva na gato. Svāyaṃ sace tattha gamissati, addhā samaṇassa gotamassa āvaṭṭaniyā māyāya āvaṭṭito, taṃ saraṇaṃ gamissati. Tato etassāpi gehadvāre brāhmaṇānaṃ sannipāto na bhavissatī’’ti. ‘‘Handassa gamanantarāyaṃ karomā’’ti sammantayitvā tattha agamaṃsu. Taṃ sandhāya – atha kho te brāhmaṇātiādi vuttaṃ.
д̇ад̇т̇а иминаабан̇г̇знаад̇и иминааби гааран̣зна. звам̣ зд̇ам̣ гааран̣ам̣ вад̇ваа буна – ‘‘ад̇д̇ано ван̣н̣з бхан̃н̃амаанз ад̇уссанагасад̇д̇о наама над̇т̇и. ханд̣̇асса ван̣н̣ам̣ бхан̣анзна г̇аманам̣ ниваарзссаамаа’’д̇и жинд̇зд̇ваа бхаван̃хи сон̣ад̣̇ан̣д̣о убхад̇о суж̇аад̇од̇иаад̣̇ийни гааран̣аани аахам̣су.
Tattha imināpaṅgenāti imināpi kāraṇena. Evaṃ etaṃ kāraṇaṃ vatvā puna – ‘‘attano vaṇṇe bhaññamāne atussanakasatto nāma natthi. Handassa vaṇṇaṃ bhaṇanena gamanaṃ nivāressāmā’’ti cintetvā bhavañhi soṇadaṇḍo ubhato sujātotiādīni kāraṇāni āhaṃsu.
убхад̇од̇и д̣̇вийхи багкзхи. маад̇ид̇о жа бид̇ид̇о жаад̇и бход̇о маад̇аа б̣раахман̣ий, маад̇умаад̇аа б̣раахман̣ий, д̇ассааби маад̇аа б̣раахман̣ий; бид̇аа б̣раахман̣о, бид̇убид̇аа б̣раахман̣о, д̇ассааби бид̇аа б̣раахман̣од̇и, звам̣ бхавам̣ убхад̇о суж̇аад̇о маад̇ид̇о жа бид̇ид̇о жа. сам̣суд̣̇д̇хаг̇ахан̣игод̇и сам̣суд̣̇д̇хаа д̇з маад̇уг̇ахан̣ий гужчийд̇и ад̇т̇о. самавзбаагинияаа г̇ахан̣ияаад̇и зд̇т̇а бана гаммаж̇ад̇зж̇од̇хаад̇у ‘‘г̇ахан̣ий’’д̇и вужжад̇и.
Ubhatoti dvīhi pakkhehi. Mātito ca pitito cāti bhoto mātā brāhmaṇī, mātumātā brāhmaṇī, tassāpi mātā brāhmaṇī; pitā brāhmaṇo, pitupitā brāhmaṇo, tassāpi pitā brāhmaṇoti, evaṃ bhavaṃ ubhato sujāto mātito ca pitito ca. Saṃsuddhagahaṇikoti saṃsuddhā te mātugahaṇī kucchīti attho. Samavepākiniyā gahaṇiyāti ettha pana kammajatejodhātu ‘‘gahaṇī’’ti vuccati.
яаава сад̇д̇амаа бид̇аамахаяуг̇аад̇и зд̇т̇а бид̇убид̇аа бид̇аамахо, бид̇аамахасса яуг̇ам̣ бид̇аамахаяуг̇ам̣. яуг̇анд̇и ааяуббамаан̣ам̣ вужжад̇и. абхилаабамад̇д̇амзва жзд̇ам̣. ад̇т̇ад̇о бана бид̇аамахоязва бид̇аамахаяуг̇ам̣. д̇ад̇о уд̣̇д̇хам̣ саб̣б̣зби буб̣б̣абурисаа бид̇аамахаг̇г̇ахан̣знзва г̇ахид̇аа. звам̣ яаава сад̇д̇амо бурисо , д̇аава сам̣суд̣̇д̇хаг̇ахан̣иго. ат̇а ваа агкид̇д̇о анубагудто ж̇аад̇иваад̣̇знаад̇и д̣̇ассзнд̇и. агкид̇д̇од̇и – ‘‘абанзт̇а зд̇ам̣, гим̣ иминаа’’д̇и звам̣ агкид̇д̇о анавагкид̇д̇о. анубагудтод̇и на убагудто, на аггосам̣ ваа нинд̣̇ам̣ ваа лад̣̇д̇хабуб̣б̣о. гзна гааран̣знаад̇и? ж̇аад̇иваад̣̇зна. ид̇иби – ‘‘хийнаж̇аад̇иго зсо’’д̇и зваруубзна важанзнаад̇и ад̇т̇о.
Yāva sattamā pitāmahayugāti ettha pitupitā pitāmaho, pitāmahassa yugaṃ pitāmahayugaṃ. Yuganti āyuppamāṇaṃ vuccati. Abhilāpamattameva cetaṃ. Atthato pana pitāmahoyeva pitāmahayugaṃ. Tato uddhaṃ sabbepi pubbapurisā pitāmahaggahaṇeneva gahitā. Evaṃ yāva sattamo puriso , tāva saṃsuddhagahaṇiko. Atha vā akkhitto anupakuṭṭho jātivādenāti dassenti. Akkhittoti – ‘‘apanetha etaṃ, kiṃ iminā’’ti evaṃ akkhitto anavakkhitto. Anupakuṭṭhoti na upakuṭṭho, na akkosaṃ vā nindaṃ vā laddhapubbo. Kena kāraṇenāti? Jātivādena. Itipi – ‘‘hīnajātiko eso’’ti evarūpena vacanenāti attho.
ад̣дход̇и иссаро. махад̣̇д̇ханод̇и махад̇аа д̇ханзна саманнааг̇ад̇о. бхавад̇о хи г̇зхз бат̇авияам̣ бам̣суваалигаа вияа б̣ахуд̇ханам̣, саман̣о бана г̇од̇амо ад̇хано бхигкааяа уд̣̇арам̣ буурзд̇ваа яаабзд̇ийд̇и д̣̇ассзнд̇и. махаабхог̇од̇и бан̃жагаамаг̇ун̣авасзна махааубабхог̇о. звам̣ яам̣ яам̣ г̇ун̣ам̣ вад̣̇анд̇и, д̇асса д̇асса бадибагкавасзна бхаг̇авад̇о аг̇ун̣ам̣язва д̣̇ассзмаад̇и ман̃н̃амаанаа вад̣̇анд̇и.
Aḍḍhoti issaro. Mahaddhanoti mahatā dhanena samannāgato. Bhavato hi gehe pathaviyaṃ paṃsuvālikā viya bahudhanaṃ, samaṇo pana gotamo adhano bhikkhāya udaraṃ pūretvā yāpetīti dassenti. Mahābhogoti pañcakāmaguṇavasena mahāupabhogo. Evaṃ yaṃ yaṃ guṇaṃ vadanti, tassa tassa paṭipakkhavasena bhagavato aguṇaṃyeva dassemāti maññamānā vadanti.
абхируубод̇и ан̃н̃зхи мануссзхи абхируубо ад̇хигаруубо. д̣̇ассанийяод̇и д̣̇ивасамби бассанд̇аанам̣ ад̇ид̇д̇игаран̣ад̇о д̣̇ассанаяог̇г̇о. д̣̇ассанзнзва жид̇д̇абасаад̣̇аж̇ананад̇о баасаад̣̇иго. богкарад̇аа вужжад̇и сунд̣̇арабхааво, ван̣н̣асса богкарад̇аа ван̣н̣абогкарад̇аа, д̇ааяа ван̣н̣асамбад̇д̇ияаа яуд̇д̇од̇и ад̇т̇о. бораан̣аа банааху – ‘‘богкаранд̇и сарийрам̣ вад̣̇анд̇и, ван̣н̣ам̣ ван̣н̣амзваа’’д̇и. д̇зсам̣ мад̇зна ван̣н̣ан̃жа богкаран̃жа ван̣н̣абогкараани. д̇зсам̣ бхааво ван̣н̣абогкарад̇аа. ид̇и барамааяа ван̣н̣абогкарад̇ааяаад̇и уд̇д̇амзна барисуд̣̇д̇хзна ван̣н̣зна жзва сарийрасан̣таанасамбад̇д̇ияаа жаад̇и ад̇т̇о. б̣рахмаван̣н̣ийд̇и сздтаван̣н̣ий. барисуд̣̇д̇хаван̣н̣зсуби сздтзна суван̣н̣аван̣н̣зна саманнааг̇ад̇од̇и ад̇т̇о. б̣рахмаважчасийд̇и махааб̣рахмуно сарийрасад̣̇исзнзва сарийрзна саманнааг̇ад̇о. акуд̣̇д̣̇аавагаасо д̣̇ассанааяаад̇и ‘‘бход̇о сарийрз д̣̇ассанасса огаасо на куд̣̇д̣̇аго махаа, саб̣б̣аанзва д̇з ан̇г̇абажжан̇г̇аани д̣̇ассанийяаанзва, д̇аани жааби маханд̇аанзваа’’д̇и д̣̇ийбзнд̇и.
Abhirūpoti aññehi manussehi abhirūpo adhikarūpo. Dassanīyoti divasampi passantānaṃ atittikaraṇato dassanayoggo. Dassaneneva cittapasādajananato pāsādiko. Pokkharatā vuccati sundarabhāvo, vaṇṇassa pokkharatā vaṇṇapokkharatā, tāya vaṇṇasampattiyā yuttoti attho. Porāṇā panāhu – ‘‘pokkharanti sarīraṃ vadanti, vaṇṇaṃ vaṇṇamevā’’ti. Tesaṃ matena vaṇṇañca pokkharañca vaṇṇapokkharāni. Tesaṃ bhāvo vaṇṇapokkharatā. Iti paramāya vaṇṇapokkharatāyāti uttamena parisuddhena vaṇṇena ceva sarīrasaṇṭhānasampattiyā cāti attho. Brahmavaṇṇīti seṭṭhavaṇṇī. Parisuddhavaṇṇesupi seṭṭhena suvaṇṇavaṇṇena samannāgatoti attho. Brahmavacchasīti mahābrahmuno sarīrasadiseneva sarīrena samannāgato. Akhuddāvakāso dassanāyāti ‘‘bhoto sarīre dassanassa okāso na khuddako mahā, sabbāneva te aṅgapaccaṅgāni dassanīyāneva, tāni cāpi mahantānevā’’ti dīpenti.
сийламасса ад̇т̇ийд̇и сийлаваа. вуд̣̇д̇хам̣ вад̣̇д̇хид̇ам̣ сийламассаад̇и вуд̣̇д̇хасийлий. вуд̣̇д̇хасийлзнаад̇и вуд̣̇д̇хзна вад̣̇д̇хид̇зна сийлзна. саманнааг̇ад̇од̇и яуд̇д̇о. ид̣̇ам̣ вуд̣̇д̇хасийлийбад̣̇ассзва взважанам̣. саб̣б̣амзд̇ам̣ бан̃жасийламад̇д̇амзва санд̇хааяа вад̣̇анд̇и.
Sīlamassa atthīti sīlavā. Vuddhaṃ vaddhitaṃ sīlamassāti vuddhasīlī. Vuddhasīlenāti vuddhena vaddhitena sīlena. Samannāgatoti yutto. Idaṃ vuddhasīlīpadasseva vevacanaṃ. Sabbametaṃ pañcasīlamattameva sandhāya vadanti.
галяаан̣аваажод̇иаад̣̇ийсу галяаан̣аа сунд̣̇араа бариман̣д̣алабад̣̇аб̣яан̃ж̇анаа ваажаа ассаад̇и галяаан̣аваажо. галяаан̣ам̣ мад̇хурам̣ вааггаран̣ам̣ ассаад̇и галяаан̣авааггаран̣о . вааггаран̣анд̇и уд̣̇аахаран̣агхосо. г̇ун̣абарибун̣н̣абхаавзна бурз бхаваад̇и борий. бурз ваа бхавад̇д̇аа борий. борияаа нааг̇аригид̇т̇ияаа сукумаалад̇д̇анзна сад̣̇исаад̇и борий, д̇ааяа борияаа. виссадтааяаад̇и абалиб̣уд̣̇д̇хааяа санд̣̇идтавиламб̣ид̇аад̣̇ид̣̇осарахид̇ааяа. анзлаг̇алааяаад̇и злаг̇ал̣знавирахид̇ааяа. яасса гассажи хи гат̇знд̇асса злаа г̇ал̣анд̇и, лаалаа ваа баг̇гхаранд̇и, кзл̣апусид̇аани ваа нигкаманд̇и, д̇асса ваажаа злаг̇ал̣ам̣ наама ход̇и, д̇аб̣б̣ибарид̇ааяаад̇и ад̇т̇о. ад̇т̇асса вин̃н̃аабанияаад̇и аад̣̇имаж̇жхабарияосаанам̣ баагадам̣ гад̇ваа бхаасид̇ад̇т̇асса вин̃н̃аабанасамад̇т̇ааяа.
Kalyāṇavācotiādīsu kalyāṇā sundarā parimaṇḍalapadabyañjanā vācā assāti kalyāṇavāco. Kalyāṇaṃ madhuraṃ vākkaraṇaṃ assāti kalyāṇavākkaraṇo. Vākkaraṇanti udāharaṇaghoso. Guṇaparipuṇṇabhāvena pure bhavāti porī. Pure vā bhavattā porī. Poriyā nāgarikitthiyā sukhumālattanena sadisāti porī, tāya poriyā. Vissaṭṭhāyāti apalibuddhāya sandiṭṭhavilambitādidosarahitāya. Anelagalāyāti elagaḷenavirahitāya. Yassa kassaci hi kathentassa elā gaḷanti, lālā vā paggharanti, kheḷaphusitāni vā nikkhamanti, tassa vācā elagaḷaṃ nāma hoti, tabbiparitāyāti attho. Atthassa viññāpaniyāti ādimajjhapariyosānaṃ pākaṭaṃ katvā bhāsitatthassa viññāpanasamatthāya.
ж̇ин̣н̣од̇и ж̇арааж̇ин̣н̣ад̇ааяа ж̇ин̣н̣о. вуд̣̇д̇ход̇и ан̇г̇абажжан̇г̇аанам̣ вуд̣̇д̇хибхаавамарияаад̣̇аббад̇д̇о. махаллагод̇и ж̇аад̇имахаллагад̇ааяа саманнааг̇ад̇о. жирагаалаббасуд̇од̇и вуд̇д̇ам̣ ход̇и. ад̣̇д̇хаг̇ад̇од̇и ад̣̇д̇хаанам̣ г̇ад̇о, д̣̇вз д̇аяо рааж̇абариваддз ад̇ийд̇од̇и ад̇хиббааяо. ваяоануббад̇д̇од̇и бажчимаваяам̣ самбад̇д̇о, бажчимаваяо наама вассасад̇асса бажчимо д̇ад̇ияабхааг̇о.
Jiṇṇoti jarājiṇṇatāya jiṇṇo. Vuddhoti aṅgapaccaṅgānaṃ vuddhibhāvamariyādappatto. Mahallakoti jātimahallakatāya samannāgato. Cirakālappasutoti vuttaṃ hoti. Addhagatoti addhānaṃ gato, dve tayo rājaparivaṭṭe atītoti adhippāyo. Vayoanuppattoti pacchimavayaṃ sampatto, pacchimavayo nāma vassasatassa pacchimo tatiyabhāgo.
аби жа ж̇ин̣н̣од̇и бораан̣о, жирагаалаббавад̇д̇агуланваяод̇и вуд̇д̇ам̣ ход̇и. вуд̣̇д̇ход̇и сийлаажаараад̣̇иг̇ун̣авуд̣̇д̇хияаа яуд̇д̇о. махаллагод̇и вибхавамаханд̇ааяа саманнааг̇ад̇о. ад̣̇д̇хаг̇ад̇од̇и маг̇г̇аббадибанно б̣раахман̣аанам̣ вад̇ажарияаад̣̇имарияаад̣̇ам̣ авийд̇иггамма жаран̣асийло. ваяоануббад̇д̇од̇и ж̇аад̇ивуд̣̇д̇хабхаавамби анд̇имаваяам̣ ануббад̇д̇о.
Api ca jiṇṇoti porāṇo, cirakālappavattakulanvayoti vuttaṃ hoti. Vuddhoti sīlācārādiguṇavuddhiyā yutto. Mahallakoti vibhavamahantāya samannāgato. Addhagatoti maggappaṭipanno brāhmaṇānaṃ vatacariyādimariyādaṃ avītikkamma caraṇasīlo. Vayoanuppattoti jātivuddhabhāvampi antimavayaṃ anuppatto.
б̣уд̣̇д̇хаг̇ун̣агат̇аа
Buddhaguṇakathā
304. звам̣ вуд̇д̇зд̇и звам̣ д̇зхи б̣раахман̣зхи вуд̇д̇з. сон̣ад̣̇ан̣д̣о – ‘‘имз б̣раахман̣аа ж̇аад̇иаад̣̇ийхи мама ван̣н̣ам̣ вад̣̇анд̇и, на ко бана мзд̇ам̣ яуд̇д̇ам̣ ад̇д̇ано ван̣н̣з раж̇ж̇ид̇ум̣. ханд̣̇аахам̣ зд̇зсам̣ ваад̣̇ам̣ бхинд̣̇ид̇ваа саман̣асса г̇од̇амасса маханд̇абхаавам̣ н̃аабзд̇ваа зд̇зсам̣ д̇ад̇т̇а г̇аманам̣ гаромий’’д̇и жинд̇зд̇ваа д̇зна хи – бхо мамаби сун̣аат̇аад̇иаад̣̇имааха. д̇ад̇т̇а язби убхад̇о суж̇аад̇од̇и аад̣̇аяо ад̇д̇ано г̇ун̣зхи сад̣̇исаа г̇ун̣аа д̇зби ; ‘‘го жаахам̣ гз жа саман̣асса г̇од̇амасса ж̇аад̇исамбад̇д̇иаад̣̇аяо г̇ун̣аа’’д̇и ад̇д̇ано г̇ун̣зхи уд̇д̇арид̇арзязва ман̃н̃амаано, ид̇арз бана зганд̇знзва бхаг̇авад̇о маханд̇абхаавад̣̇ийбанад̇т̇ам̣ багаасзд̇и.
304.Evaṃ vutteti evaṃ tehi brāhmaṇehi vutte. Soṇadaṇḍo – ‘‘ime brāhmaṇā jātiādīhi mama vaṇṇaṃ vadanti, na kho pana metaṃ yuttaṃ attano vaṇṇe rajjituṃ. Handāhaṃ etesaṃ vādaṃ bhinditvā samaṇassa gotamassa mahantabhāvaṃ ñāpetvā etesaṃ tattha gamanaṃ karomī’’ti cintetvā tena hi – bho mamapi suṇāthātiādimāha. Tattha yepi ubhato sujātoti ādayo attano guṇehi sadisā guṇā tepi ; ‘‘ko cāhaṃ ke ca samaṇassa gotamassa jātisampattiādayo guṇā’’ti attano guṇehi uttaritareyeva maññamāno, itare pana ekanteneva bhagavato mahantabhāvadīpanatthaṃ pakāseti.
маяамзва арахаамаад̇и звам̣ нияаамзнд̇овзд̇т̇а ид̣̇ам̣ д̣̇ийбзд̇и – ‘‘яад̣̇и г̇ун̣амаханд̇ад̇ааяа убасан̇гамид̇аб̣б̣о наама ход̇и. яат̇аа хи синзрум̣ убанид̇хааяа саасабо, махаасамуд̣̇д̣̇ам̣ убанид̇хааяа г̇обад̣̇агам̣, сад̇д̇асу махаасарзсу уд̣̇агам̣ убанид̇хааяа уссааваб̣инд̣̇у барид̇д̇о лаамаго. звамзва саман̣асса г̇од̇амасса ж̇аад̇исамбад̇д̇иаад̣̇аяоби г̇ун̣з убанид̇хааяа амхаагам̣ г̇ун̣аа барид̇д̇аа лаамагаа; д̇асмаа маяамзва арахаама д̇ам̣ бхаванд̇ам̣ г̇од̇амам̣ д̣̇ассанааяа убасан̇гамид̇у’’нд̇и.
Mayameva arahāmāti evaṃ niyāmentovettha idaṃ dīpeti – ‘‘yadi guṇamahantatāya upasaṅkamitabbo nāma hoti. Yathā hi sineruṃ upanidhāya sāsapo, mahāsamuddaṃ upanidhāya gopadakaṃ, sattasu mahāsaresu udakaṃ upanidhāya ussāvabindu paritto lāmako. Evameva samaṇassa gotamassa jātisampattiādayopi guṇe upanidhāya amhākaṃ guṇā parittā lāmakā; tasmā mayameva arahāma taṃ bhavantaṃ gotamaṃ dassanāya upasaṅkamitu’’nti.
маханд̇ам̣ н̃аад̇исам̣гхам̣ охааяаад̇и маад̇ибагкз асийд̇игуласахассаани , бид̇ибагкз асийд̇игуласахассаанийд̇и звам̣ садтигуласад̇асахассам̣ охааяа баб̣б̣аж̇ид̇о.
Mahantaṃñātisaṃghaṃ ohāyāti mātipakkhe asītikulasahassāni , pitipakkhe asītikulasahassānīti evaṃ saṭṭhikulasatasahassaṃ ohāya pabbajito.
бхуумиг̇ад̇ан̃жа взхаасадтан̃жаад̇и зд̇т̇а рааж̇ан̇г̇ан̣з жзва уяяаанз жа суд̇хаамадтабогкаран̣ияо сад̇д̇арад̇анаанам̣ буурзд̇ваа бхуумияам̣ табид̇ам̣ д̇ханам̣ бхуумиг̇ад̇ам̣ наама. баасаад̣̇анияуухаад̣̇аяо барибуурзд̇ваа табид̇ам̣ взхаасадтам̣ наама. зд̇ам̣ д̇аава гулабарияааязна ааг̇ад̇ам̣. д̇ат̇ааг̇ад̇асса бана ж̇аад̇ад̣̇ивасзязва сан̇ко, зло, уббало, бун̣д̣арийгод̇и жад̇д̇ааро нид̇хаяо уг̇г̇ад̇аа. д̇зсу сан̇ко г̇аавуд̇иго, зло ад̣дхаяож̇аниго, уббало д̇иг̇аавуд̇иго, бун̣д̣арийго яож̇аниго. д̇зсуби г̇ахид̇ам̣ г̇ахид̇ам̣ буурад̇иязва, ид̇и бхаг̇аваа бахууд̇ам̣ хиран̃н̃асуван̣н̣ам̣ охааяа баб̣б̣аж̇ид̇од̇и взд̣̇ид̇аб̣б̣о.
Bhūmigatañca vehāsaṭṭhañcāti ettha rājaṅgaṇe ceva uyyāne ca sudhāmaṭṭhapokkharaṇiyo sattaratanānaṃ pūretvā bhūmiyaṃ ṭhapitaṃ dhanaṃ bhūmigataṃ nāma. Pāsādaniyūhādayo paripūretvā ṭhapitaṃ vehāsaṭṭhaṃ nāma. Etaṃ tāva kulapariyāyena āgataṃ. Tathāgatassa pana jātadivaseyeva saṅkho, elo, uppalo, puṇḍarīkoti cattāro nidhayo uggatā. Tesu saṅkho gāvutiko, elo aḍḍhayojaniko, uppalo tigāvutiko, puṇḍarīko yojaniko. Tesupi gahitaṃ gahitaṃ pūratiyeva, iti bhagavā pahūtaṃ hiraññasuvaṇṇaṃ ohāya pabbajitoti veditabbo.
д̣̇ахарова самаанод̇и д̇арун̣ова самаано. сусугаал̣агзсод̇и судту гаал̣агзсо, ан̃ж̇анаван̣н̣асад̣̇исагзсо худ̇ваа ваад̇и ад̇т̇о. бхад̣̇рзнаад̇и бхад̣̇д̣̇агзна. батамзна ваяасаад̇и д̇ин̣н̣ам̣ ваяаанам̣ батамаваязна. агаамагаананд̇и анижчамаанаанам̣. анаад̣̇арад̇т̇з саамиважанам̣. ассууни мукз зд̇зсанд̇и ассумукаа, д̇зсам̣ ассумукаанам̣, ассуухи гилиннамукаананд̇и ад̇т̇о. руд̣̇анд̇аананд̇и ганд̣̇ид̇ваа род̣̇амаанаанам̣. акуд̣̇д̣̇аавагаасод̇и зд̇т̇а бхаг̇авад̇о абаримаан̣оязва д̣̇ассанааяа огаасод̇и взд̣̇ид̇аб̣б̣о.
Daharova samānoti taruṇova samāno. Susukāḷakesoti suṭṭhu kāḷakeso, añjanavaṇṇasadisakeso hutvā vāti attho. Bhadrenāti bhaddakena. Paṭhamena vayasāti tiṇṇaṃ vayānaṃ paṭhamavayena. Akāmakānanti anicchamānānaṃ. Anādaratthe sāmivacanaṃ. Assūni mukhe etesanti assumukhā, tesaṃ assumukhānaṃ, assūhi kilinnamukhānanti attho. Rudantānanti kanditvā rodamānānaṃ. Akhuddāvakāsoti ettha bhagavato aparimāṇoyeva dassanāya okāsoti veditabbo.
д̇ад̇рид̣̇ам̣ вад̇т̇у – рааж̇аг̇ахз гира ан̃н̃ад̇аро б̣раахман̣о саман̣асса г̇од̇амасса бамаан̣ам̣ г̇ахзд̇ум̣ на саггод̇ийд̇и суд̇ваа бхаг̇авад̇о бин̣д̣ааяа бависанагаалз садтихад̇т̇ам̣ взл̣ум̣ г̇ахзд̇ваа наг̇арад̣̇ваарасса б̣ахи тад̇ваа самбад̇д̇з бхаг̇авад̇и взл̣ум̣ г̇ахзд̇ваа самийбз адтааси. взл̣у бхаг̇авад̇о ж̇аан̣угамад̇д̇ам̣ баабун̣и. буна д̣̇ивасз д̣̇вз взл̣уу гхадзд̇ваа самийбз адтааси. бхаг̇авааби д̣̇виннам̣ взл̣уунам̣ убари гадимад̇д̇амзва бан̃н̃ааяамаано – ‘‘б̣раахман̣а, гим̣ гаросий’’д̇и ааха. д̇умхаагам̣ бамаан̣ам̣ г̇ан̣хаамийд̇и. ‘‘б̣раахман̣а, сажзби д̇вам̣ сагалажаггаваал̣аг̇аб̣бхам̣ буурзд̇ваа тид̇з взл̣уу гхадзд̇ваа ааг̇амиссаси, нзва мз бамаан̣ам̣ г̇ахзд̇ум̣ сагкиссаси. на хи маяаа жад̇д̇аари асан̇кязяаани габбасад̇асахассан̃жа д̇ат̇аа баарамияо буурид̇аа, яат̇аа мз баро бамаан̣ам̣ г̇ан̣хзяяа, ад̇уло, б̣раахман̣а, д̇ат̇ааг̇ад̇о аббамзяяо’’д̇и вад̇ваа д̇хаммабад̣̇з г̇аат̇амааха –
Tatridaṃ vatthu – rājagahe kira aññataro brāhmaṇo samaṇassa gotamassa pamāṇaṃ gahetuṃ na sakkotīti sutvā bhagavato piṇḍāya pavisanakāle saṭṭhihatthaṃ veḷuṃ gahetvā nagaradvārassa bahi ṭhatvā sampatte bhagavati veḷuṃ gahetvā samīpe aṭṭhāsi. Veḷu bhagavato jāṇukamattaṃ pāpuṇi. Puna divase dve veḷū ghaṭetvā samīpe aṭṭhāsi. Bhagavāpi dvinnaṃ veḷūnaṃ upari kaṭimattameva paññāyamāno – ‘‘brāhmaṇa, kiṃ karosī’’ti āha. Tumhākaṃ pamāṇaṃ gaṇhāmīti. ‘‘Brāhmaṇa, sacepi tvaṃ sakalacakkavāḷagabbhaṃ pūretvā ṭhite veḷū ghaṭetvā āgamissasi, neva me pamāṇaṃ gahetuṃ sakkhissasi. Na hi mayā cattāri asaṅkhyeyāni kappasatasahassañca tathā pāramiyo pūritā, yathā me paro pamāṇaṃ gaṇheyya, atulo, brāhmaṇa, tathāgato appameyyo’’ti vatvā dhammapade gāthamāha –
‘‘д̇з д̇аад̣̇исз бууж̇аяад̇о, ниб̣б̣уд̇з агуд̇обхаяз;
‘‘Te tādise pūjayato, nibbute akutobhaye;
на саггаа бун̃н̃ам̣ сан̇каад̇ум̣, имзд̇д̇амаби гзнажий’’д̇и. (д̇ха. ба. 36);
Na sakkā puññaṃ saṅkhātuṃ, imettamapi kenacī’’ti. (dha. pa. 36);
г̇аат̇аабарияосаанз жад̇ураасийд̇ибаан̣асахассаани амад̇ам̣ бивим̣су.
Gāthāpariyosāne caturāsītipāṇasahassāni amataṃ piviṃsu.
абарамби вад̇т̇у – рааху гира асуринд̣̇о жад̇д̇аари яож̇анасахассаани адта жа яож̇анасад̇аани ужжо. б̣ааханд̇арамасса д̣̇ваад̣̇асаяож̇анасад̇аани. б̣ахаланд̇арзна ча яож̇анасад̇аани. хад̇т̇ад̇алабаад̣̇ад̇алаанам̣ бут̇улад̇о д̇ийн̣и яож̇анасад̇аани. ан̇г̇улибаб̣б̣аани бан̣н̣аасаяож̇анаани. бхамуганд̇арам̣ бан̣н̣аасаяож̇анам̣. мукам̣ д̣̇вияож̇анасад̇ам̣ д̇ияож̇анасад̇аг̇амбхийрам̣ д̇ияож̇анасад̇абариман̣д̣алам̣. г̇ийваа д̇ияож̇анасад̇ам̣. налаадам̣ д̇ияож̇анасад̇ам̣. сийсам̣ наваяож̇анасад̇ам̣. ‘‘со ахам̣ ужжосми, сад̇т̇аарам̣ онамид̇ваа ологзд̇ум̣ на сагкиссаамий’’д̇и жинд̇зд̇ваа нааг̇ажчи. со згад̣̇ивасам̣ бхаг̇авад̇о ван̣н̣ам̣ суд̇ваа – ‘‘яат̇аагат̇ан̃жа ологзссаамий’’д̇и ааг̇ад̇о.
Aparampi vatthu – rāhu kira asurindo cattāri yojanasahassāni aṭṭha ca yojanasatāni ucco. Bāhantaramassa dvādasayojanasatāni. Bahalantarena cha yojanasatāni. Hatthatalapādatalānaṃ puthulato tīṇi yojanasatāni. Aṅgulipabbāni paṇṇāsayojanāni. Bhamukantaraṃ paṇṇāsayojanaṃ. Mukhaṃ dviyojanasataṃ tiyojanasatagambhīraṃ tiyojanasataparimaṇḍalaṃ. Gīvā tiyojanasataṃ. Nalāṭaṃ tiyojanasataṃ. Sīsaṃ navayojanasataṃ. ‘‘So ahaṃ uccosmi, satthāraṃ onamitvā oloketuṃ na sakkhissāmī’’ti cintetvā nāgacchi. So ekadivasaṃ bhagavato vaṇṇaṃ sutvā – ‘‘yathākathañca olokessāmī’’ti āgato.
ат̇а бхаг̇аваа д̇ассаж̇жхаасаяам̣ вид̣̇ид̇ваа – ‘‘жад̇уусу ирияаабат̇зсу гад̇арзна д̣̇ассзссаамий’’д̇и жинд̇зд̇ваа ‘‘тид̇аго наама нийжоби ужжо вияа бан̃н̃ааяад̇и. нибанновасса ад̇д̇аанам̣ д̣̇ассзссаамий’’д̇и ‘‘аананд̣̇а, г̇анд̇хагудибаривзн̣з ман̃жагам̣ бан̃н̃аабзхий’’д̇и вад̇ваа д̇ад̇т̇а сийхасзяяам̣ габбзси. рааху ааг̇анд̇ваа нибаннам̣ бхаг̇аванд̇ам̣ г̇ийвам̣ уннаамзд̇ваа набхамаж̇жхз бун̣н̣ажанд̣̇ам̣ вияа уллогзси. гимид̣̇ам̣ асуринд̣̇аад̇и жа вуд̇д̇з – ‘‘бхаг̇аваа онамид̇ваа ологзд̇ум̣ на сагкиссаамий’’д̇и нааг̇ажчинд̇и. на маяаа, асуринд̣̇а, ад̇хомукзна баарамияо буурид̇аа. уд̣̇д̇хаг̇г̇амзва гад̇ваа д̣̇аанам̣ д̣̇иннанд̇и. д̇ам̣ д̣̇ивасам̣ рааху саран̣ам̣ аг̇амааси. звам̣ бхаг̇аваа акуд̣̇д̣̇аавагаасо д̣̇ассанааяа.
Atha bhagavā tassajjhāsayaṃ viditvā – ‘‘catūsu iriyāpathesu katarena dassessāmī’’ti cintetvā ‘‘ṭhitako nāma nīcopi ucco viya paññāyati. Nipannovassa attānaṃ dassessāmī’’ti ‘‘ānanda, gandhakuṭipariveṇe mañcakaṃ paññāpehī’’ti vatvā tattha sīhaseyyaṃ kappesi. Rāhu āgantvā nipannaṃ bhagavantaṃ gīvaṃ unnāmetvā nabhamajjhe puṇṇacandaṃ viya ullokesi. Kimidaṃ asurindāti ca vutte – ‘‘bhagavā onamitvā oloketuṃ na sakkhissāmī’’ti nāgacchinti. Na mayā, asurinda, adhomukhena pāramiyo pūritā. Uddhaggameva katvā dānaṃ dinnanti. Taṃ divasaṃ rāhu saraṇaṃ agamāsi. Evaṃ bhagavā akhuddāvakāso dassanāya.
жад̇убаарисуд̣̇д̇хисийлзна сийлаваа, д̇ам̣ бана сийлам̣ арияам̣ уд̇д̇амам̣ барисуд̣̇д̇хам̣. д̇знааха – ‘‘арияасийлий’’д̇и. д̇ад̣̇зд̇ам̣ анаваж̇ж̇адтзна гусалам̣. д̇знааха – ‘‘гусаласийлий’’д̇и. гусаласийлзнаад̇и ид̣̇амасса взважанам̣.
Catupārisuddhisīlena sīlavā, taṃ pana sīlaṃ ariyaṃ uttamaṃ parisuddhaṃ. Tenāha – ‘‘ariyasīlī’’ti. Tadetaṃ anavajjaṭṭhena kusalaṃ. Tenāha – ‘‘kusalasīlī’’ti. Kusalasīlenāti idamassa vevacanaṃ.
б̣ахуунам̣ аажарияабаажарияод̇и бхаг̇авад̇о згзгааяа д̇хаммад̣̇зсанааяа жад̇ураасийд̇ибаан̣асахассаани абаримаан̣ааби д̣̇звамануссаа маг̇г̇апалаамад̇ам̣ биванд̇и, д̇асмаа б̣ахуунам̣ аажарияо. саавагавзнзяяаанам̣ бана баажарияод̇и.
Bahūnaṃ ācariyapācariyoti bhagavato ekekāya dhammadesanāya caturāsītipāṇasahassāni aparimāṇāpi devamanussā maggaphalāmataṃ pivanti, tasmā bahūnaṃ ācariyo. Sāvakaveneyyānaṃ pana pācariyoti.
кийн̣агаамарааг̇од̇и зд̇т̇а гаамам̣ бхаг̇авад̇о саб̣б̣зби гилзсаа кийн̣аа. б̣раахман̣о бана д̇з на ж̇аанаад̇и. ад̇д̇ано ж̇аананадтаанзязва г̇ун̣ам̣ гат̇зд̇и. виг̇ад̇ажаабаллод̇и – ‘‘бад̇д̇аман̣д̣анаа жийвараман̣д̣анаа сзнаасанаман̣д̣анаа имасса ваа бууд̇игааяасса…бз… гзланаа бадигзланаа’’д̇и (вибха. 854) звам̣ вуд̇д̇ажаабаллаа вирахид̇о.
Khīṇakāmarāgoti ettha kāmaṃ bhagavato sabbepi kilesā khīṇā. Brāhmaṇo pana te na jānāti. Attano jānanaṭṭhāneyeva guṇaṃ katheti. Vigatacāpalloti – ‘‘pattamaṇḍanā cīvaramaṇḍanā senāsanamaṇḍanā imassa vā pūtikāyassa…pe… kelanā paṭikelanā’’ti (vibha. 854) evaṃ vuttacāpallā virahito.
абаабабурзгкаарод̇и абаабз нава логуд̇д̇арад̇хаммз бурад̇о гад̇ваа вижарад̇и. б̣рахман̃н̃ааяа баж̇ааяаад̇и саарибуд̇д̇амог̇г̇аллаанамахаагассабаад̣̇ибхзд̣̇ааяа б̣раахман̣абаж̇ааяа, зд̇иссааяа жа баж̇ааяа бурзгкааро. аяан̃хи баж̇аа саман̣ам̣ г̇од̇амам̣ бурагкад̇ваа жарад̇ийд̇и ад̇т̇о. аби жа абаабабурзгкаарод̇и на баабам̣ бурзгкааро на баабам̣ бурад̇о гад̇ваа жарад̇и, на баабам̣ ижчад̇ийд̇и ад̇т̇о. гасса? б̣рахман̃н̃ааяа баж̇ааяа. ад̇д̇анаа сад̣̇д̇хим̣ бадивируд̣̇д̇хааяаби б̣раахман̣абаж̇ааяа авируд̣̇д̇хо хид̇асукад̇т̇иго язваад̇и вуд̇д̇ам̣ ход̇и.
Apāpapurekkhāroti apāpe nava lokuttaradhamme purato katvā vicarati. Brahmaññāya pajāyāti sāriputtamoggallānamahākassapādibhedāya brāhmaṇapajāya, etissāya ca pajāya purekkhāro. Ayañhi pajā samaṇaṃ gotamaṃ purakkhatvā caratīti attho. Api ca apāpapurekkhāroti na pāpaṃ purekkhāro na pāpaṃ purato katvā carati, na pāpaṃ icchatīti attho. Kassa? Brahmaññāya pajāya. Attanā saddhiṃ paṭiviruddhāyapi brāhmaṇapajāya aviruddho hitasukhatthiko yevāti vuttaṃ hoti.
д̇ирорадтаад̇и барарадтад̇о. д̇ирож̇анабад̣̇аад̇и бараж̇анабад̣̇ад̇о. бан̃хам̣ бужчид̇ум̣ ааг̇ажчанд̇ийд̇и кад̇д̇ияабан̣д̣ид̇аад̣̇аяо жзва д̣̇зваб̣рахманааг̇аг̇анд̇хаб̣б̣аад̣̇аяо жа – ‘‘бан̃хз абхисан̇карид̇ваа бужчиссаамаа’’д̇и ааг̇ажчанд̇и. д̇ад̇т̇а гзжи бужчааяа ваа д̣̇осам̣ виссаж̇ж̇анасамбадижчанз ваа асамад̇т̇ад̇ам̣ саллагкзд̇ваа абужчид̇ваава д̇ун̣хий нисийд̣̇анд̇и. гзжи бужчанд̇и. гзсан̃жи бхаг̇аваа бужчааяа уссаахам̣ ж̇анзд̇ваа виссаж̇ж̇зд̇и. звам̣ саб̣б̣зсамби д̇зсам̣ вимад̇ияо д̇ийрам̣ бад̇ваа махаасамуд̣̇д̣̇асса уумияо вияа бхаг̇аванд̇ам̣ бад̇ваа бхиж̇ж̇анд̇и.
Tiroraṭṭhāti pararaṭṭhato. Tirojanapadāti parajanapadato. Pañhaṃ pucchituṃ āgacchantīti khattiyapaṇḍitādayo ceva devabrahmanāgagandhabbādayo ca – ‘‘pañhe abhisaṅkharitvā pucchissāmā’’ti āgacchanti. Tattha keci pucchāya vā dosaṃ vissajjanasampaṭicchane vā asamatthataṃ sallakkhetvā apucchitvāva tuṇhī nisīdanti. Keci pucchanti. Kesañci bhagavā pucchāya ussāhaṃ janetvā vissajjeti. Evaṃ sabbesampi tesaṃ vimatiyo tīraṃ patvā mahāsamuddassa ūmiyo viya bhagavantaṃ patvā bhijjanti.
зхи свааг̇ад̇аваад̣̇ийд̇и д̣̇звамануссабаб̣б̣аж̇ид̇аг̇ахадтзсу д̇ам̣ д̇ам̣ ад̇д̇ано санд̇игам̣ ааг̇ад̇ам̣ – ‘‘зхи свааг̇ад̇а’’нд̇и звам̣ вад̣̇ад̇ийд̇и ад̇т̇о. сакилод̇и д̇ад̇т̇а гад̇амам̣ саакаляам̣? ‘‘яаа саа ваажаа нзлаа ган̣н̣асукаа’’д̇иаад̣̇инаа наязна вуд̇д̇асаакалязна саманнааг̇ад̇о, муд̣̇уважанод̇и ад̇т̇о. саммод̣̇агод̇и бадисант̇аарагусало, ааг̇ад̇ааг̇ад̇аанам̣ жад̇уннам̣ барисаанам̣ – ‘‘гажжи, бхигкавз, каманийяам̣, гажжи яаабанийяа’’нд̇иаад̣̇инаа наязна саб̣б̣ам̣ ад̣̇д̇хаанад̣̇арат̇ам̣ вуубасамзнд̇о вияа батамад̇арам̣ саммод̣̇анийяам̣ гат̇ам̣ гад̇д̇аад̇и ад̇т̇о. аб̣бхаагудигод̇и яат̇аа згажжз барисам̣ бад̇ваа т̇ад̣̇д̇хамукаа сан̇гудид̇амукаа хонд̇и, на зд̣̇исо, барисад̣̇ассанзна банасса б̣аалаад̇абасампассзна вияа бад̣̇умам̣ мукабад̣̇умам̣ вигасад̇и бун̣н̣ажанд̣̇асассиригам̣ ход̇и. уд̇д̇аанамукод̇и яат̇аа згажжз нигуж̇ж̇ид̇амукаа вияа самбад̇д̇ааяа барисааяа на гин̃жи гат̇знд̇и, ад̇ид̣̇уллабхагат̇аа хонд̇и, на зваруубо. саман̣о бана г̇од̇амо сулабхагат̇о. на д̇асса санд̇игам̣ ааг̇ад̇ааг̇ад̇аанам̣ – ‘‘гасмаа маяам̣ ид̇хааг̇ад̇аа’’д̇и виббадисааро уббаж̇ж̇ад̇и д̇хаммам̣ бана суд̇ваа ад̇д̇аманаава хонд̇ийд̇и д̣̇ассзд̇и. буб̣б̣абхаасийд̇и бхаасанд̇о жа батамад̇арам̣ бхаасад̇и, д̇ан̃жа ко гаалаяуд̇д̇ам̣ бамаан̣аяуд̇д̇ам̣ ад̇т̇аниссид̇амзва бхаасад̇и, на нирад̇т̇агагат̇ам̣.
Ehisvāgatavādīti devamanussapabbajitagahaṭṭhesu taṃ taṃ attano santikaṃ āgataṃ – ‘‘ehi svāgata’’nti evaṃ vadatīti attho. Sakhiloti tattha katamaṃ sākhalyaṃ? ‘‘Yā sā vācā nelā kaṇṇasukhā’’tiādinā nayena vuttasākhalyena samannāgato, muduvacanoti attho. Sammodakoti paṭisanthārakusalo, āgatāgatānaṃ catunnaṃ parisānaṃ – ‘‘kacci, bhikkhave, khamanīyaṃ, kacci yāpanīya’’ntiādinā nayena sabbaṃ addhānadarathaṃ vūpasamento viya paṭhamataraṃ sammodanīyaṃ kathaṃ kattāti attho. Abbhākuṭikoti yathā ekacce parisaṃ patvā thaddhamukhā saṅkuṭitamukhā honti, na ediso, parisadassanena panassa bālātapasamphassena viya padumaṃ mukhapadumaṃ vikasati puṇṇacandasassirikaṃ hoti. Uttānamukhoti yathā ekacce nikujjitamukhā viya sampattāya parisāya na kiñci kathenti, atidullabhakathā honti, na evarūpo. Samaṇo pana gotamo sulabhakatho. Na tassa santikaṃ āgatāgatānaṃ – ‘‘kasmā mayaṃ idhāgatā’’ti vippaṭisāro uppajjati dhammaṃ pana sutvā attamanāva hontīti dasseti. Pubbabhāsīti bhāsanto ca paṭhamataraṃ bhāsati, tañca kho kālayuttaṃ pamāṇayuttaṃ atthanissitameva bhāsati, na niratthakakathaṃ.
на д̇асмим̣ г̇аамз ваад̇и яад̇т̇а гира бхаг̇аваа бадивасад̇и, д̇ад̇т̇а махзсагкаа д̣̇звад̇аа аарагкам̣ г̇ан̣ханд̇и, д̇ам̣ ниссааяа мануссаанам̣ убад̣̇д̣̇аво на ход̇и, бам̣субисаажагаад̣̇аяоязва хи мануссз вихзтзнд̇и, д̇з д̇аасам̣ аанубхаавзна д̣̇уурам̣ абаггаманд̇и. аби жа бхаг̇авад̇о мзд̇д̇ааб̣алзнаби на амануссаа мануссз вихзтзнд̇и.
Natasmiṃ gāme vāti yattha kira bhagavā paṭivasati, tattha mahesakkhā devatā ārakkhaṃ gaṇhanti, taṃ nissāya manussānaṃ upaddavo na hoti, paṃsupisācakādayoyeva hi manusse viheṭhenti, te tāsaṃ ānubhāvena dūraṃ apakkamanti. Api ca bhagavato mettābalenapi na amanussā manusse viheṭhenti.
сан̇гхийд̇иаад̣̇ийсу анусаасид̇аб̣б̣о саяам̣ ваа уббаад̣̇ид̇о сан̇гхо асса ад̇т̇ийд̇и сан̇гхий. д̇аад̣̇исо жасса г̇ан̣о ад̇т̇ийд̇и г̇ан̣ий. буримабад̣̇ассзва ваа взважанамзд̇ам̣. аажаарасигкаабанавасзна г̇ан̣асса аажарияод̇и г̇ан̣аажарияо . бут̇уд̇ид̇т̇агараананд̇и б̣ахуунам̣ д̇ид̇т̇агараанам̣. яат̇аа ваа д̇ат̇аа ваад̇и язна ваа д̇зна ваа ажзлагаад̣̇имад̇д̇агзнааби гааран̣зна. самуд̣̇ааг̇ажчад̇ийд̇и саманд̇ад̇о убаг̇ажчад̇и абхивад̣дхад̇и.
Saṅghītiādīsu anusāsitabbo sayaṃ vā uppādito saṅgho assa atthīti saṅghī. Tādiso cassa gaṇo atthīti gaṇī. Purimapadasseva vā vevacanametaṃ. Ācārasikkhāpanavasena gaṇassa ācariyoti gaṇācariyo. Puthutitthakarānanti bahūnaṃ titthakarānaṃ. Yathāvā tathā vāti yena vā tena vā acelakādimattakenāpi kāraṇena. Samudāgacchatīti samantato upagacchati abhivaḍḍhati.
ад̇ит̇и но д̇з хонд̇ийд̇и д̇з амхаагам̣ ааг̇анд̇угаа, навагаа баахунагаа хонд̇ийд̇и ад̇т̇о. барияаабун̣аамийд̇и ж̇аанаами. абаримаан̣аван̣н̣од̇и д̇ат̇ааруубзнзва саб̣б̣ан̃н̃унааби аббамзяяаван̣н̣о – ‘‘баг̇зва маад̣̇исзнаа’’д̇и д̣̇ассзд̇и. вуд̇д̇амби жзд̇д̇ам̣ –
Atithi no te hontīti te amhākaṃ āgantukā, navakā pāhunakā hontīti attho. Pariyāpuṇāmīti jānāmi. Aparimāṇavaṇṇoti tathārūpeneva sabbaññunāpi appameyyavaṇṇo – ‘‘pageva mādisenā’’ti dasseti. Vuttampi cettaṃ –
‘‘б̣уд̣̇д̇хоби б̣уд̣̇д̇хасса бхан̣зяяа ван̣н̣ам̣,
‘‘Buddhopi buddhassa bhaṇeyya vaṇṇaṃ,
габбамби жз ан̃н̃амабхаасамаано;
Kappampi ce aññamabhāsamāno;
кийязт̇а габбо жирад̣̇ийгхаманд̇арз,
Khīyetha kappo ciradīghamantare,
ван̣н̣о на кийязт̇а д̇ат̇ааг̇ад̇ассаа’’д̇и.
Vaṇṇo na khīyetha tathāgatassā’’ti.
305. имам̣ бана сад̇т̇у г̇ун̣агат̇ам̣ суд̇ваа д̇з б̣раахман̣аа жинд̇аяим̣су – яат̇аа сон̣ад̣̇ан̣д̣о б̣раахман̣о саман̣асса г̇од̇амасса ван̣н̣з бхан̣ад̇и, аномаг̇ун̣о со бхавам̣ г̇од̇амо; звам̣ д̇асса г̇ун̣з ж̇аанамаанзна ко бана аажариязна ад̇ижирам̣ ад̇хиваасид̇ам̣, ханд̣̇а нам̣ анувад̇д̇аамаад̇и анувад̇д̇им̣су. д̇асмаа звам̣ вуд̇д̇з ‘‘д̇з б̣раахман̣аа’’д̇иаад̣̇и вуд̇д̇ам̣. д̇ад̇т̇а аламзваад̇и яуд̇д̇амзва. аби будосзнаад̇и будосам̣ вужжад̇и баат̇зяяам̣, д̇ам̣ г̇ахзд̇вааби убасан̇гамид̇ум̣ яуд̇д̇амзваад̇и ад̇т̇о. будам̣сзнаад̇иби баато, д̇ассад̇т̇о, будо ам̣сз ассаад̇и будам̣со, д̇зна будам̣сзна. ам̣сзна хи баат̇зяяабудам̣ ваханд̇знаабийд̇и вуд̇д̇ам̣ ход̇и.
305. Imaṃ pana satthu guṇakathaṃ sutvā te brāhmaṇā cintayiṃsu – yathā soṇadaṇḍo brāhmaṇo samaṇassa gotamassa vaṇṇe bhaṇati, anomaguṇo so bhavaṃ gotamo; evaṃ tassa guṇe jānamānena kho pana ācariyena aticiraṃ adhivāsitaṃ, handa naṃ anuvattāmāti anuvattiṃsu. Tasmā evaṃ vutte ‘‘te brāhmaṇā’’tiādi vuttaṃ. Tattha alamevāti yuttameva. Api puṭosenāti puṭosaṃ vuccati pātheyyaṃ, taṃ gahetvāpi upasaṅkamituṃ yuttamevāti attho. Puṭaṃsenātipi pāṭho, tassattho, puṭo aṃse assāti puṭaṃso, tena puṭaṃsena. Aṃsena hi pātheyyapuṭaṃ vahantenāpīti vuttaṃ hoti.
сон̣ад̣̇ан̣д̣абаривид̇аггаван̣н̣анаа
Soṇadaṇḍaparivitakkavaṇṇanā
306-308. д̇ированасан̣д̣аг̇ад̇ассаад̇и анд̇ованасан̣д̣з г̇ад̇асса, вихаараб̣бханд̇арам̣ бавидтассаад̇и ад̇т̇о. ан̃ж̇алим̣ бан̣аамзд̇ваад̇и зд̇з убхад̇обагкигаа, д̇з звам̣ жинд̇аяим̣су – ‘‘сажз но мижчаад̣̇идтигаа жод̣̇зссанд̇и – ‘гасмаа д̇умхз саман̣ам̣ г̇од̇амам̣ ванд̣̇ид̇т̇аа’д̇и? д̇зсам̣ – ‘гим̣ ан̃ж̇алимад̇д̇агаран̣знааби ванд̣̇анам̣ наама ход̇ий’д̇и вагкаама. сажз но саммаад̣̇идтигаа жод̣̇зссанд̇и – ‘гасмаа д̇умхз бхаг̇аванд̇ам̣ на ванд̣̇ид̇т̇аа’д̇и. ‘гим̣ сийсзна бхуумияам̣ бахаранд̇знзва ванд̣̇анам̣ наама ход̇и, нану ан̃ж̇алигаммамби ванд̣̇анам̣ зваа’д̇и вагкаамаа’’д̇и. наамаг̇од̇д̇анд̇и ‘‘бхо, г̇од̇ама, ахам̣ асугасса буд̇д̇о д̣̇ад̇д̇о наама, мид̇д̇о наама, ид̇хааг̇ад̇о’’д̇и вад̣̇анд̇аа наамам̣ саавзнд̇и наама. ‘‘бхо, г̇од̇ама, ахам̣ ваасздто наама, гажжаано наама, ид̇хааг̇ад̇о’’д̇и вад̣̇анд̇аа г̇од̇д̇ам̣ саавзнд̇и наама. зд̇з гира д̣̇алид̣̇д̣̇аа ж̇ин̣н̣аа гулабуд̇д̇аа ‘‘барисамаж̇жхз наамаг̇од̇д̇авасзна баагадаа бхависсаамаа’’д̇и звамагам̣су. яз бана д̇ун̣хийбхууд̇аа нисийд̣̇им̣су, д̇з гзраадигаа жзва анд̇хаб̣аалаа жа. д̇ад̇т̇а гзраадигаа – ‘‘згам̣ д̣̇вз гат̇аасаллаабзби гаронд̇о виссаасиго ход̇и, ат̇а виссаасз сад̇и згам̣ д̣̇вз бхигкаа ад̣̇аад̇ум̣ на яуд̇д̇а’’нд̇и д̇ад̇о ад̇д̇аанам̣ можзд̇ваа д̇ун̣хий нисийд̣̇анд̇и. анд̇хаб̣аалаа ан̃н̃аан̣ад̇ааязва авагкид̇д̇амад̇д̇игаабин̣д̣о вияа яад̇т̇а гад̇т̇ажи д̇ун̣хийбхууд̇аа нисийд̣̇анд̇и.
306-308.Tirovanasaṇḍagatassāti antovanasaṇḍe gatassa, vihārabbhantaraṃ paviṭṭhassāti attho. Añjaliṃ paṇāmetvāti ete ubhatopakkhikā, te evaṃ cintayiṃsu – ‘‘sace no micchādiṭṭhikā codessanti – ‘kasmā tumhe samaṇaṃ gotamaṃ vanditthā’ti? Tesaṃ – ‘kiṃ añjalimattakaraṇenāpi vandanaṃ nāma hotī’ti vakkhāma. Sace no sammādiṭṭhikā codessanti – ‘kasmā tumhe bhagavantaṃ na vanditthā’ti. ‘Kiṃ sīsena bhūmiyaṃ paharanteneva vandanaṃ nāma hoti, nanu añjalikammampi vandanaṃ evā’ti vakkhāmā’’ti. Nāmagottanti ‘‘bho, gotama, ahaṃ asukassa putto datto nāma, mitto nāma, idhāgato’’ti vadantā nāmaṃ sāventi nāma. ‘‘Bho, gotama, ahaṃ vāseṭṭho nāma, kaccāno nāma, idhāgato’’ti vadantā gottaṃ sāventi nāma. Ete kira daliddā jiṇṇā kulaputtā ‘‘parisamajjhe nāmagottavasena pākaṭā bhavissāmā’’ti evamakaṃsu. Ye pana tuṇhībhūtā nisīdiṃsu, te kerāṭikā ceva andhabālā ca. Tattha kerāṭikā – ‘‘ekaṃ dve kathāsallāpepi karonto vissāsiko hoti, atha vissāse sati ekaṃ dve bhikkhā adātuṃ na yutta’’nti tato attānaṃ mocetvā tuṇhī nisīdanti. Andhabālā aññāṇatāyeva avakkhittamattikāpiṇḍo viya yattha katthaci tuṇhībhūtā nisīdanti.
б̣раахман̣абан̃н̃ад̇д̇иван̣н̣анаа
Brāhmaṇapaññattivaṇṇanā
309-310. жзд̇асаа жзд̇обаривид̇агганд̇и бхаг̇аваа – ‘‘аяам̣ б̣раахман̣о ааг̇ад̇агаалад̇о бадтааяа ад̇хомуко т̇ад̣̇д̇хаг̇ад̇д̇о гим̣ жинд̇аяамаано нисинно, гим̣ ну ко жинд̇зд̇ий’’д̇и ааваж̇ж̇анд̇о ад̇д̇ано жзд̇асаа д̇асса жид̇д̇ам̣ ан̃н̃ааси. д̇зна вуд̇д̇ам̣ – ‘‘жзд̇асаа жзд̇обаривид̇аггаман̃н̃ааяаа’’д̇и. вихан̃н̃ад̇ийд̇и вигхаад̇ам̣ аабаж̇ж̇ад̇и. анувилогзд̇ваа барисанд̇и бхаг̇авад̇о сагасамаяз бан̃хабужчанзна уд̣̇агз мияамаано угкибид̇ваа т̇алз табид̇о вияа самабассад̣̇д̇хагааяажид̇д̇о худ̇ваа барисам̣ сан̇г̇ан̣ханад̇т̇ам̣ д̣̇идтисан̃ж̇аанзнзва ‘‘убад̇хаарзнд̇у мз бхонд̇о важана’’нд̇и вад̣̇анд̇о вияа анувилогзд̇ваа барисам̣ бхаг̇аванд̇ам̣ зд̇ад̣̇авожа.
309-310.Cetasā cetoparivitakkanti bhagavā – ‘‘ayaṃ brāhmaṇo āgatakālato paṭṭhāya adhomukho thaddhagatto kiṃ cintayamāno nisinno, kiṃ nu kho cintetī’’ti āvajjanto attano cetasā tassa cittaṃ aññāsi. Tena vuttaṃ – ‘‘cetasā cetoparivitakkamaññāyā’’ti. Vihaññatīti vighātaṃ āpajjati. Anuviloketvā parisanti bhagavato sakasamaye pañhapucchanena udake miyamāno ukkhipitvā thale ṭhapito viya samapassaddhakāyacitto hutvā parisaṃ saṅgaṇhanatthaṃ diṭṭhisañjāneneva ‘‘upadhārentu me bhonto vacana’’nti vadanto viya anuviloketvā parisaṃ bhagavantaṃ etadavoca.
311-313. суж̇ам̣ баг̇г̇ан̣ханд̇аананд̇и яан̃н̃аяаж̇анад̇т̇ааяа суж̇ам̣ г̇ан̣ханд̇зсу б̣раахман̣зсу батамо ваа д̣̇уд̇ияо ваад̇и ад̇т̇о. суж̇ааяа д̣̇ияяамаанам̣ махааяааг̇ам̣ бадиг̇г̇ан̣ханд̇аананд̇и бораан̣аа. ид̇и б̣раахман̣о сагасамаяавасзна саммад̣̇зва бан̃хам̣ виссаж̇ж̇зси. бхаг̇аваа бана висзсад̇о уд̇д̇амаб̣раахман̣асса д̣̇ассанад̇т̇ам̣ – ‘‘имзсам̣ банаа’’д̇иаад̣̇имааха. зд̇ад̣̇авожунд̇и сажз ж̇аад̇иван̣н̣аманд̇асамбанно б̣раахман̣о на ход̇и, ат̇а го жарахи логз б̣раахман̣о бхависсад̇и? наасзд̇и но аяам̣ сон̣ад̣̇ан̣д̣о, ханд̣̇асса ваад̣̇ам̣ бадигкибиссаамаад̇и жинд̇зд̇ваа зд̇ад̣̇авожум̣. абавад̣̇ад̇ийд̇и бадигкибад̇и. анубагканд̣̇ад̇ийд̇и анубависад̇и. ид̣̇ам̣ – ‘‘сажз д̇вам̣ басаад̣̇авасзна саман̣ам̣ г̇од̇амам̣ саран̣ам̣ г̇анд̇угаамо, г̇ажча; маа б̣раахман̣асса самаяам̣ бхинд̣̇ий’’д̇и ад̇хиббааязна аахам̣су.
311-313.Sujaṃ paggaṇhantānanti yaññayajanatthāya sujaṃ gaṇhantesu brāhmaṇesu paṭhamo vā dutiyo vāti attho. Sujāya diyyamānaṃ mahāyāgaṃ paṭiggaṇhantānanti porāṇā. Iti brāhmaṇo sakasamayavasena sammadeva pañhaṃ vissajjesi. Bhagavā pana visesato uttamabrāhmaṇassa dassanatthaṃ – ‘‘imesaṃ panā’’tiādimāha. Etadavocunti sace jātivaṇṇamantasampanno brāhmaṇo na hoti, atha ko carahi loke brāhmaṇo bhavissati? Nāseti no ayaṃ soṇadaṇḍo, handassa vādaṃ paṭikkhipissāmāti cintetvā etadavocuṃ. Apavadatīti paṭikkhipati. Anupakkhandatīti anupavisati. Idaṃ – ‘‘sace tvaṃ pasādavasena samaṇaṃ gotamaṃ saraṇaṃ gantukāmo, gaccha; mā brāhmaṇassa samayaṃ bhindī’’ti adhippāyena āhaṃsu.
314. зд̇ад̣̇авожаад̇и имзсу б̣раахман̣зсу звам̣ згаббахаарзнзва вираванд̇зсу ‘‘аяам̣ гат̇аа барияосаанам̣ на г̇амиссад̇и, ханд̣̇а нз ниссад̣̇д̣̇з гад̇ваа сон̣ад̣̇ан̣д̣знзва сад̣̇д̇хим̣ гат̇змий’’д̇и жинд̇зд̇ваа – ‘‘зд̇ам̣ сажз ко д̇умхаага’’нд̇иаад̣̇игам̣ важанам̣ авожа.
314.Etadavocāti imesu brāhmaṇesu evaṃ ekappahāreneva viravantesu ‘‘ayaṃ kathā pariyosānaṃ na gamissati, handa ne nissadde katvā soṇadaṇḍeneva saddhiṃ kathemī’’ti cintetvā – ‘‘etaṃ sace kho tumhāka’’ntiādikaṃ vacanaṃ avoca.
315-316. сахад̇хаммзнаад̇и сагааран̣зна. самасамод̇и табзд̇ваа згад̣̇зсасамад̇д̇ам̣ самабхаавзна само, саб̣б̣аагаарзна самод̇и ад̇т̇о. ахамасса маад̇аабид̇аро ж̇аанаамийд̇и бхаг̇инияаа буд̇д̇асса маад̇аабид̇аро гим̣ на ж̇ааниссад̇и, гулагодибарид̣̇ийбанам̣ санд̇хааязва вад̣̇ад̇и. мусааваад̣̇амби бхан̣зяяаад̇и ад̇т̇абхан̃ж̇анагам̣ мусааваад̣̇ам̣ гат̇зяяа. гим̣ ван̣н̣о гариссад̇ийд̇и аб̣бханд̇арз г̇ун̣з асад̇и гим̣ гариссад̇и? гимасса б̣раахман̣абхаавам̣ рагкид̇ум̣ сагкиссад̇ийд̇и ад̇т̇о. ат̇ааби сияаа буна – ‘‘багад̇исийлз тид̇асса б̣раахман̣абхаавам̣ саад̇хзнд̇ий’’д̇и звамби сийламзва саад̇хзссад̇и, д̇асмим̣ хисса асад̇и б̣раахман̣абхааво наахосийд̇и саммохамад̇д̇ам̣ ван̣н̣аад̣̇аяо. ид̣̇ам̣ бана суд̇ваа д̇з б̣раахман̣аа – ‘‘сабхаавам̣ аажарияо ааха, агааран̣аава маяам̣ уж̇жхааяимхаа’’д̇и д̇ун̣хий ахзсум̣.
315-316.Sahadhammenāti sakāraṇena. Samasamoti ṭhapetvā ekadesasamattaṃ samabhāvena samo, sabbākārena samoti attho. Ahamassa mātāpitaro jānāmīti bhaginiyā puttassa mātāpitaro kiṃ na jānissati, kulakoṭiparidīpanaṃ sandhāyeva vadati. Musāvādampi bhaṇeyyāti atthabhañjanakaṃ musāvādaṃ katheyya. Kiṃ vaṇṇo karissatīti abbhantare guṇe asati kiṃ karissati? Kimassa brāhmaṇabhāvaṃ rakkhituṃ sakkhissatīti attho. Athāpi siyā puna – ‘‘pakatisīle ṭhitassa brāhmaṇabhāvaṃ sādhentī’’ti evampi sīlameva sādhessati, tasmiṃ hissa asati brāhmaṇabhāvo nāhosīti sammohamattaṃ vaṇṇādayo. Idaṃ pana sutvā te brāhmaṇā – ‘‘sabhāvaṃ ācariyo āha, akāraṇāva mayaṃ ujjhāyimhā’’ti tuṇhī ahesuṃ.
сийлабан̃н̃аагат̇ааван̣н̣анаа
Sīlapaññākathāvaṇṇanā
317. д̇ад̇о бхаг̇аваа ‘гат̇ид̇о б̣раахман̣зна бан̃хо, гим̣ банзд̇т̇а бад̇идтаад̇ум̣ сагкиссад̇и, на сагкиссад̇ий’д̇и? д̇асса виймам̣санад̇т̇ам̣ – ‘‘имзсам̣ бана б̣раахман̣аа’’д̇иаад̣̇имааха. сийлабарид̇ход̇аад̇и сийлабарисуд̣̇д̇хаа. яад̇т̇а сийлам̣ д̇ад̇т̇а бан̃н̃аад̇и яасмим̣ буг̇г̇алз сийлам̣, д̇ад̇т̇зва бан̃н̃аа, гуд̇о д̣̇уссийлз бан̃н̃аа? бан̃н̃аарахид̇з ваа ж̇ал̣з зл̣амууг̇з гуд̇о сийланд̇и? сийлабан̃н̃аан̣анд̇и сийлан̃жа бан̃н̃аан̣ан̃жа сийлабан̃н̃аан̣ам̣. бан̃н̃аан̣анд̇и бан̃н̃ааязва. звамзд̇ам̣ б̣раахман̣аад̇и бхаг̇аваа б̣раахман̣асса важанам̣ ануж̇аананд̇о ааха. д̇ад̇т̇а сийлабарид̇ход̇аа бан̃н̃аад̇и жад̇убаарисуд̣̇д̇хисийлзна д̇ход̇аа. гат̇ам̣ бана сийлзна бан̃н̃ам̣ д̇ховад̇ийд̇и? яасса бут̇уж̇ж̇анасса сийлам̣ садтиасийд̇ивассаани акан̣д̣ам̣ ход̇и, со маран̣агаалзби саб̣б̣агилзсз гхаад̇зд̇ваа сийлзна бан̃н̃ам̣ д̇ховид̇ваа арахад̇д̇ам̣ г̇ан̣хаад̇и. ганд̣̇арасаалабаривзн̣з махаасадтивассад̇т̇зро вияа. т̇зрз гира маран̣аман̃жз нибаж̇ж̇ид̇ваа б̣алававзд̣̇анааяа нид̇т̇унанд̇з , д̇иссамахаарааж̇аа ‘‘т̇зрам̣ бассиссаамий’’д̇и г̇анд̇ваа баривзн̣ад̣̇ваарз тид̇о д̇ам̣ сад̣̇д̣̇ам̣ суд̇ваа бужчи – ‘‘гасса сад̣̇д̣̇о аяа’’нд̇и? т̇зрасса нид̇т̇унанасад̣̇д̣̇од̇и. ‘‘баб̣б̣аж̇ж̇ааяа садтивассзна взд̣̇анаабариг̇г̇ахамад̇д̇амби на гад̇ам̣, на д̣̇аани нам̣ ванд̣̇иссаамий’’д̇и нивад̇д̇ид̇ваа махааб̣од̇хим̣ ванд̣̇ид̇ум̣ г̇ад̇о. д̇ад̇о убадтаагад̣̇ахаро т̇зрам̣ ааха – ‘‘гим̣ но, бханд̇з, лаж̇ж̇аабзт̇а, сад̣̇д̇хоби рааж̇аа виббадисаарий худ̇ваа на ванд̣̇иссаамий’’д̇и г̇ад̇од̇и. гасмаа аавусод̇и? д̇умхаагам̣ нид̇т̇унанасад̣̇д̣̇ам̣ суд̇ваад̇и. ‘‘д̇зна хи мз огаасам̣ гарот̇аа’’д̇и вад̇ваа взд̣̇анам̣ вигкамбхид̇ваа арахад̇д̇ам̣ бад̇ваа д̣̇ахарасса сан̃н̃ам̣ ад̣̇ааси – ‘‘г̇ажчаавусо, ид̣̇аани рааж̇аанам̣ амхз ванд̣̇аабзхий’’д̇и. д̣̇ахаро г̇анд̇ваа – ‘‘ид̣̇аани гира т̇зрам̣, ванд̣̇ат̇аа’’д̇и ааха. рааж̇аа сам̣сумаарабад̇ид̇зна т̇зрам̣ ванд̣̇анд̇о – ‘‘наахам̣ аяяасса арахад̇д̇ам̣ ванд̣̇аами, бут̇уж̇ж̇анабхуумияам̣ бана тад̇ваа рагкид̇асийламзва ванд̣̇аамий’’д̇и ааха, звам̣ сийлзна бан̃н̃ам̣ д̇ховад̇и наама. яасса бана аб̣бханд̇арз сийласам̣варо над̇т̇и, уг̇гхаадид̇ан̃н̃уд̇ааяа бана жад̇уббад̣̇игаг̇аат̇аабарияосаанз бан̃н̃ааяа сийлам̣ д̇ховид̇ваа саха бадисамбхид̣̇аахи арахад̇д̇ам̣ баабун̣аад̇и. аяам̣ бан̃н̃ааяа сийлам̣ д̇ховад̇и наама. сзяяат̇ааби санд̇ад̇имахаамад̇д̇о.
317. Tato bhagavā ‘kathito brāhmaṇena pañho, kiṃ panettha patiṭṭhātuṃ sakkhissati, na sakkhissatī’ti? Tassa vīmaṃsanatthaṃ – ‘‘imesaṃ pana brāhmaṇā’’tiādimāha. Sīlaparidhotāti sīlaparisuddhā. Yattha sīlaṃ tattha paññāti yasmiṃ puggale sīlaṃ, tattheva paññā, kuto dussīle paññā? Paññārahite vā jaḷe eḷamūge kuto sīlanti? Sīlapaññāṇanti sīlañca paññāṇañca sīlapaññāṇaṃ. Paññāṇanti paññāyeva. Evametaṃ brāhmaṇāti bhagavā brāhmaṇassa vacanaṃ anujānanto āha. Tattha sīlaparidhotā paññāti catupārisuddhisīlena dhotā. Kathaṃ pana sīlena paññaṃ dhovatīti? Yassa puthujjanassa sīlaṃ saṭṭhiasītivassāni akhaṇḍaṃ hoti, so maraṇakālepi sabbakilese ghātetvā sīlena paññaṃ dhovitvā arahattaṃ gaṇhāti. Kandarasālapariveṇe mahāsaṭṭhivassatthero viya. There kira maraṇamañce nipajjitvā balavavedanāya nitthunante , tissamahārājā ‘‘theraṃ passissāmī’’ti gantvā pariveṇadvāre ṭhito taṃ saddaṃ sutvā pucchi – ‘‘kassa saddo aya’’nti? Therassa nitthunanasaddoti. ‘‘Pabbajjāya saṭṭhivassena vedanāpariggahamattampi na kataṃ, na dāni naṃ vandissāmī’’ti nivattitvā mahābodhiṃ vandituṃ gato. Tato upaṭṭhākadaharo theraṃ āha – ‘‘kiṃ no, bhante, lajjāpetha, saddhopi rājā vippaṭisārī hutvā na vandissāmī’’ti gatoti. Kasmā āvusoti? Tumhākaṃ nitthunanasaddaṃ sutvāti. ‘‘Tena hi me okāsaṃ karothā’’ti vatvā vedanaṃ vikkhambhitvā arahattaṃ patvā daharassa saññaṃ adāsi – ‘‘gacchāvuso, idāni rājānaṃ amhe vandāpehī’’ti. Daharo gantvā – ‘‘idāni kira theraṃ, vandathā’’ti āha. Rājā saṃsumārapatitena theraṃ vandanto – ‘‘nāhaṃ ayyassa arahattaṃ vandāmi, puthujjanabhūmiyaṃ pana ṭhatvā rakkhitasīlameva vandāmī’’ti āha, evaṃ sīlena paññaṃ dhovati nāma. Yassa pana abbhantare sīlasaṃvaro natthi, ugghāṭitaññutāya pana catuppadikagāthāpariyosāne paññāya sīlaṃ dhovitvā saha paṭisambhidāhi arahattaṃ pāpuṇāti. Ayaṃ paññāya sīlaṃ dhovati nāma. Seyyathāpi santatimahāmatto.
318. гад̇амам̣ бана д̇ам̣ б̣раахман̣аад̇и гасмаа ааха? бхаг̇аваа гира жинд̇зси – ‘‘б̣раахман̣аа б̣раахман̣асамаяз бан̃жасийлаани ‘сийла’нд̇и бан̃н̃аабзнд̇и, взд̣̇ад̇д̇аяауг̇г̇ахан̣абан̃н̃аа бан̃н̃аад̇и. убаривисзсам̣ на ж̇аананд̇и. яам̣нуунаахам̣ б̣раахман̣асса уд̇д̇аривисзсабхууд̇ам̣ маг̇г̇асийлам̣, паласийлам̣, маг̇г̇абан̃н̃ам̣, палабан̃н̃ан̃жа д̣̇ассзд̇ваа арахад̇д̇анигуудзна д̣̇зсанам̣ нидтабзяяа’’нд̇и. ат̇а нам̣ гат̇зд̇угамяад̇ааяа бужчанд̇о – ‘‘гад̇амам̣ бана д̇ам̣, б̣раахман̣а, сийлам̣ гад̇амаа саа бан̃н̃аа’’д̇и ааха. ат̇а б̣раахман̣о – ‘‘маяаа сагасамаяавасзна бан̃хо виссаж̇ж̇ид̇о. саман̣о бана мам̣ г̇од̇амо буна нивад̇д̇ид̇ваа бужчад̇и, ид̣̇ааниссаахам̣ жид̇д̇ам̣ барид̇осзд̇ваа виссаж̇ж̇ид̇ум̣ саггун̣зяяам̣ ваа на ваа? сажз на сагкиссам̣ батамам̣ уббаннааби мз лаж̇ж̇аа бхиж̇ж̇иссад̇и. асаггонд̇асса бана на саггомийд̇и важанз д̣̇осо над̇т̇ий’’д̇и буна нивад̇д̇ид̇ваа бхаг̇авад̇оязва бхаарам̣ гаронд̇о ‘‘зд̇д̇агабарамаава маяа’’нд̇иаад̣̇имааха. д̇ад̇т̇а зд̇д̇агабарамаад̇и зд̇д̇агам̣ сийлабан̃н̃аан̣анд̇и важанамзва барамам̣ амхаагам̣, д̇з маяам̣ зд̇д̇агабарамаа, ид̇о барам̣ зд̇асса бхаасид̇асса ад̇т̇ам̣ на ж̇аанаамаад̇и ад̇т̇о.
318.Katamaṃ pana taṃ brāhmaṇāti kasmā āha? Bhagavā kira cintesi – ‘‘brāhmaṇā brāhmaṇasamaye pañcasīlāni ‘sīla’nti paññāpenti, vedattayauggahaṇapaññā paññāti. Uparivisesaṃ na jānanti. Yaṃnūnāhaṃ brāhmaṇassa uttarivisesabhūtaṃ maggasīlaṃ, phalasīlaṃ, maggapaññaṃ, phalapaññañca dassetvā arahattanikūṭena desanaṃ niṭṭhapeyya’’nti. Atha naṃ kathetukamyatāya pucchanto – ‘‘katamaṃ pana taṃ, brāhmaṇa, sīlaṃ katamā sā paññā’’ti āha. Atha brāhmaṇo – ‘‘mayā sakasamayavasena pañho vissajjito. Samaṇo pana maṃ gotamo puna nivattitvā pucchati, idānissāhaṃ cittaṃ paritosetvā vissajjituṃ sakkuṇeyyaṃ vā na vā? Sace na sakkhissaṃ paṭhamaṃ uppannāpi me lajjā bhijjissati. Asakkontassa pana na sakkomīti vacane doso natthī’’ti puna nivattitvā bhagavatoyeva bhāraṃ karonto ‘‘ettakaparamāva maya’’ntiādimāha. Tattha ettakaparamāti ettakaṃ sīlapaññāṇanti vacanameva paramaṃ amhākaṃ, te mayaṃ ettakaparamā, ito paraṃ etassa bhāsitassa atthaṃ na jānāmāti attho.
ат̇асса бхаг̇аваа сийлабан̃н̃ааяа муулабхууд̇асса д̇ат̇ааг̇ад̇асса уббаад̣̇ад̇о бабхуд̇и сийлабан̃н̃аан̣ам̣ д̣̇ассзд̇ум̣ – ‘‘ид̇ха б̣раахман̣а, д̇ат̇ааг̇ад̇о’’д̇иаад̣̇имааха. д̇ассад̇т̇о сааман̃н̃апалз вуд̇д̇анаязнзва взд̣̇ид̇аб̣б̣о, аяам̣ бана висзсо, ид̇ха д̇ивид̇хамби сийлам̣ – ‘‘ид̣̇амбисса ход̇и сийласми’’нд̇и звам̣ сийламижжзва нияяаад̇ид̇ам̣ батамаж̇жхаанаад̣̇ийни жад̇д̇аари жхаанаани ад̇т̇ад̇о бан̃н̃аасамбад̣̇аа. звам̣ бан̃н̃аавасзна бана анияяаад̇зд̇ваа вибассанаабан̃н̃ааяа бад̣̇адтаанабхаавамад̇д̇зна д̣̇ассзд̇ваа вибассанаабан̃н̃аад̇о бадтааяа бан̃н̃аа нияяаад̇ид̇аад̇и.
Athassa bhagavā sīlapaññāya mūlabhūtassa tathāgatassa uppādato pabhuti sīlapaññāṇaṃ dassetuṃ – ‘‘idha brāhmaṇa, tathāgato’’tiādimāha. Tassattho sāmaññaphale vuttanayeneva veditabbo, ayaṃ pana viseso, idha tividhampi sīlaṃ – ‘‘idampissa hoti sīlasmi’’nti evaṃ sīlamicceva niyyātitaṃ paṭhamajjhānādīni cattāri jhānāni atthato paññāsampadā. Evaṃ paññāvasena pana aniyyātetvā vipassanāpaññāya padaṭṭhānabhāvamattena dassetvā vipassanāpaññāto paṭṭhāya paññā niyyātitāti.
сон̣ад̣̇ан̣д̣аубаасагад̇д̇абадивзд̣̇анаагат̇аа
Soṇadaṇḍaupāsakattapaṭivedanākathā
319-322. сваад̇анааяаад̇и бад̣̇асса ад̇т̇о аж̇ж̇ад̇анааяаад̇и зд̇т̇а вуд̇д̇анаязнзва взд̣̇ид̇аб̣б̣о. д̇зна мам̣ саа барисаа барибхавзяяаад̇и д̇зна д̇умхз д̣̇уурад̇ова д̣̇исваа аасанаа вудтид̇агааран̣зна мам̣ саа барисаа – ‘‘аяам̣ сон̣ад̣̇ан̣д̣о бажчимаваяз тид̇о махаллаго, г̇од̇амо бана д̣̇ахаро яуваа над̇д̇аабисса наббаход̇и, со наама ад̇д̇ано над̇д̇умад̇д̇абхаавамби аббад̇д̇асса аасанаа вудтаад̇ий’’д̇и барибхавзяяа. аасанаа мз д̇ам̣ бхавам̣ г̇од̇амо бажжудтаананд̇и мама аг̇ааравзна авудтаанам̣ наама над̇т̇и, бхог̇анаасанабхаязна бана на вудтахиссаами, д̇ам̣ д̇умхз хи жзва маяаа жа н̃аад̇ум̣ ваддад̇и. д̇асмаа аасанаа мз зд̇ам̣ бхавам̣ г̇од̇амо бажжудтаанам̣ д̇хаарзд̇ууд̇и, иминаа гира сад̣̇исо гухаго д̣̇уллабхо, бхаг̇авад̇и банасса аг̇ааравам̣ наама над̇т̇и, д̇асмаа бхог̇анаасанабхаяаа гуханавасзна звам̣ вад̣̇ад̇и. барабад̣̇зсуби зсзва наяо. д̇хаммияаа гат̇ааяаад̇иаад̣̇ийсу д̇ан̇кан̣аануруубааяа д̇хаммияаа гат̇ааяа д̣̇идтад̇хаммигасамбарааяигам̣ ад̇т̇ам̣ санд̣̇ассзд̇ваа гусалз д̇хаммз самаад̣̇абзд̇ваа г̇ан̣хаабзд̇ваа. д̇ад̇т̇а нам̣ самуд̇д̇зж̇зд̇ваа сауссаахам̣ гад̇ваа д̇ааяа жа сауссаахад̇ааяа ан̃н̃зхи жа виж̇ж̇амаанаг̇ун̣зхи самбахам̣сзд̇ваа д̇хаммарад̇анавассам̣ вассид̇ваа удтааяаасанаа баггаами. б̣раахман̣о бана ад̇д̇ано гухагад̇ааяа звамби бхаг̇авад̇и д̇хаммавассам̣ вассид̇з висзсам̣ ниб̣б̣ад̇д̇зд̇ум̣ наасагки. гзваламасса ааяад̇им̣ ниб̣б̣аанад̇т̇ааяа ваасанаабхааг̇ияааяа жа саб̣б̣аа буримабажчимагат̇аа ахосийд̇и.
319-322.Svātanāyāti padassa attho ajjatanāyāti ettha vuttanayeneva veditabbo. Tena maṃ sā parisā paribhaveyyāti tena tumhe dūratova disvā āsanā vuṭṭhitakāraṇena maṃ sā parisā – ‘‘ayaṃ soṇadaṇḍo pacchimavaye ṭhito mahallako, gotamo pana daharo yuvā nattāpissa nappahoti, so nāma attano nattumattabhāvampi appattassa āsanā vuṭṭhātī’’ti paribhaveyya. Āsanā me taṃ bhavaṃ gotamo paccuṭṭhānanti mama agāravena avuṭṭhānaṃ nāma natthi, bhoganāsanabhayena pana na vuṭṭhahissāmi, taṃ tumhe hi ceva mayā ca ñātuṃ vaṭṭati. Tasmā āsanā me etaṃ bhavaṃ gotamo paccuṭṭhānaṃ dhāretūti, iminā kira sadiso kuhako dullabho, bhagavati panassa agāravaṃ nāma natthi, tasmā bhoganāsanabhayā kuhanavasena evaṃ vadati. Parapadesupi eseva nayo. Dhammiyā kathāyātiādīsu taṅkhaṇānurūpāya dhammiyā kathāya diṭṭhadhammikasamparāyikaṃ atthaṃ sandassetvā kusale dhamme samādapetvā gaṇhāpetvā. Tattha naṃ samuttejetvā saussāhaṃ katvā tāya ca saussāhatāya aññehi ca vijjamānaguṇehi sampahaṃsetvā dhammaratanavassaṃ vassitvā uṭṭhāyāsanā pakkāmi. Brāhmaṇo pana attano kuhakatāya evampi bhagavati dhammavassaṃ vassite visesaṃ nibbattetuṃ nāsakkhi. Kevalamassa āyatiṃ nibbānatthāya vāsanābhāgiyāya ca sabbā purimapacchimakathā ahosīti.
ид̇и суман̇г̇алавилаасинияаа д̣̇ийгханигааяадтагат̇ааяам̣
Iti sumaṅgalavilāsiniyā dīghanikāyaṭṭhakathāyaṃ
сон̣ад̣̇ан̣д̣асуд̇д̇аван̣н̣анаа нидтид̇аа.
Soṇadaṇḍasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / д̣̇ийгханигааяа • Dīghanikāya / 4. сон̣ад̣̇ан̣д̣асуд̇д̇ам̣ • 4. Soṇadaṇḍasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / д̣̇ийгханигааяа (дийгаа) • Dīghanikāya (ṭīkā) / 4. сон̣ад̣̇ан̣д̣асуд̇д̇аван̣н̣анаа • 4. Soṇadaṇḍasuttavaṇṇanā
