| Library / Tipiṭaka / තිපිටක • Tipiṭaka / විමානවත්‌ථු-අට්‌ඨකථා • Vimānavatthu-aṭṭhakathā |
6. සොණදින්‌නාවිමානවණ්‌ණනා
6. Soṇadinnāvimānavaṇṇanā
අභික්‌කන්‌තෙන වණ්‌ණෙනාති සොණදින්‌නාවිමානං. තස්‌ස කා උප්‌පත්‌ති? භගවා සාවත්‌ථියං විහරති ජෙතවනෙ. තෙන ච සමයෙන නාළන්‌දායං සොණදින්‌නා නාම එකා උපාසිකා සද්‌ධා පසන්‌නා භික්‌ඛූනං චතූහි පච්‌චයෙහි සක්‌කච්‌චං උපට්‌ඨහන්‌තී සුවිසුද්‌ධනිච්‌චසීලා අට්‌ඨඞ්‌ගසමන්‌නාගතං උපොසථම්‌පි උපවසති. සා ධම්‌මසවනසප්‌පායං පටිලභිත්‌වා උපනිස්‌සයසම්‌පන්‌නතාය චතුසච්‌චකම්‌මට්‌ඨානං පරිබ්‍රූහන්‌තී සොතාපන්‌නා අහොසි. අථ අඤ්‌ඤතරෙන රොගෙන ඵුට්‌ඨා කාලං කත්‌වා තාවතිංසෙසු උප්‌පජ්‌ජි. තං ආයස්‌මා මහාමොග්‌ගල්‌ලානො –
Abhikkantenavaṇṇenāti soṇadinnāvimānaṃ. Tassa kā uppatti? Bhagavā sāvatthiyaṃ viharati jetavane. Tena ca samayena nāḷandāyaṃ soṇadinnā nāma ekā upāsikā saddhā pasannā bhikkhūnaṃ catūhi paccayehi sakkaccaṃ upaṭṭhahantī suvisuddhaniccasīlā aṭṭhaṅgasamannāgataṃ uposathampi upavasati. Sā dhammasavanasappāyaṃ paṭilabhitvā upanissayasampannatāya catusaccakammaṭṭhānaṃ paribrūhantī sotāpannā ahosi. Atha aññatarena rogena phuṭṭhā kālaṃ katvā tāvatiṃsesu uppajji. Taṃ āyasmā mahāmoggallāno –
217.
217.
‘‘අභික්‌කන්‌තෙන වණ්‌ණෙන, යා ත්‌වං තිට්‌ඨසි දෙවතෙ;
‘‘Abhikkantena vaṇṇena, yā tvaṃ tiṭṭhasi devate;
ඔභාසෙන්‌තී දිසා සබ්‌බා, ඔසධී විය තාරකා.
Obhāsentī disā sabbā, osadhī viya tārakā.
218.
218.
‘‘කෙන තෙතාදිසො වණ්‌ණො, කෙන තෙ ඉධ මිජ්‌ඣති;
‘‘Kena tetādiso vaṇṇo, kena te idha mijjhati;
උප්‌පජ්‌ජන්‌ති ච තෙ භොගා, යෙ කෙචි මනසො පියා.
Uppajjanti ca te bhogā, ye keci manaso piyā.
219.
219.
‘‘පුච්‌ඡාමි තං දෙවි මහානුභාවෙ, මනුස්‌සභූතා කිමකාසි පුඤ්‌ඤං;
‘‘Pucchāmi taṃ devi mahānubhāve, manussabhūtā kimakāsi puññaṃ;
කෙනාසි එවං ජලිතානුභාවා, වණ්‌ණො ච තෙ සබ්‌බදිසා පභාසතී’’ති. –
Kenāsi evaṃ jalitānubhāvā, vaṇṇo ca te sabbadisā pabhāsatī’’ti. –
ඉමාහි තීහි ගාථාහි පටිපුච්‌ඡි.
Imāhi tīhi gāthāhi paṭipucchi.
220.
220.
‘‘සා දෙවතා අත්‌තමනා, මොග්‌ගල්‌ලානෙන පුච්‌ඡිතා;
‘‘Sā devatā attamanā, moggallānena pucchitā;
පඤ්‌හං පුට්‌ඨා වියාකාසි, යස්‌ස කම්‌මස්‌සිදං ඵලං’’.
Pañhaṃ puṭṭhā viyākāsi, yassa kammassidaṃ phalaṃ’’.
221-226.
221-226.
‘‘සොණදින්‌නාති මං අඤ්‌ඤංසු…පෙ.… ගොතමස්‌ස යසස්‌සිනො.
‘‘Soṇadinnāti maṃ aññaṃsu…pe… gotamassa yasassino.
227.
227.
‘‘තෙන මෙතාදිසො වණ්‌ණො…පෙ.… වණ්‌ණො ච මෙ සබ්‌බදිසා පභාසතී’’ති. –
‘‘Tena metādiso vaṇṇo…pe… vaṇṇo ca me sabbadisā pabhāsatī’’ti. –
දෙවතා බ්‍යාකාසි. තං සබ්‌බං හෙට්‌ඨා වුත්‌තනයමෙව.
Devatā byākāsi. Taṃ sabbaṃ heṭṭhā vuttanayameva.
සොණදින්‌නාවිමානවණ්‌ණනා නිට්‌ඨිතා.
Soṇadinnāvimānavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / විමානවත්‌ථුපාළි • Vimānavatthupāḷi / 6. සොණදින්‌නාවිමානවත්‌ථු • 6. Soṇadinnāvimānavatthu
