| Library / Tipiṭaka / තිපිටක • Tipiṭaka / විමානවත්‌ථුපාළි • Vimānavatthupāḷi |
6. සොණදින්‌නාවිමානවත්‌ථු
6. Soṇadinnāvimānavatthu
217.
217.
‘‘අභික්‌කන්‌තෙන වණ්‌ණෙන, යා ත්‌වං තිට්‌ඨසි දෙවතෙ;
‘‘Abhikkantena vaṇṇena, yā tvaṃ tiṭṭhasi devate;
ඔභාසෙන්‌තී දිසා සබ්‌බා, ඔසධී විය තාරකා.
Obhāsentī disā sabbā, osadhī viya tārakā.
218.
218.
‘‘කෙන තෙතාදිසො වණ්‌ණො, කෙන තෙ ඉධ මිජ්‌ඣති;
‘‘Kena tetādiso vaṇṇo, kena te idha mijjhati;
උප්‌පජ්‌ජන්‌ති ච තෙ භොගා, යෙ කෙචි මනසො පියා.
Uppajjanti ca te bhogā, ye keci manaso piyā.
219.
219.
‘‘පුච්‌ඡාමි තං දෙවි මහානුභාවෙ, මනුස්‌සභූතා කිමකාසි පුඤ්‌ඤං;
‘‘Pucchāmi taṃ devi mahānubhāve, manussabhūtā kimakāsi puññaṃ;
කෙනාසි එවං ජලිතානුභාවා, වණ්‌ණො ච තෙ සබ්‌බදිසා පභාසතී’’ති.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
220.
220.
සා දෙවතා අත්‌තමනා, මොග්‌ගල්‌ලානෙන පුච්‌ඡිතා;
Sā devatā attamanā, moggallānena pucchitā;
පඤ්‌හං පුට්‌ඨා වියාකාසි, යස්‌ස කම්‌මස්‌සිදං ඵලං.
Pañhaṃ puṭṭhā viyākāsi, yassa kammassidaṃ phalaṃ.
221.
221.
‘‘සොණදින්‌නාති මං අඤ්‌ඤංසු, නාළන්‌දායං උපාසිකා;
‘‘Soṇadinnāti maṃ aññaṃsu, nāḷandāyaṃ upāsikā;
සද්‌ධා සීලෙන සම්‌පන්‌නා, සංවිභාගරතා සදා.
Saddhā sīlena sampannā, saṃvibhāgaratā sadā.
222.
222.
‘‘අච්‌ඡාදනඤ්‌ච භත්‌තඤ්‌ච, සෙනාසනං පදීපියං;
‘‘Acchādanañca bhattañca, senāsanaṃ padīpiyaṃ;
අදාසිං උජුභූතෙසු, විප්‌පසන්‌නෙන චෙතසා.
Adāsiṃ ujubhūtesu, vippasannena cetasā.
223.
223.
‘‘චාතුද්‌දසිං පඤ්‌චදසිං, යා ච පක්‌ඛස්‌ස අට්‌ඨමී;
‘‘Cātuddasiṃ pañcadasiṃ, yā ca pakkhassa aṭṭhamī;
පාටිහාරියපක්‌ඛඤ්‌ච, අට්‌ඨඞ්‌ගසුසමාගතං.
Pāṭihāriyapakkhañca, aṭṭhaṅgasusamāgataṃ.
224.
224.
‘‘උපොසථං උපවසිස්‌සං, සදා සීලෙසු සංවුතා;
‘‘Uposathaṃ upavasissaṃ, sadā sīlesu saṃvutā;
සඤ්‌ඤමා සංවිභාගා ච, විමානං ආවසාමහං.
Saññamā saṃvibhāgā ca, vimānaṃ āvasāmahaṃ.
225.
225.
‘‘පාණාතිපාතා විරතා, මුසාවාදා ච සඤ්‌ඤතා;
‘‘Pāṇātipātā viratā, musāvādā ca saññatā;
ථෙය්‍යා ච අතිචාරා ච, මජ්‌ජපානා ච ආරකා.
Theyyā ca aticārā ca, majjapānā ca ārakā.
226.
226.
‘‘පඤ්‌චසික්‌ඛාපදෙ රතා, අරියසච්‌චාන කොවිදා;
‘‘Pañcasikkhāpade ratā, ariyasaccāna kovidā;
උපාසිකා චක්‌ඛුමතො, ගොතමස්‌ස යසස්‌සිනො.
Upāsikā cakkhumato, gotamassa yasassino.
227.
227.
‘‘තෙන මෙතාදිසො වණ්‌ණො…පෙ.…
‘‘Tena metādiso vaṇṇo…pe…
වණ්‌ණො ච මෙ සබ්‌බදිසා පභාසතී’’ති.
Vaṇṇo ca me sabbadisā pabhāsatī’’ti.
සොණදින්‌නාවිමානං ඡට්‌ඨං.
Soṇadinnāvimānaṃ chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / විමානවත්‌ථු-අට්‌ඨකථා • Vimānavatthu-aṭṭhakathā / 6. සොණදින්‌නාවිමානවණ්‌ණනා • 6. Soṇadinnāvimānavaṇṇanā
