| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
5. චම්‌මක්‌ඛන්‌ධකො
5. Cammakkhandhako
සොණකොළිවිසකථාදිවණ්‌ණනා
Soṇakoḷivisakathādivaṇṇanā
242. චම්‌මක්‌ඛන්‌ධකෙ උණ්‌ණපාවාරණන්‌ති උභතො ලොමානි උට්‌ඨාපෙත්‌වා කතං උණ්‌ණමයං පාවාරණං, උභතො කප්‌පාසපිචුං උට්‌ඨාපෙත්‌වා වීතපාවාරොපි අත්‌ථි, තතො නිවත්‌තනත්‌ථං ‘‘උණ්‌ණපාවාරණ’’න්‌ති වුත්‌තං.
242. Cammakkhandhake uṇṇapāvāraṇanti ubhato lomāni uṭṭhāpetvā kataṃ uṇṇamayaṃ pāvāraṇaṃ, ubhato kappāsapicuṃ uṭṭhāpetvā vītapāvāropi atthi, tato nivattanatthaṃ ‘‘uṇṇapāvāraṇa’’nti vuttaṃ.
අඩ්‌ඪචන්‌දපාසාණෙති සොපානමූලෙ උපඩ්‌ඪං අන්‌තො පවෙසෙත්‌වා ඨපිතෙ අඩ්‌ඪපාසාණෙ. පාළියං විහාරපච්‌ඡායායන්‌ති විහාරපච්‌චන්‌තෙ ඡායාය, විහාරස්‌ස වඩ්‌ඪමානච්‌ඡායායන්‌තිපි වදන්‌ති.
Aḍḍhacandapāsāṇeti sopānamūle upaḍḍhaṃ anto pavesetvā ṭhapite aḍḍhapāsāṇe. Pāḷiyaṃ vihārapacchāyāyanti vihārapaccante chāyāya, vihārassa vaḍḍhamānacchāyāyantipi vadanti.
243. භොගාති උපයොගත්‌ථෙ පච්‌චත්‌තවචනං. අච්‌චායතාති අතිආයතා ඛරමුච්‌ඡනා. සරවතීති මධුරසරසංයුත්‌තා. අතිසිථිලා මන්‌දමුච්‌ඡනා. වීරියසමථන්‌ති වීරියසම්‌පයුත්‌තසමථං. තත්‌ථ ච නිමිත්‌තං ගණ්‌හාහීති තස්‌මිඤ්‌ච සමභාවෙ සති යං ආදාසෙ මුඛනිමිත්‌තං විය නිමිත්‌තං උප්‌පජ්‌ජති, තං සමථනිමිත්‌තං, විපස්‌සනානිමිත්‌තං, මග්‌ගනිමිත්‌තං, ඵලනිමිත්‌තඤ්‌ච ගණ්‌හාහි නිබ්‌බත්‌තෙහීති, එවමස්‌ස අරහත්‌තපරියොසානං කම්‌මට්‌ඨානං කථිතං.
243.Bhogāti upayogatthe paccattavacanaṃ. Accāyatāti atiāyatā kharamucchanā. Saravatīti madhurasarasaṃyuttā. Atisithilā mandamucchanā. Vīriyasamathanti vīriyasampayuttasamathaṃ. Tattha ca nimittaṃ gaṇhāhīti tasmiñca samabhāve sati yaṃ ādāse mukhanimittaṃ viya nimittaṃ uppajjati, taṃ samathanimittaṃ, vipassanānimittaṃ, magganimittaṃ, phalanimittañca gaṇhāhi nibbattehīti, evamassa arahattapariyosānaṃ kammaṭṭhānaṃ kathitaṃ.
244. ඡඨානානීති ඡ කාරණානි. අධිමුත්‌තොති පටිවිජ්‌ඣිත්‌වා ඨිතො. නෙක්‌ඛම්‌මාධිමුත්‌තොතිආදි සබ්‌බං අරහත්‌තවසෙන වුත්‌තං. අරහත්‌තඤ්‌හි සබ්‌බකිලෙසෙහි නික්‌ඛන්‌තත්‌තා නෙක්‌ඛම්‌මං, තෙහෙව ච පවිවිත්‌තත්‌තා පවිවෙකො, බ්‍යාපජ්‌ජාභාවතො අබ්‍යාපජ්‌ජං, උපාදානස්‌ස ඛයන්‌තෙ උප්‌පන්‌නත්‌තා උපාදානක්‌ඛයො, තණ්‌හක්‌ඛයන්‌තෙ උප්‌පන්‌නත්‌තා තණ්‌හක්‌ඛයො, සම්‌මොහාභාවතො අසම්‌මොහොති ච වුච්‌චති.
244.Chaṭhānānīti cha kāraṇāni. Adhimuttoti paṭivijjhitvā ṭhito. Nekkhammādhimuttotiādi sabbaṃ arahattavasena vuttaṃ. Arahattañhi sabbakilesehi nikkhantattā nekkhammaṃ, teheva ca pavivittattā paviveko, byāpajjābhāvato abyāpajjaṃ, upādānassa khayante uppannattā upādānakkhayo, taṇhakkhayante uppannattā taṇhakkhayo, sammohābhāvato asammohoti ca vuccati.
කෙවලං සද්‌ධාමත්‌තකන්‌ති කෙවලං පටිවෙධපඤ්‌ඤාය අසම්‌මිස්‌සං සද්‌ධාමත්‌තකං. පටිචයන්‌ති පුනප්‌පුනං කරණෙන වඩ්‌ඪිං. වීතරාගත්‌තාති මග්‌ගපටිවෙධෙන රාගස්‌ස විගතත්‌තා එව නෙක්‌ඛම්‌මසඞ්‌ඛාතං අරහත්‌තං පටිවිජ්‌ඣිත්‌වා සච්‌ඡිකත්‌වා ඨිතො හොති. සෙසපදෙසුපි එසෙව නයො. පවිවෙකාධිමුත්‌තොති ‘‘පවිවෙකෙ අධිමුත්‌තො අහ’’න්‌ති එවං අරහත්‌තං බ්‍යාකරොතීති අත්‌ථො.
Kevalaṃ saddhāmattakanti kevalaṃ paṭivedhapaññāya asammissaṃ saddhāmattakaṃ. Paṭicayanti punappunaṃ karaṇena vaḍḍhiṃ. Vītarāgattāti maggapaṭivedhena rāgassa vigatattā eva nekkhammasaṅkhātaṃ arahattaṃ paṭivijjhitvā sacchikatvā ṭhito hoti. Sesapadesupi eseva nayo. Pavivekādhimuttoti ‘‘paviveke adhimutto aha’’nti evaṃ arahattaṃ byākarotīti attho.
සීලබ්‌බතපරාමාසන්‌ති සීලඤ්‌ච වතඤ්‌ච පරාමසිත්‌වා ගහිතග්‌ගහණමත්‌තං. සාරතො පච්‌චාගච්‌ඡන්‌තොති සාරභාවෙන ජානන්‌තො. අබ්‍යාපජ්‌ජාධිමුත්‌තොති අබ්‍යාපජ්‌ජං අරහත්‌තං බ්‍යාකරොති.
Sīlabbataparāmāsanti sīlañca vatañca parāmasitvā gahitaggahaṇamattaṃ. Sārato paccāgacchantoti sārabhāvena jānanto. Abyāpajjādhimuttoti abyāpajjaṃ arahattaṃ byākaroti.
අමිස්‌සීකතන්‌ති අමිස්‌සකතං. කිලෙසා හි ආරම්‌මණෙන සද්‌ධිං චිත්‌තං මිස්‌සං කරොන්‌ති, තෙසං අභාවා අමිස්‌සීකතං. භුසා වාතවුට්‌ඨීති බලවවාතක්‌ඛන්‌ධො.
Amissīkatanti amissakataṃ. Kilesā hi ārammaṇena saddhiṃ cittaṃ missaṃ karonti, tesaṃ abhāvā amissīkataṃ. Bhusā vātavuṭṭhīti balavavātakkhandho.
උපාදානක්‌ඛයස්‌ස චාති උපයොගත්‌ථෙ සාමිවචනං. දිස්‌වා ආයතනුප්‌පාදන්‌ති චක්‌ඛාදිආයතනානං උප්‌පාදඤ්‌ච වයඤ්‌ච දිස්‌වා. චිත්‌තං විමුච්‌චතීති ඉමාය විපස්‌සනාපටිපත්‌තියා ඵලසමාපත්‌තිවසෙන චිත්‌තං විමුච්‌චති.
Upādānakkhayassa cāti upayogatthe sāmivacanaṃ. Disvā āyatanuppādanti cakkhādiāyatanānaṃ uppādañca vayañca disvā. Cittaṃ vimuccatīti imāya vipassanāpaṭipattiyā phalasamāpattivasena cittaṃ vimuccati.
සොණකොළිවිසකථාදිවණ්‌ණනා නිට්‌ඨිතා.
Soṇakoḷivisakathādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 147. සොණකොළිවිසවත්‌ථු • 147. Soṇakoḷivisavatthu
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā
සොණකොළිවිසවත්‌ථුකථා • Soṇakoḷivisavatthukathā
සොණස්‌ස පබ්‌බජ්‌ජාකථා • Soṇassa pabbajjākathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
සොණකොළිවිසවත්‌ථුකථාවණ්‌ණනා • Soṇakoḷivisavatthukathāvaṇṇanā
සොණස්‌ස පබ්‌බජ්‌ජාකථාවණ්‌ණනා • Soṇassa pabbajjākathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā
සොණකොළිවිසවත්‌ථුකථාවණ්‌ණනා • Soṇakoḷivisavatthukathāvaṇṇanā
සොණස්‌සපබ්‌බජ්‌ජාකථාවණ්‌ණනා • Soṇassapabbajjākathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 147. සොණකොළිවිසවත්‌ථුකථා • 147. Soṇakoḷivisavatthukathā
