| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. ஸோணகோளிவிஸத்தே²ரஅபதா³னவண்ணனா
2. Soṇakoḷivisattheraapadānavaṇṇanā
அனோமத³ஸ்ஸிஸ்ஸ முனினோதிஆதி³கங் ஆயஸ்மதோ கோளிவிஸத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அனோமத³ஸ்ஸிஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வயப்பத்தோ புத்ததா³ரேஹி வட்³டி⁴தோ விப⁴வஸம்பன்னோ ப⁴க³வதோ சங்கமனத்தா²ய ஸோப⁴னங் சங்கமங் காரெத்வா ஸுதா⁴பரிகம்மங் காரெத்வா ஆதா³ஸதலமிவ ஸமங் விஜ்ஜோதமானங் கத்வா தீ³பதூ⁴பபுப்பா²தீ³ஹி ஸஜ்ஜெத்வா ப⁴க³வதோ நிய்யாதெ³த்வா பு³த்³த⁴ப்பமுக²ங் பி⁴க்கு²ஸங்க⁴ங் பணீதேனாஹாரேன பூஜேஸி. ஸோ ஏவங் யாவஜீவங் புஞ்ஞானி கத்வா ததோ சவித்வா தே³வலோகே நிப்³ப³த்தோ. தத்த² பாளியா வுத்தனயேன தி³ப்³ப³ஸம்பத்திங் அனுப⁴வித்வா அந்தரா ஓக்காககுலப்பஸுதோதி தங் ஸப்³ப³ங் பாளியா வுத்தானுஸாரேன வேதி³தப்³ப³ங். பச்சி²மப⁴வே பன கோலியராஜவங்ஸே ஜாதோ வயப்பத்தோ கோடிஅக்³க⁴னகஸ்ஸ கண்ணபிளந்த⁴னஸ்ஸ தா⁴ரிதத்தா கோடிகண்ணோதி, குடிகண்ணோதி ச பாகடோ அஹோஸி. ஸோ ப⁴க³வதி பஸன்னோ த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனங் வட்³டெ⁴த்வா நசிரஸ்ஸேவ அரஹத்தங் பாபுணி.
Anomadassissamuninotiādikaṃ āyasmato koḷivisattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle ekasmiṃ kulagehe nibbatto vayappatto puttadārehi vaḍḍhito vibhavasampanno bhagavato caṅkamanatthāya sobhanaṃ caṅkamaṃ kāretvā sudhāparikammaṃ kāretvā ādāsatalamiva samaṃ vijjotamānaṃ katvā dīpadhūpapupphādīhi sajjetvā bhagavato niyyādetvā buddhappamukhaṃ bhikkhusaṅghaṃ paṇītenāhārena pūjesi. So evaṃ yāvajīvaṃ puññāni katvā tato cavitvā devaloke nibbatto. Tattha pāḷiyā vuttanayena dibbasampattiṃ anubhavitvā antarā okkākakulappasutoti taṃ sabbaṃ pāḷiyā vuttānusārena veditabbaṃ. Pacchimabhave pana koliyarājavaṃse jāto vayappatto koṭiagghanakassa kaṇṇapiḷandhanassa dhāritattā koṭikaṇṇoti, kuṭikaṇṇoti ca pākaṭo ahosi. So bhagavati pasanno dhammaṃ sutvā paṭiladdhasaddho pabbajitvā vipassanaṃ vaḍḍhetvā nacirasseva arahattaṃ pāpuṇi.
25. ஸோ அரஹா ஹுத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அனோமத³ஸ்ஸிஸ்ஸ முனினோதிஆதி³மாஹ. தத்த² அனோமத³ஸ்ஸிஸ்ஸாதி அனோமங் அலாமகங் ஸுந்த³ரங் த³ஸ்ஸனங் த்³வத்திங்ஸமஹாபுரிஸலக்க²ணபடிமண்டி³தத்தா ப்³யாமப்பபா⁴மண்ட³லோபஸோபி⁴தத்தா ஆரோஹபரிணாஹேன ஸமன்னாக³தத்தா ச த³ஸ்ஸனீயங் ஸரீரங் யஸ்ஸ ப⁴க³வதோ ஸோ அனோமத³ஸ்ஸீ, தஸ்ஸ அனோமத³ஸ்ஸிஸ்ஸ முனினோதி அத்தோ². தாதி³னோதி இட்டா²னிட்டே²ஸு அகம்பியஸபா⁴வஸ்ஸ. ஸுதா⁴ய லேபனங் கத்வாதி ஸுதா⁴ய அவலித்தங் கத்வா தீ³பதூ⁴பபுப்ப²த⁴ஜபடாகாதீ³ஹி ச அலங்கதங் சங்கமங் காரயிங் அகாஸிந்தி அத்தோ². ஸேஸகா³தா²னங் அத்தோ² பாளியா அனுஸாரேன ஸுவிஞ்ஞெய்யோவ.
25. So arahā hutvā attano pubbakammaṃ saritvā somanassajāto pubbacaritāpadānaṃ pakāsento anomadassissa muninotiādimāha. Tattha anomadassissāti anomaṃ alāmakaṃ sundaraṃ dassanaṃ dvattiṃsamahāpurisalakkhaṇapaṭimaṇḍitattā byāmappabhāmaṇḍalopasobhitattā ārohapariṇāhena samannāgatattā ca dassanīyaṃ sarīraṃ yassa bhagavato so anomadassī, tassa anomadassissa muninoti attho. Tādinoti iṭṭhāniṭṭhesu akampiyasabhāvassa. Sudhāya lepanaṃ katvāti sudhāya avalittaṃ katvā dīpadhūpapupphadhajapaṭākādīhi ca alaṅkataṃ caṅkamaṃ kārayiṃ akāsinti attho. Sesagāthānaṃ attho pāḷiyā anusārena suviññeyyova.
35. பரிவாரஸம்பத்தித⁴னஸம்பத்திஸங்கா²தங் யஸங் தா⁴ரேதீதி யஸோத⁴ரோ, ஸப்³பே³ ஏதே ஸத்தஸத்ததிசக்கவத்திராஜானோ யஸோத⁴ரனாமேன ஏகனாமகாதி ஸம்ப³ந்தோ⁴.
35. Parivārasampattidhanasampattisaṅkhātaṃ yasaṃ dhāretīti yasodharo, sabbe ete sattasattaticakkavattirājāno yasodharanāmena ekanāmakāti sambandho.
52. அங்கீ³ரஸோதி அங்க³தோ ஸரீரதோ நிக்³க³தா ரஸ்மி யஸ்ஸ ஸோ அங்கீ³ரஸோ, ச²ந்த³தோ³ஸமோஹப⁴யாக³தீஹி வா பாபாசாரவஸேன வா சதுராபாயங் ந க³ச்ச²தீதி நாகோ³, மஹந்தோ பூஜிதோ ச ஸோ நாகோ³ சேதி மஹானாகோ³. ஸேஸங் உத்தானத்த²மேவாதி.
52.Aṅgīrasoti aṅgato sarīrato niggatā rasmi yassa so aṅgīraso, chandadosamohabhayāgatīhi vā pāpācāravasena vā caturāpāyaṃ na gacchatīti nāgo, mahanto pūjito ca so nāgo ceti mahānāgo. Sesaṃ uttānatthamevāti.
கோளிவிஸத்தே²ரஅபதா³னவண்ணனா ஸமத்தா.
Koḷivisattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. ஸோணகோளிவிஸத்தே²ரஅபதா³னங் • 2. Soṇakoḷivisattheraapadānaṃ
