| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༥. ཙམྨཀྑནྡྷཀོ
5. Cammakkhandhako
༡༤༧. སོཎཀོལི༹ཝིསཝཏྠུ
147. Soṇakoḷivisavatthu
༢༤༢. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི གིཛ྄ཛྷཀཱུཊེ པབྦཏེ། ཏེན ཁོ པན སམཡེན རཱཛཱ མཱགདྷོ སེནིཡོ བིམྦིསཱརོ ཨསཱིཏིཡཱ གཱམསཧསྶེསུ ཨིསྶརིཡཱདྷིཔཙྩཾ རཛྫཾ ཀཱརེཏི། ཏེན ཁོ པན སམཡེན ཙམྤཱཡཾ སོཎོ ནཱམ ཀོལི༹ཝིསོ 1 སེཊྛིཔུཏྟོ སུཁུམཱལོ ཧོཏི། ཏསྶ པཱདཏལེསུ ལོམཱནི ཛཱཏཱནི ཧོནྟི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཏཱནི ཨསཱིཏི གཱམིཀསཧསྶཱནི སནྣིཔཱཏཱཔེཏྭཱ ཀེནཙིདེཝ ཀརཎཱིཡེན སོཎསྶ ཀོལི༹ཝིསསྶ སནྟིཀེ དཱུཏཾ པཱཧེསི – ཨཱགཙྪཏུ སོཎོ, ཨིཙྪཱམི སོཎསྶ ཨཱགཏནྟི། ཨཐ ཁོ སོཎསྶ ཀོལི༹ཝིསསྶ མཱཏཱཔིཏརོ སོཎཾ ཀོལི༹ཝིསཾ ཨེཏདཝོཙུཾ – ‘‘རཱཛཱ ཏེ, ཏཱཏ སོཎ, པཱདེ དཀྑིཏུཀཱམོ། མཱ ཁོ ཏྭཾ, ཏཱཏ སོཎ, ཡེན རཱཛཱ ཏེན པཱདེ ཨབྷིཔྤསཱརེཡྻཱསི། རཉྙོ པུརཏོ པལླངྐེན ནིསཱིད། ནིསིནྣསྶ ཏེ རཱཛཱ པཱདེ དཀྑིསྶཏཱི’’ཏི། ཨཐ ཁོ སོཎཾ ཀོལི༹ཝིསཾ སིཝིཀཱཡ ཨཱནེསུཾ། ཨཐ ཁོ སོཎོ ཀོལི༹ཝིསོ ཡེན རཱཛཱ མཱགདྷོ སེནིཡོ བིམྦིསཱརོ ཏེནུཔསངྐམི, ཨུཔསངྐམིཏྭཱ རཱཛཱནཾ མཱགདྷཾ སེནིཡཾ བིམྦིསཱརཾ ཨབྷིཝཱདེཏྭཱ རཉྙོ པུརཏོ པལླངྐེན ནིསཱིདི། ཨདྡསཱ ཁོ རཱཛཱ མཱགདྷོ སེནིཡོ བིམྦིསཱརོ སོཎསྶ ཀོལི༹ཝིསསྶ པཱདཏལེསུ ལོམཱནི ཛཱཏཱནི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཏཱནི ཨསཱིཏི གཱམིཀསཧསྶཱནི དིཊྛདྷམྨིཀེ ཨཏྠེ ཨནུསཱསིཏྭཱ ཨུཡྻོཛེསི – ‘‘ཏུམྷེ ཁྭཏྠ, བྷཎེ, མཡཱ དིཊྛདྷམྨིཀེ ཨཏྠེ ཨནུསཱསིཏཱ; གཙྪཐ, ཏཾ བྷགཝནྟཾ པཡིརུཔཱསཐ; སོ ནོ བྷགཝཱ སམྤརཱཡིཀེ ཨཏྠེ ཨནུསཱསིསྶཏཱི’’ཏི།
242. Tena samayena buddho bhagavā rājagahe viharati gijjhakūṭe pabbate. Tena kho pana samayena rājā māgadho seniyo bimbisāro asītiyā gāmasahassesu issariyādhipaccaṃ rajjaṃ kāreti. Tena kho pana samayena campāyaṃ soṇo nāma koḷiviso 2 seṭṭhiputto sukhumālo hoti. Tassa pādatalesu lomāni jātāni honti. Atha kho rājā māgadho seniyo bimbisāro tāni asīti gāmikasahassāni sannipātāpetvā kenacideva karaṇīyena soṇassa koḷivisassa santike dūtaṃ pāhesi – āgacchatu soṇo, icchāmi soṇassa āgatanti. Atha kho soṇassa koḷivisassa mātāpitaro soṇaṃ koḷivisaṃ etadavocuṃ – ‘‘rājā te, tāta soṇa, pāde dakkhitukāmo. Mā kho tvaṃ, tāta soṇa, yena rājā tena pāde abhippasāreyyāsi. Rañño purato pallaṅkena nisīda. Nisinnassa te rājā pāde dakkhissatī’’ti. Atha kho soṇaṃ koḷivisaṃ sivikāya ānesuṃ. Atha kho soṇo koḷiviso yena rājā māgadho seniyo bimbisāro tenupasaṅkami, upasaṅkamitvā rājānaṃ māgadhaṃ seniyaṃ bimbisāraṃ abhivādetvā rañño purato pallaṅkena nisīdi. Addasā kho rājā māgadho seniyo bimbisāro soṇassa koḷivisassa pādatalesu lomāni jātāni. Atha kho rājā māgadho seniyo bimbisāro tāni asīti gāmikasahassāni diṭṭhadhammike atthe anusāsitvā uyyojesi – ‘‘tumhe khvattha, bhaṇe, mayā diṭṭhadhammike atthe anusāsitā; gacchatha, taṃ bhagavantaṃ payirupāsatha; so no bhagavā samparāyike atthe anusāsissatī’’ti.
ཨཐ ཁོ ཏཱནི ཨསཱིཏི གཱམིཀསཧསྶཱནི ཡེན གིཛ྄ཛྷཀཱུཊོ པབྦཏོ ཏེནུཔསངྐམིཾསུ། ཏེན ཁོ པན སམཡེན ཨཱཡསྨཱ སཱགཏོ བྷགཝཏོ ཨུཔཊྛཱཀོ ཧོཏི། ཨཐ ཁོ ཏཱནི ཨསཱིཏི གཱམིཀསཧསྶཱནི ཡེནཱཡསྨཱ སཱགཏོ ཏེནུཔསངྐམིཾསུ, ཨུཔསངྐམིཏྭཱ ཨཱཡསྨནྟཾ སཱགཏཾ ཨེཏདཝོཙུཾ – ‘‘ཨིམཱནི, བྷནྟེ, ཨསཱིཏི གཱམིཀསཧསྶཱནི ཨིདྷཱུཔསངྐནྟཱནི བྷགཝནྟཾ དསྶནཱཡ; སཱདྷུ མཡཾ, བྷནྟེ, ལབྷེཡྻཱམ བྷགཝནྟཾ དསྶནཱཡཱ’’ཏི། ‘‘ཏེན ཧི ཏུམྷེ ཨཱཡསྨནྟོ མུཧུཏྟཾ ཨིདྷེཝ ཏཱཝ ཧོཐ, ཡཱཝཱཧཾ བྷགཝནྟཾ པཊིཝེདེམཱི’’ཏི། ཨཐ ཁོ ཨཱཡསྨཱ སཱགཏོ ཏེསཾ ཨསཱིཏིཡཱ གཱམིཀསཧསྶཱནཾ པུརཏོ པེཀྑམཱནཱནཾ པཱཊིཀཱཡ ནིམུཛྫིཏྭཱ བྷགཝཏོ པུརཏོ ཨུམྨུཛྫིཏྭཱ བྷགཝནྟཾ ཨེཏདཝོཙ – ‘‘ཨིམཱནི, བྷནྟེ, ཨསཱིཏི གཱམིཀསཧསྶཱནི ཨིདྷཱུཔསངྐནྟཱནི བྷགཝནྟཾ དསྶནཱཡ; ཡསྶ དཱནི, བྷནྟེ, བྷགཝཱ ཀཱལཾ མཉྙཏཱི’’ཏི། ‘‘ཏེན ཧི ཏྭཾ, སཱགཏ, ཝིཧཱརཔཙྪཱཡཱཡཾ ཨཱསནཾ པཉྙཔེཧཱི’’ཏི། ‘‘ཨེཝཾ, བྷནྟེ’’ཏི ཁོ ཨཱཡསྨཱ སཱགཏོ བྷགཝཏོ པཊིསྶུཎིཏྭཱ པཱིཋཾ གཧེཏྭཱ བྷགཝཏོ པུརཏོ ནིམུཛྫིཏྭཱ ཏེསཾ ཨསཱིཏིཡཱ གཱམིཀསཧསྶཱནཾ པུརཏོ པེཀྑམཱནཱནཾ པཱཊིཀཱཡ ཨུམྨུཛྫིཏྭཱ ཝིཧཱརཔཙྪཱཡཱཡཾ ཨཱསནཾ པཉྙཔེཏི། ཨཐ ཁོ བྷགཝཱ ཝིཧཱརཱ ནིཀྑམིཏྭཱ ཝིཧཱརཔཙྪཱཡཱཡཾ པཉྙཏྟེ ཨཱསནེ ནིསཱིདི། ཨཐ ཁོ ཏཱནི ཨསཱིཏི གཱམིཀསཧསྶཱནི ཡེན བྷགཝཱ ཏེནུཔསངྐམིཾསུ, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨཐ ཁོ ཏཱནི ཨསཱིཏི གཱམིཀསཧསྶཱནི ཨཱཡསྨནྟཾཡེཝ སཱགཏཾ སམནྣཱཧརནྟི, ནོ ཏཐཱ བྷགཝནྟཾ། ཨཐ ཁོ བྷགཝཱ ཏེསཾ ཨསཱིཏིཡཱ གཱམིཀསཧསྶཱནཾ ཙེཏསཱ ཙེཏོཔརིཝིཏཀྐམཉྙཱཡ ཨཱཡསྨནྟཾ སཱགཏཾ ཨཱམནྟེསི – ‘‘ཏེན ཧི ཏྭཾ, སཱགཏ, བྷིཡྻོསོམཏྟཱཡ ཨུཏྟརིམནུསྶདྷམྨཾ ཨིདྡྷིཔཱཊིཧཱརིཡཾ དསྶེཧཱི’’ཏི། ‘‘ཨེཝཾ, བྷནྟེ’’ཏི ཁོ ཨཱཡསྨཱ སཱགཏོ བྷགཝཏོ པཊིསྶུཎིཏྭཱ ཝེཧཱསཾ ཨབྦྷུགྒནྟྭཱ ཨཱཀཱསེ ཨནྟལིཀྑེ ཙངྐམཏིཔི, ཏིཊྛཏིཔི, ནིསཱིདཏིཔི, སེཡྻམྤི ཀཔྤེཏི, དྷཱུམཱཡཏིཔི 3 པཛྫལཏིཔི, ཨནྟརདྷཱཡཏིཔི། ཨཐ ཁོ ཨཱཡསྨཱ སཱགཏོ ཨཱཀཱསེ ཨནྟལིཀྑེ ཨནེཀཝིཧིཏཾ ཨུཏྟརིམནུསྶདྷམྨཾ ཨིདྡྷིཔཱཊིཧཱརིཡཾ དསྶེཏྭཱ བྷགཝཏོ པཱདེསུ སིརསཱ ནིཔཏིཏྭཱ བྷགཝནྟཾ ཨེཏདཝོཙ – ‘‘སཏྠཱ མེ, བྷནྟེ, བྷགཝཱ; སཱཝཀོཧམསྨི། སཏྠཱ མེ, བྷནྟེ, བྷགཝཱ; སཱཝཀོཧམསྨཱི’’ཏི། ཨཐ ཁོ ཏཱནི ཨསཱིཏི གཱམིཀསཧསྶཱནི ‘‘ཨཙྪརིཡཾ ཝཏ བྷོ! ཨབྦྷུཏཾ ཝཏ བྷོ! སཱཝཀོཔི ནཱམ ཨེཝཾ མཧིདྡྷིཀོ བྷཝིསྶཏི, ཨེཝཾ མཧཱནུབྷཱཝོ, ཨཧོ ནཱུན སཏྠཱ’’ཏི བྷགཝནྟཾཡེཝ སམནྣཱཧརནྟི, ནོ ཏཐཱ ཨཱཡསྨནྟཾ སཱགཏཾ།
Atha kho tāni asīti gāmikasahassāni yena gijjhakūṭo pabbato tenupasaṅkamiṃsu. Tena kho pana samayena āyasmā sāgato bhagavato upaṭṭhāko hoti. Atha kho tāni asīti gāmikasahassāni yenāyasmā sāgato tenupasaṅkamiṃsu, upasaṅkamitvā āyasmantaṃ sāgataṃ etadavocuṃ – ‘‘imāni, bhante, asīti gāmikasahassāni idhūpasaṅkantāni bhagavantaṃ dassanāya; sādhu mayaṃ, bhante, labheyyāma bhagavantaṃ dassanāyā’’ti. ‘‘Tena hi tumhe āyasmanto muhuttaṃ idheva tāva hotha, yāvāhaṃ bhagavantaṃ paṭivedemī’’ti. Atha kho āyasmā sāgato tesaṃ asītiyā gāmikasahassānaṃ purato pekkhamānānaṃ pāṭikāya nimujjitvā bhagavato purato ummujjitvā bhagavantaṃ etadavoca – ‘‘imāni, bhante, asīti gāmikasahassāni idhūpasaṅkantāni bhagavantaṃ dassanāya; yassa dāni, bhante, bhagavā kālaṃ maññatī’’ti. ‘‘Tena hi tvaṃ, sāgata, vihārapacchāyāyaṃ āsanaṃ paññapehī’’ti. ‘‘Evaṃ, bhante’’ti kho āyasmā sāgato bhagavato paṭissuṇitvā pīṭhaṃ gahetvā bhagavato purato nimujjitvā tesaṃ asītiyā gāmikasahassānaṃ purato pekkhamānānaṃ pāṭikāya ummujjitvā vihārapacchāyāyaṃ āsanaṃ paññapeti. Atha kho bhagavā vihārā nikkhamitvā vihārapacchāyāyaṃ paññatte āsane nisīdi. Atha kho tāni asīti gāmikasahassāni yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Atha kho tāni asīti gāmikasahassāni āyasmantaṃyeva sāgataṃ samannāharanti, no tathā bhagavantaṃ. Atha kho bhagavā tesaṃ asītiyā gāmikasahassānaṃ cetasā cetoparivitakkamaññāya āyasmantaṃ sāgataṃ āmantesi – ‘‘tena hi tvaṃ, sāgata, bhiyyosomattāya uttarimanussadhammaṃ iddhipāṭihāriyaṃ dassehī’’ti. ‘‘Evaṃ, bhante’’ti kho āyasmā sāgato bhagavato paṭissuṇitvā vehāsaṃ abbhuggantvā ākāse antalikkhe caṅkamatipi, tiṭṭhatipi, nisīdatipi, seyyampi kappeti, dhūmāyatipi 4 pajjalatipi, antaradhāyatipi. Atha kho āyasmā sāgato ākāse antalikkhe anekavihitaṃ uttarimanussadhammaṃ iddhipāṭihāriyaṃ dassetvā bhagavato pādesu sirasā nipatitvā bhagavantaṃ etadavoca – ‘‘satthā me, bhante, bhagavā; sāvakohamasmi. Satthā me, bhante, bhagavā; sāvakohamasmī’’ti. Atha kho tāni asīti gāmikasahassāni ‘‘acchariyaṃ vata bho! Abbhutaṃ vata bho! Sāvakopi nāma evaṃ mahiddhiko bhavissati, evaṃ mahānubhāvo, aho nūna satthā’’ti bhagavantaṃyeva samannāharanti, no tathā āyasmantaṃ sāgataṃ.
ཨཐ ཁོ བྷགཝཱ ཏེསཾ ཨསཱིཏིཡཱ གཱམིཀསཧསྶཱནཾ ཙེཏསཱ ཙེཏོཔརིཝིཏཀྐམཉྙཱཡ ཨནུཔུབྦིཾ ཀཐཾ ཀཐེསི, སེཡྻཐིདཾ – དཱནཀཐཾ སཱིལཀཐཾ སགྒཀཐཾ , ཀཱམཱནཾ ཨཱདཱིནཝཾ ཨོཀཱརཾ སཾཀིལེསཾ, ནེཀྑམྨེ ཨཱནིསཾསཾ པཀཱསེསི། ཡདཱ ཏེ བྷགཝཱ ཨཉྙཱསི ཀལླཙིཏྟེ, མུདུཙིཏྟེ, ཝིནཱིཝརཎཙིཏྟེ, ཨུདགྒཙིཏྟེ, པསནྣཙིཏྟེ, ཨཐ ཡཱ བུདྡྷཱནཾ སཱམུཀྐཾསིཀཱ དྷམྨདེསནཱ, ཏཾ པཀཱསེསི – དུཀྑཾ, སམུདཡཾ, ནིརོདྷཾ, མགྒཾ། སེཡྻཐཱཔི ནཱམ སུདྡྷཾ ཝཏྠཾ ཨཔགཏཀཱལ༹ཀཾ སམྨདེཝ རཛནཾ པཊིགྒཎྷེཡྻ, ཨེཝམེཝཾ ཏེསཾ ཨསཱིཏིཡཱ གཱམིཀསཧསྶཱནཾ ཏསྨིཾཡེཝ ཨཱསནེ ཝིརཛཾ ཝཱིཏམལཾ དྷམྨཙཀྑུཾ ཨུདཔཱདི – ‘‘ཡཾཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’ནྟི། ཏེ དིཊྛདྷམྨཱ པཏྟདྷམྨཱ ཝིདིཏདྷམྨཱ པརིཡོགཱལ༹ྷདྷམྨཱ ཏིཎྞཝིཙིཀིཙྪཱ ཝིགཏཀཐཾཀཐཱ ཝེསཱརཛྫཔྤཏྟཱ ཨཔརཔྤཙྩཡཱ སཏྠུསཱསནེ བྷགཝནྟཾ ཨེཏདཝོཙུཾ – ‘‘ཨབྷིཀྐནྟཾ, བྷནྟེ, ཨབྷིཀྐནྟཾ, བྷནྟེ། སེཡྻཐཱཔི, བྷནྟེ, ནིཀྐུཛྫིཏཾ ཝཱ ཨུཀྐུཛྫེཡྻ, པཊིཙྪནྣཾ ཝཱ ཝིཝརེཡྻ, མཱུལ༹ྷསྶ ཝཱ མགྒཾ ཨཱཙིཀྑེཡྻ, ཨནྡྷཀཱརེ ཝཱ ཏེལཔཛྫོཏཾ དྷཱརེཡྻ – ‘‘ཙཀྑུམནྟོ རཱུཔཱནི དཀྑནྟཱི’’ཏི, ཨེཝམེཝཾ བྷགཝཏཱ ཨནེཀཔརིཡཱཡེན དྷམྨོ པཀཱསིཏོ། ཨེཏེ མཡཾ, བྷནྟེ, བྷགཝནྟཾ སརཎཾ གཙྪཱམ། དྷམྨཉྩ, བྷིཀྑུསངྒྷཉྩ། ཨུཔཱསཀེ ནོ བྷགཝཱ དྷཱརེཏུ ཨཛྫཏགྒེ པཱཎུཔེཏེ སརཎཾ གཏེ’’ཏི།
Atha kho bhagavā tesaṃ asītiyā gāmikasahassānaṃ cetasā cetoparivitakkamaññāya anupubbiṃ kathaṃ kathesi, seyyathidaṃ – dānakathaṃ sīlakathaṃ saggakathaṃ , kāmānaṃ ādīnavaṃ okāraṃ saṃkilesaṃ, nekkhamme ānisaṃsaṃ pakāsesi. Yadā te bhagavā aññāsi kallacitte, muducitte, vinīvaraṇacitte, udaggacitte, pasannacitte, atha yā buddhānaṃ sāmukkaṃsikā dhammadesanā, taṃ pakāsesi – dukkhaṃ, samudayaṃ, nirodhaṃ, maggaṃ. Seyyathāpi nāma suddhaṃ vatthaṃ apagatakāḷakaṃ sammadeva rajanaṃ paṭiggaṇheyya, evamevaṃ tesaṃ asītiyā gāmikasahassānaṃ tasmiṃyeva āsane virajaṃ vītamalaṃ dhammacakkhuṃ udapādi – ‘‘yaṃkiñci samudayadhammaṃ, sabbaṃ taṃ nirodhadhamma’’nti. Te diṭṭhadhammā pattadhammā viditadhammā pariyogāḷhadhammā tiṇṇavicikicchā vigatakathaṃkathā vesārajjappattā aparappaccayā satthusāsane bhagavantaṃ etadavocuṃ – ‘‘abhikkantaṃ, bhante, abhikkantaṃ, bhante. Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – ‘‘cakkhumanto rūpāni dakkhantī’’ti, evamevaṃ bhagavatā anekapariyāyena dhammo pakāsito. Ete mayaṃ, bhante, bhagavantaṃ saraṇaṃ gacchāma. Dhammañca, bhikkhusaṅghañca. Upāsake no bhagavā dhāretu ajjatagge pāṇupete saraṇaṃ gate’’ti.
སོཎསྶ པབྦཛྫཱ
Soṇassa pabbajjā
༢༤༣. ཨཐ ཁོ སོཎསྶ ཀོལི༹ཝིསསྶ ཨེཏདཧོསི ‘‘ཡཐཱ ཡཐཱ ཁོ ཨཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ནཡིདཾ སུཀརཾ ཨགཱརཾ ཨཛ྄ཛྷཱཝསཏཱ ཨེཀནྟཔརིཔུཎྞཾ ཨེཀནྟཔརིསུདྡྷཾ སངྑལིཁིཏཾ བྲཧྨཙརིཡཾ ཙརིཏུཾ; ཡཾནཱུནཱཧཾ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛེཡྻ’’ནྟི། ཨཐ ཁོ ཏཱནི ཨསཱིཏི གཱམིཀསཧསྶཱནི བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐམིསུཾ། ཨཐ ཁོ སོཎོ ཀོལི༹ཝིསོ ཨཙིརཔཀྐནྟེསུ ཏེསུ ཨསཱིཏིཡཱ གཱམིཀསཧསྶེསུ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོཎོ ཀོལི༹ཝིསོ བྷགཝནྟཾ ཨེཏདཝོཙ – ‘‘ཡཐཱ ཡཐཱཧཾ, བྷནྟེ, བྷགཝཏཱ དྷམྨཾ དེསིཏཾ ཨཱཛཱནཱམི, ནཡིདཾ སུཀརཾ ཨགཱརཾ ཨཛ྄ཛྷཱཝསཏཱ ཨེཀནྟཔརིཔུཎྞཾ ཨེཀནྟཔརིསུདྡྷཾ སངྑལིཁིཏཾ བྲཧྨཙརིཡཾ ཙརིཏུཾ། ཨིཙྪཱམཧཾ, བྷནྟེ, ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཏུཾ། པབྦཱཛེཏུ མཾ, བྷནྟེ, བྷགཝཱ’’ཏི། ཨལཏྠ ཁོ སོཎོ ཀོལི༹ཝིསོ བྷགཝཏོ སནྟིཀེ པབྦཛྫཾ, ཨལཏྠ ཨུཔསམྤདཾ། ཨཙིརུཔསམྤནྣོ ཙ པནཱཡསྨཱ སོཎོ སཱིཏཝནེ ཝིཧརཏི། ཏསྶ ཨཙྩཱརདྡྷཝཱིརིཡསྶ ཙངྐམཏོ པཱདཱ བྷིཛྫིཾསུ། ཙངྐམོ ལོཧིཏེན ཕུཊོ ཧོཏི, སེཡྻཐཱཔི གཝཱགྷཱཏནཾ། 5 ཨཐ ཁོ ཨཱཡསྨཏོ སོཎསྶ རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘‘ཡེ ཁོ ཀེཙི བྷགཝཏོ སཱཝཀཱ ཨཱརདྡྷཝཱིརིཡཱ ཝིཧརནྟི, ཨཧཾ ཏེསཾ ཨཉྙཏརོ། ཨཐ ཙ པན མེ ནཱནུཔཱདཱཡ ཨཱསཝེཧི ཙིཏྟཾ ཝིམུཙྩཏི། སཾཝིཛྫནྟི ཁོ པན མེ ཀུལེ བྷོགཱ; སཀྐཱ བྷོགེ ཙ བྷུཉྫིཏུཾ, པུཉྙཱནི ཙ ཀཱཏུཾ། ཡཾནཱུནཱཧཾ ཧཱིནཱཡཱཝཏྟིཏྭཱ བྷོགེ ཙ བྷུཉྫེཡྻཾ, པུཉྙཱནི ཙ ཀརེཡྻ’’ནྟི། ཨཐ ཁོ བྷགཝཱ ཨཱཡསྨཏོ སོཎསྶ ཙེཏསཱ ཙེཏོཔརིཝིཏཀྐམཉྙཱཡ – སེཡྻཐཱཔི ནཱམ བལཝཱ པུརིསོ སམིཉྫིཏཾ ཝཱ བཱཧཾ པསཱརེཡྻ, པསཱརིཏཾ ཝཱ བཱཧཾ སམིཉྫེཡྻ ཨེཝམེཝ – གིཛ྄ཛྷཀཱུཊེ པབྦཏེ ཨནྟརཧིཏོ སཱིཏཝནེ པཱཏུརཧོསི། ཨཐ ཁོ བྷགཝཱ སམྦཧུལེཧི བྷིཀྑཱུཧི སདྡྷིཾ སེནཱསནཙཱརིཀཾ ཨཱཧིཎྜནྟོ ཡེནཱཡསྨཏོ སོཎསྶ ཙངྐམོ ཏེནུཔསངྐམི། ཨདྡསཱ ཁོ བྷགཝཱ ཨཱཡསྨཏོ སོཎསྶ ཙངྐམཾ ལོཧིཏེན ཕུཊཾ, དིསྭཱན བྷིཀྑཱུ ཨཱམནྟེསི – ‘‘ཀསྶ ནྭཱཡཾ, བྷིཀྑཝེ, ཙངྐམོ ལོཧིཏེན ཕུཊོ, སེཡྻཐཱཔི གཝཱགྷཱཏན’’ནྟི? ‘‘ཨཱཡསྨཏོ, བྷནྟེ, སོཎསྶ ཨཙྩཱརདྡྷཝཱིརིཡསྶ ཙངྐམཏོ པཱདཱ བྷིཛྫིཾསུ། ཏསྶཱཡཾ ཙངྐམོ ལོཧིཏེན ཕུཊོ, སེཡྻཐཱཔི གཝཱགྷཱཏན’’ནྟི།
243. Atha kho soṇassa koḷivisassa etadahosi ‘‘yathā yathā kho ahaṃ bhagavatā dhammaṃ desitaṃ ājānāmi, nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ; yaṃnūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya’’nti. Atha kho tāni asīti gāmikasahassāni bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkamisuṃ. Atha kho soṇo koḷiviso acirapakkantesu tesu asītiyā gāmikasahassesu yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho soṇo koḷiviso bhagavantaṃ etadavoca – ‘‘yathā yathāhaṃ, bhante, bhagavatā dhammaṃ desitaṃ ājānāmi, nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ. Icchāmahaṃ, bhante, kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ. Pabbājetu maṃ, bhante, bhagavā’’ti. Alattha kho soṇo koḷiviso bhagavato santike pabbajjaṃ, alattha upasampadaṃ. Acirupasampanno ca panāyasmā soṇo sītavane viharati. Tassa accāraddhavīriyassa caṅkamato pādā bhijjiṃsu. Caṅkamo lohitena phuṭo hoti, seyyathāpi gavāghātanaṃ. 6 Atha kho āyasmato soṇassa rahogatassa paṭisallīnassa evaṃ cetaso parivitakko udapādi – ‘‘ye kho keci bhagavato sāvakā āraddhavīriyā viharanti, ahaṃ tesaṃ aññataro. Atha ca pana me nānupādāya āsavehi cittaṃ vimuccati. Saṃvijjanti kho pana me kule bhogā; sakkā bhoge ca bhuñjituṃ, puññāni ca kātuṃ. Yaṃnūnāhaṃ hīnāyāvattitvā bhoge ca bhuñjeyyaṃ, puññāni ca kareyya’’nti. Atha kho bhagavā āyasmato soṇassa cetasā cetoparivitakkamaññāya – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya evameva – gijjhakūṭe pabbate antarahito sītavane pāturahosi. Atha kho bhagavā sambahulehi bhikkhūhi saddhiṃ senāsanacārikaṃ āhiṇḍanto yenāyasmato soṇassa caṅkamo tenupasaṅkami. Addasā kho bhagavā āyasmato soṇassa caṅkamaṃ lohitena phuṭaṃ, disvāna bhikkhū āmantesi – ‘‘kassa nvāyaṃ, bhikkhave, caṅkamo lohitena phuṭo, seyyathāpi gavāghātana’’nti? ‘‘Āyasmato, bhante, soṇassa accāraddhavīriyassa caṅkamato pādā bhijjiṃsu. Tassāyaṃ caṅkamo lohitena phuṭo, seyyathāpi gavāghātana’’nti.
ཨཐ ཁོ བྷགཝཱ ཡེནཱཡསྨཏོ སོཎསྶ ཝིཧཱརོ ཏེནུཔསངྐམི, ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ཨཱཡསྨཱཔི ཁོ སོཎོ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ སོཎཾ བྷགཝཱ ཨེཏདཝོཙ – ‘‘ནནུ ཏེ, སོཎ, རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘ཡེ ཁོ ཀེཙི བྷགཝཏོ སཱཝཀཱ ཨཱརདྡྷཝཱིརིཡཱ ཝིཧརནྟི, ཨཧཾ ཏེསཾ ཨཉྙཏརོ། ཨཐ ཙ པན མེ ནཱནུཔཱདཱཡ ཨཱསཝེཧི ཙིཏྟཾ ཝིམུཙྩཏི། སཾཝིཛྫནྟི ཁོ པན མེ ཀུལེ བྷོགཱ; སཀྐཱ བྷོགེ ཙ བྷུཉྫིཏུཾ, པུཉྙཱནི ཙ ཀཱཏུཾ། ཡཾནཱུནཱཧཾ ཧཱིནཱཡཱཝཏྟིཏྭཱ བྷོགེ ཙ བྷུཉྫེཡྻཾ, པུཉྙཱནི ཙ ཀརེཡྻ’’’ནྟི? ‘‘ཨེཝཾ, བྷནྟེ’’ཏི ། ‘‘ཏཾ ཀིཾ མཉྙསི, སོཎ, ཀུསལོ ཏྭཾ པུབྦེ ཨགཱརིཀབྷཱུཏོ ཝཱིཎཱཡ ཏནྟིསྶརེ’’ཏི? ‘‘ཨེཝཾ, བྷནྟེ’’ཏི། ‘‘ཏཾ ཀིཾ མཉྙསི, སོཎ, ཡདཱ ཏེ ཝཱིཎཱཡ ཏནྟིཡོ ཨཙྩཱཡཏཱ ཧོནྟི, ཨཔི ནུ ཏེ ཝཱིཎཱ ཏསྨིཾ སམཡེ སརཝཏཱི ཝཱ ཧོཏི, ཀམྨཉྙཱ ཝཱ’’ཏི? ‘‘ནོ ཧེཏཾ, བྷནྟེ’’ཏི། ‘‘ཏཾ ཀིཾ མཉྙསི, སོཎ, ཡདཱ ཏེ ཝཱིཎཱཡ ཏནྟིཡོ ཨཏིསིཐིལཱ ཧོནྟི, ཨཔི ནུ ཏེ ཝཱིཎཱ ཏསྨིཾ སམཡེ སརཝཏཱི ཝཱ ཧོཏི, ཀམྨཉྙཱ ཝཱ’’ཏི? ‘‘ནོ ཧེཏཾ, བྷནྟེ’’ཏི། ‘‘ཏཾ ཀིཾ མཉྙསི, སོཎ, ཡདཱ ཏེ ཝཱིཎཱཡ ཏནྟིཡོ ནེཝ ཨཙྩཱཡཏཱ ཧོནྟི ནཱཏིསིཐིལཱ, སམེ གུཎེ པཏིཊྛིཏཱ, ཨཔི ནུ ཏེ ཝཱིཎཱ ཏསྨིཾ སམཡེ སརཝཏཱི ཝཱ ཧོཏི, ཀམྨཉྙཱ ཝཱ’’ཏི? ‘‘ཨེཝཾ, བྷནྟེ’’ཏི། ‘‘ཨེཝམེཝ ཁོ, སོཎ, ཨཙྩཱརདྡྷཝཱིརིཡཾ ཨུདྡྷཙྩཱཡ སཾཝཏྟཏི , ཨཏིལཱིནཝཱིརིཡཾ ཀོསཛྫཱཡ སཾཝཏྟཏི། ཏསྨཱཏིཧ ཏྭཾ, སོཎ, ཝཱིརིཡསམཏཾ ཨདྷིཊྛཧ, ཨིནྡྲིཡཱནཉྩ སམཏཾ པཊིཝིཛ྄ཛྷ, ཏཏྠ ཙ ནིམིཏྟཾ གཎྷཱཧཱི’’ཏི། ‘‘ཨེཝཾ, བྷནྟེ’’ཏི ཁོ ཨཱཡསྨཱ སོཎོ བྷགཝཏོ པཙྩསྶོསི། ཨཐ ཁོ བྷགཝཱ ཨཱཡསྨནྟཾ སོཎཾ ཨིམིནཱ ཨོཝཱདེན ཨོཝདིཏྭཱ – སེཡྻཐཱཔི ནཱམ བལཝཱ པུརིསོ སམྨིཉྫིཏཾ ཝཱ བཱཧཾ པསཱརེཡྻ, པསཱརིཏཾ ཝཱ བཱཧཾ སམིཉྫེཡྻ ཨེཝམེཝ – སཱིཏཝནེ ཨཱཡསྨཏོ སོཎསྶ སམྨུཁེ ཨནྟརཧིཏོ གིཛ྄ཛྷཀཱུཊེ པབྦཏེ པཱཏུརཧོསི། ཨཐ ཁོ ཨཱཡསྨཱ སོཎོ ཨཔརེན སམཡེན ཝཱིརིཡསམཏཾ ཨདྷིཊྛཱསི, ཨིནྡྲིཡཱནཉྩ སམཏཾ པཊིཝིཛ྄ཛྷི, ཏཏྠ ཙ ནིམིཏྟཾ ཨགྒཧེསི། ཨཐ ཁོ ཨཱཡསྨཱ སོཎོ, ཨེཀོ ཝཱུཔཀཊྛོ ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ, ན ཙིརསྶེཝ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི – ཏདནུཏྟརཾ བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧཱསི། ‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱ’ཏི ཨབྷིཉྙཱསི། ཨཉྙཏརོ ཙ པནཱཡསྨཱ སོཎོ ཨརཧཏཾ ཨཧོསི།
Atha kho bhagavā yenāyasmato soṇassa vihāro tenupasaṅkami, upasaṅkamitvā paññatte āsane nisīdi. Āyasmāpi kho soṇo bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ soṇaṃ bhagavā etadavoca – ‘‘nanu te, soṇa, rahogatassa paṭisallīnassa evaṃ cetaso parivitakko udapādi – ‘ye kho keci bhagavato sāvakā āraddhavīriyā viharanti, ahaṃ tesaṃ aññataro. Atha ca pana me nānupādāya āsavehi cittaṃ vimuccati. Saṃvijjanti kho pana me kule bhogā; sakkā bhoge ca bhuñjituṃ, puññāni ca kātuṃ. Yaṃnūnāhaṃ hīnāyāvattitvā bhoge ca bhuñjeyyaṃ, puññāni ca kareyya’’’nti? ‘‘Evaṃ, bhante’’ti . ‘‘Taṃ kiṃ maññasi, soṇa, kusalo tvaṃ pubbe agārikabhūto vīṇāya tantissare’’ti? ‘‘Evaṃ, bhante’’ti. ‘‘Taṃ kiṃ maññasi, soṇa, yadā te vīṇāya tantiyo accāyatā honti, api nu te vīṇā tasmiṃ samaye saravatī vā hoti, kammaññā vā’’ti? ‘‘No hetaṃ, bhante’’ti. ‘‘Taṃ kiṃ maññasi, soṇa, yadā te vīṇāya tantiyo atisithilā honti, api nu te vīṇā tasmiṃ samaye saravatī vā hoti, kammaññā vā’’ti? ‘‘No hetaṃ, bhante’’ti. ‘‘Taṃ kiṃ maññasi, soṇa, yadā te vīṇāya tantiyo neva accāyatā honti nātisithilā, same guṇe patiṭṭhitā, api nu te vīṇā tasmiṃ samaye saravatī vā hoti, kammaññā vā’’ti? ‘‘Evaṃ, bhante’’ti. ‘‘Evameva kho, soṇa, accāraddhavīriyaṃ uddhaccāya saṃvattati , atilīnavīriyaṃ kosajjāya saṃvattati. Tasmātiha tvaṃ, soṇa, vīriyasamataṃ adhiṭṭhaha, indriyānañca samataṃ paṭivijjha, tattha ca nimittaṃ gaṇhāhī’’ti. ‘‘Evaṃ, bhante’’ti kho āyasmā soṇo bhagavato paccassosi. Atha kho bhagavā āyasmantaṃ soṇaṃ iminā ovādena ovaditvā – seyyathāpi nāma balavā puriso sammiñjitaṃ vā bāhaṃ pasāreyya, pasāritaṃ vā bāhaṃ samiñjeyya evameva – sītavane āyasmato soṇassa sammukhe antarahito gijjhakūṭe pabbate pāturahosi. Atha kho āyasmā soṇo aparena samayena vīriyasamataṃ adhiṭṭhāsi, indriyānañca samataṃ paṭivijjhi, tattha ca nimittaṃ aggahesi. Atha kho āyasmā soṇo, eko vūpakaṭṭho appamatto ātāpī pahitatto viharanto, na cirasseva – yassatthāya kulaputtā sammadeva agārasmā anagāriyaṃ pabbajanti – tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti abhiññāsi. Aññataro ca panāyasmā soṇo arahataṃ ahosi.
༢༤༤. ཨཐ ཁོ ཨཱཡསྨཏོ སོཎསྶ ཨརཧཏྟཔྤཏྟསྶ ཨེཏདཧོསི – ‘‘ཡཾནཱུནཱཧཾ བྷགཝཏོ སནྟིཀེ ཨཉྙཾ བྱཱཀརེཡྻ’’ནྟི། ཨཐ ཁོ ཨཱཡསྨཱ སོཎོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ སོཎོ བྷགཝནྟཾ ཨེཏདཝོཙ – ཡོ སོ, བྷནྟེ, བྷིཀྑུ ཨརཧཾ ཁཱིཎཱསཝོ ཝུསིཏཝཱ ཀཏཀརཎཱིཡོ ཨོཧིཏབྷཱརོ ཨནུཔྤཏྟསདཏྠོ པརིཀྑཱིཎབྷཝསཉྙོཛནོ སམྨདཉྙཱ ཝིམུཏྟོ, སོ ཚཊྛཱནཱནི ཨདྷིམུཏྟོ ཧོཏི – ནེཀྑམྨཱདྷིམུཏྟོ ཧོཏི, པཝིཝེཀཱདྷིམུཏྟོ ཧོཏི, ཨབྱཱཔཛྫཱདྷིམུཏྟོ ཧོཏི, ཨུཔཱདཱནཀྑཡཱདྷིམུཏྟོ ཧོཏི, ཏཎྷཀྑཡཱདྷིམུཏྟོ ཧོཏི , ཨསམྨོཧཱདྷིམུཏྟོ ཧོཏི།
244. Atha kho āyasmato soṇassa arahattappattassa etadahosi – ‘‘yaṃnūnāhaṃ bhagavato santike aññaṃ byākareyya’’nti. Atha kho āyasmā soṇo yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā soṇo bhagavantaṃ etadavoca – yo so, bhante, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaññojano sammadaññā vimutto, so chaṭṭhānāni adhimutto hoti – nekkhammādhimutto hoti, pavivekādhimutto hoti, abyāpajjādhimutto hoti, upādānakkhayādhimutto hoti, taṇhakkhayādhimutto hoti , asammohādhimutto hoti.
‘‘སིཡཱ ཁོ པན, བྷནྟེ, ཨིདྷེཀཙྩསྶ ཨཱཡསྨཏོ ཨེཝམསྶ – ‘ཀེཝལཾ སདྡྷཱམཏྟཀཾ ནཱུན ཨཡམཱཡསྨཱ ནིསྶཱཡ ནེཀྑམྨཱདྷིམུཏྟོ’ཏི, ན ཁོ པནེཏཾ, བྷནྟེ, ཨེཝཾ དཊྛབྦཾ། ཁཱིཎཱསཝོ, བྷནྟེ, བྷིཀྑུ, ཝུསིཏཝཱ, ཀཏཀརཎཱིཡོ, ཀརཎཱིཡམཏྟཱནཾ ཨསམནུཔསྶནྟོ ཀཏསྶ ཝཱ པཊིཙཡཾ ཁཡཱ རཱགསྶ ཝཱིཏརཱགཏྟཱ ནེཀྑམྨཱདྷིམུཏྟོ ཧོཏི, ཁཡཱ དོསསྶ ཝཱིཏདོསཏྟཱ ནེཀྑམྨཱདྷིམུཏྟོ ཧོཏི, ཁཡཱ མོཧསྶ ཝཱིཏམོཧཏྟཱ ནེཀྑམྨཱདྷིམུཏྟོ ཧོཏི།
‘‘Siyā kho pana, bhante, idhekaccassa āyasmato evamassa – ‘kevalaṃ saddhāmattakaṃ nūna ayamāyasmā nissāya nekkhammādhimutto’ti, na kho panetaṃ, bhante, evaṃ daṭṭhabbaṃ. Khīṇāsavo, bhante, bhikkhu, vusitavā, katakaraṇīyo, karaṇīyamattānaṃ asamanupassanto katassa vā paṭicayaṃ khayā rāgassa vītarāgattā nekkhammādhimutto hoti, khayā dosassa vītadosattā nekkhammādhimutto hoti, khayā mohassa vītamohattā nekkhammādhimutto hoti.
‘‘སིཡཱ ཁོ པན, བྷནྟེ, ཨིདྷེཀཙྩསྶ ཨཱཡསྨཏོ ཨེཝམསྶ – ‘ལཱབྷསཀྐཱརསིལོཀཾ ནཱུན ཨཡམཱཡསྨཱ ནིཀཱམཡམཱནོ པཝིཝེཀཱདྷིམུཏྟོ’ཏི། ན ཁོ པནེཏཾ, བྷནྟེ, ཨེཝཾ དཊྛབྦཾ། ཁཱིཎཱསཝོ, བྷནྟེ, བྷིཀྑུ, ཝུསིཏཝཱ, ཀཏཀརཎཱིཡོ, ཀརཎཱིཡམཏྟཱནཾ 7 ཨསམནུཔསྶནྟོ ཀཏསྶ ཝཱ པཊིཙཡཾ, ཁཡཱ རཱགསྶ ཝཱིཏརཱགཏྟཱ པཝིཝེཀཱདྷིམུཏྟོ ཧོཏི, ཁཡཱ དོསསྶ ཝཱིཏདོསཏྟཱ པཝིཝེཀཱདྷིམུཏྟོ ཧོཏི, ཁཡཱ མོཧསྶ ཝཱིཏམོཧཏྟཱ པཝིཝེཀཱདྷིམུཏྟོ ཧོཏི།
‘‘Siyā kho pana, bhante, idhekaccassa āyasmato evamassa – ‘lābhasakkārasilokaṃ nūna ayamāyasmā nikāmayamāno pavivekādhimutto’ti. Na kho panetaṃ, bhante, evaṃ daṭṭhabbaṃ. Khīṇāsavo, bhante, bhikkhu, vusitavā, katakaraṇīyo, karaṇīyamattānaṃ 8 asamanupassanto katassa vā paṭicayaṃ, khayā rāgassa vītarāgattā pavivekādhimutto hoti, khayā dosassa vītadosattā pavivekādhimutto hoti, khayā mohassa vītamohattā pavivekādhimutto hoti.
‘‘སིཡཱ ཁོ པན, བྷནྟེ, ཨིདྷེཀཙྩསྶ ཨཱཡསྨཏོ ཨེཝམསྶ – ‘སཱིལབྦཏཔརཱམཱསཾ ནཱུན ཨཡམཱཡསྨཱ སཱརཏོ པཙྩཱགཙྪནྟོ ཨབྱཱཔཛྫཱདྷིམུཏྟོ’ཏི། ན ཁོ པནེཏཾ, བྷནྟེ, ཨེཝཾ དཊྛབྦཾ། ཁཱིཎཱསཝོ, བྷནྟེ, བྷིཀྑུ, ཝུསིཏཝཱ, ཀཏཀརཎཱིཡོ, ཀརཎཱིཡམཏྟཱནཾ ཨསམནུཔསྶནྟོ ཀཏསྶ ཝཱ པཊིཙཡཾ, ཁཡཱ རཱགསྶ ཝཱིཏརཱགཏྟཱ ཨབྱཱཔཛྫཱདྷིམུཏྟོ ཧོཏི, ཁཡཱ དོསསྶ ཝཱིཏདོསཏྟཱ ཨབྱཱཔཛྫཱདྷིམུཏྟོ ཧོཏི, ཁཡཱ མོཧསྶ ཝཱིཏམོཧཏྟཱ ཨབྱཱཔཛྫཱདྷིམུཏྟོ ཧོཏི།
‘‘Siyā kho pana, bhante, idhekaccassa āyasmato evamassa – ‘sīlabbataparāmāsaṃ nūna ayamāyasmā sārato paccāgacchanto abyāpajjādhimutto’ti. Na kho panetaṃ, bhante, evaṃ daṭṭhabbaṃ. Khīṇāsavo, bhante, bhikkhu, vusitavā, katakaraṇīyo, karaṇīyamattānaṃ asamanupassanto katassa vā paṭicayaṃ, khayā rāgassa vītarāgattā abyāpajjādhimutto hoti, khayā dosassa vītadosattā abyāpajjādhimutto hoti, khayā mohassa vītamohattā abyāpajjādhimutto hoti.
‘‘ཁཡཱ རཱགསྶ ཝཱིཏརཱགཏྟཱ ཨུཔཱདཱནཀྑཡཱདྷིམུཏྟོ ཧོཏི, ཁཡཱ དོསསྶ ཝཱིཏདོསཏྟཱ ཨུཔཱདཱནཀྑཡཱདྷིམུཏྟོ ཧོཏི, ཁཡཱ མོཧསྶ ཝཱིཏམོཧཏྟཱ ཨུཔཱདཱནཀྑཡཱདྷིམུཏྟོ ཧོཏི།
‘‘Khayā rāgassa vītarāgattā upādānakkhayādhimutto hoti, khayā dosassa vītadosattā upādānakkhayādhimutto hoti, khayā mohassa vītamohattā upādānakkhayādhimutto hoti.
‘‘ཁཡཱ རཱགསྶ ཝཱིཏརཱགཏྟཱ ཏཎྷཀྑཡཱདྷིམུཏྟོ ཧོཏི, ཁཡཱ དོསསྶ ཝཱིཏདོསཏྟཱ ཏཎྷཀྑཡཱདྷིམུཏྟོ ཧོཏི, ཁཡཱ མོཧསྶ ཝཱིཏམོཧཏྟཱ ཏཎྷཀྑཡཱདྷིམུཏྟོ ཧོཏི།
‘‘Khayā rāgassa vītarāgattā taṇhakkhayādhimutto hoti, khayā dosassa vītadosattā taṇhakkhayādhimutto hoti, khayā mohassa vītamohattā taṇhakkhayādhimutto hoti.
‘‘ཁཡཱ རཱགསྶ ཝཱིཏརཱགཏྟཱ ཨསམྨོཧཱདྷིམུཏྟོ ཧོཏི, ཁཡཱ དོསསྶ ཝཱིཏདོསཏྟཱ ཨསམྨོཧཱདྷིམུཏྟོ ཧོཏི, ཁཡཱ མོཧསྶ ཝཱིཏམོཧཏྟཱ ཨསམྨོཧཱདྷིམུཏྟོ ཧོཏི།
‘‘Khayā rāgassa vītarāgattā asammohādhimutto hoti, khayā dosassa vītadosattā asammohādhimutto hoti, khayā mohassa vītamohattā asammohādhimutto hoti.
‘‘ཨེཝཾ སམྨཱ ཝིམུཏྟཙིཏྟསྶ, བྷནྟེ, བྷིཀྑུནོ བྷུསཱ ཙེཔི ཙཀྑུཝིཉྙེཡྻཱ རཱུཔཱ ཙཀྑུསྶ ཨཱཔཱཐཾ ཨཱགཙྪནྟི, ནེཝསྶ ཙིཏྟཾ པརིཡཱདིཡནྟི། ཨམིསྶཱིཀཏམེཝསྶ ཙིཏྟཾ ཧོཏི, ཋིཏཾ, ཨཱནེཉྫཔྤཏྟཾ, ཝཡཉྩསྶཱནུཔསྶཏི། བྷུསཱ ཙེཔི སོཏཝིཉྙེཡྻཱ སདྡཱ…པེ॰… གྷཱནཝིཉྙེཡྻཱ གནྡྷཱ… ཛིཝ྄ཧཱཝིཉྙེཡྻཱ རསཱ… ཀཱཡཝིཉྙེཡྻཱ ཕོཊྛབྦཱ… མནོཝིཉྙེཡྻཱ དྷམྨཱ མནསྶ ཨཱཔཱཐཾ ཨཱགཙྪནྟི, ནེཝསྶ ཙིཏྟཾ པརིཡཱདིཡནྟི; ཨམིསྶཱིཀཏམེཝསྶ ཙིཏྟཾ ཧོཏི, ཋིཏཾ, ཨཱནེཉྫཔྤཏྟཾ, ཝཡཉྩསྶཱནུཔསྶཏི། སེཡྻཐཱཔི, བྷནྟེ, སེལོ པབྦཏོ ཨཙྪིདྡོ ཨསུསིརོ ཨེཀགྒྷནོ, པུརཏྠིམཱཡ ཙེཔི དིསཱཡ ཨཱགཙྪེཡྻ བྷུསཱ ཝཱཏཝུཊྛི, ནེཝ ནཾ སངྐམྤེཡྻ ན སམྤཀམྤེཡྻ ན སམྤཝེདྷེཡྻ; པཙྪིམཱཡ ཙེཔི དིསཱཡ ཨཱགཙྪེཡྻ བྷུསཱ ཝཱཏཝུཊྛི…པེ॰… ཨུཏྟརཱཡ ཙེཔི དིསཱཡ…པེ॰… དཀྑིཎཱཡ ཙེཔི དིསཱཡ ཨཱགཙྪེཡྻ བྷུསཱ ཝཱཏཝུཊྛི, ནེཝ ནཾ སངྐམྤེཡྻ ན སམྤཀམྤེཡྻ ན སམྤཝེདྷེཡྻ, ཨེཝམེཝ ཁོ, བྷནྟེ, ཨེཝཾ སམྨཱ ཝིམུཏྟཙིཏྟསྶ བྷིཀྑུནོ བྷུསཱ ཙེཔི ཙཀྑུཝིཉྙེཡྻཱ རཱུཔཱ ཙཀྑུསྶ ཨཱཔཱཐཾ ཨཱགཙྪནྟི, ནེཝསྶ ཙིཏྟཾ པརིཡཱདིཡནྟི; ཨམིསྶཱིཀཏམེཝསྶ ཙིཏྟཾ ཧོཏི, ཋིཏཾ, ཨཱནེཉྫཔྤཏྟཾ, ཝཡཉྩསྶཱནུཔསྶཏི། བྷུསཱ ཙེཔི སོཏཝིཉྙེཡྻཱ སདྡཱ…པེ॰… གྷཱནཝིཉྙེཡྻཱ གནྡྷཱ… ཛིཝ྄ཧཱཝིཉྙེཡྻཱ རསཱ… ཀཱཡཝིཉྙེཡྻཱ ཕོཊྛབྦཱ… མནོཝིཉྙེཡྻཱ དྷམྨཱ མནསྶ ཨཱཔཱཐཾ ཨཱགཙྪནྟི, ནེཝསྶ ཙིཏྟཾ པརིཡཱདིཡནྟི; ཨམིསྶཱིཀཏམེཝསྶ ཙིཏྟཾ ཧོཏི, ཋིཏཾ, ཨཱནེཉྫཔྤཏྟཾ, ཝཡཉྩསྶཱནུཔསྶཏཱི’’ཏི།
‘‘Evaṃ sammā vimuttacittassa, bhante, bhikkhuno bhusā cepi cakkhuviññeyyā rūpā cakkhussa āpāthaṃ āgacchanti, nevassa cittaṃ pariyādiyanti. Amissīkatamevassa cittaṃ hoti, ṭhitaṃ, āneñjappattaṃ, vayañcassānupassati. Bhusā cepi sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā… manoviññeyyā dhammā manassa āpāthaṃ āgacchanti, nevassa cittaṃ pariyādiyanti; amissīkatamevassa cittaṃ hoti, ṭhitaṃ, āneñjappattaṃ, vayañcassānupassati. Seyyathāpi, bhante, selo pabbato acchiddo asusiro ekagghano, puratthimāya cepi disāya āgaccheyya bhusā vātavuṭṭhi, neva naṃ saṅkampeyya na sampakampeyya na sampavedheyya; pacchimāya cepi disāya āgaccheyya bhusā vātavuṭṭhi…pe… uttarāya cepi disāya…pe… dakkhiṇāya cepi disāya āgaccheyya bhusā vātavuṭṭhi, neva naṃ saṅkampeyya na sampakampeyya na sampavedheyya, evameva kho, bhante, evaṃ sammā vimuttacittassa bhikkhuno bhusā cepi cakkhuviññeyyā rūpā cakkhussa āpāthaṃ āgacchanti, nevassa cittaṃ pariyādiyanti; amissīkatamevassa cittaṃ hoti, ṭhitaṃ, āneñjappattaṃ, vayañcassānupassati. Bhusā cepi sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā… manoviññeyyā dhammā manassa āpāthaṃ āgacchanti, nevassa cittaṃ pariyādiyanti; amissīkatamevassa cittaṃ hoti, ṭhitaṃ, āneñjappattaṃ, vayañcassānupassatī’’ti.
ནེཀྑམྨཾ ཨདྷིམུཏྟསྶ, པཝིཝེཀཉྩ ཙེཏསོ།
Nekkhammaṃ adhimuttassa, pavivekañca cetaso;
ཨབྱཱཔཛྫཱདྷིམུཏྟསྶ, ཨུཔཱདཱནཀྑཡསྶ ཙ༎
Abyāpajjādhimuttassa, upādānakkhayassa ca.
ཏཎྷཀྑཡཱདྷིམུཏྟསྶ , ཨསམྨོཧཉྩ ཙེཏསོ།
Taṇhakkhayādhimuttassa , asammohañca cetaso;
དིསྭཱ ཨཱཡཏནུཔྤཱདཾ, སམྨཱ ཙིཏྟཾ ཝིམུཙྩཏི༎
Disvā āyatanuppādaṃ, sammā cittaṃ vimuccati.
ཏསྶ སམྨཱཝིམུཏྟསྶ, སནྟཙིཏྟསྶ བྷིཀྑུནོ།
Tassa sammāvimuttassa, santacittassa bhikkhuno;
ཀཏསྶ པཊིཙཡོ ནཏྠི, ཀརཎཱིཡཾ ན ཝིཛྫཏི༎
Katassa paṭicayo natthi, karaṇīyaṃ na vijjati.
སེལོ ཡཐཱ ཨེཀགྒྷནོ, ཝཱཏེན ན སམཱིརཏི།
Selo yathā ekagghano, vātena na samīrati;
ཨེཝཾ རཱུཔཱ རསཱ སདྡཱ, གནྡྷཱ ཕསྶཱ ཙ ཀེཝལཱ༎
Evaṃ rūpā rasā saddā, gandhā phassā ca kevalā.
ཨིཊྛཱ དྷམྨཱ ཨནིཊྛཱ ཙ, ན པཝེདྷེནྟི ཏཱདིནོ།
Iṭṭhā dhammā aniṭṭhā ca, na pavedhenti tādino;
ཋིཏཾ ཙིཏྟཾ ཝིཔྤམུཏྟཾ, ཝཡཉྩསྶཱནུཔསྶཏཱིཏི༎
Ṭhitaṃ cittaṃ vippamuttaṃ, vayañcassānupassatīti.
སོཎཀོལི༹ཝིསཝཏྠུ ནིཊྛིཏཾ།
Soṇakoḷivisavatthu niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā
སོཎཀོལི༹ཝིསཝཏྠུཀཐཱ • Soṇakoḷivisavatthukathā
སོཎསྶ པབྦཛྫཱཀཐཱ • Soṇassa pabbajjākathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā
སོཎཀོལི༹ཝིསཝཏྠུཀཐཱཝཎྞནཱ • Soṇakoḷivisavatthukathāvaṇṇanā
སོཎསྶ པབྦཛྫཱཀཐཱཝཎྞནཱ • Soṇassa pabbajjākathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā
སོཎཀོལི༹ཝིསཝཏྠུཀཐཱཝཎྞནཱ • Soṇakoḷivisavatthukathāvaṇṇanā
སོཎསྶཔབྦཛྫཱཀཐཱཝཎྞནཱ • Soṇassapabbajjākathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / སོཎཀོལི༹ཝིསཀཐཱདིཝཎྞནཱ • Soṇakoḷivisakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༤༧. སོཎཀོལི༹ཝིསཝཏྠུཀཐཱ • 147. Soṇakoḷivisavatthukathā
