| Library / Tipiṭaka / ติปิฎก • Tipiṭaka / วชิรพุทฺธิ-ฎีกา • Vajirabuddhi-ṭīkā |
๕. จมฺมกฺขนฺธกวณฺณนา
5. Cammakkhandhakavaṇṇanā
โสณโกฬิวิสวตฺถุกถาวณฺณนา
Soṇakoḷivisavatthukathāvaṇṇanā
๒๔๒. อสีติยา …เป.… กาเรตีติ ‘‘อสีติ คามิกสหสฺสานิ สนฺนิปาตาเปตฺวา’’ติ อิมสฺส การณวจนํฯ ตตฺถ ‘‘คามานํ อสีติยา สหเสฺสสู’’ติ วตฺตเพฺพ ‘‘อสีติยา คามสหเสฺสสู’’ติ วุตฺตํฯ คามปฺปมุขา คามิกา, เตสํ สหสฺสานิฯ ‘‘กมฺมจิตฺตีกตานี’’ติ อุปจาเรน วุตฺตํฯ กมฺมปจฺจยอุตุสมุฎฺฐาเน หิ เตสํ อญฺชนวณฺณภาโวฯ ‘‘เกนจิเทว กรณีเยนา’’ติ วตฺตเพฺพ ‘‘เกนจิเทวา’’ติ วุตฺตํฯ เอตฺถ เอวํ-สโทฺท โอปเมฺม ปวตฺตติฯ เอวมุปมาโนปเทสปุจฺฉาวธารณปฎิญฺญาตโอปเมฺมฯ ปุรโต เปกฺขมานานนฺติ อนาทรเตฺถ สามิวจนํฯ ตโต ปน ภควโต คนฺธกุฎิยา กวาฎํ สุพทฺธํ ปสฺสิตฺวา อิจฺฉิตาการกุสลตาย อิทฺธิยา คนฺตฺวา กุฎิํ ปวิสิตฺวา อาโรเจสิฯ วิหารปจฺฉายายนฺติ วิหารสฺส วฑฺฒมานจฺฉายายํฯ ‘‘อโห นูนาติ อโห มหโนฺต’’ติ ลิขิตํฯ ภควโต สมฺพหุเลหิ สทฺธิํ อาหิณฺฑนํ อายสฺมโต โสณสฺส วีริยารมฺภนิทสฺสเนน อนารทฺธวีริยานํ อุเตฺตชนตฺถํ, เอวํ สุขุมาลานํ ปาทรกฺขณตฺถํ อุปาหนา อนุญฺญาตาติ ทสฺสนตฺถญฺจฯ
242.Asītiyā…pe… kāretīti ‘‘asīti gāmikasahassāni sannipātāpetvā’’ti imassa kāraṇavacanaṃ. Tattha ‘‘gāmānaṃ asītiyā sahassesū’’ti vattabbe ‘‘asītiyā gāmasahassesū’’ti vuttaṃ. Gāmappamukhā gāmikā, tesaṃ sahassāni. ‘‘Kammacittīkatānī’’ti upacārena vuttaṃ. Kammapaccayautusamuṭṭhāne hi tesaṃ añjanavaṇṇabhāvo. ‘‘Kenacideva karaṇīyenā’’ti vattabbe ‘‘kenacidevā’’ti vuttaṃ. Ettha evaṃ-saddo opamme pavattati. Evamupamānopadesapucchāvadhāraṇapaṭiññātaopamme. Purato pekkhamānānanti anādaratthe sāmivacanaṃ. Tato pana bhagavato gandhakuṭiyā kavāṭaṃ subaddhaṃ passitvā icchitākārakusalatāya iddhiyā gantvā kuṭiṃ pavisitvā ārocesi. Vihārapacchāyāyanti vihārassa vaḍḍhamānacchāyāyaṃ. ‘‘Aho nūnāti aho mahanto’’ti likhitaṃ. Bhagavato sambahulehi saddhiṃ āhiṇḍanaṃ āyasmato soṇassa vīriyārambhanidassanena anāraddhavīriyānaṃ uttejanatthaṃ, evaṃ sukhumālānaṃ pādarakkhaṇatthaṃ upāhanā anuññātāti dassanatthañca.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๑๔๗. โสณโกฬิวิสวตฺถุ • 147. Soṇakoḷivisavatthu
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / โสณโกฬิวิสวตฺถุกถา • Soṇakoḷivisavatthukathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / โสณโกฬิวิสวตฺถุกถาวณฺณนา • Soṇakoḷivisavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / โสณโกฬิวิสกถาทิวณฺณนา • Soṇakoḷivisakathādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๑๔๗. โสณโกฬิวิสวตฺถุกถา • 147. Soṇakoḷivisavatthukathā
