Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

    ๙. โสณโกฎิวีสเตฺถรอปทานํ

    9. Soṇakoṭivīsattheraapadānaṃ

    ๔๙.

    49.

    ‘‘วิปสฺสิโน ปาวจเน, เอกํ เลณํ มยา กตํ;

    ‘‘Vipassino pāvacane, ekaṃ leṇaṃ mayā kataṃ;

    จาตุทฺทิสสฺส สงฺฆสฺส, พนฺธุมาราชธานิยาฯ

    Cātuddisassa saṅghassa, bandhumārājadhāniyā.

    ๕๐.

    50.

    ‘‘ทุเสฺสหิ ภูมิํ เลณสฺส, สนฺถริตฺวา ปริจฺจชิํ;

    ‘‘Dussehi bhūmiṃ leṇassa, santharitvā pariccajiṃ;

    อุทคฺคจิโตฺต สุมโน, อกาสิํ ปณิธิํ ตทาฯ

    Udaggacitto sumano, akāsiṃ paṇidhiṃ tadā.

    ๕๑.

    51.

    ‘‘อาราธเยยฺยํ สมฺพุทฺธํ, ปพฺพชฺชญฺจ ลเภยฺยหํ;

    ‘‘Ārādhayeyyaṃ sambuddhaṃ, pabbajjañca labheyyahaṃ;

    อนุตฺตรญฺจ นิพฺพานํ, ผุเสยฺยํ สนฺติมุตฺตมํฯ

    Anuttarañca nibbānaṃ, phuseyyaṃ santimuttamaṃ.

    ๕๒.

    52.

    ‘‘เตเนว สุกฺกมูเลน, กเปฺป 1 นวุติ สํสริํ;

    ‘‘Teneva sukkamūlena, kappe 2 navuti saṃsariṃ;

    เทวภูโต มนุโสฺส จ, กตปุโญฺญ วิโรจหํฯ

    Devabhūto manusso ca, katapuñño virocahaṃ.

    ๕๓.

    53.

    ‘‘ตโต กมฺมาวเสเสน, อิธ ปจฺฉิมเก ภเว;

    ‘‘Tato kammāvasesena, idha pacchimake bhave;

    จมฺปายํ อคฺคเสฎฺฐิสฺส, ชาโตมฺหิ เอกปุตฺตโกฯ

    Campāyaṃ aggaseṭṭhissa, jātomhi ekaputtako.

    ๕๔.

    54.

    ‘‘ชาตมตฺตสฺส เม สุตฺวา, ปิตุ ฉโนฺท อยํ อหุ;

    ‘‘Jātamattassa me sutvā, pitu chando ayaṃ ahu;

    ททามหํ กุมารสฺส, วีสโกฎี อนูนกาฯ

    Dadāmahaṃ kumārassa, vīsakoṭī anūnakā.

    ๕๕.

    55.

    ‘‘จตุรงฺคุลา จ เม โลมา, ชาตา ปาทตเล อุโภ;

    ‘‘Caturaṅgulā ca me lomā, jātā pādatale ubho;

    สุขุมา มุทุสมฺผสฺสา, ตูลาปิจุสมา สุภาฯ

    Sukhumā mudusamphassā, tūlāpicusamā subhā.

    ๕๖.

    56.

    ‘‘อตีตา นวุติ กปฺปา, อยํ เอโก จ อุตฺตริ;

    ‘‘Atītā navuti kappā, ayaṃ eko ca uttari;

    นาภิชานามิ นิกฺขิเตฺต, ปาเท ภูมฺยา อสนฺถเตฯ

    Nābhijānāmi nikkhitte, pāde bhūmyā asanthate.

    ๕๗.

    57.

    ‘‘อาราธิโต เม สมฺพุโทฺธ, ปพฺพชิํ อนคาริยํ;

    ‘‘Ārādhito me sambuddho, pabbajiṃ anagāriyaṃ;

    อรหตฺตญฺจ เม ปตฺตํ, สีติภูโตมฺหิ นิพฺพุโตฯ

    Arahattañca me pattaṃ, sītibhūtomhi nibbuto.

    ๕๘.

    58.

    ‘‘อโคฺค อารทฺธวีริยานํ, นิทฺทิโฎฺฐ สพฺพทสฺสินา;

    ‘‘Aggo āraddhavīriyānaṃ, niddiṭṭho sabbadassinā;

    ขีณาสโวมฺหิ อรหา, ฉฬภิโญฺญ มหิทฺธิโกฯ

    Khīṇāsavomhi arahā, chaḷabhiñño mahiddhiko.

    ๕๙.

    59.

    ‘‘เอกนวุติโต กเปฺป, ยํ ทานมททิํ ตทา;

    ‘‘Ekanavutito kappe, yaṃ dānamadadiṃ tadā;

    ทุคฺคติํ นาภิชานามิ, เลณทานสฺสิทํ ผลํฯ

    Duggatiṃ nābhijānāmi, leṇadānassidaṃ phalaṃ.

    ๖๐.

    60.

    ‘‘กิเลสา ฌาปิตา มยฺหํ…เป.… วิหรามิ อนาสโวฯ

    ‘‘Kilesā jhāpitā mayhaṃ…pe… viharāmi anāsavo.

    ๖๑.

    61.

    ‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

    ‘‘Svāgataṃ vata me āsi…pe… kataṃ buddhassa sāsanaṃ.

    ๖๒.

    62.

    ‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ

    ‘‘Paṭisambhidā catasso…pe… kataṃ buddhassa sāsanaṃ’’.

    ๖๓.

    63.

    ‘‘เถโร โกฎิวีโส 3 โสโณ, ภิกฺขุสงฺฆสฺส อคฺคโต;

    ‘‘Thero koṭivīso 4 soṇo, bhikkhusaṅghassa aggato;

    ปญฺหํ ปุโฎฺฐ วิยากาสิ, อโนตเตฺต มหาสเร’’ติฯ

    Pañhaṃ puṭṭho viyākāsi, anotatte mahāsare’’ti.

    อิตฺถํ สุทํ อายสฺมา โสโณ โกฎิวีโส เถโร อิมา คาถาโย อภาสิตฺถาติฯ

    Itthaṃ sudaṃ āyasmā soṇo koṭivīso thero imā gāthāyo abhāsitthāti.

    โสณโกฎิวีสเตฺถรสฺสาปทานํ นวมํฯ

    Soṇakoṭivīsattherassāpadānaṃ navamaṃ.




    Next: ๑๐. ปุพฺพกมฺมปิโลติกพุทฺธอปทานํ • 10. Pubbakammapilotikabuddhaapadānaṃ




    Footnotes:
    1. กปฺปํ (สี.), กปฺป (ก.)
    2. kappaṃ (sī.), kappa (ka.)
    3. โกฎิวิโส (สฺยา. ก.), โกฬิวิโส (อญฺญฎฺฐาเนสุ)
    4. koṭiviso (syā. ka.), koḷiviso (aññaṭṭhānesu)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๙. โสณโกฎิวีสเตฺถรอปทานวณฺณนา • 9. Soṇakoṭivīsattheraapadānavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact