| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
11. сон̣агудиган̣н̣ад̇т̇зраг̇аат̇ааван̣н̣анаа
11. Soṇakuṭikaṇṇattheragāthāvaṇṇanā
убасамбад̣̇аа жа мз лад̣̇д̇хаад̇иаад̣̇игаа ааяасмад̇о сон̣асса гудиган̣н̣асса г̇аат̇аа. гаа уббад̇д̇и? аяам̣ гира бад̣̇умуд̇д̇арасса бхаг̇авад̇о гаалз хам̣савад̇ийнаг̇арз вибхавасамбанно сздти худ̇ваа ул̣аарааяа иссарияасамбад̇д̇ияаа тид̇о згад̣̇ивасам̣ сад̇т̇аарам̣ сад̇асахассакийн̣аасавабаривуд̇ам̣ махад̇ияаа б̣уд̣̇д̇халийл̣ааяа маханд̇зна б̣уд̣̇д̇хаанубхаавзна наг̇арам̣ бависанд̇ам̣ д̣̇исваа басаннамаанасо ванд̣̇ид̇ваа ан̃ж̇алим̣ гад̇ваа адтааси. со бажчаабхад̇д̇ам̣ убаасагзхи сад̣̇д̇хим̣ вихаарам̣ г̇анд̇ваа бхаг̇авад̇о санд̇игз д̇хаммам̣ сун̣анд̇о сад̇т̇аарам̣ згам̣ бхигкум̣ галяаан̣авааггаран̣аанам̣ аг̇г̇адтаанз табзнд̇ам̣ д̣̇исваа саяамби д̇ам̣ таанам̣ бад̇т̇зд̇ваа махаад̣̇аанам̣ д̣̇ад̇ваа бан̣ид̇хаанам̣ агааси. сад̇т̇аа д̇асса ананд̇арааяад̇ам̣ д̣̇исваа ‘‘анааг̇ад̇з г̇од̇амасса наама саммаасамб̣уд̣̇д̇хасса саасанз галяаан̣авааггаран̣аанам̣ аг̇г̇о бхависсад̇ий’’д̇и б̣яаагааси.
Upasampadāca me laddhātiādikā āyasmato soṇassa kuṭikaṇṇassa gāthā. Kā uppatti? Ayaṃ kira padumuttarassa bhagavato kāle haṃsavatīnagare vibhavasampanno seṭṭhi hutvā uḷārāya issariyasampattiyā ṭhito ekadivasaṃ satthāraṃ satasahassakhīṇāsavaparivutaṃ mahatiyā buddhalīḷāya mahantena buddhānubhāvena nagaraṃ pavisantaṃ disvā pasannamānaso vanditvā añjaliṃ katvā aṭṭhāsi. So pacchābhattaṃ upāsakehi saddhiṃ vihāraṃ gantvā bhagavato santike dhammaṃ suṇanto satthāraṃ ekaṃ bhikkhuṃ kalyāṇavākkaraṇānaṃ aggaṭṭhāne ṭhapentaṃ disvā sayampi taṃ ṭhānaṃ patthetvā mahādānaṃ datvā paṇidhānaṃ akāsi. Satthā tassa anantarāyataṃ disvā ‘‘anāgate gotamassa nāma sammāsambuddhassa sāsane kalyāṇavākkaraṇānaṃ aggo bhavissatī’’ti byākāsi.
со д̇ад̇т̇а яааваж̇ийвам̣ бун̃н̃аани гад̇ваа д̣̇звамануссзсу сам̣саранд̇о вибассисса бхаг̇авад̇о гаалз саасанз баб̣б̣аж̇ид̇ваа вад̇д̇абадивад̇д̇аани буурзнд̇о згасса бхигкуно жийварам̣ сиб̣б̣ид̇ваа ад̣̇ааси. буна б̣уд̣̇д̇хасун̃н̃з логз б̣аараан̣асияам̣ д̇уннавааяо худ̇ваа згасса бажжзгаб̣уд̣̇д̇хасса жийварагодим̣ чиннам̣ гхадзд̇ваа ад̣̇ааси. звам̣ д̇ад̇т̇а д̇ад̇т̇а бун̃н̃аани гад̇ваа имасмим̣ б̣уд̣̇д̇хуббаад̣̇з аванд̇ирадтз гурарагхарз махаавибхавасса сздтино буд̇д̇о худ̇ваа ниб̣б̣ад̇д̇и. сон̣од̇исса наамам̣ агам̣су. годиаг̇гханагасса ган̣н̣абил̣анд̇ханасса д̇хааран̣зна ‘‘годиган̣н̣о’’д̇и вад̇д̇аб̣б̣з гудиган̣н̣од̇и бан̃н̃ааяид̇т̇а.
So tattha yāvajīvaṃ puññāni katvā devamanussesu saṃsaranto vipassissa bhagavato kāle sāsane pabbajitvā vattapaṭivattāni pūrento ekassa bhikkhuno cīvaraṃ sibbitvā adāsi. Puna buddhasuññe loke bārāṇasiyaṃ tunnavāyo hutvā ekassa paccekabuddhassa cīvarakoṭiṃ chinnaṃ ghaṭetvā adāsi. Evaṃ tattha tattha puññāni katvā imasmiṃ buddhuppāde avantiraṭṭhe kuraraghare mahāvibhavassa seṭṭhino putto hutvā nibbatti. Soṇotissa nāmaṃ akaṃsu. Koṭiagghanakassa kaṇṇapiḷandhanassa dhāraṇena ‘‘koṭikaṇṇo’’ti vattabbe kuṭikaṇṇoti paññāyittha.
со ануггамзна вад̣дхид̇ваа гудумб̣ам̣ сан̣табзнд̇о ааяасманд̇з махаагажжаанз гулагхарам̣ ниссааяа бавад̇д̇абаб̣б̣ад̇з вихаранд̇з д̇асса санд̇игз д̇хаммам̣ суд̇ваа саран̣зсу жа сийлзсу жа бад̇идтааяа д̇ам̣ жад̇уухи бажжаязхи убадтахи. со абарабхааг̇з сам̣саарз сан̃ж̇аад̇асам̣взг̇о т̇зрасса санд̇игз баб̣б̣аж̇ид̇ваа гижчзна гасирзна д̣̇асаваг̇г̇ам̣ сан̇гхам̣ саннибаад̇зд̇ваа убасамбаж̇ж̇ид̇ваа гад̇ибаяагаалам̣ т̇зрасса санд̇игз васид̇ваа, т̇зрам̣ аабужчид̇ваа сад̇т̇аарам̣ ванд̣̇ид̇ум̣ саавад̇т̇им̣ убаг̇ад̇о, сад̇т̇аараа згаг̇анд̇хагудияам̣ ваасам̣ лабхид̇ваа бажжуусасамаяз аж̇жхидто сол̣асаадтагаваг̇г̇ияаанам̣ уссааран̣зна саад̇хугаарам̣ д̣̇ад̇ваа бхаасид̇ааяа ‘‘д̣̇исваа аад̣̇ийнавам̣ логз’’д̇и (уд̣̇аа. 46; махаава. 258) уд̣̇аанаг̇аат̇ааяа барияосаанз вибассанам̣ вад̣дхзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 2.44.26-34) –
So anukkamena vaḍḍhitvā kuṭumbaṃ saṇṭhapento āyasmante mahākaccāne kulagharaṃ nissāya pavattapabbate viharante tassa santike dhammaṃ sutvā saraṇesu ca sīlesu ca patiṭṭhāya taṃ catūhi paccayehi upaṭṭhahi. So aparabhāge saṃsāre sañjātasaṃvego therassa santike pabbajitvā kicchena kasirena dasavaggaṃ saṅghaṃ sannipātetvā upasampajjitvā katipayakālaṃ therassa santike vasitvā, theraṃ āpucchitvā satthāraṃ vandituṃ sāvatthiṃ upagato, satthārā ekagandhakuṭiyaṃ vāsaṃ labhitvā paccūsasamaye ajjhiṭṭho soḷasaaṭṭhakavaggiyānaṃ ussāraṇena sādhukāraṃ datvā bhāsitāya ‘‘disvā ādīnavaṃ loke’’ti (udā. 46; mahāva. 258) udānagāthāya pariyosāne vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 2.44.26-34) –
‘‘бад̣̇умуд̇д̇аро наама ж̇ино, аахуд̇ийнам̣ бадиг̇г̇ахо;
‘‘Padumuttaro nāma jino, āhutīnaṃ paṭiggaho;
васийсад̇асахассзхи, наг̇арам̣ баависий д̇ад̣̇аа.
Vasīsatasahassehi, nagaraṃ pāvisī tadā.
‘‘наг̇арам̣ бависанд̇асса, убасанд̇асса д̇аад̣̇ино;
‘‘Nagaraṃ pavisantassa, upasantassa tādino;
рад̇анаани баж̇ж̇од̇им̣су, ниг̇гхосо ааси д̇аавад̣̇з.
Ratanāni pajjotiṃsu, nigghoso āsi tāvade.
‘‘б̣уд̣̇д̇хасса аанубхаавзна, бхзрий важ̇ж̇умагхаддид̇аа;
‘‘Buddhassa ānubhāvena, bherī vajjumaghaṭṭitā;
саяам̣ вийн̣аа баваж̇ж̇анд̇и, б̣уд̣̇д̇хасса бависад̇о бурам̣.
Sayaṃ vīṇā pavajjanti, buddhassa pavisato puraṃ.
‘‘б̣уд̣̇д̇хасздтам̣ намассаами, бад̣̇умуд̇д̇арамахаамуним̣;
‘‘Buddhaseṭṭhaṃ namassāmi, padumuttaramahāmuniṃ;
баадихийран̃жа бассид̇ваа, д̇ад̇т̇а жид̇д̇ам̣ басаад̣̇аяим̣.
Pāṭihīrañca passitvā, tattha cittaṃ pasādayiṃ.
‘‘ахо б̣уд̣̇д̇хо ахо д̇хаммо, ахо но сад̇т̇у самбад̣̇аа;
‘‘Aho buddho aho dhammo, aho no satthu sampadā;
ажзд̇анааби д̇уурияаа, саяамзва баваж̇ж̇арз.
Acetanāpi tūriyā, sayameva pavajjare.
‘‘сад̇асахассид̇о габбз, яам̣ сан̃н̃амалабхим̣ д̇ад̣̇аа;
‘‘Satasahassito kappe, yaṃ saññamalabhiṃ tadā;
д̣̇уг̇г̇ад̇им̣ наабхиж̇аанаами, б̣уд̣̇д̇хасан̃н̃ааяид̣̇ам̣ палам̣.
Duggatiṃ nābhijānāmi, buddhasaññāyidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇з бана бад̇идтид̇о ад̇д̇ано убаж̇жхааязна аажигкид̇анияаамзна бажжанд̇имзсу ж̇анабад̣̇зсу винаяад̇харабан̃жамзна г̇ан̣зна убасамбад̣̇аа, д̇хуванхаанам̣, жаммад̇т̇аран̣ам̣, г̇ун̣ан̇г̇ун̣уубааханам̣, жийваравиббаваасод̇и бан̃жа варз яаажид̇ваа д̇з сад̇т̇у санд̇игаа лабхид̇ваа бунад̣̇зва ад̇д̇ано васид̇адтаанам̣ г̇анд̇ваа убаж̇жхааяасса д̇амад̇т̇ам̣ аарожзси. аяамзд̇т̇а сан̇кзбо. вид̇т̇ааро бана уд̣̇аанадтагат̇ааяам̣ ааг̇ад̇анаязна взд̣̇ид̇аб̣б̣о. ан̇г̇уд̇д̇арадтагат̇ааяам̣ (а. ни. адта. 1.1.206) бана ‘‘убасамбанно худ̇ваа ад̇д̇ано убаж̇жхааяасса санд̇игз гаммадтаанам̣ г̇ахзд̇ваа вибассанам̣ вад̣дхзд̇ваа арахад̇д̇ам̣ баабун̣ий’’д̇и вуд̇д̇ам̣.
Arahatte pana patiṭṭhito attano upajjhāyena ācikkhitaniyāmena paccantimesu janapadesu vinayadharapañcamena gaṇena upasampadā, dhuvanhānaṃ, cammattharaṇaṃ, guṇaṅguṇūpāhanaṃ, cīvaravippavāsoti pañca vare yācitvā te satthu santikā labhitvā punadeva attano vasitaṭṭhānaṃ gantvā upajjhāyassa tamatthaṃ ārocesi. Ayamettha saṅkhepo. Vitthāro pana udānaṭṭhakathāyaṃ āgatanayena veditabbo. Aṅguttaraṭṭhakathāyaṃ (a. ni. aṭṭha. 1.1.206) pana ‘‘upasampanno hutvā attano upajjhāyassa santike kammaṭṭhānaṃ gahetvā vipassanaṃ vaḍḍhetvā arahattaṃ pāpuṇī’’ti vuttaṃ.
со абарабхааг̇з вимуд̇д̇исукзна вихаранд̇о ад̇д̇ано бадибад̇д̇им̣ бажжавзгкид̇ваа соманассаж̇аад̇о уд̣̇аанавасзна –
So aparabhāge vimuttisukhena viharanto attano paṭipattiṃ paccavekkhitvā somanassajāto udānavasena –
365.
365.
‘‘убасамбад̣̇аа жа мз лад̣̇д̇хаа, вимуд̇д̇о жамхи анаасаво;
‘‘Upasampadā ca me laddhā, vimutto camhi anāsavo;
со жа мз бхаг̇аваа д̣̇идто, вихаарз жа сахаавасим̣.
So ca me bhagavā diṭṭho, vihāre ca sahāvasiṃ.
366.
366.
‘‘б̣ахуд̣̇зва рад̇д̇им̣ бхаг̇аваа, аб̣бхогаасзд̇инаамаяи;
‘‘Bahudeva rattiṃ bhagavā, abbhokāsetināmayi;
вихаарагусало сад̇т̇аа, вихаарам̣ баависий д̇ад̣̇аа.
Vihārakusalo satthā, vihāraṃ pāvisī tadā.
367.
367.
‘‘сант̇арид̇ваана сан̇гхаадим̣, сзяяам̣ габбзси г̇од̇амо;
‘‘Santharitvāna saṅghāṭiṃ, seyyaṃ kappesi gotamo;
сийхо сзлаг̇ухааяам̣ва, бахийнабхаяабхзраво.
Sīho selaguhāyaṃva, pahīnabhayabheravo.
368.
368.
‘‘д̇ад̇о галяаан̣авааггаран̣о, саммаасамб̣уд̣̇д̇хасааваго;
‘‘Tato kalyāṇavākkaraṇo, sammāsambuddhasāvako;
сон̣о абхааси сад̣̇д̇хаммам̣, б̣уд̣̇д̇хасздтасса саммукаа.
Soṇo abhāsi saddhammaṃ, buddhaseṭṭhassa sammukhā.
369.
369.
‘‘бан̃жагканд̇хз барин̃н̃ааяа, бхааваяид̇ваана ан̃ж̇асам̣;
‘‘Pañcakkhandhe pariññāya, bhāvayitvāna añjasaṃ;
баббуяяа барамам̣ санд̇им̣, бариниб̣б̣иссад̇яанаасаво’’д̇и. –
Pappuyya paramaṃ santiṃ, parinibbissatyanāsavo’’ti. –
имаа бан̃жа г̇аат̇аа абхааси.
Imā pañca gāthā abhāsi.
д̇ад̇т̇а убасамбад̣̇аа жа мз лад̣̇д̇хаад̇и яаа саа гижчзна д̣̇асаваг̇г̇ам̣ бхигкусан̇гхам̣ саннибаад̇зд̇ваа ад̇д̇анаа лад̣̇д̇хаа убасамбад̣̇аа. яаа жа бана варад̣̇аанавасзна саб̣б̣абажжанд̇имзсу ж̇анабад̣̇зсу винаяад̇харабан̃жамзна г̇ан̣зна сад̇т̇аараа анун̃н̃аад̇аа убасамбад̣̇аа, д̇ад̣̇убхаяам̣ санд̇хааяааха. жа-сад̣̇д̣̇о самужжаяад̇т̇о, д̇зна ид̇арзби сад̇т̇у санд̇игаа лад̣̇д̇хаварз сан̇г̇ан̣хаад̇и. вимуд̇д̇о жамхи анаасавод̇и аг̇г̇амаг̇г̇зна сагалагилзсавад̇т̇увимуд̇д̇ияаа вимуд̇д̇о жа амхи. д̇ад̇о зва гаамаасаваад̣̇ийхи анаасаво амхийд̇и яож̇анаа. со жа мз бхаг̇аваа д̣̇идтод̇и яад̣̇ад̇т̇ам̣ ахам̣ аванд̇ирадтад̇о саавад̇т̇им̣ г̇ад̇о, со жа бхаг̇аваа маяаа ад̣̇идтабуб̣б̣о д̣̇идто. вихаарз жа сахаавасинд̇и на гзвалам̣ д̇асса бхаг̇авад̇о д̣̇ассанамзва маяаа лад̣̇д̇хам̣, ат̇а ко вихаарз сад̇т̇у г̇анд̇хагудияам̣ сад̇т̇аараа гааран̣ам̣ саллагкзд̇ваа ваасзнд̇зна саха авасим̣. ‘‘вихаарзд̇и вихаарасамийбз’’д̇и гзжи.
Tattha upasampadā ca me laddhāti yā sā kicchena dasavaggaṃ bhikkhusaṅghaṃ sannipātetvā attanā laddhā upasampadā. Yā ca pana varadānavasena sabbapaccantimesu janapadesu vinayadharapañcamena gaṇena satthārā anuññātā upasampadā, tadubhayaṃ sandhāyāha. Ca-saddo samuccayattho, tena itarepi satthu santikā laddhavare saṅgaṇhāti. Vimutto camhi anāsavoti aggamaggena sakalakilesavatthuvimuttiyā vimutto ca amhi. Tato eva kāmāsavādīhi anāsavo amhīti yojanā. So ca me bhagavā diṭṭhoti yadatthaṃ ahaṃ avantiraṭṭhato sāvatthiṃ gato, so ca bhagavā mayā adiṭṭhapubbo diṭṭho. Vihāre ca sahāvasinti na kevalaṃ tassa bhagavato dassanameva mayā laddhaṃ, atha kho vihāre satthu gandhakuṭiyaṃ satthārā kāraṇaṃ sallakkhetvā vāsentena saha avasiṃ. ‘‘Vihāreti vihārasamīpe’’ti keci.
б̣ахуд̣̇зва рад̇д̇инд̇и батамам̣ яаамам̣ бхигкуунам̣ д̇хаммад̣̇зсанаавасзна гаммадтаанасод̇ханавасзна жа, маж̇жхимам̣ яаамам̣ д̣̇зваанам̣ б̣рахмуунан̃жа ган̇кажчзд̣̇анавасзна бхаг̇аваа б̣ахуд̣̇зва рад̇д̇им̣ аб̣бхогаасз ад̇инаамаяи вийд̇инаамзси. вихаарагусалод̇и д̣̇иб̣б̣аб̣рахмааанзн̃ж̇аарияавихаарзсу гусало. вихаарам̣ баависийд̇и ад̇ивзлам̣ нисаж̇ж̇ажан̇гамзхи уббаннабариссамавинод̣̇анад̇т̇ам̣ г̇анд̇хагудим̣ баависи.
Bahudeva rattinti paṭhamaṃ yāmaṃ bhikkhūnaṃ dhammadesanāvasena kammaṭṭhānasodhanavasena ca, majjhimaṃ yāmaṃ devānaṃ brahmūnañca kaṅkhacchedanavasena bhagavā bahudeva rattiṃ abbhokāse atināmayi vītināmesi. Vihārakusaloti dibbabrahmaāneñjaariyavihāresu kusalo. Vihāraṃ pāvisīti ativelaṃ nisajjacaṅkamehi uppannaparissamavinodanatthaṃ gandhakuṭiṃ pāvisi.
сант̇арид̇ваана сан̇гхаадим̣, сзяяам̣ габбзсийд̇и жад̇уг̇г̇ун̣ам̣ сан̇гхаадим̣ бан̃н̃аабзд̇ваа сийхасзяяам̣ габбзси. д̇знааха ‘‘г̇од̇амо сийхо сзлаг̇ухааяам̣ва бахийнабхаяабхзраво’’д̇и. д̇ад̇т̇а г̇од̇амод̇и бхаг̇аванд̇ам̣ г̇од̇д̇зна гид̇д̇зд̇и. сийхо сзлаг̇ухааяам̣ваад̇и сзласса баб̣б̣ад̇асса г̇ухааяам̣. яат̇аа сийхо миг̇арааж̇аа д̇зж̇уссад̣̇ад̇ааяа бахийнабхаяабхзраво д̣̇агкин̣зна бассзна баад̣̇з баад̣̇ам̣ ажжаад̇хааяа сзяяам̣ габбзси, звам̣ жид̇д̇уд̇раасаломахам̣саначамбхид̇ад̇д̇ахзд̇уунам̣ гилзсаанам̣ самужчиннад̇д̇аа бахийнабхаяабхзраво г̇од̇амо бхаг̇аваа сзяяам̣ габбзсийд̇и ад̇т̇о.
Santharitvāna saṅghāṭiṃ, seyyaṃ kappesīti catugguṇaṃ saṅghāṭiṃ paññāpetvā sīhaseyyaṃ kappesi. Tenāha ‘‘gotamo sīho selaguhāyaṃva pahīnabhayabheravo’’ti. Tattha gotamoti bhagavantaṃ gottena kitteti. Sīho selaguhāyaṃvāti selassa pabbatassa guhāyaṃ. Yathā sīho migarājā tejussadatāya pahīnabhayabheravo dakkhiṇena passena pāde pādaṃ accādhāya seyyaṃ kappesi, evaṃ cittutrāsalomahaṃsanachambhitattahetūnaṃ kilesānaṃ samucchinnattā pahīnabhayabheravo gotamo bhagavā seyyaṃ kappesīti attho.
д̇ад̇од̇и бажчаа, сийхасзяяам̣ габбзд̇ваа д̇ад̇о вудтахид̇ваа ‘‘бадибхаад̇у д̇ам̣ бхигку д̇хаммо бхаасид̇у’’нд̇и (уд̣̇аа. 46) сад̇т̇аараа аж̇жхзсид̇од̇и ад̇т̇о. галяаан̣авааггаран̣од̇и сунд̣̇араважийгаран̣о, лагкан̣асамбаннаважанаггамод̇и ад̇т̇о. сон̣о абхааси сад̣̇д̇хамманд̇и сол̣аса адтагаваг̇г̇ияасуд̇д̇аани сон̣о гудиган̣н̣о, б̣уд̣̇д̇хасздтасса саммаасамб̣уд̣̇д̇хасса саммукаа, бажжагкад̇о абхаасийд̇и т̇зро ад̇д̇аанамзва барам̣ вияа авожа.
Tatoti pacchā, sīhaseyyaṃ kappetvā tato vuṭṭhahitvā ‘‘paṭibhātu taṃ bhikkhu dhammo bhāsitu’’nti (udā. 46) satthārā ajjhesitoti attho. Kalyāṇavākkaraṇoti sundaravacīkaraṇo, lakkhaṇasampannavacanakkamoti attho. Soṇo abhāsi saddhammanti soḷasa aṭṭhakavaggiyasuttāni soṇo kuṭikaṇṇo, buddhaseṭṭhassa sammāsambuddhassa sammukhā, paccakkhato abhāsīti thero attānameva paraṃ viya avoca.
бан̃жагканд̇хз барин̃н̃ааяаад̇и бан̃жубаад̣̇аанагканд̇хз д̇ийхиби барин̃н̃аахи бариж̇аанид̇ваа д̇з бариж̇аананд̇оязва, ан̃ж̇асам̣ арияам̣ адтан̇г̇игам̣ маг̇г̇ам̣ бхааваяид̇ваа, барамам̣ санд̇им̣ ниб̣б̣аанам̣ баббуяяа баабун̣ид̇ваа тид̇о анаасаво. д̇ад̇о зва ид̣̇аани бариниб̣б̣иссад̇и анубаад̣̇исзсаниб̣б̣аанавасзна ниб̣б̣ааяиссад̇ийд̇и.
Pañcakkhandhe pariññāyāti pañcupādānakkhandhe tīhipi pariññāhi parijānitvā te parijānantoyeva, añjasaṃ ariyaṃ aṭṭhaṅgikaṃ maggaṃ bhāvayitvā, paramaṃ santiṃ nibbānaṃ pappuyya pāpuṇitvā ṭhito anāsavo. Tato eva idāni parinibbissati anupādisesanibbānavasena nibbāyissatīti.
сон̣агудиган̣н̣ад̇т̇зраг̇аат̇ааван̣н̣анаа нидтид̇аа.
Soṇakuṭikaṇṇattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 11. сон̣агудиган̣н̣ад̇т̇зраг̇аат̇аа • 11. Soṇakuṭikaṇṇattheragāthā
