| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
157. ஸோணகுடிகண்ணவத்து²
157. Soṇakuṭikaṇṇavatthu
257. 1 தேன கோ² பன ஸமயேன ஆயஸ்மா மஹாகச்சானோ அவந்தீஸு விஹரதி குரரக⁴ரே 2 பபதகே 3 பப்³ப³தே. தேன கோ² பன ஸமயேன ஸோணோ உபாஸகோ குடிகண்ணோ ஆயஸ்மதோ மஹாகச்சானஸ்ஸ உபட்டா²கோ ஹோதி. அத² கோ² ஸோணோ உபாஸகோ குடிகண்ணோ யேனாயஸ்மா மஹாகச்சானோ தேனுபஸங்கமி, உபஸங்கமித்வா ஆயஸ்மந்தங் மஹாகச்சானங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோணோ உபாஸகோ குடிகண்ணோ ஆயஸ்மந்தங் மஹாகச்சானங் ஏதத³வோச – ‘‘யதா² யதா²ஹங், ப⁴ந்தே, அய்யேன மஹாகச்சானேன த⁴ம்மங் தே³ஸிதங் ஆஜானாமி, நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங் ஸங்க²லிகி²தங் ப்³ரஹ்மசரியங் சரிதுங். இச்சா²மஹங், ப⁴ந்தே, கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதுங் . பப்³பா³ஜேது மங், ப⁴ந்தே, அய்யோ மஹாகச்சானோ’’தி. ( ) 4 ‘‘து³க்கரங் கோ², ஸோண, யாவஜீவங் ஏகஸெய்யங் ஏகப⁴த்தங் ப்³ரஹ்மசரியங் சரிதுங். இங்க⁴, த்வங், ஸோண , தத்தே²வ அகா³ரிகபூ⁴தோ பு³த்³தா⁴னங் ஸாஸனங் அனுயுஞ்ஜ, காலயுத்தங் ஏகஸெய்யங் ஏகப⁴த்தங் ப்³ரஹ்மசரிய’’ந்தி. அத² கோ² ஸோணஸ்ஸ உபாஸகஸ்ஸ குடிகண்ணஸ்ஸ யோ அஹோஸி பப்³ப³ஜ்ஜாபி⁴ஸங்கா²ரோ ஸோ படிப்பஸ்ஸம்பி⁴. து³தியம்பி கோ² ஸோணோ உபாஸகோ குடிகண்ணோ …பே॰… ததியம்பி கோ² ஸோணோ உபாஸகோ குடிகண்ணோ யேனாயஸ்மா மஹாகச்சானோ தேனுபஸங்கமி, உபஸங்கமித்வா ஆயஸ்மந்தங் மஹாகச்சானங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோணோ உபாஸகோ குடிகண்ணோ ஆயஸ்மந்தங் மஹாகச்சானங் ஏதத³வோச – ‘‘யதா² யதா²ஹங், ப⁴ந்தே, அய்யேன மஹாகச்சானேன த⁴ம்மங் தே³ஸிதங் ஆஜானாமி, நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங் ஸங்க²லிகி²தங் ப்³ரஹ்மசரியங் சரிதுங். இச்சா²மஹங், ப⁴ந்தே, கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதுங். பப்³பா³ஜேது மங், ப⁴ந்தே, அய்யோ மஹாகச்சானோ’’தி. அத² கோ² ஆயஸ்மா மஹாகச்சானோ ஸோணங் உபாஸகங் குடிகண்ணங் பப்³பா³ஜேஸி. தேன கோ² பன ஸமயேன அவந்தித³க்கி²ணாபதோ² அப்பபி⁴க்கு²கோ ஹோதி. அத² கோ² ஆயஸ்மா மஹாகச்சானோ திண்ணங் வஸ்ஸானங் அச்சயேன கிச்சே²ன கஸிரேன ததோ ததோ த³ஸவக்³க³ங் பி⁴க்கு²ஸங்க⁴ங் ஸன்னிபாதாபெத்வா ஆயஸ்மந்தங் ஸோணங் உபஸம்பாதே³ஸி.
257.5 Tena kho pana samayena āyasmā mahākaccāno avantīsu viharati kuraraghare 6 papatake 7 pabbate. Tena kho pana samayena soṇo upāsako kuṭikaṇṇo āyasmato mahākaccānassa upaṭṭhāko hoti. Atha kho soṇo upāsako kuṭikaṇṇo yenāyasmā mahākaccāno tenupasaṅkami, upasaṅkamitvā āyasmantaṃ mahākaccānaṃ abhivādetvā ekamantaṃ nisīdi. Ekamantaṃ nisinno kho soṇo upāsako kuṭikaṇṇo āyasmantaṃ mahākaccānaṃ etadavoca – ‘‘yathā yathāhaṃ, bhante, ayyena mahākaccānena dhammaṃ desitaṃ ājānāmi, nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ. Icchāmahaṃ, bhante, kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ . Pabbājetu maṃ, bhante, ayyo mahākaccāno’’ti. ( ) 8 ‘‘Dukkaraṃ kho, soṇa, yāvajīvaṃ ekaseyyaṃ ekabhattaṃ brahmacariyaṃ carituṃ. Iṅgha, tvaṃ, soṇa , tattheva agārikabhūto buddhānaṃ sāsanaṃ anuyuñja, kālayuttaṃ ekaseyyaṃ ekabhattaṃ brahmacariya’’nti. Atha kho soṇassa upāsakassa kuṭikaṇṇassa yo ahosi pabbajjābhisaṅkhāro so paṭippassambhi. Dutiyampi kho soṇo upāsako kuṭikaṇṇo …pe… tatiyampi kho soṇo upāsako kuṭikaṇṇo yenāyasmā mahākaccāno tenupasaṅkami, upasaṅkamitvā āyasmantaṃ mahākaccānaṃ abhivādetvā ekamantaṃ nisīdi. Ekamantaṃ nisinno kho soṇo upāsako kuṭikaṇṇo āyasmantaṃ mahākaccānaṃ etadavoca – ‘‘yathā yathāhaṃ, bhante, ayyena mahākaccānena dhammaṃ desitaṃ ājānāmi, nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ. Icchāmahaṃ, bhante, kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ. Pabbājetu maṃ, bhante, ayyo mahākaccāno’’ti. Atha kho āyasmā mahākaccāno soṇaṃ upāsakaṃ kuṭikaṇṇaṃ pabbājesi. Tena kho pana samayena avantidakkhiṇāpatho appabhikkhuko hoti. Atha kho āyasmā mahākaccāno tiṇṇaṃ vassānaṃ accayena kicchena kasirena tato tato dasavaggaṃ bhikkhusaṅghaṃ sannipātāpetvā āyasmantaṃ soṇaṃ upasampādesi.
ஸோணகுடிகண்ணவத்து² நிட்டி²தங்.
Soṇakuṭikaṇṇavatthu niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸப்³ப³சம்மபடிக்கே²பாதி³கதா² • Sabbacammapaṭikkhepādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸோணகுடிகண்ணவத்து²கதா²வண்ணனா • Soṇakuṭikaṇṇavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கி³ஹிவிகதானுஞ்ஞாதாதி³கதா²வண்ணனா • Gihivikatānuññātādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 157. ஸோணகுடிகண்ணவத்து²கதா² • 157. Soṇakuṭikaṇṇavatthukathā
