| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஸோணகுடிகண்ணவத்து²கதா²வண்ணனா
Soṇakuṭikaṇṇavatthukathāvaṇṇanā
257. பபதகே பப்³ப³தேதி எத்த² ‘‘பவத்தே பப்³ப³தே’’திபி பட²ந்தி, பவத்தனாமகே பப்³ப³தேதி அத்தோ². ஸோணோ உபாஸகோதிஆதீ³ஸு (உதா³॰ அட்ட²॰ 46) நாமேன ஸோணோ நாம, தீஹி ஸரணக³மனேஹி உபாஸகத்தபடிவேத³னேன உபாஸகோ, கோடிஅக்³க⁴னகஸ்ஸ கண்ணபிளந்த⁴னஸ்ஸ தா⁴ரணேன ‘‘கோடிகண்ணோ’’தி ச வத்தப்³பே³ ‘‘குடிகண்ணோ’’தி ஏவங் அபி⁴ஞ்ஞாதோ, ந ஸுகுமாரஸோணோதி அதி⁴ப்பாயோ. அயஞ்ஹி ஆயஸ்மதோ மஹாகச்சானஸ்ஸ ஸந்திகே த⁴ம்மங் ஸுத்வா ஸாஸனே அபி⁴ப்பஸன்னோ ஸரணேஸு ச ஸீலேஸு ச பதிட்டி²தோ பபதகே பப்³ப³தே சா²யூத³கஸம்பன்னே டா²னே விஹாரங் காரெத்வா தே²ரங் தத்த² வஸாபெத்வா சதூஹி பச்சயேஹி உபட்டா²தி. தேன வுத்தங் ‘‘ஆயஸ்மதோ மஹாகச்சானஸ்ஸ உபட்டா²கோ ஹோதீ’’தி.
257.Papatake pabbateti ettha ‘‘pavatte pabbate’’tipi paṭhanti, pavattanāmake pabbateti attho. Soṇo upāsakotiādīsu (udā. aṭṭha. 46) nāmena soṇo nāma, tīhi saraṇagamanehi upāsakattapaṭivedanena upāsako, koṭiagghanakassa kaṇṇapiḷandhanassa dhāraṇena ‘‘koṭikaṇṇo’’ti ca vattabbe ‘‘kuṭikaṇṇo’’ti evaṃ abhiññāto, na sukumārasoṇoti adhippāyo. Ayañhi āyasmato mahākaccānassa santike dhammaṃ sutvā sāsane abhippasanno saraṇesu ca sīlesu ca patiṭṭhito papatake pabbate chāyūdakasampanne ṭhāne vihāraṃ kāretvā theraṃ tattha vasāpetvā catūhi paccayehi upaṭṭhāti. Tena vuttaṃ ‘‘āyasmato mahākaccānassa upaṭṭhāko hotī’’ti.
ஸோ காலேன காலங் தே²ரஸ்ஸ உபட்டா²னங் க³ச்ச²தி, தே²ரோ சஸ்ஸ த⁴ம்மங் தே³ஸேதி, தேன ஸங்வேக³ப³ஹுலோ த⁴ம்மசரியாயங் உஸ்ஸாஹஜாதோ விஹரதி. ஸோ ஏகதா³ ஸத்தே²ன ஸத்³தி⁴ங் வாணிஜ்ஜத்தா²ய உஜ்ஜேனிங் க³ச்ச²ந்தோ அந்தராமக்³கே³ அடவியங் ஸத்தே² நிவிட்டே² ரத்தியங் ஜனஸம்பா³த⁴ப⁴யேன ஏகமந்தங் அபக்கம்ம நித்³த³ங் உபக³ஞ்சி². ஸத்தோ² பச்சூஸவேலாயங் உட்டா²ய க³தோ, ந ஏகோபி ஸோணங் பபோ³தே⁴ஸி, ஸப்³பே³ விஸ்ஸரித்வா அக³மிங்ஸு. ஸோ பபா⁴தாய ரத்தியா பபு³ஜ்ஜி²த்வா உட்டா²ய கஞ்சி அபஸ்ஸந்தோ ஸத்தே²ன க³தமக்³க³ங் க³ஹெத்வா ஸீக⁴ங் ஸீக⁴ங் க³ச்ச²ந்தோ ஏகங் வடருக்க²ங் உபக³ஞ்சி². தத்த² அத்³த³ஸ ஏகங் மஹாகாயங் விரூபத³ஸ்ஸனங் பீ³ப⁴ச்ச²ங் புரிஸங் அட்டி²தோ முத்தானி அத்தனோ மங்ஸானி ஸயமேவ கா²த³ந்தங், தி³ஸ்வான ‘‘கோஸி த்வ’’ந்தி புச்சி². பேதொஸ்மி, ப⁴ந்தேதி. கஸ்மா ஏவங் கரோஸீதி? அத்தனோ புப்³ப³கம்மேனாதி. கிங் பன தங் கம்மந்தி? அஹங் புப்³பே³ பா⁴ருகச்ச²னக³ரவாஸீ கூடவாணிஜோ ஹுத்வா பரேஸங் ஸந்தகங் வஞ்செத்வா கா²தி³ங், ஸமணே ச பி⁴க்கா²ய உபக³தே ‘‘தும்ஹாகங் மங்ஸங் கா²த³தா²’’தி அக்கோஸிங், தேன கம்மேன ஏதரஹி இமங் து³க்க²ங் அனுப⁴வாமீதி. தங் ஸுத்வா ஸோணோ அதிவிய ஸங்வேக³ங் படிலபி⁴.
So kālena kālaṃ therassa upaṭṭhānaṃ gacchati, thero cassa dhammaṃ deseti, tena saṃvegabahulo dhammacariyāyaṃ ussāhajāto viharati. So ekadā satthena saddhiṃ vāṇijjatthāya ujjeniṃ gacchanto antarāmagge aṭaviyaṃ satthe niviṭṭhe rattiyaṃ janasambādhabhayena ekamantaṃ apakkamma niddaṃ upagañchi. Sattho paccūsavelāyaṃ uṭṭhāya gato, na ekopi soṇaṃ pabodhesi, sabbe vissaritvā agamiṃsu. So pabhātāya rattiyā pabujjhitvā uṭṭhāya kañci apassanto satthena gatamaggaṃ gahetvā sīghaṃ sīghaṃ gacchanto ekaṃ vaṭarukkhaṃ upagañchi. Tattha addasa ekaṃ mahākāyaṃ virūpadassanaṃ bībhacchaṃ purisaṃ aṭṭhito muttāni attano maṃsāni sayameva khādantaṃ, disvāna ‘‘kosi tva’’nti pucchi. Petosmi, bhanteti. Kasmā evaṃ karosīti? Attano pubbakammenāti. Kiṃ pana taṃ kammanti? Ahaṃ pubbe bhārukacchanagaravāsī kūṭavāṇijo hutvā paresaṃ santakaṃ vañcetvā khādiṃ, samaṇe ca bhikkhāya upagate ‘‘tumhākaṃ maṃsaṃ khādathā’’ti akkosiṃ, tena kammena etarahi imaṃ dukkhaṃ anubhavāmīti. Taṃ sutvā soṇo ativiya saṃvegaṃ paṭilabhi.
ததோ பரங் க³ச்ச²ந்தோ முக²தோ பக்³க⁴ரிதகாளலோஹிதே த்³வே பேததா³ரகே பஸ்ஸித்வா ததே²வ புச்சி², தேபிஸ்ஸ அத்தனோ கம்மங் கதே²ஸுங். தே கிர பா⁴ருகச்ச²னக³ரே தா³ரககாலே க³ந்த⁴வாணிஜ்ஜாய ஜீவிகங் கப்பெந்தா அத்தனோ மாதரி கீ²ணாஸவே நிமந்தெத்வா போ⁴ஜெந்தியா கே³ஹங் க³ந்த்வா ‘‘அம்ஹாகங் ஸந்தகங் கஸ்மா ஸமணானங் தே³ஸி, தயா தி³ன்னங் போ⁴ஜனங் பு⁴ஞ்ஜனகஸமணானங் முக²தோ காளலோஹிதங் பக்³க⁴ரதூ’’தி அக்கோஸிங்ஸு. தே தேன கம்மேன நிரயே பச்சித்வா தஸ்ஸ விபாகாவஸேஸேன பேதயோனியங் நிப்³ப³த்தித்வா ததா³ இமங் து³க்க²ங் அனுப⁴வந்தி. தம்பி ஸுத்வா ஸோணோ அதிவிய ஸங்வேக³ஜாதோ அஹோஸி.
Tato paraṃ gacchanto mukhato paggharitakāḷalohite dve petadārake passitvā tatheva pucchi, tepissa attano kammaṃ kathesuṃ. Te kira bhārukacchanagare dārakakāle gandhavāṇijjāya jīvikaṃ kappentā attano mātari khīṇāsave nimantetvā bhojentiyā gehaṃ gantvā ‘‘amhākaṃ santakaṃ kasmā samaṇānaṃ desi, tayā dinnaṃ bhojanaṃ bhuñjanakasamaṇānaṃ mukhato kāḷalohitaṃ paggharatū’’ti akkosiṃsu. Te tena kammena niraye paccitvā tassa vipākāvasesena petayoniyaṃ nibbattitvā tadā imaṃ dukkhaṃ anubhavanti. Tampi sutvā soṇo ativiya saṃvegajāto ahosi.
ஸோ உஜ்ஜேனிங் க³ந்த்வா தங் கரணீயங் தீரெத்வா குரரக⁴ரங் பச்சாக³தோ தே²ரங் உபஸங்கமித்வா கதபடிஸந்தா²ரோ தமத்த²ங் ஆரோசேஸி. தே²ரோபிஸ்ஸ பவத்தினிவத்தீஸு ஆதீ³னவானிஸங்ஸே விபா⁴வெந்தோ த⁴ம்மங் தே³ஸேஸி. ஸோ தே²ரங் வந்தி³த்வா கே³ஹங் க³தோ ஸாயமாஸங் பு⁴ஞ்ஜித்வா ஸயனங் உபக³தோ தோ²கங்யேவ நித்³தா³யித்வா பபு³ஜ்ஜி²த்வா ஸயனதலே நிஸஜ்ஜ யதா²ஸுதங் த⁴ம்மங் பச்சவெக்கி²துங் ஆரத்³தோ⁴. தஸ்ஸ தங் த⁴ம்மங் பச்சவெக்க²தோ தே ச பேதத்தபா⁴வே அனுஸ்ஸரதோ ஸங்ஸாரது³க்க²ங் அதிவிய ப⁴யானகங் ஹுத்வா உபட்டா²ஸி, பப்³ப³ஜ்ஜாய சித்தங் நமி. ஸோ விபா⁴தாய ரத்தியா ஸரீரபடிஜக்³க³னங் கத்வா தே²ரங் உபக³ந்த்வா அத்தனோ அஜ்ஜா²ஸயங் ஆரோசெத்வா பப்³ப³ஜ்ஜங் யாசி. தேன வுத்தங் ‘‘அத² கோ² ஸோணோ உபாஸகோ…பே॰… பப்³பா³ஜேது மங், ப⁴ந்தே, அய்யோ மஹாகச்சானோ’’தி.
So ujjeniṃ gantvā taṃ karaṇīyaṃ tīretvā kuraragharaṃ paccāgato theraṃ upasaṅkamitvā katapaṭisanthāro tamatthaṃ ārocesi. Theropissa pavattinivattīsu ādīnavānisaṃse vibhāvento dhammaṃ desesi. So theraṃ vanditvā gehaṃ gato sāyamāsaṃ bhuñjitvā sayanaṃ upagato thokaṃyeva niddāyitvā pabujjhitvā sayanatale nisajja yathāsutaṃ dhammaṃ paccavekkhituṃ āraddho. Tassa taṃ dhammaṃ paccavekkhato te ca petattabhāve anussarato saṃsāradukkhaṃ ativiya bhayānakaṃ hutvā upaṭṭhāsi, pabbajjāya cittaṃ nami. So vibhātāya rattiyā sarīrapaṭijagganaṃ katvā theraṃ upagantvā attano ajjhāsayaṃ ārocetvā pabbajjaṃ yāci. Tena vuttaṃ ‘‘atha kho soṇo upāsako…pe… pabbājetu maṃ, bhante, ayyo mahākaccāno’’ti.
தத்த² யதா² யதா²திஆதி³பதா³னங் அயங் ஸங்கே²பத்தோ² – யேன யேன ஆகாரேன அய்யோ மஹாகச்சானோ த⁴ம்மங் தே³ஸேதி ஆசிக்க²தி பஞ்ஞபேதி பட்ட²பேதி விவரதி விப⁴ஜதி உத்தானிங் கரோதி பகாஸேதி, தேன தேன மே உபபரிக்க²தோ ஏவங் ஹோதி ‘‘யதே³தங் ஸிக்க²த்தயப்³ரஹ்மசரியங் ஏகம்பி தி³வஸங் அக²ண்ட³ங் கத்வா சரிமகசித்தங் பாபேதப்³ப³தாய ஏகந்தபரிபுண்ணங், ஏகதி³வஸம்பி கிலேஸமலேன அமலீனங் கத்வா சரிமகசித்தங் பாபேதப்³ப³தாய ஏகந்தபரிஸுத்³த⁴ங், ஸங்க²லிகி²தங் லிகி²தஸங்க²ஸதி³ஸங் தோ⁴தஸங்க²ஸப்படிபா⁴க³ங் சரிதப்³ப³ங், இத³ங் ந ஸுகரங் அகா³ரங் அஜ்ஜா²வஸதா அகா³ரமஜ்ஜே² வஸந்தேன ஏகந்தபரிபுண்ணங்…பே॰… சரிது’’ந்தி.
Tattha yathā yathātiādipadānaṃ ayaṃ saṅkhepattho – yena yena ākārena ayyo mahākaccāno dhammaṃ deseti ācikkhati paññapeti paṭṭhapeti vivarati vibhajati uttāniṃ karoti pakāseti, tena tena me upaparikkhato evaṃ hoti ‘‘yadetaṃ sikkhattayabrahmacariyaṃ ekampi divasaṃ akhaṇḍaṃ katvā carimakacittaṃ pāpetabbatāya ekantaparipuṇṇaṃ, ekadivasampi kilesamalena amalīnaṃ katvā carimakacittaṃ pāpetabbatāya ekantaparisuddhaṃ, saṅkhalikhitaṃ likhitasaṅkhasadisaṃ dhotasaṅkhasappaṭibhāgaṃ caritabbaṃ, idaṃ na sukaraṃ agāraṃ ajjhāvasatā agāramajjhe vasantena ekantaparipuṇṇaṃ…pe… caritu’’nti.
ஏவங் அத்தனோ பரிவிதக்கிதங் ஸோணோ உபாஸகோ தே²ரஸ்ஸ ஆரோசெத்வா தங் படிபஜ்ஜிதுகாமோ ‘‘இச்சா²மஹங் ப⁴ந்தே’’திஆதி³மாஹ. தே²ரோ பன ‘‘ந தாவஸ்ஸ ஞாணங் பரிபாகங் க³த’’ந்தி உபதா⁴ரெத்வா ஞாணபரிபாகங் ஆக³மயமானோ ‘‘து³க்கரங் கோ²’’திஆதி³னா பப்³ப³ஜ்ஜாச²ந்த³ங் நிவாரேஸி. தத்த² ஏகஸெய்யந்தி அது³தியஸெய்யங். எத்த² ச ஸெய்யாஸீஸேன ‘‘ஏகோ திட்ட²தி, ஏகோ க³ச்ச²தி, ஏகோ நிஸீத³தீ’’திஆதி³னா நயேன வுத்தங் சதூஸு இரியாபதே²ஸு காயவிவேகங் தீ³பேதி, ந ஏகிகா ஹுத்வா ஸயனமத்தங். ஏகப⁴த்தந்தி ‘‘ஏகப⁴த்திகோ ஹோதி ரத்தூபரதோ விரதோ விகாலபோ⁴ஜனா’’தி (தீ³॰ நி॰ 1.10, 194; ம॰ நி॰ 1.293 அ॰ நி॰ 3.71) ஏவங் வுத்தங் விகாலபோ⁴ஜனா விரதிங் ஸந்தா⁴ய வத³தி. ப்³ரஹ்மசரியந்தி மேது²னவிரதிப்³ரஹ்மசரியங், ஸிக்க²த்தயானுயோக³ஸங்கா²தங் ஸாஸனப்³ரஹ்மசரியங் வா. இங்கா⁴தி சோத³னத்தே² நிபாதோ. தத்தே²வாதி கே³ஹேயேவ. பு³த்³தா⁴னங் ஸாஸனங் அனுயுஞ்ஜாதி நிச்சஸீலஉபோஸத²ஸீலனியமாதி³பே⁴த³ங் பஞ்சங்க³ங் அட்ட²ங்க³ங் த³ஸங்க³ஞ்ச ஸீலங் தத³னுரூபஞ்ச ஸமாதி⁴பஞ்ஞாபா⁴வனங் அனுயுஞ்ஜ. ஏதஞ்ஹி உபாஸகேன புப்³ப³பா⁴கே³ அனுயுஞ்ஜிதப்³ப³ங் பு³த்³த⁴ஸாஸனங் நாம. தேனாஹ ‘‘காலயுத்தங் ஏகஸெய்யங் ஏகப⁴த்தங் ப்³ரஹ்மசரிய’’ந்தி.
Evaṃ attano parivitakkitaṃ soṇo upāsako therassa ārocetvā taṃ paṭipajjitukāmo ‘‘icchāmahaṃ bhante’’tiādimāha. Thero pana ‘‘na tāvassa ñāṇaṃ paripākaṃ gata’’nti upadhāretvā ñāṇaparipākaṃ āgamayamāno ‘‘dukkaraṃ kho’’tiādinā pabbajjāchandaṃ nivāresi. Tattha ekaseyyanti adutiyaseyyaṃ. Ettha ca seyyāsīsena ‘‘eko tiṭṭhati, eko gacchati, eko nisīdatī’’tiādinā nayena vuttaṃ catūsu iriyāpathesu kāyavivekaṃ dīpeti, na ekikā hutvā sayanamattaṃ. Ekabhattanti ‘‘ekabhattiko hoti rattūparato virato vikālabhojanā’’ti (dī. ni. 1.10, 194; ma. ni. 1.293 a. ni. 3.71) evaṃ vuttaṃ vikālabhojanā viratiṃ sandhāya vadati. Brahmacariyanti methunaviratibrahmacariyaṃ, sikkhattayānuyogasaṅkhātaṃ sāsanabrahmacariyaṃ vā. Iṅghāti codanatthe nipāto. Tatthevāti geheyeva. Buddhānaṃ sāsanaṃ anuyuñjāti niccasīlauposathasīlaniyamādibhedaṃ pañcaṅgaṃ aṭṭhaṅgaṃ dasaṅgañca sīlaṃ tadanurūpañca samādhipaññābhāvanaṃ anuyuñja. Etañhi upāsakena pubbabhāge anuyuñjitabbaṃ buddhasāsanaṃ nāma. Tenāha ‘‘kālayuttaṃ ekaseyyaṃ ekabhattaṃ brahmacariya’’nti.
தத்த² காலயுத்தந்தி சாதுத்³த³ஸீபஞ்சத்³த³ஸீஅட்ட²மீபாடிஹாரிகபக்க²ஸங்கா²தேன காலேன யுத்தங், யதா²வுத்தகாலே வா துய்ஹங் அனுயுஞ்ஜந்தஸ்ஸ யுத்தங் பதிரூபங் ஸக்குணெய்யங், ந ஸப்³ப³காலங் ஸப்³ப³ந்தி அதி⁴ப்பாயோ . ஸப்³ப³மேதங் ஞாணஸ்ஸ அபரிபக்கத்தா தஸ்ஸ காமானங் து³ப்பஹானதாய ஸம்மா படிபத்தியங் யொக்³யங் காராபேதுங் வத³தி, ந பப்³ப³ஜ்ஜாச²ந்த³ங் நிவாரேதுங். பப்³ப³ஜ்ஜாபி⁴ஸங்கா²ரோதி பப்³ப³ஜிதுங் ஆரம்போ⁴ உஸ்ஸாஹோ. படிப்பஸ்ஸம்பீ⁴தி இந்த்³ரியானங் அபரிபக்கத்தா ஸங்வேக³ஸ்ஸ ச நாதிதிக்க²பா⁴வதோ வூபஸமி. கிஞ்சாபி படிப்பஸ்ஸம்பி⁴, தே²ரேன வுத்தவிதி⁴ங் பன அனுதிட்ட²ந்தோ காலேன காலங் தே²ரங் உபஸங்கமித்வா பயிருபாஸந்தோ த⁴ம்மங் ஸுணாதி. தஸ்ஸ வுத்தனயேனேவ து³தியம்பி பப்³ப³ஜ்ஜாய சித்தங் உப்பஜ்ஜி, தே²ரஸ்ஸ ச ஆரோசேஸி, து³தியம்பி தே²ரோ படிக்கி²பி. ததியவாரே பன ஞாணஸ்ஸ பரிபக்கபா⁴வங் ஞத்வா ‘‘இதா³னி நங் பப்³பா³ஜேதுங் காலோ’’தி தே²ரோ பப்³பா³ஜேஸி, பப்³ப³ஜிதஞ்ச தங் தீணி ஸங்வச்ச²ரானி அதிக்கமித்வா க³ணங் பரியேஸித்வா உபஸம்பாதே³ஸி. தங் ஸந்தா⁴ய வுத்தங் ‘‘து³தியம்பி கோ² ஸோணோ…பே॰… உபஸம்பாதே³ஸீ’’தி.
Tattha kālayuttanti cātuddasīpañcaddasīaṭṭhamīpāṭihārikapakkhasaṅkhātena kālena yuttaṃ, yathāvuttakāle vā tuyhaṃ anuyuñjantassa yuttaṃ patirūpaṃ sakkuṇeyyaṃ, na sabbakālaṃ sabbanti adhippāyo . Sabbametaṃ ñāṇassa aparipakkattā tassa kāmānaṃ duppahānatāya sammā paṭipattiyaṃ yogyaṃ kārāpetuṃ vadati, na pabbajjāchandaṃ nivāretuṃ. Pabbajjābhisaṅkhāroti pabbajituṃ ārambho ussāho. Paṭippassambhīti indriyānaṃ aparipakkattā saṃvegassa ca nātitikkhabhāvato vūpasami. Kiñcāpi paṭippassambhi, therena vuttavidhiṃ pana anutiṭṭhanto kālena kālaṃ theraṃ upasaṅkamitvā payirupāsanto dhammaṃ suṇāti. Tassa vuttanayeneva dutiyampi pabbajjāya cittaṃ uppajji, therassa ca ārocesi, dutiyampi thero paṭikkhipi. Tatiyavāre pana ñāṇassa paripakkabhāvaṃ ñatvā ‘‘idāni naṃ pabbājetuṃ kālo’’ti thero pabbājesi, pabbajitañca taṃ tīṇi saṃvaccharāni atikkamitvā gaṇaṃ pariyesitvā upasampādesi. Taṃ sandhāya vuttaṃ ‘‘dutiyampi kho soṇo…pe… upasampādesī’’ti.
தத்த² அப்பபி⁴க்கு²கோதி கதிபயபி⁴க்கு²கோ. ததா³ கிர பி⁴க்கூ² யேபு⁴ய்யேன மஜ்ஜி²மதே³ஸேயேவ வஸிங்ஸு, தஸ்மா தத்த² கதிபயா ஏவ அஹேஸுங் . தே ச ஏகஸ்மிங் கா³மே ஏகோ, ஏகஸ்மிங் நிக³மே த்³வேதி ஏவங் விஸுங் விஸுங் வஸிங்ஸு. கிச்சே²னாதி து³க்கே²ன. கஸிரேனாதி ஆயாஸேன. ததோ ததோதி தஸ்மா தஸ்மா கா³மனிக³மாதி³தோ. தே²ரேன ஹி கதிபயே பி⁴க்கூ² ஆனெத்வா அஞ்ஞேஸு ஆனீயமானேஸு புப்³பே³ ஆனீதா கேனசிதே³வ கரணீயேன பக்கமிங்ஸு, கஞ்சி காலங் ஆக³மெத்வா புன தேஸு ஆனீயமானேஸு இதரே பக்கமிங்ஸு. ஏவங் புனப்புனங் ஆனயனேன ஸன்னிபாதோ சிரேனேவ அஹோஸி. தே²ரோபி ததா³ ஏகவிஹாரீ அஹோஸி. தேன வுத்தங் ‘‘திண்ணங் வஸ்ஸானங்…பே॰… ஸன்னிபாதாபெத்வா’’தி.
Tattha appabhikkhukoti katipayabhikkhuko. Tadā kira bhikkhū yebhuyyena majjhimadeseyeva vasiṃsu, tasmā tattha katipayā eva ahesuṃ . Te ca ekasmiṃ gāme eko, ekasmiṃ nigame dveti evaṃ visuṃ visuṃ vasiṃsu. Kicchenāti dukkhena. Kasirenāti āyāsena. Tato tatoti tasmā tasmā gāmanigamādito. Therena hi katipaye bhikkhū ānetvā aññesu ānīyamānesu pubbe ānītā kenacideva karaṇīyena pakkamiṃsu, kañci kālaṃ āgametvā puna tesu ānīyamānesu itare pakkamiṃsu. Evaṃ punappunaṃ ānayanena sannipāto cireneva ahosi. Theropi tadā ekavihārī ahosi. Tena vuttaṃ ‘‘tiṇṇaṃ vassānaṃ…pe… sannipātāpetvā’’ti.
வஸ்ஸங்வுத்த²ஸ்ஸாதி வஸ்ஸங் உபக³ந்த்வா வுஸிதவதோ. ஏதி³ஸோ ச ஏதி³ஸோ சாதி ஏவரூபோ ச ஏவரூபோ ச. ‘‘ஏவரூபாய நாம ரூபகாயஸம்பத்தியா ஸமன்னாக³தோ, ஏவரூபாய த⁴ம்மகாயஸம்பத்தியா ஸமன்னாக³தோ’’தி ஸுதோயேவ மே ஸோ ப⁴க³வா. ந ச மயா ஸம்முகா² தி³ட்டோ²தி எத்த² பன புது²ஜ்ஜனஸத்³தா⁴ய ஏவ ஆயஸ்மா ஸோணோ ப⁴க³வந்தங் த³ட்டு²காமோ அஹோஸி. அபரபா⁴கே³ பன ஸத்தா²ரா ஸத்³தி⁴ங் ஏகக³ந்த⁴குடியங் வஸித்வா பச்சூஸஸமயங் அஜ்ஜி²ட்டோ² ஸோளஸ அட்ட²கவக்³கி³யானி ஸத்து² ஸம்முகா² அட்டி²ங் கத்வா மனஸி கத்வா ஸப்³ப³ங் சேதஸா ஸமன்னாஹரித்வா அத்த²த⁴ம்மபடிஸங்வேதீ³ ஹுத்வா ப⁴ணந்தோ த⁴ம்முபஸஞ்ஹிதபாமோஜ்ஜாதி³முகே²ன ஸமாஹிதோ ஸரப⁴ஞ்ஞபரியோஸானே விபஸ்ஸனங் பட்ட²பெத்வா ஸங்கா²ரே ஸம்மஸந்தோ அனுபுப்³பே³ன அரஹத்தங் பாபுணி. ஏதத³த்த²மேவ ஹிஸ்ஸ ப⁴க³வதா அத்தனா ஸத்³தி⁴ங் ஏகக³ந்த⁴குடியங் வாஸோ ஆணத்தோதி வத³ந்தி.
Vassaṃvutthassāti vassaṃ upagantvā vusitavato. Ediso ca ediso cāti evarūpo ca evarūpo ca. ‘‘Evarūpāya nāma rūpakāyasampattiyā samannāgato, evarūpāya dhammakāyasampattiyā samannāgato’’ti sutoyeva me so bhagavā. Na ca mayā sammukhā diṭṭhoti ettha pana puthujjanasaddhāya eva āyasmā soṇo bhagavantaṃ daṭṭhukāmo ahosi. Aparabhāge pana satthārā saddhiṃ ekagandhakuṭiyaṃ vasitvā paccūsasamayaṃ ajjhiṭṭho soḷasa aṭṭhakavaggiyāni satthu sammukhā aṭṭhiṃ katvā manasi katvā sabbaṃ cetasā samannāharitvā atthadhammapaṭisaṃvedī hutvā bhaṇanto dhammupasañhitapāmojjādimukhena samāhito sarabhaññapariyosāne vipassanaṃ paṭṭhapetvā saṅkhāre sammasanto anupubbena arahattaṃ pāpuṇi. Etadatthameva hissa bhagavatā attanā saddhiṃ ekagandhakuṭiyaṃ vāso āṇattoti vadanti.
கேசி பனாஹு ‘‘ந ச மயா ஸம்முகா² தி³ட்டோ²தி இத³ங் ரூபகாயத³ஸ்ஸனமேவ ஸந்தா⁴ய வுத்தங். ஆயஸ்மா ஹி ஸோணோ பப்³ப³ஜித்வா தே²ரஸ்ஸ ஸந்திகே கம்மட்டா²னங் க³ஹெத்வா க⁴டெந்தோ வாயமந்தோ அனுபஸம்பன்னோவ ஸோதாபன்னோ ஹுத்வா உபஸம்பஜ்ஜித்வா ‘உபாஸகாபி ஸோதாபன்னா ஹொந்தி, அஹம்பி ஸோதாபன்னோ, கிமெத்த² சித்த’ந்தி உபரிமக்³க³த்தா²ய விபஸ்ஸனங் வட்³டெ⁴த்வா அந்தோவஸ்ஸேயேவ ச²ளபி⁴ஞ்ஞோ ஹுத்வா விஸுத்³தி⁴பவாரணாய பவாரேஸி. அரியஸச்சத³ஸ்ஸனேன ப⁴க³வதோ த⁴ம்மகாயோ தி³ட்டோ² நாம ஹோதி. வுத்தஞ்ஹேதங் ‘யோ கோ², வக்கலி, த⁴ம்மங் பஸ்ஸதி, ஸோ மங் பஸ்ஸதீ’தி (ஸங்॰ நி॰ 3.87). தஸ்மாஸ்ஸ த⁴ம்மகாயத³ஸ்ஸனங் பகே³வ ஸித்³த⁴ங், பவாரெத்வா பன ரூபகாயங் த³ட்டு²காமோ அஹோஸீ’’தி.
Keci panāhu ‘‘na ca mayā sammukhā diṭṭhoti idaṃ rūpakāyadassanameva sandhāya vuttaṃ. Āyasmā hi soṇo pabbajitvā therassa santike kammaṭṭhānaṃ gahetvā ghaṭento vāyamanto anupasampannova sotāpanno hutvā upasampajjitvā ‘upāsakāpi sotāpannā honti, ahampi sotāpanno, kimettha citta’nti uparimaggatthāya vipassanaṃ vaḍḍhetvā antovasseyeva chaḷabhiñño hutvā visuddhipavāraṇāya pavāresi. Ariyasaccadassanena bhagavato dhammakāyo diṭṭho nāma hoti. Vuttañhetaṃ ‘yo kho, vakkali, dhammaṃ passati, so maṃ passatī’ti (saṃ. ni. 3.87). Tasmāssa dhammakāyadassanaṃ pageva siddhaṃ, pavāretvā pana rūpakāyaṃ daṭṭhukāmo ahosī’’ti.
பாஸாதி³கந்திஆதி³பதா³னங் அத்தோ² அட்ட²கதா²யமேவ வுத்தோ. தத்த² விஸூகாயிகவிப்ப²ந்தி³தானந்தி படிபக்க²பூ⁴தானங் தி³ட்டி²சித்தவிப்ப²ந்தி³தானந்தி அத்தோ². பாஸாதி³கந்தி (உதா³॰ அட்ட²॰ 10) வா த்³வத்திங்ஸமஹாபுரிஸலக்க²ணஅஸீதிஅனுப்³யஞ்ஜனப்³யாமப்பபா⁴கேதுமாலாலங்கதாய ஸமந்தபாஸாதி³காய அத்தனோ ஸரீரப்பபா⁴ய ஸம்பத்தியா ரூபகாயத³ஸ்ஸனப்³யாவடஸ்ஸ ஜனஸ்ஸ ஸப்³ப³பா⁴க³தோ பஸாதா³வஹங். பஸாத³னீயந்தி த³ஸப³லசதுவேஸாரஜ்ஜச²அஸாதா⁴ரணஞாணஅட்டா²ரஸஆவேணிகபு³த்³த⁴த⁴ம்மப்பபு⁴திஅபரிமாணகு³ணக³ணஸமன்னாக³தாய த⁴ம்மகாயஸம்பத்தியா பரிக்க²கஜனஸ்ஸ பஸாத³னீயங் பஸீதி³தப்³ப³யுத்தங் பஸாத³கங் வா. ஸந்திந்த்³ரியந்தி சக்கா²தி³பஞ்சிந்த்³ரியலோலதாவிக³மேன வூபஸந்தபஞ்சிந்த்³ரியங். ஸந்தமானஸந்தி ச²ட்ட²ஸ்ஸ மனிந்த்³ரியஸ்ஸ நிப்³பி³ஸேவனபா⁴வூபக³மனேன வூபஸந்தமானஸங். உத்தமத³மத²ஸமத²ங் அனுப்பத்தந்தி லோகுத்தரபஞ்ஞாவிமுத்திசேதோவிமுத்திஸங்கா²தங் உத்தமங் த³மத²ங் ஸமத²ஞ்ச அனுப்பத்வா அதி⁴க³ந்த்வா டி²தங். த³ந்தந்தி ஸுபரிஸுத்³த⁴காயஸமாசாரதாய ஹத்த²பாத³குக்குச்சாபா⁴வதோ த³வாதி³அபா⁴வதோ ச காயேன த³ந்தங். கு³த்தந்தி ஸுபரிஸுத்³த⁴வசீஸமாசாரதாய நிரத்த²கவாசாபா⁴வதோ ரவாதி³அபா⁴வதோ ச வாசாய கு³த்தங். யதிந்த்³ரியந்தி ஸுபரிஸுத்³த⁴மனோஸமாசாரதாய அரியித்³தி⁴யோகே³ன அப்³யாவடஅப்படிஸங்கு²பெக்கா²பா⁴வதோ ச மனிந்த்³ரியவஸேன யதிந்த்³ரியங். நாக³ந்தி ச²ந்தா³தி³வஸேன அக³மனதோ, பஹீனானங் ராகா³தி³கிலேஸானங் அபுனாக³மனதோ அபச்சாக³மனதோ கஸ்ஸசிபி ஆகு³ஸ்ஸ ஸப்³ப³தா²பி அகரணதோ, புனப்³ப⁴வஸ்ஸ ச அக³மனதோதி இமேஹி காரணேஹி நாக³ங். எத்த² ச ‘‘பாஸாதி³க’’ந்தி இமினா ரூபகாயேன ப⁴க³வதோ பமாணபூ⁴ததங் தீ³பேதி, ‘‘பஸாத³னீய’’ந்தி இமினா த⁴ம்மகாயேன. ‘‘ஸந்திந்த்³ரிய’’ந்திஆதி³னா ஸேஸேஹி பமாணபூ⁴ததங் தீ³பேதி, தேன சதுப்பமாணிகே லோகஸன்னிவாஸே அனவஸேஸதோ ஸத்தானங் ப⁴க³வதோ பமாணபா⁴வோ பகாஸிதோதி வேதி³தப்³போ³. ஏகவிஹாரேதி ஏகக³ந்த⁴குடியங். க³ந்த⁴குடி ஹி இத⁴ ‘‘விஹாரோ’’தி அதி⁴ப்பேதோ. வத்து²ந்தி வஸிதுங்.
Pāsādikantiādipadānaṃ attho aṭṭhakathāyameva vutto. Tattha visūkāyikavipphanditānanti paṭipakkhabhūtānaṃ diṭṭhicittavipphanditānanti attho. Pāsādikanti (udā. aṭṭha. 10) vā dvattiṃsamahāpurisalakkhaṇaasītianubyañjanabyāmappabhāketumālālaṅkatāya samantapāsādikāya attano sarīrappabhāya sampattiyā rūpakāyadassanabyāvaṭassa janassa sabbabhāgato pasādāvahaṃ. Pasādanīyanti dasabalacatuvesārajjachaasādhāraṇañāṇaaṭṭhārasaāveṇikabuddhadhammappabhutiaparimāṇaguṇagaṇasamannāgatāya dhammakāyasampattiyā parikkhakajanassa pasādanīyaṃ pasīditabbayuttaṃ pasādakaṃ vā. Santindriyanti cakkhādipañcindriyalolatāvigamena vūpasantapañcindriyaṃ. Santamānasanti chaṭṭhassa manindriyassa nibbisevanabhāvūpagamanena vūpasantamānasaṃ. Uttamadamathasamathaṃ anuppattanti lokuttarapaññāvimutticetovimuttisaṅkhātaṃ uttamaṃ damathaṃ samathañca anuppatvā adhigantvā ṭhitaṃ. Dantanti suparisuddhakāyasamācāratāya hatthapādakukkuccābhāvato davādiabhāvato ca kāyena dantaṃ. Guttanti suparisuddhavacīsamācāratāya niratthakavācābhāvato ravādiabhāvato ca vācāya guttaṃ. Yatindriyanti suparisuddhamanosamācāratāya ariyiddhiyogena abyāvaṭaappaṭisaṅkhupekkhābhāvato ca manindriyavasena yatindriyaṃ. Nāganti chandādivasena agamanato, pahīnānaṃ rāgādikilesānaṃ apunāgamanato apaccāgamanato kassacipi āgussa sabbathāpi akaraṇato, punabbhavassa ca agamanatoti imehi kāraṇehi nāgaṃ. Ettha ca ‘‘pāsādika’’nti iminā rūpakāyena bhagavato pamāṇabhūtataṃ dīpeti, ‘‘pasādanīya’’nti iminā dhammakāyena. ‘‘Santindriya’’ntiādinā sesehi pamāṇabhūtataṃ dīpeti, tena catuppamāṇike lokasannivāse anavasesato sattānaṃ bhagavato pamāṇabhāvo pakāsitoti veditabbo. Ekavihāreti ekagandhakuṭiyaṃ. Gandhakuṭi hi idha ‘‘vihāro’’ti adhippeto. Vatthunti vasituṃ.
258. அஜ்ஜோ²காஸே வீதினாமெத்வாதி (உதா³॰ அட்ட²॰ 46) அஜ்ஜோ²காஸே நிஸஜ்ஜாய வீதினாமெத்வா. ‘‘யஸ்மா ப⁴க³வா ஆயஸ்மதோ ஸோணஸ்ஸ ஸமாபத்திஸமாபஜ்ஜனேன படிஸந்தா²ரங் கரொந்தோ ஸாவகஸாதா⁴ரணா ஸப்³பா³ ஸமாபத்தியோ அனுலோமபடிலோமங் ஸமாபஜ்ஜந்தோ ப³ஹுதே³வ ரத்திங் அஜ்ஜோ²காஸே நிஸஜ்ஜாய வீதினாமெத்வா பாதே³ பக்கா²லெத்வா விஹாரங் பாவிஸி, தஸ்மா ஆயஸ்மாபி ஸோணோ ப⁴க³வதோ அதி⁴ப்பாயங் ஞத்வா தத³னுரூபங் ஸப்³பா³ தா ஸமாபத்தியோ ஸமாபஜ்ஜந்தோ ப³ஹுதே³வ ரத்திங் அஜ்ஜோ²காஸே நிஸஜ்ஜாய வீதினாமெத்வா பாதே³ பக்கா²லெத்வா விஹாரங் பாவிஸீ’’தி கேசி வத³ந்தி. பவிஸித்வா ச ப⁴க³வதா அனுஞ்ஞாதோ சீவரங் திரோகரணீயங் கத்வாபி ப⁴க³வதோ பாத³பஸ்ஸே நிஸஜ்ஜாய வீதினாமேஸி. அஜ்ஜே²ஸீதி ஆணாபேஸி. படிபா⁴து தங் பி⁴க்கு² த⁴ம்மோ பா⁴ஸிதுந்தி பி⁴க்கு² துய்ஹங் த⁴ம்மோ பா⁴ஸிதுங் உபட்டா²து ஞாணமுக²ங் ஆக³ச்ச²து, யதா²ஸுதங் யதா²பரியத்தங் த⁴ம்மங் ப⁴ணாஹீதி அத்தோ².
258.Ajjhokāse vītināmetvāti (udā. aṭṭha. 46) ajjhokāse nisajjāya vītināmetvā. ‘‘Yasmā bhagavā āyasmato soṇassa samāpattisamāpajjanena paṭisanthāraṃ karonto sāvakasādhāraṇā sabbā samāpattiyo anulomapaṭilomaṃ samāpajjanto bahudeva rattiṃ ajjhokāse nisajjāya vītināmetvā pāde pakkhāletvā vihāraṃ pāvisi, tasmā āyasmāpi soṇo bhagavato adhippāyaṃ ñatvā tadanurūpaṃ sabbā tā samāpattiyo samāpajjanto bahudeva rattiṃ ajjhokāse nisajjāya vītināmetvā pāde pakkhāletvā vihāraṃ pāvisī’’ti keci vadanti. Pavisitvā ca bhagavatā anuññāto cīvaraṃ tirokaraṇīyaṃ katvāpi bhagavato pādapasse nisajjāya vītināmesi. Ajjhesīti āṇāpesi. Paṭibhātu taṃ bhikkhu dhammo bhāsitunti bhikkhu tuyhaṃ dhammo bhāsituṃ upaṭṭhātu ñāṇamukhaṃ āgacchatu, yathāsutaṃ yathāpariyattaṃ dhammaṃ bhaṇāhīti attho.
ஸப்³பா³னேவ அட்ட²கவக்³கி³கானீதி அட்ட²கவக்³க³பூ⁴தானி காமஸுத்தாதீ³னி (மஹானி॰ 1) ஸோளஸ ஸுத்தானி. ஸரேன அபா⁴ஸீதி ஸுத்துஸ்ஸாரணஸரேன அபா⁴ஸி, ஸரப⁴ஞ்ஞவஸேன கதே²ஸீதி அத்தோ². ஸரப⁴ஞ்ஞபரியோஸானேதி உஸ்ஸாரணாவஸானே. ஸுக்³க³ஹிதானீதி ஸம்மா உக்³க³ஹிதானி. ஸுமனஸிகதானீதி ஸுட்டு² மனஸி கதானி. ஏகச்சோ உக்³க³ஹணகாலே ஸம்மா உக்³க³ஹெத்வாபி பச்சா² ஸஜ்ஜா²யாதி³வஸேன மனஸிகரணகாலே ப்³யஞ்ஜனானி வா மிச்சா² ரோபேதி, பத³பச்சாப⁴ட்ட²ங் வா கரோதி, ந ஏவமயங். இமினா பன ஸம்மதே³வ யது²க்³க³ஹிதங் மனஸி கதானி. தேன வுத்தங் ‘‘ஸுமனஸிகதானீதி ஸுட்டு² மனஸி கதானீ’’தி. ஸூபதா⁴ரிதானீதி அத்த²தோபி ஸுட்டு² உபதா⁴ரிதானி. அத்தே² ஹி ஸுட்டு² உபதா⁴ரிதே ஸக்கா பாளி ஸம்மா உஸ்ஸாரேதுங். கல்யாணியாபி வாசாய ஸமன்னாக³தோதி ஸிதி²லத⁴னிதாதீ³னங் யதா²விதா⁴னங் வசனேன பரிமண்ட³லபத³ப்³யஞ்ஜனாய போரியா வாசாய ஸமன்னாக³தோ. விஸ்ஸட்டா²யாதி விமுத்தாய. ஏதேனஸ்ஸ விமுத்தவாதி³தங் த³ஸ்ஸேதி. அனேலக³லாயாதி ஏலங் வுச்சதி தோ³ஸோ, தங் ந பக்³க⁴ரதீதி அனேலக³லா, தாய நித்³தோ³ஸாயாதி அத்தோ². அத² வா அனேலக³லாயாதி அனேலாய ச அக³லாய ச, நித்³தோ³ஸாய அக³லிதபத³ப்³யஞ்ஜனாய அபரிஹீனபத³ப்³யஞ்ஜனாயாதி அத்தோ². ததா² ஹி நங் ப⁴க³வா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் கல்யாணவாக்கரணானங் யதி³த³ங் ஸோணோ குடிகண்ணோ’’தி (அ॰ நி॰ 1.198, 206) ஏதத³க்³கே³ ட²பேஸி. அத்த²ஸ்ஸ விஞ்ஞாபனியாதி யதா²தி⁴ப்பேதங் அத்த²ங் ஞாபேதுங் ஸமத்தா²ய.
Sabbāneva aṭṭhakavaggikānīti aṭṭhakavaggabhūtāni kāmasuttādīni (mahāni. 1) soḷasa suttāni. Sarena abhāsīti suttussāraṇasarena abhāsi, sarabhaññavasena kathesīti attho. Sarabhaññapariyosāneti ussāraṇāvasāne. Suggahitānīti sammā uggahitāni. Sumanasikatānīti suṭṭhu manasi katāni. Ekacco uggahaṇakāle sammā uggahetvāpi pacchā sajjhāyādivasena manasikaraṇakāle byañjanāni vā micchā ropeti, padapaccābhaṭṭhaṃ vā karoti, na evamayaṃ. Iminā pana sammadeva yathuggahitaṃ manasi katāni. Tena vuttaṃ ‘‘sumanasikatānīti suṭṭhu manasi katānī’’ti. Sūpadhāritānīti atthatopi suṭṭhu upadhāritāni. Atthe hi suṭṭhu upadhārite sakkā pāḷi sammā ussāretuṃ. Kalyāṇiyāpi vācāya samannāgatoti sithiladhanitādīnaṃ yathāvidhānaṃ vacanena parimaṇḍalapadabyañjanāya poriyā vācāya samannāgato. Vissaṭṭhāyāti vimuttāya. Etenassa vimuttavāditaṃ dasseti. Anelagalāyāti elaṃ vuccati doso, taṃ na paggharatīti anelagalā, tāya niddosāyāti attho. Atha vā anelagalāyāti anelāya ca agalāya ca, niddosāya agalitapadabyañjanāya aparihīnapadabyañjanāyāti attho. Tathā hi naṃ bhagavā ‘‘etadaggaṃ, bhikkhave, mama sāvakānaṃ bhikkhūnaṃ kalyāṇavākkaraṇānaṃ yadidaṃ soṇo kuṭikaṇṇo’’ti (a. ni. 1.198, 206) etadagge ṭhapesi. Atthassa viññāpaniyāti yathādhippetaṃ atthaṃ ñāpetuṃ samatthāya.
கதிவஸ்ஸோதி ஸோ கிர மஜ்ஜி²மவயஸ்ஸ ததியே கொட்டா²ஸே டி²தோ ஆகப்பஸம்பன்னோ ச பரேஸங் சிரதரபப்³ப³ஜிதோ விய கா²யதி. தங் ஸந்தா⁴ய ப⁴க³வா புச்சீ²தி கேசி, தங் அகாரணங். ஏவங் ஸந்தங் ஸமாதி⁴ஸுக²ங் அனுப⁴விதுங் யுத்தோ, எத்தகங் காலங் கஸ்மா பமாத³ங் ஆபன்னோஸீதி பன அனுயுஞ்ஜிதுங் ஸத்தா² ‘‘கதிவஸ்ஸோஸீ’’தி தங் புச்சி². தேனேவாஹ ‘‘கிஸ்ஸ பன த்வங் பி⁴க்கு² ஏவங் சிரங் அகாஸீ’’தி. தத்த² கிஸ்ஸாதி கிங்காரணா. ஏவங் சிரங் அகாஸீதி ஏவங் சிராயி, கேன காரணேன ஏவங் சிரகாலங் பப்³ப³ஜ்ஜங் அனுபக³ந்த்வா அகா³ரமஜ்ஜே² வஸீதி அத்தோ². சிரங் தி³ட்டோ² மேதி சிரேன சிரகாலேன மயா தி³ட்டோ². காமேஸூதி வத்து²காமேஸு கிலேஸகாமேஸு ச. ஆதீ³னவோதி தோ³ஸோ. அபிசாதி காமேஸு ஆதீ³னவே கேனசி பகாரேன தி³ட்டே²பி ந தாவாஹங் க⁴ராவாஸதோ நிக்க²மிதுங் அஸக்கி²ங். கஸ்மா? ஸம்பா³தோ⁴ க⁴ராவாஸோ, உச்சாவசேஹி கிச்சகரணீயேஹி ஸமுபப்³யூள்ஹோ அகா³ரியபா⁴வோ. தேனேவாஹ ‘‘ப³ஹுகிச்சோ ப³ஹுகரணீயோ’’தி.
Kativassoti so kira majjhimavayassa tatiye koṭṭhāse ṭhito ākappasampanno ca paresaṃ ciratarapabbajito viya khāyati. Taṃ sandhāya bhagavā pucchīti keci, taṃ akāraṇaṃ. Evaṃ santaṃ samādhisukhaṃ anubhavituṃ yutto, ettakaṃ kālaṃ kasmā pamādaṃ āpannosīti pana anuyuñjituṃ satthā ‘‘kativassosī’’ti taṃ pucchi. Tenevāha ‘‘kissa pana tvaṃ bhikkhu evaṃ ciraṃ akāsī’’ti. Tattha kissāti kiṃkāraṇā. Evaṃ ciraṃ akāsīti evaṃ cirāyi, kena kāraṇena evaṃ cirakālaṃ pabbajjaṃ anupagantvā agāramajjhe vasīti attho. Ciraṃ diṭṭho meti cirena cirakālena mayā diṭṭho. Kāmesūti vatthukāmesu kilesakāmesu ca. Ādīnavoti doso. Apicāti kāmesu ādīnave kenaci pakārena diṭṭhepi na tāvāhaṃ gharāvāsato nikkhamituṃ asakkhiṃ. Kasmā? Sambādho gharāvāso, uccāvacehi kiccakaraṇīyehi samupabyūḷho agāriyabhāvo. Tenevāha ‘‘bahukicco bahukaraṇīyo’’ti.
ஏதமத்த²ங் விதி³த்வாதி காமேஸு யதா²பூ⁴தங் ஆதீ³னவத³ஸ்ஸினோ சித்தங் சிராயித்வாபி க⁴ராவாஸே ந பக்க²ந்த³தி, அஞ்ஞத³த்து² பது³மபலாஸே உத³கபி³ந்து³ விய வினிவத்ததியேவாதி ஏதமத்த²ங் ஸப்³பா³காரதோ விதி³த்வா. இமங் உதா³னந்தி பவத்திங் நிவத்திஞ்ச ஸம்மதே³வ ஜானந்தோ பவத்தியங் தங்னிமித்தே ச ந கதா³சிபி ரமதீதி இத³மத்த²தீ³பகங் இமங் உதா³னங் உதா³னேஸி.
Etamatthaṃ viditvāti kāmesu yathābhūtaṃ ādīnavadassino cittaṃ cirāyitvāpi gharāvāse na pakkhandati, aññadatthu padumapalāse udakabindu viya vinivattatiyevāti etamatthaṃ sabbākārato viditvā. Imaṃ udānanti pavattiṃ nivattiñca sammadeva jānanto pavattiyaṃ taṃnimitte ca na kadācipi ramatīti idamatthadīpakaṃ imaṃ udānaṃ udānesi.
தத்த² தி³ஸ்வா ஆதீ³னவங் லோகேதி ஸப்³ப³ஸ்மிம்பி ஸங்கா²ரலோகே ‘‘அனிச்சோ து³க்கோ² விபரிணாமத⁴ம்மோ’’திஆதீ³னவங் தோ³ஸங் பஞ்ஞாசக்கு²னா பஸ்ஸித்வா. ஏதேன விபஸ்ஸனாசாரோ கதி²தோ. ஞத்வா த⁴ம்மங் நிரூபதி⁴ந்தி ஸப்³பூ³பதி⁴படினிஸ்ஸக்³க³த்தா நிருபதி⁴ங் நிப்³பா³னத⁴ம்மங் யதா²பூ⁴தங் ஞத்வா, நிஸ்ஸரணவிவேகாஸங்க²தாமதஸபா⁴வதோ மக்³க³ஞாணேன படிவிஜ்ஜி²த்வா. ‘‘தி³ஸ்வா ஞத்வா’’தி இமேஸங் பதா³னங் ‘‘க⁴தங் பிவித்வா ப³லங் ஹோதி, ஸீஹங் தி³ஸ்வா ப⁴யங் ஹோதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹொந்தீ’’திஆதீ³ஸு (ம॰ நி॰ 1.271) விய ஹேதுஅத்த²தா த³ட்ட²ப்³பா³. அரியோ ந ரமதீ பாபேதி கிலேஸேஹி ஆரகத்தா அரியோ ஸப்புரிஸோ அணுமத்தேபி பாபே ந ரமதி. கஸ்மா? பாபே ந ரமதீ ஸுசீதி ஸுவிஸுத்³த⁴காயஸமாசாராதி³தாய ஸுசி ஸுத்³த⁴புக்³க³லோ ராஜஹங்ஸோ விய உச்சாரட்டா²னே பாபே ஸங்கிலிட்ட²த⁴ம்மே ந ரமதி நாபி⁴னந்த³தி. ‘‘பாபோ ந ரமதீ ஸுசி’’ந்திபி பாடோ², தஸ்ஸத்தோ² – பாபோ புக்³க³லோ ஸுசிங் அனவஜ்ஜங் வோதா³னத⁴ம்மங் ந ரமதி, அஞ்ஞத³த்து² கா³மஸூகராத³யோ விய உச்சாரட்டா²னங் அஸுசிங் ஸங்கிலேஸத⁴ம்மங்யேவ ரமதீதி படிபக்க²தோ தே³ஸனங் பரிவத்தேதி.
Tattha disvā ādīnavaṃ loketi sabbasmimpi saṅkhāraloke ‘‘anicco dukkho vipariṇāmadhammo’’tiādīnavaṃ dosaṃ paññācakkhunā passitvā. Etena vipassanācāro kathito. Ñatvā dhammaṃ nirūpadhinti sabbūpadhipaṭinissaggattā nirupadhiṃ nibbānadhammaṃ yathābhūtaṃ ñatvā, nissaraṇavivekāsaṅkhatāmatasabhāvato maggañāṇena paṭivijjhitvā. ‘‘Disvā ñatvā’’ti imesaṃ padānaṃ ‘‘ghataṃ pivitvā balaṃ hoti, sīhaṃ disvā bhayaṃ hoti, paññāya cassa disvā āsavā parikkhīṇā hontī’’tiādīsu (ma. ni. 1.271) viya hetuatthatā daṭṭhabbā. Ariyo na ramatī pāpeti kilesehi ārakattā ariyo sappuriso aṇumattepi pāpe na ramati. Kasmā? Pāpe na ramatī sucīti suvisuddhakāyasamācārāditāya suci suddhapuggalo rājahaṃso viya uccāraṭṭhāne pāpe saṃkiliṭṭhadhamme na ramati nābhinandati. ‘‘Pāpo na ramatī suci’’ntipi pāṭho, tassattho – pāpo puggalo suciṃ anavajjaṃ vodānadhammaṃ na ramati, aññadatthu gāmasūkarādayo viya uccāraṭṭhānaṃ asuciṃ saṃkilesadhammaṃyeva ramatīti paṭipakkhato desanaṃ parivatteti.
ஸோணகுடிகண்ணவத்து²கதா²வண்ணனா நிட்டி²தா.
Soṇakuṭikaṇṇavatthukathāvaṇṇanā niṭṭhitā.
259. காளஸீஹோதி காளமுக²வானரஜாதி. ஸேஸமெத்த² பாளிதோ அட்ட²கதா²தோ ச ஸுவிஞ்ஞெய்யமேவாதி.
259.Kāḷasīhoti kāḷamukhavānarajāti. Sesamettha pāḷito aṭṭhakathāto ca suviññeyyamevāti.
சம்மக்க²ந்த⁴கவண்ணனா நிட்டி²தா.
Cammakkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
157. ஸோணகுடிகண்ணவத்து² • 157. Soṇakuṭikaṇṇavatthu
158. மஹாகச்சானஸ்ஸ பஞ்சவரபரித³ஸ்ஸனா • 158. Mahākaccānassa pañcavaraparidassanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸப்³ப³சம்மபடிக்கே²பாதி³கதா² • Sabbacammapaṭikkhepādikathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸப்³ப³சம்மபடிக்கே²பாதி³கதா²வண்ணனா • Sabbacammapaṭikkhepādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கி³ஹிவிகதானுஞ்ஞாதாதி³கதா²வண்ணனா • Gihivikatānuññātādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 157. ஸோணகுடிகண்ணவத்து²கதா² • 157. Soṇakuṭikaṇṇavatthukathā
