| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
সোণকুটিকণ্ণৰত্থুকথাৰণ্ণনা
Soṇakuṭikaṇṇavatthukathāvaṇṇanā
২৫৭. পপতকে পব্বতেতি এত্থ ‘‘পৰত্তে পব্বতে’’তিপি পঠন্তি, পৰত্তনামকে পব্বতেতি অত্থো। সোণো উপাসকোতিআদীসু (উদা॰ অট্ঠ॰ ৪৬) নামেন সোণো নাম, তীহি সরণগমনেহি উপাসকত্তপটিৰেদনেন উপাসকো, কোটিঅগ্ঘনকস্স কণ্ণপিল়ন্ধনস্স ধারণেন ‘‘কোটিকণ্ণো’’তি চ ৰত্তব্বে ‘‘কুটিকণ্ণো’’তি এৰং অভিঞ্ঞাতো, ন সুকুমারসোণোতি অধিপ্পাযো। অযঞ্হি আযস্মতো মহাকচ্চানস্স সন্তিকে ধম্মং সুত্ৰা সাসনে অভিপ্পসন্নো সরণেসু চ সীলেসু চ পতিট্ঠিতো পপতকে পব্বতে ছাযূদকসম্পন্নে ঠানে ৰিহারং কারেত্ৰা থেরং তত্থ ৰসাপেত্ৰা চতূহি পচ্চযেহি উপট্ঠাতি। তেন ৰুত্তং ‘‘আযস্মতো মহাকচ্চানস্স উপট্ঠাকো হোতী’’তি।
257.Papatake pabbateti ettha ‘‘pavatte pabbate’’tipi paṭhanti, pavattanāmake pabbateti attho. Soṇo upāsakotiādīsu (udā. aṭṭha. 46) nāmena soṇo nāma, tīhi saraṇagamanehi upāsakattapaṭivedanena upāsako, koṭiagghanakassa kaṇṇapiḷandhanassa dhāraṇena ‘‘koṭikaṇṇo’’ti ca vattabbe ‘‘kuṭikaṇṇo’’ti evaṃ abhiññāto, na sukumārasoṇoti adhippāyo. Ayañhi āyasmato mahākaccānassa santike dhammaṃ sutvā sāsane abhippasanno saraṇesu ca sīlesu ca patiṭṭhito papatake pabbate chāyūdakasampanne ṭhāne vihāraṃ kāretvā theraṃ tattha vasāpetvā catūhi paccayehi upaṭṭhāti. Tena vuttaṃ ‘‘āyasmato mahākaccānassa upaṭṭhāko hotī’’ti.
সো কালেন কালং থেরস্স উপট্ঠানং গচ্ছতি, থেরো চস্স ধম্মং দেসেতি, তেন সংৰেগবহুলো ধম্মচরিযাযং উস্সাহজাতো ৰিহরতি। সো একদা সত্থেন সদ্ধিং ৰাণিজ্জত্থায উজ্জেনিং গচ্ছন্তো অন্তরামগ্গে অটৰিযং সত্থে নিৰিট্ঠে রত্তিযং জনসম্বাধভযেন একমন্তং অপক্কম্ম নিদ্দং উপগঞ্ছি। সত্থো পচ্চূসৰেলাযং উট্ঠায গতো, ন একোপি সোণং পবোধেসি, সব্বে ৰিস্সরিত্ৰা অগমিংসু। সো পভাতায রত্তিযা পবুজ্ঝিত্ৰা উট্ঠায কঞ্চি অপস্সন্তো সত্থেন গতমগ্গং গহেত্ৰা সীঘং সীঘং গচ্ছন্তো একং ৰটরুক্খং উপগঞ্ছি। তত্থ অদ্দস একং মহাকাযং ৰিরূপদস্সনং বীভচ্ছং পুরিসং অট্ঠিতো মুত্তানি অত্তনো মংসানি সযমেৰ খাদন্তং, দিস্ৰান ‘‘কোসি ত্ৰ’’ন্তি পুচ্ছি। পেতোস্মি, ভন্তেতি। কস্মা এৰং করোসীতি? অত্তনো পুব্বকম্মেনাতি। কিং পন তং কম্মন্তি? অহং পুব্বে ভারুকচ্ছনগরৰাসী কূটৰাণিজো হুত্ৰা পরেসং সন্তকং ৰঞ্চেত্ৰা খাদিং, সমণে চ ভিক্খায উপগতে ‘‘তুম্হাকং মংসং খাদথা’’তি অক্কোসিং, তেন কম্মেন এতরহি ইমং দুক্খং অনুভৰামীতি। তং সুত্ৰা সোণো অতিৰিয সংৰেগং পটিলভি।
So kālena kālaṃ therassa upaṭṭhānaṃ gacchati, thero cassa dhammaṃ deseti, tena saṃvegabahulo dhammacariyāyaṃ ussāhajāto viharati. So ekadā satthena saddhiṃ vāṇijjatthāya ujjeniṃ gacchanto antarāmagge aṭaviyaṃ satthe niviṭṭhe rattiyaṃ janasambādhabhayena ekamantaṃ apakkamma niddaṃ upagañchi. Sattho paccūsavelāyaṃ uṭṭhāya gato, na ekopi soṇaṃ pabodhesi, sabbe vissaritvā agamiṃsu. So pabhātāya rattiyā pabujjhitvā uṭṭhāya kañci apassanto satthena gatamaggaṃ gahetvā sīghaṃ sīghaṃ gacchanto ekaṃ vaṭarukkhaṃ upagañchi. Tattha addasa ekaṃ mahākāyaṃ virūpadassanaṃ bībhacchaṃ purisaṃ aṭṭhito muttāni attano maṃsāni sayameva khādantaṃ, disvāna ‘‘kosi tva’’nti pucchi. Petosmi, bhanteti. Kasmā evaṃ karosīti? Attano pubbakammenāti. Kiṃ pana taṃ kammanti? Ahaṃ pubbe bhārukacchanagaravāsī kūṭavāṇijo hutvā paresaṃ santakaṃ vañcetvā khādiṃ, samaṇe ca bhikkhāya upagate ‘‘tumhākaṃ maṃsaṃ khādathā’’ti akkosiṃ, tena kammena etarahi imaṃ dukkhaṃ anubhavāmīti. Taṃ sutvā soṇo ativiya saṃvegaṃ paṭilabhi.
ততো পরং গচ্ছন্তো মুখতো পগ্ঘরিতকাল়লোহিতে দ্ৰে পেতদারকে পস্সিত্ৰা তথেৰ পুচ্ছি, তেপিস্স অত্তনো কম্মং কথেসুং। তে কির ভারুকচ্ছনগরে দারককালে গন্ধৰাণিজ্জায জীৰিকং কপ্পেন্তা অত্তনো মাতরি খীণাসৰে নিমন্তেত্ৰা ভোজেন্তিযা গেহং গন্ত্ৰা ‘‘অম্হাকং সন্তকং কস্মা সমণানং দেসি, তযা দিন্নং ভোজনং ভুঞ্জনকসমণানং মুখতো কাল়লোহিতং পগ্ঘরতূ’’তি অক্কোসিংসু। তে তেন কম্মেন নিরযে পচ্চিত্ৰা তস্স ৰিপাকাৰসেসেন পেতযোনিযং নিব্বত্তিত্ৰা তদা ইমং দুক্খং অনুভৰন্তি। তম্পি সুত্ৰা সোণো অতিৰিয সংৰেগজাতো অহোসি।
Tato paraṃ gacchanto mukhato paggharitakāḷalohite dve petadārake passitvā tatheva pucchi, tepissa attano kammaṃ kathesuṃ. Te kira bhārukacchanagare dārakakāle gandhavāṇijjāya jīvikaṃ kappentā attano mātari khīṇāsave nimantetvā bhojentiyā gehaṃ gantvā ‘‘amhākaṃ santakaṃ kasmā samaṇānaṃ desi, tayā dinnaṃ bhojanaṃ bhuñjanakasamaṇānaṃ mukhato kāḷalohitaṃ paggharatū’’ti akkosiṃsu. Te tena kammena niraye paccitvā tassa vipākāvasesena petayoniyaṃ nibbattitvā tadā imaṃ dukkhaṃ anubhavanti. Tampi sutvā soṇo ativiya saṃvegajāto ahosi.
সো উজ্জেনিং গন্ত্ৰা তং করণীযং তীরেত্ৰা কুররঘরং পচ্চাগতো থেরং উপসঙ্কমিত্ৰা কতপটিসন্থারো তমত্থং আরোচেসি। থেরোপিস্স পৰত্তিনিৰত্তীসু আদীনৰানিসংসে ৰিভাৰেন্তো ধম্মং দেসেসি। সো থেরং ৰন্দিত্ৰা গেহং গতো সাযমাসং ভুঞ্জিত্ৰা সযনং উপগতো থোকংযেৰ নিদ্দাযিত্ৰা পবুজ্ঝিত্ৰা সযনতলে নিসজ্জ যথাসুতং ধম্মং পচ্চৰেক্খিতুং আরদ্ধো। তস্স তং ধম্মং পচ্চৰেক্খতো তে চ পেতত্তভাৰে অনুস্সরতো সংসারদুক্খং অতিৰিয ভযানকং হুত্ৰা উপট্ঠাসি, পব্বজ্জায চিত্তং নমি। সো ৰিভাতায রত্তিযা সরীরপটিজগ্গনং কত্ৰা থেরং উপগন্ত্ৰা অত্তনো অজ্ঝাসযং আরোচেত্ৰা পব্বজ্জং যাচি। তেন ৰুত্তং ‘‘অথ খো সোণো উপাসকো…পে॰… পব্বাজেতু মং, ভন্তে, অয্যো মহাকচ্চানো’’তি।
So ujjeniṃ gantvā taṃ karaṇīyaṃ tīretvā kuraragharaṃ paccāgato theraṃ upasaṅkamitvā katapaṭisanthāro tamatthaṃ ārocesi. Theropissa pavattinivattīsu ādīnavānisaṃse vibhāvento dhammaṃ desesi. So theraṃ vanditvā gehaṃ gato sāyamāsaṃ bhuñjitvā sayanaṃ upagato thokaṃyeva niddāyitvā pabujjhitvā sayanatale nisajja yathāsutaṃ dhammaṃ paccavekkhituṃ āraddho. Tassa taṃ dhammaṃ paccavekkhato te ca petattabhāve anussarato saṃsāradukkhaṃ ativiya bhayānakaṃ hutvā upaṭṭhāsi, pabbajjāya cittaṃ nami. So vibhātāya rattiyā sarīrapaṭijagganaṃ katvā theraṃ upagantvā attano ajjhāsayaṃ ārocetvā pabbajjaṃ yāci. Tena vuttaṃ ‘‘atha kho soṇo upāsako…pe… pabbājetu maṃ, bhante, ayyo mahākaccāno’’ti.
তত্থ যথা যথাতিআদিপদানং অযং সঙ্খেপত্থো – যেন যেন আকারেন অয্যো মহাকচ্চানো ধম্মং দেসেতি আচিক্খতি পঞ্ঞপেতি পট্ঠপেতি ৰিৰরতি ৰিভজতি উত্তানিং করোতি পকাসেতি, তেন তেন মে উপপরিক্খতো এৰং হোতি ‘‘যদেতং সিক্খত্তযব্রহ্মচরিযং একম্পি দিৰসং অখণ্ডং কত্ৰা চরিমকচিত্তং পাপেতব্বতায একন্তপরিপুণ্ণং, একদিৰসম্পি কিলেসমলেন অমলীনং কত্ৰা চরিমকচিত্তং পাপেতব্বতায একন্তপরিসুদ্ধং, সঙ্খলিখিতং লিখিতসঙ্খসদিসং ধোতসঙ্খসপ্পটিভাগং চরিতব্বং, ইদং ন সুকরং অগারং অজ্ঝাৰসতা অগারমজ্ঝে ৰসন্তেন একন্তপরিপুণ্ণং…পে॰… চরিতু’’ন্তি।
Tattha yathā yathātiādipadānaṃ ayaṃ saṅkhepattho – yena yena ākārena ayyo mahākaccāno dhammaṃ deseti ācikkhati paññapeti paṭṭhapeti vivarati vibhajati uttāniṃ karoti pakāseti, tena tena me upaparikkhato evaṃ hoti ‘‘yadetaṃ sikkhattayabrahmacariyaṃ ekampi divasaṃ akhaṇḍaṃ katvā carimakacittaṃ pāpetabbatāya ekantaparipuṇṇaṃ, ekadivasampi kilesamalena amalīnaṃ katvā carimakacittaṃ pāpetabbatāya ekantaparisuddhaṃ, saṅkhalikhitaṃ likhitasaṅkhasadisaṃ dhotasaṅkhasappaṭibhāgaṃ caritabbaṃ, idaṃ na sukaraṃ agāraṃ ajjhāvasatā agāramajjhe vasantena ekantaparipuṇṇaṃ…pe… caritu’’nti.
এৰং অত্তনো পরিৰিতক্কিতং সোণো উপাসকো থেরস্স আরোচেত্ৰা তং পটিপজ্জিতুকামো ‘‘ইচ্ছামহং ভন্তে’’তিআদিমাহ। থেরো পন ‘‘ন তাৰস্স ঞাণং পরিপাকং গত’’ন্তি উপধারেত্ৰা ঞাণপরিপাকং আগমযমানো ‘‘দুক্করং খো’’তিআদিনা পব্বজ্জাছন্দং নিৰারেসি। তত্থ একসেয্যন্তি অদুতিযসেয্যং। এত্থ চ সেয্যাসীসেন ‘‘একো তিট্ঠতি, একো গচ্ছতি, একো নিসীদতী’’তিআদিনা নযেন ৰুত্তং চতূসু ইরিযাপথেসু কাযৰিৰেকং দীপেতি, ন একিকা হুত্ৰা সযনমত্তং। একভত্তন্তি ‘‘একভত্তিকো হোতি রত্তূপরতো ৰিরতো ৰিকালভোজনা’’তি (দী॰ নি॰ ১.১০, ১৯৪; ম॰ নি॰ ১.২৯৩ অ॰ নি॰ ৩.৭১) এৰং ৰুত্তং ৰিকালভোজনা ৰিরতিং সন্ধায ৰদতি। ব্রহ্মচরিযন্তি মেথুনৰিরতিব্রহ্মচরিযং, সিক্খত্তযানুযোগসঙ্খাতং সাসনব্রহ্মচরিযং ৰা। ইঙ্ঘাতি চোদনত্থে নিপাতো। তত্থেৰাতি গেহেযেৰ। বুদ্ধানং সাসনং অনুযুঞ্জাতি নিচ্চসীলউপোসথসীলনিযমাদিভেদং পঞ্চঙ্গং অট্ঠঙ্গং দসঙ্গঞ্চ সীলং তদনুরূপঞ্চ সমাধিপঞ্ঞাভাৰনং অনুযুঞ্জ। এতঞ্হি উপাসকেন পুব্বভাগে অনুযুঞ্জিতব্বং বুদ্ধসাসনং নাম। তেনাহ ‘‘কালযুত্তং একসেয্যং একভত্তং ব্রহ্মচরিয’’ন্তি।
Evaṃ attano parivitakkitaṃ soṇo upāsako therassa ārocetvā taṃ paṭipajjitukāmo ‘‘icchāmahaṃ bhante’’tiādimāha. Thero pana ‘‘na tāvassa ñāṇaṃ paripākaṃ gata’’nti upadhāretvā ñāṇaparipākaṃ āgamayamāno ‘‘dukkaraṃ kho’’tiādinā pabbajjāchandaṃ nivāresi. Tattha ekaseyyanti adutiyaseyyaṃ. Ettha ca seyyāsīsena ‘‘eko tiṭṭhati, eko gacchati, eko nisīdatī’’tiādinā nayena vuttaṃ catūsu iriyāpathesu kāyavivekaṃ dīpeti, na ekikā hutvā sayanamattaṃ. Ekabhattanti ‘‘ekabhattiko hoti rattūparato virato vikālabhojanā’’ti (dī. ni. 1.10, 194; ma. ni. 1.293 a. ni. 3.71) evaṃ vuttaṃ vikālabhojanā viratiṃ sandhāya vadati. Brahmacariyanti methunaviratibrahmacariyaṃ, sikkhattayānuyogasaṅkhātaṃ sāsanabrahmacariyaṃ vā. Iṅghāti codanatthe nipāto. Tatthevāti geheyeva. Buddhānaṃ sāsanaṃ anuyuñjāti niccasīlauposathasīlaniyamādibhedaṃ pañcaṅgaṃ aṭṭhaṅgaṃ dasaṅgañca sīlaṃ tadanurūpañca samādhipaññābhāvanaṃ anuyuñja. Etañhi upāsakena pubbabhāge anuyuñjitabbaṃ buddhasāsanaṃ nāma. Tenāha ‘‘kālayuttaṃ ekaseyyaṃ ekabhattaṃ brahmacariya’’nti.
তত্থ কালযুত্তন্তি চাতুদ্দসীপঞ্চদ্দসীঅট্ঠমীপাটিহারিকপক্খসঙ্খাতেন কালেন যুত্তং, যথাৰুত্তকালে ৰা তুয্হং অনুযুঞ্জন্তস্স যুত্তং পতিরূপং সক্কুণেয্যং, ন সব্বকালং সব্বন্তি অধিপ্পাযো । সব্বমেতং ঞাণস্স অপরিপক্কত্তা তস্স কামানং দুপ্পহানতায সম্মা পটিপত্তিযং যোগ্যং কারাপেতুং ৰদতি, ন পব্বজ্জাছন্দং নিৰারেতুং। পব্বজ্জাভিসঙ্খারোতি পব্বজিতুং আরম্ভো উস্সাহো। পটিপ্পস্সম্ভীতি ইন্দ্রিযানং অপরিপক্কত্তা সংৰেগস্স চ নাতিতিক্খভাৰতো ৰূপসমি। কিঞ্চাপি পটিপ্পস্সম্ভি, থেরেন ৰুত্তৰিধিং পন অনুতিট্ঠন্তো কালেন কালং থেরং উপসঙ্কমিত্ৰা পযিরুপাসন্তো ধম্মং সুণাতি। তস্স ৰুত্তনযেনেৰ দুতিযম্পি পব্বজ্জায চিত্তং উপ্পজ্জি, থেরস্স চ আরোচেসি, দুতিযম্পি থেরো পটিক্খিপি। ততিযৰারে পন ঞাণস্স পরিপক্কভাৰং ঞত্ৰা ‘‘ইদানি নং পব্বাজেতুং কালো’’তি থেরো পব্বাজেসি, পব্বজিতঞ্চ তং তীণি সংৰচ্ছরানি অতিক্কমিত্ৰা গণং পরিযেসিত্ৰা উপসম্পাদেসি। তং সন্ধায ৰুত্তং ‘‘দুতিযম্পি খো সোণো…পে॰… উপসম্পাদেসী’’তি।
Tattha kālayuttanti cātuddasīpañcaddasīaṭṭhamīpāṭihārikapakkhasaṅkhātena kālena yuttaṃ, yathāvuttakāle vā tuyhaṃ anuyuñjantassa yuttaṃ patirūpaṃ sakkuṇeyyaṃ, na sabbakālaṃ sabbanti adhippāyo . Sabbametaṃ ñāṇassa aparipakkattā tassa kāmānaṃ duppahānatāya sammā paṭipattiyaṃ yogyaṃ kārāpetuṃ vadati, na pabbajjāchandaṃ nivāretuṃ. Pabbajjābhisaṅkhāroti pabbajituṃ ārambho ussāho. Paṭippassambhīti indriyānaṃ aparipakkattā saṃvegassa ca nātitikkhabhāvato vūpasami. Kiñcāpi paṭippassambhi, therena vuttavidhiṃ pana anutiṭṭhanto kālena kālaṃ theraṃ upasaṅkamitvā payirupāsanto dhammaṃ suṇāti. Tassa vuttanayeneva dutiyampi pabbajjāya cittaṃ uppajji, therassa ca ārocesi, dutiyampi thero paṭikkhipi. Tatiyavāre pana ñāṇassa paripakkabhāvaṃ ñatvā ‘‘idāni naṃ pabbājetuṃ kālo’’ti thero pabbājesi, pabbajitañca taṃ tīṇi saṃvaccharāni atikkamitvā gaṇaṃ pariyesitvā upasampādesi. Taṃ sandhāya vuttaṃ ‘‘dutiyampi kho soṇo…pe… upasampādesī’’ti.
তত্থ অপ্পভিক্খুকোতি কতিপযভিক্খুকো। তদা কির ভিক্খূ যেভুয্যেন মজ্ঝিমদেসেযেৰ ৰসিংসু, তস্মা তত্থ কতিপযা এৰ অহেসুং । তে চ একস্মিং গামে একো, একস্মিং নিগমে দ্ৰেতি এৰং ৰিসুং ৰিসুং ৰসিংসু। কিচ্ছেনাতি দুক্খেন। কসিরেনাতি আযাসেন। ততো ততোতি তস্মা তস্মা গামনিগমাদিতো। থেরেন হি কতিপযে ভিক্খূ আনেত্ৰা অঞ্ঞেসু আনীযমানেসু পুব্বে আনীতা কেনচিদেৰ করণীযেন পক্কমিংসু, কঞ্চি কালং আগমেত্ৰা পুন তেসু আনীযমানেসু ইতরে পক্কমিংসু। এৰং পুনপ্পুনং আনযনেন সন্নিপাতো চিরেনেৰ অহোসি। থেরোপি তদা একৰিহারী অহোসি। তেন ৰুত্তং ‘‘তিণ্ণং ৰস্সানং…পে॰… সন্নিপাতাপেত্ৰা’’তি।
Tattha appabhikkhukoti katipayabhikkhuko. Tadā kira bhikkhū yebhuyyena majjhimadeseyeva vasiṃsu, tasmā tattha katipayā eva ahesuṃ . Te ca ekasmiṃ gāme eko, ekasmiṃ nigame dveti evaṃ visuṃ visuṃ vasiṃsu. Kicchenāti dukkhena. Kasirenāti āyāsena. Tato tatoti tasmā tasmā gāmanigamādito. Therena hi katipaye bhikkhū ānetvā aññesu ānīyamānesu pubbe ānītā kenacideva karaṇīyena pakkamiṃsu, kañci kālaṃ āgametvā puna tesu ānīyamānesu itare pakkamiṃsu. Evaṃ punappunaṃ ānayanena sannipāto cireneva ahosi. Theropi tadā ekavihārī ahosi. Tena vuttaṃ ‘‘tiṇṇaṃ vassānaṃ…pe… sannipātāpetvā’’ti.
ৰস্সংৰুত্থস্সাতি ৰস্সং উপগন্ত্ৰা ৰুসিতৰতো। এদিসো চ এদিসো চাতি এৰরূপো চ এৰরূপো চ। ‘‘এৰরূপায নাম রূপকাযসম্পত্তিযা সমন্নাগতো, এৰরূপায ধম্মকাযসম্পত্তিযা সমন্নাগতো’’তি সুতোযেৰ মে সো ভগৰা। ন চ মযা সম্মুখা দিট্ঠোতি এত্থ পন পুথুজ্জনসদ্ধায এৰ আযস্মা সোণো ভগৰন্তং দট্ঠুকামো অহোসি। অপরভাগে পন সত্থারা সদ্ধিং একগন্ধকুটিযং ৰসিত্ৰা পচ্চূসসমযং অজ্ঝিট্ঠো সোল়স অট্ঠকৰগ্গিযানি সত্থু সম্মুখা অট্ঠিং কত্ৰা মনসি কত্ৰা সব্বং চেতসা সমন্নাহরিত্ৰা অত্থধম্মপটিসংৰেদী হুত্ৰা ভণন্তো ধম্মুপসঞ্হিতপামোজ্জাদিমুখেন সমাহিতো সরভঞ্ঞপরিযোসানে ৰিপস্সনং পট্ঠপেত্ৰা সঙ্খারে সম্মসন্তো অনুপুব্বেন অরহত্তং পাপুণি। এতদত্থমেৰ হিস্স ভগৰতা অত্তনা সদ্ধিং একগন্ধকুটিযং ৰাসো আণত্তোতি ৰদন্তি।
Vassaṃvutthassāti vassaṃ upagantvā vusitavato. Ediso ca ediso cāti evarūpo ca evarūpo ca. ‘‘Evarūpāya nāma rūpakāyasampattiyā samannāgato, evarūpāya dhammakāyasampattiyā samannāgato’’ti sutoyeva me so bhagavā. Na ca mayā sammukhā diṭṭhoti ettha pana puthujjanasaddhāya eva āyasmā soṇo bhagavantaṃ daṭṭhukāmo ahosi. Aparabhāge pana satthārā saddhiṃ ekagandhakuṭiyaṃ vasitvā paccūsasamayaṃ ajjhiṭṭho soḷasa aṭṭhakavaggiyāni satthu sammukhā aṭṭhiṃ katvā manasi katvā sabbaṃ cetasā samannāharitvā atthadhammapaṭisaṃvedī hutvā bhaṇanto dhammupasañhitapāmojjādimukhena samāhito sarabhaññapariyosāne vipassanaṃ paṭṭhapetvā saṅkhāre sammasanto anupubbena arahattaṃ pāpuṇi. Etadatthameva hissa bhagavatā attanā saddhiṃ ekagandhakuṭiyaṃ vāso āṇattoti vadanti.
কেচি পনাহু ‘‘ন চ মযা সম্মুখা দিট্ঠোতি ইদং রূপকাযদস্সনমেৰ সন্ধায ৰুত্তং। আযস্মা হি সোণো পব্বজিত্ৰা থেরস্স সন্তিকে কম্মট্ঠানং গহেত্ৰা ঘটেন্তো ৰাযমন্তো অনুপসম্পন্নোৰ সোতাপন্নো হুত্ৰা উপসম্পজ্জিত্ৰা ‘উপাসকাপি সোতাপন্না হোন্তি, অহম্পি সোতাপন্নো, কিমেত্থ চিত্ত’ন্তি উপরিমগ্গত্থায ৰিপস্সনং ৰড্ঢেত্ৰা অন্তোৰস্সেযেৰ ছল়ভিঞ্ঞো হুত্ৰা ৰিসুদ্ধিপৰারণায পৰারেসি। অরিযসচ্চদস্সনেন ভগৰতো ধম্মকাযো দিট্ঠো নাম হোতি। ৰুত্তঞ্হেতং ‘যো খো, ৰক্কলি, ধম্মং পস্সতি, সো মং পস্সতী’তি (সং॰ নি॰ ৩.৮৭)। তস্মাস্স ধম্মকাযদস্সনং পগেৰ সিদ্ধং, পৰারেত্ৰা পন রূপকাযং দট্ঠুকামো অহোসী’’তি।
Keci panāhu ‘‘na ca mayā sammukhā diṭṭhoti idaṃ rūpakāyadassanameva sandhāya vuttaṃ. Āyasmā hi soṇo pabbajitvā therassa santike kammaṭṭhānaṃ gahetvā ghaṭento vāyamanto anupasampannova sotāpanno hutvā upasampajjitvā ‘upāsakāpi sotāpannā honti, ahampi sotāpanno, kimettha citta’nti uparimaggatthāya vipassanaṃ vaḍḍhetvā antovasseyeva chaḷabhiñño hutvā visuddhipavāraṇāya pavāresi. Ariyasaccadassanena bhagavato dhammakāyo diṭṭho nāma hoti. Vuttañhetaṃ ‘yo kho, vakkali, dhammaṃ passati, so maṃ passatī’ti (saṃ. ni. 3.87). Tasmāssa dhammakāyadassanaṃ pageva siddhaṃ, pavāretvā pana rūpakāyaṃ daṭṭhukāmo ahosī’’ti.
পাসাদিকন্তিআদিপদানং অত্থো অট্ঠকথাযমেৰ ৰুত্তো। তত্থ ৰিসূকাযিকৰিপ্ফন্দিতানন্তি পটিপক্খভূতানং দিট্ঠিচিত্তৰিপ্ফন্দিতানন্তি অত্থো। পাসাদিকন্তি (উদা॰ অট্ঠ॰ ১০) ৰা দ্ৰত্তিংসমহাপুরিসলক্খণঅসীতিঅনুব্যঞ্জনব্যামপ্পভাকেতুমালালঙ্কতায সমন্তপাসাদিকায অত্তনো সরীরপ্পভায সম্পত্তিযা রূপকাযদস্সনব্যাৰটস্স জনস্স সব্বভাগতো পসাদাৰহং। পসাদনীযন্তি দসবলচতুৰেসারজ্জছঅসাধারণঞাণঅট্ঠারসআৰেণিকবুদ্ধধম্মপ্পভুতিঅপরিমাণগুণগণসমন্নাগতায ধম্মকাযসম্পত্তিযা পরিক্খকজনস্স পসাদনীযং পসীদিতব্বযুত্তং পসাদকং ৰা। সন্তিন্দ্রিযন্তি চক্খাদিপঞ্চিন্দ্রিযলোলতাৰিগমেন ৰূপসন্তপঞ্চিন্দ্রিযং। সন্তমানসন্তি ছট্ঠস্স মনিন্দ্রিযস্স নিব্বিসেৰনভাৰূপগমনেন ৰূপসন্তমানসং। উত্তমদমথসমথং অনুপ্পত্তন্তি লোকুত্তরপঞ্ঞাৰিমুত্তিচেতোৰিমুত্তিসঙ্খাতং উত্তমং দমথং সমথঞ্চ অনুপ্পত্ৰা অধিগন্ত্ৰা ঠিতং। দন্তন্তি সুপরিসুদ্ধকাযসমাচারতায হত্থপাদকুক্কুচ্চাভাৰতো দৰাদিঅভাৰতো চ কাযেন দন্তং। গুত্তন্তি সুপরিসুদ্ধৰচীসমাচারতায নিরত্থকৰাচাভাৰতো রৰাদিঅভাৰতো চ ৰাচায গুত্তং। যতিন্দ্রিযন্তি সুপরিসুদ্ধমনোসমাচারতায অরিযিদ্ধিযোগেন অব্যাৰটঅপ্পটিসঙ্খুপেক্খাভাৰতো চ মনিন্দ্রিযৰসেন যতিন্দ্রিযং। নাগন্তি ছন্দাদিৰসেন অগমনতো, পহীনানং রাগাদিকিলেসানং অপুনাগমনতো অপচ্চাগমনতো কস্সচিপি আগুস্স সব্বথাপি অকরণতো, পুনব্ভৰস্স চ অগমনতোতি ইমেহি কারণেহি নাগং। এত্থ চ ‘‘পাসাদিক’’ন্তি ইমিনা রূপকাযেন ভগৰতো পমাণভূততং দীপেতি, ‘‘পসাদনীয’’ন্তি ইমিনা ধম্মকাযেন। ‘‘সন্তিন্দ্রিয’’ন্তিআদিনা সেসেহি পমাণভূততং দীপেতি, তেন চতুপ্পমাণিকে লোকসন্নিৰাসে অনৰসেসতো সত্তানং ভগৰতো পমাণভাৰো পকাসিতোতি ৰেদিতব্বো। একৰিহারেতি একগন্ধকুটিযং। গন্ধকুটি হি ইধ ‘‘ৰিহারো’’তি অধিপ্পেতো। ৰত্থুন্তি ৰসিতুং।
Pāsādikantiādipadānaṃ attho aṭṭhakathāyameva vutto. Tattha visūkāyikavipphanditānanti paṭipakkhabhūtānaṃ diṭṭhicittavipphanditānanti attho. Pāsādikanti (udā. aṭṭha. 10) vā dvattiṃsamahāpurisalakkhaṇaasītianubyañjanabyāmappabhāketumālālaṅkatāya samantapāsādikāya attano sarīrappabhāya sampattiyā rūpakāyadassanabyāvaṭassa janassa sabbabhāgato pasādāvahaṃ. Pasādanīyanti dasabalacatuvesārajjachaasādhāraṇañāṇaaṭṭhārasaāveṇikabuddhadhammappabhutiaparimāṇaguṇagaṇasamannāgatāya dhammakāyasampattiyā parikkhakajanassa pasādanīyaṃ pasīditabbayuttaṃ pasādakaṃ vā. Santindriyanti cakkhādipañcindriyalolatāvigamena vūpasantapañcindriyaṃ. Santamānasanti chaṭṭhassa manindriyassa nibbisevanabhāvūpagamanena vūpasantamānasaṃ. Uttamadamathasamathaṃ anuppattanti lokuttarapaññāvimutticetovimuttisaṅkhātaṃ uttamaṃ damathaṃ samathañca anuppatvā adhigantvā ṭhitaṃ. Dantanti suparisuddhakāyasamācāratāya hatthapādakukkuccābhāvato davādiabhāvato ca kāyena dantaṃ. Guttanti suparisuddhavacīsamācāratāya niratthakavācābhāvato ravādiabhāvato ca vācāya guttaṃ. Yatindriyanti suparisuddhamanosamācāratāya ariyiddhiyogena abyāvaṭaappaṭisaṅkhupekkhābhāvato ca manindriyavasena yatindriyaṃ. Nāganti chandādivasena agamanato, pahīnānaṃ rāgādikilesānaṃ apunāgamanato apaccāgamanato kassacipi āgussa sabbathāpi akaraṇato, punabbhavassa ca agamanatoti imehi kāraṇehi nāgaṃ. Ettha ca ‘‘pāsādika’’nti iminā rūpakāyena bhagavato pamāṇabhūtataṃ dīpeti, ‘‘pasādanīya’’nti iminā dhammakāyena. ‘‘Santindriya’’ntiādinā sesehi pamāṇabhūtataṃ dīpeti, tena catuppamāṇike lokasannivāse anavasesato sattānaṃ bhagavato pamāṇabhāvo pakāsitoti veditabbo. Ekavihāreti ekagandhakuṭiyaṃ. Gandhakuṭi hi idha ‘‘vihāro’’ti adhippeto. Vatthunti vasituṃ.
২৫৮. অজ্ঝোকাসে ৰীতিনামেত্ৰাতি (উদা॰ অট্ঠ॰ ৪৬) অজ্ঝোকাসে নিসজ্জায ৰীতিনামেত্ৰা। ‘‘যস্মা ভগৰা আযস্মতো সোণস্স সমাপত্তিসমাপজ্জনেন পটিসন্থারং করোন্তো সাৰকসাধারণা সব্বা সমাপত্তিযো অনুলোমপটিলোমং সমাপজ্জন্তো বহুদেৰ রত্তিং অজ্ঝোকাসে নিসজ্জায ৰীতিনামেত্ৰা পাদে পক্খালেত্ৰা ৰিহারং পাৰিসি, তস্মা আযস্মাপি সোণো ভগৰতো অধিপ্পাযং ঞত্ৰা তদনুরূপং সব্বা তা সমাপত্তিযো সমাপজ্জন্তো বহুদেৰ রত্তিং অজ্ঝোকাসে নিসজ্জায ৰীতিনামেত্ৰা পাদে পক্খালেত্ৰা ৰিহারং পাৰিসী’’তি কেচি ৰদন্তি। পৰিসিত্ৰা চ ভগৰতা অনুঞ্ঞাতো চীৰরং তিরোকরণীযং কত্ৰাপি ভগৰতো পাদপস্সে নিসজ্জায ৰীতিনামেসি। অজ্ঝেসীতি আণাপেসি। পটিভাতু তং ভিক্খু ধম্মো ভাসিতুন্তি ভিক্খু তুয্হং ধম্মো ভাসিতুং উপট্ঠাতু ঞাণমুখং আগচ্ছতু, যথাসুতং যথাপরিযত্তং ধম্মং ভণাহীতি অত্থো।
258.Ajjhokāse vītināmetvāti (udā. aṭṭha. 46) ajjhokāse nisajjāya vītināmetvā. ‘‘Yasmā bhagavā āyasmato soṇassa samāpattisamāpajjanena paṭisanthāraṃ karonto sāvakasādhāraṇā sabbā samāpattiyo anulomapaṭilomaṃ samāpajjanto bahudeva rattiṃ ajjhokāse nisajjāya vītināmetvā pāde pakkhāletvā vihāraṃ pāvisi, tasmā āyasmāpi soṇo bhagavato adhippāyaṃ ñatvā tadanurūpaṃ sabbā tā samāpattiyo samāpajjanto bahudeva rattiṃ ajjhokāse nisajjāya vītināmetvā pāde pakkhāletvā vihāraṃ pāvisī’’ti keci vadanti. Pavisitvā ca bhagavatā anuññāto cīvaraṃ tirokaraṇīyaṃ katvāpi bhagavato pādapasse nisajjāya vītināmesi. Ajjhesīti āṇāpesi. Paṭibhātu taṃ bhikkhu dhammo bhāsitunti bhikkhu tuyhaṃ dhammo bhāsituṃ upaṭṭhātu ñāṇamukhaṃ āgacchatu, yathāsutaṃ yathāpariyattaṃ dhammaṃ bhaṇāhīti attho.
সব্বানেৰ অট্ঠকৰগ্গিকানীতি অট্ঠকৰগ্গভূতানি কামসুত্তাদীনি (মহানি॰ ১) সোল়স সুত্তানি। সরেন অভাসীতি সুত্তুস্সারণসরেন অভাসি, সরভঞ্ঞৰসেন কথেসীতি অত্থো। সরভঞ্ঞপরিযোসানেতি উস্সারণাৰসানে। সুগ্গহিতানীতি সম্মা উগ্গহিতানি। সুমনসিকতানীতি সুট্ঠু মনসি কতানি। একচ্চো উগ্গহণকালে সম্মা উগ্গহেত্ৰাপি পচ্ছা সজ্ঝাযাদিৰসেন মনসিকরণকালে ব্যঞ্জনানি ৰা মিচ্ছা রোপেতি, পদপচ্চাভট্ঠং ৰা করোতি, ন এৰমযং। ইমিনা পন সম্মদেৰ যথুগ্গহিতং মনসি কতানি। তেন ৰুত্তং ‘‘সুমনসিকতানীতি সুট্ঠু মনসি কতানী’’তি। সূপধারিতানীতি অত্থতোপি সুট্ঠু উপধারিতানি। অত্থে হি সুট্ঠু উপধারিতে সক্কা পাল়ি সম্মা উস্সারেতুং। কল্যাণিযাপি ৰাচায সমন্নাগতোতি সিথিলধনিতাদীনং যথাৰিধানং ৰচনেন পরিমণ্ডলপদব্যঞ্জনায পোরিযা ৰাচায সমন্নাগতো। ৰিস্সট্ঠাযাতি ৰিমুত্তায। এতেনস্স ৰিমুত্তৰাদিতং দস্সেতি। অনেলগলাযাতি এলং ৰুচ্চতি দোসো, তং ন পগ্ঘরতীতি অনেলগলা, তায নিদ্দোসাযাতি অত্থো। অথ ৰা অনেলগলাযাতি অনেলায চ অগলায চ, নিদ্দোসায অগলিতপদব্যঞ্জনায অপরিহীনপদব্যঞ্জনাযাতি অত্থো। তথা হি নং ভগৰা ‘‘এতদগ্গং, ভিক্খৰে, মম সাৰকানং ভিক্খূনং কল্যাণৰাক্করণানং যদিদং সোণো কুটিকণ্ণো’’তি (অ॰ নি॰ ১.১৯৮, ২০৬) এতদগ্গে ঠপেসি। অত্থস্স ৰিঞ্ঞাপনিযাতি যথাধিপ্পেতং অত্থং ঞাপেতুং সমত্থায।
Sabbāneva aṭṭhakavaggikānīti aṭṭhakavaggabhūtāni kāmasuttādīni (mahāni. 1) soḷasa suttāni. Sarena abhāsīti suttussāraṇasarena abhāsi, sarabhaññavasena kathesīti attho. Sarabhaññapariyosāneti ussāraṇāvasāne. Suggahitānīti sammā uggahitāni. Sumanasikatānīti suṭṭhu manasi katāni. Ekacco uggahaṇakāle sammā uggahetvāpi pacchā sajjhāyādivasena manasikaraṇakāle byañjanāni vā micchā ropeti, padapaccābhaṭṭhaṃ vā karoti, na evamayaṃ. Iminā pana sammadeva yathuggahitaṃ manasi katāni. Tena vuttaṃ ‘‘sumanasikatānīti suṭṭhu manasi katānī’’ti. Sūpadhāritānīti atthatopi suṭṭhu upadhāritāni. Atthe hi suṭṭhu upadhārite sakkā pāḷi sammā ussāretuṃ. Kalyāṇiyāpi vācāya samannāgatoti sithiladhanitādīnaṃ yathāvidhānaṃ vacanena parimaṇḍalapadabyañjanāya poriyā vācāya samannāgato. Vissaṭṭhāyāti vimuttāya. Etenassa vimuttavāditaṃ dasseti. Anelagalāyāti elaṃ vuccati doso, taṃ na paggharatīti anelagalā, tāya niddosāyāti attho. Atha vā anelagalāyāti anelāya ca agalāya ca, niddosāya agalitapadabyañjanāya aparihīnapadabyañjanāyāti attho. Tathā hi naṃ bhagavā ‘‘etadaggaṃ, bhikkhave, mama sāvakānaṃ bhikkhūnaṃ kalyāṇavākkaraṇānaṃ yadidaṃ soṇo kuṭikaṇṇo’’ti (a. ni. 1.198, 206) etadagge ṭhapesi. Atthassa viññāpaniyāti yathādhippetaṃ atthaṃ ñāpetuṃ samatthāya.
কতিৰস্সোতি সো কির মজ্ঝিমৰযস্স ততিযে কোট্ঠাসে ঠিতো আকপ্পসম্পন্নো চ পরেসং চিরতরপব্বজিতো ৰিয খাযতি। তং সন্ধায ভগৰা পুচ্ছীতি কেচি, তং অকারণং। এৰং সন্তং সমাধিসুখং অনুভৰিতুং যুত্তো, এত্তকং কালং কস্মা পমাদং আপন্নোসীতি পন অনুযুঞ্জিতুং সত্থা ‘‘কতিৰস্সোসী’’তি তং পুচ্ছি। তেনেৰাহ ‘‘কিস্স পন ত্ৰং ভিক্খু এৰং চিরং অকাসী’’তি। তত্থ কিস্সাতি কিংকারণা। এৰং চিরং অকাসীতি এৰং চিরাযি, কেন কারণেন এৰং চিরকালং পব্বজ্জং অনুপগন্ত্ৰা অগারমজ্ঝে ৰসীতি অত্থো। চিরং দিট্ঠো মেতি চিরেন চিরকালেন মযা দিট্ঠো। কামেসূতি ৰত্থুকামেসু কিলেসকামেসু চ। আদীনৰোতি দোসো। অপিচাতি কামেসু আদীনৰে কেনচি পকারেন দিট্ঠেপি ন তাৰাহং ঘরাৰাসতো নিক্খমিতুং অসক্খিং। কস্মা? সম্বাধো ঘরাৰাসো, উচ্চাৰচেহি কিচ্চকরণীযেহি সমুপব্যূল়্হো অগারিযভাৰো। তেনেৰাহ ‘‘বহুকিচ্চো বহুকরণীযো’’তি।
Kativassoti so kira majjhimavayassa tatiye koṭṭhāse ṭhito ākappasampanno ca paresaṃ ciratarapabbajito viya khāyati. Taṃ sandhāya bhagavā pucchīti keci, taṃ akāraṇaṃ. Evaṃ santaṃ samādhisukhaṃ anubhavituṃ yutto, ettakaṃ kālaṃ kasmā pamādaṃ āpannosīti pana anuyuñjituṃ satthā ‘‘kativassosī’’ti taṃ pucchi. Tenevāha ‘‘kissa pana tvaṃ bhikkhu evaṃ ciraṃ akāsī’’ti. Tattha kissāti kiṃkāraṇā. Evaṃ ciraṃ akāsīti evaṃ cirāyi, kena kāraṇena evaṃ cirakālaṃ pabbajjaṃ anupagantvā agāramajjhe vasīti attho. Ciraṃ diṭṭho meti cirena cirakālena mayā diṭṭho. Kāmesūti vatthukāmesu kilesakāmesu ca. Ādīnavoti doso. Apicāti kāmesu ādīnave kenaci pakārena diṭṭhepi na tāvāhaṃ gharāvāsato nikkhamituṃ asakkhiṃ. Kasmā? Sambādho gharāvāso, uccāvacehi kiccakaraṇīyehi samupabyūḷho agāriyabhāvo. Tenevāha ‘‘bahukicco bahukaraṇīyo’’ti.
এতমত্থং ৰিদিত্ৰাতি কামেসু যথাভূতং আদীনৰদস্সিনো চিত্তং চিরাযিত্ৰাপি ঘরাৰাসে ন পক্খন্দতি, অঞ্ঞদত্থু পদুমপলাসে উদকবিন্দু ৰিয ৰিনিৰত্ততিযেৰাতি এতমত্থং সব্বাকারতো ৰিদিত্ৰা। ইমং উদানন্তি পৰত্তিং নিৰত্তিঞ্চ সম্মদেৰ জানন্তো পৰত্তিযং তংনিমিত্তে চ ন কদাচিপি রমতীতি ইদমত্থদীপকং ইমং উদানং উদানেসি।
Etamatthaṃ viditvāti kāmesu yathābhūtaṃ ādīnavadassino cittaṃ cirāyitvāpi gharāvāse na pakkhandati, aññadatthu padumapalāse udakabindu viya vinivattatiyevāti etamatthaṃ sabbākārato viditvā. Imaṃ udānanti pavattiṃ nivattiñca sammadeva jānanto pavattiyaṃ taṃnimitte ca na kadācipi ramatīti idamatthadīpakaṃ imaṃ udānaṃ udānesi.
তত্থ দিস্ৰা আদীনৰং লোকেতি সব্বস্মিম্পি সঙ্খারলোকে ‘‘অনিচ্চো দুক্খো ৰিপরিণামধম্মো’’তিআদীনৰং দোসং পঞ্ঞাচক্খুনা পস্সিত্ৰা। এতেন ৰিপস্সনাচারো কথিতো। ঞত্ৰা ধম্মং নিরূপধিন্তি সব্বূপধিপটিনিস্সগ্গত্তা নিরুপধিং নিব্বানধম্মং যথাভূতং ঞত্ৰা, নিস্সরণৰিৰেকাসঙ্খতামতসভাৰতো মগ্গঞাণেন পটিৰিজ্ঝিত্ৰা। ‘‘দিস্ৰা ঞত্ৰা’’তি ইমেসং পদানং ‘‘ঘতং পিৰিত্ৰা বলং হোতি, সীহং দিস্ৰা ভযং হোতি, পঞ্ঞায চস্স দিস্ৰা আসৰা পরিক্খীণা হোন্তী’’তিআদীসু (ম॰ নি॰ ১.২৭১) ৰিয হেতুঅত্থতা দট্ঠব্বা। অরিযো ন রমতী পাপেতি কিলেসেহি আরকত্তা অরিযো সপ্পুরিসো অণুমত্তেপি পাপে ন রমতি। কস্মা? পাপে ন রমতী সুচীতি সুৰিসুদ্ধকাযসমাচারাদিতায সুচি সুদ্ধপুগ্গলো রাজহংসো ৰিয উচ্চারট্ঠানে পাপে সংকিলিট্ঠধম্মে ন রমতি নাভিনন্দতি। ‘‘পাপো ন রমতী সুচি’’ন্তিপি পাঠো, তস্সত্থো – পাপো পুগ্গলো সুচিং অনৰজ্জং ৰোদানধম্মং ন রমতি, অঞ্ঞদত্থু গামসূকরাদযো ৰিয উচ্চারট্ঠানং অসুচিং সংকিলেসধম্মংযেৰ রমতীতি পটিপক্খতো দেসনং পরিৰত্তেতি।
Tattha disvā ādīnavaṃ loketi sabbasmimpi saṅkhāraloke ‘‘anicco dukkho vipariṇāmadhammo’’tiādīnavaṃ dosaṃ paññācakkhunā passitvā. Etena vipassanācāro kathito. Ñatvā dhammaṃ nirūpadhinti sabbūpadhipaṭinissaggattā nirupadhiṃ nibbānadhammaṃ yathābhūtaṃ ñatvā, nissaraṇavivekāsaṅkhatāmatasabhāvato maggañāṇena paṭivijjhitvā. ‘‘Disvā ñatvā’’ti imesaṃ padānaṃ ‘‘ghataṃ pivitvā balaṃ hoti, sīhaṃ disvā bhayaṃ hoti, paññāya cassa disvā āsavā parikkhīṇā hontī’’tiādīsu (ma. ni. 1.271) viya hetuatthatā daṭṭhabbā. Ariyo na ramatī pāpeti kilesehi ārakattā ariyo sappuriso aṇumattepi pāpe na ramati. Kasmā? Pāpe na ramatī sucīti suvisuddhakāyasamācārāditāya suci suddhapuggalo rājahaṃso viya uccāraṭṭhāne pāpe saṃkiliṭṭhadhamme na ramati nābhinandati. ‘‘Pāpo na ramatī suci’’ntipi pāṭho, tassattho – pāpo puggalo suciṃ anavajjaṃ vodānadhammaṃ na ramati, aññadatthu gāmasūkarādayo viya uccāraṭṭhānaṃ asuciṃ saṃkilesadhammaṃyeva ramatīti paṭipakkhato desanaṃ parivatteti.
সোণকুটিকণ্ণৰত্থুকথাৰণ্ণনা নিট্ঠিতা।
Soṇakuṭikaṇṇavatthukathāvaṇṇanā niṭṭhitā.
২৫৯. কাল়সীহোতি কাল়মুখৰানরজাতি। সেসমেত্থ পাল়িতো অট্ঠকথাতো চ সুৰিঞ্ঞেয্যমেৰাতি।
259.Kāḷasīhoti kāḷamukhavānarajāti. Sesamettha pāḷito aṭṭhakathāto ca suviññeyyamevāti.
চম্মক্খন্ধকৰণ্ণনা নিট্ঠিতা।
Cammakkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১৫৭. সোণকুটিকণ্ণৰত্থু • 157. Soṇakuṭikaṇṇavatthu
১৫৮. মহাকচ্চানস্স পঞ্চৰরপরিদস্সনা • 158. Mahākaccānassa pañcavaraparidassanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সব্বচম্মপটিক্খেপাদিকথা • Sabbacammapaṭikkhepādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সব্বচম্মপটিক্খেপাদিকথাৰণ্ণনা • Sabbacammapaṭikkhepādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / গিহিৰিকতানুঞ্ঞাতাদিকথাৰণ্ণনা • Gihivikatānuññātādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৫৭. সোণকুটিকণ্ণৰত্থুকথা • 157. Soṇakuṭikaṇṇavatthukathā
