| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஸோணஸ்ஸ பப்³ப³ஜ்ஜாகதா²
Soṇassa pabbajjākathā
243. லோஹிதேன பு²டோ ஹோதீதி லோஹிதேன மக்கி²தோ ஹோதி. க³வாகா⁴தனந்தி யத்த² கா³வோ ஹஞ்ஞந்தி, தாதி³ஸோதி அத்தோ². குஸலோ நாம வீணாய வாத³னகுஸலோ. வீணாய தந்திஸ்ஸரேதி வீணாய தந்தியா ஸரே. அச்சாயதாதி அதிஆயதா க²ரமுச்சி²தா. ஸரவதீதி ஸரஸம்பன்னா. கம்மஞ்ஞாதி கம்மக்க²மா. அதிஸிதி²லாதி மந்த³முச்ச²னா. ஸமே கு³ணே பதிட்டி²தாதி மஜ்ஜி²மே ஸரே ட²பெத்வா முச்சி²தா. வீரியஸமதங் அதி⁴ட்ட²ஹாதி வீரியஸம்பயுத்தஸமதங் அதி⁴ட்டா²ஹி, வீரியங் ஸமதே²ன யோஜேஹீதி அத்தோ². இந்த்³ரியானஞ்ச ஸமதங் படிவிஜ்ஜா²தி ஸத்³தா⁴தீ³னங் இந்த்³ரியானங் ஸமதங் ஸமபா⁴வங். தத்த² ஸத்³த⁴ங் பஞ்ஞாய, பஞ்ஞஞ்ச ஸத்³தா⁴ய, வீரியங் ஸமாதி⁴னா, ஸமாதி⁴ஞ்ச வீரியேன யோஜயமானோ இந்த்³ரியானங் ஸமதங் படிவிஜ்ஜ². தத்த² ச நிமித்தங் க³ண்ஹாஹீதி தஸ்மிங் ஸமதே² ஸதி, யேன ஆதா³ஸே முக²பி³ம்பே³னேவ நிமித்தேன உப்பஜ்ஜிதப்³ப³ங் , தங் ஸமத²னிமித்தங் விபஸ்ஸனானிமித்தங் மக்³க³னிமித்தங் ப²லனிமித்தஞ்ச க³ண்ஹாஹி, நிப்³ப³த்தேஹீதி அத்தோ².
243.Lohitenaphuṭo hotīti lohitena makkhito hoti. Gavāghātananti yattha gāvo haññanti, tādisoti attho. Kusalo nāma vīṇāya vādanakusalo. Vīṇāya tantissareti vīṇāya tantiyā sare. Accāyatāti atiāyatā kharamucchitā. Saravatīti sarasampannā. Kammaññāti kammakkhamā. Atisithilāti mandamucchanā. Same guṇe patiṭṭhitāti majjhime sare ṭhapetvā mucchitā. Vīriyasamataṃ adhiṭṭhahāti vīriyasampayuttasamataṃ adhiṭṭhāhi, vīriyaṃ samathena yojehīti attho. Indriyānañca samataṃ paṭivijjhāti saddhādīnaṃ indriyānaṃ samataṃ samabhāvaṃ. Tattha saddhaṃ paññāya, paññañca saddhāya, vīriyaṃ samādhinā, samādhiñca vīriyena yojayamāno indriyānaṃ samataṃ paṭivijjha. Tattha ca nimittaṃ gaṇhāhīti tasmiṃ samathe sati, yena ādāse mukhabimbeneva nimittena uppajjitabbaṃ , taṃ samathanimittaṃ vipassanānimittaṃ magganimittaṃ phalanimittañca gaṇhāhi, nibbattehīti attho.
244. அஞ்ஞங் ப்³யாகரெய்யந்தி அரஹா அஹந்தி ஜானாபெய்யங். ச² டா²னானீதி ச² காரணானி. அதி⁴முத்தோ ஹோதீதி படிவிஜ்ஜி²த்வா பச்சக்க²ங் கத்வா டி²தோ ஹோதி. நெக்க²ம்மாதி⁴முத்தோதிஆதி³ ஸப்³ப³ங் அரஹத்தவஸேன வுத்தங். அரஹத்தஞ்ஹி ஸப்³ப³கிலேஸேஹி நிக்க²ந்தத்தா நெக்க²ம்மங், தேஹேவ பவிவித்தத்தா பவிவேகோ, ப்³யாபஜ்ஜாபா⁴வதோ அப்³யாபஜ்ஜங், உபாதா³னஸ்ஸ க²யந்தே உப்பன்னத்தா உபாதா³னக்க²யோ, தண்ஹாக்க²யந்தே உப்பன்னத்தா தண்ஹக்க²யோ, ஸம்மோஹாபா⁴வதோ அஸம்மோஹோதி ச வுச்சதி.
244.Aññaṃ byākareyyanti arahā ahanti jānāpeyyaṃ. Cha ṭhānānīti cha kāraṇāni. Adhimutto hotīti paṭivijjhitvā paccakkhaṃ katvā ṭhito hoti. Nekkhammādhimuttotiādi sabbaṃ arahattavasena vuttaṃ. Arahattañhi sabbakilesehi nikkhantattā nekkhammaṃ, teheva pavivittattā paviveko, byāpajjābhāvato abyāpajjaṃ, upādānassa khayante uppannattā upādānakkhayo, taṇhākkhayante uppannattā taṇhakkhayo, sammohābhāvato asammohoti ca vuccati.
கேவலங் ஸத்³தா⁴மத்தகந்தி படிவேத⁴ரஹிதங் கேவலங் படிவேத⁴பஞ்ஞாய அஸம்மிஸ்ஸங் ஸத்³தா⁴மத்தகங். படிசயந்தி புனப்புனங் கரணேன வுட்³டி⁴ங். வீதராக³த்தாதி மக்³க³ப்படிவேதே⁴ன ராக³ஸ்ஸ விக³தத்தாயேவ நெக்க²ம்மஸங்கா²தங் அரஹத்தங் படிவிஜ்ஜி²த்வா டி²தோ ஹோதி. ப²லஸமாபத்திவிஹாரேனேவ விஹரதி, தன்னின்னமானஸோயேவ ஹோதீதி அத்தோ². ஸேஸபதே³ஸுபி ஏஸேவ நயோ.
Kevalaṃ saddhāmattakanti paṭivedharahitaṃ kevalaṃ paṭivedhapaññāya asammissaṃ saddhāmattakaṃ. Paṭicayanti punappunaṃ karaṇena vuḍḍhiṃ. Vītarāgattāti maggappaṭivedhena rāgassa vigatattāyeva nekkhammasaṅkhātaṃ arahattaṃ paṭivijjhitvā ṭhito hoti. Phalasamāpattivihāreneva viharati, tanninnamānasoyeva hotīti attho. Sesapadesupi eseva nayo.
லாப⁴ஸக்காரஸிலோகந்தி சதுபச்சயலாப⁴ஞ்ச தேஸங்யேவ ஸுகதபா⁴வஞ்ச வண்ணப⁴ணனஞ்ச. நிகாமயமானோதி இச்ச²மானோ பத்த²யமானோ. பவிவேகாதி⁴முத்தோதி விவேகே அதி⁴முத்தோ அஹந்தி ஏவங் அரஹத்தங் ப்³யாகரோதீதி அத்தோ².
Lābhasakkārasilokanti catupaccayalābhañca tesaṃyeva sukatabhāvañca vaṇṇabhaṇanañca. Nikāmayamānoti icchamāno patthayamāno. Pavivekādhimuttoti viveke adhimutto ahanti evaṃ arahattaṃ byākarotīti attho.
ஸீலப்³ப³தபராமாஸந்தி ஸீலஞ்ச வதஞ்ச பராமஸித்வா க³ஹிதக³ஹணமத்தங். ஸாரதோ பச்சாக³ச்ச²ந்தோதி ஸாரபா⁴வேன ஜானந்தோ. அப்³யாபஜ்ஜாதி⁴முத்தோதி அப்³யாபஜ்ஜங் அரஹத்தங் ப்³யாகரோதீதி அத்தோ². இமினாவ நயேன ஸப்³ப³வாரேஸு அத்தோ² வேதி³தப்³போ³.
Sīlabbataparāmāsanti sīlañca vatañca parāmasitvā gahitagahaṇamattaṃ. Sārato paccāgacchantoti sārabhāvena jānanto. Abyāpajjādhimuttoti abyāpajjaṃ arahattaṃ byākarotīti attho. Imināva nayena sabbavāresu attho veditabbo.
பு⁴ஸாதி ப³லவந்தோ. நேவஸ்ஸ சித்தங் பரியாதி³யந்தீதி ஏதஸ்ஸ கீ²ணாஸவஸ்ஸ சித்தங் க³ஹெத்வா டா²துங் ந ஸக்கொந்தி. அமிஸ்ஸீகதந்தி அமிஸ்ஸகதங். கிலேஸாஹி ஆரம்மணேன ஸத்³தி⁴ங் சித்தங் மிஸ்ஸங் கரொந்தி, தேஸங் அபா⁴வா அமிஸ்ஸீகதங். டி²தந்தி பதிட்டி²தங். ஆனேஞ்ஜப்பத்தந்தி அசலனப்பத்தங். வயஞ்சஸ்ஸானுபஸ்ஸதீதி தஸ்ஸ சித்தஸ்ஸ உப்பாத³ம்பி வயம்பி பஸ்ஸதி.
Bhusāti balavanto. Nevassa cittaṃ pariyādiyantīti etassa khīṇāsavassa cittaṃ gahetvā ṭhātuṃ na sakkonti. Amissīkatanti amissakataṃ. Kilesāhi ārammaṇena saddhiṃ cittaṃ missaṃ karonti, tesaṃ abhāvā amissīkataṃ. Ṭhitanti patiṭṭhitaṃ. Āneñjappattanti acalanappattaṃ. Vayañcassānupassatīti tassa cittassa uppādampi vayampi passati.
நெக்க²ம்மங் அதி⁴முத்தஸ்ஸாதி அரஹத்தங் படிவிஜ்ஜி²த்வா டி²தஸ்ஸ. ஸேஸபதே³ஹிபி அரஹத்தமேவ கதி²தங். உபாதா³னக்க²யஸ்ஸாதி உபயோக³த்தே² ஸாமிவசனங். அஸம்மோஹஞ்ச சேதஸோதி சித்தஸ்ஸ ச அஸம்மோஹங் அதி⁴முத்தஸ்ஸ. தி³ஸ்வா ஆயதனுப்பாத³ந்தி ஆயதனானங் உப்பாத³ஞ்ச வயஞ்ச தி³ஸ்வா. ஸம்மா சித்தங் விமுச்சதீதி ஸம்மா ஹேதுனா நயேன இமாய விபஸ்ஸனாய படிபத்தியா ப²லஸமாபத்திவஸேன சித்தங் விமுச்சதி, நிப்³பா³னாரம்மணே அதி⁴முச்சதி. ஸந்தசித்தஸ்ஸாதி நிப்³பு³தசித்தஸ்ஸ. தாதி³னோதி இட்டா²னிட்டே² அனுனயபடிகே⁴ஹி அகம்பியத்தா தாதீ³, தஸ்ஸ தாதி³னோ.
Nekkhammaṃ adhimuttassāti arahattaṃ paṭivijjhitvā ṭhitassa. Sesapadehipi arahattameva kathitaṃ. Upādānakkhayassāti upayogatthe sāmivacanaṃ. Asammohañca cetasoti cittassa ca asammohaṃ adhimuttassa. Disvā āyatanuppādanti āyatanānaṃ uppādañca vayañca disvā. Sammā cittaṃ vimuccatīti sammā hetunā nayena imāya vipassanāya paṭipattiyā phalasamāpattivasena cittaṃ vimuccati, nibbānārammaṇe adhimuccati. Santacittassāti nibbutacittassa. Tādinoti iṭṭhāniṭṭhe anunayapaṭighehi akampiyattā tādī, tassa tādino.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 147. ஸோணகோளிவிஸவத்து² • 147. Soṇakoḷivisavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸோணஸ்ஸ பப்³ப³ஜ்ஜாகதா²வண்ணனா • Soṇassa pabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸோணஸ்ஸபப்³ப³ஜ்ஜாகதா²வண்ணனா • Soṇassapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸோணகோளிவிஸகதா²தி³வண்ணனா • Soṇakoḷivisakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 147. ஸோணகோளிவிஸவத்து²கதா² • 147. Soṇakoḷivisavatthukathā
