| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஸோணஸ்ஸ பப்³ப³ஜ்ஜாகதா²வண்ணனா
Soṇassa pabbajjākathāvaṇṇanā
243. ஸுத்தத்தோ² பன ஸுத்தவண்ணனாதோயேவ க³ஹேதப்³போ³தி எத்தா²யங் ஸுத்தவண்ணனா. ஸீதவனேதி (அ॰ நி॰ அட்ட²॰ 3.6.55) ஏவங்னாமகே வனே. தஸ்மிங் கிர படிபாடியா பஞ்ச சங்கமனஸதானி மாபிதானி, தேஸு தே²ரோ அத்தனோ ஸப்பாயங் சங்கமனங் க³ஹெத்வா ஸமணத⁴ம்மங் கரோதி. தஸ்ஸ ஆரத்³த⁴வீரியஸ்ஸ ஹுத்வா சங்கமதோ பாத³தலானி பி⁴ஜ்ஜிங்ஸு, ஜாணூஹி சங்கமதோ ஜாணுகானிபி ஹத்த²தலானிபி பி⁴ஜ்ஜிங்ஸு, சி²த்³தா³னி அஹேஸுங். ஏவங் ஆரத்³த⁴வீரியோ விஹரந்தோ ஓபா⁴ஸனிமித்தமத்தகம்பி த³ஸ்ஸேதுங் நாஸக்கி². தஸ்ஸ வீரியேன கிலமிதகாயஸ்ஸ சங்கமனகோடியங் பாஸாணப²லகே நிஸின்னஸ்ஸ யோ விதக்கோ உத³பாதி³, தங் த³ஸ்ஸேதுங் ‘‘அத² கோ² ஆயஸ்மதோ’’திஆதி³ வுத்தங். தத்த² ஆரத்³த⁴வீரியாதி பரிபுண்ணபக்³க³ஹிதவீரியா. ந அனுபாதா³ய ஆஸவேஹி சித்தங் விமுச்சதீதி ‘‘ஸசே அஹங் உக்³க⁴டிதஞ்ஞூ வா விபஞ்சிதஞ்ஞூ வா நெய்யோ வா, ந மே சித்தங் ந விமுச்செய்ய, அத்³தா⁴ பன பத³பரமோ, யேன மே சித்தங் ந முச்சதீ’’தி ஸன்னிட்டா²னங் கத்வா ‘‘ஸங்விஜ்ஜந்தி கோ² பனா’’திஆதீ³னி சிந்தேஸி. தத்த² போ⁴கா³தி உபயோக³த்தே² பச்சத்தங்.
243. Suttattho pana suttavaṇṇanātoyeva gahetabboti etthāyaṃ suttavaṇṇanā. Sītavaneti (a. ni. aṭṭha. 3.6.55) evaṃnāmake vane. Tasmiṃ kira paṭipāṭiyā pañca caṅkamanasatāni māpitāni, tesu thero attano sappāyaṃ caṅkamanaṃ gahetvā samaṇadhammaṃ karoti. Tassa āraddhavīriyassa hutvā caṅkamato pādatalāni bhijjiṃsu, jāṇūhi caṅkamato jāṇukānipi hatthatalānipi bhijjiṃsu, chiddāni ahesuṃ. Evaṃ āraddhavīriyo viharanto obhāsanimittamattakampi dassetuṃ nāsakkhi. Tassa vīriyena kilamitakāyassa caṅkamanakoṭiyaṃ pāsāṇaphalake nisinnassa yo vitakko udapādi, taṃ dassetuṃ ‘‘atha kho āyasmato’’tiādi vuttaṃ. Tattha āraddhavīriyāti paripuṇṇapaggahitavīriyā. Na anupādāya āsavehi cittaṃ vimuccatīti ‘‘sace ahaṃ ugghaṭitaññū vā vipañcitaññū vā neyyo vā, na me cittaṃ na vimucceyya, addhā pana padaparamo, yena me cittaṃ na muccatī’’ti sanniṭṭhānaṃ katvā ‘‘saṃvijjanti kho panā’’tiādīni cintesi. Tattha bhogāti upayogatthe paccattaṃ.
பாதுரஹோஸீதி தே²ரஸ்ஸ சித்தாசாரங் ஞத்வா ‘‘அயங் ஸோணோ அஜ்ஜ ஸீதவனே பதா⁴னபூ⁴மியங் நிஸின்னோ இமங் விதக்கங் விதக்கேதி, க³ந்த்வாஸ்ஸ விதக்கங் ஸஹொட்³ட⁴ங் க³ண்ஹித்வா வீணோபமகம்மட்டா²னங் கதெ²ஸ்ஸாமீ’’தி ஸீதவனே பாதுரஹோஸி. பஞ்ஞத்தே ஆஸனேதி பதா⁴னிகபி⁴க்கூ² அத்தனோ வஸனட்டா²னே ஓவதி³துங் ஆக³தஸ்ஸ பு³த்³த⁴ஸ்ஸ ப⁴க³வதோ நிஸீத³னத்த²ங் யதா²லாபே⁴ன ஆஸனம்பி பஞ்ஞபெத்வாவ பதா⁴னங் கரொந்தி , அஞ்ஞங் அலப⁴மானா புராணபண்ணானி ஸங்க⁴ரித்வா உபரி ஸங்கா⁴டிங் பஞ்ஞபெந்தி. தே²ரோபி ஆஸனங் பஞ்ஞபெத்வாவ பதா⁴னங் அகாஸி, தங் ஸந்தா⁴ய வுத்தங் ‘‘பஞ்ஞத்தே ஆஸனே’’தி.
Pāturahosīti therassa cittācāraṃ ñatvā ‘‘ayaṃ soṇo ajja sītavane padhānabhūmiyaṃ nisinno imaṃ vitakkaṃ vitakketi, gantvāssa vitakkaṃ sahoḍḍhaṃ gaṇhitvā vīṇopamakammaṭṭhānaṃ kathessāmī’’ti sītavane pāturahosi. Paññatte āsaneti padhānikabhikkhū attano vasanaṭṭhāne ovadituṃ āgatassa buddhassa bhagavato nisīdanatthaṃ yathālābhena āsanampi paññapetvāva padhānaṃ karonti , aññaṃ alabhamānā purāṇapaṇṇāni saṅgharitvā upari saṅghāṭiṃ paññapenti. Theropi āsanaṃ paññapetvāva padhānaṃ akāsi, taṃ sandhāya vuttaṃ ‘‘paññatte āsane’’ti.
தங் கிங் மஞ்ஞஸீதி ஸத்தா² ‘‘இமஸ்ஸ பி⁴க்கு²னோ அவஸேஸகம்மட்டா²னேன அத்தோ² நத்தி², அயங் க³ந்த⁴ப்³ப³ஸிப்பே சே²கோ சிண்ணவஸீ, அத்தனோ விஸயே கதி²யமானே கி²ப்பமேவ ஸல்லக்கெ²ஸ்ஸதீ’’தி வீணோபமங் கதே²துங் ‘‘தங் கிங் மஞ்ஞஸீ’’திஆதி³மாஹ. வீணாய தந்திஸ்ஸரே குஸலதா நாம வீணாய வாத³னகுஸலதா, ஸோ ச தத்த² குஸலோ. மாதாபிதரோ ஹிஸ்ஸ ‘‘அம்ஹாகங் புத்தோ அஞ்ஞங் ஸிப்பங் ஸிக்க²ந்தோ காயேன கிலமிஸ்ஸதி, இத³ங் பன ஆஸனே நிஸின்னேனேவ ஸக்கா உக்³க³ண்ஹிது’’ந்தி க³ந்த⁴ப்³ப³ஸிப்பமேவ உக்³க³ண்ஹாபேஸுங். தஸ்ஸ –
Taṃkiṃ maññasīti satthā ‘‘imassa bhikkhuno avasesakammaṭṭhānena attho natthi, ayaṃ gandhabbasippe cheko ciṇṇavasī, attano visaye kathiyamāne khippameva sallakkhessatī’’ti vīṇopamaṃ kathetuṃ ‘‘taṃ kiṃ maññasī’’tiādimāha. Vīṇāya tantissare kusalatā nāma vīṇāya vādanakusalatā, so ca tattha kusalo. Mātāpitaro hissa ‘‘amhākaṃ putto aññaṃ sippaṃ sikkhanto kāyena kilamissati, idaṃ pana āsane nisinneneva sakkā uggaṇhitu’’nti gandhabbasippameva uggaṇhāpesuṃ. Tassa –
‘‘ஸத்த ஸரா தயோ கா³மா, முச்ச²னா ஏகவீஸதி;
‘‘Satta sarā tayo gāmā, mucchanā ekavīsati;
டா²னா ஏகூனபஞ்ஞாஸ, இச்சேதே ஸரமண்ட³லா’’தி. –
Ṭhānā ekūnapaññāsa, iccete saramaṇḍalā’’ti. –
ஆதி³கங் க³ந்த⁴ப்³ப³ஸிப்பங் ஸப்³ப³மேவ பகு³ணங் அஹோஸி. அச்சாயதாதி அதிஆயதா க²ரமுச்ச²னா. ஸரவதீதி ஸரஸம்பன்னா. கம்மஞ்ஞாதி கம்மக்க²மா கம்மயொக்³கா³. அதிஸிதி²லாதி மந்த³முச்ச²னா. ஸமே கு³ணே பதிட்டி²தாதி மஜ்ஜி²மே ஸரே ட²பெத்வா முச்சி²தா.
Ādikaṃ gandhabbasippaṃ sabbameva paguṇaṃ ahosi. Accāyatāti atiāyatā kharamucchanā. Saravatīti sarasampannā. Kammaññāti kammakkhamā kammayoggā. Atisithilāti mandamucchanā. Same guṇe patiṭṭhitāti majjhime sare ṭhapetvā mucchitā.
அச்சாரத்³த⁴ந்தி அதிகா³ள்ஹங். உத்³த⁴ச்சாய ஸங்வத்ததீதி உத்³த⁴தபா⁴வாய ஸங்வத்ததி. அதிலீனந்தி அதிஸிதி²லங். கோஸஜ்ஜாயாதி குஸீதபா⁴வத்தா²ய. வீரியஸமத²ங் அதி⁴ட்டா²ஹீதி வீரியஸம்பயுத்தங் ஸமத²ங் அதி⁴ட்டா²ஹி, வீரியங் ஸமதே²ன யோஜேஹீதி அத்தோ². இந்த்³ரியானஞ்ச ஸமதங் அதி⁴ட்டா²ஹீதி ஸத்³தா⁴தீ³னங் இந்த்³ரியானங் ஸமதங் ஸமபா⁴வங் அதி⁴ட்டா²ஹி. தத்த² ஸத்³த⁴ங் பஞ்ஞாய, பஞ்ஞஞ்ச ஸத்³தா⁴ய, வீரியங் ஸமாதி⁴னா, ஸமாதி⁴ஞ்ச வீரியேன யோஜயதா இந்த்³ரியானங் ஸமதா அதி⁴ட்டி²தா நாம ஹோதி. ஸதி பன ஸப்³ப³த்தி²கா, ஸா ஸதா³பி ப³லவதீயேவ வட்டதி. தஞ்ச பன நேஸங் யோஜனாவிதா⁴னங் விஸுத்³தி⁴மக்³கே³ (விஸுத்³தி⁴॰ 1.60-62) ஆக³தனயேன வேதி³தப்³ப³ங். தத்த² ச நிமித்தங் க³ண்ஹாஹீதி தஸ்மிஞ்ச ஸமபா⁴வே ஸதி யேன ஆதா³ஸே முக²பி³ம்பே³னேவ நிமித்தேன உப்பஜ்ஜிதப்³ப³ங், தங் ஸமத²னிமித்தங் விபஸ்ஸனானிமித்தங் மக்³க³னிமித்தங் ப²லனிமித்தஞ்ச க³ண்ஹ நிப்³ப³த்தேஹீதி ஏவமஸ்ஸ ஸத்தா² அரஹத்தே பக்கி²பித்வா கம்மட்டா²னங் கதே²ஸி.
Accāraddhanti atigāḷhaṃ. Uddhaccāya saṃvattatīti uddhatabhāvāya saṃvattati. Atilīnanti atisithilaṃ. Kosajjāyāti kusītabhāvatthāya. Vīriyasamathaṃ adhiṭṭhāhīti vīriyasampayuttaṃ samathaṃ adhiṭṭhāhi, vīriyaṃ samathena yojehīti attho. Indriyānañca samataṃ adhiṭṭhāhīti saddhādīnaṃ indriyānaṃ samataṃ samabhāvaṃ adhiṭṭhāhi. Tattha saddhaṃ paññāya, paññañca saddhāya, vīriyaṃ samādhinā, samādhiñca vīriyena yojayatā indriyānaṃ samatā adhiṭṭhitā nāma hoti. Sati pana sabbatthikā, sā sadāpi balavatīyeva vaṭṭati. Tañca pana nesaṃ yojanāvidhānaṃ visuddhimagge (visuddhi. 1.60-62) āgatanayena veditabbaṃ. Tattha ca nimittaṃ gaṇhāhīti tasmiñca samabhāve sati yena ādāse mukhabimbeneva nimittena uppajjitabbaṃ, taṃ samathanimittaṃ vipassanānimittaṃ magganimittaṃ phalanimittañca gaṇha nibbattehīti evamassa satthā arahatte pakkhipitvā kammaṭṭhānaṃ kathesi.
தத்த² ச நிமித்தங் அக்³க³ஹேஸீதி ஸமத²னிமித்தஞ்ச விபஸ்ஸனானிமித்தஞ்ச அக்³க³ஹேஸி. ஏகோதி அஸஹாயோ. வூபகட்டோ²தி வத்து²காமேஹி ச கிலேஸகாமேஹி ச காயேன சேவ சித்தேன ச வூபகட்டோ². அப்பமத்தோதி கம்மட்டா²னே ஸதிங் அவிஜஹந்தோ. ஆதாபீதி காயிகசேதஸிகவீரியாதாபேன ஆதாபோ. ஆதப்பதி கிலேஸேஹீதி ஆதாபோ, வீரியங். பஹிதத்தோதி காயே ச ஜீவிதே ச அனபெக்க²தாய பேஸிதத்தோ விஸ்ஸட்ட²அத்தபா⁴வோ, நிப்³பா³னே வா பேஸிதசித்தோ. ந சிரஸ்ஸேவாதி கம்மட்டா²னாரம்ப⁴தோ ந சிரேனேவ. அஞ்ஞதரோதி ஏகோ. அரஹதந்தி ப⁴க³வதோ ஸாவகானங் அரஹந்தானங் அப்³ப⁴ந்தரோ ஏகோ மஹாஸாவகோ அஹோஸீதி அத்தோ².
Tattha ca nimittaṃ aggahesīti samathanimittañca vipassanānimittañca aggahesi. Ekoti asahāyo. Vūpakaṭṭhoti vatthukāmehi ca kilesakāmehi ca kāyena ceva cittena ca vūpakaṭṭho. Appamattoti kammaṭṭhāne satiṃ avijahanto. Ātāpīti kāyikacetasikavīriyātāpena ātāpo. Ātappati kilesehīti ātāpo, vīriyaṃ. Pahitattoti kāye ca jīvite ca anapekkhatāya pesitatto vissaṭṭhaattabhāvo, nibbāne vā pesitacitto. Na cirassevāti kammaṭṭhānārambhato na cireneva. Aññataroti eko. Arahatanti bhagavato sāvakānaṃ arahantānaṃ abbhantaro eko mahāsāvako ahosīti attho.
244. வுஸிதவாதி வுத்த²ப்³ரஹ்மசரியவாஸோ. கதகரணீயோதி சதூஹி மக்³கே³ஹி கத்தப்³ப³ங் கத்வா டி²தோ. ஓஹிதபா⁴ரோதி க²ந்த⁴பா⁴ரங் கிலேஸபா⁴ரங் அபி⁴ஸங்கா²ரபா⁴ரஞ்ச ஓதாரெத்வா டி²தோ. அனுப்பத்தஸத³த்தோ²தி ஸத³த்தோ² வுச்சதி அரஹத்தங், தங் பத்தோதி அத்தோ². பரிக்கீ²ணப⁴வஸங்யோஜனோதி கீ²ணப⁴வப³ந்த⁴னோ. ஸம்மத³ஞ்ஞா விமுத்தோதி ஸம்மா ஹேதுனா காரணேன ஜானித்வா விமுத்தோ. ச² டா²னானீதி ச² காரணானி. அதி⁴முத்தோ ஹோதீதி படிவிஜ்ஜி²த்வா பச்சக்க²ங் கத்வா டி²தோ ஹோதி. நெக்க²ம்மாதி⁴முத்தோதிஆதி³ ஸப்³ப³ங் அரஹத்தவஸேன வுத்தங். அரஹத்தஞ்ஹி ஸப்³ப³கிலேஸேஹி நிக்க²ந்தத்தா நெக்க²ம்மங், தேஹேவ பவிவித்தத்தா பவிவேகோ, ப்³யாபஜ்ஜாபா⁴வதோ அப்³யாபஜ்ஜங், உபாதா³னஸ்ஸ க²யந்தே உப்பன்னத்தா உபாதா³னக்க²யோ, தண்ஹாய க²யந்தே உப்பன்னத்தா தண்ஹக்க²யோ, ஸம்மோஹாபா⁴வதோ அஸம்மோஹோதி ச வுச்சதி.
244.Vusitavāti vutthabrahmacariyavāso. Katakaraṇīyoti catūhi maggehi kattabbaṃ katvā ṭhito. Ohitabhāroti khandhabhāraṃ kilesabhāraṃ abhisaṅkhārabhārañca otāretvā ṭhito. Anuppattasadatthoti sadattho vuccati arahattaṃ, taṃ pattoti attho. Parikkhīṇabhavasaṃyojanoti khīṇabhavabandhano. Sammadaññā vimuttoti sammā hetunā kāraṇena jānitvā vimutto. Cha ṭhānānīti cha kāraṇāni. Adhimutto hotīti paṭivijjhitvā paccakkhaṃ katvā ṭhito hoti. Nekkhammādhimuttotiādi sabbaṃ arahattavasena vuttaṃ. Arahattañhi sabbakilesehi nikkhantattā nekkhammaṃ, teheva pavivittattā paviveko, byāpajjābhāvato abyāpajjaṃ, upādānassa khayante uppannattā upādānakkhayo, taṇhāya khayante uppannattā taṇhakkhayo, sammohābhāvato asammohoti ca vuccati.
கேவலங் ஸத்³தா⁴மத்தகந்தி படிவேத⁴ரஹிதங் கேவலங் படிவேத⁴பஞ்ஞாய அஸம்மிஸ்ஸங் ஸத்³தா⁴மத்தகங். படிசயந்தி புனப்புனங் கரணேன வட்³டி⁴ங். வீதராக³த்தாதி மக்³க³படிவேதே⁴ன ராக³ஸ்ஸ விஹதத்தாயேவ நெக்க²ம்மஸங்கா²தங் அரஹத்தங் படிவிஜ்ஜி²த்வா ஸச்சி²கத்வா டி²தோ ஹோதி, ப²லஸமாபத்திவிஹாரேன விஹரதி, தன்னின்னமானஸோயேவ ஹோதீதி அத்தோ². ஸேஸபதே³ஸுபி ஏஸேவ நயோ.
Kevalaṃ saddhāmattakanti paṭivedharahitaṃ kevalaṃ paṭivedhapaññāya asammissaṃ saddhāmattakaṃ. Paṭicayanti punappunaṃ karaṇena vaḍḍhiṃ. Vītarāgattāti maggapaṭivedhena rāgassa vihatattāyeva nekkhammasaṅkhātaṃ arahattaṃ paṭivijjhitvā sacchikatvā ṭhito hoti, phalasamāpattivihārena viharati, tanninnamānasoyeva hotīti attho. Sesapadesupi eseva nayo.
லாப⁴ஸக்காரஸிலோகந்தி சதுபச்சயலாப⁴ஞ்ச தேஸங்யேவ ஸுகதபா⁴வஞ்ச வண்ணப⁴ணனஞ்ச. நிகாமயமானோதி இச்ச²மானோ பத்த²யமானோ. பவிவேகாதி⁴முத்தோதி ‘‘பவிவேகே அதி⁴முத்தோ அஹ’’ந்தி ஏவங் அரஹத்தங் ப்³யாகரோதீதி அத்தோ².
Lābhasakkārasilokanti catupaccayalābhañca tesaṃyeva sukatabhāvañca vaṇṇabhaṇanañca. Nikāmayamānoti icchamāno patthayamāno. Pavivekādhimuttoti ‘‘paviveke adhimutto aha’’nti evaṃ arahattaṃ byākarotīti attho.
ஸீலப்³ப³தபராமாஸந்தி ஸீலஞ்ச வதஞ்ச பராமஸித்வா க³ஹிதக்³க³ஹணமத்தங். ஸாரதோ பச்சாக³ச்ச²ந்தோதி ஸாரபா⁴வேன ஜானந்தோ. அப்³யாபஜ்ஜாதி⁴முத்தோதி அப்³யாபஜ்ஜங் அரஹத்தங் ப்³யாகரோதி. இமினாவ நயேன ஸப்³ப³வாரேஸு அத்தோ² த³ட்ட²ப்³போ³. அபிசெத்த² ‘‘நெக்க²ம்மாதி⁴முத்தோதி இமஸ்மிங்யேவ அரஹத்தங் கதி²தங், ஸேஸேஸு பஞ்சஸு நிப்³பா³ன’’ந்தி ஏகே வத³ந்தி. அபரே ‘‘அஸம்மோஹாதி⁴முத்தோதி எத்தே²வ நிப்³பா³னங் கதி²தங், ஸேஸேஸு அரஹத்த’’ந்தி வத³ந்தி. அயங் பனெத்த² ஸாரோ – ‘‘ஸப்³பெ³ஸ்வேவேதேஸு அரஹத்தம்பி நிப்³பா³னம்பி கதி²தமேவாதி.
Sīlabbataparāmāsanti sīlañca vatañca parāmasitvā gahitaggahaṇamattaṃ. Sārato paccāgacchantoti sārabhāvena jānanto. Abyāpajjādhimuttoti abyāpajjaṃ arahattaṃ byākaroti. Imināva nayena sabbavāresu attho daṭṭhabbo. Apicettha ‘‘nekkhammādhimuttoti imasmiṃyeva arahattaṃ kathitaṃ, sesesu pañcasu nibbāna’’nti eke vadanti. Apare ‘‘asammohādhimuttoti ettheva nibbānaṃ kathitaṃ, sesesu arahatta’’nti vadanti. Ayaṃ panettha sāro – ‘‘sabbesvevetesu arahattampi nibbānampi kathitamevāti.
பு⁴ஸாதி ப³லவந்தோ தி³ப்³ப³ரூபஸதி³ஸா. நேவஸ்ஸ சித்தங் பரியாதி³யந்தீதி ஏதஸ்ஸ கீ²ணாஸவஸ்ஸ சித்தங் க³ஹெத்வா டா²துங் ந ஸக்கொந்தி. கிலேஸா ஹி உப்பஜ்ஜமானா சித்தங் க³ண்ஹந்தி நாம. அமிஸ்ஸீகதந்தி அமிஸ்ஸகதங். கிலேஸா ஹி ஆரம்மணேன ஸத்³தி⁴ங் சித்தங் மிஸ்ஸங் கரொந்தி, தேஸங் அபா⁴வா அமிஸ்ஸீகதங். டி²தந்தி பதிட்டி²தங். ஆனேஞ்ஜப்பத்தந்தி அசலனப்பத்தங். வயஞ்சஸ்ஸானுபஸ்ஸதீதி தஸ்ஸ சேஸ சித்தஸ்ஸ உப்பாத³ம்பி வயம்பி பஸ்ஸதி. பு⁴ஸா வாதவுட்டீ²தி ப³லவா வாதக்க²ந்தோ⁴. நேவ நங் ஸங்கம்பெய்யாதி ஏகபா⁴கே³ன சாலேதுங் ந ஸக்குணெய்ய. ந ஸம்பகம்பெய்யாதி தூ²ணங் விய ஸப்³ப³பா⁴க³தோ கம்பேதுங் ந ஸக்குணெய்ய. ந ஸம்பவேதெ⁴ய்யாதி வேதெ⁴த்வா பவேதெ⁴த்வா பாதேதுங் ந ஸக்குணெய்ய.
Bhusāti balavanto dibbarūpasadisā. Nevassa cittaṃ pariyādiyantīti etassa khīṇāsavassa cittaṃ gahetvā ṭhātuṃ na sakkonti. Kilesā hi uppajjamānā cittaṃ gaṇhanti nāma. Amissīkatanti amissakataṃ. Kilesā hi ārammaṇena saddhiṃ cittaṃ missaṃ karonti, tesaṃ abhāvā amissīkataṃ. Ṭhitanti patiṭṭhitaṃ. Āneñjappattanti acalanappattaṃ. Vayañcassānupassatīti tassa cesa cittassa uppādampi vayampi passati. Bhusā vātavuṭṭhīti balavā vātakkhandho. Neva naṃ saṅkampeyyāti ekabhāgena cāletuṃ na sakkuṇeyya. Na sampakampeyyāti thūṇaṃ viya sabbabhāgato kampetuṃ na sakkuṇeyya. Na sampavedheyyāti vedhetvā pavedhetvā pātetuṃ na sakkuṇeyya.
நெக்க²ம்மங் அதி⁴முத்தஸ்ஸாதி அரஹத்தங் படிவிஜ்ஜி²த்வா டி²தஸ்ஸ. ஸேஸபதே³ஸுபி அரஹத்தமேவ கதி²தங். உபாதா³னக்க²யஸ்ஸ சாதி உபயோக³த்தே² ஸாமிவசனங். அஸம்மோஹஞ்ச சேதஸோதி சித்தஸ்ஸ ச அஸம்மோஹங் அதி⁴முத்தஸ்ஸ. தி³ஸ்வா ஆயதனுப்பாத³ந்தி ஆயதனானங் உப்பாத³ஞ்ச வயஞ்ச தி³ஸ்வா. ஸம்மா சித்தங் விமுச்சதீதி ஸம்மா ஹேதுனா நயேன இமாய விபஸ்ஸனாய படிபத்தியா ப²லஸமாபத்திவஸேன சித்தங் விமுச்சதி, நிப்³பா³னாரம்மணே அதி⁴முச்சதி. அத² வா இமினா கீ²ணாஸவஸ்ஸ புப்³ப³பா⁴க³படிபதா³ கதி²தா. தஸ்ஸ ஹி ஆயதனுப்பாத³ங் தி³ஸ்வா இமாய விபஸ்ஸனாய அதி⁴க³தஸ்ஸ அரியமக்³க³ஸ்ஸ ஆனுபா⁴வேன ஸப்³ப³கிலேஸேஹி ஸம்மா சித்தங் விமுச்சதி. ஏவங் தஸ்ஸ ஸம்மா விமுத்தஸ்ஸ…பே॰… ந விஜ்ஜதி. தத்த² ஸந்தசித்தஸ்ஸாதி நிப்³பு³தசித்தஸ்ஸ. ஸேஸமெத்த² உத்தானத்த²மேவ.
Nekkhammaṃ adhimuttassāti arahattaṃ paṭivijjhitvā ṭhitassa. Sesapadesupi arahattameva kathitaṃ. Upādānakkhayassa cāti upayogatthe sāmivacanaṃ. Asammohañca cetasoti cittassa ca asammohaṃ adhimuttassa. Disvā āyatanuppādanti āyatanānaṃ uppādañca vayañca disvā. Sammā cittaṃ vimuccatīti sammā hetunā nayena imāya vipassanāya paṭipattiyā phalasamāpattivasena cittaṃ vimuccati, nibbānārammaṇe adhimuccati. Atha vā iminā khīṇāsavassa pubbabhāgapaṭipadā kathitā. Tassa hi āyatanuppādaṃ disvā imāya vipassanāya adhigatassa ariyamaggassa ānubhāvena sabbakilesehi sammā cittaṃ vimuccati. Evaṃ tassa sammā vimuttassa…pe… na vijjati. Tattha santacittassāti nibbutacittassa. Sesamettha uttānatthameva.
ஸோணஸ்ஸ பப்³ப³ஜ்ஜாகதா²வண்ணனா நிட்டி²தா.
Soṇassa pabbajjākathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 147. ஸோணகோளிவிஸவத்து² • 147. Soṇakoḷivisavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸோணஸ்ஸ பப்³ப³ஜ்ஜாகதா² • Soṇassa pabbajjākathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸோணஸ்ஸபப்³ப³ஜ்ஜாகதா²வண்ணனா • Soṇassapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸோணகோளிவிஸகதா²தி³வண்ணனா • Soṇakoḷivisakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 147. ஸோணகோளிவிஸவத்து²கதா² • 147. Soṇakoḷivisavatthukathā
