ஸோணஸ்ஸபப்³ப³ஜ்ஜாகதா²வண்ணனா

243. தத்த² ச நிமித்தங் க³ண்ஹாஹீதி தேஸங் இந்த்³ரியானங் ஆகாரங் உபலக்கே²ஹி.

244. அதி⁴முத்தோ ஹோதீதி படிவிஜ்ஜி²த்வா பச்சக்க²ங் கத்வா டி²தோ ஹோதி. நெக்க²ம்மாதி⁴முத்தோதிஆதீ³ஹி நிப்³பா³னங், அரஹத்தஞ்ச வுத்தங். ‘‘தஞ்ஹி ஸப்³ப³கிலேஸேஹி நிக்க²ந்தத்தா ‘நெக்க²ம்ம’ந்தி ச கே³ஹதோ பவிவித்தத்தா ‘பவிவேகோ’தி ச ப்³யாபஜ்ஜாபா⁴வதோ ‘அப்³யாபஜ்ஜ’ந்தி ச அரஹத்தங் உபாதா³னஸ்ஸ க²யந்தே உப்பன்னத்தா ‘உபாதா³னக்க²யோ’தி ச தண்ஹாய க²யந்தே உப்பன்னத்தா ‘தண்ஹக்க²யோ’தி ச ஸம்மோஹாபா⁴வதோ ‘அஸம்மோஹோ’தி ச வுச்சதீ’’தி வுத்தங். ஸப்³பே³ஹி அரஹத்தங் வுத்தந்தி கேசி. ஸியா கோ² ஏவமஸ்ஸாதி கதா³சி ஏவமஸ்ஸ, அஸ்ஸ வா ஆயஸ்மதோ ஏவங் ஸியா. பச்சாக³ச்ச²ந்தோ ஜானந்தோ. கரணீயமத்தானந்தி அத்தனோ. ஸோ ஏவ வா பாடோ². நெக்க²ம்மாதி⁴முத்தோதி இமஸ்மிங்யேவ அரஹத்தங் கதி²தங். ஸேஸேஸு நிப்³பா³னந்தி கேசி. அஸம்மோஹாதி⁴முத்தோதி எத்தே²வ நிப்³பா³னங். ஸேஸேஸு அரஹத்தந்தி கேசி. ‘‘ஸப்³பெ³ஸ்வேவேதேஸு உப⁴யம்பீ’’தி வத³ந்தி. பவிவேகஞ்ச சேதஸோ, அதி⁴முத்தஸ்ஸ, உபாதா³னக்க²யஸ்ஸ சாதி உபயோக³த்தே² ஸாமிவசனங். ஆயதனானங் உப்பாத³ஞ்ச வயஞ்ச தி³ஸ்வா.