| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
(๒๐) ๕. พฺราหฺมณวโคฺค
(20) 5. Brāhmaṇavaggo
๑. โสณสุตฺตํ
1. Soṇasuttaṃ
๑๙๑. ‘‘ปญฺจิเม , ภิกฺขเว, โปราณา พฺราหฺมณธมฺมา เอตรหิ สุนเขสุ สนฺทิสฺสนฺติ, โน พฺราหฺมเณสุฯ กตเม ปญฺจ? ปุเพฺพ สุทํ 1, ภิกฺขเว, พฺราหฺมณา พฺราหฺมณิํเยว คจฺฉนฺติ, โน อพฺราหฺมณิํฯ เอตรหิ, ภิกฺขเว, พฺราหฺมณา พฺราหฺมณิมฺปิ คจฺฉนฺติ, อพฺราหฺมณิมฺปิ คจฺฉนฺติฯ เอตรหิ, ภิกฺขเว, สุนขา สุนขิํเยว คจฺฉนฺติ, โน อสุนขิํฯ อยํ, ภิกฺขเว, ปฐโม โปราโณ พฺราหฺมณธโมฺม เอตรหิ สุนเขสุ สนฺทิสฺสติ, โน พฺราหฺมเณสุฯ
191. ‘‘Pañcime , bhikkhave, porāṇā brāhmaṇadhammā etarahi sunakhesu sandissanti, no brāhmaṇesu. Katame pañca? Pubbe sudaṃ 2, bhikkhave, brāhmaṇā brāhmaṇiṃyeva gacchanti, no abrāhmaṇiṃ. Etarahi, bhikkhave, brāhmaṇā brāhmaṇimpi gacchanti, abrāhmaṇimpi gacchanti. Etarahi, bhikkhave, sunakhā sunakhiṃyeva gacchanti, no asunakhiṃ. Ayaṃ, bhikkhave, paṭhamo porāṇo brāhmaṇadhammo etarahi sunakhesu sandissati, no brāhmaṇesu.
‘‘ปุเพฺพ สุทํ, ภิกฺขเว, พฺราหฺมณา พฺราหฺมณิํ อุตุนิํเยว คจฺฉนฺติ, โน อนุตุนิํฯ เอตรหิ, ภิกฺขเว, พฺราหฺมณา พฺราหฺมณิํ อุตุนิมฺปิ คจฺฉนฺติ, อนุตุนิมฺปิ คจฺฉนฺติ ฯ เอตรหิ, ภิกฺขเว, สุนขา สุนขิํ อุตุนิํเยว คจฺฉนฺติ, โน อนุตุนิํฯ อยํ, ภิกฺขเว, ทุติโย โปราโณ พฺราหฺมณธโมฺม เอตรหิ สุนเขสุ สนฺทิสฺสติ, โน พฺราหฺมเณสุฯ
‘‘Pubbe sudaṃ, bhikkhave, brāhmaṇā brāhmaṇiṃ utuniṃyeva gacchanti, no anutuniṃ. Etarahi, bhikkhave, brāhmaṇā brāhmaṇiṃ utunimpi gacchanti, anutunimpi gacchanti . Etarahi, bhikkhave, sunakhā sunakhiṃ utuniṃyeva gacchanti, no anutuniṃ. Ayaṃ, bhikkhave, dutiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘ปุเพฺพ สุทํ, ภิกฺขเว, พฺราหฺมณา พฺราหฺมณิํ เนว กิณนฺติ โน วิกฺกิณนฺติ, สมฺปิเยเนว สํวาสํ สํพนฺธาย 3 สํปวเตฺตนฺติฯ เอตรหิ, ภิกฺขเว, พฺราหฺมณา พฺราหฺมณิํ กิณนฺติปิ วิกฺกิณนฺติปิ, สมฺปิเยนปิ สํวาสํ สํพนฺธาย สํปวเตฺตนฺติฯ เอตรหิ, ภิกฺขเว, สุนขา สุนขิํ เนว กิณนฺติ โน วิกฺกิณนฺติ, สมฺปิเยเนว สํวาสํ สํพนฺธาย สํปวเตฺตนฺติฯ อยํ, ภิกฺขเว, ตติโย โปราโณ พฺราหฺมณธโมฺม เอตรหิ สุนเขสุ สนฺทิสฺสติ, โน พฺราหฺมเณสุฯ
‘‘Pubbe sudaṃ, bhikkhave, brāhmaṇā brāhmaṇiṃ neva kiṇanti no vikkiṇanti, sampiyeneva saṃvāsaṃ saṃbandhāya 4 saṃpavattenti. Etarahi, bhikkhave, brāhmaṇā brāhmaṇiṃ kiṇantipi vikkiṇantipi, sampiyenapi saṃvāsaṃ saṃbandhāya saṃpavattenti. Etarahi, bhikkhave, sunakhā sunakhiṃ neva kiṇanti no vikkiṇanti, sampiyeneva saṃvāsaṃ saṃbandhāya saṃpavattenti. Ayaṃ, bhikkhave, tatiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘ปุเพฺพ สุทํ, ภิกฺขเว, พฺราหฺมณา น สนฺนิธิํ กโรนฺติ ธนสฺสปิ ธญฺญสฺสปิ รชตสฺสปิ ชาตรูปสฺสปิฯ เอตรหิ, ภิกฺขเว, พฺราหฺมณา สนฺนิธิํ กโรนฺติ ธนสฺสปิ ธญฺญสฺสปิ รชตสฺสปิ ชาตรูปสฺสปิฯ เอตรหิ, ภิกฺขเว, สุนขา น สนฺนิธิํ กโรนฺติ ธนสฺสปิ ธญฺญสฺสปิ รชตสฺสปิ ชาตรูปสฺสปิฯ อยํ, ภิกฺขเว, จตุโตฺถ โปราโณ พฺราหฺมณธโมฺม เอตรหิ สุนเขสุ สนฺทิสฺสติ, โน พฺราหฺมเณสุฯ
‘‘Pubbe sudaṃ, bhikkhave, brāhmaṇā na sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, brāhmaṇā sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, sunakhā na sannidhiṃ karonti dhanassapi dhaññassapi rajatassapi jātarūpassapi. Ayaṃ, bhikkhave, catuttho porāṇo brāhmaṇadhammo etarahi sunakhesu sandissati, no brāhmaṇesu.
‘‘ปุเพฺพ สุทํ, ภิกฺขเว, พฺราหฺมณา สายํ สายมาสาย ปาโต ปาตราสาย ภิกฺขํ ปริเยสนฺติฯ เอตรหิ, ภิกฺขเว, พฺราหฺมณา ยาวทตฺถํ อุทราวเทหกํ ภุญฺชิตฺวา อวเสสํ อาทาย ปกฺกมนฺติฯ เอตรหิ, ภิกฺขเว, สุนขา สายํ สายมาสาย ปาโต ปาตราสาย ภิกฺขํ ปริเยสนฺติฯ อยํ, ภิกฺขเว, ปญฺจโม โปราโณ พฺราหฺมณธโมฺม เอตรหิ สุนเขสุ สนฺทิสฺสติ, โน พฺราหฺมเณสุฯ อิเม โข, ภิกฺขเว, ปญฺจ โปราณา พฺราหฺมณธมฺมา เอตรหิ สุนเขสุ สนฺทิสฺสนฺติ, โน พฺราหฺมเณสู’’ติฯ ปฐมํฯ
‘‘Pubbe sudaṃ, bhikkhave, brāhmaṇā sāyaṃ sāyamāsāya pāto pātarāsāya bhikkhaṃ pariyesanti. Etarahi, bhikkhave, brāhmaṇā yāvadatthaṃ udarāvadehakaṃ bhuñjitvā avasesaṃ ādāya pakkamanti. Etarahi, bhikkhave, sunakhā sāyaṃ sāyamāsāya pāto pātarāsāya bhikkhaṃ pariyesanti. Ayaṃ, bhikkhave, pañcamo porāṇo brāhmaṇadhammo etarahi sunakhesu sandissati, no brāhmaṇesu. Ime kho, bhikkhave, pañca porāṇā brāhmaṇadhammā etarahi sunakhesu sandissanti, no brāhmaṇesū’’ti. Paṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๑. โสณสุตฺตวณฺณนา • 1. Soṇasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑. โสณสุตฺตวณฺณนา • 1. Soṇasuttavaṇṇanā
