| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
(20) 5. බ්‍රාහ්‌මණවග්‌ගො
(20) 5. Brāhmaṇavaggo
1. සොණසුත්‌තං
1. Soṇasuttaṃ
191. ‘‘පඤ්‌චිමෙ , භික්‌ඛවෙ, පොරාණා බ්‍රාහ්‌මණධම්‌මා එතරහි සුනඛෙසු සන්‌දිස්‌සන්‌ති, නො බ්‍රාහ්‌මණෙසු. කතමෙ පඤ්‌ච? පුබ්‌බෙ සුදං 1, භික්‌ඛවෙ, බ්‍රාහ්‌මණා බ්‍රාහ්‌මණිංයෙව ගච්‌ඡන්‌ති, නො අබ්‍රාහ්‌මණිං. එතරහි, භික්‌ඛවෙ, බ්‍රාහ්‌මණා බ්‍රාහ්‌මණිම්‌පි ගච්‌ඡන්‌ති, අබ්‍රාහ්‌මණිම්‌පි ගච්‌ඡන්‌ති. එතරහි, භික්‌ඛවෙ, සුනඛා සුනඛිංයෙව ගච්‌ඡන්‌ති, නො අසුනඛිං. අයං, භික්‌ඛවෙ, පඨමො පොරාණො බ්‍රාහ්‌මණධම්‌මො එතරහි සුනඛෙසු සන්‌දිස්‌සති, නො බ්‍රාහ්‌මණෙසු.
191. ‘‘Pañcime , bhikkhave, porāṇā brāhmaṇadhammā etarahi sunakhesu sandissanti, no brāhmaṇesu. Katame pañca? Pubbe sudaṃ 2, bhikkhave, brāhmaṇā brāhmaṇiṃyeva gacchanti, no abrāhmaṇiṃ. Etarahi, bhikkhave, brāhmaṇā brāhmaṇimpi gacchanti, abrāhmaṇimpi gacchanti. Etarahi, bhikkhave, sunakhā sunakhiṃyeva gacchanti, no asunakhiṃ. Ayaṃ, bhikkhave, paṭhamo porāṇo brāhmaṇadhammo etarahi sunakhesu sandissati, no brāhmaṇesu.
‘‘පුබ්‌බෙ සුදං, භික්‌ඛවෙ, බ්‍රාහ්‌මණා බ්‍රාහ්‌මණිං උතුනිංයෙව ගච්‌ඡන්‌ති, නො අනුතුනිං. එතරහි, භික්‌ඛවෙ, බ්‍රාහ්‌මණා බ්‍රාහ්‌මණිං උතුනිම්‌පි ගච්‌ඡන්‌ති, අනුතුනිම්‌පි ගච්‌ඡන්‌ති . එතරහි, භික්‌ඛවෙ, සුනඛා සුනඛිං උතුනිංයෙව ගච්‌ඡන්‌ති, නො අනුතුනිං. අයං, භික්‌ඛවෙ, දුතියො පොරාණො බ්‍රාහ්‌මණධම්‌මො එතරහි සුනඛෙසු සන්‌දිස්‌සති, නො බ්‍රාහ්‌මණෙසු.
‘‘Pubbe sudaṃ, bhikkhave, brāhmaṇā brāhmaṇiṃ utuniṃyeva gacchanti, no anutuniṃ. Etarahi, bhikkhave, brāhmaṇā brāhmaṇiṃ utunimpi gacchanti, anutunimpi gacchanti . Etarahi, bhikkhave, sunakhā sunakhiṃ utuniṃyeva gacchanti, no anutuniṃ. Ayaṃ, bhikkhave, dutiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘පුබ්‌බෙ සුදං, භික්‌ඛවෙ, බ්‍රාහ්‌මණා බ්‍රාහ්‌මණිං නෙව කිණන්‌ති නො වික්‌කිණන්‌ති, සම්‌පියෙනෙව සංවාසං සංබන්‌ධාය 3 සංපවත්‌තෙන්‌ති. එතරහි, භික්‌ඛවෙ, බ්‍රාහ්‌මණා බ්‍රාහ්‌මණිං කිණන්‌තිපි වික්‌කිණන්‌තිපි, සම්‌පියෙනපි සංවාසං සංබන්‌ධාය සංපවත්‌තෙන්‌ති. එතරහි, භික්‌ඛවෙ, සුනඛා සුනඛිං නෙව කිණන්‌ති නො වික්‌කිණන්‌ති, සම්‌පියෙනෙව සංවාසං සංබන්‌ධාය සංපවත්‌තෙන්‌ති. අයං, භික්‌ඛවෙ, තතියො පොරාණො බ්‍රාහ්‌මණධම්‌මො එතරහි සුනඛෙසු සන්‌දිස්‌සති, නො බ්‍රාහ්‌මණෙසු.
‘‘Pubbe sudaṃ, bhikkhave, brāhmaṇā brāhmaṇiṃ neva kiṇanti no vikkiṇanti, sampiyeneva saṃvāsaṃ saṃbandhāya 4 saṃpavattenti. Etarahi, bhikkhave, brāhmaṇā brāhmaṇiṃ kiṇantipi vikkiṇantipi, sampiyenapi saṃvāsaṃ saṃbandhāya saṃpavattenti. Etarahi, bhikkhave, sunakhā sunakhiṃ neva kiṇanti no vikkiṇanti, sampiyeneva saṃvāsaṃ saṃbandhāya saṃpavattenti. Ayaṃ, bhikkhave, tatiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘පුබ්‌බෙ සුදං, භික්‌ඛවෙ, බ්‍රාහ්‌මණා න සන්‌නිධිං කරොන්‌ති ධනස්‌සපි ධඤ්‌ඤස්‌සපි රජතස්‌සපි ජාතරූපස්‌සපි. එතරහි, භික්‌ඛවෙ, බ්‍රාහ්‌මණා සන්‌නිධිං කරොන්‌ති ධනස්‌සපි ධඤ්‌ඤස්‌සපි රජතස්‌සපි ජාතරූපස්‌සපි. එතරහි, භික්‌ඛවෙ, සුනඛා න සන්‌නිධිං කරොන්‌ති ධනස්‌සපි ධඤ්‌ඤස්‌සපි රජතස්‌සපි ජාතරූපස්‌සපි. අයං, භික්‌ඛවෙ, චතුත්‌ථො පොරාණො බ්‍රාහ්‌මණධම්‌මො එතරහි සුනඛෙසු සන්‌දිස්‌සති, නො බ්‍රාහ්‌මණෙසු.
‘‘Pubbe sudaṃ, bhikkhave, brāhmaṇā na sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, brāhmaṇā sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, sunakhā na sannidhiṃ karonti dhanassapi dhaññassapi rajatassapi jātarūpassapi. Ayaṃ, bhikkhave, catuttho porāṇo brāhmaṇadhammo etarahi sunakhesu sandissati, no brāhmaṇesu.
‘‘පුබ්‌බෙ සුදං, භික්‌ඛවෙ, බ්‍රාහ්‌මණා සායං සායමාසාය පාතො පාතරාසාය භික්‌ඛං පරියෙසන්‌ති. එතරහි, භික්‌ඛවෙ, බ්‍රාහ්‌මණා යාවදත්‌ථං උදරාවදෙහකං භුඤ්‌ජිත්‌වා අවසෙසං ආදාය පක්‌කමන්‌ති. එතරහි, භික්‌ඛවෙ, සුනඛා සායං සායමාසාය පාතො පාතරාසාය භික්‌ඛං පරියෙසන්‌ති. අයං, භික්‌ඛවෙ, පඤ්‌චමො පොරාණො බ්‍රාහ්‌මණධම්‌මො එතරහි සුනඛෙසු සන්‌දිස්‌සති, නො බ්‍රාහ්‌මණෙසු. ඉමෙ ඛො, භික්‌ඛවෙ, පඤ්‌ච පොරාණා බ්‍රාහ්‌මණධම්‌මා එතරහි සුනඛෙසු සන්‌දිස්‌සන්‌ති, නො බ්‍රාහ්‌මණෙසූ’’ති. පඨමං.
‘‘Pubbe sudaṃ, bhikkhave, brāhmaṇā sāyaṃ sāyamāsāya pāto pātarāsāya bhikkhaṃ pariyesanti. Etarahi, bhikkhave, brāhmaṇā yāvadatthaṃ udarāvadehakaṃ bhuñjitvā avasesaṃ ādāya pakkamanti. Etarahi, bhikkhave, sunakhā sāyaṃ sāyamāsāya pāto pātarāsāya bhikkhaṃ pariyesanti. Ayaṃ, bhikkhave, pañcamo porāṇo brāhmaṇadhammo etarahi sunakhesu sandissati, no brāhmaṇesu. Ime kho, bhikkhave, pañca porāṇā brāhmaṇadhammā etarahi sunakhesu sandissanti, no brāhmaṇesū’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1. සොණසුත්‌තවණ්‌ණනා • 1. Soṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. සොණසුත්‌තවණ්‌ණනා • 1. Soṇasuttavaṇṇanā
