| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. து³தியபண்ணாஸகங்
2. Dutiyapaṇṇāsakaṃ
6. மஹாவக்³கோ³
6. Mahāvaggo
1. ஸோணஸுத்தவண்ணனா
1. Soṇasuttavaṇṇanā
55. ச²ட்ட²ஸ்ஸ பட²மே நிஸீதி³ ப⁴க³வா பஞ்ஞத்தே ஆஸனேதி எத்த² கிங் தங் ஆஸனங் பட²மமேவ பஞ்ஞத்தங், உதா³ஹு ப⁴க³வந்தங் தி³ஸ்வா பஞ்ஞத்தந்தி சே? ப⁴க³வதோ த⁴ரமானகாலே பதா⁴னிகபி⁴க்கூ²னங் வத்தமேதங், யதி³த³ங் அத்தனோ வஸனட்டா²னே பு³த்³தா⁴ஸனங் பஞ்ஞபெத்வாவ நிஸீத³னந்தி த³ஸ்ஸெந்தோ ஆஹ ‘‘பதா⁴னிகபி⁴க்கூ²’’திஆதி³. பு³த்³த⁴காலே கிர யத்த² யத்த² ஏகோபி பி⁴க்கு² விஹரதி, ஸப்³ப³த்த² பு³த்³தா⁴ஸனங் பஞ்ஞத்தமேவ ஹோதி. கஸ்மா? ப⁴க³வா ஹி அத்தனோ ஸந்திகே கம்மட்டா²னங் க³ஹெத்வா பா²ஸுகட்டா²னே விஹரந்தே மனஸி கரோதி – ‘‘அஸுகோ மய்ஹங் ஸந்திகே கம்மட்டா²னங் க³ஹெத்வா க³தோ, அஸக்கி² நு கோ² விஸேஸங் நிப்³ப³த்தேதுங், நோ’’தி. அத² நங் பஸ்ஸதி கம்மட்டா²னங் விஸ்ஸஜ்ஜெத்வா அகுஸலவிதக்கங் விதக்கயமானங், ததோ ‘‘கத²ஞ்ஹி நாம மாதி³ஸஸ்ஸ ஸத்து² ஸந்திகே கம்மட்டா²னங் க³ஹெத்வா விஹரந்தங் இமங் குலபுத்தங் அகுஸலவிதக்கா அதி⁴ப⁴வித்வா அனமதக்³கே³ வட்டது³க்கே² ஸங்ஸாரெஸ்ஸந்தீ’’தி தஸ்ஸ அனுக்³க³ஹத்த²ங் தத்தே²வ அத்தானங் த³ஸ்ஸெத்வா தங் குலபுத்தங் ஓவதி³த்வா ஆகாஸங் உப்பதித்வா புன அத்தனோ வஸனட்டா²னமேவ க³ச்ச²தி. அதே²வங் ஓவதி³யமானா தே பி⁴க்கூ² சிந்தயிங்ஸு ‘‘ஸத்தா² அம்ஹாகங் மனங் ஜானித்வா ஆக³ந்த்வா அம்ஹாகங் ஸமீபே டி²தங்யேவ அத்தானங் த³ஸ்ஸேதி. தஸ்மிங் க²ணே, ‘ப⁴ந்தே, இத⁴ நிஸீத³த² நிஸீத³தா²’தி ஆஸனபரியேஸனங் நாம பா⁴ரோ’’தி. தே ஆஸனங் பஞ்ஞபெத்வாவ விஹரந்தி. யஸ்ஸ பீட²ங் அத்தி², ஸோ தங் பஞ்ஞபேதி. யஸ்ஸ நத்தி², ஸோ மஞ்சங் வா ப²லகங் வா பாஸாணங் வா வாலிகாபுஞ்ஜங் வா பஞ்ஞபேதி. தங் அலப⁴மானா புராணபண்ணானிபி ஸங்கட்³டி⁴த்வா தத்த² பங்ஸுகூலங் பத்த²ரித்வா ட²பெந்தி.
55. Chaṭṭhassa paṭhame nisīdi bhagavā paññatte āsaneti ettha kiṃ taṃ āsanaṃ paṭhamameva paññattaṃ, udāhu bhagavantaṃ disvā paññattanti ce? Bhagavato dharamānakāle padhānikabhikkhūnaṃ vattametaṃ, yadidaṃ attano vasanaṭṭhāne buddhāsanaṃ paññapetvāva nisīdananti dassento āha ‘‘padhānikabhikkhū’’tiādi. Buddhakāle kira yattha yattha ekopi bhikkhu viharati, sabbattha buddhāsanaṃ paññattameva hoti. Kasmā? Bhagavā hi attano santike kammaṭṭhānaṃ gahetvā phāsukaṭṭhāne viharante manasi karoti – ‘‘asuko mayhaṃ santike kammaṭṭhānaṃ gahetvā gato, asakkhi nu kho visesaṃ nibbattetuṃ, no’’ti. Atha naṃ passati kammaṭṭhānaṃ vissajjetvā akusalavitakkaṃ vitakkayamānaṃ, tato ‘‘kathañhi nāma mādisassa satthu santike kammaṭṭhānaṃ gahetvā viharantaṃ imaṃ kulaputtaṃ akusalavitakkā adhibhavitvā anamatagge vaṭṭadukkhe saṃsāressantī’’ti tassa anuggahatthaṃ tattheva attānaṃ dassetvā taṃ kulaputtaṃ ovaditvā ākāsaṃ uppatitvā puna attano vasanaṭṭhānameva gacchati. Athevaṃ ovadiyamānā te bhikkhū cintayiṃsu ‘‘satthā amhākaṃ manaṃ jānitvā āgantvā amhākaṃ samīpe ṭhitaṃyeva attānaṃ dasseti. Tasmiṃ khaṇe, ‘bhante, idha nisīdatha nisīdathā’ti āsanapariyesanaṃ nāma bhāro’’ti. Te āsanaṃ paññapetvāva viharanti. Yassa pīṭhaṃ atthi, so taṃ paññapeti. Yassa natthi, so mañcaṃ vā phalakaṃ vā pāsāṇaṃ vā vālikāpuñjaṃ vā paññapeti. Taṃ alabhamānā purāṇapaṇṇānipi saṃkaḍḍhitvā tattha paṃsukūlaṃ pattharitvā ṭhapenti.
ஸத்த ஸராதி – ச²ஜ்ஜோ, உஸபோ⁴, க³ந்தா⁴ரோ, மஜ்ஜி²மோ, பஞ்சமோ, தே⁴வதோ, நிஸாதோ³தி ஏதே ஸத்த ஸரா. தயோ கா³மாதி – ச²ஜ்ஜகா³மோ, மஜ்ஜி²மகா³மோ, ஸாதா⁴ரணகா³மோதி தயோ கா³மா, ஸமூஹாதி அத்தோ². மனுஸ்ஸலோகே வீணாவாத³னா ஏகேகஸ்ஸ ஸரஸ்ஸ வஸேன தயோ தயோ முச்ச²னாதி கத்வா ஏகவீஸதி முச்ச²னா. தே³வலோகே வீணாவாத³னா பன ஸமபஞ்ஞாஸ முச்ச²னாதி வத³ந்தி. தத்த² ஹி ஏகேகஸ்ஸ ஸரஸ்ஸ வஸேன ஸத்த ஸத்த முச்ச²னா, அந்தரஸ்ஸ ஸரஸ்ஸ ச ஏகாதி ஸமபஞ்ஞாஸ முச்ச²னா. தேனேவ ஸக்கபஞ்ஹஸுத்தஸங்வண்ணனாயங் (தீ³॰ நி॰ அட்ட²॰ 2.345) ‘‘ஸமபஞ்ஞாஸ முச்ச²னா முச்செ²த்வா’’தி பஞ்சஸிக²ஸ்ஸ வீணாவாத³னங் த³ஸ்ஸெந்தேன வுத்தங். டா²னா ஏகூனபஞ்ஞாஸாதி ஏகேகஸ்ஸேவ ஸரஸ்ஸ ஸத்த ஸத்த டா²னபே⁴தா³, யதோ ஸரஸ்ஸ மண்ட³லதாவவத்தா²னங் ஹோதி. ஏகூனபஞ்ஞாஸட்டா²னவிஸேஸோ திஸ்ஸோ து³வே சதஸ்ஸோ சதஸ்ஸோ திஸ்ஸோ து³வே சதஸ்ஸோதி த்³வாவீஸதி ஸுதிபே⁴தா³ ச இச்சி²தா.
Satta sarāti – chajjo, usabho, gandhāro, majjhimo, pañcamo, dhevato, nisādoti ete satta sarā. Tayo gāmāti – chajjagāmo, majjhimagāmo, sādhāraṇagāmoti tayo gāmā, samūhāti attho. Manussaloke vīṇāvādanā ekekassa sarassa vasena tayo tayo mucchanāti katvā ekavīsati mucchanā. Devaloke vīṇāvādanā pana samapaññāsa mucchanāti vadanti. Tattha hi ekekassa sarassa vasena satta satta mucchanā, antarassa sarassa ca ekāti samapaññāsa mucchanā. Teneva sakkapañhasuttasaṃvaṇṇanāyaṃ (dī. ni. aṭṭha. 2.345) ‘‘samapaññāsa mucchanā mucchetvā’’ti pañcasikhassa vīṇāvādanaṃ dassentena vuttaṃ. Ṭhānā ekūnapaññāsāti ekekasseva sarassa satta satta ṭhānabhedā, yato sarassa maṇḍalatāvavatthānaṃ hoti. Ekūnapaññāsaṭṭhānaviseso tisso duve catasso catasso tisso duve catassoti dvāvīsati sutibhedā ca icchitā.
அதிகா³ள்ஹங் ஆரத்³த⁴ந்தி தி²னமித்³த⁴ச²ம்பி⁴தத்தானங் வூபஸமத்த²ங் அதிவிய ஆரத்³த⁴ங். ஸப்³ப³த்த² நியுத்தா ஸப்³ப³த்தி²கா. ஸப்³பே³ன வா லீனுத்³த⁴ச்சபக்கி²யேன அத்தே²தப்³பா³ ஸப்³ப³த்தி²கா. ஸமதோ²யேவ ஸமத²னிமித்தங். ஏவங் ஸேஸேஸுபி. க²யா ராக³ஸ்ஸ வீதராக³த்தாதி எத்த² யஸ்மா பா³ஹிரகோ காமேஸு வீதராகோ³ ந க²யா ராக³ஸ்ஸ வீதராகோ³ ஸப்³ப³ஸோ அவிப்பஹீனராக³த்தா. விக்க²ம்பி⁴தராகோ³ ஹி ஸோ. அரஹா பன க²யா ஏவ, தஸ்மா வுத்தங் ‘‘க²யா ராக³ஸ்ஸ வீதராக³த்தா’’தி. ஏஸ நயோ தோ³ஸமோஹேஸுபி.
Atigāḷhaṃ āraddhanti thinamiddhachambhitattānaṃ vūpasamatthaṃ ativiya āraddhaṃ. Sabbattha niyuttā sabbatthikā. Sabbena vā līnuddhaccapakkhiyena atthetabbā sabbatthikā. Samathoyeva samathanimittaṃ. Evaṃ sesesupi. Khayā rāgassa vītarāgattāti ettha yasmā bāhirako kāmesu vītarāgo na khayā rāgassa vītarāgo sabbaso avippahīnarāgattā. Vikkhambhitarāgo hi so. Arahā pana khayā eva, tasmā vuttaṃ ‘‘khayā rāgassa vītarāgattā’’ti. Esa nayo dosamohesupi.
லாப⁴ஸக்காரஸிலோகங் நிகாமயமானோதி எத்த² லப்³ப⁴தி பாபுணீயதீதி லாபோ⁴, சதுன்னங் பச்சயானமேதங் அதி⁴வசனங். ஸக்கச்சங் காதப்³போ³தி ஸக்காரோ. பச்சயா ஏவ ஹி பணீதபணீதா ஸுந்த³ரஸுந்த³ரா அபி⁴ஸங்க²ரித்வா கதா ‘‘ஸக்காரோ’’தி வுச்சதி, யா ச பரேஹி அத்தனோ கா³ரவகிரியா, புப்பா²தீ³ஹி வா பூஜா. ஸிலோகோதி வண்ணப⁴ணனங். தங் லாப⁴ஞ்ச, ஸக்காரஞ்ச, ஸிலோகஞ்ச, நிகாமயமானோ, பவத்தயமானோதி அத்தோ². தேனேவாஹ ‘‘சதுபச்சயலாப⁴ஞ்ச…பே॰… பத்த²யமானோ’’தி.
Lābhasakkārasilokaṃ nikāmayamānoti ettha labbhati pāpuṇīyatīti lābho, catunnaṃ paccayānametaṃ adhivacanaṃ. Sakkaccaṃ kātabboti sakkāro. Paccayā eva hi paṇītapaṇītā sundarasundarā abhisaṅkharitvā katā ‘‘sakkāro’’ti vuccati, yā ca parehi attano gāravakiriyā, pupphādīhi vā pūjā. Silokoti vaṇṇabhaṇanaṃ. Taṃ lābhañca, sakkārañca, silokañca, nikāmayamāno, pavattayamānoti attho. Tenevāha ‘‘catupaccayalābhañca…pe… patthayamāno’’ti.
தூ²ணந்தி பஸூனங் ப³ந்த⁴னத்தா²ய நிகா²தத்த²ம்ப⁴ஸங்கா²தங் தூ²ணங். ஸேஸங் ஸுவிஞ்ஞெய்யமேவ.
Thūṇanti pasūnaṃ bandhanatthāya nikhātatthambhasaṅkhātaṃ thūṇaṃ. Sesaṃ suviññeyyameva.
ஸோணஸுத்தவண்ணனா நிட்டி²தா.
Soṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸோணஸுத்தங் • 1. Soṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸோணஸுத்தவண்ணனா • 1. Soṇasuttavaṇṇanā
