| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. सोपाकत्थेरअपदानं
9. Sopākattheraapadānaṃ
११२.
112.
सिद्धत्थो नाम भगवा, आगच्छि मम सन्तिकं॥
Siddhattho nāma bhagavā, āgacchi mama santikaṃ.
११३.
113.
‘‘बुद्धं उपगतं दिस्वा, लोकजेट्ठस्स तादिनो।
‘‘Buddhaṃ upagataṃ disvā, lokajeṭṭhassa tādino;
११४.
114.
‘‘पुप्फासने निसीदित्वा, सिद्धत्थो लोकनायको।
‘‘Pupphāsane nisīditvā, siddhattho lokanāyako;
ममञ्च गतिमञ्ञाय, अनिच्चतमुदाहरि॥
Mamañca gatimaññāya, aniccatamudāhari.
११५.
115.
‘‘‘अनिच्चा वत सङ्खारा, उप्पादवयधम्मिनो।
‘‘‘Aniccā vata saṅkhārā, uppādavayadhammino;
उप्पज्जित्वा निरुज्झन्ति, तेसं वूपसमो सुखो’॥
Uppajjitvā nirujjhanti, tesaṃ vūpasamo sukho’.
११६.
116.
‘‘इदं वत्वान सब्बञ्ञू, लोकजेट्ठो नरासभो।
‘‘Idaṃ vatvāna sabbaññū, lokajeṭṭho narāsabho;
नभं अब्भुग्गमि वीरो, हंसराजाव अम्बरे॥
Nabhaṃ abbhuggami vīro, haṃsarājāva ambare.
११७.
117.
‘‘सकं दिट्ठिं जहित्वान, भावयानिच्चसञ्ञहं।
‘‘Sakaṃ diṭṭhiṃ jahitvāna, bhāvayāniccasaññahaṃ;
एकाहं भावयित्वान, तत्थ कालं कतो अहं॥
Ekāhaṃ bhāvayitvāna, tattha kālaṃ kato ahaṃ.
११८.
118.
‘‘द्वे सम्पत्ती अनुभोत्वा, सुक्कमूलेन चोदितो।
‘‘Dve sampattī anubhotvā, sukkamūlena codito;
पच्छिमे भवे सम्पत्ते, सपाकयोनुपागमिं॥
Pacchime bhave sampatte, sapākayonupāgamiṃ.
११९.
119.
‘‘अगारा अभिनिक्खम्म, पब्बजिं अनगारियं।
‘‘Agārā abhinikkhamma, pabbajiṃ anagāriyaṃ;
जातिया सत्तवस्सोहं, अरहत्तमपापुणिं॥
Jātiyā sattavassohaṃ, arahattamapāpuṇiṃ.
१२०.
120.
‘‘आरद्धवीरियो पहितत्तो, सीलेसु सुसमाहितो।
‘‘Āraddhavīriyo pahitatto, sīlesu susamāhito;
तोसेत्वान महानागं, अलत्थं उपसम्पदं॥
Tosetvāna mahānāgaṃ, alatthaṃ upasampadaṃ.
१२१.
121.
‘‘चतुन्नवुतितो कप्पे, यं कम्ममकरिं तदा।
‘‘Catunnavutito kappe, yaṃ kammamakariṃ tadā;
दुग्गतिं नाभिजानामि, पुप्फदानस्सिदं फलं॥
Duggatiṃ nābhijānāmi, pupphadānassidaṃ phalaṃ.
१२२.
122.
‘‘चतुन्नवुतितो कप्पे, यं सञ्ञं भावयिं तदा।
‘‘Catunnavutito kappe, yaṃ saññaṃ bhāvayiṃ tadā;
तं सञ्ञं भावयन्तस्स, पत्तो मे आसवक्खयो॥
Taṃ saññaṃ bhāvayantassa, patto me āsavakkhayo.
१२३.
123.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा सोपाको थेरो इमा गाथायो अभासित्थाति।
Itthaṃ sudaṃ āyasmā sopāko thero imā gāthāyo abhāsitthāti.
सोपाकत्थेरस्सापदानं नवमं।
Sopākattherassāpadānaṃ navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ९. सोपाकत्थेरअपदानवण्णना • 9. Sopākattheraapadānavaṇṇanā
