| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. ஸோபாகத்தே²ரஅபதா³னவண்ணனா
9. Sopākattheraapadānavaṇṇanā
பப்³பா⁴ரங் ஸோத⁴யந்தஸ்ஸாதிஆதி³கங் ஆயஸ்மதோ ஸோபாகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே அஞ்ஞதரஸ்ஸ குடும்பி³கஸ்ஸ புத்தோ ஹுத்வா நிப்³ப³த்தி. ஏகதி³வஸங் ஸத்தா²ரங் தி³ஸ்வா பீ³ஜபூரப²லானி ஸத்து² உபனேஸி, பரிபு⁴ஞ்ஜி ப⁴க³வா தஸ்ஸானுகம்பங் உபாதா³ய. ஸோ பி⁴க்கு² ஸத்த²ரி ஸங்கே⁴ ச அபி⁴ப்பஸன்னோ ஸலாகப⁴த்தங் பட்ட²பெத்வா ஸங்கு⁴த்³தே³ஸவஸேன திண்ணங் பி⁴க்கூ²னங் யாவதாயுகங் கீ²ரப⁴த்தங் அதா³ஸி. ஸோ தேஹி புஞ்ஞேஹி அபராபரங் தே³வமனுஸ்ஸேஸு ஸம்பத்தியோ அனுப⁴வந்தோ ஏகதா³ மனுஸ்ஸயோனியங் நிப்³ப³த்தோ ஏகஸ்ஸ பச்சேகபு³த்³த⁴ஸ்ஸ கீ²ரப⁴த்தங் அதா³ஸி.
Pabbhāraṃ sodhayantassātiādikaṃ āyasmato sopākattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle aññatarassa kuṭumbikassa putto hutvā nibbatti. Ekadivasaṃ satthāraṃ disvā bījapūraphalāni satthu upanesi, paribhuñji bhagavā tassānukampaṃ upādāya. So bhikkhu satthari saṅghe ca abhippasanno salākabhattaṃ paṭṭhapetvā saṅghuddesavasena tiṇṇaṃ bhikkhūnaṃ yāvatāyukaṃ khīrabhattaṃ adāsi. So tehi puññehi aparāparaṃ devamanussesu sampattiyo anubhavanto ekadā manussayoniyaṃ nibbatto ekassa paccekabuddhassa khīrabhattaṃ adāsi.
ஏவங் தத்த² தத்த² புஞ்ஞானி கத்வா ஸுக³தீஸுயேவ பரிப்³ப⁴மந்தோ இமஸ்மிங் பு³த்³து⁴ப்பாதே³ புரிமகம்மனிஸ்ஸந்தே³ன ஸாவத்தி²யங் அஞ்ஞதராய து³க்³க³தித்தி²யா குச்சி²ம்ஹி படிஸந்தி⁴ங் க³ண்ஹி. ஸா தங் த³ஸமாஸே குச்சி²னா பரிஹரித்வா பரிபக்கே க³ப்³பே⁴ விஜாயனகாலே விஜாயிதுங் அஸக்கொந்தீ முச்ச²ங் ஆபஜ்ஜித்வா ப³ஹுவேலங் மதா விய நிபஜ்ஜி. ஞாதகா ‘‘மதா’’தி ஸஞ்ஞாய ஸுஸானங் நெத்வா சிதகங் ஆரோபெத்வா தே³வதானுபா⁴வேன வாதவுட்டி²யா உட்டி²தாய அக்³கி³ங் அத³த்வா பக்கமிங்ஸு. தா³ரகோ பச்சி²மப⁴விகத்தா தே³வதானுபா⁴வேனேவ அரோகோ³ ஹுத்வா மாதுகுச்சி²தோ நிக்க²மி. மாதா பன காலமகாஸி. தே³வதா மனுஸ்ஸரூபேனுபக³ம்ம தங் க³ஹெத்வா ஸுஸானகோ³பகஸ்ஸ கே³ஹே ட²பெத்வா கதிபாஹங் காலங் பதிரூபேன ஆஹாரேன போஸேஸி. ததோ பரங் ஸுஸானகோ³பகோ அத்தனோ புத்தங் கத்வா வட்³டே⁴ஸி. ஸோ ததா² வட்³டெ⁴ந்தோ தஸ்ஸ புத்தேன ஸுப்பியேன நாம தா³ரகேன ஸத்³தி⁴ங் கீளந்தோ விசரி. தஸ்ஸ ஸுஸானே ஜாதஸங்வட்³ட⁴பா⁴வதோ ஸோபாகோதி ஸமஞ்ஞா அஹோஸி.
Evaṃ tattha tattha puññāni katvā sugatīsuyeva paribbhamanto imasmiṃ buddhuppāde purimakammanissandena sāvatthiyaṃ aññatarāya duggatitthiyā kucchimhi paṭisandhiṃ gaṇhi. Sā taṃ dasamāse kucchinā pariharitvā paripakke gabbhe vijāyanakāle vijāyituṃ asakkontī mucchaṃ āpajjitvā bahuvelaṃ matā viya nipajji. Ñātakā ‘‘matā’’ti saññāya susānaṃ netvā citakaṃ āropetvā devatānubhāvena vātavuṭṭhiyā uṭṭhitāya aggiṃ adatvā pakkamiṃsu. Dārako pacchimabhavikattā devatānubhāveneva arogo hutvā mātukucchito nikkhami. Mātā pana kālamakāsi. Devatā manussarūpenupagamma taṃ gahetvā susānagopakassa gehe ṭhapetvā katipāhaṃ kālaṃ patirūpena āhārena posesi. Tato paraṃ susānagopako attano puttaṃ katvā vaḍḍhesi. So tathā vaḍḍhento tassa puttena suppiyena nāma dārakena saddhiṃ kīḷanto vicari. Tassa susāne jātasaṃvaḍḍhabhāvato sopākoti samaññā ahosi.
அதே²கதி³வஸங் ஸத்தவஸ்ஸிகங் தங் ப⁴க³வா பச்சூஸவேலாயங் ஞாணஜாலங் பத்த²ரித்வா வேனெய்யப³ந்த⁴வே ஓலோகெந்தோ ஞாணஜாலஸ்ஸ அந்தோக³தங் தி³ஸ்வா ஸுஸானட்டா²னங் அக³மாஸி. தா³ரகோ புப்³ப³ஹேதுனா சோதி³யமானோ பஸன்னமானஸோ ஸத்தா²ரங் உபஸங்கமித்வா வந்தி³த்வா அட்டா²ஸி. ஸத்தா² தஸ்ஸ த⁴ம்மங் கதே²ஸி. ஸோ த⁴ம்மங் ஸுத்வா பப்³ப³ஜ்ஜங் யாசித்வா பிதரா ‘‘அனுஞ்ஞாதோஸீ’’தி வுத்தோ பிதரங் ஸத்து² ஸந்திகங் ஆனேஸி. தஸ்ஸ பிதா ஸத்தா²ரங் வந்தி³த்வா ‘‘இமங் தா³ரகங் பப்³பா³ஜேத², ப⁴ந்தே’’தி அனுஜானி, தங் பப்³பா³ஜெத்வா ப⁴க³வா மெத்தாபா⁴வனாய நியோஜேஸி. ஸோ மெத்தாகம்மட்டா²னங் க³ஹெத்வா ஸுஸானே விஹரந்தோ நசிரஸ்ஸேவ மெத்தாஜா²னங் பாத³கங் கத்வா விபஸ்ஸனங் வட்³டெ⁴த்வா அரஹத்தங் ஸச்சா²காஸி. அரஹா ஹுத்வாபி அஞ்ஞேஸங் ஸோஸானிகபி⁴க்கூ²னங் மெத்தாபா⁴வனாவிதி⁴ங் த³ஸ்ஸெந்தோ ‘‘யதா²பி ஏகபுத்தஸ்மி’’ந்தி (தே²ரகா³॰ 33) கா³த²ங் அபா⁴ஸி. இத³ங் வுத்தங் ஹோதி – யதா² ஏகபுத்தகே பியே மனாபே மாதா பிதா ச குஸலீ ஏகந்தஹிதேஸீ ப⁴வெய்ய, ஏவங் புரத்தி²மாதி³பே⁴தா³ஸு ஸப்³பா³ஸு தி³ஸாஸு காமப⁴வாதி³பே⁴தே³ஸு வா ஸப்³பே³ஸு ப⁴வேஸு த³ஹராதி³பே⁴தா³ஸு ஸப்³பா³ஸு அவத்தா²ஸுபி டி²தேஸு ஸப்³பே³ஸு ஸத்தேஸு ஏகந்தஹிதேஸிதாய குஸலீ ப⁴வெய்ய ‘‘மித்தோ, உதா³ஸினோ, பச்சத்தி²கோ’’தி ஸீமங் அகத்வா ஸீமாய ஸம்பே⁴த³வஸேன ஸப்³ப³த்த² ஏகரஸங் மெத்தங் பா⁴வெய்யாதி இமங் பன கா³த²ங் வத்வா ‘‘ஸசே தும்ஹே ஆயஸ்மந்தோ ஏவங் மெத்தங் பா⁴வெய்யாத², யே தே ப⁴க³வதா ‘ஸுக²ங் ஸுபதீ’திஆதி³னா (அ॰ நி॰ 11.15; பரி॰ 331; மி॰ ப॰ 4.4.6) ஏகாத³ஸ மெத்தானிஸங்ஸா ச வுத்தா, ஏகங்ஸேன தேஸங் பா⁴கி³னோ ப⁴வதா²’’தி ஓவாத³ங் அதா³ஸி.
Athekadivasaṃ sattavassikaṃ taṃ bhagavā paccūsavelāyaṃ ñāṇajālaṃ pattharitvā veneyyabandhave olokento ñāṇajālassa antogataṃ disvā susānaṭṭhānaṃ agamāsi. Dārako pubbahetunā codiyamāno pasannamānaso satthāraṃ upasaṅkamitvā vanditvā aṭṭhāsi. Satthā tassa dhammaṃ kathesi. So dhammaṃ sutvā pabbajjaṃ yācitvā pitarā ‘‘anuññātosī’’ti vutto pitaraṃ satthu santikaṃ ānesi. Tassa pitā satthāraṃ vanditvā ‘‘imaṃ dārakaṃ pabbājetha, bhante’’ti anujāni, taṃ pabbājetvā bhagavā mettābhāvanāya niyojesi. So mettākammaṭṭhānaṃ gahetvā susāne viharanto nacirasseva mettājhānaṃ pādakaṃ katvā vipassanaṃ vaḍḍhetvā arahattaṃ sacchākāsi. Arahā hutvāpi aññesaṃ sosānikabhikkhūnaṃ mettābhāvanāvidhiṃ dassento ‘‘yathāpi ekaputtasmi’’nti (theragā. 33) gāthaṃ abhāsi. Idaṃ vuttaṃ hoti – yathā ekaputtake piye manāpe mātā pitā ca kusalī ekantahitesī bhaveyya, evaṃ puratthimādibhedāsu sabbāsu disāsu kāmabhavādibhedesu vā sabbesu bhavesu daharādibhedāsu sabbāsu avatthāsupi ṭhitesu sabbesu sattesu ekantahitesitāya kusalī bhaveyya ‘‘mitto, udāsino, paccatthiko’’ti sīmaṃ akatvā sīmāya sambhedavasena sabbattha ekarasaṃ mettaṃ bhāveyyāti imaṃ pana gāthaṃ vatvā ‘‘sace tumhe āyasmanto evaṃ mettaṃ bhāveyyātha, ye te bhagavatā ‘sukhaṃ supatī’tiādinā (a. ni. 11.15; pari. 331; mi. pa. 4.4.6) ekādasa mettānisaṃsā ca vuttā, ekaṃsena tesaṃ bhāgino bhavathā’’ti ovādaṃ adāsi.
112. ஏவங் ஸோ பத்தப²லாதி⁴க³மோ அத்தனோ கதபுஞ்ஞங் பச்சவெக்கி²த்வா ஸஞ்ஜாதஸோமனஸ்ஸோ புப்³ப³சரிதாபதா³னங் த³ஸ்ஸெந்தோ பப்³பா⁴ரங் ஸோத⁴யந்தஸ்ஸாதிஆதி³மாஹ. தத்த² பப்³பா⁴ரந்தி ஸிலாபப்³ப³தஸ்ஸ விவேகட்டா²னங், தங் பப்³ப³ஜிதானுரூபத்தா இட்ட²கபாகாரங் கத்வா த்³வாரகவாடங் யோஜெத்வா பி⁴க்கூ²னங் வஸனத்தா²ய அதா³ஸி, பகாரேன ப⁴ரோ பத்தே²தப்³போ³தி பப்³பா⁴ரோ, தங் ஸோத⁴யந்தஸ்ஸ மம ஸந்திகங் ஸித்³த⁴த்தோ² நாம ப⁴க³வா ஆக³ச்சி² பாபுணி.
112. Evaṃ so pattaphalādhigamo attano katapuññaṃ paccavekkhitvā sañjātasomanasso pubbacaritāpadānaṃ dassento pabbhāraṃ sodhayantassātiādimāha. Tattha pabbhāranti silāpabbatassa vivekaṭṭhānaṃ, taṃ pabbajitānurūpattā iṭṭhakapākāraṃ katvā dvārakavāṭaṃ yojetvā bhikkhūnaṃ vasanatthāya adāsi, pakārena bharo patthetabboti pabbhāro, taṃ sodhayantassa mama santikaṃ siddhattho nāma bhagavā āgacchi pāpuṇi.
113. பு³த்³த⁴ங் உபக³தங் தி³ஸ்வாதி ஏவங் மம ஸந்திகங் ஆக³தங் தி³ஸ்வா தாதி³னோ இட்டா²னிட்டே²ஸு அகம்பியஸபா⁴வத்தா தாதி³கு³ணயுத்தஸ்ஸ லோகஜெட்ட²ஸ்ஸ பு³த்³த⁴ஸ்ஸ ஸந்த²ரங் திணபண்ணாதி³ஸந்த²ரங் கட்ட²த்த²ரங் பஞ்ஞாபெத்வா நிட்டா²பெத்வா புப்பா²ஸனங் புப்ப²மயங் ஆஸனங் அஹங் அதா³ஸிங்.
113.Buddhaṃ upagataṃ disvāti evaṃ mama santikaṃ āgataṃ disvā tādino iṭṭhāniṭṭhesu akampiyasabhāvattā tādiguṇayuttassa lokajeṭṭhassa buddhassa santharaṃ tiṇapaṇṇādisantharaṃ kaṭṭhattharaṃ paññāpetvā niṭṭhāpetvā pupphāsanaṃ pupphamayaṃ āsanaṃ ahaṃ adāsiṃ.
114. புப்பா²ஸனே நிஸீதி³த்வாதி தஸ்மிங் பஞ்ஞத்தே புப்பா²ஸனே நிஸீதி³த்வா லோகனாயகோ ஸித்³த⁴த்தோ² ப⁴க³வா. மமஞ்ச க³திமஞ்ஞாயாதி மய்ஹங் க³திங் ஆயதிங் உப்பத்திட்டா²னங் அஞ்ஞாய ஜானித்வா அனிச்சதங் அனிச்சபா⁴வங் உதா³ஹரி கதே²ஸி.
114.Pupphāsanenisīditvāti tasmiṃ paññatte pupphāsane nisīditvā lokanāyako siddhattho bhagavā. Mamañca gatimaññāyāti mayhaṃ gatiṃ āyatiṃ uppattiṭṭhānaṃ aññāya jānitvā aniccataṃ aniccabhāvaṃ udāhari kathesi.
115. அனிச்சா வத ஸங்கா²ராதி வத ஏகந்தேன ஸங்கா²ரா பச்சயேஹி ஸமேச்ச ஸமாக³ந்த்வா கரீயமானா ஸப்³பே³ ஸப்பச்சயத⁴ம்மா ஹுத்வா அபா⁴வட்டே²ன அனிச்சா. உப்பாத³வயத⁴ம்மினோதி உப்பஜ்ஜித்வா வினஸ்ஸனஸபா⁴வா உப்பஜ்ஜித்வா பாதுப⁴வித்வா ஏதே ஸங்கா²ரா நிருஜ்ஜ²ந்தி வினஸ்ஸந்தீதி அத்தோ². தேஸங் வூபஸமோ ஸுகோ²தி தேஸங் ஸங்கா²ரானங் விஸேஸேன உபஸமோ ஸுகோ², தேஸங் வூபஸமகரங் நிப்³பா³னமேவ ஏகந்தஸுக²ந்தி அத்தோ².
115.Aniccā vata saṅkhārāti vata ekantena saṅkhārā paccayehi samecca samāgantvā karīyamānā sabbe sappaccayadhammā hutvā abhāvaṭṭhena aniccā. Uppādavayadhamminoti uppajjitvā vinassanasabhāvā uppajjitvā pātubhavitvā ete saṅkhārā nirujjhanti vinassantīti attho. Tesaṃ vūpasamo sukhoti tesaṃ saṅkhārānaṃ visesena upasamo sukho, tesaṃ vūpasamakaraṃ nibbānameva ekantasukhanti attho.
116. இத³ங் வத்வான ஸப்³ப³ஞ்ஞூதி ஸப்³ப³த⁴ம்மஜானநகோ ப⁴க³வா லோகானங் ஜெட்டோ² வுட்³டோ⁴ நரானங் ஆஸபோ⁴ பதா⁴னோ வீரோ இத³ங் அனிச்சபடிஸங்யுத்தங் த⁴ம்மதே³ஸனங் வத்வான கதெ²த்வா அம்ப³ரே ஆகாஸே ஹங்ஸராஜா இவ நப⁴ங் ஆகாஸங் அப்³பு⁴க்³க³மீதி ஸம்ப³ந்தோ⁴.
116.Idaṃ vatvāna sabbaññūti sabbadhammajānanako bhagavā lokānaṃ jeṭṭho vuḍḍho narānaṃ āsabho padhāno vīro idaṃ aniccapaṭisaṃyuttaṃ dhammadesanaṃ vatvāna kathetvā ambare ākāse haṃsarājā iva nabhaṃ ākāsaṃ abbhuggamīti sambandho.
117. ஸகங் தி³ட்டி²ங் அத்தனோ லத்³தி⁴ங் க²ந்திங் ருசிங் அஜ்ஜா²ஸயங் ஜஹித்வான பஹாய. பா⁴வயானிச்சஸஞ்ஞஹந்தி அனிச்சே அனிச்சந்தி பவத்தஸஞ்ஞங் அஹங் பா⁴வயிங் வட்³டே⁴ஸிங் மனஸி அகாஸிங். தத்த² காலங் கதோ அஹந்தி தத்த² திஸ்ஸங் ஜாதியங் ததோ ஜாதிதோ அஹங் காலங் கதோ மதோ.
117.Sakaṃ diṭṭhiṃ attano laddhiṃ khantiṃ ruciṃ ajjhāsayaṃ jahitvāna pahāya. Bhāvayāniccasaññahanti anicce aniccanti pavattasaññaṃ ahaṃ bhāvayiṃ vaḍḍhesiṃ manasi akāsiṃ. Tattha kālaṃ kato ahanti tattha tissaṃ jātiyaṃ tato jātito ahaṃ kālaṃ kato mato.
118. த்³வே ஸம்பத்தீ அனுபொ⁴த்வாதி மனுஸ்ஸஸம்பத்திதி³ப்³ப³ஸம்பத்திஸங்கா²தா த்³வே ஸம்பத்தியோ அனுப⁴வித்வா. ஸுக்கமூலேன சோதி³தோதி புராணகுஸலமூலேன, மூலபூ⁴தேன குஸலேன வா சோதி³தோ ஸஞ்சோதி³தோ. பச்சி²மே ப⁴வே ஸம்பத்தேதி பரியோஸானே ப⁴வே ஸம்பத்தே பாபுணிதே. ஸபாகயோனுபாக³மிந்தி ஸகங் பசிதப⁴த்தங் ஸபாகங் யோனிங் உபாக³மிங். யஸ்ஸ குலஸ்ஸ அத்தனோ பசிதப⁴த்தங் அஞ்ஞேஹி அபு⁴ஞ்ஜனீயங், தஸ்மிங் சண்டா³லகுலே நிப்³ப³த்தொஸ்மீதி அத்தோ². அத² வா ஸா வுச்சதி ஸுனகோ², ஸுனகொ²ச்சி²ட்ட²ப⁴த்தபு⁴ஞ்ஜனகசண்டா³லகுலே ஜாதோதி அத்தோ². ஸேஸங் உத்தானத்த²மேவாதி.
118.Dvesampattī anubhotvāti manussasampattidibbasampattisaṅkhātā dve sampattiyo anubhavitvā. Sukkamūlena coditoti purāṇakusalamūlena, mūlabhūtena kusalena vā codito sañcodito. Pacchime bhave sampatteti pariyosāne bhave sampatte pāpuṇite. Sapākayonupāgaminti sakaṃ pacitabhattaṃ sapākaṃ yoniṃ upāgamiṃ. Yassa kulassa attano pacitabhattaṃ aññehi abhuñjanīyaṃ, tasmiṃ caṇḍālakule nibbattosmīti attho. Atha vā sā vuccati sunakho, sunakhocchiṭṭhabhattabhuñjanakacaṇḍālakule jātoti attho. Sesaṃ uttānatthamevāti.
ஸோபாகத்தே²ரஅபதா³னவண்ணனா ஸமத்தா.
Sopākattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. ஸோபாகத்தே²ரஅபதா³னங் • 9. Sopākattheraapadānaṃ
