| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੯. ਸੋਪਾਕਤ੍ਥੇਰਅਪਦਾਨવਣ੍ਣਨਾ
9. Sopākattheraapadānavaṇṇanā
ਪਬ੍ਭਾਰਂ ਸੋਧਯਨ੍ਤਸ੍ਸਾਤਿਆਦਿਕਂ ਆਯਸ੍ਮਤੋ ਸੋਪਾਕਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗવਤੋ ਕਾਲੇ ਅਞ੍ਞਤਰਸ੍ਸ ਕੁਟੁਮ੍ਬਿਕਸ੍ਸ ਪੁਤ੍ਤੋ ਹੁਤ੍વਾ ਨਿਬ੍ਬਤ੍ਤਿ। ਏਕਦਿવਸਂ ਸਤ੍ਥਾਰਂ ਦਿਸ੍વਾ ਬੀਜਪੂਰਫਲਾਨਿ ਸਤ੍ਥੁ ਉਪਨੇਸਿ, ਪਰਿਭੁਞ੍ਜਿ ਭਗવਾ ਤਸ੍ਸਾਨੁਕਮ੍ਪਂ ਉਪਾਦਾਯ। ਸੋ ਭਿਕ੍ਖੁ ਸਤ੍ਥਰਿ ਸਙ੍ਘੇ ਚ ਅਭਿਪ੍ਪਸਨ੍ਨੋ ਸਲਾਕਭਤ੍ਤਂ ਪਟ੍ਠਪੇਤ੍વਾ ਸਙ੍ਘੁਦ੍ਦੇਸવਸੇਨ ਤਿਣ੍ਣਂ ਭਿਕ੍ਖੂਨਂ ਯਾવਤਾਯੁਕਂ ਖੀਰਭਤ੍ਤਂ ਅਦਾਸਿ। ਸੋ ਤੇਹਿ ਪੁਞ੍ਞੇਹਿ ਅਪਰਾਪਰਂ ਦੇવਮਨੁਸ੍ਸੇਸੁ ਸਮ੍ਪਤ੍ਤਿਯੋ ਅਨੁਭવਨ੍ਤੋ ਏਕਦਾ ਮਨੁਸ੍ਸਯੋਨਿਯਂ ਨਿਬ੍ਬਤ੍ਤੋ ਏਕਸ੍ਸ ਪਚ੍ਚੇਕਬੁਦ੍ਧਸ੍ਸ ਖੀਰਭਤ੍ਤਂ ਅਦਾਸਿ।
Pabbhāraṃ sodhayantassātiādikaṃ āyasmato sopākattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle aññatarassa kuṭumbikassa putto hutvā nibbatti. Ekadivasaṃ satthāraṃ disvā bījapūraphalāni satthu upanesi, paribhuñji bhagavā tassānukampaṃ upādāya. So bhikkhu satthari saṅghe ca abhippasanno salākabhattaṃ paṭṭhapetvā saṅghuddesavasena tiṇṇaṃ bhikkhūnaṃ yāvatāyukaṃ khīrabhattaṃ adāsi. So tehi puññehi aparāparaṃ devamanussesu sampattiyo anubhavanto ekadā manussayoniyaṃ nibbatto ekassa paccekabuddhassa khīrabhattaṃ adāsi.
ਏવਂ ਤਤ੍ਥ ਤਤ੍ਥ ਪੁਞ੍ਞਾਨਿ ਕਤ੍વਾ ਸੁਗਤੀਸੁਯੇવ ਪਰਿਬ੍ਭਮਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਪੁਰਿਮਕਮ੍ਮਨਿਸ੍ਸਨ੍ਦੇਨ ਸਾવਤ੍ਥਿਯਂ ਅਞ੍ਞਤਰਾਯ ਦੁਗ੍ਗਤਿਤ੍ਥਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ। ਸਾ ਤਂ ਦਸਮਾਸੇ ਕੁਚ੍ਛਿਨਾ ਪਰਿਹਰਿਤ੍વਾ ਪਰਿਪਕ੍ਕੇ ਗਬ੍ਭੇ વਿਜਾਯਨਕਾਲੇ વਿਜਾਯਿਤੁਂ ਅਸਕ੍ਕੋਨ੍ਤੀ ਮੁਚ੍ਛਂ ਆਪਜ੍ਜਿਤ੍વਾ ਬਹੁવੇਲਂ ਮਤਾ વਿਯ ਨਿਪਜ੍ਜਿ। ਞਾਤਕਾ ‘‘ਮਤਾ’’ਤਿ ਸਞ੍ਞਾਯ ਸੁਸਾਨਂ ਨੇਤ੍વਾ ਚਿਤਕਂ ਆਰੋਪੇਤ੍વਾ ਦੇવਤਾਨੁਭਾવੇਨ વਾਤવੁਟ੍ਠਿਯਾ ਉਟ੍ਠਿਤਾਯ ਅਗ੍ਗਿਂ ਅਦਤ੍વਾ ਪਕ੍ਕਮਿਂਸੁ। ਦਾਰਕੋ ਪਚ੍ਛਿਮਭવਿਕਤ੍ਤਾ ਦੇવਤਾਨੁਭਾવੇਨੇવ ਅਰੋਗੋ ਹੁਤ੍વਾ ਮਾਤੁਕੁਚ੍ਛਿਤੋ ਨਿਕ੍ਖਮਿ। ਮਾਤਾ ਪਨ ਕਾਲਮਕਾਸਿ। ਦੇવਤਾ ਮਨੁਸ੍ਸਰੂਪੇਨੁਪਗਮ੍ਮ ਤਂ ਗਹੇਤ੍વਾ ਸੁਸਾਨਗੋਪਕਸ੍ਸ ਗੇਹੇ ਠਪੇਤ੍વਾ ਕਤਿਪਾਹਂ ਕਾਲਂ ਪਤਿਰੂਪੇਨ ਆਹਾਰੇਨ ਪੋਸੇਸਿ। ਤਤੋ ਪਰਂ ਸੁਸਾਨਗੋਪਕੋ ਅਤ੍ਤਨੋ ਪੁਤ੍ਤਂ ਕਤ੍વਾ વਡ੍ਢੇਸਿ। ਸੋ ਤਥਾ વਡ੍ਢੇਨ੍ਤੋ ਤਸ੍ਸ ਪੁਤ੍ਤੇਨ ਸੁਪ੍ਪਿਯੇਨ ਨਾਮ ਦਾਰਕੇਨ ਸਦ੍ਧਿਂ ਕੀਲ਼ਨ੍ਤੋ વਿਚਰਿ। ਤਸ੍ਸ ਸੁਸਾਨੇ ਜਾਤਸਂવਡ੍ਢਭਾવਤੋ ਸੋਪਾਕੋਤਿ ਸਮਞ੍ਞਾ ਅਹੋਸਿ।
Evaṃ tattha tattha puññāni katvā sugatīsuyeva paribbhamanto imasmiṃ buddhuppāde purimakammanissandena sāvatthiyaṃ aññatarāya duggatitthiyā kucchimhi paṭisandhiṃ gaṇhi. Sā taṃ dasamāse kucchinā pariharitvā paripakke gabbhe vijāyanakāle vijāyituṃ asakkontī mucchaṃ āpajjitvā bahuvelaṃ matā viya nipajji. Ñātakā ‘‘matā’’ti saññāya susānaṃ netvā citakaṃ āropetvā devatānubhāvena vātavuṭṭhiyā uṭṭhitāya aggiṃ adatvā pakkamiṃsu. Dārako pacchimabhavikattā devatānubhāveneva arogo hutvā mātukucchito nikkhami. Mātā pana kālamakāsi. Devatā manussarūpenupagamma taṃ gahetvā susānagopakassa gehe ṭhapetvā katipāhaṃ kālaṃ patirūpena āhārena posesi. Tato paraṃ susānagopako attano puttaṃ katvā vaḍḍhesi. So tathā vaḍḍhento tassa puttena suppiyena nāma dārakena saddhiṃ kīḷanto vicari. Tassa susāne jātasaṃvaḍḍhabhāvato sopākoti samaññā ahosi.
ਅਥੇਕਦਿવਸਂ ਸਤ੍ਤવਸ੍ਸਿਕਂ ਤਂ ਭਗવਾ ਪਚ੍ਚੂਸવੇਲਾਯਂ ਞਾਣਜਾਲਂ ਪਤ੍ਥਰਿਤ੍વਾ વੇਨੇਯ੍ਯਬਨ੍ਧવੇ ਓਲੋਕੇਨ੍ਤੋ ਞਾਣਜਾਲਸ੍ਸ ਅਨ੍ਤੋਗਤਂ ਦਿਸ੍વਾ ਸੁਸਾਨਟ੍ਠਾਨਂ ਅਗਮਾਸਿ। ਦਾਰਕੋ ਪੁਬ੍ਬਹੇਤੁਨਾ ਚੋਦਿਯਮਾਨੋ ਪਸਨ੍ਨਮਾਨਸੋ ਸਤ੍ਥਾਰਂ ਉਪਸਙ੍ਕਮਿਤ੍વਾ વਨ੍ਦਿਤ੍વਾ ਅਟ੍ਠਾਸਿ। ਸਤ੍ਥਾ ਤਸ੍ਸ ਧਮ੍ਮਂ ਕਥੇਸਿ। ਸੋ ਧਮ੍ਮਂ ਸੁਤ੍વਾ ਪਬ੍ਬਜ੍ਜਂ ਯਾਚਿਤ੍વਾ ਪਿਤਰਾ ‘‘ਅਨੁਞ੍ਞਾਤੋਸੀ’’ਤਿ વੁਤ੍ਤੋ ਪਿਤਰਂ ਸਤ੍ਥੁ ਸਨ੍ਤਿਕਂ ਆਨੇਸਿ। ਤਸ੍ਸ ਪਿਤਾ ਸਤ੍ਥਾਰਂ વਨ੍ਦਿਤ੍વਾ ‘‘ਇਮਂ ਦਾਰਕਂ ਪਬ੍ਬਾਜੇਥ, ਭਨ੍ਤੇ’’ਤਿ ਅਨੁਜਾਨਿ, ਤਂ ਪਬ੍ਬਾਜੇਤ੍વਾ ਭਗવਾ ਮੇਤ੍ਤਾਭਾવਨਾਯ ਨਿਯੋਜੇਸਿ। ਸੋ ਮੇਤ੍ਤਾਕਮ੍ਮਟ੍ਠਾਨਂ ਗਹੇਤ੍વਾ ਸੁਸਾਨੇ વਿਹਰਨ੍ਤੋ ਨਚਿਰਸ੍ਸੇવ ਮੇਤ੍ਤਾਝਾਨਂ ਪਾਦਕਂ ਕਤ੍વਾ વਿਪਸ੍ਸਨਂ વਡ੍ਢੇਤ੍વਾ ਅਰਹਤ੍ਤਂ ਸਚ੍ਛਾਕਾਸਿ। ਅਰਹਾ ਹੁਤ੍વਾਪਿ ਅਞ੍ਞੇਸਂ ਸੋਸਾਨਿਕਭਿਕ੍ਖੂਨਂ ਮੇਤ੍ਤਾਭਾવਨਾવਿਧਿਂ ਦਸ੍ਸੇਨ੍ਤੋ ‘‘ਯਥਾਪਿ ਏਕਪੁਤ੍ਤਸ੍ਮਿ’’ਨ੍ਤਿ (ਥੇਰਗਾ॰ ੩੩) ਗਾਥਂ ਅਭਾਸਿ। ਇਦਂ વੁਤ੍ਤਂ ਹੋਤਿ – ਯਥਾ ਏਕਪੁਤ੍ਤਕੇ ਪਿਯੇ ਮਨਾਪੇ ਮਾਤਾ ਪਿਤਾ ਚ ਕੁਸਲੀ ਏਕਨ੍ਤਹਿਤੇਸੀ ਭવੇਯ੍ਯ, ਏવਂ ਪੁਰਤ੍ਥਿਮਾਦਿਭੇਦਾਸੁ ਸਬ੍ਬਾਸੁ ਦਿਸਾਸੁ ਕਾਮਭવਾਦਿਭੇਦੇਸੁ વਾ ਸਬ੍ਬੇਸੁ ਭવੇਸੁ ਦਹਰਾਦਿਭੇਦਾਸੁ ਸਬ੍ਬਾਸੁ ਅવਤ੍ਥਾਸੁਪਿ ਠਿਤੇਸੁ ਸਬ੍ਬੇਸੁ ਸਤ੍ਤੇਸੁ ਏਕਨ੍ਤਹਿਤੇਸਿਤਾਯ ਕੁਸਲੀ ਭવੇਯ੍ਯ ‘‘ਮਿਤ੍ਤੋ, ਉਦਾਸਿਨੋ, ਪਚ੍ਚਤ੍ਥਿਕੋ’’ਤਿ ਸੀਮਂ ਅਕਤ੍વਾ ਸੀਮਾਯ ਸਮ੍ਭੇਦવਸੇਨ ਸਬ੍ਬਤ੍ਥ ਏਕਰਸਂ ਮੇਤ੍ਤਂ ਭਾવੇਯ੍ਯਾਤਿ ਇਮਂ ਪਨ ਗਾਥਂ વਤ੍વਾ ‘‘ਸਚੇ ਤੁਮ੍ਹੇ ਆਯਸ੍ਮਨ੍ਤੋ ਏવਂ ਮੇਤ੍ਤਂ ਭਾવੇਯ੍ਯਾਥ, ਯੇ ਤੇ ਭਗવਤਾ ‘ਸੁਖਂ ਸੁਪਤੀ’ਤਿਆਦਿਨਾ (ਅ॰ ਨਿ॰ ੧੧.੧੫; ਪਰਿ॰ ੩੩੧; ਮਿ॰ ਪ॰ ੪.੪.੬) ਏਕਾਦਸ ਮੇਤ੍ਤਾਨਿਸਂਸਾ ਚ વੁਤ੍ਤਾ, ਏਕਂਸੇਨ ਤੇਸਂ ਭਾਗਿਨੋ ਭવਥਾ’’ਤਿ ਓવਾਦਂ ਅਦਾਸਿ।
Athekadivasaṃ sattavassikaṃ taṃ bhagavā paccūsavelāyaṃ ñāṇajālaṃ pattharitvā veneyyabandhave olokento ñāṇajālassa antogataṃ disvā susānaṭṭhānaṃ agamāsi. Dārako pubbahetunā codiyamāno pasannamānaso satthāraṃ upasaṅkamitvā vanditvā aṭṭhāsi. Satthā tassa dhammaṃ kathesi. So dhammaṃ sutvā pabbajjaṃ yācitvā pitarā ‘‘anuññātosī’’ti vutto pitaraṃ satthu santikaṃ ānesi. Tassa pitā satthāraṃ vanditvā ‘‘imaṃ dārakaṃ pabbājetha, bhante’’ti anujāni, taṃ pabbājetvā bhagavā mettābhāvanāya niyojesi. So mettākammaṭṭhānaṃ gahetvā susāne viharanto nacirasseva mettājhānaṃ pādakaṃ katvā vipassanaṃ vaḍḍhetvā arahattaṃ sacchākāsi. Arahā hutvāpi aññesaṃ sosānikabhikkhūnaṃ mettābhāvanāvidhiṃ dassento ‘‘yathāpi ekaputtasmi’’nti (theragā. 33) gāthaṃ abhāsi. Idaṃ vuttaṃ hoti – yathā ekaputtake piye manāpe mātā pitā ca kusalī ekantahitesī bhaveyya, evaṃ puratthimādibhedāsu sabbāsu disāsu kāmabhavādibhedesu vā sabbesu bhavesu daharādibhedāsu sabbāsu avatthāsupi ṭhitesu sabbesu sattesu ekantahitesitāya kusalī bhaveyya ‘‘mitto, udāsino, paccatthiko’’ti sīmaṃ akatvā sīmāya sambhedavasena sabbattha ekarasaṃ mettaṃ bhāveyyāti imaṃ pana gāthaṃ vatvā ‘‘sace tumhe āyasmanto evaṃ mettaṃ bhāveyyātha, ye te bhagavatā ‘sukhaṃ supatī’tiādinā (a. ni. 11.15; pari. 331; mi. pa. 4.4.6) ekādasa mettānisaṃsā ca vuttā, ekaṃsena tesaṃ bhāgino bhavathā’’ti ovādaṃ adāsi.
੧੧੨. ਏવਂ ਸੋ ਪਤ੍ਤਫਲਾਧਿਗਮੋ ਅਤ੍ਤਨੋ ਕਤਪੁਞ੍ਞਂ ਪਚ੍ਚવੇਕ੍ਖਿਤ੍વਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਦਸ੍ਸੇਨ੍ਤੋ ਪਬ੍ਭਾਰਂ ਸੋਧਯਨ੍ਤਸ੍ਸਾਤਿਆਦਿਮਾਹ। ਤਤ੍ਥ ਪਬ੍ਭਾਰਨ੍ਤਿ ਸਿਲਾਪਬ੍ਬਤਸ੍ਸ વਿવੇਕਟ੍ਠਾਨਂ, ਤਂ ਪਬ੍ਬਜਿਤਾਨੁਰੂਪਤ੍ਤਾ ਇਟ੍ਠਕਪਾਕਾਰਂ ਕਤ੍વਾ ਦ੍વਾਰਕવਾਟਂ ਯੋਜੇਤ੍વਾ ਭਿਕ੍ਖੂਨਂ વਸਨਤ੍ਥਾਯ ਅਦਾਸਿ, ਪਕਾਰੇਨ ਭਰੋ ਪਤ੍ਥੇਤਬ੍ਬੋਤਿ ਪਬ੍ਭਾਰੋ, ਤਂ ਸੋਧਯਨ੍ਤਸ੍ਸ ਮਮ ਸਨ੍ਤਿਕਂ ਸਿਦ੍ਧਤ੍ਥੋ ਨਾਮ ਭਗવਾ ਆਗਚ੍ਛਿ ਪਾਪੁਣਿ।
112. Evaṃ so pattaphalādhigamo attano katapuññaṃ paccavekkhitvā sañjātasomanasso pubbacaritāpadānaṃ dassento pabbhāraṃ sodhayantassātiādimāha. Tattha pabbhāranti silāpabbatassa vivekaṭṭhānaṃ, taṃ pabbajitānurūpattā iṭṭhakapākāraṃ katvā dvārakavāṭaṃ yojetvā bhikkhūnaṃ vasanatthāya adāsi, pakārena bharo patthetabboti pabbhāro, taṃ sodhayantassa mama santikaṃ siddhattho nāma bhagavā āgacchi pāpuṇi.
੧੧੩. ਬੁਦ੍ਧਂ ਉਪਗਤਂ ਦਿਸ੍વਾਤਿ ਏવਂ ਮਮ ਸਨ੍ਤਿਕਂ ਆਗਤਂ ਦਿਸ੍વਾ ਤਾਦਿਨੋ ਇਟ੍ਠਾਨਿਟ੍ਠੇਸੁ ਅਕਮ੍ਪਿਯਸਭਾવਤ੍ਤਾ ਤਾਦਿਗੁਣਯੁਤ੍ਤਸ੍ਸ ਲੋਕਜੇਟ੍ਠਸ੍ਸ ਬੁਦ੍ਧਸ੍ਸ ਸਨ੍ਥਰਂ ਤਿਣਪਣ੍ਣਾਦਿਸਨ੍ਥਰਂ ਕਟ੍ਠਤ੍ਥਰਂ ਪਞ੍ਞਾਪੇਤ੍વਾ ਨਿਟ੍ਠਾਪੇਤ੍વਾ ਪੁਪ੍ਫਾਸਨਂ ਪੁਪ੍ਫਮਯਂ ਆਸਨਂ ਅਹਂ ਅਦਾਸਿਂ।
113.Buddhaṃ upagataṃ disvāti evaṃ mama santikaṃ āgataṃ disvā tādino iṭṭhāniṭṭhesu akampiyasabhāvattā tādiguṇayuttassa lokajeṭṭhassa buddhassa santharaṃ tiṇapaṇṇādisantharaṃ kaṭṭhattharaṃ paññāpetvā niṭṭhāpetvā pupphāsanaṃ pupphamayaṃ āsanaṃ ahaṃ adāsiṃ.
੧੧੪. ਪੁਪ੍ਫਾਸਨੇ ਨਿਸੀਦਿਤ੍વਾਤਿ ਤਸ੍ਮਿਂ ਪਞ੍ਞਤ੍ਤੇ ਪੁਪ੍ਫਾਸਨੇ ਨਿਸੀਦਿਤ੍વਾ ਲੋਕਨਾਯਕੋ ਸਿਦ੍ਧਤ੍ਥੋ ਭਗવਾ। ਮਮਞ੍ਚ ਗਤਿਮਞ੍ਞਾਯਾਤਿ ਮਯ੍ਹਂ ਗਤਿਂ ਆਯਤਿਂ ਉਪ੍ਪਤ੍ਤਿਟ੍ਠਾਨਂ ਅਞ੍ਞਾਯ ਜਾਨਿਤ੍વਾ ਅਨਿਚ੍ਚਤਂ ਅਨਿਚ੍ਚਭਾવਂ ਉਦਾਹਰਿ ਕਥੇਸਿ।
114.Pupphāsanenisīditvāti tasmiṃ paññatte pupphāsane nisīditvā lokanāyako siddhattho bhagavā. Mamañca gatimaññāyāti mayhaṃ gatiṃ āyatiṃ uppattiṭṭhānaṃ aññāya jānitvā aniccataṃ aniccabhāvaṃ udāhari kathesi.
੧੧੫. ਅਨਿਚ੍ਚਾ વਤ ਸਙ੍ਖਾਰਾਤਿ વਤ ਏਕਨ੍ਤੇਨ ਸਙ੍ਖਾਰਾ ਪਚ੍ਚਯੇਹਿ ਸਮੇਚ੍ਚ ਸਮਾਗਨ੍ਤ੍વਾ ਕਰੀਯਮਾਨਾ ਸਬ੍ਬੇ ਸਪ੍ਪਚ੍ਚਯਧਮ੍ਮਾ ਹੁਤ੍વਾ ਅਭਾવਟ੍ਠੇਨ ਅਨਿਚ੍ਚਾ। ਉਪ੍ਪਾਦવਯਧਮ੍ਮਿਨੋਤਿ ਉਪ੍ਪਜ੍ਜਿਤ੍વਾ વਿਨਸ੍ਸਨਸਭਾવਾ ਉਪ੍ਪਜ੍ਜਿਤ੍વਾ ਪਾਤੁਭવਿਤ੍વਾ ਏਤੇ ਸਙ੍ਖਾਰਾ ਨਿਰੁਜ੍ਝਨ੍ਤਿ વਿਨਸ੍ਸਨ੍ਤੀਤਿ ਅਤ੍ਥੋ। ਤੇਸਂ વੂਪਸਮੋ ਸੁਖੋਤਿ ਤੇਸਂ ਸਙ੍ਖਾਰਾਨਂ વਿਸੇਸੇਨ ਉਪਸਮੋ ਸੁਖੋ, ਤੇਸਂ વੂਪਸਮਕਰਂ ਨਿਬ੍ਬਾਨਮੇવ ਏਕਨ੍ਤਸੁਖਨ੍ਤਿ ਅਤ੍ਥੋ।
115.Aniccā vata saṅkhārāti vata ekantena saṅkhārā paccayehi samecca samāgantvā karīyamānā sabbe sappaccayadhammā hutvā abhāvaṭṭhena aniccā. Uppādavayadhamminoti uppajjitvā vinassanasabhāvā uppajjitvā pātubhavitvā ete saṅkhārā nirujjhanti vinassantīti attho. Tesaṃ vūpasamo sukhoti tesaṃ saṅkhārānaṃ visesena upasamo sukho, tesaṃ vūpasamakaraṃ nibbānameva ekantasukhanti attho.
੧੧੬. ਇਦਂ વਤ੍વਾਨ ਸਬ੍ਬਞ੍ਞੂਤਿ ਸਬ੍ਬਧਮ੍ਮਜਾਨਨਕੋ ਭਗવਾ ਲੋਕਾਨਂ ਜੇਟ੍ਠੋ વੁਡ੍ਢੋ ਨਰਾਨਂ ਆਸਭੋ ਪਧਾਨੋ વੀਰੋ ਇਦਂ ਅਨਿਚ੍ਚਪਟਿਸਂਯੁਤ੍ਤਂ ਧਮ੍ਮਦੇਸਨਂ વਤ੍વਾਨ ਕਥੇਤ੍વਾ ਅਮ੍ਬਰੇ ਆਕਾਸੇ ਹਂਸਰਾਜਾ ਇવ ਨਭਂ ਆਕਾਸਂ ਅਬ੍ਭੁਗ੍ਗਮੀਤਿ ਸਮ੍ਬਨ੍ਧੋ।
116.Idaṃ vatvāna sabbaññūti sabbadhammajānanako bhagavā lokānaṃ jeṭṭho vuḍḍho narānaṃ āsabho padhāno vīro idaṃ aniccapaṭisaṃyuttaṃ dhammadesanaṃ vatvāna kathetvā ambare ākāse haṃsarājā iva nabhaṃ ākāsaṃ abbhuggamīti sambandho.
੧੧੭. ਸਕਂ ਦਿਟ੍ਠਿਂ ਅਤ੍ਤਨੋ ਲਦ੍ਧਿਂ ਖਨ੍ਤਿਂ ਰੁਚਿਂ ਅਜ੍ਝਾਸਯਂ ਜਹਿਤ੍વਾਨ ਪਹਾਯ। ਭਾવਯਾਨਿਚ੍ਚਸਞ੍ਞਹਨ੍ਤਿ ਅਨਿਚ੍ਚੇ ਅਨਿਚ੍ਚਨ੍ਤਿ ਪવਤ੍ਤਸਞ੍ਞਂ ਅਹਂ ਭਾવਯਿਂ વਡ੍ਢੇਸਿਂ ਮਨਸਿ ਅਕਾਸਿਂ। ਤਤ੍ਥ ਕਾਲਂ ਕਤੋ ਅਹਨ੍ਤਿ ਤਤ੍ਥ ਤਿਸ੍ਸਂ ਜਾਤਿਯਂ ਤਤੋ ਜਾਤਿਤੋ ਅਹਂ ਕਾਲਂ ਕਤੋ ਮਤੋ।
117.Sakaṃ diṭṭhiṃ attano laddhiṃ khantiṃ ruciṃ ajjhāsayaṃ jahitvāna pahāya. Bhāvayāniccasaññahanti anicce aniccanti pavattasaññaṃ ahaṃ bhāvayiṃ vaḍḍhesiṃ manasi akāsiṃ. Tattha kālaṃ kato ahanti tattha tissaṃ jātiyaṃ tato jātito ahaṃ kālaṃ kato mato.
੧੧੮. ਦ੍વੇ ਸਮ੍ਪਤ੍ਤੀ ਅਨੁਭੋਤ੍વਾਤਿ ਮਨੁਸ੍ਸਸਮ੍ਪਤ੍ਤਿਦਿਬ੍ਬਸਮ੍ਪਤ੍ਤਿਸਙ੍ਖਾਤਾ ਦ੍વੇ ਸਮ੍ਪਤ੍ਤਿਯੋ ਅਨੁਭવਿਤ੍વਾ। ਸੁਕ੍ਕਮੂਲੇਨ ਚੋਦਿਤੋਤਿ ਪੁਰਾਣਕੁਸਲਮੂਲੇਨ, ਮੂਲਭੂਤੇਨ ਕੁਸਲੇਨ વਾ ਚੋਦਿਤੋ ਸਞ੍ਚੋਦਿਤੋ। ਪਚ੍ਛਿਮੇ ਭવੇ ਸਮ੍ਪਤ੍ਤੇਤਿ ਪਰਿਯੋਸਾਨੇ ਭવੇ ਸਮ੍ਪਤ੍ਤੇ ਪਾਪੁਣਿਤੇ। ਸਪਾਕਯੋਨੁਪਾਗਮਿਨ੍ਤਿ ਸਕਂ ਪਚਿਤਭਤ੍ਤਂ ਸਪਾਕਂ ਯੋਨਿਂ ਉਪਾਗਮਿਂ। ਯਸ੍ਸ ਕੁਲਸ੍ਸ ਅਤ੍ਤਨੋ ਪਚਿਤਭਤ੍ਤਂ ਅਞ੍ਞੇਹਿ ਅਭੁਞ੍ਜਨੀਯਂ, ਤਸ੍ਮਿਂ ਚਣ੍ਡਾਲਕੁਲੇ ਨਿਬ੍ਬਤ੍ਤੋਸ੍ਮੀਤਿ ਅਤ੍ਥੋ। ਅਥ વਾ ਸਾ વੁਚ੍ਚਤਿ ਸੁਨਖੋ, ਸੁਨਖੋਚ੍ਛਿਟ੍ਠਭਤ੍ਤਭੁਞ੍ਜਨਕਚਣ੍ਡਾਲਕੁਲੇ ਜਾਤੋਤਿ ਅਤ੍ਥੋ। ਸੇਸਂ ਉਤ੍ਤਾਨਤ੍ਥਮੇવਾਤਿ।
118.Dvesampattī anubhotvāti manussasampattidibbasampattisaṅkhātā dve sampattiyo anubhavitvā. Sukkamūlena coditoti purāṇakusalamūlena, mūlabhūtena kusalena vā codito sañcodito. Pacchime bhave sampatteti pariyosāne bhave sampatte pāpuṇite. Sapākayonupāgaminti sakaṃ pacitabhattaṃ sapākaṃ yoniṃ upāgamiṃ. Yassa kulassa attano pacitabhattaṃ aññehi abhuñjanīyaṃ, tasmiṃ caṇḍālakule nibbattosmīti attho. Atha vā sā vuccati sunakho, sunakhocchiṭṭhabhattabhuñjanakacaṇḍālakule jātoti attho. Sesaṃ uttānatthamevāti.
ਸੋਪਾਕਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Sopākattheraapadānavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੯. ਸੋਪਾਕਤ੍ਥੇਰਅਪਦਾਨਂ • 9. Sopākattheraapadānaṃ
