| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৩. সোপাকত্থেরগাথাৰণ্ণনা
3. Sopākattheragāthāvaṇṇanā
যথাপি একপুত্তস্মিন্তি আযস্মতো সোপাকত্থেরস্স গাথা। কা উপ্পত্তি? সো কির পুরিমবুদ্ধেসু কতাধিকারো হুত্ৰা তত্থ তত্থ ৰিৰট্টূপনিস্সযং কুসলং উপচিনন্তো ককুসন্ধস্স ভগৰতো কালে অঞ্ঞতরস্স কুটুম্বিকস্স পুত্তো হুত্ৰা নিব্বত্তো একদিৰসং সত্থারং দিস্ৰা পসন্নচিত্তো বীজপূরফলানি সত্থু উপনেসি। পটিগ্গহেসি ভগৰা অনুকম্পং উপাদায । সো ভিক্খুসঙ্ঘে চ অভিপ্পসন্নো সলাকভত্তং পট্ঠপেত্ৰা সঙ্ঘুদ্দেসৰসেন তিণ্ণং ভিক্খূনং যাৰতাযুকং খীরভত্তং অদাসি। সো তেহি পুঞ্ঞকম্মেহি অপরাপরং দেৰমনুস্সেসু সম্পত্তিং অনুভৰন্তো একদা মনুস্সযোনিযং নিব্বত্তো একস্স পচ্চেকবুদ্ধস্স খীরভত্তং অদাসি। এৰং তত্থ তত্থ পুঞ্ঞানি কত্ৰা সুগতীসু এৰ পরিব্ভমন্তো ইমস্মিং বুদ্ধুপ্পাদে পুরিমকম্মনিস্সন্দেন সাৰত্থিযং অঞ্ঞতরায দুগ্গতিত্থিযা কুচ্ছিম্হি পটিসন্ধিং গণ্হি। তস্স মাতা দস মাসে কুচ্ছিনা পরিহরিত্ৰা পরিপক্কে গব্ভে ৰিজাযনকালে ৰিজাযিতুং অসক্কোন্তী মুচ্ছং আপজ্জিত্ৰা বহুৰেলং মতা ৰিয নিপজ্জি। তং ঞাতকা ‘‘মতা’’তি সঞ্ঞায সুসানং নেত্ৰা চিতকং আরোপেত্ৰা দেৰতানুভাৰেন ৰাতৰুট্ঠিযা উট্ঠিতায অগ্গিং অদত্ৰা পক্কমিংসু। দারকো পচ্ছিমভাৰিকত্তা দেৰতানুভাৰেন মাতুকুচ্ছিতো অরোগো নিক্খমি। মাতা পন কালমকাসি। দেৰতা তং গহেত্ৰা মনুস্সরূপেন সুসানগোপকস্স গেহে ঠপেত্ৰা কতিপযকালং পতিরূপেন আহারেন পোসেসি। ততো পরং সুসানগোপকো চ নং অত্তনো পুত্তং কত্ৰা ৰড্ঢেতি। সো তথা ৰড্ঢেন্তো তস্স পুত্তেন সুপিযেন নাম দারকেন সদ্ধিং কীল়ন্তো ৰিচরতি। তস্স সুসানে জাতসংৰড্ঢভাৰতো সোপাকোতি সমঞ্ঞা অহোসি।
Yathāpi ekaputtasminti āyasmato sopākattherassa gāthā. Kā uppatti? So kira purimabuddhesu katādhikāro hutvā tattha tattha vivaṭṭūpanissayaṃ kusalaṃ upacinanto kakusandhassa bhagavato kāle aññatarassa kuṭumbikassa putto hutvā nibbatto ekadivasaṃ satthāraṃ disvā pasannacitto bījapūraphalāni satthu upanesi. Paṭiggahesi bhagavā anukampaṃ upādāya . So bhikkhusaṅghe ca abhippasanno salākabhattaṃ paṭṭhapetvā saṅghuddesavasena tiṇṇaṃ bhikkhūnaṃ yāvatāyukaṃ khīrabhattaṃ adāsi. So tehi puññakammehi aparāparaṃ devamanussesu sampattiṃ anubhavanto ekadā manussayoniyaṃ nibbatto ekassa paccekabuddhassa khīrabhattaṃ adāsi. Evaṃ tattha tattha puññāni katvā sugatīsu eva paribbhamanto imasmiṃ buddhuppāde purimakammanissandena sāvatthiyaṃ aññatarāya duggatitthiyā kucchimhi paṭisandhiṃ gaṇhi. Tassa mātā dasa māse kucchinā pariharitvā paripakke gabbhe vijāyanakāle vijāyituṃ asakkontī mucchaṃ āpajjitvā bahuvelaṃ matā viya nipajji. Taṃ ñātakā ‘‘matā’’ti saññāya susānaṃ netvā citakaṃ āropetvā devatānubhāvena vātavuṭṭhiyā uṭṭhitāya aggiṃ adatvā pakkamiṃsu. Dārako pacchimabhāvikattā devatānubhāvena mātukucchito arogo nikkhami. Mātā pana kālamakāsi. Devatā taṃ gahetvā manussarūpena susānagopakassa gehe ṭhapetvā katipayakālaṃ patirūpena āhārena posesi. Tato paraṃ susānagopako ca naṃ attano puttaṃ katvā vaḍḍheti. So tathā vaḍḍhento tassa puttena supiyena nāma dārakena saddhiṃ kīḷanto vicarati. Tassa susāne jātasaṃvaḍḍhabhāvato sopākoti samaññā ahosi.
অথেকদিৰসং সত্তৰস্সিকং তং ভগৰা পচ্চূসৰেলায ঞাণজালং পত্থরিত্ৰা ৰেনেয্যবন্ধৰে ওলোকেত্ৰা ঞাণজলন্তোগধং দিস্ৰা সুসানট্ঠানং অগমাসি। দারকো পুব্বহেতুনা চোদিযমানো পসন্নমানসো সত্থারং উপসঙ্কমিত্ৰা ৰন্দিত্ৰা অট্ঠাসি। সত্থা তস্স ধম্মং কথেসি। সো ধম্মং সুত্ৰা পব্বজ্জং যাচিত্ৰা ‘‘পিতরা অনুঞ্ঞাতোসী’’তি ৰুত্তো পিতরং সত্থু সন্তিকং নেসি। তস্স পিতা সত্থারং উপসঙ্কমিত্ৰা ৰন্দিত্ৰা ‘‘ভন্তে, ইমং দারকং পব্বাজেথা’’তি অনুজানি। সত্থা তং পব্বাজেত্ৰা মেত্তাভাৰনায নিযোজেসি। সো মেত্তাকম্মট্ঠানং গহেত্ৰা সুসানে ৰিহরন্তো চ চিরস্সেৰ মেত্তাঝানং নিব্বত্তেত্ৰা ঝানং পাদকং কত্ৰা ৰিপস্সনং ৰড্ঢেত্ৰা অরহত্তং সচ্ছাকাসি। তেন ৰুত্তং অপদানে (অপ॰ থের ২.৪৫.১-৭) –
Athekadivasaṃ sattavassikaṃ taṃ bhagavā paccūsavelāya ñāṇajālaṃ pattharitvā veneyyabandhave oloketvā ñāṇajalantogadhaṃ disvā susānaṭṭhānaṃ agamāsi. Dārako pubbahetunā codiyamāno pasannamānaso satthāraṃ upasaṅkamitvā vanditvā aṭṭhāsi. Satthā tassa dhammaṃ kathesi. So dhammaṃ sutvā pabbajjaṃ yācitvā ‘‘pitarā anuññātosī’’ti vutto pitaraṃ satthu santikaṃ nesi. Tassa pitā satthāraṃ upasaṅkamitvā vanditvā ‘‘bhante, imaṃ dārakaṃ pabbājethā’’ti anujāni. Satthā taṃ pabbājetvā mettābhāvanāya niyojesi. So mettākammaṭṭhānaṃ gahetvā susāne viharanto ca cirasseva mettājhānaṃ nibbattetvā jhānaṃ pādakaṃ katvā vipassanaṃ vaḍḍhetvā arahattaṃ sacchākāsi. Tena vuttaṃ apadāne (apa. thera 2.45.1-7) –
‘‘ককুসন্ধো মহাৰীরো, সব্বধম্মান পারগূ।
‘‘Kakusandho mahāvīro, sabbadhammāna pāragū;
গণম্হা ৰূপকট্ঠো সো, অগমাসি ৰনন্তরং॥
Gaṇamhā vūpakaṭṭho so, agamāsi vanantaraṃ.
‘‘বীজমিঞ্জং গহেত্ৰান, লতায আৰুণিং অহং।
‘‘Bījamiñjaṃ gahetvāna, latāya āvuṇiṃ ahaṃ;
ভগৰা তম্হি সমযে, ঝাযতে পব্বতন্তরে॥
Bhagavā tamhi samaye, jhāyate pabbatantare.
‘‘দিস্ৰানহং দেৰদেৰং, ৰিপ্পসন্নেন চেতসা।
‘‘Disvānahaṃ devadevaṃ, vippasannena cetasā;
দক্খিণেয্যস্স ৰীরস্স, বীজমিঞ্জমদাসহং॥
Dakkhiṇeyyassa vīrassa, bījamiñjamadāsahaṃ.
‘‘ইমস্মিংযেৰ কপ্পম্হি, যং মিঞ্জমদদিং তদা।
‘‘Imasmiṃyeva kappamhi, yaṃ miñjamadadiṃ tadā;
দুগ্গতিং নাভিজানামি, বীজমিঞ্জস্সিদং ফলং॥
Duggatiṃ nābhijānāmi, bījamiñjassidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহা হুত্ৰা পন অঞ্ঞেসং সোসানিকভিক্খূনং মেত্তাভাৰনাৰিধিং দস্সেন্তো ‘‘যথাপি একপুত্তস্মি’’ন্তি গাথং অভাসি।
Arahā hutvā pana aññesaṃ sosānikabhikkhūnaṃ mettābhāvanāvidhiṃ dassento ‘‘yathāpi ekaputtasmi’’nti gāthaṃ abhāsi.
৩৩. তত্থ যথাতি ওপম্মত্থে নিপাতো। একপুত্তস্মিন্তি পুনাতি চ কুলৰংসং তাযতি চাতি পুত্তো, অত্রজাদিভেদো পুত্তো। একো পুত্তো একপুত্তো, তস্মিং একপুত্তস্মিং। ৰিসযে চেতং ভুম্মৰচনং। পিযস্মিন্তি পিযাযিতব্বতায চেৰ একপুত্ততায চ রূপসীলাচারাদীহি চ পেমকরণট্ঠানভূতে। কুসলীতি কুসলং ৰুচ্চতি খেমং সোত্থিভাৰো, তং লভিতব্বং এতস্স অত্থীতি কুসলী, সত্তানং হিতেসী মেত্তজ্ঝাসযো। সব্বেসু পাণেসূতি সব্বেসু সত্তেসু। সব্বত্থাতি সব্বাসু দিসাসু সব্বেসু ৰা ভৰাদীসু, সব্বাসু ৰা অৰত্থাসু। ইদং ৰুত্তং হোতি – যথা একপুত্তকে পিযে মনাপে মাতাপিতা কুসলী একন্তহিতেসী ভৰেয্য, এৰং পুরত্থিমাদিভেদাসু সব্বাসু দিসাসু, কামভৰাদিভেদেসু সব্বেসু ভৰেসু দহরাদিভেদাসু সব্বাসু অৰত্থাসু চ ঠিতেসু সব্বেসু সত্তেসু একন্তহিতেসিতায কুসলী ভৰেয্য, ‘‘মিত্তো উদাসীনো পঞ্চত্থিকো’’তি সীমং অকত্ৰা সীমাসম্ভেদৰসেন সব্বত্থ একরসং মেত্তং ভাৰেয্যাতি। ইমং পন গাথং ৰত্ৰা ‘‘সচে তুম্হে আযস্মন্তো এৰং মেত্তাভাৰনং অনুযুঞ্জেয্যাথ, যে তে ভগৰতা ‘সুখং সুপতী’তিআদিনা (অ॰ নি॰ ১১.১৫) একাদস মেত্তানিসংসা ৰুত্তা, একংসেন তেসং ভাগিনো ভৰথা’’তি ওৰাদমদাসি।
33. Tattha yathāti opammatthe nipāto. Ekaputtasminti punāti ca kulavaṃsaṃ tāyati cāti putto, atrajādibhedo putto. Eko putto ekaputto, tasmiṃ ekaputtasmiṃ. Visaye cetaṃ bhummavacanaṃ. Piyasminti piyāyitabbatāya ceva ekaputtatāya ca rūpasīlācārādīhi ca pemakaraṇaṭṭhānabhūte. Kusalīti kusalaṃ vuccati khemaṃ sotthibhāvo, taṃ labhitabbaṃ etassa atthīti kusalī, sattānaṃ hitesī mettajjhāsayo. Sabbesu pāṇesūti sabbesu sattesu. Sabbatthāti sabbāsu disāsu sabbesu vā bhavādīsu, sabbāsu vā avatthāsu. Idaṃ vuttaṃ hoti – yathā ekaputtake piye manāpe mātāpitā kusalī ekantahitesī bhaveyya, evaṃ puratthimādibhedāsu sabbāsu disāsu, kāmabhavādibhedesu sabbesu bhavesu daharādibhedāsu sabbāsu avatthāsu ca ṭhitesu sabbesu sattesu ekantahitesitāya kusalī bhaveyya, ‘‘mitto udāsīno pañcatthiko’’ti sīmaṃ akatvā sīmāsambhedavasena sabbattha ekarasaṃ mettaṃ bhāveyyāti. Imaṃ pana gāthaṃ vatvā ‘‘sace tumhe āyasmanto evaṃ mettābhāvanaṃ anuyuñjeyyātha, ye te bhagavatā ‘sukhaṃ supatī’tiādinā (a. ni. 11.15) ekādasa mettānisaṃsā vuttā, ekaṃsena tesaṃ bhāgino bhavathā’’ti ovādamadāsi.
সোপাকত্থেরগাথাৰণ্ণনা নিট্ঠিতা।
Sopākattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৩. সোপাকত্থেরগাথা • 3. Sopākattheragāthā
