| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
51. ஸோததா⁴துவிஸுத்³தி⁴ஞாணனித்³தே³ஸோ
51. Sotadhātuvisuddhiñāṇaniddeso
103. கத²ங் விதக்கவிப்பா²ரவஸேன நானத்தேகத்தஸத்³த³னிமித்தானங் பரியோகா³ஹணே பஞ்ஞா ஸோததா⁴துவிஸுத்³தி⁴ஞாணங் ? இத⁴ பி⁴க்கு² ச²ந்த³ஸமாதி⁴…பே॰… வீரியஸமாதி⁴… சித்தஸமாதி⁴… வீமங்ஸாஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி. ஸோ இமேஸு சதூஸு இத்³தி⁴பாதே³ஸு சித்தங் பரிபா⁴வேதி பரித³மேதி, முது³ங் கரோதி கம்மனியங். ஸோ இமேஸு சதூஸு இத்³தி⁴பாதே³ஸு சித்தங் பரிபா⁴வெத்வா பரித³மெத்வா, முது³ங் கரித்வா கம்மனியங் தூ³ரேபி ஸத்³தா³னங் ஸத்³த³னிமித்தங் மனஸி கரோதி, ஸந்திகேபி ஸத்³தா³னங் ஸத்³த³னிமித்தங் மனஸி கரோதி, ஓளாரிகானம்பி ஸத்³தா³னங் ஸத்³த³னிமித்தங் மனஸி கரோதி, ஸுகு²மானம்பி ஸத்³தா³னங் ஸத்³த³னிமித்தங் மனஸி கரோதி, ஸண்ஹஸண்ஹானம்பி ஸத்³தா³னங் ஸத்³த³னிமித்தங் மனஸி கரோதி, புரத்தி²மாயபி தி³ஸாய ஸத்³தா³னங் ஸத்³த³னிமித்தங் மனஸி கரோதி, பச்சி²மாயபி தி³ஸாய ஸத்³தா³னங் ஸத்³த³னிமித்தங் மனஸி கரோதி, உத்தராயபி தி³ஸாய ஸத்³தா³னங் ஸத்³த³னிமித்தங் மனஸி கரோதி, த³க்கி²ணாயபி தி³ஸாய ஸத்³தா³னங் ஸத்³த³னிமித்தங் மனஸி கரோதி, புரத்தி²மாயபி அனுதி³ஸாய ஸத்³தா³னங் ஸத்³த³னிமித்தங் மனஸி கரோதி, பச்சி²மாயபி அனுதி³ஸாய ஸத்³தா³னங் ஸத்³த³னிமித்தங் மனஸி கரோதி, உத்தராயபி அனுதி³ஸாய ஸத்³தா³னங் ஸத்³த³னிமித்தங் மனஸி கரோதி, த³க்கி²ணாயபி அனுதி³ஸாய ஸத்³தா³னங் ஸத்³த³னிமித்தங் மனஸி கரோதி, ஹெட்டி²மாயபி தி³ஸாய ஸத்³தா³னங் ஸத்³த³னிமித்தங் மனஸி கரோதி, உபரிமாயபி தி³ஸாய ஸத்³தா³னங் ஸத்³த³னிமித்தங் மனஸி கரோதி. ஸோ ததா²பா⁴விதேன சித்தேன பரிஸுத்³தே⁴ன பரியோதா³தேன ஸோததா⁴துவிஸுத்³தி⁴ஞாணாய சித்தங் அபி⁴னீஹரதி அபி⁴னின்னாமேதி. ஸோ தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணாதி – தி³ப்³பே³ ச மானுஸே ச யே தூ³ரே ஸந்திகே ச. தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘விதக்கவிப்பா²ரவஸேன நானத்தேகத்தஸத்³த³னிமித்தானங் பரியோகா³ஹணே பஞ்ஞா ஸோததா⁴துவிஸுத்³தி⁴ஞாணங்’’.
103. Kathaṃ vitakkavipphāravasena nānattekattasaddanimittānaṃ pariyogāhaṇe paññā sotadhātuvisuddhiñāṇaṃ ? Idha bhikkhu chandasamādhi…pe… vīriyasamādhi… cittasamādhi… vīmaṃsāsamādhipadhānasaṅkhārasamannāgataṃ iddhipādaṃ bhāveti. So imesu catūsu iddhipādesu cittaṃ paribhāveti paridameti, muduṃ karoti kammaniyaṃ. So imesu catūsu iddhipādesu cittaṃ paribhāvetvā paridametvā, muduṃ karitvā kammaniyaṃ dūrepi saddānaṃ saddanimittaṃ manasi karoti, santikepi saddānaṃ saddanimittaṃ manasi karoti, oḷārikānampi saddānaṃ saddanimittaṃ manasi karoti, sukhumānampi saddānaṃ saddanimittaṃ manasi karoti, saṇhasaṇhānampi saddānaṃ saddanimittaṃ manasi karoti, puratthimāyapi disāya saddānaṃ saddanimittaṃ manasi karoti, pacchimāyapi disāya saddānaṃ saddanimittaṃ manasi karoti, uttarāyapi disāya saddānaṃ saddanimittaṃ manasi karoti, dakkhiṇāyapi disāya saddānaṃ saddanimittaṃ manasi karoti, puratthimāyapi anudisāya saddānaṃ saddanimittaṃ manasi karoti, pacchimāyapi anudisāya saddānaṃ saddanimittaṃ manasi karoti, uttarāyapi anudisāya saddānaṃ saddanimittaṃ manasi karoti, dakkhiṇāyapi anudisāya saddānaṃ saddanimittaṃ manasi karoti, heṭṭhimāyapi disāya saddānaṃ saddanimittaṃ manasi karoti, uparimāyapi disāya saddānaṃ saddanimittaṃ manasi karoti. So tathābhāvitena cittena parisuddhena pariyodātena sotadhātuvisuddhiñāṇāya cittaṃ abhinīharati abhininnāmeti. So dibbāya sotadhātuyā visuddhāya atikkantamānusikāya ubho sadde suṇāti – dibbe ca mānuse ca ye dūre santike ca. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘vitakkavipphāravasena nānattekattasaddanimittānaṃ pariyogāhaṇe paññā sotadhātuvisuddhiñāṇaṃ’’.
ஸோததா⁴துவிஸுத்³தி⁴ஞாணனித்³தே³ஸோ ஏகபஞ்ஞாஸமோ.
Sotadhātuvisuddhiñāṇaniddeso ekapaññāsamo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 51. ஸோததா⁴துவிஸுத்³தி⁴ஞாணனித்³தே³ஸவண்ணனா • 51. Sotadhātuvisuddhiñāṇaniddesavaṇṇanā
