| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৫১. সোতধাতুৰিসুদ্ধিঞাণনিদ্দেসো
51. Sotadhātuvisuddhiñāṇaniddeso
১০৩. কথং ৰিতক্কৰিপ্ফারৰসেন নানত্তেকত্তসদ্দনিমিত্তানং পরিযোগাহণে পঞ্ঞা সোতধাতুৰিসুদ্ধিঞাণং ? ইধ ভিক্খু ছন্দসমাধি…পে॰… ৰীরিযসমাধি… চিত্তসমাধি… ৰীমংসাসমাধিপধানসঙ্খারসমন্নাগতং ইদ্ধিপাদং ভাৰেতি। সো ইমেসু চতূসু ইদ্ধিপাদেসু চিত্তং পরিভাৰেতি পরিদমেতি, মুদুং করোতি কম্মনিযং। সো ইমেসু চতূসু ইদ্ধিপাদেসু চিত্তং পরিভাৰেত্ৰা পরিদমেত্ৰা, মুদুং করিত্ৰা কম্মনিযং দূরেপি সদ্দানং সদ্দনিমিত্তং মনসি করোতি, সন্তিকেপি সদ্দানং সদ্দনিমিত্তং মনসি করোতি, ওল়ারিকানম্পি সদ্দানং সদ্দনিমিত্তং মনসি করোতি, সুখুমানম্পি সদ্দানং সদ্দনিমিত্তং মনসি করোতি, সণ্হসণ্হানম্পি সদ্দানং সদ্দনিমিত্তং মনসি করোতি, পুরত্থিমাযপি দিসায সদ্দানং সদ্দনিমিত্তং মনসি করোতি, পচ্ছিমাযপি দিসায সদ্দানং সদ্দনিমিত্তং মনসি করোতি, উত্তরাযপি দিসায সদ্দানং সদ্দনিমিত্তং মনসি করোতি, দক্খিণাযপি দিসায সদ্দানং সদ্দনিমিত্তং মনসি করোতি, পুরত্থিমাযপি অনুদিসায সদ্দানং সদ্দনিমিত্তং মনসি করোতি, পচ্ছিমাযপি অনুদিসায সদ্দানং সদ্দনিমিত্তং মনসি করোতি, উত্তরাযপি অনুদিসায সদ্দানং সদ্দনিমিত্তং মনসি করোতি, দক্খিণাযপি অনুদিসায সদ্দানং সদ্দনিমিত্তং মনসি করোতি, হেট্ঠিমাযপি দিসায সদ্দানং সদ্দনিমিত্তং মনসি করোতি, উপরিমাযপি দিসায সদ্দানং সদ্দনিমিত্তং মনসি করোতি। সো তথাভাৰিতেন চিত্তেন পরিসুদ্ধেন পরিযোদাতেন সোতধাতুৰিসুদ্ধিঞাণায চিত্তং অভিনীহরতি অভিনিন্নামেতি। সো দিব্বায সোতধাতুযা ৰিসুদ্ধায অতিক্কন্তমানুসিকায উভো সদ্দে সুণাতি – দিব্বে চ মানুসে চ যে দূরে সন্তিকে চ। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘ৰিতক্কৰিপ্ফারৰসেন নানত্তেকত্তসদ্দনিমিত্তানং পরিযোগাহণে পঞ্ঞা সোতধাতুৰিসুদ্ধিঞাণং’’।
103. Kathaṃ vitakkavipphāravasena nānattekattasaddanimittānaṃ pariyogāhaṇe paññā sotadhātuvisuddhiñāṇaṃ ? Idha bhikkhu chandasamādhi…pe… vīriyasamādhi… cittasamādhi… vīmaṃsāsamādhipadhānasaṅkhārasamannāgataṃ iddhipādaṃ bhāveti. So imesu catūsu iddhipādesu cittaṃ paribhāveti paridameti, muduṃ karoti kammaniyaṃ. So imesu catūsu iddhipādesu cittaṃ paribhāvetvā paridametvā, muduṃ karitvā kammaniyaṃ dūrepi saddānaṃ saddanimittaṃ manasi karoti, santikepi saddānaṃ saddanimittaṃ manasi karoti, oḷārikānampi saddānaṃ saddanimittaṃ manasi karoti, sukhumānampi saddānaṃ saddanimittaṃ manasi karoti, saṇhasaṇhānampi saddānaṃ saddanimittaṃ manasi karoti, puratthimāyapi disāya saddānaṃ saddanimittaṃ manasi karoti, pacchimāyapi disāya saddānaṃ saddanimittaṃ manasi karoti, uttarāyapi disāya saddānaṃ saddanimittaṃ manasi karoti, dakkhiṇāyapi disāya saddānaṃ saddanimittaṃ manasi karoti, puratthimāyapi anudisāya saddānaṃ saddanimittaṃ manasi karoti, pacchimāyapi anudisāya saddānaṃ saddanimittaṃ manasi karoti, uttarāyapi anudisāya saddānaṃ saddanimittaṃ manasi karoti, dakkhiṇāyapi anudisāya saddānaṃ saddanimittaṃ manasi karoti, heṭṭhimāyapi disāya saddānaṃ saddanimittaṃ manasi karoti, uparimāyapi disāya saddānaṃ saddanimittaṃ manasi karoti. So tathābhāvitena cittena parisuddhena pariyodātena sotadhātuvisuddhiñāṇāya cittaṃ abhinīharati abhininnāmeti. So dibbāya sotadhātuyā visuddhāya atikkantamānusikāya ubho sadde suṇāti – dibbe ca mānuse ca ye dūre santike ca. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘vitakkavipphāravasena nānattekattasaddanimittānaṃ pariyogāhaṇe paññā sotadhātuvisuddhiñāṇaṃ’’.
সোতধাতুৰিসুদ্ধিঞাণনিদ্দেসো একপঞ্ঞাসমো।
Sotadhātuvisuddhiñāṇaniddeso ekapaññāsamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৫১. সোতধাতুৰিসুদ্ধিঞাণনিদ্দেসৰণ্ণনা • 51. Sotadhātuvisuddhiñāṇaniddesavaṇṇanā
