| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
(২০) ৫. মহাৰগ্গো
(20) 5. Mahāvaggo
১. সোতানুগতসুত্তং
1. Sotānugatasuttaṃ
১৯১. ‘‘সোতানুগতানং , ভিক্খৰে, ধম্মানং, ৰচসা পরিচিতানং, মনসানুপেক্খিতানং, দিট্ঠিযা সুপ্পটিৰিদ্ধানং চত্তারো আনিসংসা পাটিকঙ্খা। কতমে চত্তারো? ইধ, ভিক্খৰে, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। তস্স তে ধম্মা সোতানুগতা হোন্তি, ৰচসা পরিচিতা, মনসানুপেক্খিতা, দিট্ঠিযা সুপ্পটিৰিদ্ধা। সো মুট্ঠস্সতি 1 কালং কুরুমানো অঞ্ঞতরং দেৰনিকাযং উপপজ্জতি। তস্স তত্থ সুখিনো ধম্মপদা প্লৰন্তি 2। দন্ধো, ভিক্খৰে, সতুপ্পাদো; অথ সো সত্তো খিপ্পংযেৰ ৰিসেসগামী হোতি। সোতানুগতানং, ভিক্খৰে, ধম্মানং, ৰচসা পরিচিতানং, মনসানুপেক্খিতানং, দিট্ঠিযা সুপ্পটিৰিদ্ধানং অযং পঠমো আনিসংসো পাটিকঙ্খো।
191. ‘‘Sotānugatānaṃ , bhikkhave, dhammānaṃ, vacasā paricitānaṃ, manasānupekkhitānaṃ, diṭṭhiyā suppaṭividdhānaṃ cattāro ānisaṃsā pāṭikaṅkhā. Katame cattāro? Idha, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati 3 kālaṃ kurumāno aññataraṃ devanikāyaṃ upapajjati. Tassa tattha sukhino dhammapadā plavanti 4. Dandho, bhikkhave, satuppādo; atha so satto khippaṃyeva visesagāmī hoti. Sotānugatānaṃ, bhikkhave, dhammānaṃ, vacasā paricitānaṃ, manasānupekkhitānaṃ, diṭṭhiyā suppaṭividdhānaṃ ayaṃ paṭhamo ānisaṃso pāṭikaṅkho.
‘‘পুন চপরং, ভিক্খৰে, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। তস্স তে ধম্মা সোতানুগতা হোন্তি, ৰচসা পরিচিতা, মনসানুপেক্খিতা, দিট্ঠিযা সুপ্পটিৰিদ্ধা। সো মুট্ঠস্সতি কালং কুরুমানো অঞ্ঞতরং দেৰনিকাযং উপপজ্জতি। তস্স তত্থ ন হেৰ খো সুখিনো ধম্মপদা প্লৰন্তি; অপি চ খো ভিক্খু ইদ্ধিমা চেতোৰসিপ্পত্তো দেৰপরিসাযং ধম্মং দেসেতি। তস্স এৰং হোতি – ‘অযং ৰা সো ধম্মৰিনযো, যত্থাহং পুব্বে ব্রহ্মচরিযং অচরি’ন্তি। দন্ধো, ভিক্খৰে, সতুপ্পাদো; অথ সো সত্তো খিপ্পমেৰ ৰিসেসগামী হোতি। সেয্যথাপি, ভিক্খৰে, পুরিসো কুসলো ভেরিসদ্দস্স। সো অদ্ধানমগ্গপ্পটিপন্নো ভেরিসদ্দং সুণেয্য। তস্স ন হেৰ খো অস্স কঙ্খা ৰা ৰিমতি ৰা – ‘ভেরিসদ্দো নু খো, ন নু খো ভেরিসদ্দো’তি! অথ খো ভেরিসদ্দোত্ৰেৰ নিট্ঠং গচ্ছেয্য। এৰমেৰং খো, ভিক্খৰে, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। তস্স তে ধম্মা সোতানুগতা হোন্তি, ৰচসা পরিচিতা, মনসানুপেক্খিতা, দিট্ঠিযা সুপ্পটিৰিদ্ধা। সো মুট্ঠস্সতি কালং কুরুমানো অঞ্ঞতরং দেৰনিকাযং উপপজ্জতি। তস্স তত্থ ন হেৰ খো সুখিনো ধম্মপদা প্লৰন্তি; অপি চ খো ভিক্খু ইদ্ধিমা চেতোৰসিপ্পত্তো দেৰপরিসাযং ধম্মং দেসেতি। তস্স এৰং হোতি – ‘অযং ৰা সো ধম্মৰিনযো, যত্থাহং পুব্বে ব্রহ্মচরিযং অচরি’ন্তি। দন্ধো, ভিক্খৰে, সতুপ্পাদো; অথ সো সত্তো খিপ্পংযেৰ ৰিসেসগামী হোতি। সোতানুগতানং, ভিক্খৰে, ধম্মানং , ৰচসা পরিচিতানং, মনসানুপেক্খিতানং, দিট্ঠিযা সুপ্পটিৰিদ্ধানং অযং দুতিযো আনিসংসো পাটিকঙ্খো।
‘‘Puna caparaṃ, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti; api ca kho bhikkhu iddhimā cetovasippatto devaparisāyaṃ dhammaṃ deseti. Tassa evaṃ hoti – ‘ayaṃ vā so dhammavinayo, yatthāhaṃ pubbe brahmacariyaṃ acari’nti. Dandho, bhikkhave, satuppādo; atha so satto khippameva visesagāmī hoti. Seyyathāpi, bhikkhave, puriso kusalo bherisaddassa. So addhānamaggappaṭipanno bherisaddaṃ suṇeyya. Tassa na heva kho assa kaṅkhā vā vimati vā – ‘bherisaddo nu kho, na nu kho bherisaddo’ti! Atha kho bherisaddotveva niṭṭhaṃ gaccheyya. Evamevaṃ kho, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti; api ca kho bhikkhu iddhimā cetovasippatto devaparisāyaṃ dhammaṃ deseti. Tassa evaṃ hoti – ‘ayaṃ vā so dhammavinayo, yatthāhaṃ pubbe brahmacariyaṃ acari’nti. Dandho, bhikkhave, satuppādo; atha so satto khippaṃyeva visesagāmī hoti. Sotānugatānaṃ, bhikkhave, dhammānaṃ , vacasā paricitānaṃ, manasānupekkhitānaṃ, diṭṭhiyā suppaṭividdhānaṃ ayaṃ dutiyo ānisaṃso pāṭikaṅkho.
‘‘পুন চপরং, ভিক্খৰে, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। তস্স তে ধম্মা সোতানুগতা হোন্তি, ৰচসা পরিচিতা, মনসানুপেক্খিতা, দিট্ঠিযা সুপ্পটিৰিদ্ধা। সো মুট্ঠস্সতি কালং কুরুমানো অঞ্ঞতরং দেৰনিকাযং উপপজ্জতি। তস্স তত্থ ন হেৰ খো সুখিনো ধম্মপদা প্লৰন্তি, নপি ভিক্খু ইদ্ধিমা চেতোৰসিপ্পত্তো দেৰপরিসাযং ধম্মং দেসেতি; অপি চ খো দেৰপুত্তো দেৰপরিসাযং ধম্মং দেসেতি। তস্স এৰং হোতি – ‘অযং ৰা সো ধম্মৰিনযো, যত্থাহং পুব্বে ব্রহ্মচরিযং অচরি’ন্তি। দন্ধো, ভিক্খৰে, সতুপ্পাদো; অথ সো সত্তো খিপ্পংযেৰ ৰিসেসগামী হোতি। সেয্যথাপি, ভিক্খৰে, পুরিসো কুসলো সঙ্খসদ্দস্স। সো অদ্ধানমগ্গপ্পটিপন্নো সঙ্খসদ্দং সুণেয্য। তস্স ন হেৰ খো অস্স কঙ্খা ৰা ৰিমতি ৰা – ‘সঙ্খসদ্দো নু খো, ন নু খো সঙ্খসদ্দো’তি! অথ খো সঙ্খসদ্দোত্ৰেৰ নিট্ঠং গচ্ছেয্য। এৰমেৰং খো, ভিক্খৰে, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। তস্স তে ধম্মা সোতানুগতা হোন্তি, ৰচসা পরিচিতা, মনসানুপেক্খিতা, দিট্ঠিযা সুপ্পটিৰিদ্ধা। সো মুট্ঠস্সতি কালং কুরুমানো অঞ্ঞতরং দেৰনিকাযং উপপজ্জতি। তস্স তত্থ ন হেৰ খো সুখিনো ধম্মপদা প্লৰন্তি, নপি ভিক্খু ইদ্ধিমা চেতোৰসিপ্পত্তো দেৰপরিসাযং ধম্মং দেসেতি; অপি চ খো দেৰপুত্তো দেৰপরিসাযং ধম্মং দেসেতি। তস্স এৰং হোতি – ‘অযং ৰা সো ধম্মৰিনযো, যত্থাহং পুব্বে ব্রহ্মচরিযং অচরি’ন্তি। দন্ধো, ভিক্খৰে, সতুপ্পাদো; অথ সো সত্তো খিপ্পংযেৰ ৰিসেসগামী হোতি। সোতানুগতানং, ভিক্খৰে, ধম্মানং, ৰচসা পরিচিতানং, মনসানুপেক্খিতানং, দিট্ঠিযা সুপ্পটিৰিদ্ধানং অযং ততিযো আনিসংসো পাটিকঙ্খো।
‘‘Puna caparaṃ, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṃ dhammaṃ deseti; api ca kho devaputto devaparisāyaṃ dhammaṃ deseti. Tassa evaṃ hoti – ‘ayaṃ vā so dhammavinayo, yatthāhaṃ pubbe brahmacariyaṃ acari’nti. Dandho, bhikkhave, satuppādo; atha so satto khippaṃyeva visesagāmī hoti. Seyyathāpi, bhikkhave, puriso kusalo saṅkhasaddassa. So addhānamaggappaṭipanno saṅkhasaddaṃ suṇeyya. Tassa na heva kho assa kaṅkhā vā vimati vā – ‘saṅkhasaddo nu kho, na nu kho saṅkhasaddo’ti! Atha kho saṅkhasaddotveva niṭṭhaṃ gaccheyya. Evamevaṃ kho, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṃ dhammaṃ deseti; api ca kho devaputto devaparisāyaṃ dhammaṃ deseti. Tassa evaṃ hoti – ‘ayaṃ vā so dhammavinayo, yatthāhaṃ pubbe brahmacariyaṃ acari’nti. Dandho, bhikkhave, satuppādo; atha so satto khippaṃyeva visesagāmī hoti. Sotānugatānaṃ, bhikkhave, dhammānaṃ, vacasā paricitānaṃ, manasānupekkhitānaṃ, diṭṭhiyā suppaṭividdhānaṃ ayaṃ tatiyo ānisaṃso pāṭikaṅkho.
‘‘পুন চপরং, ভিক্খৰে, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। তস্স তে ধম্মা সোতানুগতা হোন্তি, ৰচসা পরিচিতা, মনসানুপেক্খিতা, দিট্ঠিযা সুপ্পটিৰিদ্ধা। সো মুট্ঠস্সতি কালং কুরুমানো অঞ্ঞতরং দেৰনিকাযং উপপজ্জতি। তস্স তত্থ ন হেৰ খো সুখিনো ধম্মপদা প্লৰন্তি, নপি ভিক্খু ইদ্ধিমা চেতোৰসিপ্পত্তো দেৰপরিসাযং ধম্মং দেসেতি, নপি দেৰপুত্তো দেৰপরিসাযং ধম্মং দেসেতি; অপি চ খো ওপপাতিকো ওপপাতিকং সারেতি – ‘সরসি ত্ৰং, মারিস, সরসি ত্ৰং , মারিস, যত্থ মযং পুব্বে ব্রহ্মচরিযং অচরিম্হা’তি। সো এৰমাহ – ‘সরামি, মারিস, সরামি, মারিসা’তি। দন্ধো, ভিক্খৰে, সতুপ্পাদো; অথ সো সত্তো খিপ্পংযেৰ ৰিসেসগামী হোতি। সেয্যথাপি, ভিক্খৰে, দ্ৰে সহাযকা সহপংসুকীল়িকা 5। তে কদাচি করহচি অঞ্ঞমঞ্ঞং সমাগচ্ছেয্যুং। অঞ্ঞো পন 6 সহাযকো সহাযকং এৰং ৰদেয্য – ‘ইদম্পি, সম্ম, সরসি, ইদম্পি, সম্ম, সরসী’তি। সো এৰং ৰদেয্য – ‘সরামি , সম্ম, সরামি, সম্মা’তি। এৰমেৰং খো, ভিক্খৰে, ভিক্খু ধম্মং পরিযাপুণাতি – সুত্তং, গেয্যং, ৰেয্যাকরণং, গাথং, উদানং, ইতিৰুত্তকং, জাতকং, অব্ভুতধম্মং, ৰেদল্লং। তস্স তে ধম্মা সোতানুগতা হোন্তি, ৰচসা পরিচিতা, মনসানুপেক্খিতা, দিট্ঠিযা সুপ্পটিৰিদ্ধা। সো মুট্ঠস্সতি কালং কুরুমানো অঞ্ঞতরং দেৰনিকাযং উপপজ্জতি। তস্স তত্থ ন হেৰ খো সুখিনো ধম্মপদা প্লৰন্তি, নপি ভিক্খু ইদ্ধিমা চেতোৰসিপ্পত্তো দেৰপরিসাযং ধম্মং দেসেতি, নপি দেৰপুত্তো দেৰপরিসাযং ধম্মং দেসেতি; অপি চ খো ওপপাতিকো ওপপাতিকং সারেতি – ‘সরসি ত্ৰং, মারিস, সরসি ত্ৰং, মারিস, যত্থ মযং পুব্বে ব্রহ্মচরিযং অচরিম্হা’তি। সো এৰমাহ – ‘সরামি, মারিস, সরামি, মারিসা’তি। দন্ধো, ভিক্খৰে, সতুপ্পাদো; অথ খো সো সত্তো খিপ্পংযেৰ ৰিসেসগামী হোতি। সোতানুগতানং, ভিক্খৰে, ধম্মানং, ৰচসা পরিচিতানং, মনসানুপেক্খিতানং, দিট্ঠিযা সুপ্পটিৰিদ্ধানং অযং চতুত্থো আনিসংসো পাটিকঙ্খো। সোতানুগতানং, ভিক্খৰে, ধম্মানং, ৰচসা পরিচিতানং, মনসানুপেক্খিতানং দিট্ঠিযা সুপ্পটিৰিদ্ধানং ইমে চত্তারো আনিসংসা পাটিকঙ্খা’’তি। পঠমং।
‘‘Puna caparaṃ, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṃ dhammaṃ deseti, napi devaputto devaparisāyaṃ dhammaṃ deseti; api ca kho opapātiko opapātikaṃ sāreti – ‘sarasi tvaṃ, mārisa, sarasi tvaṃ , mārisa, yattha mayaṃ pubbe brahmacariyaṃ acarimhā’ti. So evamāha – ‘sarāmi, mārisa, sarāmi, mārisā’ti. Dandho, bhikkhave, satuppādo; atha so satto khippaṃyeva visesagāmī hoti. Seyyathāpi, bhikkhave, dve sahāyakā sahapaṃsukīḷikā 7. Te kadāci karahaci aññamaññaṃ samāgaccheyyuṃ. Añño pana 8 sahāyako sahāyakaṃ evaṃ vadeyya – ‘idampi, samma, sarasi, idampi, samma, sarasī’ti. So evaṃ vadeyya – ‘sarāmi , samma, sarāmi, sammā’ti. Evamevaṃ kho, bhikkhave, bhikkhu dhammaṃ pariyāpuṇāti – suttaṃ, geyyaṃ, veyyākaraṇaṃ, gāthaṃ, udānaṃ, itivuttakaṃ, jātakaṃ, abbhutadhammaṃ, vedallaṃ. Tassa te dhammā sotānugatā honti, vacasā paricitā, manasānupekkhitā, diṭṭhiyā suppaṭividdhā. So muṭṭhassati kālaṃ kurumāno aññataraṃ devanikāyaṃ upapajjati. Tassa tattha na heva kho sukhino dhammapadā plavanti, napi bhikkhu iddhimā cetovasippatto devaparisāyaṃ dhammaṃ deseti, napi devaputto devaparisāyaṃ dhammaṃ deseti; api ca kho opapātiko opapātikaṃ sāreti – ‘sarasi tvaṃ, mārisa, sarasi tvaṃ, mārisa, yattha mayaṃ pubbe brahmacariyaṃ acarimhā’ti. So evamāha – ‘sarāmi, mārisa, sarāmi, mārisā’ti. Dandho, bhikkhave, satuppādo; atha kho so satto khippaṃyeva visesagāmī hoti. Sotānugatānaṃ, bhikkhave, dhammānaṃ, vacasā paricitānaṃ, manasānupekkhitānaṃ, diṭṭhiyā suppaṭividdhānaṃ ayaṃ catuttho ānisaṃso pāṭikaṅkho. Sotānugatānaṃ, bhikkhave, dhammānaṃ, vacasā paricitānaṃ, manasānupekkhitānaṃ diṭṭhiyā suppaṭividdhānaṃ ime cattāro ānisaṃsā pāṭikaṅkhā’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. সোতানুগতসুত্তৰণ্ণনা • 1. Sotānugatasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১. সোতানুগতসুত্তৰণ্ণনা • 1. Sotānugatasuttavaṇṇanā
