| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(20) 5. மஹாவக்³கோ³
(20) 5. Mahāvaggo
1. ஸோதானுக³தஸுத்தவண்ணனா
1. Sotānugatasuttavaṇṇanā
191. பஞ்சமஸ்ஸ பட²மே ஸோதானுக³தானந்தி பஸாத³ஸோதங் ஓத³ஹித்வா ஞாணஸோதேன வவத்த²பிதானங். சத்தாரோ ஆனிஸங்ஸா பாடிகங்கா²தி சத்தாரோ கு³ணானிஸங்ஸா பாடிகங்கி²தப்³பா³. இத³ங் பன ப⁴க³வதா அத்து²ப்பத்திவஸேன ஆரத்³த⁴ங். கதரஅத்து²ப்பத்திவஸேனாதி? பி⁴க்கூ²னங் த⁴ம்மஸ்ஸவனாய அனுபஸங்கமனஅத்து²ப்பத்திவஸேன. பஞ்சஸதா கிர ப்³ராஹ்மணபப்³ப³ஜிதா ‘‘ஸம்மாஸம்பு³த்³தோ⁴ லிங்க³வசனவிப⁴த்திபத³ப்³யஞ்ஜனாதீ³ஹி கதெ²ந்தோ அம்ஹேஹி ஞாதமேவ கதெ²ஸ்ஸதி, அஞ்ஞாதங் கிங் கதெ²ஸ்ஸதீ’’தி த⁴ம்மஸ்ஸவனத்த²ங் ந க³ச்ச²ந்தி. ஸத்தா² தங் பவத்திங் ஸுத்வா தே பக்கோஸாபெத்வா ‘‘கஸ்மா ஏவங் கரோத², ஸக்கச்சங் த⁴ம்மங் ஸுணாத², ஸக்கச்சங் த⁴ம்மங் ஸுணந்தானஞ்ச ஸஜ்ஜா²யந்தானஞ்ச இமே எத்தகா ஆனிஸங்ஸா’’தி த³ஸ்ஸெந்தோ இமங் தே³ஸனங் ஆரபி⁴.
191. Pañcamassa paṭhame sotānugatānanti pasādasotaṃ odahitvā ñāṇasotena vavatthapitānaṃ. Cattāro ānisaṃsā pāṭikaṅkhāti cattāro guṇānisaṃsā pāṭikaṅkhitabbā. Idaṃ pana bhagavatā atthuppattivasena āraddhaṃ. Kataraatthuppattivasenāti? Bhikkhūnaṃ dhammassavanāya anupasaṅkamanaatthuppattivasena. Pañcasatā kira brāhmaṇapabbajitā ‘‘sammāsambuddho liṅgavacanavibhattipadabyañjanādīhi kathento amhehi ñātameva kathessati, aññātaṃ kiṃ kathessatī’’ti dhammassavanatthaṃ na gacchanti. Satthā taṃ pavattiṃ sutvā te pakkosāpetvā ‘‘kasmā evaṃ karotha, sakkaccaṃ dhammaṃ suṇātha, sakkaccaṃ dhammaṃ suṇantānañca sajjhāyantānañca ime ettakā ānisaṃsā’’ti dassento imaṃ desanaṃ ārabhi.
தத்த² த⁴ம்மங் பரியாபுணாதீதி ஸுத்தங் கெ³ய்யந்திஆதி³கங் நவங்க³ங் ஸத்து²ஸாஸனபூ⁴தங் தந்தித⁴ம்மங் வளஞ்ஜேதி. ஸோதானுக³தா ஹொந்தீதி ஸோதங் அனுப்பத்தா அனுபவிட்டா² ஹொந்தி. மனஸானுபெக்கி²தாதி சித்தேன ஓலோகிதா. தி³ட்டி²யா ஸுப்படிவித்³தா⁴தி அத்த²தோ ச காரணதோ ச பஞ்ஞாய ஸுட்டு² படிவித்³தா⁴ பச்சக்க²ங் கதா. முட்ட²ஸ்ஸதி காலங் குருமானோதி நயித³ங் பு³த்³த⁴வசனங் அனுஸ்ஸரணஸதியா அபா⁴வேன வுத்தங், புது²ஜ்ஜனகாலகிரியங் பன ஸந்தா⁴ய வுத்தங். புது²ஜ்ஜனோ ஹி முட்ட²ஸ்ஸதி காலங் கரோதி நாம. உபபஜ்ஜதீதி ஸுத்³த⁴ஸீலே பதிட்டி²தோ தே³வலோகே நிப்³ப³த்ததி. த⁴ம்மபதா³ ப்லவந்தீதி அந்தராப⁴வே நிப்³ப³த்தமுட்ட²ஸ்ஸதினோ, யேபி புப்³பே³ ஸஜ்ஜா²யமூலிகா வாசாபரிசிதபு³த்³த⁴வசனத⁴ம்மா, தே ஸப்³பே³ பஸன்னே ஆதா³ஸே சா²யா விய ப்லவந்தி, பாகடா ஹுத்வா பஞ்ஞாயந்தி. த³ந்தோ⁴, பி⁴க்க²வே, ஸதுப்பாதோ³தி பு³த்³த⁴வசனானுஸ்ஸரணஸதியா உப்பாதோ³ த³ந்தோ⁴ க³ரு. அத² ஸோ ஸத்தோ கி²ப்பங்யேவ விஸேஸகா³மீ ஹோதி, நிப்³பா³னகா³மீ ஹோதீதி அத்தோ².
Tattha dhammaṃ pariyāpuṇātīti suttaṃ geyyantiādikaṃ navaṅgaṃ satthusāsanabhūtaṃ tantidhammaṃ vaḷañjeti. Sotānugatā hontīti sotaṃ anuppattā anupaviṭṭhā honti. Manasānupekkhitāti cittena olokitā. Diṭṭhiyā suppaṭividdhāti atthato ca kāraṇato ca paññāya suṭṭhu paṭividdhā paccakkhaṃ katā. Muṭṭhassati kālaṃ kurumānoti nayidaṃ buddhavacanaṃ anussaraṇasatiyā abhāvena vuttaṃ, puthujjanakālakiriyaṃ pana sandhāya vuttaṃ. Puthujjano hi muṭṭhassati kālaṃ karoti nāma. Upapajjatīti suddhasīle patiṭṭhito devaloke nibbattati. Dhammapadā plavantīti antarābhave nibbattamuṭṭhassatino, yepi pubbe sajjhāyamūlikā vācāparicitabuddhavacanadhammā, te sabbe pasanne ādāse chāyā viya plavanti, pākaṭā hutvā paññāyanti. Dandho, bhikkhave, satuppādoti buddhavacanānussaraṇasatiyā uppādo dandho garu. Atha so satto khippaṃyeva visesagāmī hoti, nibbānagāmī hotīti attho.
இத்³தி⁴மா சேதோவஸிப்பத்தோதி இத்³தி⁴ஸம்பன்னோ சித்தஸ்ஸ வஸிபா⁴வபத்தோ கீ²ணாஸவோ. அயங் வா ஸோ த⁴ம்மவினயோதி எத்த² விபா⁴வனத்தோ² வா-ஸத்³தோ³. யத்தா²தி யஸ்மிங் த⁴ம்மவினயே. ப்³ரஹ்மசரியங் அசரிந்தி ப்³ரஹ்மசரியவாஸங் வஸிங். இத³ம்பி பு³த்³த⁴வசனங் மயா புப்³பே³ வளஞ்ஜிதந்தி பு³த்³த⁴வசனானுஸ்ஸரணவஸேனேதங் வுத்தங். தே³வபுத்தோதி பஞ்சாலசண்டோ³ விய ஹத்த²கமஹாப்³ரஹ்மா விய ஸனங்குமாரப்³ரஹ்மா விய ச ஏகோ த⁴ம்மகதி²கதே³வபுத்தோ. ஓபபாதிகோ ஓபபாதிகங் ஸாரேதீதி பட²மங் உப்பன்னோ தே³வபுத்தோ பச்சா² உப்பன்னங் ஸாரேதி. ஸஹபங்ஸுகீளிகாதி ஏதேன நேஸங் தீ³க⁴ரத்தங் கதபரிசயபா⁴வங் த³ஸ்ஸேதி. ஸமாக³ச்செ²ய்யுந்தி ஸாலாய வா ருக்க²மூலே வா ஸம்முகீ²பா⁴வங் க³ச்செ²ய்யுங். ஏவங் வதெ³ய்யாதி ஸாலாய வா ருக்க²மூலே வா பட²மதரங் நிஸின்னோ பச்சா² ஆக³தங் ஏவங் வதெ³ய்ய. ஸேஸமெத்த² பாளினயேனேவ வேதி³தப்³ப³ங்.
Iddhimā cetovasippattoti iddhisampanno cittassa vasibhāvapatto khīṇāsavo. Ayaṃvā so dhammavinayoti ettha vibhāvanattho vā-saddo. Yatthāti yasmiṃ dhammavinaye. Brahmacariyaṃ acarinti brahmacariyavāsaṃ vasiṃ. Idampi buddhavacanaṃ mayā pubbe vaḷañjitanti buddhavacanānussaraṇavasenetaṃ vuttaṃ. Devaputtoti pañcālacaṇḍo viya hatthakamahābrahmā viya sanaṅkumārabrahmā viya ca eko dhammakathikadevaputto. Opapātiko opapātikaṃ sāretīti paṭhamaṃ uppanno devaputto pacchā uppannaṃ sāreti. Sahapaṃsukīḷikāti etena nesaṃ dīgharattaṃ kataparicayabhāvaṃ dasseti. Samāgaccheyyunti sālāya vā rukkhamūle vā sammukhībhāvaṃ gaccheyyuṃ. Evaṃ vadeyyāti sālāya vā rukkhamūle vā paṭhamataraṃ nisinno pacchā āgataṃ evaṃ vadeyya. Sesamettha pāḷinayeneva veditabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸோதானுக³தஸுத்தங் • 1. Sotānugatasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. ஸோதானுக³தஸுத்தவண்ணனா • 1. Sotānugatasuttavaṇṇanā
