| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(20) 5. மஹாவக்³கோ³
(20) 5. Mahāvaggo
1. ஸோதானுக³தஸுத்தவண்ணனா
1. Sotānugatasuttavaṇṇanā
191. பஞ்சமஸ்ஸ பட²மே ஸோதானுக³தானந்தி பஸாத³ஸோதங் அனுக³ந்த்வா க³தானங், பகு³ணானங் வாசுக்³க³தானந்தி அத்தோ². ஏவங்பூ⁴தா ச பஸாத³ஸோதங் ஓத³ஹித்வா ஞாணஸோதேன ஸுட்டு² வவத்த²பிதா நாம ஹொந்தீதி ஆஹ ‘‘பஸாத³ஸோத’’ந்திஆதி³. ஏகச்சஸ்ஸ ஹி உக்³க³ஹிதபுப்³ப³வசனங் தங் தங் பகு³ணங் நிச்ச²ரிதங் ஸுட்டு² வவத்த²பிதங் ந ஹோதி. ‘‘அஸுகங் ஸுத்தங் வா ஜாதகங் வா கதே²ஹீ’’தி வுத்தே ‘‘ஸஜ்ஜா²யித்வா ஸங்ஸந்தி³த்வா ஸமனுக்³கா³ஹித்வா ஜானிஸ்ஸாமீ’’தி வத³ந்தி. ஏகச்சஸ்ஸ தங் தங் பகு³ணங் ப⁴வங்க³ஸோதஸதி³ஸங் ஹோதி ‘‘அஸுகங் ஸுத்தங் வா ஜாதகங் வா கதே²ஹீ’’தி வுத்தே உத்³த⁴ரித்வா தமேவ கதே²தி. தங் ஸந்தா⁴யேதங் வுத்தங் ‘‘ஞாணஸோதேன வவத்த²பிதான’’ந்தி. இத்தி²லிங்கா³தீ³னி தீணி லிங்கா³னி. நாமாதீ³னி சத்தாரி பதா³னி. பட²மாத³யோ ஸத்த விப⁴த்தியோ.
191. Pañcamassa paṭhame sotānugatānanti pasādasotaṃ anugantvā gatānaṃ, paguṇānaṃ vācuggatānanti attho. Evaṃbhūtā ca pasādasotaṃ odahitvā ñāṇasotena suṭṭhu vavatthapitā nāma hontīti āha ‘‘pasādasota’’ntiādi. Ekaccassa hi uggahitapubbavacanaṃ taṃ taṃ paguṇaṃ niccharitaṃ suṭṭhu vavatthapitaṃ na hoti. ‘‘Asukaṃ suttaṃ vā jātakaṃ vā kathehī’’ti vutte ‘‘sajjhāyitvā saṃsanditvā samanuggāhitvā jānissāmī’’ti vadanti. Ekaccassa taṃ taṃ paguṇaṃ bhavaṅgasotasadisaṃ hoti ‘‘asukaṃ suttaṃ vā jātakaṃ vā kathehī’’ti vutte uddharitvā tameva katheti. Taṃ sandhāyetaṃ vuttaṃ ‘‘ñāṇasotena vavatthapitāna’’nti. Itthiliṅgādīni tīṇi liṅgāni. Nāmādīni cattāri padāni. Paṭhamādayo satta vibhattiyo.
வளஞ்ஜேதீதி பாளிங் அனுஸந்தி⁴ங் புப்³பா³பரவஸேன வாசுக்³க³தங் கரொந்தோ தா⁴ரேதி. வசஸா பரிசிதாதி ஸுத்தத³ஸகவக்³க³த³ஸகபண்ணாஸத³ஸகவஸேன வாசாய ஸஜ்ஜா²யிதா, ‘‘த³ஸஸுத்தானி க³தானி, த³ஸவக்³கா³னி க³தானீ’’திஆதி³னா ஸல்லக்கெ²த்வா வாசாய ஸஜ்ஜா²யிதாதி அத்தோ². வக்³கா³தி³வஸேன ஹி இத⁴ வசஸா பரிசயோ அதி⁴ப்பேதோ, ந பன ஸுத்தேகதே³ஸஸ்ஸ ஸுத்தமத்தஸ்ஸ வசஸா பரிசயோ. மனஸா அனு அனு பெக்கி²தா பா⁴க³ஸோ நிஜ்ஜா²யிதா விதி³தா மனுஸானுபெக்கி²தா. யஸ்ஸ வாசாய ஸஜ்ஜா²யிதங் பு³த்³த⁴வசனங் மனஸா சிந்தெந்தஸ்ஸ தத்த² தத்த² பாகடங் ஹோதி, மஹாதீ³பங் ஜாலெத்வா டி²தஸ்ஸ ரூபக³தங் விய விபூ⁴தங் ஹுத்வா பஞ்ஞாயதி. தங் ஸந்தா⁴யேதங் வுத்தங். ஸுப்படிவித்³தா⁴தி நிஜ்ஜடங் நிக்³கு³ம்ப³ங் கத்வா ஸுட்டு² யாதா²வதோ படிவித்³தா⁴. ஸேஸமெத்த² ஸுவிஞ்ஞெய்யமேவ.
Vaḷañjetīti pāḷiṃ anusandhiṃ pubbāparavasena vācuggataṃ karonto dhāreti. Vacasā paricitāti suttadasakavaggadasakapaṇṇāsadasakavasena vācāya sajjhāyitā, ‘‘dasasuttāni gatāni, dasavaggāni gatānī’’tiādinā sallakkhetvā vācāya sajjhāyitāti attho. Vaggādivasena hi idha vacasā paricayo adhippeto, na pana suttekadesassa suttamattassa vacasā paricayo. Manasā anu anu pekkhitā bhāgaso nijjhāyitā viditā manusānupekkhitā. Yassa vācāya sajjhāyitaṃ buddhavacanaṃ manasā cintentassa tattha tattha pākaṭaṃ hoti, mahādīpaṃ jāletvā ṭhitassa rūpagataṃ viya vibhūtaṃ hutvā paññāyati. Taṃ sandhāyetaṃ vuttaṃ. Suppaṭividdhāti nijjaṭaṃ niggumbaṃ katvā suṭṭhu yāthāvato paṭividdhā. Sesamettha suviññeyyameva.
ஸோதானுக³தஸுத்தவண்ணனா நிட்டி²தா.
Sotānugatasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸோதானுக³தஸுத்தங் • 1. Sotānugatasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸோதானுக³தஸுத்தவண்ணனா • 1. Sotānugatasuttavaṇṇanā
