| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. ஸுப⁴த்³த³த்தே²ரஅபதா³னவண்ணனா
9. Subhaddattheraapadānavaṇṇanā
பது³முத்தரோ லோகவிதூ³திஆதி³கங் ஆயஸ்மதோ ஸுப⁴த்³த³த்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே நிப்³பா³னாதி⁴க³மனத்தா²ய புஞ்ஞானி உபசினந்தோ பது³முத்தரஸ்ஸ ப⁴க³வதோ காலே விப⁴வஸம்பன்னே ஸத்³தா⁴ஸம்பன்னே ஏகஸ்மிங் குலகே³ஹே நிப்³ப³தோ விஞ்ஞுதங் பத்வா க⁴ரப³ந்த⁴னேன ப³த்³தோ⁴ ரதனத்தயே பஸன்னோ பரினிப்³பா³னமஞ்சே நிபன்னங் பது³முத்தரங் ப⁴க³வந்தங் தி³ஸ்வா ஸன்னிபதிதா த³ஸஸஹஸ்ஸசக்கவாளதே³வதாயோ ச தி³ஸ்வா பஸன்னமானஸோ நிக்³கு³ண்டி³கேடகனீலகாஸோகாஸிதாதி³அனேகேஹி ஸுக³ந்த⁴புப்பே²ஹி பூஜேஸி. ஸோ தேன புஞ்ஞகம்மேன யாவதாயுகங் ட²த்வா ததோ சவித்வா துஸிதாதீ³ஸு தி³ப்³ப³ஸம்பத்தியோ அனுப⁴வித்வா ததோ மனுஸ்ஸேஸு மனுஸ்ஸஸம்பத்தியோ அனுப⁴வித்வா நிப்³ப³த்தனிப்³ப³த்தட்டா²னேஸு ச ஸுக³ந்தே⁴ஹி புப்பே²ஹி பூஜிதோ அஹோஸி. இமஸ்மிங் பன பு³த்³து⁴ப்பாதே³ ஏகஸ்மிங் விப⁴வஸம்பன்னே குலே நிப்³ப³த்தித்வா விஞ்ஞுதங் பத்தோ காமேஸு ஆதீ³னவங் தி³ஸ்வாபி யாவ பு³த்³த⁴ஸ்ஸ ப⁴க³வதோ பரினிப்³பா³னகாலோ தாவ அலத்³த⁴பு³த்³த⁴த³ஸ்ஸனோ ப⁴க³வதோ பரினிப்³பா³னமஞ்சே நிபன்னகாலேயேவ பப்³ப³ஜித்வா அரஹத்தங் பாபுணி. புப்³பே³ கதபுஞ்ஞனாமேன ஸுப⁴த்³தோ³தி பாகடோ அஹோஸி.
Padumuttarolokavidūtiādikaṃ āyasmato subhaddattherassa apadānaṃ. Ayampi purimabuddhesu katādhikāro tattha tattha bhave nibbānādhigamanatthāya puññāni upacinanto padumuttarassa bhagavato kāle vibhavasampanne saddhāsampanne ekasmiṃ kulagehe nibbato viññutaṃ patvā gharabandhanena baddho ratanattaye pasanno parinibbānamañce nipannaṃ padumuttaraṃ bhagavantaṃ disvā sannipatitā dasasahassacakkavāḷadevatāyo ca disvā pasannamānaso nigguṇḍikeṭakanīlakāsokāsitādianekehi sugandhapupphehi pūjesi. So tena puññakammena yāvatāyukaṃ ṭhatvā tato cavitvā tusitādīsu dibbasampattiyo anubhavitvā tato manussesu manussasampattiyo anubhavitvā nibbattanibbattaṭṭhānesu ca sugandhehi pupphehi pūjito ahosi. Imasmiṃ pana buddhuppāde ekasmiṃ vibhavasampanne kule nibbattitvā viññutaṃ patto kāmesu ādīnavaṃ disvāpi yāva buddhassa bhagavato parinibbānakālo tāva aladdhabuddhadassano bhagavato parinibbānamañce nipannakāleyeva pabbajitvā arahattaṃ pāpuṇi. Pubbe katapuññanāmena subhaddoti pākaṭo ahosi.
101. ஸோ அத்தனோ புப்³ப³கம்மங் ஸரித்வா ஸோமனஸ்ஸவஸேன புப்³ப³சரிதாபதா³னங் பகாஸெந்தோ பது³முத்தரோ லோகவிதூ³திஆதி³மாஹ. தங் உத்தானத்த²மேவ. ஸுணாத² மம பா⁴ஸதோ…பே॰… நிப்³பா³யிஸ்ஸதினாஸவோதி இத³ங் பரினிப்³பா³னமஞ்சே நிபன்னோவ பது³முத்தரோ ப⁴க³வா ப்³யாகாஸி.
101. So attano pubbakammaṃ saritvā somanassavasena pubbacaritāpadānaṃ pakāsento padumuttaro lokavidūtiādimāha. Taṃ uttānatthameva. Suṇātha mama bhāsato…pe… nibbāyissatināsavoti idaṃ parinibbānamañce nipannova padumuttaro bhagavā byākāsi.
பஞ்சமபா⁴ணவாரவண்ணனா ஸமத்தா.
Pañcamabhāṇavāravaṇṇanā samattā.
115. ஸோ அத்தனோ படிபத்திங் த³ஸ்ஸெந்தோ புப்³ப³கம்மேன ஸங்யுத்தோதிஆதி³மாஹ. ஏகக்³கோ³தி ஏகக்³க³சித்தோ. ஸுஸமாஹிதோதி ஸுட்டு² ஸமாஹிதோ, ஸந்தகாயசித்தோதி அத்தோ². பு³த்³த⁴ஸ்ஸ ஓரஸோ புத்தோதி பு³த்³த⁴ஸ்ஸ உரஸா ஹத³யேன நிக்³க³தஓவாதா³னுஸாஸனிங் ஸுத்வா பத்தஅரஹத்தப²லோதி அத்தோ². த⁴ம்மஜொம்ஹி ஸுனிம்மிதோதி த⁴ம்மதோ கம்மட்டா²னத⁴ம்மதோ ஜாதோ அரியாய ஜாதியா ஸுனிம்மிதோ ஸுட்டு² நிப்ப்பா²தி³தஸப்³ப³கிச்சோ அம்ஹி ப⁴வாமீதி அத்தோ².
115. So attano paṭipattiṃ dassento pubbakammena saṃyuttotiādimāha. Ekaggoti ekaggacitto. Susamāhitoti suṭṭhu samāhito, santakāyacittoti attho. Buddhassa oraso puttoti buddhassa urasā hadayena niggataovādānusāsaniṃ sutvā pattaarahattaphaloti attho. Dhammajomhi sunimmitoti dhammato kammaṭṭhānadhammato jāto ariyāya jātiyā sunimmito suṭṭhu nippphāditasabbakicco amhi bhavāmīti attho.
116. த⁴ம்மராஜங் உபக³ம்மாதி த⁴ம்மேன ஸப்³ப³ஸத்தானங் ராஜானங் இஸ்ஸரபூ⁴தங் ப⁴க³வந்தங் உபக³ந்த்வா ஸமீபங் க³ந்த்வாதி அத்தோ². அபுச்சி²ங் பஞ்ஹமுத்தமந்தி உத்தமங் க²ந்தா⁴யதனதா⁴துஸச்சஸமுப்பாதா³தி³படிஸங்யுத்தங் பஞ்ஹங் அபுச்சி²ந்தி அத்தோ². கத²யந்தோ ச மே பஞ்ஹந்தி ஏஸோ அம்ஹாகங் ப⁴க³வா மே மய்ஹங் பஞ்ஹங் கத²யந்தோ ப்³யாகரொந்தோ. த⁴ம்மஸோதங் உபானயீதி அனுபாதி³ஸேஸனிப்³பா³னதா⁴துஸங்கா²தங் த⁴ம்மஸோதங் த⁴ம்மபவாஹங் உபானயி பாவிஸீதி அத்தோ².
116.Dhammarājaṃ upagammāti dhammena sabbasattānaṃ rājānaṃ issarabhūtaṃ bhagavantaṃ upagantvā samīpaṃ gantvāti attho. Apucchiṃ pañhamuttamanti uttamaṃ khandhāyatanadhātusaccasamuppādādipaṭisaṃyuttaṃ pañhaṃ apucchinti attho. Kathayantoca me pañhanti eso amhākaṃ bhagavā me mayhaṃ pañhaṃ kathayanto byākaronto. Dhammasotaṃ upānayīti anupādisesanibbānadhātusaṅkhātaṃ dhammasotaṃ dhammapavāhaṃ upānayi pāvisīti attho.
118. ஜலஜுத்தமனாயகோதி பது³முத்தரனாமகோ ம-காரஸ்ஸ ய-காரங் கத்வா கதவோஹாரோ. நிப்³பா³யி அனுபாதா³னோதி உபாதா³னே பஞ்சக்க²ந்தே⁴ அக்³க³ஹெத்வா நிப்³பா³யி ந பஞ்ஞாயி அத³ஸ்ஸனங் அக³மாஸி, மனுஸ்ஸலோகாதீ³ஸு கத்த²சிபி அபதிட்டி²தோதி அத்தோ². தீ³போவ தேலஸங்க²யாதி வட்டிதேலானங் ஸங்க²யா அபா⁴வா பதீ³போ இவ நிப்³பா³யீதி ஸம்ப³ந்தோ⁴.
118.Jalajuttamanāyakoti padumuttaranāmako ma-kārassa ya-kāraṃ katvā katavohāro. Nibbāyianupādānoti upādāne pañcakkhandhe aggahetvā nibbāyi na paññāyi adassanaṃ agamāsi, manussalokādīsu katthacipi apatiṭṭhitoti attho. Dīpova telasaṅkhayāti vaṭṭitelānaṃ saṅkhayā abhāvā padīpo iva nibbāyīti sambandho.
119. ஸத்தயோஜனிகங் ஆஸீதி தஸ்ஸ பரினிப்³பு³தஸ்ஸ பது³முத்தரஸ்ஸ ப⁴க³வதோ ரதனமயங் தூ²பங் ஸத்தயோஜனுப்³பே³த⁴ங் ஆஸி அஹோஸீதி அத்தோ². த⁴ஜங் தத்த² அபூஜேஸிந்தி தத்த² தஸ்மிங் சேதியே ஸப்³ப³ப⁴த்³த³ங் ஸப்³ப³தோ ப⁴த்³த³ங் ஸப்³ப³ஸோ மனோரமங் த⁴ஜங் பூஜேஸிந்தி அத்தோ².
119.Sattayojanikaṃ āsīti tassa parinibbutassa padumuttarassa bhagavato ratanamayaṃ thūpaṃ sattayojanubbedhaṃ āsi ahosīti attho. Dhajaṃ tattha apūjesinti tattha tasmiṃ cetiye sabbabhaddaṃ sabbato bhaddaṃ sabbaso manoramaṃ dhajaṃ pūjesinti attho.
120. கஸ்ஸபஸ்ஸ ச பு³த்³த⁴ஸ்ஸாதி பது³முத்தரஸ்ஸ ப⁴க³வதோ காலதோ பட்டா²ய ஆக³தஸ்ஸ தே³வமனுஸ்ஸேஸு ஸங்ஸரதோ மே மய்ஹங் ஓரஸோ புத்தோ திஸ்ஸோ நாம கஸ்ஸபஸ்ஸ ஸம்மாஸம்பு³த்³த⁴ஸ்ஸ அக்³க³ஸாவகோ ஜினஸாஸனே பு³த்³த⁴ஸாஸனே தா³யாதோ³ ஆஸி அஹோஸீதி ஸம்ப³ந்தோ⁴.
120.Kassapassa ca buddhassāti padumuttarassa bhagavato kālato paṭṭhāya āgatassa devamanussesu saṃsarato me mayhaṃ oraso putto tisso nāma kassapassa sammāsambuddhassa aggasāvako jinasāsane buddhasāsane dāyādo āsi ahosīti sambandho.
121. தஸ்ஸ ஹீனேன மனஸாதி தஸ்ஸ மம புத்தஸ்ஸ திஸ்ஸஸ்ஸ அக்³க³ஸாவகஸ்ஸ ஹீனேன லாமகேன மனஸா சித்தேன அப⁴த்³த³கங் அஸுந்த³ரங் அயுத்தகங் ‘‘அந்தகோ பச்சி²மோ’’தி வாசங் வசனங் அபா⁴ஸிங் கதே²ஸிந்தி அத்தோ². தேன கம்மவிபாகேனாதி தேன அரஹந்தப⁴க்கா²னஸங்கா²தஸ்ஸ அகுஸலகம்மஸ்ஸ விபாகேன. பச்சி²மே அத்³த³ஸங் ஜினந்தி பச்சி²மே பரியோஸானே பரினிப்³பா³னகாலே மல்லானங் உபவத்தனே ஸாலவனே பரினிப்³பா³னமஞ்சே நிபன்னங் ஜினங் ஜிதஸப்³ப³மாரங் அம்ஹாகங் கோ³தமஸம்மாஸம்பு³த்³த⁴ங் அத்³த³ஸங் அஹந்தி அத்தோ². ‘‘பச்சா² மே ஆஸி ப⁴த்³த³க’’ந்திபி பாடோ². தஸ்ஸ பச்சா² தஸ்ஸ ப⁴க³வதோ அவஸானகாலே நிப்³பா³னாஸன்னகாலே மே மய்ஹங் ப⁴த்³த³கங் ஸுந்த³ரங் சதுஸச்சபடிவிஜ்ஜ²னங் ஆஸி அஹோஸீதி அத்தோ².
121.Tassa hīnena manasāti tassa mama puttassa tissassa aggasāvakassa hīnena lāmakena manasā cittena abhaddakaṃ asundaraṃ ayuttakaṃ ‘‘antako pacchimo’’ti vācaṃ vacanaṃ abhāsiṃ kathesinti attho. Tena kammavipākenāti tena arahantabhakkhānasaṅkhātassa akusalakammassa vipākena. Pacchime addasaṃ jinanti pacchime pariyosāne parinibbānakāle mallānaṃ upavattane sālavane parinibbānamañce nipannaṃ jinaṃ jitasabbamāraṃ amhākaṃ gotamasammāsambuddhaṃ addasaṃ ahanti attho. ‘‘Pacchā me āsi bhaddaka’’ntipi pāṭho. Tassa pacchā tassa bhagavato avasānakāle nibbānāsannakāle me mayhaṃ bhaddakaṃ sundaraṃ catusaccapaṭivijjhanaṃ āsi ahosīti attho.
122. பப்³பா³ஜேஸி மஹாவீரோதி மஹாவீரியோ ஸப்³ப³ஸத்தஹிதோ கருணாயுத்தோ ஜிதமாரோ முனி மல்லானங் உபவத்தனே ஸாலவனே பச்சி²மே ஸயனே பரினிப்³பா³னமஞ்சே ஸயிதோவ மங் பப்³பா³ஜேஸீதி ஸம்ப³ந்தோ⁴.
122.Pabbājesi mahāvīroti mahāvīriyo sabbasattahito karuṇāyutto jitamāro muni mallānaṃ upavattane sālavane pacchime sayane parinibbānamañce sayitova maṃ pabbājesīti sambandho.
123. அஜ்ஜேவ தா³னி பப்³ப³ஜ்ஜாதி அஜ்ஜ ஏவ ப⁴க³வதோ பரினிப்³பா³னதி³வஸேயேவ மம பப்³ப³ஜ்ஜா, ததா² அஜ்ஜ ஏவ உபஸம்பதா³, அஜ்ஜ ஏவ த்³விபது³த்தமஸ்ஸ ஸம்முகா² பரினிப்³பா³னங் அஹோஸீதி ஸம்ப³ந்தோ⁴. ஸேஸங் ஸுவிஞ்ஞெய்யமேவாதி.
123.Ajjevadāni pabbajjāti ajja eva bhagavato parinibbānadivaseyeva mama pabbajjā, tathā ajja eva upasampadā, ajja eva dvipaduttamassa sammukhā parinibbānaṃ ahosīti sambandho. Sesaṃ suviññeyyamevāti.
ஸுப⁴த்³த³த்தே²ரஅபதா³னவண்ணனா ஸமத்தா.
Subhaddattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. ஸுப⁴த்³த³த்தே²ரஅபதா³னங் • 9. Subhaddattheraapadānaṃ
