| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৯. সুভদ্দত্থেরঅপদানৰণ্ণনা
9. Subhaddattheraapadānavaṇṇanā
পদুমুত্তরো লোকৰিদূতিআদিকং আযস্মতো সুভদ্দত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে নিব্বানাধিগমনত্থায পুঞ্ঞানি উপচিনন্তো পদুমুত্তরস্স ভগৰতো কালে ৰিভৰসম্পন্নে সদ্ধাসম্পন্নে একস্মিং কুলগেহে নিব্বতো ৰিঞ্ঞুতং পত্ৰা ঘরবন্ধনেন বদ্ধো রতনত্তযে পসন্নো পরিনিব্বানমঞ্চে নিপন্নং পদুমুত্তরং ভগৰন্তং দিস্ৰা সন্নিপতিতা দসসহস্সচক্কৰাল়দেৰতাযো চ দিস্ৰা পসন্নমানসো নিগ্গুণ্ডিকেটকনীলকাসোকাসিতাদিঅনেকেহি সুগন্ধপুপ্ফেহি পূজেসি। সো তেন পুঞ্ঞকম্মেন যাৰতাযুকং ঠত্ৰা ততো চৰিত্ৰা তুসিতাদীসু দিব্বসম্পত্তিযো অনুভৰিত্ৰা ততো মনুস্সেসু মনুস্সসম্পত্তিযো অনুভৰিত্ৰা নিব্বত্তনিব্বত্তট্ঠানেসু চ সুগন্ধেহি পুপ্ফেহি পূজিতো অহোসি। ইমস্মিং পন বুদ্ধুপ্পাদে একস্মিং ৰিভৰসম্পন্নে কুলে নিব্বত্তিত্ৰা ৰিঞ্ঞুতং পত্তো কামেসু আদীনৰং দিস্ৰাপি যাৰ বুদ্ধস্স ভগৰতো পরিনিব্বানকালো তাৰ অলদ্ধবুদ্ধদস্সনো ভগৰতো পরিনিব্বানমঞ্চে নিপন্নকালেযেৰ পব্বজিত্ৰা অরহত্তং পাপুণি। পুব্বে কতপুঞ্ঞনামেন সুভদ্দোতি পাকটো অহোসি।
Padumuttarolokavidūtiādikaṃ āyasmato subhaddattherassa apadānaṃ. Ayampi purimabuddhesu katādhikāro tattha tattha bhave nibbānādhigamanatthāya puññāni upacinanto padumuttarassa bhagavato kāle vibhavasampanne saddhāsampanne ekasmiṃ kulagehe nibbato viññutaṃ patvā gharabandhanena baddho ratanattaye pasanno parinibbānamañce nipannaṃ padumuttaraṃ bhagavantaṃ disvā sannipatitā dasasahassacakkavāḷadevatāyo ca disvā pasannamānaso nigguṇḍikeṭakanīlakāsokāsitādianekehi sugandhapupphehi pūjesi. So tena puññakammena yāvatāyukaṃ ṭhatvā tato cavitvā tusitādīsu dibbasampattiyo anubhavitvā tato manussesu manussasampattiyo anubhavitvā nibbattanibbattaṭṭhānesu ca sugandhehi pupphehi pūjito ahosi. Imasmiṃ pana buddhuppāde ekasmiṃ vibhavasampanne kule nibbattitvā viññutaṃ patto kāmesu ādīnavaṃ disvāpi yāva buddhassa bhagavato parinibbānakālo tāva aladdhabuddhadassano bhagavato parinibbānamañce nipannakāleyeva pabbajitvā arahattaṃ pāpuṇi. Pubbe katapuññanāmena subhaddoti pākaṭo ahosi.
১০১. সো অত্তনো পুব্বকম্মং সরিত্ৰা সোমনস্সৰসেন পুব্বচরিতাপদানং পকাসেন্তো পদুমুত্তরো লোকৰিদূতিআদিমাহ। তং উত্তানত্থমেৰ। সুণাথ মম ভাসতো…পে॰… নিব্বাযিস্সতিনাসৰোতি ইদং পরিনিব্বানমঞ্চে নিপন্নোৰ পদুমুত্তরো ভগৰা ব্যাকাসি।
101. So attano pubbakammaṃ saritvā somanassavasena pubbacaritāpadānaṃ pakāsento padumuttaro lokavidūtiādimāha. Taṃ uttānatthameva. Suṇātha mama bhāsato…pe… nibbāyissatināsavoti idaṃ parinibbānamañce nipannova padumuttaro bhagavā byākāsi.
পঞ্চমভাণৰারৰণ্ণনা সমত্তা।
Pañcamabhāṇavāravaṇṇanā samattā.
১১৫. সো অত্তনো পটিপত্তিং দস্সেন্তো পুব্বকম্মেন সংযুত্তোতিআদিমাহ। একগ্গোতি একগ্গচিত্তো। সুসমাহিতোতি সুট্ঠু সমাহিতো, সন্তকাযচিত্তোতি অত্থো। বুদ্ধস্স ওরসো পুত্তোতি বুদ্ধস্স উরসা হদযেন নিগ্গতওৰাদানুসাসনিং সুত্ৰা পত্তঅরহত্তফলোতি অত্থো। ধম্মজোম্হি সুনিম্মিতোতি ধম্মতো কম্মট্ঠানধম্মতো জাতো অরিযায জাতিযা সুনিম্মিতো সুট্ঠু নিপ্প্ফাদিতসব্বকিচ্চো অম্হি ভৰামীতি অত্থো।
115. So attano paṭipattiṃ dassento pubbakammena saṃyuttotiādimāha. Ekaggoti ekaggacitto. Susamāhitoti suṭṭhu samāhito, santakāyacittoti attho. Buddhassa oraso puttoti buddhassa urasā hadayena niggataovādānusāsaniṃ sutvā pattaarahattaphaloti attho. Dhammajomhi sunimmitoti dhammato kammaṭṭhānadhammato jāto ariyāya jātiyā sunimmito suṭṭhu nippphāditasabbakicco amhi bhavāmīti attho.
১১৬. ধম্মরাজং উপগম্মাতি ধম্মেন সব্বসত্তানং রাজানং ইস্সরভূতং ভগৰন্তং উপগন্ত্ৰা সমীপং গন্ত্ৰাতি অত্থো। অপুচ্ছিং পঞ্হমুত্তমন্তি উত্তমং খন্ধাযতনধাতুসচ্চসমুপ্পাদাদিপটিসংযুত্তং পঞ্হং অপুচ্ছিন্তি অত্থো। কথযন্তো চ মে পঞ্হন্তি এসো অম্হাকং ভগৰা মে ময্হং পঞ্হং কথযন্তো ব্যাকরোন্তো। ধম্মসোতং উপানযীতি অনুপাদিসেসনিব্বানধাতুসঙ্খাতং ধম্মসোতং ধম্মপৰাহং উপানযি পাৰিসীতি অত্থো।
116.Dhammarājaṃ upagammāti dhammena sabbasattānaṃ rājānaṃ issarabhūtaṃ bhagavantaṃ upagantvā samīpaṃ gantvāti attho. Apucchiṃ pañhamuttamanti uttamaṃ khandhāyatanadhātusaccasamuppādādipaṭisaṃyuttaṃ pañhaṃ apucchinti attho. Kathayantoca me pañhanti eso amhākaṃ bhagavā me mayhaṃ pañhaṃ kathayanto byākaronto. Dhammasotaṃ upānayīti anupādisesanibbānadhātusaṅkhātaṃ dhammasotaṃ dhammapavāhaṃ upānayi pāvisīti attho.
১১৮. জলজুত্তমনাযকোতি পদুমুত্তরনামকো ম-কারস্স য-কারং কত্ৰা কতৰোহারো। নিব্বাযি অনুপাদানোতি উপাদানে পঞ্চক্খন্ধে অগ্গহেত্ৰা নিব্বাযি ন পঞ্ঞাযি অদস্সনং অগমাসি, মনুস্সলোকাদীসু কত্থচিপি অপতিট্ঠিতোতি অত্থো। দীপোৰ তেলসঙ্খযাতি ৰট্টিতেলানং সঙ্খযা অভাৰা পদীপো ইৰ নিব্বাযীতি সম্বন্ধো।
118.Jalajuttamanāyakoti padumuttaranāmako ma-kārassa ya-kāraṃ katvā katavohāro. Nibbāyianupādānoti upādāne pañcakkhandhe aggahetvā nibbāyi na paññāyi adassanaṃ agamāsi, manussalokādīsu katthacipi apatiṭṭhitoti attho. Dīpova telasaṅkhayāti vaṭṭitelānaṃ saṅkhayā abhāvā padīpo iva nibbāyīti sambandho.
১১৯. সত্তযোজনিকং আসীতি তস্স পরিনিব্বুতস্স পদুমুত্তরস্স ভগৰতো রতনমযং থূপং সত্তযোজনুব্বেধং আসি অহোসীতি অত্থো। ধজং তত্থ অপূজেসিন্তি তত্থ তস্মিং চেতিযে সব্বভদ্দং সব্বতো ভদ্দং সব্বসো মনোরমং ধজং পূজেসিন্তি অত্থো।
119.Sattayojanikaṃ āsīti tassa parinibbutassa padumuttarassa bhagavato ratanamayaṃ thūpaṃ sattayojanubbedhaṃ āsi ahosīti attho. Dhajaṃ tattha apūjesinti tattha tasmiṃ cetiye sabbabhaddaṃ sabbato bhaddaṃ sabbaso manoramaṃ dhajaṃ pūjesinti attho.
১২০. কস্সপস্স চ বুদ্ধস্সাতি পদুমুত্তরস্স ভগৰতো কালতো পট্ঠায আগতস্স দেৰমনুস্সেসু সংসরতো মে ময্হং ওরসো পুত্তো তিস্সো নাম কস্সপস্স সম্মাসম্বুদ্ধস্স অগ্গসাৰকো জিনসাসনে বুদ্ধসাসনে দাযাদো আসি অহোসীতি সম্বন্ধো।
120.Kassapassa ca buddhassāti padumuttarassa bhagavato kālato paṭṭhāya āgatassa devamanussesu saṃsarato me mayhaṃ oraso putto tisso nāma kassapassa sammāsambuddhassa aggasāvako jinasāsane buddhasāsane dāyādo āsi ahosīti sambandho.
১২১. তস্স হীনেন মনসাতি তস্স মম পুত্তস্স তিস্সস্স অগ্গসাৰকস্স হীনেন লামকেন মনসা চিত্তেন অভদ্দকং অসুন্দরং অযুত্তকং ‘‘অন্তকো পচ্ছিমো’’তি ৰাচং ৰচনং অভাসিং কথেসিন্তি অত্থো। তেন কম্মৰিপাকেনাতি তেন অরহন্তভক্খানসঙ্খাতস্স অকুসলকম্মস্স ৰিপাকেন। পচ্ছিমে অদ্দসং জিনন্তি পচ্ছিমে পরিযোসানে পরিনিব্বানকালে মল্লানং উপৰত্তনে সালৰনে পরিনিব্বানমঞ্চে নিপন্নং জিনং জিতসব্বমারং অম্হাকং গোতমসম্মাসম্বুদ্ধং অদ্দসং অহন্তি অত্থো। ‘‘পচ্ছা মে আসি ভদ্দক’’ন্তিপি পাঠো। তস্স পচ্ছা তস্স ভগৰতো অৰসানকালে নিব্বানাসন্নকালে মে ময্হং ভদ্দকং সুন্দরং চতুসচ্চপটিৰিজ্ঝনং আসি অহোসীতি অত্থো।
121.Tassa hīnena manasāti tassa mama puttassa tissassa aggasāvakassa hīnena lāmakena manasā cittena abhaddakaṃ asundaraṃ ayuttakaṃ ‘‘antako pacchimo’’ti vācaṃ vacanaṃ abhāsiṃ kathesinti attho. Tena kammavipākenāti tena arahantabhakkhānasaṅkhātassa akusalakammassa vipākena. Pacchime addasaṃ jinanti pacchime pariyosāne parinibbānakāle mallānaṃ upavattane sālavane parinibbānamañce nipannaṃ jinaṃ jitasabbamāraṃ amhākaṃ gotamasammāsambuddhaṃ addasaṃ ahanti attho. ‘‘Pacchā me āsi bhaddaka’’ntipi pāṭho. Tassa pacchā tassa bhagavato avasānakāle nibbānāsannakāle me mayhaṃ bhaddakaṃ sundaraṃ catusaccapaṭivijjhanaṃ āsi ahosīti attho.
১২২. পব্বাজেসি মহাৰীরোতি মহাৰীরিযো সব্বসত্তহিতো করুণাযুত্তো জিতমারো মুনি মল্লানং উপৰত্তনে সালৰনে পচ্ছিমে সযনে পরিনিব্বানমঞ্চে সযিতোৰ মং পব্বাজেসীতি সম্বন্ধো।
122.Pabbājesi mahāvīroti mahāvīriyo sabbasattahito karuṇāyutto jitamāro muni mallānaṃ upavattane sālavane pacchime sayane parinibbānamañce sayitova maṃ pabbājesīti sambandho.
১২৩. অজ্জেৰ দানি পব্বজ্জাতি অজ্জ এৰ ভগৰতো পরিনিব্বানদিৰসেযেৰ মম পব্বজ্জা, তথা অজ্জ এৰ উপসম্পদা, অজ্জ এৰ দ্ৰিপদুত্তমস্স সম্মুখা পরিনিব্বানং অহোসীতি সম্বন্ধো। সেসং সুৰিঞ্ঞেয্যমেৰাতি।
123.Ajjevadāni pabbajjāti ajja eva bhagavato parinibbānadivaseyeva mama pabbajjā, tathā ajja eva upasampadā, ajja eva dvipaduttamassa sammukhā parinibbānaṃ ahosīti sambandho. Sesaṃ suviññeyyamevāti.
সুভদ্দত্থেরঅপদানৰণ্ণনা সমত্তা।
Subhaddattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৯. সুভদ্দত্থেরঅপদানং • 9. Subhaddattheraapadānaṃ
