| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
14. д̇им̣санибаад̇о
14. Tiṃsanipāto
1. субхааж̇ийвагамб̣аванигаат̇зрийг̇аат̇ааван̣н̣анаа
1. Subhājīvakambavanikātherīgāthāvaṇṇanā
д̇им̣санибаад̇з ж̇ийвагамб̣аванам̣ рамманд̇иаад̣̇игаа субхааяа ж̇ийвагамб̣аванигааяа т̇зрияаа г̇аат̇аа. аяамби буримаб̣уд̣̇д̇хзсу гад̇аад̇хигаараа д̇ад̇т̇а д̇ад̇т̇а бхавз виваддуубаниссаяам̣ гусалам̣ убажинанд̇ий, самбхаавид̇агусаламуулаа ануггамзна бариб̣руухид̇авимогкасамбхаараа барибагган̃аан̣аа худ̇ваа, имасмим̣ б̣уд̣̇д̇хуббаад̣̇з рааж̇аг̇ахз б̣раахман̣амахаасаалагулз ниб̣б̣ад̇д̇и, субхаад̇иссаа наамамахоси. д̇ассаа гира сарийрааваяаваа собханаван̣н̣аяуд̇д̇аа ахзсум̣, д̇асмаа субхаад̇и анвад̇т̇амзва наамам̣ ж̇аад̇ам̣. саа сад̇т̇у рааж̇аг̇ахаббавзсанз бадилад̣̇д̇хасад̣̇д̇хаа убаасигаа худ̇ваа абарабхааг̇з сам̣саарз ж̇аад̇асам̣взг̇аа гаамзсу аад̣̇ийнавам̣ д̣̇исваа нзгкамман̃жа кзмад̇о саллагканд̇ий махаабаж̇аабад̇ияаа г̇од̇амияаа санд̇игз баб̣б̣аж̇ид̇ваа вибассанааяа гаммам̣ гаронд̇ий гад̇ибаахзнзва анааг̇аамипалз бад̇идтааси.
Tiṃsanipāte jīvakambavanaṃ rammantiādikā subhāya jīvakambavanikāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī, sambhāvitakusalamūlā anukkamena paribrūhitavimokkhasambhārā paripakkañāṇā hutvā, imasmiṃ buddhuppāde rājagahe brāhmaṇamahāsālakule nibbatti, subhātissā nāmamahosi. Tassā kira sarīrāvayavā sobhanavaṇṇayuttā ahesuṃ, tasmā subhāti anvatthameva nāmaṃ jātaṃ. Sā satthu rājagahappavesane paṭiladdhasaddhā upāsikā hutvā aparabhāge saṃsāre jātasaṃvegā kāmesu ādīnavaṃ disvā nekkhammañca khemato sallakkhantī mahāpajāpatiyā gotamiyā santike pabbajitvā vipassanāya kammaṃ karontī katipāheneva anāgāmiphale patiṭṭhāsi.
ат̇а нам̣ згад̣̇ивасам̣ ан̃н̃ад̇аро рааж̇аг̇ахаваасий д̇худ̇д̇абурисо д̇арун̣о батамаяоб̣б̣анз тид̇о ж̇ийвагамб̣аванз д̣̇иваавихаарааяа г̇ажчанд̇им̣ д̣̇исваа бадиб̣ад̣̇д̇хажид̇д̇о худ̇ваа маг̇г̇ам̣ оваранд̇о гаамзхи ниманд̇зси. саа д̇асса наанаббагаарзхи гаамаанам̣ аад̣̇ийнавам̣ ад̇д̇ано жа нзгкаммаж̇жхаасаяам̣ бавзд̣̇знд̇ий д̇хаммам̣ гат̇зси. со д̇хаммагат̇ам̣ суд̇вааби на бадиггамад̇и, ниб̣анд̇хад̇иязва. т̇зрий нам̣ ад̇д̇ано важанз ад̇идтанд̇ам̣ агкимхи жа абхирад̇д̇ам̣ д̣̇исваа, ‘‘ханд̣̇а, д̇аяаа самбхаавид̇ам̣ агки’’нд̇и ад̇д̇ано згам̣ агким̣ уббаадзд̇ваа д̇асса убанзси. д̇ад̇о со бурисо санд̇аасо сам̣взг̇аж̇аад̇о д̇ад̇т̇а виг̇ад̇арааг̇ова худ̇ваа т̇зрим̣ камаабзд̇ваа г̇ад̇о. т̇зрий сад̇т̇у санд̇игам̣ аг̇амааси. сад̇т̇уно саха д̣̇ассанзнзвассаа агки бадибаагад̇игам̣ ахоси. д̇ад̇о саа б̣уд̣̇д̇хаг̇ад̇ааяа бийд̇ияаа ниранд̇арам̣ пудаа худ̇ваа адтааси. сад̇т̇аа д̇ассаа жид̇д̇аажаарам̣ н̃ад̇ваа д̇хаммам̣ д̣̇зсзд̇ваа аг̇г̇амаг̇г̇ад̇т̇ааяа гаммадтаанам̣ аажигки. саа бийд̇им̣ вигкамбхзд̇ваа д̇аавад̣̇зва вибассанам̣ вад̣дхзд̇ваа саха бадисамбхид̣̇аахи арахад̇д̇ам̣ баабун̣и. арахад̇д̇ам̣ бана бад̇ваа паласукзна ниб̣б̣аанасукзна вихаранд̇ий ад̇д̇ано бадибад̇д̇им̣ бажжавзгкид̇ваа ад̇д̇анаа д̇зна жа д̇худ̇д̇абурисзна вуд̇д̇аг̇аат̇аа уд̣̇аанавасзна –
Atha naṃ ekadivasaṃ aññataro rājagahavāsī dhuttapuriso taruṇo paṭhamayobbane ṭhito jīvakambavane divāvihārāya gacchantiṃ disvā paṭibaddhacitto hutvā maggaṃ ovaranto kāmehi nimantesi. Sā tassa nānappakārehi kāmānaṃ ādīnavaṃ attano ca nekkhammajjhāsayaṃ pavedentī dhammaṃ kathesi. So dhammakathaṃ sutvāpi na paṭikkamati, nibandhatiyeva. Therī naṃ attano vacane atiṭṭhantaṃ akkhimhi ca abhirattaṃ disvā, ‘‘handa, tayā sambhāvitaṃ akkhi’’nti attano ekaṃ akkhiṃ uppāṭetvā tassa upanesi. Tato so puriso santāso saṃvegajāto tattha vigatarāgova hutvā theriṃ khamāpetvā gato. Therī satthu santikaṃ agamāsi. Satthuno saha dassanenevassā akkhi paṭipākatikaṃ ahosi. Tato sā buddhagatāya pītiyā nirantaraṃ phuṭā hutvā aṭṭhāsi. Satthā tassā cittācāraṃ ñatvā dhammaṃ desetvā aggamaggatthāya kammaṭṭhānaṃ ācikkhi. Sā pītiṃ vikkhambhetvā tāvadeva vipassanaṃ vaḍḍhetvā saha paṭisambhidāhi arahattaṃ pāpuṇi. Arahattaṃ pana patvā phalasukhena nibbānasukhena viharantī attano paṭipattiṃ paccavekkhitvā attanā tena ca dhuttapurisena vuttagāthā udānavasena –
368.
368.
‘‘ж̇ийвагамб̣аванам̣ раммам̣, г̇ажчанд̇им̣ бхигкуним̣ субхам̣;
‘‘Jīvakambavanaṃ rammaṃ, gacchantiṃ bhikkhuniṃ subhaṃ;
д̇худ̇д̇аго санниваарзси, д̇амзнам̣ аб̣равий субхаа.
Dhuttako sannivāresi, tamenaṃ abravī subhā.
369.
369.
‘‘гим̣ д̇з абараад̇хид̇ам̣ маяаа, яам̣ мам̣ оварияаана д̇идтаси;
‘‘Kiṃ te aparādhitaṃ mayā, yaṃ maṃ ovariyāna tiṭṭhasi;
на хи баб̣б̣аж̇ид̇ааяа аавусо, бурисо сампусанааяа габбад̇и.
Na hi pabbajitāya āvuso, puriso samphusanāya kappati.
370.
370.
‘‘г̇аругз мама сад̇т̇усаасанз, яаа сигкаа суг̇ад̇зна д̣̇зсид̇аа;
‘‘Garuke mama satthusāsane, yā sikkhā sugatena desitā;
барисуд̣̇д̇хабад̣̇ам̣ анан̇г̇ан̣ам̣, гим̣ мам̣ оварияаана д̇идтаси.
Parisuddhapadaṃ anaṅgaṇaṃ, kiṃ maṃ ovariyāna tiṭṭhasi.
371.
371.
‘‘аавилажид̇д̇о анаавилам̣, сараж̇о вийд̇араж̇ам̣ анан̇г̇ан̣ам̣;
‘‘Āvilacitto anāvilaṃ, sarajo vītarajaṃ anaṅgaṇaṃ;
саб̣б̣ад̇т̇а вимуд̇д̇амаанасам̣, гим̣ мам̣ оварияаана д̇идтаси.
Sabbattha vimuttamānasaṃ, kiṃ maṃ ovariyāna tiṭṭhasi.
372.
372.
‘‘д̣̇ахараа жа абаабигаа жаси, гим̣ д̇з баб̣б̣аж̇ж̇аа гариссад̇и;
‘‘Daharā ca apāpikā casi, kiṃ te pabbajjā karissati;
нигкиба гаасааяажийварам̣, зхи рамаама субубпид̇з ванз.
Nikkhipa kāsāyacīvaraṃ, ehi ramāma supupphite vane.
373.
373.
‘‘мад̇хуран̃жа баванд̇и саб̣б̣асо, гусумараж̇зна самудтид̇аа д̣̇умаа;
‘‘Madhurañca pavanti sabbaso, kusumarajena samuṭṭhitā dumā;
батамавасанд̇о суко уд̇у, зхи рамаама субубпид̇з ванз.
Paṭhamavasanto sukho utu, ehi ramāma supupphite vane.
374.
374.
‘‘гусумид̇асикараа жа баад̣̇абаа, абхиг̇аж̇ж̇анд̇ива маалуд̇зрид̇аа;
‘‘Kusumitasikharā ca pādapā, abhigajjantiva māluteritā;
гаа д̇уяхам̣ рад̇и бхависсад̇и, яад̣̇и згаа ванамог̇ахиссаси.
Kā tuyhaṃ rati bhavissati, yadi ekā vanamogahissasi.
375.
375.
‘‘ваал̣амиг̇асан̇гхасзвид̇ам̣, гун̃ж̇арамад̇д̇агарзн̣улол̣ид̇ам̣;
‘‘Vāḷamigasaṅghasevitaṃ, kuñjaramattakareṇuloḷitaṃ;
асахааяигаа г̇анд̇умижчаси, рахид̇ам̣ бхим̣санагам̣ махааванам̣.
Asahāyikā gantumicchasi, rahitaṃ bhiṃsanakaṃ mahāvanaṃ.
376.
376.
‘‘д̇абанийяагад̇аава д̇хийд̇игаа, вижараси жид̇д̇алад̇зва ажчараа;
‘‘Tapanīyakatāva dhītikā, vicarasi cittalateva accharā;
гаасигасукумзхи ваг̇г̇убхи, собхасий сувасанзхи нуубамз.
Kāsikasukhumehi vaggubhi, sobhasī suvasanehi nūpame.
377.
377.
‘‘ахам̣ д̇ава васаануг̇о сияам̣, яад̣̇и вихарзмасз гаанананд̇арз;
‘‘Ahaṃ tava vasānugo siyaṃ, yadi viharemase kānanantare;
на хи мад̇т̇и д̇аяаа бияад̇д̇аро, баан̣о гиннариманд̣̇аложанз.
Na hi matthi tayā piyattaro, pāṇo kinnarimandalocane.
378.
378.
‘‘яад̣̇и мз важанам̣ гариссаси, сукид̇аа зхи аг̇аарамааваса;
‘‘Yadi me vacanaṃ karissasi, sukhitā ehi agāramāvasa;
баасаад̣̇аниваад̇аваасиний, баригаммам̣ д̇з гаронд̇у наарияо.
Pāsādanivātavāsinī, parikammaṃ te karontu nāriyo.
379.
379.
‘‘гаасигасукумаани д̇хаараяа, абхиробзхи жа маалаван̣н̣агам̣;
‘‘Kāsikasukhumāni dhāraya, abhiropehi ca mālavaṇṇakaṃ;
ган̃жанаман̣имуд̇д̇агам̣ б̣ахум̣, вивид̇хам̣ аабхаран̣ам̣ гароми д̇з.
Kañcanamaṇimuttakaṃ bahuṃ, vividhaṃ ābharaṇaṃ karomi te.
380.
380.
‘‘суд̇ход̇араж̇абажчад̣̇ам̣ субхам̣, г̇онагад̇уулигасант̇ад̇ам̣ навам̣;
‘‘Sudhotarajapacchadaṃ subhaṃ, gonakatūlikasanthataṃ navaṃ;
абхируха саяанам̣ махаарахам̣, жанд̣̇анаман̣д̣ид̇асаараг̇анд̇хигам̣.
Abhiruha sayanaṃ mahārahaṃ, candanamaṇḍitasāragandhikaṃ.
381.
381.
‘‘уббалам̣ жуд̣̇агаа самуг̇г̇ад̇ам̣, яат̇аа д̇ам̣ амануссасзвид̇ам̣;
‘‘Uppalaṃ cudakā samuggataṃ, yathā taṃ amanussasevitaṃ;
звам̣ д̇вам̣ б̣рахмажаариний, сагзсан̇г̇зсу ж̇арам̣ г̇амиссаси.
Evaṃ tvaṃ brahmacārinī, sakesaṅgesu jaraṃ gamissasi.
382.
382.
‘‘гим̣ д̇з ид̇ха саарасаммад̇ам̣, гун̣абабуурамхи сусаанавад̣дханз;
‘‘Kiṃ te idha sārasammataṃ, kuṇapapūramhi susānavaḍḍhane;
бхзд̣̇анад̇хаммз гал̣зварз, яам̣ д̣̇исваа вимано уд̣̇игкаси.
Bhedanadhamme kaḷevare, yaṃ disvā vimano udikkhasi.
383.
383.
‘‘агкийни жа д̇уурияаарива, гиннарияаарива баб̣б̣ад̇анд̇арз;
‘‘Akkhīni ca tūriyāriva, kinnariyāriva pabbatantare;
д̇ава мз наяанаани д̣̇агкияа, бхияяо гаамарад̇ий бавад̣дхад̇и.
Tava me nayanāni dakkhiya, bhiyyo kāmaratī pavaḍḍhati.
384.
384.
‘‘уббаласикаробамаани д̇з, вималз хаадагасаннибхз мукз;
‘‘Uppalasikharopamāni te, vimale hāṭakasannibhe mukhe;
д̇ава мз наяанаани д̣̇агкияа, бхияяо гаамаг̇ун̣о бавад̣дхад̇и.
Tava me nayanāni dakkhiya, bhiyyo kāmaguṇo pavaḍḍhati.
385.
385.
‘‘аби д̣̇уураг̇ад̇аа сарамхасз, ааяад̇абамхз висуд̣̇д̇хад̣̇ассанз;
‘‘Api dūragatā saramhase, āyatapamhe visuddhadassane;
на хи мад̇т̇и д̇аяаа бияад̇д̇аро, наяанаа гиннариманд̣̇аложанз.
Na hi matthi tayā piyattaro, nayanā kinnarimandalocane.
386.
386.
‘‘абат̇зна баяаад̇умижчаси, жанд̣̇ам̣ гийл̣анагам̣ г̇авзсаси;
‘‘Apathena payātumicchasi, candaṃ kīḷanakaṃ gavesasi;
мзрум̣ лан̇гхзд̇умижчаси, яо д̇вам̣ б̣уд̣̇д̇хасуд̇ам̣ маг̇г̇аяаси.
Meruṃ laṅghetumicchasi, yo tvaṃ buddhasutaṃ maggayasi.
387.
387.
‘‘над̇т̇и хи логз сад̣̇звагз, рааг̇о яад̇т̇аби д̣̇аани мз сияаа;
‘‘Natthi hi loke sadevake, rāgo yatthapi dāni me siyā;
наби нам̣ ж̇аанаами гийрисо, ат̇а маг̇г̇зна хад̇о самуулаго.
Napi naṃ jānāmi kīriso, atha maggena hato samūlako.
388.
388.
‘‘ин̇г̇аалагуяаава уж̇жхид̇о, висабад̇д̇орива аг̇г̇ид̇о гад̇о;
‘‘Iṅgālakuyāva ujjhito, visapattoriva aggito kato;
наби нам̣ бассаами гийрисо, ат̇а маг̇г̇зна хад̇о самуулаго.
Napi naṃ passāmi kīriso, atha maggena hato samūlako.
389.
389.
‘‘яассаа сияаа абажжавзгкид̇ам̣, сад̇т̇аа ваа анубаасид̇о сияаа;
‘‘Yassā siyā apaccavekkhitaṃ, satthā vā anupāsito siyā;
д̇вам̣ д̇аад̣̇исигам̣ балобхаяа, ж̇аананд̇им̣ со имам̣ вихан̃н̃аси.
Tvaṃ tādisikaṃ palobhaya, jānantiṃ so imaṃ vihaññasi.
390.
390.
‘‘маяхан̃хи аггудтаванд̣̇ид̇з, сукад̣̇угкз жа сад̇ий убадтид̇аа;
‘‘Mayhañhi akkuṭṭhavandite, sukhadukkhe ca satī upaṭṭhitā;
сан̇кад̇амасубханд̇и ж̇аанияа, саб̣б̣ад̇т̇зва мано на лимбад̇и.
Saṅkhatamasubhanti jāniya, sabbattheva mano na limpati.
391.
391.
‘‘саахам̣ суг̇ад̇асса саавигаа, маг̇г̇адтан̇г̇игаяаанаяааяиний;
‘‘Sāhaṃ sugatassa sāvikā, maggaṭṭhaṅgikayānayāyinī;
уд̣̇д̇хадасаллаа анаасаваа, сун̃н̃ааг̇аараг̇ад̇аа рамаамахам̣.
Uddhaṭasallā anāsavā, suññāgāragatā ramāmahaṃ.
392.
392.
‘‘д̣̇идтаа хи маяаа сужид̇д̇ид̇аа, сомбхаа д̣̇ааругабиллагаани ваа;
‘‘Diṭṭhā hi mayā sucittitā, sombhā dārukapillakāni vā;
д̇анд̇ийхи жа кийлагзхи жа, виниб̣ад̣̇д̇хаа вивид̇хам̣ банажжагаа.
Tantīhi ca khīlakehi ca, vinibaddhā vividhaṃ panaccakā.
393.
393.
‘‘д̇амхуд̣̇д̇хадз д̇анд̇икийлагз, виссадтз вигалз баригрид̇з;
‘‘Tamhuddhaṭe tantikhīlake, vissaṭṭhe vikale parikrite;
на винд̣̇зяяа кан̣д̣асо гад̇з, гимхи д̇ад̇т̇а манам̣ нивзсаяз.
Na vindeyya khaṇḍaso kate, kimhi tattha manaṃ nivesaye.
394.
394.
‘‘д̇ат̇уубамаа д̣̇зхагаани мам̣, д̇зхи д̇хаммзхи винаа на вад̇д̇анд̇и;
‘‘Tathūpamā dehakāni maṃ, tehi dhammehi vinā na vattanti;
д̇хаммзхи винаа на вад̇д̇ад̇и, гимхи д̇ад̇т̇а манам̣ нивзсаяз.
Dhammehi vinā na vattati, kimhi tattha manaṃ nivesaye.
395.
395.
‘‘яат̇аа харид̇аалзна магкид̇ам̣, ад̣̇д̣̇аса жид̇д̇игам̣ бхид̇д̇ияаа гад̇ам̣;
‘‘Yathā haritālena makkhitaṃ, addasa cittikaṃ bhittiyā kataṃ;
д̇амхи д̇з вибарийд̇ад̣̇ассанам̣, сан̃н̃аа маанусигаа нирад̇т̇игаа.
Tamhi te viparītadassanaṃ, saññā mānusikā niratthikā.
396.
396.
‘‘мааяам̣ вияа аг̇г̇ад̇о гад̇ам̣, субинанд̇зва суван̣н̣абаад̣̇абам̣;
‘‘Māyaṃ viya aggato kataṃ, supinanteva suvaṇṇapādapaṃ;
убаг̇ажчаси анд̇ха рид̇д̇агам̣, ж̇анамаж̇жхзрива руббаруубагам̣.
Upagacchasi andha rittakaṃ, janamajjheriva rupparūpakaṃ.
397.
397.
‘‘вадданирива годарохид̇аа, маж̇жхз буб̣б̣ул̣агаа саассугаа;
‘‘Vaṭṭaniriva koṭarohitā, majjhe pubbuḷakā saassukā;
бийл̣агол̣игаа жзд̇т̇а ж̇ааяад̇и, вивид̇хаа жагкувид̇хаа жа бин̣д̣ид̇аа.
Pīḷakoḷikā cettha jāyati, vividhā cakkhuvidhā ca piṇḍitā.
398.
398.
‘‘уббаадияа жааруд̣̇ассанаа, на жа баж̇ж̇ид̇т̇а асан̇г̇амаанасаа;
‘‘Uppāṭiya cārudassanā, na ca pajjittha asaṅgamānasā;
ханд̣̇а д̇з жагкум̣ харассу д̇ам̣, д̇асса нарасса ад̣̇ааси д̇аавад̣̇з.
Handa te cakkhuṃ harassu taṃ, tassa narassa adāsi tāvade.
399.
399.
‘‘д̇асса жа вирамааси д̇аавад̣̇з, рааг̇о д̇ад̇т̇а камаабаяий жа нам̣;
‘‘Tassa ca viramāsi tāvade, rāgo tattha khamāpayī ca naṃ;
сод̇т̇и сияаа б̣рахмажаариний, на буно зд̣̇исагам̣ бхависсад̇и.
Sotthi siyā brahmacārinī, na puno edisakaṃ bhavissati.
400.
400.
‘‘аасаад̣̇ияа зд̣̇исам̣ ж̇анам̣, аг̇г̇им̣ баж̇ж̇алид̇ам̣ва лин̇г̇ияа;
‘‘Āsādiya edisaṃ janaṃ, aggiṃ pajjalitaṃva liṅgiya;
г̇ан̣хияа аасийвисам̣ вияа, аби ну сод̇т̇и сияаа камзхи но.
Gaṇhiya āsīvisaṃ viya, api nu sotthi siyā khamehi no.
401.
401.
‘‘муд̇д̇аа жа д̇ад̇о саа бхигкуний, аг̇амий б̣уд̣̇д̇хаварасса санд̇игам̣;
‘‘Muttā ca tato sā bhikkhunī, agamī buddhavarassa santikaṃ;
бассияа варабун̃н̃алагкан̣ам̣, жагку ааси яат̇аа бураан̣ага’’нд̇и. –
Passiya varapuññalakkhaṇaṃ, cakkhu āsi yathā purāṇaka’’nti. –
имаа г̇аат̇аа бажжуд̣̇аахааси.
Imā gāthā paccudāhāsi.
д̇ад̇т̇а ж̇ийвагамб̣авананд̇и ж̇ийвагасса гомаарабхажжасса амб̣аванам̣. рамманд̇и раман̣ийяам̣. д̇ам̣ гира бхуумибхааг̇асамбад̇д̇ияаа чааяууд̣̇агасамбад̇д̇ияаа жа ругкаанам̣ робид̇аагаарзна ад̇ивияа манун̃н̃ам̣ манорамам̣. г̇ажчанд̇инд̇и амб̣аванам̣ уд̣̇д̣̇исса г̇ад̇ам̣, д̣̇иваавихаарааяа убаг̇ажчанд̇им̣. субханд̇и звам̣наамигам̣. д̇худ̇д̇агод̇и ид̇т̇ид̇худ̇д̇о. рааж̇аг̇ахаваасий гирзго махаавибхавасса суван̣н̣агаарасса буд̇д̇о яуваа абхируубо ид̇т̇ид̇худ̇д̇о бурисо мад̇д̇о вижарад̇и. со д̇ам̣ бадибат̇з д̣̇исваа бадиб̣ад̣̇д̇хажид̇д̇о маг̇г̇ам̣ убарунд̇хид̇ваа адтааси. д̇зна вуд̇д̇ам̣ – ‘‘д̇худ̇д̇аго санниваарзсий’’д̇и, мама г̇аманам̣ нисзд̇хзсийд̇и ад̇т̇о. д̇амзнам̣ аб̣равий субхаад̇и д̇амзнам̣ ниваарзд̇ваа тид̇ам̣ д̇худ̇д̇ам̣ субхаа бхигкуний гат̇зси. зд̇т̇а жа ‘‘г̇ажчанд̇им̣ бхигкуним̣ субхам̣, аб̣рави субхаа’’д̇и жа ад̇д̇аанамзва т̇зрий ан̃н̃ам̣ вияа гад̇ваа вад̣̇ад̇и. т̇зрияаа вуд̇д̇аг̇аат̇аанам̣ самб̣анд̇хад̣̇ассанавасзна сан̇г̇ийд̇игаарзхи аяам̣ г̇аат̇аа вуд̇д̇аа.
Tattha jīvakambavananti jīvakassa komārabhaccassa ambavanaṃ. Rammanti ramaṇīyaṃ. Taṃ kira bhūmibhāgasampattiyā chāyūdakasampattiyā ca rukkhānaṃ ropitākārena ativiya manuññaṃ manoramaṃ. Gacchantinti ambavanaṃ uddissa gataṃ, divāvihārāya upagacchantiṃ. Subhanti evaṃnāmikaṃ. Dhuttakoti itthidhutto. Rājagahavāsī kireko mahāvibhavassa suvaṇṇakārassa putto yuvā abhirūpo itthidhutto puriso matto vicarati. So taṃ paṭipathe disvā paṭibaddhacitto maggaṃ uparundhitvā aṭṭhāsi. Tena vuttaṃ – ‘‘dhuttako sannivāresī’’ti, mama gamanaṃ nisedhesīti attho. Tamenaṃ abravī subhāti tamenaṃ nivāretvā ṭhitaṃ dhuttaṃ subhā bhikkhunī kathesi. Ettha ca ‘‘gacchantiṃ bhikkhuniṃ subhaṃ, abravi subhā’’ti ca attānameva therī aññaṃ viya katvā vadati. Theriyā vuttagāthānaṃ sambandhadassanavasena saṅgītikārehi ayaṃ gāthā vuttā.
‘‘аб̣равий субхаа’’д̇и вад̇ваа д̇ассаа вуд̇д̇аагаарад̣̇ассанад̇т̇ам̣ ааха ‘‘гим̣ д̇з абараад̇хид̇а’’нд̇иаад̣̇и. д̇ад̇т̇а гим̣ д̇з абараад̇хид̇ам̣ маяаад̇и гим̣ д̇уяхам̣, аавусо, маяаа абарад̣̇д̇хам̣. яам̣ мам̣ оварияаана д̇идтасийд̇и язна абараад̇хзна мам̣ г̇ажчанд̇им̣ оварид̇ваа г̇аманам̣ нисзд̇хзд̇ваа д̇идтаси, со над̇т̇зваад̇и ад̇хиббааяо. ат̇а ид̇т̇ийд̇исан̃н̃ааяа звам̣ бадибаж̇ж̇аси, звамби на яуд̇д̇анд̇и д̣̇ассзнд̇ий ааха – ‘‘на хи баб̣б̣аж̇ид̇ааяа, аавусо, бурисо сампусанааяа габбад̇ий’’д̇и, аавусо суван̣н̣агаарабуд̇д̇а , логияажаарид̇д̇знаби бурисасса баб̣б̣аж̇ид̇аанам̣ сампусанааяа на габбад̇и, баб̣б̣аж̇ид̇ааяа бана бурисо д̇иражчаанаг̇ад̇оби сампусанааяа на габбад̇и, д̇идтад̇у д̇аава бурисапусанаа, рааг̇авасзнассаа ниссаг̇г̇иязна бурисасса ниссаг̇г̇ияассааби пусанаа на габбад̇зва.
‘‘Abravī subhā’’ti vatvā tassā vuttākāradassanatthaṃ āha ‘‘kiṃ te aparādhita’’ntiādi. Tattha kiṃ te aparādhitaṃ mayāti kiṃ tuyhaṃ, āvuso, mayā aparaddhaṃ. Yaṃ maṃ ovariyāna tiṭṭhasīti yena aparādhena maṃ gacchantiṃ ovaritvā gamanaṃ nisedhetvā tiṭṭhasi, so natthevāti adhippāyo. Atha itthītisaññāya evaṃ paṭipajjasi, evampi na yuttanti dassentī āha – ‘‘na hi pabbajitāya, āvuso, puriso samphusanāya kappatī’’ti, āvuso suvaṇṇakāraputta , lokiyacārittenapi purisassa pabbajitānaṃ samphusanāya na kappati, pabbajitāya pana puriso tiracchānagatopi samphusanāya na kappati, tiṭṭhatu tāva purisaphusanā, rāgavasenassā nissaggiyena purisassa nissaggiyassāpi phusanā na kappateva.
д̇знааха ‘‘г̇аругз мама сад̇т̇усаасанз’’д̇иаад̣̇и. д̇ассад̇т̇о – г̇аругз баасаан̣ажчад̇д̇ам̣ вияа г̇аругаад̇аб̣б̣з маяхам̣ сад̇т̇у саасанз яаа сигкаа бхигкунияо уд̣̇д̣̇исса суг̇ад̇зна саммаасамб̣уд̣̇д̇хзна д̣̇зсид̇аа бан̃н̃ад̇д̇аа. д̇аахи барисуд̣̇д̇хабад̣̇ам̣ барисуд̣̇д̇хагусалагодтаасам̣, рааг̇аад̣̇иан̇г̇ан̣аанам̣ саб̣б̣асо абхаавзна анан̇г̇ан̣ам̣, звам̣бхууд̇ам̣ мам̣ г̇ажчанд̇им̣ гзна гааран̣зна ааварид̇ваа д̇идтасийд̇и.
Tenāha ‘‘garuke mama satthusāsane’’tiādi. Tassattho – garuke pāsāṇacchattaṃ viya garukātabbe mayhaṃ satthu sāsane yā sikkhā bhikkhuniyo uddissa sugatena sammāsambuddhena desitā paññattā. Tāhi parisuddhapadaṃ parisuddhakusalakoṭṭhāsaṃ, rāgādiaṅgaṇānaṃ sabbaso abhāvena anaṅgaṇaṃ, evaṃbhūtaṃ maṃ gacchantiṃ kena kāraṇena āvaritvā tiṭṭhasīti.
аавилажид̇д̇од̇и жид̇д̇асса аавилабхаавагараанам̣ гаамавид̇аггаад̣̇ийнам̣ васзна аавилажид̇д̇о, д̇вам̣ д̇ад̣̇абхаавад̇о анаавилам̣, рааг̇араж̇аад̣̇ийнам̣ васзна сараж̇о, саан̇г̇ан̣о д̇ад̣̇абхаавад̇о вийд̇араж̇ам̣ анан̇г̇ан̣ам̣ саб̣б̣ад̇т̇а канд̇хабан̃жагз самужчзд̣̇авимуд̇д̇ияаа вимуд̇д̇амаанасам̣, мам̣ гасмаа оварид̇ваа д̇идтасийд̇и?
Āvilacittoti cittassa āvilabhāvakarānaṃ kāmavitakkādīnaṃ vasena āvilacitto, tvaṃ tadabhāvato anāvilaṃ, rāgarajādīnaṃ vasena sarajo, sāṅgaṇo tadabhāvato vītarajaṃ anaṅgaṇaṃ sabbattha khandhapañcake samucchedavimuttiyā vimuttamānasaṃ, maṃ kasmā ovaritvā tiṭṭhasīti?
звам̣ т̇зрияаа вуд̇д̇з д̇худ̇д̇аго ад̇д̇ано ад̇хиббааяам̣ вибхаавзнд̇о ‘‘д̣̇ахараа жаа’’д̇иаад̣̇инаа д̣̇аса г̇аат̇аа абхааси. д̇ад̇т̇а д̣̇ахараад̇и д̇арун̣ий батамз яоб̣б̣анз тид̇аа. абаабигаа жасийд̇и руубзна алаамигаа жа аси , уд̇д̇амаруубад̇хараа жаахосийд̇и ад̇хиббааяо. гим̣ д̇з баб̣б̣аж̇ж̇аа гариссад̇ийд̇и д̇уяхам̣ звам̣ батамаваяз тид̇ааяа руубасамбаннааяа баб̣б̣аж̇ж̇аа гим̣ гариссад̇и, вуд̣дхааяа б̣ийбхажчаруубааяа ваа баб̣б̣аж̇ид̇аб̣б̣анд̇и ад̇хиббааязна вад̣̇ад̇и. нигкибаад̇и чад̣д̣зхи. ‘‘угкибаа’’д̇и ваа баато, абанзхийд̇и ад̇т̇о.
Evaṃ theriyā vutte dhuttako attano adhippāyaṃ vibhāvento ‘‘daharā cā’’tiādinā dasa gāthā abhāsi. Tattha daharāti taruṇī paṭhame yobbane ṭhitā. Apāpikā casīti rūpena alāmikā ca asi , uttamarūpadharā cāhosīti adhippāyo. Kiṃ te pabbajjā karissatīti tuyhaṃ evaṃ paṭhamavaye ṭhitāya rūpasampannāya pabbajjā kiṃ karissati, vuḍḍhāya bībhaccharūpāya vā pabbajitabbanti adhippāyena vadati. Nikkhipāti chaḍḍehi. ‘‘Ukkhipā’’ti vā pāṭho, apanehīti attho.
мад̇хуранд̇и субхам̣, суг̇анд̇ханд̇и ад̇т̇о. баванд̇ийд̇и вааяанд̇и. саб̣б̣асод̇и саманд̇ад̇о. гусумараж̇зна самудтид̇аа д̣̇умаад̇и имз ругкаа манд̣̇аваад̇зна самудтахамаанагусумарзн̣уж̇аад̇зна ад̇д̇ано гусумараж̇зна саяам̣ самудтид̇аа вияа худ̇ваа саманд̇ад̇о сурабхий вааяанд̇и. батамавасанд̇о суко уд̇ууд̇и аяам̣ батамо васанд̇амаасо сукасампассо жа уд̇у вад̇д̇ад̇ийд̇и ад̇т̇о.
Madhuranti subhaṃ, sugandhanti attho. Pavantīti vāyanti. Sabbasoti samantato. Kusumarajena samuṭṭhitā dumāti ime rukkhā mandavātena samuṭṭhahamānakusumareṇujātena attano kusumarajena sayaṃ samuṭṭhitā viya hutvā samantato surabhī vāyanti. Paṭhamavasanto sukhoutūti ayaṃ paṭhamo vasantamāso sukhasamphasso ca utu vattatīti attho.
гусумид̇асикараад̇и субубпид̇аг̇г̇аа. абхиг̇аж̇ж̇анд̇ива маалуд̇зрид̇аад̇и ваад̇зна сан̃жалид̇аа абхиг̇аж̇ж̇анд̇ива абхид̇т̇анид̇аа вияа д̇идтанд̇и. яад̣̇и згаа ванамог̇ахиссасийд̇и сажз д̇вам̣ згигаа ванамог̇аахиссаси, гаа наама д̇з д̇ад̇т̇а рад̇и бхависсад̇ийд̇и ад̇д̇анаа б̣ад̣̇д̇хасукаабхирад̇д̇ад̇д̇аа звамааха.
Kusumitasikharāti supupphitaggā. Abhigajjantiva māluteritāti vātena sañcalitā abhigajjantiva abhitthanitā viya tiṭṭhanti. Yadi ekā vanamogahissasīti sace tvaṃ ekikā vanamogāhissasi, kā nāma te tattha rati bhavissatīti attanā baddhasukhābhirattattā evamāha.
ваал̣амиг̇асан̇гхасзвид̇анд̇и сийхаб̣яаг̇гхаад̣̇иваал̣амиг̇асамуухзхи д̇ад̇т̇а д̇ад̇т̇а убасзвид̇ам̣. гун̃ж̇арамад̇д̇агарзн̣улол̣ид̇анд̇и мад̇д̇агун̃ж̇арзхи хад̇т̇инийхи жа миг̇аанам̣ жид̇д̇ад̇аабанзна ругкаг̇ажчаад̣̇ийнам̣ саакаабхан̃ж̇анзна жа аалол̣ид̇абад̣̇зсам̣. гин̃жааби д̇асмим̣ ванз ийд̣̇исам̣ д̇ад̣̇аа над̇т̇и, ванам̣ наама зваруубанд̇и д̇ам̣ бхим̣саабзд̇угаамо звамааха. рахид̇анд̇и ж̇анарахид̇ам̣ виж̇анам̣. бхим̣санаганд̇и бхаяаж̇анагам̣.
Vāḷamigasaṅghasevitanti sīhabyagghādivāḷamigasamūhehi tattha tattha upasevitaṃ. Kuñjaramattakareṇuloḷitanti mattakuñjarehi hatthinīhi ca migānaṃ cittatāpanena rukkhagacchādīnaṃ sākhābhañjanena ca āloḷitapadesaṃ. Kiñcāpi tasmiṃ vane īdisaṃ tadā natthi, vanaṃ nāma evarūpanti taṃ bhiṃsāpetukāmo evamāha. Rahitanti janarahitaṃ vijanaṃ. Bhiṃsanakanti bhayajanakaṃ.
д̇абанийяагад̇аава д̇хийд̇игаад̇и рад̇д̇асуван̣н̣зна вижарид̇аа д̇хийд̇алигаа вияа сугусалзна яанд̇аажариязна яанд̇аяог̇авасзна саж̇ж̇ид̇аа суван̣н̣абадимаа вияа вижараси, ид̣̇аанзва ид̇о жид̇о жа сан̃жараси. жид̇д̇алад̇зва ажчараад̇и жид̇д̇алад̇аанаамагз уяяаанз д̣̇зважчараа вияа. гаасигасукумзхийд̇и гаасирадтз уббаннзхи ад̇ивияа сукумзхи. ваг̇г̇убхийд̇и синид̣̇д̇хамадтзхи. собхасий сувасанзхи нуубамзд̇и ниваасанабаарубанавад̇т̇зхи анубамз убамаарахид̇з д̇вам̣ ид̣̇аани мз васаануг̇о собхасийд̇и бхаавинам̣ ад̇д̇ано ад̇хиббааяавасзна зганд̇игам̣ вад̇д̇амаанам̣ вияа гад̇ваа вад̣̇ад̇и.
Tapanīyakatāva dhītikāti rattasuvaṇṇena vicaritā dhītalikā viya sukusalena yantācariyena yantayogavasena sajjitā suvaṇṇapaṭimā viya vicarasi, idāneva ito cito ca sañcarasi. Cittalateva accharāti cittalatānāmake uyyāne devaccharā viya. Kāsikasukhumehīti kāsiraṭṭhe uppannehi ativiya sukhumehi. Vaggubhīti siniddhamaṭṭhehi. Sobhasī suvasanehi nūpameti nivāsanapārupanavatthehi anupame upamārahite tvaṃ idāni me vasānugo sobhasīti bhāvinaṃ attano adhippāyavasena ekantikaṃ vattamānaṃ viya katvā vadati.
ахам̣ д̇ава васаануг̇о сияанд̇и ахамби д̇уяхам̣ васаануг̇о гим̣гаарабадиссаавий бхавзяяам̣. яад̣̇и вихарзмасз гаанананд̇арзд̇и яад̣̇и маяам̣ убхоби вананд̇арз саха васаама рамаама. на хи мад̇т̇и д̇аяаа бияад̇д̇арод̇и васаануг̇абхаавасса гааран̣амааха. баан̣од̇и сад̇д̇о, ан̃н̃о гожиби сад̇д̇о д̇аяаа бияад̇аро маяхам̣ на хи ад̇т̇ийд̇и ад̇т̇о. ат̇а ваа баан̣од̇и ад̇д̇ано ж̇ийвид̇ам̣ санд̇хааяа вад̣̇ад̇и, маяхам̣ ж̇ийвид̇ам̣ д̇аяаа бияад̇арам̣ на хи ад̇т̇ийд̇и ад̇т̇о. гиннариманд̣̇аложанзд̇и гиннарияаа вияа манд̣̇абут̇увиложанз.
Ahaṃ tava vasānugo siyanti ahampi tuyhaṃ vasānugo kiṃkārapaṭissāvī bhaveyyaṃ. Yadi viharemase kānanantareti yadi mayaṃ ubhopi vanantare saha vasāma ramāma. Na hi matthi tayā piyattaroti vasānugabhāvassa kāraṇamāha. Pāṇoti satto, añño kocipi satto tayā piyataro mayhaṃ na hi atthīti attho. Atha vā pāṇoti attano jīvitaṃ sandhāya vadati, mayhaṃ jīvitaṃ tayā piyataraṃ na hi atthīti attho. Kinnarimandalocaneti kinnariyā viya mandaputhuvilocane.
яад̣̇и мз важанам̣ гариссаси, сукид̇аа зхи аг̇аарамаавасаад̇и сажз д̇вам̣ мама важанам̣ гариссаси, згаасанам̣ згасзяяам̣ б̣рахмажарияад̣̇угкам̣ бахааяа зхи гаамабхог̇зхи сукид̇аа худ̇ваа аг̇аарам̣ аж̇жхааваса. ‘‘сукид̇аа хзд̇и аг̇аарамаавасанд̇ий’’д̇и гзжи батанд̇и, д̇зсам̣ сукид̇аа бхависсад̇и, аг̇аарам̣ аж̇жхаавасанд̇ийд̇и ад̇т̇о. баасаад̣̇аниваад̇аваасинийд̇и ниваад̇зсу баасаад̣̇зсу ваасиний. ‘‘баасаад̣̇авимаанаваасиний’’д̇и жа баато, вимаанасад̣̇исзсу баасаад̣̇зсу ваасинийд̇и ад̇т̇о. баригамманд̇и взяяааважжам̣.
Yadi me vacanaṃ karissasi, sukhitā ehi agāramāvasāti sace tvaṃ mama vacanaṃ karissasi, ekāsanaṃ ekaseyyaṃ brahmacariyadukkhaṃ pahāya ehi kāmabhogehi sukhitā hutvā agāraṃ ajjhāvasa. ‘‘Sukhitā heti agāramāvasantī’’ti keci paṭhanti, tesaṃ sukhitā bhavissati, agāraṃ ajjhāvasantīti attho. Pāsādanivātavāsinīti nivātesu pāsādesu vāsinī. ‘‘Pāsādavimānavāsinī’’ti ca pāṭho, vimānasadisesu pāsādesu vāsinīti attho. Parikammanti veyyāvaccaṃ.
д̇хаараяаад̇и барид̣̇аха, ниваасзхи жзва уд̇д̇арияан̃жа гарохи. абхиробзхийд̇и ман̣д̣анавибхуусанавасзна ваа сарийрам̣ ааробаяа, алан̇гарохийд̇и ад̇т̇о. маалаван̣н̣аганд̇и маалан̃жзва г̇анд̇хавилзбанан̃жа. ган̃жанаман̣имуд̇д̇аганд̇и ган̃жанзна ман̣имуд̇д̇аахи жа яуд̇д̇ам̣, суван̣н̣амаяаман̣имуд̇д̇аахи кажид̇анд̇и ад̇т̇о. б̣ахунд̇и хад̇т̇уубаг̇аад̣̇ибхзд̣̇ад̇о б̣ахуббагаарам̣. вивид̇ханд̇и гаран̣авигад̇ияаа наанаавид̇хам̣.
Dhārayāti paridaha, nivāsehi ceva uttariyañca karohi. Abhiropehīti maṇḍanavibhūsanavasena vā sarīraṃ āropaya, alaṅkarohīti attho. Mālavaṇṇakanti mālañceva gandhavilepanañca. Kañcanamaṇimuttakanti kañcanena maṇimuttāhi ca yuttaṃ, suvaṇṇamayamaṇimuttāhi khacitanti attho. Bahunti hatthūpagādibhedato bahuppakāraṃ. Vividhanti karaṇavikatiyā nānāvidhaṃ.
суд̇ход̇араж̇абажчад̣̇анд̇и суд̇ход̇ад̇ааяа баваахид̇араж̇ам̣ уд̇д̇аражчад̣̇ам̣. субханд̇и собханам̣. г̇онагад̇уулигасант̇ад̇анд̇и д̣̇ийгхаломагаал̣агож̇авзна жзва хам̣саломаад̣̇ибун̣н̣ааяа д̇уулигааяа жа сант̇ад̇ам̣. наванд̇и абхинавам̣. махаараханд̇и махаг̇гхам̣. жанд̣̇анаман̣д̣ид̇асаараг̇анд̇хиганд̇и г̇осийсагаад̣̇исааражанд̣̇анзна ман̣д̣ид̇ад̇ааяа сурабхиг̇анд̇хигам̣, зваруубам̣ саяанамааруха, д̇ам̣ аарухид̇ваа яат̇аасукам̣ саяаахи жзва нисийд̣̇а жаад̇и ад̇т̇о.
Sudhotarajapacchadanti sudhotatāya pavāhitarajaṃ uttaracchadaṃ. Subhanti sobhanaṃ. Gonakatūlikasanthatanti dīghalomakāḷakojavena ceva haṃsalomādipuṇṇāya tūlikāya ca santhataṃ. Navanti abhinavaṃ. Mahārahanti mahagghaṃ. Candanamaṇḍitasāragandhikanti gosīsakādisāracandanena maṇḍitatāya surabhigandhikaṃ, evarūpaṃ sayanamāruha, taṃ āruhitvā yathāsukhaṃ sayāhi ceva nisīda cāti attho.
уббалам̣ жуд̣̇агаа самуг̇г̇ад̇анд̇и жа-гааро нибаад̇амад̇д̇ам̣, уд̣̇агад̇о уг̇г̇ад̇ам̣ удтид̇ам̣ ажжуг̇г̇амма тид̇ам̣ супулламуббалам̣. яат̇аа д̇ам̣ амануссасзвид̇анд̇и д̇ан̃жа рагкасабариг̇г̇ахид̇ааяа богкаран̣ияаа ж̇аад̇ад̇д̇аа ниммануссзхи сзвид̇ам̣ гзнажи абарибхуд̇д̇амзва бхавзяяа. звам̣ д̇вам̣ б̣рахмажааринийд̇и звамзва д̇ам̣ судту пулламуббалам̣ вияа д̇увам̣ б̣рахмажаариний. сагзсан̇г̇зсу ад̇д̇ано сарийрааваяавзсу гзнажи абарибхуд̇д̇зсуязва ж̇арам̣ г̇амиссаси, муд̇хааязва ж̇арааж̇ин̣н̣аа бхависсаси.
Uppalaṃ cudakā samuggatanti ca-kāro nipātamattaṃ, udakato uggataṃ uṭṭhitaṃ accuggamma ṭhitaṃ suphullamuppalaṃ. Yathā taṃ amanussasevitanti tañca rakkhasapariggahitāya pokkharaṇiyā jātattā nimmanussehi sevitaṃ kenaci aparibhuttameva bhaveyya. Evaṃ tvaṃ brahmacārinīti evameva taṃ suṭṭhu phullamuppalaṃ viya tuvaṃ brahmacārinī. Sakesaṅgesu attano sarīrāvayavesu kenaci aparibhuttesuyeva jaraṃ gamissasi, mudhāyeva jarājiṇṇā bhavissasi.
звам̣ д̇худ̇д̇агзна ад̇д̇ано ад̇хиббааяз багаасид̇з т̇зрий сарийрасабхаававибхааванзна д̇ам̣ д̇ад̇т̇а вижчинд̣̇знд̇ий ‘‘гим̣ д̇з ид̇хаа’’д̇и г̇аат̇амааха. д̇ассад̇т̇о – аавусо суван̣н̣агаарабуд̇д̇а, гзсаад̣̇игун̣абабуурз зганд̇зна бхзд̣̇анад̇хаммз сусаанавад̣дханз, ид̇ха имасмим̣ гааяасан̃н̃ид̇з асужигал̣зварз гим̣ наама д̇ава сааранд̇и саммад̇ам̣ самбхаавид̇ам̣, яам̣ д̣̇исваа вимано ан̃н̃ад̇арасмим̣ аарамман̣з виг̇ад̇аманасан̇габбо, зд̇т̇зва ваа авимано соманассиго худ̇ваа уд̣̇игкаси, д̇ам̣ маяхам̣ гат̇зхийд̇и.
Evaṃ dhuttakena attano adhippāye pakāsite therī sarīrasabhāvavibhāvanena taṃ tattha vicchindentī ‘‘kiṃ te idhā’’ti gāthamāha. Tassattho – āvuso suvaṇṇakāraputta, kesādikuṇapapūre ekantena bhedanadhamme susānavaḍḍhane, idha imasmiṃ kāyasaññite asucikaḷevare kiṃ nāma tava sāranti sammataṃ sambhāvitaṃ, yaṃ disvā vimano aññatarasmiṃ ārammaṇe vigatamanasaṅkappo, ettheva vā avimano somanassiko hutvā udikkhasi, taṃ mayhaṃ kathehīti.
д̇ам̣ суд̇ваа д̇худ̇д̇аго гин̃жааби д̇ассаа руубам̣ жаад̇урияасобхид̇ам̣, батамад̣̇ассанад̇о бана бадтааяа яасмим̣ д̣̇идтибаад̇з бадиб̣ад̣̇д̇хажид̇д̇о, д̇амзва абад̣̇исанд̇о ‘‘агкийни жа д̇уурияаариваа’’д̇иаад̣̇имааха. гааман̃жааяам̣ т̇зрий судту сам̣яад̇ад̇ааяа санд̇инд̣̇рияаа, д̇ааяа т̇иравиббасаннасоммасанд̇анаяананибаад̇зсу гаммаанубхааванибпаннзсу басаннабан̃жаббасаад̣̇абадиман̣д̣ид̇зсу наяанзсу лаб̣бхамаанз бабхаависидтажаад̇урияз д̣̇идтибаад̇з, яасмаа саяам̣ жарид̇ахаавабхаававилаасаад̣̇ибаригаббаван̃жид̇о со д̇худ̇д̇о ж̇аад̇о, д̇асмаасса д̣̇идтирааг̇о сависзсам̣ взбуллам̣ аг̇амааси. д̇ад̇т̇а агкийни жа д̇уурияаариваад̇и д̇уури вужжад̇и миг̇ий, жа-сад̣̇д̣̇о нибаад̇амад̇д̇ам̣, миг̇ажчаабааяа вияа д̇з агкийнийд̇и ад̇т̇о. ‘‘горияаариваа’’д̇и ваа баал̣и, гун̃жагаарагуггудияаад̇и вуд̇д̇ам̣ ход̇и. гиннарияаарива баб̣б̣ад̇анд̇арзд̇и баб̣б̣ад̇агужчияам̣ вижарамаанааяа гиннариванид̇ааяа вияа жа д̇з агкийнийд̇и ад̇т̇о. д̇ава мз наяанаани д̣̇агкияаад̇и д̇ава вуд̇д̇аг̇ун̣ависзсаани наяанаани д̣̇исваа, бхияяо убаруубари мз гаамаабхирад̇и бавад̣дхад̇и.
Taṃ sutvā dhuttako kiñcāpi tassā rūpaṃ cāturiyasobhitaṃ, paṭhamadassanato pana paṭṭhāya yasmiṃ diṭṭhipāte paṭibaddhacitto, tameva apadisanto ‘‘akkhīni ca tūriyārivā’’tiādimāha. Kāmañcāyaṃ therī suṭṭhu saṃyatatāya santindriyā, tāya thiravippasannasommasantanayananipātesu kammānubhāvanipphannesu pasannapañcappasādapaṭimaṇḍitesu nayanesu labbhamāne pabhāvisiṭṭhacāturiye diṭṭhipāte, yasmā sayaṃ caritahāvabhāvavilāsādiparikappavañcito so dhutto jāto, tasmāssa diṭṭhirāgo savisesaṃ vepullaṃ agamāsi. Tattha akkhīni ca tūriyārivāti tūri vuccati migī, ca-saddo nipātamattaṃ, migacchāpāya viya te akkhīnīti attho. ‘‘Koriyārivā’’ti vā pāḷi, kuñcakārakukkuṭiyāti vuttaṃ hoti. Kinnariyāriva pabbatantareti pabbatakucchiyaṃ vicaramānāya kinnarivanitāya viya ca te akkhīnīti attho. Tava me nayanāni dakkhiyāti tava vuttaguṇavisesāni nayanāni disvā, bhiyyo uparūpari me kāmābhirati pavaḍḍhati.
уббаласикаробамаани д̇зд̇и рад̇д̇уббалааг̇г̇асад̣̇исаани бамхаани д̇ава. вималзд̇и ниммалз. хаадагасаннибхзд̇и ган̃жанаруубагасса мукасад̣̇исз д̇з мукз, наяанаани д̣̇агкияаад̇и яож̇анаа.
Uppalasikharopamāniteti rattuppalaaggasadisāni pamhāni tava. Vimaleti nimmale. Hāṭakasannibheti kañcanarūpakassa mukhasadise te mukhe, nayanāni dakkhiyāti yojanā.
аби д̣̇уураг̇ад̇аад̇и д̣̇уурам̣ таанам̣ г̇ад̇ааби. сарамхасзд̇и ан̃н̃ам̣ гин̃жи ажинд̇зд̇ваа д̇ава наяанаани зва ануссараами. ааяад̇абамхзд̇и д̣̇ийгхабакумз. висуд̣̇д̇хад̣̇ассанзд̇и ниммалаложанз. на хи мад̇т̇и д̇аяаа бияад̇д̇аро наяанаад̇и д̇ава наяанад̇о ан̃н̃о гожи маяхам̣ бияад̇аро над̇т̇и. д̇аяаад̇и хи саамиад̇т̇з зва гаран̣аважанам̣.
Api dūragatāti dūraṃ ṭhānaṃ gatāpi. Saramhaseti aññaṃ kiñci acintetvā tava nayanāni eva anussarāmi. Āyatapamheti dīghapakhume. Visuddhadassaneti nimmalalocane. Na hi matthi tayā piyattaro nayanāti tava nayanato añño koci mayhaṃ piyataro natthi. Tayāti hi sāmiatthe eva karaṇavacanaṃ.
звам̣ жагкусамбад̇д̇ияаа уммаад̣̇ид̇асса вияа д̇ам̣ д̇ам̣ виббалабад̇о д̇асса бурисасса манорат̇ам̣ вибаривад̇д̇знд̇ий т̇зрий ‘‘абат̇знаа’’д̇иаад̣̇инаа д̣̇ваад̣̇аса г̇аат̇аа абхааси. д̇ад̇т̇а абат̇зна баяаад̇умижчасийд̇и, аавусо суван̣н̣агаарабуд̇д̇а, санд̇з ан̃н̃асмим̣ ид̇т̇иж̇анз яо д̇вам̣ б̣уд̣̇д̇хасуд̇ам̣ б̣уд̣̇д̇хасса бхаг̇авад̇о орасад̇хийд̇арам̣ мам̣ маг̇г̇аяаси бад̇т̇зси, со д̇вам̣ санд̇з кзмз уж̇умаг̇г̇з абат̇зна ган̣даганивуд̇зна сабхаязна гуммаг̇г̇зна баяаад̇умижчаси бадибаж̇ж̇ид̇угаамоси, жанд̣̇ам̣ гийл̣анагам̣ г̇авзсаси жанд̣̇аман̣д̣алам̣ гийл̣ааг̇ол̣агам̣ гаад̇угаамоси, мзрум̣ лан̇гхзд̇умижчаси жад̇ураасийд̇ияож̇анасахассуб̣б̣зд̇хам̣ синзрубаб̣б̣ад̇арааж̇ам̣ лан̇гхаяид̇ваа абарабхааг̇з таад̇угаамоси, со д̇вам̣ мам̣ б̣уд̣̇д̇хасуд̇ам̣ маг̇г̇аяасийд̇и яож̇анаа.
Evaṃ cakkhusampattiyā ummāditassa viya taṃ taṃ vippalapato tassa purisassa manorathaṃ viparivattentī therī ‘‘apathenā’’tiādinā dvādasa gāthā abhāsi. Tattha apathena payātumicchasīti, āvuso suvaṇṇakāraputta, sante aññasmiṃ itthijane yo tvaṃ buddhasutaṃ buddhassa bhagavato orasadhītaraṃ maṃ maggayasi patthesi, so tvaṃ sante kheme ujumagge apathena kaṇṭakanivutena sabhayena kummaggena payātumicchasi paṭipajjitukāmosi, candaṃ kīḷanakaṃ gavesasi candamaṇḍalaṃ kīḷāgoḷakaṃ kātukāmosi, meruṃ laṅghetumicchasi caturāsītiyojanasahassubbedhaṃ sinerupabbatarājaṃ laṅghayitvā aparabhāge ṭhātukāmosi, so tvaṃ maṃ buddhasutaṃ maggayasīti yojanā.
ид̣̇аани д̇асса ад̇д̇ано ависаяабхаавам̣ бад̇т̇анааяа жа вигхаад̇аавахад̇ам̣ д̣̇ассзд̇ум̣ ‘‘над̇т̇ий’’д̇иаад̣̇и вуд̇д̇ам̣. д̇ад̇т̇а рааг̇о яад̇т̇аби д̣̇аани мз сияаад̇и яад̇т̇а ид̣̇аани мз рааг̇о сияаа бхавзяяа, д̇ам̣ аарамман̣ам̣ сад̣̇звагз логз над̇т̇и зва. наби нам̣ ж̇аанаами гийрисод̇и нам̣ рааг̇ам̣ гийрисод̇иби на ж̇аанаами. ат̇а маг̇г̇зна хад̇о самуулагод̇и ат̇аад̇и нибаад̇амад̇д̇ам̣. аяонисоманасигаарасан̇каад̇зна муулзна самуулаго рааг̇о арияамаг̇г̇зна хад̇о самуг̇гхаад̇ид̇о.
Idāni tassa attano avisayabhāvaṃ patthanāya ca vighātāvahataṃ dassetuṃ ‘‘natthī’’tiādi vuttaṃ. Tattha rāgo yatthapi dāni me siyāti yattha idāni me rāgo siyā bhaveyya, taṃ ārammaṇaṃ sadevake loke natthi eva. Napi naṃ jānāmi kīrisoti naṃ rāgaṃ kīrisotipi na jānāmi. Atha maggena hato samūlakoti athāti nipātamattaṃ. Ayonisomanasikārasaṅkhātena mūlena samūlako rāgo ariyamaggena hato samugghātito.
ин̇г̇аалагуяаад̇и ан̇г̇аарагаасуяаа. уж̇жхид̇од̇и ваад̇угкид̇д̇о вияа яо гожи, д̣̇аханияаа инд̇ханам̣ вияаад̇и ад̇т̇о. висабад̇д̇ориваад̇и висаг̇ад̇абхааж̇анам̣ вияа. аг̇г̇ид̇о гад̇од̇и аг̇г̇ид̇о ан̇г̇аарад̇о абаг̇ад̇о гад̇о, висасса лзсамби асзсзд̇ваа абанийд̇о винаасид̇од̇и ад̇т̇о.
Iṅgālakuyāti aṅgārakāsuyā. Ujjhitoti vātukkhitto viya yo koci, dahaniyā indhanaṃ viyāti attho. Visapattorivāti visagatabhājanaṃ viya. Aggito katoti aggito aṅgārato apagato kato, visassa lesampi asesetvā apanīto vināsitoti attho.
яассаа сияаа абажжавзгкид̇анд̇и яассаа ид̇т̇ияаа ид̣̇ам̣ канд̇хабан̃жагам̣ н̃аан̣зна аббадивзгкид̇ам̣ абарин̃н̃аад̇ам̣ сияаа. сад̇д̇аа ваа анусаасид̇о сияаад̇и сад̇д̇аа ваа д̇хаммасарийрасса ад̣̇ассанзна яассаа ид̇т̇ияаа ананусаасид̇о сияаа. д̇вам̣ д̇аад̣̇исигам̣ балобхаяаад̇и, аавусо, д̇вам̣ д̇ат̇ааруубам̣ абаримад̣̇д̣̇ид̇асан̇каарам̣ абажжавзгкид̇алогуд̇д̇арад̇хаммам̣ гаамзхи балобхаяа убаг̇ажча. ж̇аананд̇им̣ со имам̣ вихан̃н̃асийд̇и со д̇вам̣ бавад̇д̇им̣ нивад̇д̇ин̃жа яаат̇аавад̇о ж̇аананд̇им̣ бадивид̣̇д̇хасажжам̣ имам̣ субхам̣ бхигкуним̣ ааг̇амма вихан̃н̃аси, самбад̇и ааяад̇ин̃жа вигхаад̇ам̣ д̣̇угкам̣ аабаж̇ж̇аси.
Yassā siyā apaccavekkhitanti yassā itthiyā idaṃ khandhapañcakaṃ ñāṇena appaṭivekkhitaṃ apariññātaṃ siyā. Sattā vā anusāsito siyāti sattā vā dhammasarīrassa adassanena yassā itthiyā ananusāsito siyā. Tvaṃ tādisikaṃ palobhayāti, āvuso, tvaṃ tathārūpaṃ aparimadditasaṅkhāraṃ apaccavekkhitalokuttaradhammaṃ kāmehi palobhaya upagaccha. Jānantiṃ so imaṃ vihaññasīti so tvaṃ pavattiṃ nivattiñca yāthāvato jānantiṃ paṭividdhasaccaṃ imaṃ subhaṃ bhikkhuniṃ āgamma vihaññasi, sampati āyatiñca vighātaṃ dukkhaṃ āpajjasi.
ид̣̇аанисса вигхаад̇аабад̇д̇ид̇ам̣ гааран̣авибхааванзна д̣̇ассзнд̇ий ‘‘маяхам̣ хий’’д̇иаад̣̇имааха. д̇ад̇т̇а хийд̇и хзд̇уад̇т̇з нибаад̇о. аггудтаванд̣̇ид̇зд̇и аггосз ванд̣̇анааяа жа. сукад̣̇угкзд̇и сукз жа д̣̇угкз жа, идтаанидтависаяасамааяог̇з ваа. сад̇ий убадтид̇аад̇и бажжавзгкан̣аяуд̇д̇аа сад̇и саб̣б̣агаалам̣ убадтид̇аа. сан̇кад̇амасубханд̇и ж̇аанияаад̇и д̇збхуумагам̣ сан̇каараг̇ад̇ам̣ гилзсаасужибаг̇гхаран̣зна асубханд̇и н̃ад̇ваа. саб̣б̣ад̇т̇зваад̇и саб̣б̣асмим̣язва бхавад̇д̇аяз маяхам̣ мано д̇ан̣хаалзбаад̣̇инаа на убалимбад̇и.
Idānissa vighātāpattitaṃ kāraṇavibhāvanena dassentī ‘‘mayhaṃ hī’’tiādimāha. Tattha hīti hetuatthe nipāto. Akkuṭṭhavanditeti akkose vandanāya ca. Sukhadukkheti sukhe ca dukkhe ca, iṭṭhāniṭṭhavisayasamāyoge vā. Satī upaṭṭhitāti paccavekkhaṇayuttā sati sabbakālaṃ upaṭṭhitā. Saṅkhatamasubhanti jāniyāti tebhūmakaṃ saṅkhāragataṃ kilesāsucipaggharaṇena asubhanti ñatvā. Sabbatthevāti sabbasmiṃyeva bhavattaye mayhaṃ mano taṇhālepādinā na upalimpati.
маг̇г̇адтан̇г̇игаяаанаяааяинийд̇и адтан̇г̇игамаг̇г̇асан̇каад̇зна арияаяаанзна ниб̣б̣аанабурам̣ яааяиний убаг̇ад̇аа. уд̣̇д̇хадасаллаад̇и ад̇д̇ано санд̇аанад̇о самуд̣̇д̇хадарааг̇аад̣̇исаллаа.
Maggaṭṭhaṅgikayānayāyinīti aṭṭhaṅgikamaggasaṅkhātena ariyayānena nibbānapuraṃ yāyinī upagatā. Uddhaṭasallāti attano santānato samuddhaṭarāgādisallā.
сужид̇д̇ид̇аад̇и хад̇т̇абаад̣̇амукаад̣̇иаагаарзна судту жид̇д̇ид̇аа виражид̇аа. сомбхаад̇и сумбхагаа. д̣̇ааругабиллагаани ваад̇и д̣̇ааруд̣̇ан̣д̣аад̣̇ийхи убаражид̇аруубагаани. д̇анд̇ийхийд̇и нхаарусуд̇д̇агзхи. кийлагзхийд̇и хад̇т̇абаад̣̇абидтиган̣н̣аад̣̇иад̇т̇ааяа табид̇ад̣̇ан̣д̣зхи. виниб̣ад̣̇д̇хаад̇и вивид̇хзнаагаарзна б̣ад̣̇д̇хаа. вивид̇хам̣ банажжагаад̇и яанд̇асуд̇д̇аад̣̇ийнам̣ ан̃чанависсаж̇ж̇анаад̣̇инаа бадтабид̇анажжагаа, банажжанд̇аа вияа д̣̇идтаад̇и яож̇анаа.
Sucittitāti hatthapādamukhādiākārena suṭṭhu cittitā viracitā. Sombhāti sumbhakā. Dārukapillakāni vāti dārudaṇḍādīhi uparacitarūpakāni. Tantīhīti nhārusuttakehi. Khīlakehīti hatthapādapiṭṭhikaṇṇādiatthāya ṭhapitadaṇḍehi. Vinibaddhāti vividhenākārena baddhā. Vividhaṃ panaccakāti yantasuttādīnaṃ añchanavissajjanādinā paṭṭhapitanaccakā, panaccantā viya diṭṭhāti yojanā.
д̇амхуд̣̇д̇хадз д̇анд̇икийлагзд̇и саннивзсависидтаражанаависзсаяуд̇д̇ам̣ убаад̣̇ааяа руубагасаман̃н̃аа д̇амхи д̇анд̇имхи кийлагз жа таанад̇о уд̣̇д̇хадз б̣анд̇ханд̇о виссадтз, висум̣ гаран̣зна ан̃н̃аман̃н̃ам̣ вигалз, д̇ахим̣ д̇ахим̣ кибанзна баригрид̇з вигирид̇з. на винд̣̇зяяа кан̣д̣асо гад̇зд̇и бод̇т̇агаруубасса аваяавз кан̣д̣аакан̣д̣ид̇з гад̇з бод̇т̇агаруубам̣ на винд̣̇зяяа, на убалабхзяяа. звам̣ санд̇з гимхи д̇ад̇т̇а манам̣ нивзсаяз д̇асмим̣ бод̇т̇агаруубааваяавз гимхи гим̣ каан̣угз, уд̣̇ааху раж̇ж̇угз, мад̇д̇игаабин̣д̣аад̣̇игз ваа манам̣ манасан̃н̃ам̣ нивзсзяяа, висан̇каарз аваяавз саа сан̃н̃аа гад̣̇аажиби набад̇зяяаад̇и ад̇т̇о.
Tamhuddhaṭe tantikhīlaketi sannivesavisiṭṭharacanāvisesayuttaṃ upādāya rūpakasamaññā tamhi tantimhi khīlake ca ṭhānato uddhaṭe bandhanto vissaṭṭhe, visuṃ karaṇena aññamaññaṃ vikale, tahiṃ tahiṃ khipanena parikrite vikirite. Na vindeyya khaṇḍaso kateti potthakarūpassa avayave khaṇḍākhaṇḍite kate potthakarūpaṃ na vindeyya, na upalabheyya. Evaṃ sante kimhi tattha manaṃ nivesaye tasmiṃ potthakarūpāvayave kimhi kiṃ khāṇuke, udāhu rajjuke, mattikāpiṇḍādike vā manaṃ manasaññaṃ niveseyya, visaṅkhāre avayave sā saññā kadācipi napateyyāti attho.
д̇ат̇уубамаад̇и д̇ам̣сад̣̇исаа д̇зна бод̇т̇агаруубзна сад̣̇исаа. гинд̇и жз ааха ‘‘д̣̇зхагааний’’д̇иаад̣̇и. д̇ад̇т̇а д̣̇зхагаанийд̇и хад̇т̇абаад̣̇амукаад̣̇ид̣̇зхааваяаваа. манд̇и мз бадиб̣ад̣̇д̇хаа убадтаханд̇и. д̇зхи д̇хаммзхийд̇и д̇зхи бат̇авиаад̣̇ийхи жа жагкаад̣̇ийхи жа д̇хаммзхи. винаа на вад̇д̇анд̇ийд̇и на хи д̇ат̇аа д̇ат̇аа саннивидтз бат̇авиаад̣̇ид̇хаммз мун̃жид̇ваа д̣̇зхаа наама санд̇и. д̇хаммзхи винаа на вад̇д̇ад̇ийд̇и д̣̇зхо аваяавзхи аваяавад̇хаммзхи винаа на вад̇д̇ад̇и на убалаб̣бхад̇и. звам̣ санд̇з гимхи д̇ад̇т̇а манам̣ нивзсаязд̇и гимхи гим̣ бат̇авияам̣, уд̣̇ааху аабаад̣̇игз д̣̇зход̇и ваа хад̇т̇абаад̣̇аад̣̇ийнийд̇и ваа манам̣ манасан̃н̃ам̣ нивзсзяяа. яасмаа бат̇авиаад̣̇ибасаад̣̇ад̇хаммамад̇д̇з зсаа саман̃н̃аа, яад̣̇ид̣̇ам̣ д̣̇зход̇и ваа хад̇т̇абаад̣̇аад̣̇ийнийд̇и ваа сад̇д̇од̇и ваа ид̇т̇ийд̇и ваа бурисод̇и ваа, д̇асмаа на зд̇т̇а ж̇аанад̇о гожи абхинивзсо ход̇ийд̇и.
Tathūpamāti taṃsadisā tena potthakarūpena sadisā. Kinti ce āha ‘‘dehakānī’’tiādi. Tattha dehakānīti hatthapādamukhādidehāvayavā. Manti me paṭibaddhā upaṭṭhahanti. Tehi dhammehīti tehi pathaviādīhi ca cakkhādīhi ca dhammehi. Vinā na vattantīti na hi tathā tathā sanniviṭṭhe pathaviādidhamme muñcitvā dehā nāma santi. Dhammehi vinā na vattatīti deho avayavehi avayavadhammehi vinā na vattati na upalabbhati. Evaṃ sante kimhi tattha manaṃ nivesayeti kimhi kiṃ pathaviyaṃ, udāhu āpādike dehoti vā hatthapādādīnīti vā manaṃ manasaññaṃ niveseyya. Yasmā pathaviādipasādadhammamatte esā samaññā, yadidaṃ dehoti vā hatthapādādīnīti vā sattoti vā itthīti vā purisoti vā, tasmā na ettha jānato koci abhiniveso hotīti.
яат̇аа харид̇аалзна магкид̇ам̣, ад̣̇д̣̇аса жид̇д̇игам̣ бхид̇д̇ияаа гад̇анд̇и яат̇аа гусалзна жид̇д̇агаарзна бхид̇д̇ияам̣ харид̇аалзна магкид̇ам̣ лид̇д̇ам̣ д̇зна лзбам̣ д̣̇ад̇ваа гад̇ам̣ ааликид̇ам̣ жид̇д̇игам̣ ид̇т̇ируубам̣ ад̣̇д̣̇аса бассзяяа. д̇ад̇т̇а яаа убат̇амбханакзбанаад̣̇игирияаасамбад̇д̇ияаа маанусигаа ну ко аяам̣ бхид̇д̇и абассааяа тид̇аад̇и сан̃н̃аа, саа нирад̇т̇агаа мануссабхаавасан̇каад̇асса ад̇т̇асса д̇ад̇т̇а абхаавад̇о, маанусийд̇и бана гзвалам̣ д̇ахим̣ д̇асса жа вибарийд̇ад̣̇ассанам̣, яаат̇аавад̇о г̇ахан̣ам̣ на ход̇и, д̇хаммабун̃ж̇амад̇д̇з ид̇т̇ибурисаад̣̇иг̇ахан̣амби звам̣ самбад̣̇амид̣̇ам̣ д̣̇адтаб̣б̣анд̇и ад̇хиббааяо.
Yathā haritālena makkhitaṃ, addasa cittikaṃ bhittiyā katanti yathā kusalena cittakārena bhittiyaṃ haritālena makkhitaṃ littaṃ tena lepaṃ datvā kataṃ ālikhitaṃ cittikaṃ itthirūpaṃ addasa passeyya. Tattha yā upathambhanakhepanādikiriyāsampattiyā mānusikā nu kho ayaṃ bhitti apassāya ṭhitāti saññā, sā niratthakā manussabhāvasaṅkhātassa atthassa tattha abhāvato, mānusīti pana kevalaṃ tahiṃ tassa ca viparītadassanaṃ, yāthāvato gahaṇaṃ na hoti, dhammapuñjamatte itthipurisādigahaṇampi evaṃ sampadamidaṃ daṭṭhabbanti adhippāyo.
мааяам̣ вияа аг̇г̇ад̇о гад̇анд̇и мааяаагаарзна бурад̇о убадтаабид̇ам̣ мааяаасад̣̇исам̣. субинанд̇зва суван̣н̣абаад̣̇абанд̇и субинамзва субинанд̇ам̣, д̇ад̇т̇а убадтид̇асуван̣н̣амаяаругкам̣ вияа. убаг̇ажчаси анд̇ха рид̇д̇аганд̇и анд̇хаб̣аала рид̇д̇агам̣ д̇ужчагам̣ анд̇осаарарахид̇ам̣ имам̣ ад̇д̇абхаавам̣ ‘‘зд̇ам̣ мамаа’’д̇и саараванд̇ам̣ вияа убаг̇ажчаси абхинивисаси. ж̇анамаж̇жхзрива руббаруубаганд̇и мааяаагаарзна махааж̇анамаж̇жхз д̣̇ассид̇ам̣ руубияаруубасад̣̇исам̣ саарам̣ вияа убадтаханд̇ам̣, асааранд̇и ад̇т̇о.
Māyaṃ viya aggato katanti māyākārena purato upaṭṭhāpitaṃ māyāsadisaṃ. Supinanteva suvaṇṇapādapanti supinameva supinantaṃ, tattha upaṭṭhitasuvaṇṇamayarukkhaṃ viya. Upagacchasi andha rittakanti andhabāla rittakaṃ tucchakaṃ antosārarahitaṃ imaṃ attabhāvaṃ ‘‘etaṃ mamā’’ti sāravantaṃ viya upagacchasi abhinivisasi. Janamajjheriva rupparūpakanti māyākārena mahājanamajjhe dassitaṃ rūpiyarūpasadisaṃ sāraṃ viya upaṭṭhahantaṃ, asāranti attho.
вадданириваад̇и лаакааяа г̇ул̣игаа вияа. годарохид̇аад̇и годарз ругкасусирз табид̇аа. маж̇жхз буб̣б̣ул̣агаад̇и агкид̣̇аламаж̇жхз тид̇аж̇алабуб̣б̣ул̣асад̣̇исаа. саассугаад̇и ассуж̇аласахид̇аа. бийл̣агол̣игаад̇и агкиг̇уут̇аго. зд̇т̇а ж̇ааяад̇ийд̇и зд̇асмим̣ агкиман̣д̣алз убхосу годийсу висаг̇анд̇хам̣ вааяанд̇о ниб̣б̣ад̇д̇ад̇и. бийл̣агол̣игаад̇и ваа агкид̣̇алзсу ниб̣б̣ад̇д̇анагаа бийл̣агаа вужжад̇и. вивид̇хаад̇и сзд̇анийламан̣д̣алаанан̃жзва рад̇д̇абийд̇аад̣̇ийнам̣ сад̇д̇аннам̣ бадалаанан̃жа васзна анзгавид̇хаа. жагкувид̇хаад̇и жагкубхааг̇аа жагкуббагаараа ваа д̇асса анзгагалаабаг̇ад̇абхаавад̇о. бин̣д̣ид̇аад̇и самуд̣̇ид̇аа.
Vaṭṭanirivāti lākhāya guḷikā viya. Koṭarohitāti koṭare rukkhasusire ṭhapitā. Majjhe pubbuḷakāti akkhidalamajjhe ṭhitajalapubbuḷasadisā. Saassukāti assujalasahitā. Pīḷakoḷikāti akkhigūthako. Ettha jāyatīti etasmiṃ akkhimaṇḍale ubhosu koṭīsu visagandhaṃ vāyanto nibbattati. Pīḷakoḷikāti vā akkhidalesu nibbattanakā pīḷakā vuccati. Vividhāti setanīlamaṇḍalānañceva rattapītādīnaṃ sattannaṃ paṭalānañca vasena anekavidhā. Cakkhuvidhāti cakkhubhāgā cakkhuppakārā vā tassa anekakalāpagatabhāvato. Piṇḍitāti samuditā.
звам̣ жагкусмим̣ саараж̇ж̇анд̇асса жагкуно асубхад̇ам̣ анавадтид̇ад̇ааяа анижжад̇ан̃жа вибхаавзси . вибхаавзд̇ваа жа яат̇аа наама гожи лобханийяам̣ бхан̣д̣ам̣ г̇ахзд̇ваа жораганд̇аарам̣ бадибаж̇ж̇анд̇о жорзхи балиб̣уд̣̇д̇хо д̇ам̣ лобханийяабхан̣д̣ам̣ д̣̇ад̇ваа г̇ажчад̇и, звамзва жагкумхи саарад̇д̇зна д̇зна бурисзна балиб̣уд̣̇д̇хаа т̇зрий ад̇д̇ано жагкум̣ уббаадзд̇ваа д̇асса ад̣̇ааси. д̇зна вуд̇д̇ам̣ ‘‘уббаадияа жааруд̣̇ассанаа’’д̇иаад̣̇и. д̇ад̇т̇а уббаадияаад̇и уббаадзд̇ваа жагкугуубад̇о нийхарид̇ваа. жааруд̣̇ассанаад̇и бияад̣̇ассанаа манохарад̣̇ассанаа. на жа баж̇ж̇ид̇т̇аад̇и д̇асмим̣ жагкусмим̣ сан̇г̇ам̣ наабаж̇ж̇и. асан̇г̇амаанасаад̇и гад̇т̇ажиби аарамман̣з анаасад̇д̇ажид̇д̇аа. ханд̣̇а д̇з жагкунд̇и д̇аяаа гаамид̇ам̣ д̇ад̇о зва маяаа д̣̇иннад̇д̇аа д̇з жагкусан̃н̃ид̇ам̣ асужибин̣д̣ам̣ г̇ан̣ха, г̇ахзд̇ваа харассу басаад̣̇аяуд̇д̇ам̣ ижчид̇ам̣ таанам̣ нзхи.
Evaṃ cakkhusmiṃ sārajjantassa cakkhuno asubhataṃ anavaṭṭhitatāya aniccatañca vibhāvesi . Vibhāvetvā ca yathā nāma koci lobhanīyaṃ bhaṇḍaṃ gahetvā corakantāraṃ paṭipajjanto corehi palibuddho taṃ lobhanīyabhaṇḍaṃ datvā gacchati, evameva cakkhumhi sārattena tena purisena palibuddhā therī attano cakkhuṃ uppāṭetvā tassa adāsi. Tena vuttaṃ ‘‘uppāṭiya cārudassanā’’tiādi. Tattha uppāṭiyāti uppāṭetvā cakkhukūpato nīharitvā. Cārudassanāti piyadassanā manoharadassanā. Na ca pajjitthāti tasmiṃ cakkhusmiṃ saṅgaṃ nāpajji. Asaṅgamānasāti katthacipi ārammaṇe anāsattacittā. Handa te cakkhunti tayā kāmitaṃ tato eva mayā dinnattā te cakkhusaññitaṃ asucipiṇḍaṃ gaṇha, gahetvā harassu pasādayuttaṃ icchitaṃ ṭhānaṃ nehi.
д̇асса жа вирамааси д̇аавад̣̇зд̇и д̇асса д̇худ̇д̇абурисасса д̇аавад̣̇зва агкимхи уббаадид̇агкан̣з зва рааг̇о виг̇ажчи. д̇ад̇т̇аад̇и агкимхи, д̇ассам̣ ваа т̇зрияам̣. ат̇а ваа д̇ад̇т̇аад̇и д̇асмим̣язва таанз. камаабаяийд̇и камаабзси. сод̇т̇и сияаа б̣рахмажааринийд̇и сздтажаарини махзсигз д̇уяхам̣ аарог̇яамзва бхавзяяа. на буно зд̣̇исагам̣ бхависсад̇ийд̇и ид̇о барам̣ зваруубам̣ анаажааражаран̣ам̣ на бхависсад̇и, на гариссаамийд̇и ад̇т̇о.
Tassa ca viramāsi tāvadeti tassa dhuttapurisassa tāvadeva akkhimhi uppāṭitakkhaṇe eva rāgo vigacchi. Tatthāti akkhimhi, tassaṃ vā theriyaṃ. Atha vā tatthāti tasmiṃyeva ṭhāne. Khamāpayīti khamāpesi. Sotthi siyā brahmacārinīti seṭṭhacārini mahesike tuyhaṃ ārogyameva bhaveyya. Na puno edisakaṃbhavissatīti ito paraṃ evarūpaṃ anācāracaraṇaṃ na bhavissati, na karissāmīti attho.
аасаад̣̇ияаад̇и гхаддзд̇ваа. зд̣̇исанд̇и зваруубам̣ саб̣б̣ад̇т̇а вийд̇арааг̇ам̣. аг̇г̇им̣ баж̇ж̇алид̇ам̣ва лин̇г̇ияаад̇и баж̇ж̇алид̇ам̣ аг̇г̇им̣ аалин̇г̇зд̇ваа вияа.
Āsādiyāti ghaṭṭetvā. Edisanti evarūpaṃ sabbattha vītarāgaṃ. Aggiṃ pajjalitaṃva liṅgiyāti pajjalitaṃ aggiṃ āliṅgetvā viya.
д̇ад̇од̇и д̇асмаа д̇худ̇д̇абурисаа. саа бхигкунийд̇и саа субхаа бхигкуний. аг̇амий б̣уд̣̇д̇хаварасса санд̇иганд̇и саммаасамб̣уд̣̇д̇хасса санд̇игам̣ убаг̇ажчи убасан̇гами. бассияа варабун̃н̃алагкан̣анд̇и уд̇д̇амзхи бун̃н̃асамбхаарзхи ниб̣б̣ад̇д̇амахаабурисалагкан̣ам̣ д̣̇исваа. яат̇аа бураан̣аганд̇и бораан̣ам̣ вияа уббааданад̇о буб̣б̣з вияа жагку бадибаагад̇игам̣ ахоси. яамзд̇т̇а анд̇аранд̇араа на вуд̇д̇ам̣, д̇ам̣ вуд̇д̇анаяад̇д̇аа сувин̃н̃зяяамзва.
Tatoti tasmā dhuttapurisā. Sā bhikkhunīti sā subhā bhikkhunī. Agamī buddhavarassa santikanti sammāsambuddhassa santikaṃ upagacchi upasaṅkami. Passiya varapuññalakkhaṇanti uttamehi puññasambhārehi nibbattamahāpurisalakkhaṇaṃ disvā. Yathā purāṇakanti porāṇaṃ viya uppāṭanato pubbe viya cakkhu paṭipākatikaṃ ahosi. Yamettha antarantarā na vuttaṃ, taṃ vuttanayattā suviññeyyameva.
субхааж̇ийвагамб̣аванигаат̇зрийг̇аат̇ааван̣н̣анаа нидтид̇аа.
Subhājīvakambavanikātherīgāthāvaṇṇanā niṭṭhitā.
д̇им̣санибаад̇аван̣н̣анаа нидтид̇аа.
Tiṃsanipātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 1. субхааж̇ийвагамб̣аванигаат̇зрийг̇аат̇аа • 1. Subhājīvakambavanikātherīgāthā
