| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
3. ஸுபா⁴ஸிதஸுத்தவண்ணனா
3. Subhāsitasuttavaṇṇanā
ஏவங் மே ஸுதந்தி ஸுபா⁴ஸிதஸுத்தங். அத்தஜ்ஜா²ஸயதோ சஸ்ஸ உப்பத்தி. ப⁴க³வா ஹி ஸுபா⁴ஸிதப்பியோ, ஸோ அத்தனோ ஸுபா⁴ஸிதஸமுதா³சாரப்பகாஸனேன ஸத்தானங் து³ப்³பா⁴ஸிதஸமுதா³சாரங் படிஸேதெ⁴ந்தோ இமங் ஸுத்தமபா⁴ஸி. தத்த² ஏவங் மே ஸுதந்திஆதி³ ஸங்கீ³திகாரவசனங். தத்த² தத்ர கோ² ப⁴க³வா…பே॰… ப⁴த³ந்தேதி தே பி⁴க்கூ²தி ஏதங் அபுப்³ப³ங், ஸேஸங் வுத்தனயமேவ. தஸ்மா அபுப்³ப³பத³வண்ணனத்த²மித³ங் வுச்சதி – தத்ராதி தே³ஸகாலபரிதீ³பனங். தஞ்ஹி யங் ஸமயங் விஹரதி, தத்ர ஸமயே, யஸ்மிஞ்ச ஆராமே விஹரதி, தத்ர ஆராமேதி தீ³பேதி. பா⁴ஸிதப்³ப³யுத்தே வா தே³ஸகாலே தீ³பேதி. ந ஹி ப⁴க³வா அயுத்தே தே³ஸே காலே வா த⁴ம்மங் பா⁴ஸதி. ‘‘அகாலோ கோ², தாவ, பா³ஹியா’’திஆதி³ (உதா³॰ 10) செத்த² ஸாத⁴கங். கோ²தி பத³பூரணமத்தே அவதா⁴ரணாதி³காலத்தே² வா நிபாதோ. ப⁴க³வாதி லோகக³ருபரிதீ³பனங். பி⁴க்கூ²தி கதா²ஸவனயுத்தபுக்³க³லபரிதீ³பனங். ஆமந்தேஸீதி ஆலபி அபா⁴ஸி ஸம்போ³தே⁴ஸி.
Evaṃme sutanti subhāsitasuttaṃ. Attajjhāsayato cassa uppatti. Bhagavā hi subhāsitappiyo, so attano subhāsitasamudācārappakāsanena sattānaṃ dubbhāsitasamudācāraṃ paṭisedhento imaṃ suttamabhāsi. Tattha evaṃ me sutantiādi saṅgītikāravacanaṃ. Tattha tatra kho bhagavā…pe… bhadanteti te bhikkhūti etaṃ apubbaṃ, sesaṃ vuttanayameva. Tasmā apubbapadavaṇṇanatthamidaṃ vuccati – tatrāti desakālaparidīpanaṃ. Tañhi yaṃ samayaṃ viharati, tatra samaye, yasmiñca ārāme viharati, tatra ārāmeti dīpeti. Bhāsitabbayutte vā desakāle dīpeti. Na hi bhagavā ayutte dese kāle vā dhammaṃ bhāsati. ‘‘Akālo kho, tāva, bāhiyā’’tiādi (udā. 10) cettha sādhakaṃ. Khoti padapūraṇamatte avadhāraṇādikālatthe vā nipāto. Bhagavāti lokagaruparidīpanaṃ. Bhikkhūti kathāsavanayuttapuggalaparidīpanaṃ. Āmantesīti ālapi abhāsi sambodhesi.
பி⁴க்க²வோதி ஆமந்தனாகாரபரிதீ³பனங். தஞ்ச பி⁴க்க²னஸீலதாதி³கு³ணயோக³ஸித்³த⁴த்தா வுத்தங். தேன நேஸங் ஹீனாதி⁴கஜனஸேவிதங் வுத்திங் பகாஸெந்தோ உத்³த⁴ததீ³னபா⁴வனிக்³க³ஹங் கரோதி. ‘‘பி⁴க்க²வோ’’தி இமினா ச கருணாவிப்பா²ரஸொம்மஹத³யனயனநிபாதபுப்³ப³ங்க³மேன வசனேன தே அத்தனோ முகா²பி⁴முகே² கரித்வா தேனேவ கதே²துகம்யதாதீ³பகேன வசனேன தேஸங் ஸோதுகம்யதங் ஜனேதி, தேனேவ ச ஸம்போ³த⁴னத்தே²ன வசனேன ஸாது⁴கஸவனமனஸிகாரேபி தே நியோஜேதி. ஸாது⁴கஸவனமனஸிகாராயத்தா ஹி ஸாஸனஸம்பத்தி. அபரேஸுபி தே³வமனுஸ்ஸேஸு விஜ்ஜமானேஸு கஸ்மா பி⁴க்கூ² ஏவ ஆமந்தேஸீதி சே? ஜெட்ட²ஸெட்டா²ஸன்னஸதா³ஸன்னிஹிதபா⁴வதோ. ஸப்³ப³பரிஸஸாதா⁴ரணா ஹி அயங் த⁴ம்மதே³ஸனா, ந பாடிபுக்³க³லிகா. பரிஸாய ச ஜெட்டா² பி⁴க்கூ² பட²முப்பன்னத்தா, ஸெட்டா² அனகா³ரியபா⁴வங் ஆதி³ங் கத்வா ஸத்து² சரியானுவிதா⁴யகத்தா ஸகலஸாஸனபடிக்³கா³ஹகத்தா ச. ஆஸன்னா தத்த² நிஸின்னேஸு ஸத்து² ஸந்திகத்தா, ஸதா³ ஸன்னிஹிதா ஸத்து² ஸந்திகாவசரத்தா. தேன ப⁴க³வா ஸப்³ப³பரிஸஸாதா⁴ரணங் த⁴ம்மங் தே³ஸெந்தோ பி⁴க்கூ² ஏவ ஆமந்தேஸி. அபிச பா⁴ஜனங் தே இமாய கதா²ய யதா²னுஸிட்ட²ங் படிபத்திஸப்³பா⁴வதோதிபி தே ஏவ ஆமந்தேஸி. ப⁴த³ந்தேதி கா³ரவாதி⁴வசனமேதங். தே பி⁴க்கூ²தி யே ப⁴க³வா ஆமந்தேஸி, தே ஏவங் ப⁴க³வந்தங் ஆலபந்தா ப⁴க³வதோ பச்சஸ்ஸோஸுந்தி.
Bhikkhavoti āmantanākāraparidīpanaṃ. Tañca bhikkhanasīlatādiguṇayogasiddhattā vuttaṃ. Tena nesaṃ hīnādhikajanasevitaṃ vuttiṃ pakāsento uddhatadīnabhāvaniggahaṃ karoti. ‘‘Bhikkhavo’’ti iminā ca karuṇāvipphārasommahadayanayananipātapubbaṅgamena vacanena te attano mukhābhimukhe karitvā teneva kathetukamyatādīpakena vacanena tesaṃ sotukamyataṃ janeti, teneva ca sambodhanatthena vacanena sādhukasavanamanasikārepi te niyojeti. Sādhukasavanamanasikārāyattā hi sāsanasampatti. Aparesupi devamanussesu vijjamānesu kasmā bhikkhū eva āmantesīti ce? Jeṭṭhaseṭṭhāsannasadāsannihitabhāvato. Sabbaparisasādhāraṇā hi ayaṃ dhammadesanā, na pāṭipuggalikā. Parisāya ca jeṭṭhā bhikkhū paṭhamuppannattā, seṭṭhā anagāriyabhāvaṃ ādiṃ katvā satthu cariyānuvidhāyakattā sakalasāsanapaṭiggāhakattā ca. Āsannā tattha nisinnesu satthu santikattā, sadā sannihitā satthu santikāvacarattā. Tena bhagavā sabbaparisasādhāraṇaṃ dhammaṃ desento bhikkhū eva āmantesi. Apica bhājanaṃ te imāya kathāya yathānusiṭṭhaṃ paṭipattisabbhāvatotipi te eva āmantesi. Bhadanteti gāravādhivacanametaṃ. Te bhikkhūti ye bhagavā āmantesi, te evaṃ bhagavantaṃ ālapantā bhagavato paccassosunti.
சதூஹி அங்கே³ஹீதி சதூஹி காரணேஹி அவயவேஹி வா. முஸாவாதா³வேரமணிஆதீ³னி ஹி சத்தாரி ஸுபா⁴ஸிதவாசாய காரணானி. ஸச்சவசனாத³யோ சத்தாரோ அவயவா, காரணத்தே² ச அங்க³ஸத்³தோ³. சதூஹீதி நிஸ்ஸக்கவசனங் ஹோதி, அவயவத்தே² கரணவசனங். ஸமன்னாக³தாதி ஸமனுஆக³தா பவத்தா யுத்தா ச. வாசாதி ஸமுல்லபனவாசா. யா ஸா ‘‘வாசா கி³ரா ப்³யப்பதோ²’’தி (த⁴॰ ஸ॰ 636) ச, ‘‘நேலா கண்ணஸுகா²’’தி (தீ³॰ நி॰ 1.9; ம॰ நி॰ 3.14) ச ஏவமாதீ³ஸு ஆக³ச்ச²தி. யா பன ‘‘வாசாய சே கதங் கம்ம’’ந்தி (த⁴॰ ஸ॰ அட்ட²॰ 1 காயகம்மத்³வார) ஏவங் விஞ்ஞத்தி ச, ‘‘யா சதூஹி வசீது³ச்சரிதேஹி ஆரதி விரதி…பே॰… அயங் வுச்சதி ஸம்மாவாசா’’தி (த⁴॰ ஸ॰ 299; விப⁴॰ 206) ஏவங் விரதி ச, ‘‘ப²ருஸவாசா, பி⁴க்க²வே, ஆஸேவிதா பா⁴விதா ப³ஹுலீகதா நிரயஸங்வத்தனிகா ஹோதீ’’தி (அ॰ நி॰ 8.40) ஏவங் சேதனா ச வாசாதி ஆக³ச்ச²தி, ஸா இத⁴ ந அதி⁴ப்பேதா. கஸ்மா? அபா⁴ஸிதப்³ப³தோ. ஸுபா⁴ஸிதா ஹோதீதி ஸுட்டு² பா⁴ஸிதா ஹோதி. தேனஸ்ஸா அத்தா²வஹனதங் தீ³பேதி. ந து³ப்³பா⁴ஸிதாதி ந து³ட்டு² பா⁴ஸிதா. தேனஸ்ஸா அனத்தா²னாவஹனதங் தீ³பேதி. அனவஜ்ஜாதி வஜ்ஜஸங்கா²தராகா³தி³தோ³ஸவிரஹிதா. தேனஸ்ஸா காரணஸுத்³தி⁴ங் வுத்ததோ³ஸாபா⁴வஞ்ச தீ³பேதி. அனநுவஜ்ஜா சாதி அனுவாத³விமுத்தா. தேனஸ்ஸா ஸப்³பா³காரஸம்பத்திங் தீ³பேதி. விஞ்ஞூனந்தி பண்டி³தானங். தேன நிந்தா³பஸங்ஸாஸு பா³லா அப்பமாணாதி தீ³பேதி.
Catūhiaṅgehīti catūhi kāraṇehi avayavehi vā. Musāvādāveramaṇiādīni hi cattāri subhāsitavācāya kāraṇāni. Saccavacanādayo cattāro avayavā, kāraṇatthe ca aṅgasaddo. Catūhīti nissakkavacanaṃ hoti, avayavatthe karaṇavacanaṃ. Samannāgatāti samanuāgatā pavattā yuttā ca. Vācāti samullapanavācā. Yā sā ‘‘vācā girā byappatho’’ti (dha. sa. 636) ca, ‘‘nelā kaṇṇasukhā’’ti (dī. ni. 1.9; ma. ni. 3.14) ca evamādīsu āgacchati. Yā pana ‘‘vācāya ce kataṃ kamma’’nti (dha. sa. aṭṭha. 1 kāyakammadvāra) evaṃ viññatti ca, ‘‘yā catūhi vacīduccaritehi ārati virati…pe… ayaṃ vuccati sammāvācā’’ti (dha. sa. 299; vibha. 206) evaṃ virati ca, ‘‘pharusavācā, bhikkhave, āsevitā bhāvitā bahulīkatā nirayasaṃvattanikā hotī’’ti (a. ni. 8.40) evaṃ cetanā ca vācāti āgacchati, sā idha na adhippetā. Kasmā? Abhāsitabbato. Subhāsitā hotīti suṭṭhu bhāsitā hoti. Tenassā atthāvahanataṃ dīpeti. Na dubbhāsitāti na duṭṭhu bhāsitā. Tenassā anatthānāvahanataṃ dīpeti. Anavajjāti vajjasaṅkhātarāgādidosavirahitā. Tenassā kāraṇasuddhiṃ vuttadosābhāvañca dīpeti. Ananuvajjā cāti anuvādavimuttā. Tenassā sabbākārasampattiṃ dīpeti. Viññūnanti paṇḍitānaṃ. Tena nindāpasaṃsāsu bālā appamāṇāti dīpeti.
கதமேஹி சதூஹீதி கதே²துகம்யதாபுச்சா². இதா⁴தி இமஸ்மிங் ஸாஸனே. பி⁴க்க²வேதி யேஸங் கதே²துகாமோ, ததா³லபனங். பி⁴க்கூ²தி வுத்தப்பகாரவாசாபா⁴ஸனகபுக்³க³லனித³ஸ்ஸனங். ஸுபா⁴ஸிதங்யேவ பா⁴ஸதீதி புக்³க³லாதி⁴ட்டா²னாய தே³ஸனாய சதூஸு வாசங்கே³ஸு அஞ்ஞதரங்க³னித்³தே³ஸவசனங். நோ து³ப்³பா⁴ஸிதந்தி தஸ்ஸேவ வாசங்க³ஸ்ஸ படிபக்க²பா⁴ஸனநிவாரணங். தேன ‘‘முஸாவாதா³த³யோபி கதா³சி வத்தப்³பா³’’தி தி³ட்டி²ங் நிஸேதே⁴தி. ‘‘நோ து³ப்³பா⁴ஸித’’ந்தி இமினா வா மிச்சா²வாசப்பஹானங் தீ³பேதி, ‘‘ஸுபா⁴ஸித’’ந்தி இமினா பஹீனமிச்சா²வாசேன ஸதா பா⁴ஸிதப்³ப³வசனலக்க²ணங். ததா² பாபஸ்ஸ அகரணங், குஸலஸ்ஸ உபஸம்பத³ங் . அங்க³பரிதீ³பனத்த²ங் பன அபா⁴ஸிதப்³ப³ங் புப்³பே³ அவத்வா பா⁴ஸிதப்³ப³மேவாஹ. ஏஸ நயோ த⁴ம்மங்யேவாதிஆதீ³ஸுபி.
Katamehi catūhīti kathetukamyatāpucchā. Idhāti imasmiṃ sāsane. Bhikkhaveti yesaṃ kathetukāmo, tadālapanaṃ. Bhikkhūti vuttappakāravācābhāsanakapuggalanidassanaṃ. Subhāsitaṃyeva bhāsatīti puggalādhiṭṭhānāya desanāya catūsu vācaṅgesu aññataraṅganiddesavacanaṃ. No dubbhāsitanti tasseva vācaṅgassa paṭipakkhabhāsananivāraṇaṃ. Tena ‘‘musāvādādayopi kadāci vattabbā’’ti diṭṭhiṃ nisedheti. ‘‘No dubbhāsita’’nti iminā vā micchāvācappahānaṃ dīpeti, ‘‘subhāsita’’nti iminā pahīnamicchāvācena satā bhāsitabbavacanalakkhaṇaṃ. Tathā pāpassa akaraṇaṃ, kusalassa upasampadaṃ . Aṅgaparidīpanatthaṃ pana abhāsitabbaṃ pubbe avatvā bhāsitabbamevāha. Esa nayo dhammaṃyevātiādīsupi.
எத்த² ச ‘‘ஸுபா⁴ஸிதங்யேவ பா⁴ஸதி நோ து³ப்³பா⁴ஸித’’ந்தி இமினா பிஸுணதோ³ஸரஹிதங் ஸமக்³க³கரணவசனங் வுத்தங், ‘‘த⁴ம்மங்யேவ பா⁴ஸதி நோ அத⁴ம்ம’’ந்தி இமினா ஸம்ப²தோ³ஸரஹிதங் த⁴ம்மதோ அனபேதங் மந்தாவசனங் வுத்தங், இதரேஹி த்³வீஹி ப²ருஸாலிகரஹிதானி பியஸச்சவசனானி வுத்தானி. இமேஹி கோ²திஆதி³னா பன தானி அங்கா³னி பச்சக்க²தோ த³ஸ்ஸெந்தோ தங் வாசங் நிக³மேதி. விஸேஸதோ செத்த² ‘‘இமேஹி கோ², பி⁴க்க²வே , சதூஹி அங்கே³ஹி ஸமன்னாக³தா வாசா ஸுபா⁴ஸிதா ஹோதீ’’தி ப⁴ணந்தோ யத³ஞ்ஞே படிஞ்ஞாதீ³ஹி அவயவேஹி நாமாதீ³ஹி பதே³ஹி லிங்க³வசனவிப⁴த்திகாலகாரகாதீ³ஹி ஸம்பத்தீஹி ச ஸமன்னாக³தங் வாசங் ‘‘ஸுபா⁴ஸித’’ந்தி மஞ்ஞந்தி, தங் த⁴ம்மதோ படிஸேதே⁴தி. அவயவாதி³ஸம்பன்னாபி ஹி பேஸுஞ்ஞாதி³ஸமன்னாக³தா வாசா து³ப்³பா⁴ஸிதாவ ஹோதி அத்தனோ பரேஸஞ்ச அனத்தா²வஹத்தா. இமேஹி பன சதூஹி அங்கே³ஹி ஸமன்னாக³தா ஸசேபி மிலக்கு²பா⁴ஸாபரியாபன்னா க⁴டசேடிகாகீ³திகபரியாபன்னா வா ஹோதி, ததா²பி ஸுபா⁴ஸிதா ஏவ லோகியலோகுத்தரஹிதஸுகா²வஹத்தா. ஸீஹளதீ³பே மக்³க³பஸ்ஸே ஸஸ்ஸங் ரக்க²ந்தியா ஸீஹளசேடிகாய ஸீஹளகேனேவ ஜாதிஜராமரணபடிஸங்யுத்தங் கீ³தங் கா³யந்தியா ஸுத்வா மக்³க³ங் க³ச்ச²ந்தா ஸட்டி²மத்தா விபஸ்ஸகபி⁴க்கூ² செத்த² அரஹத்தங் பத்தா நித³ஸ்ஸனங். ததா² திஸ்ஸோ நாம ஆரத்³த⁴விபஸ்ஸகோ பி⁴க்கு² பது³மஸரஸமீபேன க³ச்ச²ந்தோ பது³மஸரே பது³மானி ப⁴ஞ்ஜித்வா ப⁴ஞ்ஜித்வா –
Ettha ca ‘‘subhāsitaṃyeva bhāsati no dubbhāsita’’nti iminā pisuṇadosarahitaṃ samaggakaraṇavacanaṃ vuttaṃ, ‘‘dhammaṃyeva bhāsati no adhamma’’nti iminā samphadosarahitaṃ dhammato anapetaṃ mantāvacanaṃ vuttaṃ, itarehi dvīhi pharusālikarahitāni piyasaccavacanāni vuttāni. Imehi khotiādinā pana tāni aṅgāni paccakkhato dassento taṃ vācaṃ nigameti. Visesato cettha ‘‘imehi kho, bhikkhave , catūhi aṅgehi samannāgatā vācā subhāsitā hotī’’ti bhaṇanto yadaññe paṭiññādīhi avayavehi nāmādīhi padehi liṅgavacanavibhattikālakārakādīhi sampattīhi ca samannāgataṃ vācaṃ ‘‘subhāsita’’nti maññanti, taṃ dhammato paṭisedheti. Avayavādisampannāpi hi pesuññādisamannāgatā vācā dubbhāsitāva hoti attano paresañca anatthāvahattā. Imehi pana catūhi aṅgehi samannāgatā sacepi milakkhubhāsāpariyāpannā ghaṭaceṭikāgītikapariyāpannā vā hoti, tathāpi subhāsitā eva lokiyalokuttarahitasukhāvahattā. Sīhaḷadīpe maggapasse sassaṃ rakkhantiyā sīhaḷaceṭikāya sīhaḷakeneva jātijarāmaraṇapaṭisaṃyuttaṃ gītaṃ gāyantiyā sutvā maggaṃ gacchantā saṭṭhimattā vipassakabhikkhū cettha arahattaṃ pattā nidassanaṃ. Tathā tisso nāma āraddhavipassako bhikkhu padumasarasamīpena gacchanto padumasare padumāni bhañjitvā bhañjitvā –
‘‘பாதோ பு²ல்லங் கோகனத³ங், ஸூரியாலோகேன ப⁴ஜ்ஜியதே;
‘‘Pāto phullaṃ kokanadaṃ, sūriyālokena bhajjiyate;
ஏவங் மனுஸ்ஸத்தக³தா ஸத்தா, ஜராபி⁴வேகே³ன மத்³தீ³யந்தீ’’தி. –
Evaṃ manussattagatā sattā, jarābhivegena maddīyantī’’ti. –
இமங் கீ³தங் கா³யந்தியா சேடிகாய ஸுத்வா அரஹத்தங் பத்தோ, பு³த்³த⁴ந்தரே ச அஞ்ஞதரோ புரிஸோ ஸத்தஹி புத்தேஹி ஸத்³தி⁴ங் வனா ஆக³ம்ம அஞ்ஞதராய இத்தி²யா முஸலேன தண்டு³லே கொட்டெந்தியா –
Imaṃ gītaṃ gāyantiyā ceṭikāya sutvā arahattaṃ patto, buddhantare ca aññataro puriso sattahi puttehi saddhiṃ vanā āgamma aññatarāya itthiyā musalena taṇḍule koṭṭentiyā –
‘‘ஜராய பரிமத்³தி³தங் ஏதங், மிலாதச²விசம்மனிஸ்ஸிதங்;
‘‘Jarāya parimadditaṃ etaṃ, milātachavicammanissitaṃ;
மரணேன பி⁴ஜ்ஜதி ஏதங், மச்சுஸ்ஸ க⁴ஸமாமிஸங்.
Maraṇena bhijjati etaṃ, maccussa ghasamāmisaṃ.
‘‘கிமீனங் ஆலயங் ஏதங், நானாகுணபேன பூரிதங்;
‘‘Kimīnaṃ ālayaṃ etaṃ, nānākuṇapena pūritaṃ;
அஸுசிஸ்ஸ பா⁴ஜனங் ஏதங், கத³லிக்க²ந்த⁴ஸமங் இத³’’ந்தி. –
Asucissa bhājanaṃ etaṃ, kadalikkhandhasamaṃ ida’’nti. –
இமங் கீ³திகங் ஸுத்வா ஸஹ புத்தேஹி பச்சேகபோ³தி⁴ங் பத்தோ, அஞ்ஞே ச ஈதி³ஸேஹி உபாயேஹி அரியபூ⁴மிங் பத்தா நித³ஸ்ஸனங். அனச்ச²ரியங் பனேதங், யங் ப⁴க³வதா ஆஸயானுஸயகுஸலேன ‘‘ஸப்³பே³ ஸங்கா²ரா அனிச்சா’’திஆதி³னா நயேன வுத்தா கா³தா²யோ ஸுத்வா பஞ்சஸதா பி⁴க்கூ² அரஹத்தங் பாபுணிங்ஸு, அஞ்ஞே ச க²ந்தா⁴யதனாதி³படிஸங்யுத்தா கதா² ஸுத்வா அனேகே தே³வமனுஸ்ஸாதி. ஏவங் இமேஹி சதூஹி அங்கே³ஹி ஸமன்னாக³தா வாசா ஸசேபி மிலக்கு²பா⁴ஸாபரியாபன்னா, க⁴டசேடிகாகீ³திகபரியாபன்னா வா ஹோதி, ததா²பி ‘‘ஸுபா⁴ஸிதா’’தி வேதி³தப்³பா³. ஸுபா⁴ஸிதத்தா ஏவ ச அனவஜ்ஜா ச அனநுவஜ்ஜா ச விஞ்ஞூனங் அத்த²த்தி²கானங் குலபுத்தானங் அத்த²படிஸரணானங், நோ ப்³யஞ்ஜனபடிஸரணானந்தி.
Imaṃ gītikaṃ sutvā saha puttehi paccekabodhiṃ patto, aññe ca īdisehi upāyehi ariyabhūmiṃ pattā nidassanaṃ. Anacchariyaṃ panetaṃ, yaṃ bhagavatā āsayānusayakusalena ‘‘sabbe saṅkhārā aniccā’’tiādinā nayena vuttā gāthāyo sutvā pañcasatā bhikkhū arahattaṃ pāpuṇiṃsu, aññe ca khandhāyatanādipaṭisaṃyuttā kathā sutvā aneke devamanussāti. Evaṃ imehi catūhi aṅgehi samannāgatā vācā sacepi milakkhubhāsāpariyāpannā, ghaṭaceṭikāgītikapariyāpannā vā hoti, tathāpi ‘‘subhāsitā’’ti veditabbā. Subhāsitattā eva ca anavajjā ca ananuvajjā ca viññūnaṃ atthatthikānaṃ kulaputtānaṃ atthapaṭisaraṇānaṃ, no byañjanapaṭisaraṇānanti.
இத³மவோச ப⁴க³வாதி இத³ங் ஸுபா⁴ஸிதலக்க²ணங் ப⁴க³வா அவோச. இத³ங் வத்வான ஸுக³தோ, அதா²பரங் ஏதத³வோச ஸத்தா²தி இத³ஞ்ச லக்க²ணங் வத்வா அத² அஞ்ஞம்பி ஏதங் அவோச ஸத்தா². இதா³னி வத்தப்³ப³கா³த²ங் த³ஸ்ஸெத்வா ஸப்³ப³மேதங் ஸங்கீ³திகாரகா ஆஹங்ஸு. தத்த² அபரந்தி கா³தா²ப³ந்த⁴வசனங் ஸந்தா⁴ய வுச்சதி. தங் து³வித⁴ங் ஹோதி – பச்சா² ஆக³தபரிஸங் அஸ்ஸவனஸுஸ்ஸவனஆதா⁴ரணத³ள்ஹீகரணாதீ³னி வா ஸந்தா⁴ய தத³த்த²தீ³பகமேவ ச. புப்³பே³ கேனசி காரணேன பரிஹாபிதஸ்ஸ அத்த²ஸ்ஸ தீ³பனேன அத்த²விஸேஸதீ³பகஞ்ச ‘‘புரிஸஸ்ஸ ஹி ஜாதஸ்ஸ, குடா²ரீ ஜாயதே முகே²’’திஆதீ³ஸு (ஸு॰ நி॰ 662) விய. இத⁴ பன தத³த்த²தீ³பகமேவ.
Idamavocabhagavāti idaṃ subhāsitalakkhaṇaṃ bhagavā avoca. Idaṃ vatvāna sugato, athāparaṃ etadavoca satthāti idañca lakkhaṇaṃ vatvā atha aññampi etaṃ avoca satthā. Idāni vattabbagāthaṃ dassetvā sabbametaṃ saṅgītikārakā āhaṃsu. Tattha aparanti gāthābandhavacanaṃ sandhāya vuccati. Taṃ duvidhaṃ hoti – pacchā āgataparisaṃ assavanasussavanaādhāraṇadaḷhīkaraṇādīni vā sandhāya tadatthadīpakameva ca. Pubbe kenaci kāraṇena parihāpitassa atthassa dīpanena atthavisesadīpakañca ‘‘purisassa hi jātassa, kuṭhārī jāyate mukhe’’tiādīsu (su. ni. 662) viya. Idha pana tadatthadīpakameva.
453. தத்த² ஸந்தோதி பு³த்³தா⁴த³யோ. தே ஹி ஸுபா⁴ஸிதங் ‘‘உத்தமங் ஸெட்ட²’’ந்தி வண்ணயந்தி. து³தியங் ததியங் சதுத்த²ந்தி இத³ங் பன புப்³பே³ நித்³தி³ட்ட²க்கமங் உபாதா³ய வுத்தங். கா³தா²பரியோஸானே பன வங்கீ³ஸத்தே²ரோ ப⁴க³வதோ ஸுபா⁴ஸிதே பஸீதி³.
453. Tattha santoti buddhādayo. Te hi subhāsitaṃ ‘‘uttamaṃ seṭṭha’’nti vaṇṇayanti. Dutiyaṃ tatiyaṃ catutthanti idaṃ pana pubbe niddiṭṭhakkamaṃ upādāya vuttaṃ. Gāthāpariyosāne pana vaṅgīsatthero bhagavato subhāsite pasīdi.
ஸோ யங் பஸன்னாகாரங் அகாஸி, யஞ்ச வசனங் ப⁴க³வா அபா⁴ஸி, தங் த³ஸ்ஸெந்தா ஸங்கீ³திகாரகா ‘‘அத² கோ² ஆயஸ்மா’’திஆதி³மாஹங்ஸு. தத்த² படிபா⁴தி மந்தி மம பா⁴கோ³ பகாஸதி . படிபா⁴து தந்தி தவ பா⁴கோ³ பகாஸது. ஸாருப்பாஹீதி அனுச்ச²விகாஹி. அபி⁴த்த²வீதி பஸங்ஸி.
So yaṃ pasannākāraṃ akāsi, yañca vacanaṃ bhagavā abhāsi, taṃ dassentā saṅgītikārakā ‘‘atha kho āyasmā’’tiādimāhaṃsu. Tattha paṭibhāti manti mama bhāgo pakāsati . Paṭibhātu tanti tava bhāgo pakāsatu. Sāruppāhīti anucchavikāhi. Abhitthavīti pasaṃsi.
454. ந தாபயேதி விப்படிஸாரேன ந தாபெய்ய. ந விஹிங்ஸெய்யாதி அஞ்ஞமஞ்ஞங் பி⁴ந்த³ந்தோ ந பா³தெ⁴ய்ய. ஸா வே வாசாதி ஸா வாசா ஏகங்ஸேனேவ ஸுபா⁴ஸிதா. எத்தாவதா அபிஸுணவாசாய ப⁴க³வந்தங் தோ²மேதி.
454.Na tāpayeti vippaṭisārena na tāpeyya. Na vihiṃseyyāti aññamaññaṃ bhindanto na bādheyya. Sā ve vācāti sā vācā ekaṃseneva subhāsitā. Ettāvatā apisuṇavācāya bhagavantaṃ thometi.
455. படினந்தி³தாதி ஹட்டே²ன ஹத³யேன படிமுக²ங் க³ந்த்வா நந்தி³தா ஸம்பியாயிதா. யங் அனாதா³ய பாபானி, பரேஸங் பா⁴ஸதே பியந்தி யங் வாசங் பா⁴ஸந்தோ பரேஸங் பாபானி அப்பியானி படிக்கூலானி ப²ருஸவசனானி அனாதா³ய அத்த²ப்³யஞ்ஜனமது⁴ரங் பியமேவ வசனங் பா⁴ஸதி, தங் பியவாசமேவ பா⁴ஸெய்யாதி வுத்தங் ஹோதி. இமாய கா³தா²ய பியவசனேன ப⁴க³வந்தங் அபி⁴த்த²வி.
455.Paṭinanditāti haṭṭhena hadayena paṭimukhaṃ gantvā nanditā sampiyāyitā. Yaṃ anādāya pāpāni, paresaṃ bhāsate piyanti yaṃ vācaṃ bhāsanto paresaṃ pāpāni appiyāni paṭikkūlāni pharusavacanāni anādāya atthabyañjanamadhuraṃ piyameva vacanaṃ bhāsati, taṃ piyavācameva bhāseyyāti vuttaṃ hoti. Imāya gāthāya piyavacanena bhagavantaṃ abhitthavi.
456. அமதாதி அமதஸதி³ஸா ஸாது³பா⁴வேன. வுத்தம்பி சேதங் ‘‘ஸச்சங் ஹவே ஸாது³தரங் ரஸான’’ந்தி (ஸங்॰ நி॰ 1.73; ஸு॰ நி॰ 184). நிப்³பா³னாமதபச்சயத்தா வா அமதா. ஏஸ த⁴ம்மோ ஸனந்தனோதி யாயங் ஸச்சவாசா நாம, ஏஸ போராணோ த⁴ம்மோ சரியா பவேணீ, இத³மேவ ஹி போராணானங் ஆசிண்ணங், ந தே அலிகங் பா⁴ஸிங்ஸு. தேனேவாஹ – ‘‘ஸச்சே அத்தே² ச த⁴ம்மே ச, அஹு ஸந்தோ பதிட்டி²தா’’தி. தத்த² ஸச்சே பதிட்டி²தத்தா ஏவ அத்தனோ ச பரேஸஞ்ச அத்தே² பதிட்டி²தா. அத்தே² பதிட்டி²தத்தா ஏவ ச த⁴ம்மே பதிட்டி²தா ஹொந்தீதி வேதி³தப்³பா³. பரங் வா த்³வயங் ஸச்சவிஸேஸனமிச்சேவ வேதி³தப்³ப³ங். ஸச்சே பதிட்டி²தா. கீதி³ஸே? அத்தே² ச த⁴ம்மே ச, யங் பரேஸங் அத்த²தோ அனபேதத்தா அத்த²ங் அனுபரோத⁴ங் கரோதீதி வுத்தங் ஹோதி. ஸதிபி ச அனுபரோத⁴கரத்தே த⁴ம்மதோ அனபேதத்தா த⁴ம்மங், யங் த⁴ம்மிகமேவ அத்த²ங் ஸாதே⁴தீதி வுத்தங் ஹோதி. இமாய கா³தா²ய ஸச்சவசனேன ப⁴க³வந்தங் அபி⁴த்த²வி.
456.Amatāti amatasadisā sādubhāvena. Vuttampi cetaṃ ‘‘saccaṃ have sādutaraṃ rasāna’’nti (saṃ. ni. 1.73; su. ni. 184). Nibbānāmatapaccayattā vā amatā. Esa dhammo sanantanoti yāyaṃ saccavācā nāma, esa porāṇo dhammo cariyā paveṇī, idameva hi porāṇānaṃ āciṇṇaṃ, na te alikaṃ bhāsiṃsu. Tenevāha – ‘‘sacce atthe ca dhamme ca, ahu santo patiṭṭhitā’’ti. Tattha sacce patiṭṭhitattā eva attano ca paresañca atthe patiṭṭhitā. Atthe patiṭṭhitattā eva ca dhamme patiṭṭhitā hontīti veditabbā. Paraṃ vā dvayaṃ saccavisesanamicceva veditabbaṃ. Sacce patiṭṭhitā. Kīdise? Atthe ca dhamme ca, yaṃ paresaṃ atthato anapetattā atthaṃ anuparodhaṃ karotīti vuttaṃ hoti. Satipi ca anuparodhakaratte dhammato anapetattā dhammaṃ, yaṃ dhammikameva atthaṃ sādhetīti vuttaṃ hoti. Imāya gāthāya saccavacanena bhagavantaṃ abhitthavi.
457. கே²மந்தி அப⁴யங் நிருபத்³த³வங். கேன காரணேனாதி சே? நிப்³பா³னப்பத்தியா து³க்க²ஸ்ஸந்தகிரியாய, யஸ்மா கிலேஸனிப்³பா³னங் பாபேதி, வட்டது³க்க²ஸ்ஸ ச அந்தகிரியாய ஸங்வத்ததீதி அத்தோ². அத² வா யங் பு³த்³தோ⁴ நிப்³பா³னப்பத்தியா து³க்க²ஸ்ஸந்தகிரியாயாதி த்³வின்னங் நிப்³பா³னதா⁴தூனமத்தா²ய கே²மமக்³க³ப்பகாஸனதோ கே²மங் வாசங் பா⁴ஸதி, ஸா வே வாசானமுத்தமாதி ஸா வாசா ஸப்³ப³வாசானங் ஸெட்டா²தி ஏவமெத்த² அத்தோ² வேதி³தப்³போ³. இமாய கா³தா²ய மந்தாவசனேன ப⁴க³வந்தங் அபி⁴த்த²வந்தோ அரஹத்தனிகூடேன தே³ஸனங் நிட்டா²பேஸீதி அயமெத்த² அபுப்³ப³பத³வண்ணனா. ஸேஸங் வுத்தனயேனேவ வேதி³தப்³ப³ந்தி.
457.Khemanti abhayaṃ nirupaddavaṃ. Kena kāraṇenāti ce? Nibbānappattiyā dukkhassantakiriyāya, yasmā kilesanibbānaṃ pāpeti, vaṭṭadukkhassa ca antakiriyāya saṃvattatīti attho. Atha vā yaṃ buddho nibbānappattiyā dukkhassantakiriyāyāti dvinnaṃ nibbānadhātūnamatthāya khemamaggappakāsanato khemaṃ vācaṃ bhāsati, sā ve vācānamuttamāti sā vācā sabbavācānaṃ seṭṭhāti evamettha attho veditabbo. Imāya gāthāya mantāvacanena bhagavantaṃ abhitthavanto arahattanikūṭena desanaṃ niṭṭhāpesīti ayamettha apubbapadavaṇṇanā. Sesaṃ vuttanayeneva veditabbanti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய ஸுபா⁴ஸிதஸுத்தவண்ணனா நிட்டி²தா.
Suttanipāta-aṭṭhakathāya subhāsitasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 3. ஸுபா⁴ஸிதஸுத்தங் • 3. Subhāsitasuttaṃ
