Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

    ๓. สุภูติวโคฺค

    3. Subhūtivaggo

    ๑. สุภูติเตฺถรอปทานํ

    1. Subhūtittheraapadānaṃ

    ๑.

    1.

    ‘‘หิมวนฺตสฺสาวิทูเร , นิสโภ นาม ปพฺพโต;

    ‘‘Himavantassāvidūre , nisabho nāma pabbato;

    อสฺสโม สุกโต มยฺหํ, ปณฺณสาลา สุมาปิตาฯ

    Assamo sukato mayhaṃ, paṇṇasālā sumāpitā.

    ๒.

    2.

    ‘‘โกสิโย นาม นาเมน, ชฎิโล อุคฺคตาปโน;

    ‘‘Kosiyo nāma nāmena, jaṭilo uggatāpano;

    เอกากิโย 1 อทุติโย, วสามิ นิสเภ ตทาฯ

    Ekākiyo 2 adutiyo, vasāmi nisabhe tadā.

    ๓.

    3.

    ‘‘ผลํ มูลญฺจ ปณฺณญฺจ, น ภุญฺชามิ อหํ ตทา;

    ‘‘Phalaṃ mūlañca paṇṇañca, na bhuñjāmi ahaṃ tadā;

    ปวตฺตํว สุปาตาหํ 3, อุปชีวามิ ตาวเทฯ

    Pavattaṃva supātāhaṃ 4, upajīvāmi tāvade.

    ๔.

    4.

    ‘‘นาหํ โกเปมิ อาชีวํ, จชมาโนปิ ชีวิตํ;

    ‘‘Nāhaṃ kopemi ājīvaṃ, cajamānopi jīvitaṃ;

    อาราเธมิ สกํ จิตฺตํ, วิวเชฺชมิ อเนสนํฯ

    Ārādhemi sakaṃ cittaṃ, vivajjemi anesanaṃ.

    ๕.

    5.

    ‘‘ราคูปสํหิตํ จิตฺตํ, ยทา อุปฺปชฺชเต มม;

    ‘‘Rāgūpasaṃhitaṃ cittaṃ, yadā uppajjate mama;

    สยํว ปจฺจเวกฺขามิ, เอกโคฺค ตํ ทเมมหํฯ

    Sayaṃva paccavekkhāmi, ekaggo taṃ damemahaṃ.

    ๖.

    6.

    ‘‘‘รชฺชเส รชฺชนีเย จ, ทุสฺสนีเย จ ทุสฺสเส;

    ‘‘‘Rajjase rajjanīye ca, dussanīye ca dussase;

    มุยฺหเส โมหนีเย จ, นิกฺขมสฺสุ วนา ตุวํฯ

    Muyhase mohanīye ca, nikkhamassu vanā tuvaṃ.

    ๗.

    7.

    ‘‘‘วิสุทฺธานํ อยํ วาโส, นิมฺมลานํ ตปสฺสินํ;

    ‘‘‘Visuddhānaṃ ayaṃ vāso, nimmalānaṃ tapassinaṃ;

    มา โข วิสุทฺธํ ทูเสสิ, นิกฺขมสฺสุ วนา ตุวํฯ

    Mā kho visuddhaṃ dūsesi, nikkhamassu vanā tuvaṃ.

    ๘.

    8.

    ‘‘‘อคาริโก ภวิตฺวาน, ยทา ปุตฺตํ 5, ลภิสฺสสิ;

    ‘‘‘Agāriko bhavitvāna, yadā puttaṃ 6, labhissasi;

    อุโภปิ มา วิราเธสิ, นิกฺขมสฺสุ วนา ตุวํฯ

    Ubhopi mā virādhesi, nikkhamassu vanā tuvaṃ.

    ๙.

    9.

    ‘‘‘ฉวาลาตํ ยถา กฎฺฐํ, น กฺวจิ กิจฺจการกํ;

    ‘‘‘Chavālātaṃ yathā kaṭṭhaṃ, na kvaci kiccakārakaṃ;

    เนว คาเม อรเญฺญ วา, น หิ ตํ กฎฺฐสมฺมตํฯ

    Neva gāme araññe vā, na hi taṃ kaṭṭhasammataṃ.

    ๑๐.

    10.

    ‘‘‘ฉวาลาตูปโม ตฺวํสิ, น คิหี นาปิ สญฺญโต;

    ‘‘‘Chavālātūpamo tvaṃsi, na gihī nāpi saññato;

    อุภโต มุตฺตโก อชฺช, นิกฺขมสฺสุ วนา ตุวํฯ

    Ubhato muttako ajja, nikkhamassu vanā tuvaṃ.

    ๑๑.

    11.

    ‘‘‘สิยา นุ โข ตว เอตํ, โก ปชานาติ เต อิทํ;

    ‘‘‘Siyā nu kho tava etaṃ, ko pajānāti te idaṃ;

    สทฺธาธุรํ วหิสิ 7 เม, โกสชฺชพหุลาย จฯ

    Saddhādhuraṃ vahisi 8 me, kosajjabahulāya ca.

    ๑๒.

    12.

    ‘‘‘ชิคุจฺฉิสฺสนฺติ ตํ วิญฺญู, อสุจิํ นาคริโก ยถา;

    ‘‘‘Jigucchissanti taṃ viññū, asuciṃ nāgariko yathā;

    อากฑฺฒิตฺวาน อิสโย, โจทยิสฺสนฺติ ตํ สทาฯ

    Ākaḍḍhitvāna isayo, codayissanti taṃ sadā.

    ๑๓.

    13.

    ‘‘‘ตํ วิญฺญู ปวทิสฺสนฺติ, สมติกฺกนฺตสาสนํ;

    ‘‘‘Taṃ viññū pavadissanti, samatikkantasāsanaṃ;

    สํวาสํ อลภโนฺต หิ, กถํ ชีวิหิสิ 9 ตุวํฯ

    Saṃvāsaṃ alabhanto hi, kathaṃ jīvihisi 10 tuvaṃ.

    ๑๔.

    14.

    ‘‘‘ติธาปภินฺนํ มาตงฺคํ, กุญฺชรํ สฎฺฐิหายนํ;

    ‘‘‘Tidhāpabhinnaṃ mātaṅgaṃ, kuñjaraṃ saṭṭhihāyanaṃ;

    พลี นาโค อุปคนฺตฺวา, ยูถา นีหรเต คชํฯ

    Balī nāgo upagantvā, yūthā nīharate gajaṃ.

    ๑๕.

    15.

    ‘‘‘ยูถา วินิสฺสโฎ สโนฺต, สุขํ สาตํ น วินฺทติ;

    ‘‘‘Yūthā vinissaṭo santo, sukhaṃ sātaṃ na vindati;

    ทุกฺขิโต วิมโน โหติ, ปชฺฌายโนฺต ปเวธติฯ

    Dukkhito vimano hoti, pajjhāyanto pavedhati.

    ๑๖.

    16.

    ‘‘‘ตเถว ชฎิลา ตมฺปิ, นีหริสฺสนฺติ ทุมฺมติํ;

    ‘‘‘Tatheva jaṭilā tampi, nīharissanti dummatiṃ;

    เตหิ ตฺวํ นิสฺสโฎ สโนฺต, สุขํ สาตํ น ลจฺฉสิฯ

    Tehi tvaṃ nissaṭo santo, sukhaṃ sātaṃ na lacchasi.

    ๑๗.

    17.

    ‘‘‘ทิวา วา ยทิ วา รตฺติํ, โสกสลฺลสมปฺปิโต;

    ‘‘‘Divā vā yadi vā rattiṃ, sokasallasamappito;

    ฑยฺหสิ ปริฬาเหน, คโช ยูถาว นิสฺสโฎฯ

    Ḍayhasi pariḷāhena, gajo yūthāva nissaṭo.

    ๑๘.

    18.

    ‘‘‘ชาตรูปํ ยถา กูฎํ, เนว ฌายติ 11 กตฺถจิ;

    ‘‘‘Jātarūpaṃ yathā kūṭaṃ, neva jhāyati 12 katthaci;

    ตถา สีลวิหีโน ตฺวํ, น ฌายิสฺสสิ 13 กตฺถจิฯ

    Tathā sīlavihīno tvaṃ, na jhāyissasi 14 katthaci.

    ๑๙.

    19.

    ‘‘‘อคารํ วสมาโนปิ, กถํ ชีวิหิสิ ตุวํ;

    ‘‘‘Agāraṃ vasamānopi, kathaṃ jīvihisi tuvaṃ;

    มตฺติกํ เปตฺติกญฺจาปิ, นตฺถิ เต นิหิตํ ธนํฯ

    Mattikaṃ pettikañcāpi, natthi te nihitaṃ dhanaṃ.

    ๒๐.

    20.

    ‘‘‘สยํ กมฺมํ กริตฺวาน, คเตฺต เสทํ ปโมจยํ;

    ‘‘‘Sayaṃ kammaṃ karitvāna, gatte sedaṃ pamocayaṃ;

    เอวํ ชีวิหิสิ เคเห, สาธุ เต ตํ น รุจฺจติฯ

    Evaṃ jīvihisi gehe, sādhu te taṃ na ruccati.

    ๒๑.

    21.

    ‘‘‘เอวาหํ ตตฺถ วาเรมิ, สํกิเลสคตํ มนํ;

    ‘‘‘Evāhaṃ tattha vāremi, saṃkilesagataṃ manaṃ;

    นานาธมฺมกถํ กตฺวา, ปาปา จิตฺตํ นิวารยิํ’ฯ

    Nānādhammakathaṃ katvā, pāpā cittaṃ nivārayiṃ’.

    ๒๒.

    22.

    ‘‘เอวํ เม วิหรนฺตสฺส, อปฺปมาทวิหาริโน;

    ‘‘Evaṃ me viharantassa, appamādavihārino;

    ติํสวสฺสสหสฺสานิ, วิปิเน เม อติกฺกมุํฯ

    Tiṃsavassasahassāni, vipine me atikkamuṃ.

    ๒๓.

    23.

    ‘‘อปฺปมาทรตํ ทิสฺวา, อุตฺตมตฺถํ คเวสกํ;

    ‘‘Appamādarataṃ disvā, uttamatthaṃ gavesakaṃ;

    ปทุมุตฺตรสมฺพุโทฺธ, อาคจฺฉิ มม สนฺติกํฯ

    Padumuttarasambuddho, āgacchi mama santikaṃ.

    ๒๔.

    24.

    ‘‘ติมฺพรูสกวณฺณาโภ , อปฺปเมโยฺย อนูปโม;

    ‘‘Timbarūsakavaṇṇābho , appameyyo anūpamo;

    รูเปนาสทิโส พุโทฺธ, อากาเส จงฺกมี ตทาฯ

    Rūpenāsadiso buddho, ākāse caṅkamī tadā.

    ๒๕.

    25.

    ‘‘สุผุโลฺล สาลราชาว, วิชฺชูวพฺภฆนนฺตเร;

    ‘‘Suphullo sālarājāva, vijjūvabbhaghanantare;

    ญาเณนาสทิโส พุโทฺธ, อากาเส จงฺกมี ตทาฯ

    Ñāṇenāsadiso buddho, ākāse caṅkamī tadā.

    ๒๖.

    26.

    ‘‘สีหราชา วสมฺภีโต 15,

    ‘‘Sīharājā vasambhīto 16,

    คชราชาว ทปฺปิโต 17ฯ

    Gajarājāva dappito 18.

    ลาสิโต 19 พฺยคฺฆราชาว, อากาเส จงฺกมี ตทาฯ

    Lāsito 20 byaggharājāva, ākāse caṅkamī tadā.

    ๒๗.

    27.

    ‘‘สิงฺคีนิกฺขสวณฺณาโภ, ขทิรงฺคารสนฺนิโภ;

    ‘‘Siṅgīnikkhasavaṇṇābho, khadiraṅgārasannibho;

    มณิ ยถา โชติรโส, อากาเส จงฺกมี ตทาฯ

    Maṇi yathā jotiraso, ākāse caṅkamī tadā.

    ๒๘.

    28.

    ‘‘วิสุทฺธเกลาสนิโภ , ปุณฺณมาเยว จนฺทิมา;

    ‘‘Visuddhakelāsanibho , puṇṇamāyeva candimā;

    มชฺฌนฺหิเกว 21 สูริโย, อากาเส จงฺกมี ตทาฯ

    Majjhanhikeva 22 sūriyo, ākāse caṅkamī tadā.

    ๒๙.

    29.

    ‘‘ทิสฺวา นเภ จงฺกมนฺตํ, เอวํ จิเนฺตสหํ ตทา;

    ‘‘Disvā nabhe caṅkamantaṃ, evaṃ cintesahaṃ tadā;

    ‘เทโว นุ โข อยํ สโตฺต, อุทาหุ มนุโช อยํฯ

    ‘Devo nu kho ayaṃ satto, udāhu manujo ayaṃ.

    ๓๐.

    30.

    ‘‘‘น เม สุโต วา ทิโฎฺฐ วา, มหิยา เอทิโส นโร;

    ‘‘‘Na me suto vā diṭṭho vā, mahiyā ediso naro;

    อปิ มนฺตปทํ อตฺถิ, อยํ สตฺถา ภวิสฺสติ’ฯ

    Api mantapadaṃ atthi, ayaṃ satthā bhavissati’.

    ๓๑.

    31.

    ‘‘เอวาหํ จินฺตยิตฺวาน, สกํ จิตฺตํ ปสาทยิํ;

    ‘‘Evāhaṃ cintayitvāna, sakaṃ cittaṃ pasādayiṃ;

    นานาปุปฺผญฺจ คนฺธญฺจ, สนฺนิปาเตสหํ 23 ตทาฯ

    Nānāpupphañca gandhañca, sannipātesahaṃ 24 tadā.

    ๓๒.

    32.

    ‘‘ปุปฺผาสนํ ปญฺญเปตฺวา, สาธุจิตฺตํ มโนรมํ;

    ‘‘Pupphāsanaṃ paññapetvā, sādhucittaṃ manoramaṃ;

    นรสารถินํ อคฺคํ, อิทํ วจนมพฺรวิํฯ

    Narasārathinaṃ aggaṃ, idaṃ vacanamabraviṃ.

    ๓๓.

    33.

    ‘‘‘อิทํ เม อาสนํ วีร, ปญฺญตฺตํ ตวนุจฺฉวํ;

    ‘‘‘Idaṃ me āsanaṃ vīra, paññattaṃ tavanucchavaṃ;

    หาสยโนฺต มมํ จิตฺตํ, นิสีท กุสุมาสเน’ฯ

    Hāsayanto mamaṃ cittaṃ, nisīda kusumāsane’.

    ๓๔.

    34.

    ‘‘นิสีทิ ตตฺถ ภควา, อสมฺภีโตว 25 เกสรี;

    ‘‘Nisīdi tattha bhagavā, asambhītova 26 kesarī;

    สตฺตรตฺตินฺทิวํ พุโทฺธ, ปวเร กุสุมาสเนฯ

    Sattarattindivaṃ buddho, pavare kusumāsane.

    ๓๕.

    35.

    ‘‘นมสฺสมาโน อฎฺฐาสิํ, สตฺตรตฺตินฺทิวํ อหํ;

    ‘‘Namassamāno aṭṭhāsiṃ, sattarattindivaṃ ahaṃ;

    วุฎฺฐหิตฺวา สมาธิมฺหา, สตฺถา โลเก อนุตฺตโร;

    Vuṭṭhahitvā samādhimhā, satthā loke anuttaro;

    มม กมฺมํ ปกิเตฺตโนฺต, อิทํ วจนมพฺรวิฯ

    Mama kammaṃ pakittento, idaṃ vacanamabravi.

    ๓๖.

    36.

    ‘‘‘ภาเวหิ พุทฺธานุสฺสติํ, ภาวนานมนุตฺตรํ;

    ‘‘‘Bhāvehi buddhānussatiṃ, bhāvanānamanuttaraṃ;

    อิมํ สติํ ภาวยิตฺวา, ปูรยิสฺสสิ มานสํฯ

    Imaṃ satiṃ bhāvayitvā, pūrayissasi mānasaṃ.

    ๓๗.

    37.

    ‘‘‘ติํสกปฺปสหสฺสานิ, เทวโลเก รมิสฺสสิ;

    ‘‘‘Tiṃsakappasahassāni, devaloke ramissasi;

    อสีติกฺขตฺตุํ เทวิโนฺท, เทวรชฺชํ กริสฺสสิ;

    Asītikkhattuṃ devindo, devarajjaṃ karissasi;

    สหสฺสกฺขตฺตุํ จกฺกวตฺตี, ราชา รเฎฺฐ ภวิสฺสสิฯ

    Sahassakkhattuṃ cakkavattī, rājā raṭṭhe bhavissasi.

    ๓๘.

    38.

    ‘‘‘ปเทสรชฺชํ วิปุลํ, คณนาโต อสงฺขิยํ;

    ‘‘‘Padesarajjaṃ vipulaṃ, gaṇanāto asaṅkhiyaṃ;

    อนุโภสฺสสิ ตํ สพฺพํ, พุทฺธานุสฺสติยา ผลํฯ

    Anubhossasi taṃ sabbaṃ, buddhānussatiyā phalaṃ.

    ๓๙.

    39.

    ‘‘‘ภวาภเว สํสรโนฺต, มหาโภคํ ลภิสฺสสิ;

    ‘‘‘Bhavābhave saṃsaranto, mahābhogaṃ labhissasi;

    โภเค เต อูนตา นตฺถิ, พุทฺธานุสฺสติยา ผลํฯ

    Bhoge te ūnatā natthi, buddhānussatiyā phalaṃ.

    ๔๐.

    40.

    ‘‘‘กปฺปสตสหสฺสมฺหิ, โอกฺกากกุลสมฺภโว;

    ‘‘‘Kappasatasahassamhi, okkākakulasambhavo;

    โคตโม นาม โคเตฺตน, สตฺถา โลเก ภวิสฺสติฯ

    Gotamo nāma gottena, satthā loke bhavissati.

    ๔๑.

    41.

    ‘‘‘อสีติโกฎิํ ฉเฑฺฑตฺวา, ทาเส กมฺมกเร พหู;

    ‘‘‘Asītikoṭiṃ chaḍḍetvā, dāse kammakare bahū;

    โคตมสฺส ภควโต, สาสเน ปพฺพชิสฺสสิฯ

    Gotamassa bhagavato, sāsane pabbajissasi.

    ๔๒.

    42.

    ‘‘‘อาราธยิตฺวา สมฺพุทฺธํ, โคตมํ สกฺยปุงฺควํ;

    ‘‘‘Ārādhayitvā sambuddhaṃ, gotamaṃ sakyapuṅgavaṃ;

    สุภูติ นาม นาเมน, เหสฺสติ สตฺถุ สาวโกฯ

    Subhūti nāma nāmena, hessati satthu sāvako.

    ๔๓.

    43.

    ‘‘‘ภิกฺขุสเงฺฆ นิสีทิตฺวา, ทกฺขิเณยฺยคุณมฺหิ ตํ;

    ‘‘‘Bhikkhusaṅghe nisīditvā, dakkhiṇeyyaguṇamhi taṃ;

    ตถารณวิหาเร จ, ทฺวีสุ อเคฺค ฐเปสฺสติ’ฯ

    Tathāraṇavihāre ca, dvīsu agge ṭhapessati’.

    ๔๔.

    44.

    ‘‘อิทํ วตฺวาน สมฺพุโทฺธ, ชลชุตฺตมนามโก;

    ‘‘Idaṃ vatvāna sambuddho, jalajuttamanāmako;

    นภํ อพฺภุคฺคมี วีโร, หํสราชาว อมฺพเรฯ

    Nabhaṃ abbhuggamī vīro, haṃsarājāva ambare.

    ๔๕.

    45.

    ‘‘สาสิโต โลกนาเถน, นมสฺสิตฺวา ตถาคตํ;

    ‘‘Sāsito lokanāthena, namassitvā tathāgataṃ;

    สทา ภาเวมิ มุทิโต, พุทฺธานุสฺสติมุตฺตมํฯ

    Sadā bhāvemi mudito, buddhānussatimuttamaṃ.

    ๔๖.

    46.

    ‘‘เตน กเมฺมน สุกเตน, เจตนาปณิธีหิ จ;

    ‘‘Tena kammena sukatena, cetanāpaṇidhīhi ca;

    ชหิตฺวา มานุสํ เทหํ, ตาวติํสํ อคจฺฉหํฯ

    Jahitvā mānusaṃ dehaṃ, tāvatiṃsaṃ agacchahaṃ.

    ๔๗.

    47.

    ‘‘อสีติกฺขตฺตุํ เทวิโนฺท, เทวรชฺชมการยิํ;

    ‘‘Asītikkhattuṃ devindo, devarajjamakārayiṃ;

    สหสฺสกฺขตฺตุํ ราชา จ, จกฺกวตฺตี อโหสหํฯ

    Sahassakkhattuṃ rājā ca, cakkavattī ahosahaṃ.

    ๔๘.

    48.

    ‘‘ปเทสรชฺชํ วิปุลํ, คณนาโต อสงฺขิยํ;

    ‘‘Padesarajjaṃ vipulaṃ, gaṇanāto asaṅkhiyaṃ;

    อนุโภมิ สุสมฺปตฺติํ, พุทฺธานุสฺสติยา ผลํฯ

    Anubhomi susampattiṃ, buddhānussatiyā phalaṃ.

    ๔๙.

    49.

    ‘‘ภวาภเว สํสรโนฺต, มหาโภคํ ลภามหํ;

    ‘‘Bhavābhave saṃsaranto, mahābhogaṃ labhāmahaṃ;

    โภเค เม อูนตา นตฺถิ, พุทฺธานุสฺสติยา ผลํฯ

    Bhoge me ūnatā natthi, buddhānussatiyā phalaṃ.

    ๕๐.

    50.

    ‘‘สตสหสฺสิโต กเปฺป, ยํ กมฺมมกริํ ตทา;

    ‘‘Satasahassito kappe, yaṃ kammamakariṃ tadā;

    ทุคฺคติํ นาภิชานามิ, พุทฺธานุสฺสติยา ผลํฯ

    Duggatiṃ nābhijānāmi, buddhānussatiyā phalaṃ.

    ๕๑.

    51.

    ‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;

    ‘‘Paṭisambhidā catasso, vimokkhāpi ca aṭṭhime;

    ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

    Chaḷabhiññā sacchikatā, kataṃ buddhassa sāsanaṃ’’.

    อิตฺถํ สุทํ อายสฺมา สุภูติ เถโร อิมา คาถาโย อภาสิตฺถาติฯ

    Itthaṃ sudaṃ āyasmā subhūti thero imā gāthāyo abhāsitthāti.

    สุภูติเตฺถรสฺสาปทานํ ปฐมํฯ

    Subhūtittherassāpadānaṃ paṭhamaṃ.




    Next: ๒. อุปวานเตฺถรอปทานํ • 2. Upavānattheraapadānaṃ




    Footnotes:
    1. เอกากิโก (ก.)
    2. ekākiko (ka.)
    3. ปวตฺตปณฺฑุปตฺตานิ (สี.)
    4. pavattapaṇḍupattāni (sī.)
    5. สทายุตฺตํ (สี.), ยทายุตฺตํ (สฺยา.)
    6. sadāyuttaṃ (sī.), yadāyuttaṃ (syā.)
    7. สทฺธาธุรํ ชหสิ (สี.), สีฆํ ธุรํ วหิสิ (สฺยา.)
    8. saddhādhuraṃ jahasi (sī.), sīghaṃ dhuraṃ vahisi (syā.)
    9. ชีวิสฺสสิ (สี.)
    10. jīvissasi (sī.)
    11. ยายติ (สฺยา.)
    12. yāyati (syā.)
    13. ยาริสฺสติ (สฺยา.)
    14. yārissati (syā.)
    15. ฉมฺภิโต (ก.)
    16. chambhito (ka.)
    17. ทมฺมิโต (ก.)
    18. dammito (ka.)
    19. อภีโต (สฺยา.)
    20. abhīto (syā.)
    21. มชฺฌนฺติเกว (สพฺพตฺถ)
    22. majjhantikeva (sabbattha)
    23. สนฺนิปาเตตฺวาหํ (สี.)
    24. sannipātetvāhaṃ (sī.)
    25. อฉมฺภิโตว (ก.)
    26. achambhitova (ka.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑. สุภูติเตฺถรอปทานวณฺณนา • 1. Subhūtittheraapadānavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact