| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
3. субхууд̇иваг̇г̇о
3. Subhūtivaggo
1. субхууд̇ид̇т̇зраабад̣̇аанаван̣н̣анаа
1. Subhūtittheraapadānavaṇṇanā
химаванд̇ассаавид̣̇уурзд̇иаад̣̇игам̣ ааяасмад̇о субхууд̇ид̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о ид̇о габбасад̇асахассамад̇т̇агз ануббаннзязва бад̣̇умуд̇д̇арз бхаг̇авад̇и логанаат̇з хам̣савад̇ийнаг̇арз ан̃н̃ад̇арасса б̣раахман̣амахаасааласса згабуд̇д̇аго худ̇ваа ниб̣б̣ад̇д̇и, д̇асса нанд̣̇амаан̣авод̇и наамам̣ агам̣су. со ваяаббад̇д̇о д̇аяо взд̣̇з уг̇г̇ан̣хид̇ваа д̇ад̇т̇а саарам̣ абассанд̇о ад̇д̇ано бариваарабхууд̇зхи жад̇ужад̇д̇аалийсааяа маан̣авасахассзхи сад̣̇д̇хим̣ баб̣б̣ад̇абаад̣̇з исибаб̣б̣аж̇ж̇ам̣ баб̣б̣аж̇ид̇ваа адта самаабад̇д̇ияо бан̃жаабхин̃н̃ааяо жа ниб̣б̣ад̇д̇зси. анд̇зваасигаанамби гаммадтаанам̣ аажигки. д̇зби нажирассзва жхааналаабхино ахзсум̣.
Himavantassāvidūretiādikaṃ āyasmato subhūtittherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ito kappasatasahassamatthake anuppanneyeva padumuttare bhagavati lokanāthe haṃsavatīnagare aññatarassa brāhmaṇamahāsālassa ekaputtako hutvā nibbatti, tassa nandamāṇavoti nāmaṃ akaṃsu. So vayappatto tayo vede uggaṇhitvā tattha sāraṃ apassanto attano parivārabhūtehi catucattālīsāya māṇavasahassehi saddhiṃ pabbatapāde isipabbajjaṃ pabbajitvā aṭṭha samāpattiyo pañcābhiññāyo ca nibbattesi. Antevāsikānampi kammaṭṭhānaṃ ācikkhi. Tepi nacirasseva jhānalābhino ahesuṃ.
д̇зна жа самаязна бад̣̇умуд̇д̇аро бхаг̇аваа логз уббаж̇ж̇ид̇ваа хам̣савад̇ийнаг̇арам̣ убаниссааяа вихаранд̇о згад̣̇ивасам̣ бажжуусасамаяз логам̣ вологзнд̇о нанд̣̇ад̇аабасасса анд̇зваасигаж̇адилаанам̣ арахад̇д̇уубаниссаяам̣, нанд̣̇ад̇аабасасса жа д̣̇вийхан̇г̇зхи саманнааг̇ад̇асса саавагадтаананд̇арасса бад̇т̇анам̣ д̣̇исваа баад̇ова сарийрабадиж̇аг̇г̇анам̣ гад̇ваа буб̣б̣ан̣хасамаяз бад̇д̇ажийварамаад̣̇ааяа ан̃н̃ам̣ ган̃жи анааманд̇зд̇ваа сийхо вияа згажаро нанд̣̇ад̇аабасасса анд̇зваасигзсу палаапалад̇т̇ааяа г̇ад̇зсу ‘‘б̣уд̣̇д̇хабхаавам̣ мз ж̇аанаад̇уу’’д̇и бассанд̇ассзва нанд̣̇ад̇аабасасса аагаасад̇о од̇арид̇ваа бат̇авияам̣ бад̇идтааси. нанд̣̇ад̇аабасо б̣уд̣̇д̇хаанубхааван̃жзва лагкан̣абаарибуурин̃жа д̣̇исваа лагкан̣аманд̇з саммасид̇ваа ‘‘имзхи лагкан̣зхи саманнааг̇ад̇о наама аг̇аарам̣ аж̇жхаавасанд̇о рааж̇аа ход̇и жаггавад̇д̇ий, баб̣б̣аж̇анд̇о логз вивадажчзд̣̇о саб̣б̣ан̃н̃уу б̣уд̣̇д̇хо ход̇и, аяам̣ бурисааж̇аанийяо ниссам̣саяам̣ б̣уд̣̇д̇хо’’д̇и н̃ад̇ваа бажжуг̇г̇аманам̣ гад̇ваа бан̃жабад̇идтид̇зна ванд̣̇ид̇ваа аасанам̣ бан̃н̃аабзд̇ваа ад̣̇ааси. нисийд̣̇и бхаг̇аваа бан̃н̃ад̇д̇з аасанз. нанд̣̇ад̇аабасоби ад̇д̇ано анужчавигам̣ аасанам̣ г̇ахзд̇ваа згаманд̇ам̣ нисийд̣̇и. д̇асмим̣ самаяз жад̇ужад̇д̇аалийсасахассаж̇адилаа бан̣ийд̇абан̣ийд̇аани ож̇аванд̇аани палаапалаани г̇ахзд̇ваа аажарияасса санд̇игам̣ самбад̇д̇аа б̣уд̣̇д̇хаанан̃жзва аажарияасса жа нисиннаагаарам̣ ологзд̇ваа аахам̣су – ‘‘аажарияа, маяам̣ ‘имасмим̣ логз д̇умхзхи маханд̇ад̇аро над̇т̇ий’д̇и вижараама, аяам̣ бана бурисо д̇умхзхи маханд̇ад̇аро ман̃н̃з’’д̇и. нанд̣̇ад̇аабасо – ‘‘д̇аад̇аа , гим̣ вад̣̇зт̇а, д̇умхз саасабзна сад̣̇д̇хим̣ адтасадтияож̇анасад̇асахассуб̣б̣зд̇хам̣ синзрум̣ убамзд̇ум̣ ижчат̇а, саб̣б̣ан̃н̃уб̣уд̣̇д̇хзна сад̣̇д̇хим̣ маа мам̣ убамид̇т̇аа’’д̇и ааха. ат̇а д̇з д̇аабасаа – ‘‘сажз аяам̣ ораго абхависса, на амхаагам̣ аажарияо звам̣ убамам̣ аахарзяяа. яаава махаавад̇ааяам̣ бурисааж̇аанийяо’’д̇и баад̣̇зсу нибад̇ид̇ваа сирасаа ванд̣̇им̣су. ат̇а д̇з аажарияо ааха – ‘‘д̇аад̇аа, амхаагам̣ б̣уд̣̇д̇хаанам̣ анужчавиго д̣̇зяяад̇хаммо над̇т̇и, бхаг̇аваа жа бхигкаажааравзлааяам̣ ид̇хааг̇ад̇о, д̇асмаа маяам̣ яат̇ааб̣алам̣ д̣̇зяяад̇хаммам̣ д̣̇ассаама, д̇умхзхи яам̣ яам̣ бан̣ийд̇ам̣ палаапалам̣ аабхад̇ам̣, д̇ам̣ д̇ам̣ аахарат̇аа’’д̇и аахараабзд̇ваа сахад̇т̇знзва д̇ховид̇ваа саяам̣ д̇ат̇ааг̇ад̇асса бад̇д̇з бад̇идтаабзси. сад̇т̇аараа палаапалз бадиг̇г̇ахид̇амад̇д̇з д̣̇звад̇аа д̣̇иб̣б̣ож̇ам̣ багкибим̣су. д̇аабасо уд̣̇агамби саяамзва бариссаавзд̇ваа ад̣̇ааси. д̇ад̇о бхож̇анагижжам̣ нидтаабзд̇ваа нисиннз сад̇т̇ари саб̣б̣з анд̇зваасигз баггосид̇ваа сад̇т̇у санд̇игз сааран̣ийяам̣ гат̇ам̣ гат̇знд̇о нисийд̣̇и. сад̇т̇аа ‘‘бхигкусан̇гхо ааг̇ажчад̇уу’’д̇и жинд̇зси. сад̇т̇у жид̇д̇ам̣ н̃ад̇ваа сад̇асахассамад̇д̇аа кийн̣аасаваа ааг̇анд̇ваа сад̇т̇аарам̣ ванд̣̇ид̇ваа адтам̣су.
Tena ca samayena padumuttaro bhagavā loke uppajjitvā haṃsavatīnagaraṃ upanissāya viharanto ekadivasaṃ paccūsasamaye lokaṃ volokento nandatāpasassa antevāsikajaṭilānaṃ arahattūpanissayaṃ, nandatāpasassa ca dvīhaṅgehi samannāgatassa sāvakaṭṭhānantarassa patthanaṃ disvā pātova sarīrapaṭijagganaṃ katvā pubbaṇhasamaye pattacīvaramādāya aññaṃ kañci anāmantetvā sīho viya ekacaro nandatāpasassa antevāsikesu phalāphalatthāya gatesu ‘‘buddhabhāvaṃ me jānātū’’ti passantasseva nandatāpasassa ākāsato otaritvā pathaviyaṃ patiṭṭhāsi. Nandatāpaso buddhānubhāvañceva lakkhaṇapāripūriñca disvā lakkhaṇamante sammasitvā ‘‘imehi lakkhaṇehi samannāgato nāma agāraṃ ajjhāvasanto rājā hoti cakkavattī, pabbajanto loke vivaṭacchedo sabbaññū buddho hoti, ayaṃ purisājānīyo nissaṃsayaṃ buddho’’ti ñatvā paccuggamanaṃ katvā pañcapatiṭṭhitena vanditvā āsanaṃ paññāpetvā adāsi. Nisīdi bhagavā paññatte āsane. Nandatāpasopi attano anucchavikaṃ āsanaṃ gahetvā ekamantaṃ nisīdi. Tasmiṃ samaye catucattālīsasahassajaṭilā paṇītapaṇītāni ojavantāni phalāphalāni gahetvā ācariyassa santikaṃ sampattā buddhānañceva ācariyassa ca nisinnākāraṃ oloketvā āhaṃsu – ‘‘ācariya, mayaṃ ‘imasmiṃ loke tumhehi mahantataro natthī’ti vicarāma, ayaṃ pana puriso tumhehi mahantataro maññe’’ti. Nandatāpaso – ‘‘tātā , kiṃ vadetha, tumhe sāsapena saddhiṃ aṭṭhasaṭṭhiyojanasatasahassubbedhaṃ sineruṃ upametuṃ icchatha, sabbaññubuddhena saddhiṃ mā maṃ upamitthā’’ti āha. Atha te tāpasā – ‘‘sace ayaṃ orako abhavissa, na amhākaṃ ācariyo evaṃ upamaṃ āhareyya. Yāva mahāvatāyaṃ purisājānīyo’’ti pādesu nipatitvā sirasā vandiṃsu. Atha te ācariyo āha – ‘‘tātā, amhākaṃ buddhānaṃ anucchaviko deyyadhammo natthi, bhagavā ca bhikkhācāravelāyaṃ idhāgato, tasmā mayaṃ yathābalaṃ deyyadhammaṃ dassāma, tumhehi yaṃ yaṃ paṇītaṃ phalāphalaṃ ābhataṃ, taṃ taṃ āharathā’’ti āharāpetvā sahattheneva dhovitvā sayaṃ tathāgatassa patte patiṭṭhāpesi. Satthārā phalāphale paṭiggahitamatte devatā dibbojaṃ pakkhipiṃsu. Tāpaso udakampi sayameva parissāvetvā adāsi. Tato bhojanakiccaṃ niṭṭhāpetvā nisinne satthari sabbe antevāsike pakkositvā satthu santike sāraṇīyaṃ kathaṃ kathento nisīdi. Satthā ‘‘bhikkhusaṅgho āgacchatū’’ti cintesi. Satthu cittaṃ ñatvā satasahassamattā khīṇāsavā āgantvā satthāraṃ vanditvā aṭṭhaṃsu.
ат̇а нанд̣̇ад̇аабасо анд̇зваасигз ааманд̇зси – ‘‘д̇аад̇аа, б̣уд̣̇д̇хаанам̣ нисиннаасанамби нийжам̣, саман̣асад̇асахассассаби аасанам̣ над̇т̇и. д̇умхзхи аж̇ж̇а ул̣аарам̣ бхаг̇авад̇о бхигкусан̇гхасса жа саггаарам̣ гаад̇ум̣ ваддад̇и, баб̣б̣ад̇абаад̣̇ад̇о ван̣н̣аг̇анд̇хасамбаннаани бубпаани аахарат̇аа’’д̇и ааха. ажинд̇зяяад̇д̇аа ид̣̇д̇хивисаяасса д̇з мухуд̇д̇знзва ван̣н̣аг̇анд̇харасасамбаннаани бубпаани аахарид̇ваа б̣уд̣̇д̇хаанам̣ яож̇анаббамаан̣ам̣ бубпаасанам̣ бан̃н̃аабзсум̣. аг̇г̇асаавагаанам̣ д̇иг̇аавуд̇ам̣, сзсабхигкуунам̣ ад̣дхаяож̇анаад̣̇ибхзд̣̇ам̣, сан̇гханавагасса усабхамад̇д̇ам̣ бан̃н̃аабзсум̣. звам̣ бан̃н̃ад̇д̇зсу аасанзсу нанд̣̇ад̇аабасо д̇ат̇ааг̇ад̇асса бурад̇о ан̃ж̇алим̣ баг̇г̇аяха тид̇о, ‘‘бханд̇з, амхаагам̣ д̣̇ийгхарад̇д̇ам̣ хид̇ааяа сукааяа имам̣ бубпаасанам̣ ааруяха нисийд̣̇ат̇аа’’д̇и ааха. нисийд̣̇и бхаг̇аваа бубпаасанз. звам̣ нисиннз сад̇т̇ари сад̇т̇у аагаарам̣ н̃ад̇ваа бхигкуу ад̇д̇ано ад̇д̇ано бад̇д̇аасанз нисийд̣̇им̣су. нанд̣̇ад̇аабасо маханд̇ам̣ бубпажчад̇д̇ам̣ г̇ахзд̇ваа д̇ат̇ааг̇ад̇асса мад̇т̇агз д̇хаарзнд̇о адтааси. сад̇т̇аа ‘‘д̇аабасаанам̣ аяам̣ саггааро махабпало ход̇уу’’д̇и нирод̇хасамаабад̇д̇им̣ самаабаж̇ж̇и. сад̇т̇у самаабаннабхаавам̣ н̃ад̇ваа бхигкууби самаабад̇д̇им̣ самаабаж̇ж̇им̣су. д̇ат̇ааг̇ад̇з сад̇д̇аахам̣ нирод̇хам̣ самаабаж̇ж̇ид̇ваа нисиннз анд̇зваасигаа бхигкаажаарагаалз самбад̇д̇з ванамуулапалаапалам̣ барибхун̃ж̇ид̇ваа сзсагаалз б̣уд̣̇д̇хаанам̣ ан̃ж̇алим̣ баг̇г̇аяха адтам̣су. нанд̣̇ад̇аабасо бана бхигкаажаарамби аг̇анд̇ваа бубпажчад̇д̇ам̣ д̇хаарзнд̇оязва сад̇д̇аахам̣ бийд̇исукзнзва вийд̇инаамзси.
Atha nandatāpaso antevāsike āmantesi – ‘‘tātā, buddhānaṃ nisinnāsanampi nīcaṃ, samaṇasatasahassassapi āsanaṃ natthi. Tumhehi ajja uḷāraṃ bhagavato bhikkhusaṅghassa ca sakkāraṃ kātuṃ vaṭṭati, pabbatapādato vaṇṇagandhasampannāni pupphāni āharathā’’ti āha. Acinteyyattā iddhivisayassa te muhutteneva vaṇṇagandharasasampannāni pupphāni āharitvā buddhānaṃ yojanappamāṇaṃ pupphāsanaṃ paññāpesuṃ. Aggasāvakānaṃ tigāvutaṃ, sesabhikkhūnaṃ aḍḍhayojanādibhedaṃ, saṅghanavakassa usabhamattaṃ paññāpesuṃ. Evaṃ paññattesu āsanesu nandatāpaso tathāgatassa purato añjaliṃ paggayha ṭhito, ‘‘bhante, amhākaṃ dīgharattaṃ hitāya sukhāya imaṃ pupphāsanaṃ āruyha nisīdathā’’ti āha. Nisīdi bhagavā pupphāsane. Evaṃ nisinne satthari satthu ākāraṃ ñatvā bhikkhū attano attano pattāsane nisīdiṃsu. Nandatāpaso mahantaṃ pupphacchattaṃ gahetvā tathāgatassa matthake dhārento aṭṭhāsi. Satthā ‘‘tāpasānaṃ ayaṃ sakkāro mahapphalo hotū’’ti nirodhasamāpattiṃ samāpajji. Satthu samāpannabhāvaṃ ñatvā bhikkhūpi samāpattiṃ samāpajjiṃsu. Tathāgate sattāhaṃ nirodhaṃ samāpajjitvā nisinne antevāsikā bhikkhācārakāle sampatte vanamūlaphalāphalaṃ paribhuñjitvā sesakāle buddhānaṃ añjaliṃ paggayha aṭṭhaṃsu. Nandatāpaso pana bhikkhācārampi agantvā pupphacchattaṃ dhārentoyeva sattāhaṃ pītisukheneva vītināmesi.
сад̇т̇аа нирод̇хад̇о вудтааяа аран̣авихаариан̇г̇зна д̣̇агкин̣зяяан̇г̇зна жаад̇и д̣̇вийхи ан̇г̇зхи саманнааг̇ад̇ам̣ згам̣ саавагам̣ ‘‘исиг̇ан̣асса бубпаасанаанумод̣̇анам̣ гарохий’’д̇и аан̣аабзси. со жаггавад̇д̇иран̃н̃о санд̇игаа бадилад̣̇д̇хамахаалаабхо махааяод̇хо вияа д̇удтамаанасо ад̇д̇ано висаяз тад̇ваа д̇збидагам̣ б̣уд̣̇д̇хаважанам̣ саммасид̇ваа анумод̣̇анамагааси. д̇асса д̣̇зсанаавасаанз сад̇т̇аа саяам̣ д̇хаммам̣ д̣̇зсзси. сад̇т̇у д̣̇зсанаавасаанз саб̣б̣зби жад̇ужад̇д̇аалийсасахассад̇аабасаа арахад̇д̇ам̣ баабун̣им̣су. сад̇т̇аа – ‘‘зт̇а бхигкаво’’д̇и хад̇т̇ам̣ басаарзси. д̇зсам̣ д̇аавад̣̇зва гзсамассуу анд̇арад̇хааяим̣су . адта баригкаараа сарийрз бадимуггаава ахзсум̣. д̇з садтивассигад̇т̇зраа вияа сад̇т̇аарам̣ бариваараяим̣су. нанд̣̇ад̇аабасо бана вигкид̇д̇ажид̇д̇ад̇ааяа висзсам̣ наад̇хиг̇ан̃чи. д̇асса гира аран̣авихаарид̇т̇зрасса д̇хаммам̣ сод̇ум̣ аарад̣̇д̇хагаалад̇о бадтааяа – ‘‘ахо вад̇аахамби анааг̇ад̇з згасса б̣уд̣̇д̇хасса саасанз иминаа саавагзна лад̣̇д̇хаг̇ун̣ам̣ лабхзяяа’’нд̇и жид̇д̇ам̣ уд̣̇абаад̣̇и. со д̇зна вид̇аггзна маг̇г̇апалабадивзд̇хам̣ гаад̇ум̣ наасагки. д̇ат̇ааг̇ад̇ам̣ бана ванд̣̇ид̇ваа ан̃ж̇алим̣ баг̇г̇аяха саммукз тид̇о звамааха – ‘‘бханд̇з, язна бхигкунаа исиг̇ан̣асса бубпаасанаанумод̣̇анаа гад̇аа, го наамааяам̣ д̇умхаагам̣ саасанз’’д̇и? ‘‘аран̣авихаариан̇г̇зна жа д̣̇агкин̣зяяан̇г̇зна жа зд̇ад̣̇аг̇г̇адтаанам̣ бад̇д̇о зсо бхигкуу’’д̇и. ‘‘бханд̇з, явааяам̣ маяаа сад̇д̇аахам̣ бубпажчад̇д̇ам̣ д̇хаарзнд̇зна саггааро гад̇о, д̇зна ад̇хигаарзна ан̃н̃ам̣ самбад̇д̇им̣ на бад̇т̇зми, анааг̇ад̇з бана згасса б̣уд̣̇д̇хасса саасанз аяам̣ т̇зро вияа д̣̇вийхан̇г̇зхи саманнааг̇ад̇о сааваго бхавзяяа’’нд̇и бад̇т̇анам̣ агааси.
Satthā nirodhato vuṭṭhāya araṇavihāriaṅgena dakkhiṇeyyaṅgena cāti dvīhi aṅgehi samannāgataṃ ekaṃ sāvakaṃ ‘‘isigaṇassa pupphāsanānumodanaṃ karohī’’ti āṇāpesi. So cakkavattirañño santikā paṭiladdhamahālābho mahāyodho viya tuṭṭhamānaso attano visaye ṭhatvā tepiṭakaṃ buddhavacanaṃ sammasitvā anumodanamakāsi. Tassa desanāvasāne satthā sayaṃ dhammaṃ desesi. Satthu desanāvasāne sabbepi catucattālīsasahassatāpasā arahattaṃ pāpuṇiṃsu. Satthā – ‘‘etha bhikkhavo’’ti hatthaṃ pasāresi. Tesaṃ tāvadeva kesamassū antaradhāyiṃsu . Aṭṭha parikkhārā sarīre paṭimukkāva ahesuṃ. Te saṭṭhivassikattherā viya satthāraṃ parivārayiṃsu. Nandatāpaso pana vikkhittacittatāya visesaṃ nādhigañchi. Tassa kira araṇavihārittherassa dhammaṃ sotuṃ āraddhakālato paṭṭhāya – ‘‘aho vatāhampi anāgate ekassa buddhassa sāsane iminā sāvakena laddhaguṇaṃ labheyya’’nti cittaṃ udapādi. So tena vitakkena maggaphalapaṭivedhaṃ kātuṃ nāsakkhi. Tathāgataṃ pana vanditvā añjaliṃ paggayha sammukhe ṭhito evamāha – ‘‘bhante, yena bhikkhunā isigaṇassa pupphāsanānumodanā katā, ko nāmāyaṃ tumhākaṃ sāsane’’ti? ‘‘Araṇavihāriaṅgena ca dakkhiṇeyyaṅgena ca etadaggaṭṭhānaṃ patto eso bhikkhū’’ti. ‘‘Bhante, yvāyaṃ mayā sattāhaṃ pupphacchattaṃ dhārentena sakkāro kato, tena adhikārena aññaṃ sampattiṃ na patthemi, anāgate pana ekassa buddhassa sāsane ayaṃ thero viya dvīhaṅgehi samannāgato sāvako bhaveyya’’nti patthanaṃ akāsi.
сад̇т̇аа ‘‘самиж̇жхиссад̇и ну ко имасса д̇аабасасса бад̇т̇анаа’’д̇и анааг̇ад̇ам̣сан̃аан̣ам̣ бзсзд̇ваа ологзнд̇о габбасад̇асахассам̣ ад̇иггамид̇ваа самиж̇жханагабхаавам̣ д̣̇исваа, ‘‘д̇аабаса, на д̇з аяам̣ бад̇т̇анаа могхам̣ бхависсад̇и, анааг̇ад̇з габбасад̇асахассам̣ ад̇иггамид̇ваа г̇од̇амо наама б̣уд̣̇д̇хо уббаж̇ж̇иссад̇и, д̇асса санд̇игз самиж̇жхиссад̇ий’’д̇и д̇хаммагат̇ам̣ гат̇зд̇ваа бхигкусан̇гхабаривуд̇о аагаасам̣ багканд̣̇и. нанд̣̇ад̇аабасо яаава жагкубат̇ам̣ на самад̇иггамад̇и, д̇аава сад̇т̇у бхигкусан̇гхасса жа ан̃ж̇алим̣ баг̇г̇ахзд̇ваа адтааси. со абарабхааг̇з гаалзна гаалам̣ сад̇т̇аарам̣ убасан̇гамид̇ваа д̇хаммам̣ сун̣ид̇ваа абарихийнаж̇жхаанова гаалам̣ гад̇ваа б̣рахмалогз ниб̣б̣ад̇д̇о. д̇ад̇о бана жуд̇о абарааниби бан̃жа ж̇аад̇исад̇аани баб̣б̣аж̇ид̇ваа ааран̃н̃агова ахоси, гассабасаммаасамб̣уд̣̇д̇хагаалзби баб̣б̣аж̇ид̇ваа ааран̃н̃аго худ̇ваа г̇ад̇абажжааг̇ад̇авад̇д̇ам̣ буурзси. зд̇ам̣ гира вад̇д̇ам̣ абарибуурзд̇ваа махаасаавагабхаавам̣ баабун̣анд̇аа наама над̇т̇и, г̇ад̇абажжааг̇ад̇авад̇д̇ам̣ бана ааг̇амадтагат̇аасу вуд̇д̇анаязнзва взд̣̇ид̇аб̣б̣ам̣. со вийсад̇ивассасахассаани г̇ад̇абажжааг̇ад̇авад̇д̇ам̣ буурзд̇ваа гаалам̣ гад̇ваа д̇аавад̇им̣сад̣̇звалогз ниб̣б̣ад̇д̇и.
Satthā ‘‘samijjhissati nu kho imassa tāpasassa patthanā’’ti anāgataṃsañāṇaṃ pesetvā olokento kappasatasahassaṃ atikkamitvā samijjhanakabhāvaṃ disvā, ‘‘tāpasa, na te ayaṃ patthanā moghaṃ bhavissati, anāgate kappasatasahassaṃ atikkamitvā gotamo nāma buddho uppajjissati, tassa santike samijjhissatī’’ti dhammakathaṃ kathetvā bhikkhusaṅghaparivuto ākāsaṃ pakkhandi. Nandatāpaso yāva cakkhupathaṃ na samatikkamati, tāva satthu bhikkhusaṅghassa ca añjaliṃ paggahetvā aṭṭhāsi. So aparabhāge kālena kālaṃ satthāraṃ upasaṅkamitvā dhammaṃ suṇitvā aparihīnajjhānova kālaṃ katvā brahmaloke nibbatto. Tato pana cuto aparānipi pañca jātisatāni pabbajitvā āraññakova ahosi, kassapasammāsambuddhakālepi pabbajitvā āraññako hutvā gatapaccāgatavattaṃ pūresi. Etaṃ kira vattaṃ aparipūretvā mahāsāvakabhāvaṃ pāpuṇantā nāma natthi, gatapaccāgatavattaṃ pana āgamaṭṭhakathāsu vuttanayeneva veditabbaṃ. So vīsativassasahassāni gatapaccāgatavattaṃ pūretvā kālaṃ katvā tāvatiṃsadevaloke nibbatti.
звам̣ со д̇аавад̇им̣сабхаванз абараабарам̣ уббаж̇ж̇анавасзна д̣̇иб̣б̣асамбад̇д̇им̣ анубхавид̇ваа д̇ад̇о жуд̇о мануссалогз анзгасад̇агкад̇д̇ум̣ жаггавад̇д̇ирааж̇аа бад̣̇зсарааж̇аа жа худ̇ваа ул̣аарам̣ мануссасамбад̇д̇им̣ анубхавид̇ваа амхаагам̣ бхаг̇авад̇о уббаннагаалз саавад̇т̇ияам̣ суманасздтисса г̇зхз анаат̇абин̣д̣игасса ганидто худ̇ваа ниб̣б̣ад̇д̇и. субхууд̇ийд̇исса наамам̣ ахоси.
Evaṃ so tāvatiṃsabhavane aparāparaṃ uppajjanavasena dibbasampattiṃ anubhavitvā tato cuto manussaloke anekasatakkhattuṃ cakkavattirājā padesarājā ca hutvā uḷāraṃ manussasampattiṃ anubhavitvā amhākaṃ bhagavato uppannakāle sāvatthiyaṃ sumanaseṭṭhissa gehe anāthapiṇḍikassa kaniṭṭho hutvā nibbatti. Subhūtītissa nāmaṃ ahosi.
д̇зна жа самаязна амхаагам̣ бхаг̇аваа логз уббаж̇ж̇ид̇ваа бавад̇д̇ид̇аварад̇хаммажагго анубуб̣б̣зна рааж̇аг̇ахам̣ г̇анд̇ваа д̇ад̇т̇а взл̣уванабадиг̇г̇ахан̣аад̣̇инаа логаануг̇г̇ахам̣ гаронд̇о рааж̇аг̇ахам̣ убаниссааяа сийд̇аванз вихааси. д̇ад̣̇аа анаат̇абин̣д̣иго сздти саавад̇т̇ияам̣ удтаанагам̣ бхан̣д̣ам̣ г̇ахзд̇ваа ад̇д̇ано сахааяасса рааж̇аг̇ахасздтино г̇зхам̣ г̇анд̇ваа б̣уд̣̇д̇хуббаад̣̇ам̣ суд̇ваа сад̇т̇аарам̣ сийд̇аванз вихаранд̇ам̣ убасан̇гамид̇ваа батамад̣̇ассанзнзва сод̇аабад̇д̇ипалз бад̇идтааяа сад̇т̇аарам̣ саавад̇т̇им̣ ааг̇аманад̇т̇ааяа яаажид̇ваа д̇ад̇о бан̃жажад̇д̇аалийсаяож̇анз маг̇г̇з яож̇анз яож̇анз сад̇асахассабарижжааг̇зна вихаарз бад̇идтаабзд̇ваа саавад̇т̇ияам̣ адтагарийсаббамаан̣ам̣ ж̇зд̇асса гумаарасса уяяаанабхуумим̣ годисант̇аарзна гин̣ид̇ваа д̇ад̇т̇а бхаг̇авад̇о вихаарам̣ гаарзд̇ваа ад̣̇ааси. вихаарамахад̣̇ивасз аяам̣ субхууд̇игудумб̣иго анаат̇абин̣д̣игасздтинаа сад̣̇д̇хим̣ г̇анд̇ваа д̇хаммам̣ сун̣анд̇о сад̣̇д̇хам̣ бадилабхид̇ваа баб̣б̣аж̇и. со убасамбанно д̣̇вз маад̇игаа баг̇ун̣аа гад̇ваа гаммадтаанам̣ гат̇аабзд̇ваа аран̃н̃з саман̣ад̇хаммам̣ гаронд̇о мзд̇д̇аажхаанам̣ ниб̣б̣ад̇д̇зд̇ваа д̇ам̣ баад̣̇агам̣ гад̇ваа вибассанам̣ вад̣дхзд̇ваа арахад̇д̇ам̣ баабун̣и.
Tena ca samayena amhākaṃ bhagavā loke uppajjitvā pavattitavaradhammacakko anupubbena rājagahaṃ gantvā tattha veḷuvanapaṭiggahaṇādinā lokānuggahaṃ karonto rājagahaṃ upanissāya sītavane vihāsi. Tadā anāthapiṇḍiko seṭṭhi sāvatthiyaṃ uṭṭhānakaṃ bhaṇḍaṃ gahetvā attano sahāyassa rājagahaseṭṭhino gehaṃ gantvā buddhuppādaṃ sutvā satthāraṃ sītavane viharantaṃ upasaṅkamitvā paṭhamadassaneneva sotāpattiphale patiṭṭhāya satthāraṃ sāvatthiṃ āgamanatthāya yācitvā tato pañcacattālīsayojane magge yojane yojane satasahassapariccāgena vihāre patiṭṭhāpetvā sāvatthiyaṃ aṭṭhakarīsappamāṇaṃ jetassa kumārassa uyyānabhūmiṃ koṭisanthārena kiṇitvā tattha bhagavato vihāraṃ kāretvā adāsi. Vihāramahadivase ayaṃ subhūtikuṭumbiko anāthapiṇḍikaseṭṭhinā saddhiṃ gantvā dhammaṃ suṇanto saddhaṃ paṭilabhitvā pabbaji. So upasampanno dve mātikā paguṇā katvā kammaṭṭhānaṃ kathāpetvā araññe samaṇadhammaṃ karonto mettājhānaṃ nibbattetvā taṃ pādakaṃ katvā vipassanaṃ vaḍḍhetvā arahattaṃ pāpuṇi.
со д̇хаммам̣ д̣̇зсзнд̇о яасмаа сад̇т̇аараа д̣̇зсид̇анияаамзна анод̣̇иссагам̣ гад̇ваа д̣̇зсзд̇и, д̇асмаа аран̣авихаарийнам̣ аг̇г̇о наама ж̇аад̇о. яасмаа жа бин̣д̣ааяа жаранд̇о гхарз гхарз мзд̇д̇аажхаанам̣ самаабаж̇ж̇ид̇ваа вудтааяа бхигкам̣ бадиг̇г̇ан̣хаад̇и ‘‘звам̣ д̣̇ааяагаанам̣ махабпалам̣ бхависсад̇ий’’д̇и, д̇асмаа д̣̇агкин̣зяяаанам̣ аг̇г̇о наама ж̇аад̇о. д̇зна нам̣ бхаг̇аваа ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ аран̣авихаарийнам̣ д̣̇агкин̣зяяаанан̃жа яад̣̇ид̣̇ам̣ субхууд̇ий’’д̇и (а. ни. 1.198, 201) д̣̇ваяан̇г̇асаманнааг̇ад̇з аг̇г̇адтаанз табзси. звамаяам̣ махаат̇зро ад̇д̇анаа буурид̇абаарамийнам̣ паласса мад̇т̇агам̣ арахад̇д̇ам̣ бад̇ваа логз абхин̃н̃аад̇о абхилагкид̇о худ̇ваа б̣ахуж̇анахид̇ааяа ж̇анабад̣̇ажааригам̣ жаранд̇о анубуб̣б̣зна рааж̇аг̇ахам̣ аг̇амааси.
So dhammaṃ desento yasmā satthārā desitaniyāmena anodissakaṃ katvā deseti, tasmā araṇavihārīnaṃ aggo nāma jāto. Yasmā ca piṇḍāya caranto ghare ghare mettājhānaṃ samāpajjitvā vuṭṭhāya bhikkhaṃ paṭiggaṇhāti ‘‘evaṃ dāyakānaṃ mahapphalaṃ bhavissatī’’ti, tasmā dakkhiṇeyyānaṃ aggo nāma jāto. Tena naṃ bhagavā ‘‘etadaggaṃ, bhikkhave, mama sāvakānaṃ bhikkhūnaṃ araṇavihārīnaṃ dakkhiṇeyyānañca yadidaṃ subhūtī’’ti (a. ni. 1.198, 201) dvayaṅgasamannāgate aggaṭṭhāne ṭhapesi. Evamayaṃ mahāthero attanā pūritapāramīnaṃ phalassa matthakaṃ arahattaṃ patvā loke abhiññāto abhilakkhito hutvā bahujanahitāya janapadacārikaṃ caranto anupubbena rājagahaṃ agamāsi.
рааж̇аа б̣имб̣исааро т̇зрасса ааг̇аманам̣ суд̇ваа убасан̇гамид̇ваа ванд̣̇ид̇ваа ‘‘ид̇хзва, бханд̇з, васат̇а, васанадтаанам̣ во гариссаамий’’д̇и вад̇ваа багганд̇о виссари. т̇зро сзнаасанам̣ алабханд̇о аб̣бхогаасз вийд̇инаамзси. т̇зрассаанубхаавзна д̣̇зво на вассад̇и. мануссаа авудтид̇ааяа убад̣̇д̣̇уд̇аа ран̃н̃о нивзсанад̣̇ваарз уггудтим̣ агам̣су. рааж̇аа ‘‘гзна ну ко гааран̣зна д̣̇зво на вассад̇ий’’д̇и виймам̣санд̇о ‘‘т̇зрасса аб̣бхогаасаваасзна ман̃н̃з на вассад̇ий’’д̇и жинд̇зд̇ваа д̇асса бан̣н̣агудим̣ гаараабзд̇ваа ‘‘имиссам̣, бханд̇з, бан̣н̣агудияам̣ васат̇аа’’д̇и вад̇ваа ванд̣̇ид̇ваа баггаами. т̇зро гудим̣ бависид̇ваа д̇ин̣асант̇аарагз баллан̇гзна нисийд̣̇и. д̇ад̣̇аа д̣̇зво т̇огам̣ т̇огам̣ пусааяад̇и, на саммаад̇хаарам̣ анубавзжчад̇и. ат̇а т̇зро логасса авудтигабхаяам̣ вид̇хамид̇угаамо ад̇д̇ано аж̇жхад̇д̇игаб̣аахиравад̇т̇угасса бариссаяасса абхаавам̣ бавзд̣̇знд̇о ‘‘чаннаа мз гудигаа’’д̇и (т̇зраг̇аа. 1) г̇аат̇амааха. д̇ассад̇т̇о т̇зраг̇аат̇ааяам̣ вуд̇д̇оязва.
Rājā bimbisāro therassa āgamanaṃ sutvā upasaṅkamitvā vanditvā ‘‘idheva, bhante, vasatha, vasanaṭṭhānaṃ vo karissāmī’’ti vatvā pakkanto vissari. Thero senāsanaṃ alabhanto abbhokāse vītināmesi. Therassānubhāvena devo na vassati. Manussā avuṭṭhitāya upaddutā rañño nivesanadvāre ukkuṭṭhiṃ akaṃsu. Rājā ‘‘kena nu kho kāraṇena devo na vassatī’’ti vīmaṃsanto ‘‘therassa abbhokāsavāsena maññe na vassatī’’ti cintetvā tassa paṇṇakuṭiṃ kārāpetvā ‘‘imissaṃ, bhante, paṇṇakuṭiyaṃ vasathā’’ti vatvā vanditvā pakkāmi. Thero kuṭiṃ pavisitvā tiṇasanthārake pallaṅkena nisīdi. Tadā devo thokaṃ thokaṃ phusāyati, na sammādhāraṃ anupavecchati. Atha thero lokassa avuṭṭhikabhayaṃ vidhamitukāmo attano ajjhattikabāhiravatthukassa parissayassa abhāvaṃ pavedento ‘‘channā me kuṭikā’’ti (theragā. 1) gāthamāha. Tassattho theragāthāyaṃ vuttoyeva.
гасмаа банзд̇з махаат̇зраа ад̇д̇ано г̇ун̣з багаасзнд̇ийд̇и? иминаа д̣̇ийгхзна ад̣̇д̇хунаа анад̇хиг̇ад̇абуб̣б̣ам̣ барамаг̇амбхийрам̣ ад̇ивияа санд̇ам̣ бан̣ийд̇ам̣ ад̇д̇анаа ад̇хиг̇ад̇алогуд̇д̇арад̇хаммам̣ бажжавзгкид̇ваа бийд̇ивзг̇асамуссаахид̇ауд̣̇аанад̣̇ийбанад̇т̇ам̣ саасанасса нияяаанигабхаававибхааванад̇т̇ан̃жа барамаббижчаа арияаа ад̇д̇ано г̇ун̣з багаасзнд̇и. яат̇аа д̇ам̣ логанаат̇о б̣од̇ханзяяаанам̣ аж̇жхаасаяавасзна ‘‘д̣̇асаб̣аласаманнааг̇ад̇о, бхигкавз, д̇ат̇ааг̇ад̇о жад̇увзсаараж̇ж̇ависаарад̣̇о’’д̇иаад̣̇инаа (а. ни. 10.21; ма. ни. 1. 148 ад̇т̇ад̇о самаанам̣) ад̇д̇ано г̇ун̣з багаасзд̇и. звамаяам̣ т̇зрасса ан̃н̃ааб̣яаагаран̣аг̇аат̇ааби ахосийд̇и.
Kasmā panete mahātherā attano guṇe pakāsentīti? Iminā dīghena addhunā anadhigatapubbaṃ paramagambhīraṃ ativiya santaṃ paṇītaṃ attanā adhigatalokuttaradhammaṃ paccavekkhitvā pītivegasamussāhitaudānadīpanatthaṃ sāsanassa niyyānikabhāvavibhāvanatthañca paramappicchā ariyā attano guṇe pakāsenti. Yathā taṃ lokanātho bodhaneyyānaṃ ajjhāsayavasena ‘‘dasabalasamannāgato, bhikkhave, tathāgato catuvesārajjavisārado’’tiādinā (a. ni. 10.21; ma. ni. 1. 148 atthato samānaṃ) attano guṇe pakāseti. Evamayaṃ therassa aññābyākaraṇagāthāpi ahosīti.
1. звам̣ со бад̇д̇аарахад̇д̇апало бад̇д̇азд̇ад̣̇аг̇г̇адтаано жа ад̇д̇ано буб̣б̣агаммам̣ сарид̇ваа соманассаж̇аад̇о буб̣б̣ажарид̇аабад̣̇аанам̣ багаасзнд̇о химаванд̇ассаавид̣̇уурзд̇иаад̣̇имааха. д̇ад̇т̇а химаванд̇ассаад̇и химаалаяабаб̣б̣ад̇асса авид̣̇уурз аасаннз самийбз баб̣б̣ад̇абаад̣̇з мануссаанам̣ г̇аманааг̇аманасамбаннз сан̃жаран̣адтаанзд̇и ад̇т̇о. нисабхо наама баб̣б̣ад̇од̇и баб̣б̣ад̇аанам̣ ж̇здтад̇д̇аа наамзна нисабхо наама сзламаяабаб̣б̣ад̇о ахосийд̇и самб̣анд̇хо. ассамо сугад̇о маяханд̇и д̇ад̇т̇а баб̣б̣ад̇з маяхам̣ васанад̇т̇ааяа ассамо аран̃н̃ааваасо судту гад̇о. гудирад̇д̇идтаанад̣̇иваадтаанавад̇ибаригкзбаад̣̇ивасзна сунд̣̇араагаарзна гад̇од̇и ад̇т̇о. бан̣н̣асаалаа сумаабид̇аад̇и бан̣н̣зхи чаад̣̇ид̇аа саалаа маяхам̣ ниваасанад̇т̇ааяа судту маабид̇аа нидтаабид̇аад̇и ад̇т̇о.
1. Evaṃ so pattaarahattaphalo pattaetadaggaṭṭhāno ca attano pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Tattha himavantassāti himālayapabbatassa avidūre āsanne samīpe pabbatapāde manussānaṃ gamanāgamanasampanne sañcaraṇaṭṭhāneti attho. Nisabho nāma pabbatoti pabbatānaṃ jeṭṭhattā nāmena nisabho nāma selamayapabbato ahosīti sambandho. Assamo sukato mayhanti tattha pabbate mayhaṃ vasanatthāya assamo araññāvāso suṭṭhu kato. Kuṭirattiṭṭhānadivāṭṭhānavatiparikkhepādivasena sundarākārena katoti attho. Paṇṇasālā sumāpitāti paṇṇehi chāditā sālā mayhaṃ nivāsanatthāya suṭṭhu māpitā niṭṭhāpitāti attho.
2. госияо наама наамзнаад̇и маад̇аабид̇уухи гад̇анаамад̇хзяязна госияо наама. уг̇г̇ад̇аабано баагадад̇або гхорад̇або. згаагияо ан̃н̃зсам̣ абхааваа ахам̣ зва зго. ад̣̇уд̇ияо д̣̇уд̇ияад̇аабасарахид̇о ж̇адило ж̇адаад̇хаарий д̇аабасо д̇ад̣̇аа д̇асмим̣ гаалз нисабхз баб̣б̣ад̇з васаами вихараамийд̇и самб̣анд̇хо.
2.Kosiyo nāma nāmenāti mātāpitūhi katanāmadheyyena kosiyo nāma. Uggatāpano pākaṭatapo ghoratapo. Ekākiyo aññesaṃ abhāvā ahaṃ eva eko. Adutiyo dutiyatāpasarahito jaṭilo jaṭādhārī tāpaso tadā tasmiṃ kāle nisabhe pabbate vasāmi viharāmīti sambandho.
3. палам̣ муулан̃жа бан̣н̣ан̃жа, на бхун̃ж̇аами ахам̣ д̇ад̣̇аад̇и д̇ад̣̇аа д̇асмим̣ нисабхабаб̣б̣ад̇з васанагаалз д̇ин̣д̣угаад̣̇ипалам̣ мул̣аалаад̣̇имуулам̣, гаарабан̣н̣аад̣̇ибан̣н̣ан̃жа ругкад̇о ожинид̇ваа на бхун̃ж̇аамийд̇и ад̇т̇о. звам̣ сад̇и гат̇ам̣ ж̇ийвад̇ийд̇и д̇ам̣ д̣̇ассзнд̇о бавад̇д̇ам̣ва субаад̇ааханд̇и ааха. д̇ад̇т̇а бавад̇д̇ам̣ саяамзва ж̇аад̇ам̣ субаад̇ам̣ ад̇д̇ано д̇хаммад̇ааяа бад̇ид̇ам̣ бан̣н̣аад̣̇игам̣ ниссааяа аахаарам̣ гад̇ваа ахам̣ д̇аавад̣̇з д̇асмим̣ гаалз ж̇ийваами ж̇ийвигам̣ габбзмийд̇и самб̣анд̇хо. ‘‘бавад̇д̇абан̣д̣убан̣н̣ааний’’д̇и ваа баато, д̇асса саяамзва бад̇ид̇аани бан̣д̣убан̣н̣аани ругкабад̇д̇аани убаниссааяа ж̇ийваамийд̇и ад̇т̇о.
3.Phalaṃ mūlañca paṇṇañca, na bhuñjāmi ahaṃ tadāti tadā tasmiṃ nisabhapabbate vasanakāle tiṇḍukādiphalaṃ muḷālādimūlaṃ, kārapaṇṇādipaṇṇañca rukkhato ocinitvā na bhuñjāmīti attho. Evaṃ sati kathaṃ jīvatīti taṃ dassento pavattaṃva supātāhanti āha. Tattha pavattaṃ sayameva jātaṃ supātaṃ attano dhammatāya patitaṃ paṇṇādikaṃ nissāya āhāraṃ katvā ahaṃ tāvade tasmiṃ kāle jīvāmi jīvikaṃ kappemīti sambandho. ‘‘Pavattapaṇḍupaṇṇānī’’ti vā pāṭho, tassa sayameva patitāni paṇḍupaṇṇāni rukkhapattāni upanissāya jīvāmīti attho.
4. наахам̣ гобзми ааж̇ийванд̇и ахам̣ ж̇ийвид̇ам̣ жаж̇амааноби барижжааг̇ам̣ гурумааноби д̇ан̣хаавасзна паламуулаад̣̇иаахаарабариязсанааяа саммаа ааж̇ийвам̣ на гобзми на наасзмийд̇и самб̣анд̇хо. аараад̇хзми сагам̣ жид̇д̇анд̇и сагам̣ жид̇д̇ам̣ ад̇д̇ано манам̣ аббижчад̇ааяа санд̇удтияаа жа аараад̇хзми басаад̣̇зми. виваж̇ж̇зми анзсананд̇и взж̇ж̇агаммад̣̇ууд̇агаммаад̣̇ивасзна анзсанам̣ аяуд̇д̇абариязсанам̣ виваж̇ж̇зми д̣̇уурам̣ гароми.
4.Nāhaṃ kopemi ājīvanti ahaṃ jīvitaṃ cajamānopi pariccāgaṃ kurumānopi taṇhāvasena phalamūlādiāhārapariyesanāya sammā ājīvaṃ na kopemi na nāsemīti sambandho. Ārādhemi sakaṃ cittanti sakaṃ cittaṃ attano manaṃ appicchatāya santuṭṭhiyā ca ārādhemi pasādemi. Vivajjemi anesananti vejjakammadūtakammādivasena anesanaṃ ayuttapariyesanaṃ vivajjemi dūraṃ karomi.
5. рааг̇уубасам̣хид̇ам̣ жид̇д̇анд̇и яад̣̇аа яасмим̣ гаалз мама рааг̇зна самбаяуд̇д̇ам̣ жид̇д̇ам̣ уббаж̇ж̇ад̇и, д̇ад̣̇аа саяамзва ад̇д̇анааязва бажжавзгкаами н̃аан̣зна бадивзгкид̇ваа винод̣̇зми. згаг̇г̇о д̇ам̣ д̣̇амзмаханд̇и ахам̣ згасмим̣ гаммадтаанаарамман̣з аг̇г̇о самаахид̇о д̇ам̣ рааг̇ажид̇д̇ам̣ д̣̇амзми д̣̇аманам̣ гароми.
5.Rāgūpasaṃhitaṃ cittanti yadā yasmiṃ kāle mama rāgena sampayuttaṃ cittaṃ uppajjati, tadā sayameva attanāyeva paccavekkhāmi ñāṇena paṭivekkhitvā vinodemi. Ekaggo taṃ damemahanti ahaṃ ekasmiṃ kammaṭṭhānārammaṇe aggo samāhito taṃ rāgacittaṃ damemi damanaṃ karomi.
6. раж̇ж̇асз раж̇ж̇анийяз жаад̇и раж̇ж̇анийяз аллийяид̇аб̣б̣з руубаарамман̣аад̣̇ивад̇т̇усмим̣ раж̇ж̇асз аллийно аси бхаваси. д̣̇уссанийяз жа д̣̇уссасзд̇и д̣̇уусид̇аб̣б̣з д̣̇осагаран̣авад̇т̇усмим̣ д̣̇уусаго аси. муяхасз моханийяз жаад̇и мохид̇аб̣б̣з мохагаран̣авад̇т̇усмим̣ мояхаси муул̣хо аси бхаваси. д̇асмаа д̇увам̣ ванаа ванад̇о аран̃н̃аваасад̇о нигкамассу абаг̇ажчаахийд̇и звам̣ ад̇д̇аанам̣ д̣̇амзмийд̇и самб̣анд̇хо.
6.Rajjase rajjanīye cāti rajjanīye allīyitabbe rūpārammaṇādivatthusmiṃ rajjase allīno asi bhavasi. Dussanīye ca dussaseti dūsitabbe dosakaraṇavatthusmiṃ dūsako asi. Muyhase mohanīye cāti mohitabbe mohakaraṇavatthusmiṃ moyhasi mūḷho asi bhavasi. Tasmā tuvaṃ vanā vanato araññavāsato nikkhamassu apagacchāhīti evaṃ attānaṃ damemīti sambandho.
24. д̇имб̣аруусагаван̣н̣аабход̇и суван̣н̣ад̇имб̣аруусагаван̣н̣аабхо, ж̇амб̣онад̣̇асуван̣н̣аван̣н̣од̇и ад̇т̇о. сзсам̣ сувин̃н̃зяяамзваад̇и.
24.Timbarūsakavaṇṇābhoti suvaṇṇatimbarūsakavaṇṇābho, jambonadasuvaṇṇavaṇṇoti attho. Sesaṃ suviññeyyamevāti.
субхууд̇ид̇т̇зраабад̣̇аанаван̣н̣анаа самад̇д̇аа.
Subhūtittheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 1. субхууд̇ид̇т̇зраабад̣̇аанам̣ • 1. Subhūtittheraapadānaṃ
