| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. ஸுப்³ரஹ்மஸுத்தவண்ணனா
7. Subrahmasuttavaṇṇanā
98. ஸத்தமே ஸுப்³ரஹ்மாதி ஸோ கிர தே³வபுத்தோ அச்ச²ராஸங்க⁴பரிவுதோ நந்த³னகீளிகங் க³ந்த்வா பாரிச்ச²த்தகமூலே பஞ்ஞத்தாஸனே நிஸீதி³. தங் பஞ்சஸதா தே³வதீ⁴தரோ பரிவாரெத்வா நிஸின்னா, பஞ்சஸதா ருக்க²ங் அபி⁴ருள்ஹா. நனு ச தே³வதானங் சித்தவஸேன யோஜனஸதிகோபி ருக்கோ² ஓனமித்வா ஹத்த²ங் ஆக³ச்ச²தி, கஸ்மா தா அபி⁴ருள்ஹாதி. கி²ட்³டா³பஸுததாய. அபி⁴ருய்ஹ பன மது⁴ரஸ்ஸரேன கா³யித்வா கா³யித்வா புப்பா²னி பாதெந்தி, தானி க³ஹெத்வா இதரா ஏகதோவண்டிகமாலாதி³வஸேன க³ந்தெ²ந்தி. அத² ருக்க²ங் அபி⁴ருள்ஹா உபச்சே²த³ககம்மவஸேன ஏகப்பஹாரேனேவ காலங் கத்வா அவீசிம்ஹி நிப்³ப³த்தா மஹாது³க்க²ங் அனுப⁴வந்தி.
98. Sattame subrahmāti so kira devaputto accharāsaṅghaparivuto nandanakīḷikaṃ gantvā pāricchattakamūle paññattāsane nisīdi. Taṃ pañcasatā devadhītaro parivāretvā nisinnā, pañcasatā rukkhaṃ abhiruḷhā. Nanu ca devatānaṃ cittavasena yojanasatikopi rukkho onamitvā hatthaṃ āgacchati, kasmā tā abhiruḷhāti. Khiḍḍāpasutatāya. Abhiruyha pana madhurassarena gāyitvā gāyitvā pupphāni pātenti, tāni gahetvā itarā ekatovaṇṭikamālādivasena ganthenti. Atha rukkhaṃ abhiruḷhā upacchedakakammavasena ekappahāreneva kālaṃ katvā avīcimhi nibbattā mahādukkhaṃ anubhavanti.
அத² காலே க³ச்ச²ந்தே தே³வபுத்தோ ‘‘இமாஸங் நேவ ஸத்³தோ³ ஸுய்யதி, ந புப்பா²னி பாதெந்தி. கஹங் நு கோ² க³தா’’தி? ஆவஜ்ஜெந்தோ நிரயே நிப்³ப³த்தபா⁴வங் தி³ஸ்வா பியவத்து²கஸோகேன ருப்பமானோ சிந்தேஸி – ‘‘ஏதா தாவ யதா²கம்மேன க³தா, மய்ஹங் ஆயுஸங்கா²ரோ கித்தகோ’’தி. ஸோ – ‘‘ஸத்தமே தி³வஸே மயாபி அவஸேஸாஹி பஞ்சஸதாஹி ஸத்³தி⁴ங் காலங் கத்வா தத்தே²வ நிப்³ப³த்திதப்³ப³’’ந்தி தி³ஸ்வா ப³லவதரேன ஸோகேன ருப்பி. ஸோ – ‘‘இமங் மய்ஹங் ஸோகங் ஸதே³வகே லோகே அஞ்ஞத்ர ததா²க³தா நித்³த⁴மிதுங் ஸமத்தோ² நாம நத்தீ²’’தி சிந்தெத்வா ஸத்து² ஸந்திகங் க³ந்த்வா நிச்சங் உத்ரஸ்தந்தி கா³த²மாஹ.
Atha kāle gacchante devaputto ‘‘imāsaṃ neva saddo suyyati, na pupphāni pātenti. Kahaṃ nu kho gatā’’ti? Āvajjento niraye nibbattabhāvaṃ disvā piyavatthukasokena ruppamāno cintesi – ‘‘etā tāva yathākammena gatā, mayhaṃ āyusaṅkhāro kittako’’ti. So – ‘‘sattame divase mayāpi avasesāhi pañcasatāhi saddhiṃ kālaṃ katvā tattheva nibbattitabba’’nti disvā balavatarena sokena ruppi. So – ‘‘imaṃ mayhaṃ sokaṃ sadevake loke aññatra tathāgatā niddhamituṃ samattho nāma natthī’’ti cintetvā satthu santikaṃ gantvā niccaṃ utrastanti gāthamāha.
தத்த² இத³ந்தி அத்தனோ சித்தங் த³ஸ்ஸேதி. து³தியபத³ங் புரிமஸ்ஸேவ வேவசனங். நிச்சந்தி ச பத³ஸ்ஸ தே³வலோகே நிப்³ப³த்தகாலதோ பட்டா²யாதி அத்தோ² ந க³ஹேதப்³போ³, ஸோகுப்பத்திகாலதோ பன பட்டா²ய நிச்சந்தி வேதி³தப்³ப³ங். அனுப்பன்னேஸு கிச்சே²ஸூதி இதோ ஸத்தாஹச்சயேன யானி து³க்கா²னி உப்பஜ்ஜிஸ்ஸந்தி, தேஸு. அதோ² உப்பதிதேஸு சாதி யானி பஞ்சஸதானங் அச்ச²ரானங் நிரயே நிப்³ப³த்தானங் தி³ட்டா²னி, தேஸு சாதி ஏவங் இமேஸு உப்பன்னானுப்பன்னேஸு து³க்கே²ஸு நிச்சங் மம உத்ரஸ்தங் சித்தங், அப்³ப⁴ந்தரே ட³ய்ஹமானோ விய ஹோமி ப⁴க³வாதி த³ஸ்ஸேதி.
Tattha idanti attano cittaṃ dasseti. Dutiyapadaṃ purimasseva vevacanaṃ. Niccanti ca padassa devaloke nibbattakālato paṭṭhāyāti attho na gahetabbo, sokuppattikālato pana paṭṭhāya niccanti veditabbaṃ. Anuppannesu kicchesūti ito sattāhaccayena yāni dukkhāni uppajjissanti, tesu. Atho uppatitesu cāti yāni pañcasatānaṃ accharānaṃ niraye nibbattānaṃ diṭṭhāni, tesu cāti evaṃ imesu uppannānuppannesu dukkhesu niccaṃ mama utrastaṃ cittaṃ, abbhantare ḍayhamāno viya homi bhagavāti dasseti.
நாஞ்ஞத்ர பொ³ஜ்ஜா² தபஸாதி பொ³ஜ்ஜ²ங்க³பா⁴வனஞ்ச தபோகு³ணஞ்ச அஞ்ஞத்ர முஞ்சித்வா ஸொத்தி²ங் ந பஸ்ஸாமீதி அத்தோ². ஸப்³ப³னிஸ்ஸக்³கா³தி நிப்³பா³னதோ. எத்த² கிஞ்சாபி பொ³ஜ்ஜ²ங்க³பா⁴வனா பட²மங் க³ஹிதா, இந்த்³ரியஸங்வரோ பச்சா², அத்த²தோ பன இந்த்³ரியஸங்வரோவ பட²மங் வேதி³தப்³போ³. இந்தி³யஸங்வரே ஹி க³ஹிதே சதுபாரிஸுத்³தி⁴ஸீலங் க³ஹிதங் ஹோதி. தஸ்மிங் பதிட்டி²தோ பி⁴க்கு² நிஸ்ஸயமுத்தகோ து⁴தங்க³ஸங்கா²தங் தபோகு³ணங் ஸமாதா³ய அரஞ்ஞங் பவிஸித்வா கம்மட்டா²னங் பா⁴வெந்தோ ஸஹ விபஸ்ஸனாய பொ³ஜ்ஜ²ங்கே³ பா⁴வேதி. தஸ்ஸ அரியமக்³கோ³ யங் நிப்³பா³னங் ஆரம்மணங் கத்வா உப்பஜ்ஜதி, ஸோ ‘‘ஸப்³ப³னிஸ்ஸக்³கோ³’’தி ப⁴க³வா சதுஸச்சவஸேன தே³ஸனங் வினிவத்தேஸி. தே³வபுத்தோ தே³ஸனாபரியோஸானே ஸோதாபத்திப²லே பதிட்ட²ஹீதி. ஸத்தமங்.
Nāññatrabojjhā tapasāti bojjhaṅgabhāvanañca tapoguṇañca aññatra muñcitvā sotthiṃ na passāmīti attho. Sabbanissaggāti nibbānato. Ettha kiñcāpi bojjhaṅgabhāvanā paṭhamaṃ gahitā, indriyasaṃvaro pacchā, atthato pana indriyasaṃvarova paṭhamaṃ veditabbo. Indiyasaṃvare hi gahite catupārisuddhisīlaṃ gahitaṃ hoti. Tasmiṃ patiṭṭhito bhikkhu nissayamuttako dhutaṅgasaṅkhātaṃ tapoguṇaṃ samādāya araññaṃ pavisitvā kammaṭṭhānaṃ bhāvento saha vipassanāya bojjhaṅge bhāveti. Tassa ariyamaggo yaṃ nibbānaṃ ārammaṇaṃ katvā uppajjati, so ‘‘sabbanissaggo’’ti bhagavā catusaccavasena desanaṃ vinivattesi. Devaputto desanāpariyosāne sotāpattiphale patiṭṭhahīti. Sattamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. ஸுப்³ரஹ்மஸுத்தங் • 7. Subrahmasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. ஸுப்³ரஹ்மஸுத்தவண்ணனா • 7. Subrahmasuttavaṇṇanā
