| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༧. སུབྲཧྨསུཏྟཝཎྞནཱ
7. Subrahmasuttavaṇṇanā
༩༨. སུབྲཧྨཱཏི ཏསྶ དེཝཔུཏྟསྶ ནཱམཾ། ཏསྶ སཏྠུ སནྟིཀཱུཔསངྐམནསྶ ཀཱརཎཾ དསྶེནྟོ ‘‘སོ ཀིརཱ’’ཏིཨཱདིམཱཧ། ཏདེཝ སོཀཾ ཏསྶ དེཝཔུཏྟསྶ ཨཊྛུཔྤཏྟི། ཨཙྪརཱསངྒྷཔརིཝུཏོཏི སཧསྶམཏྟེན ཨཙྪརཱསངྒྷེན པརིཝུཏོ། ནནྡནཀཱིལི༹ཀནྟི ནནྡནཝནཀཱིལི༹ཀཾ། ཧཏྠཾ ཨཱགཙྪཏཱིཏི ཧཏྠགཡ྄ཧུཔགོ ཧོཏི། གནྠེནྟཱིཏི ཨེཏྠ མཱལཱཝེཋནམྤི ཁིཌྜཱཔསུཏཏཱཡཱཏི དཊྛབྦཾ། ཨཉྙཐཱ པུཔྥཱནིཡེཝ ཏཱཡ ཏཱཡ ཙིཏྟསྶ ཝསེན མཱལཱབྷཱཝེན ཧཏྠཾ ཨུཔགཙྪནྟཱིཏི། ཨུཔཙྪེདཀཀམྨཝསེནཱཏི ཏསྨིཾ དེཝལོཀེ ཨཱཡུསེསེ སཏི ཨེཝ ཏསྶ པན ཨུཔགྷཱཏཀསྶ ལདྡྷོཀཱསསྶ པཱཔཀམྨསྶ ཝསེན། ‘‘པཧཱརོ’’ཏི དིཝསསྶ ཏཏིཡོ བྷཱགོ ཝུཙྩཏི, ཏསྨཱ ཨེཀཔྤཧཱརེནེཝཱཏི ཨེཀཝེལཱཡམེཝཱཏི ཨཏྠོ།
98.Subrahmāti tassa devaputtassa nāmaṃ. Tassa satthu santikūpasaṅkamanassa kāraṇaṃ dassento ‘‘so kirā’’tiādimāha. Tadeva sokaṃ tassa devaputtassa aṭṭhuppatti. Accharāsaṅghaparivutoti sahassamattena accharāsaṅghena parivuto. Nandanakīḷikanti nandanavanakīḷikaṃ. Hatthaṃ āgacchatīti hatthagayhupago hoti. Ganthentīti ettha mālāveṭhanampi khiḍḍāpasutatāyāti daṭṭhabbaṃ. Aññathā pupphāniyeva tāya tāya cittassa vasena mālābhāvena hatthaṃ upagacchantīti. Upacchedakakammavasenāti tasmiṃ devaloke āyusese sati eva tassa pana upaghātakassa laddhokāsassa pāpakammassa vasena. ‘‘Pahāro’’ti divasassa tatiyo bhāgo vuccati, tasmā ekappahārenevāti ekavelāyamevāti attho.
པིཡཝཏྠུཀསོཀེནཱཏི པིཡཝཏྠུནིམིཏྟཀེན སོཀེན། རུཔྤམཱནོཏི པཱིལི༹ཡམཱནོ། སཏྟམེ དིཝསེཏི མནུསྶགཎནཱཡ སཏྟམེ དིཝསེ། ཏཏྠེཝཱཏི ཏསྨིཾཡེཝ ནིརཡེ ནིབྦཏྟིཏབྦཾ ཨིམིནཱ ཏཱཧི ཙ སཧེཝ པུབྦེ ཏསྶ པཱཔཀམྨསྶ ཀཏཏྟཱ། རུཔྤཱིཏི ཙིཏྟསནྟཱསཾ ཨཱཔཛྫི། ནིདྡྷམིཏུནྟི ནཱིཧརིཏུཾ ཨཔནེཏུཾ། སཏྠུ སནྟིཀཾ གནྟྭཱཏི ཏཱཧི པཉྩསཏཱཧི ཨཙྪརཱཧི སདྡྷིཾ བྷགཝཏོ སནྟིཀཾ གནྟྭཱ།
Piyavatthukasokenāti piyavatthunimittakena sokena. Ruppamānoti pīḷiyamāno. Sattame divaseti manussagaṇanāya sattame divase. Tatthevāti tasmiṃyeva niraye nibbattitabbaṃ iminā tāhi ca saheva pubbe tassa pāpakammassa katattā. Ruppīti cittasantāsaṃ āpajji. Niddhamitunti nīharituṃ apanetuṃ. Satthu santikaṃ gantvāti tāhi pañcasatāhi accharāhi saddhiṃ bhagavato santikaṃ gantvā.
ཨིདནྟི ཨཏྟནོ ཙིཏྟཾ དསྶེཏི ཨཱསནྣཔཙྩཀྑབྷཱཝཏོ། ནིཙྩནྟི སདཱ། སྭཱཡཾ ནིཙྩཏྠོ ཨདྷིཔྤཱཡཝསེན གཧེཏབྦོཏི ཏཏྠ པཧཱཏབྦཾ གཧེཏབྦཉྩ དསྶེནྟོ ‘‘དེཝལོཀེ’’ཏིཨཱདིམཱཧ། ན གཧེཏབྦོ ཧེཏུཔཝཏྟིཏོ པུབྦེ ཏསྶ ཨུཏྲཱསསྶ ཨབྷཱཝཏོ། ཏེསཱུཏི དུཀྑེསུ། ཏཱནི ཧི ཧེཏུཔཙྩཡེཧི ཀཏྟབྦཏོ གཱཐཱཡཾ ‘‘ཀིཙྪེསཱུ’’ཏི ཝུཏྟཱནི། ཀིཙྪེསཱུཏི ཝཱ ཀིཙྪནིམིཏྟཾ། ཡཱསཉྷི པཡོགཝིཔཏྟཱིནཾ ཝསེནསྶ ཏཱནི དུཀྑཱནི ཨུཔྤཛྫེཡྻུཾ, ཏཾནིམིཏྟནྟི ཨཏྠོ། ཏཱ ཧི ཨསྶ པཡོགཝིཔཏྟིཡོ གཏིཝིཔཏྟིཡོ སཏྠུ སནྟིཀཾ ཨུཔགམནེན ཧཱཡེཡྻུཾ། ནིབྦཏྟཱནཾ དིཊྛཱནཱིཏི ནིབྦཏྟཱནཾ ཝསེན དིཊྛཱནི དུཀྑཱནི། ཏེསུ ཙ དུཀྑེསུ། སབྦཏྠ ནིམིཏྟཏྠེ བྷུམྨཾ། ཌཡ྄ཧམཱནོ ཝིཡ ཙིཏྟསནྟཱཔེན།
Idantiattano cittaṃ dasseti āsannapaccakkhabhāvato. Niccanti sadā. Svāyaṃ niccattho adhippāyavasena gahetabboti tattha pahātabbaṃ gahetabbañca dassento ‘‘devaloke’’tiādimāha. Na gahetabbo hetupavattito pubbe tassa utrāsassa abhāvato. Tesūti dukkhesu. Tāni hi hetupaccayehi kattabbato gāthāyaṃ ‘‘kicchesū’’ti vuttāni. Kicchesūti vā kicchanimittaṃ. Yāsañhi payogavipattīnaṃ vasenassa tāni dukkhāni uppajjeyyuṃ, taṃnimittanti attho. Tā hi assa payogavipattiyo gativipattiyo satthu santikaṃ upagamanena hāyeyyuṃ. Nibbattānaṃ diṭṭhānīti nibbattānaṃ vasena diṭṭhāni dukkhāni. Tesu ca dukkhesu. Sabbattha nimittatthe bhummaṃ. Ḍayhamāno viya cittasantāpena.
ཙཏྟཱརིཔི སཙྩཱནི བུཛ྄ཛྷཏི པཊིཝིཛ྄ཛྷཏཱིཏི བོདྷི, སཏིཨཱདིདྷམྨསཱམགྒཱི, ཏསྨཱ བོཛ྄ཛྷཱ བོདྷིཏོ། སཱ པན བོདྷི བྷཱཝནཱཀཱརེནེཝ པཝཏྟཏི, ཨཉྙཏྲསདྡཡོགེན ཙ ‘‘བོཛ྄ཛྷཱ’’ཏི ནིསྶཀྐཝཙནནྟི ཏདཏྠཾ དསྶེནྟོ མུཉྩིཏྭཱཔདཾ ཨཔེཀྑིཏྭཱ ‘‘བོཛ྄ཛྷངྒབྷཱཝན’’ནྟི ཨཱཧ། ཏཔོགུཎནྟི དྷུཏདྷམྨམཱཧ། སོ ཧི ཏཎྷཱལོལུཔྤསྶ ཏཔནཏོ ཏཔོ, སཡཾ གུཎསབྷཱཝཏྟཱ གུཎསནྣིསྶཡཏོ ཙ གུཎནྟི། ཏེནཱཧ ‘‘དྷུཏངྒསངྑཱཏཾ ཏཔོགུཎ’’ནྟི། སབྦེ སངྑཱརགཏཱ ནིསྶཛྫཱིཡནྟི ཨེཏྠཱཏི སབྦནིསྶགྒོ, ཨསངྑཏདྷཱཏཱུཏི ཨཱཧ ‘‘སབྦནིསྶགྒཱཏི ནིབྦཱནཏོ’’ཏི།
Cattāripi saccāni bujjhati paṭivijjhatīti bodhi, satiādidhammasāmaggī, tasmā bojjhā bodhito. Sā pana bodhi bhāvanākāreneva pavattati, aññatrasaddayogena ca ‘‘bojjhā’’ti nissakkavacananti tadatthaṃ dassento muñcitvāpadaṃ apekkhitvā ‘‘bojjhaṅgabhāvana’’nti āha. Tapoguṇanti dhutadhammamāha. So hi taṇhāloluppassa tapanato tapo, sayaṃ guṇasabhāvattā guṇasannissayato ca guṇanti. Tenāha ‘‘dhutaṅgasaṅkhātaṃ tapoguṇa’’nti. Sabbe saṅkhāragatā nissajjīyanti etthāti sabbanissaggo, asaṅkhatadhātūti āha ‘‘sabbanissaggāti nibbānato’’ti.
ཨིནྡྲིཡསཾཝརོཝ པཋམཾ ཝེདིཏབྦོ པཊིཔཏྟིཀྐམཝསེན ཏསྶེཝ པཋམཏྟཱ། ཏཾ པན པཊིཔཏྟིཀྐམཾ དསྶེཏུཾ ‘‘ཨིནྡྲིཡསཾཝརེ ཧཱི’’ཏིཨཱདིམཱཧ། ནིཔྤརིཡཱཡཏོ མགྒཔརིཡཱཔནྣཱ ཨེཝ བོཛ྄ཛྷངྒཱཏི ཨཱཧ ‘‘སཧཝིཔསྶནཱཡ བོཛ྄ཛྷངྒེ’’ཏི། ཏསྶཱཏི ཏཐཱབྷཱཝེན ཏསྶ ཡོགིནོ། ཡསྨཱ དེཝཔུཏྟསྶ སཏྠཱ ཏཾ གཱཐཾ ཝཏྭཱ ཨུཔརི ཙ སཙྩཱནི པཀཱསེསི, ཏསྨཱ ཝུཏྟཾ ‘‘བྷགཝཱ ཙཏུསཙྩཝསེན དེསནཾ ཝིནིཝཏྟེསཱི’’ཏི། དེཝཔུཏྟོ སོཏཱཔཏྟིཕལེ པཏིཊྛཧཱིཏི ཀཱམཾ ཏསྶེཝ ཝིསེསཱདྷིགམོ ཨིདྷཱགཏོ, པཉྩསཏམཏྟཱཧི པན ཨཙྪརཱཧི སདྡྷིཾ སོཏཱཔཏྟིཕལེ པཏིཊྛཧཱིཏི ཝེདིཏབྦཾ། ཏེནཱཧ མཧཱསཏིཔཊྛཱནསུཏྟཝཎྞནཱཡཾ (དཱི॰ ནི॰ ཨཊྛ॰ ༢.༣༧༣; མ॰ ནི॰ ཨཊྛ॰ ༡.༡༠༦) ‘‘སོ དེསནཱཔརིཡོསཱནེ པཉྩཧི ཨཙྪརཱསཏེཧི སདྡྷིཾ སོཏཱཔཏྟིཕལེ པཏིཊྛཱཡ ཏཾ སམྤཏྟིཾ ཐཱཝརཾ ཀཏྭཱ དེཝལོཀམེཝ ཨགམཱསཱི’’ཏི།
Indriyasaṃvarovapaṭhamaṃ veditabbo paṭipattikkamavasena tasseva paṭhamattā. Taṃ pana paṭipattikkamaṃ dassetuṃ ‘‘indriyasaṃvare hī’’tiādimāha. Nippariyāyato maggapariyāpannā eva bojjhaṅgāti āha ‘‘sahavipassanāya bojjhaṅge’’ti. Tassāti tathābhāvena tassa yogino. Yasmā devaputtassa satthā taṃ gāthaṃ vatvā upari ca saccāni pakāsesi, tasmā vuttaṃ ‘‘bhagavā catusaccavasena desanaṃ vinivattesī’’ti. Devaputto sotāpattiphale patiṭṭhahīti kāmaṃ tasseva visesādhigamo idhāgato, pañcasatamattāhi pana accharāhi saddhiṃ sotāpattiphale patiṭṭhahīti veditabbaṃ. Tenāha mahāsatipaṭṭhānasuttavaṇṇanāyaṃ (dī. ni. aṭṭha. 2.373; ma. ni. aṭṭha. 1.106) ‘‘so desanāpariyosāne pañcahi accharāsatehi saddhiṃ sotāpattiphale patiṭṭhāya taṃ sampattiṃ thāvaraṃ katvā devalokameva agamāsī’’ti.
སུབྲཧྨསུཏྟཝཎྞནཱ ནིཊྛིཏཱ།
Subrahmasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༧. སུབྲཧྨསུཏྟཾ • 7. Subrahmasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. སུབྲཧྨསུཏྟཝཎྞནཱ • 7. Subrahmasuttavaṇṇanā
