| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৭. সূচিদাযকত্থেরঅপদানৰণ্ণনা
7. Sūcidāyakattheraapadānavaṇṇanā
তিংসকপ্পসহস্সম্হীতিআদিকং আযস্মতো সূচিদাযকত্থেরস্স অপদানং। অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সুমেধস্স ভগৰতো কালে একস্মিং কুলগেহে নিব্বত্তো ৰুদ্ধিমন্ৰায ভগৰতো চীৰরকম্মং কাতুং পঞ্চ সূচিযো অদাসি। সো তেন পুঞ্ঞেন দেৰমনুস্সেসু পুঞ্ঞমনুভৰিত্ৰা ৰিচরন্তো উপ্পন্নুপ্পন্নভৰে তিক্খপঞ্ঞো হুত্ৰা পাকটো ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজন্তো তিক্খপঞ্ঞতায খুরগ্গেযেৰ অরহত্তং পাপুণি।
Tiṃsakappasahassamhītiādikaṃ āyasmato sūcidāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle ekasmiṃ kulagehe nibbatto vuddhimanvāya bhagavato cīvarakammaṃ kātuṃ pañca sūciyo adāsi. So tena puññena devamanussesu puññamanubhavitvā vicaranto uppannuppannabhave tikkhapañño hutvā pākaṭo imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajanto tikkhapaññatāya khuraggeyeva arahattaṃ pāpuṇi.
৩০. সো অপরভাগে পুঞ্ঞং পচ্চৰেক্খন্তো তং দিস্ৰা সোমনস্সজাতো পুব্বচরিতাপদানং পকাসেন্তো তিংসকপ্পসহস্সম্হীতিআদিমাহ। অন্তরন্তরং পনেত্থ সুৰিঞ্ঞেয্যমেৰ।
30. So aparabhāge puññaṃ paccavekkhanto taṃ disvā somanassajāto pubbacaritāpadānaṃ pakāsento tiṃsakappasahassamhītiādimāha. Antarantaraṃ panettha suviññeyyameva.
৩১. পঞ্চসূচী মযা দিন্নাতি এত্থ সূচতি ছিদ্দং করোতি ৰিজ্ঝতীতি সূচি, পঞ্চমত্তা সূচী পঞ্চসূচী মযা দিন্নাতি অত্থো। সেসং সুৰিঞ্ঞেয্যমেৰাতি।
31.Pañcasūcī mayā dinnāti ettha sūcati chiddaṃ karoti vijjhatīti sūci, pañcamattā sūcī pañcasūcī mayā dinnāti attho. Sesaṃ suviññeyyamevāti.
সূচিদাযকত্থেরঅপদানৰণ্ণনা সমত্তা।
Sūcidāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৭. সূচিদাযকত্থেরঅপদানং • 7. Sūcidāyakattheraapadānaṃ
