| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
७. सूचिदायकत्थेरअपदानवण्णना
7. Sūcidāyakattheraapadānavaṇṇanā
तिंसकप्पसहस्सम्हीतिआदिकं आयस्मतो सूचिदायकत्थेरस्स अपदानं। अयम्पि पुरिमजिनवरेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो सुमेधस्स भगवतो काले एकस्मिं कुलगेहे निब्बत्तो वुद्धिमन्वाय भगवतो चीवरकम्मं कातुं पञ्च सूचियो अदासि। सो तेन पुञ्ञेन देवमनुस्सेसु पुञ्ञमनुभवित्वा विचरन्तो उप्पन्नुप्पन्नभवे तिक्खपञ्ञो हुत्वा पाकटो इमस्मिं बुद्धुप्पादे एकस्मिं कुलगेहे निब्बत्तो वुद्धिमन्वाय सत्थरि पसीदित्वा पब्बजन्तो तिक्खपञ्ञताय खुरग्गेयेव अरहत्तं पापुणि।
Tiṃsakappasahassamhītiādikaṃ āyasmato sūcidāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle ekasmiṃ kulagehe nibbatto vuddhimanvāya bhagavato cīvarakammaṃ kātuṃ pañca sūciyo adāsi. So tena puññena devamanussesu puññamanubhavitvā vicaranto uppannuppannabhave tikkhapañño hutvā pākaṭo imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajanto tikkhapaññatāya khuraggeyeva arahattaṃ pāpuṇi.
३०. सो अपरभागे पुञ्ञं पच्चवेक्खन्तो तं दिस्वा सोमनस्सजातो पुब्बचरितापदानं पकासेन्तो तिंसकप्पसहस्सम्हीतिआदिमाह। अन्तरन्तरं पनेत्थ सुविञ्ञेय्यमेव।
30. So aparabhāge puññaṃ paccavekkhanto taṃ disvā somanassajāto pubbacaritāpadānaṃ pakāsento tiṃsakappasahassamhītiādimāha. Antarantaraṃ panettha suviññeyyameva.
३१. पञ्चसूची मया दिन्नाति एत्थ सूचति छिद्दं करोति विज्झतीति सूचि, पञ्चमत्ता सूची पञ्चसूची मया दिन्नाति अत्थो। सेसं सुविञ्ञेय्यमेवाति।
31.Pañcasūcī mayā dinnāti ettha sūcati chiddaṃ karoti vijjhatīti sūci, pañcamattā sūcī pañcasūcī mayā dinnāti attho. Sesaṃ suviññeyyamevāti.
सूचिदायकत्थेरअपदानवण्णना समत्ता।
Sūcidāyakattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ७. सूचिदायकत्थेरअपदानं • 7. Sūcidāyakattheraapadānaṃ
