| Library / Tipiṭaka / ติปิฎก • Tipiṭaka / อปทาน-อฎฺฐกถา • Apadāna-aṭṭhakathā |
๔. สูจิทายกเตฺถรอปทานวณฺณนา
4. Sūcidāyakattheraapadānavaṇṇanā
กมฺมาโรหํ ปุเร อาสินฺติอาทิกํ อายสฺมโต สูจิทายกเตฺถรสฺส อปทานํฯ อยมฺปิ ปุริมพุเทฺธสุ กตาธิกาโร อนฺตรนฺตรา กุสลพีชานิ ปูเรโนฺต วิปสฺสิสฺส ภควโต กาเล อนฺตรนฺตรา กเตน เอเกน กมฺมจฺฉิเทฺทน กมฺมารกุเล นิพฺพโตฺต วุทฺธิมนฺวาย สกสิเปฺปสุ นิปฺผตฺติํ ปโตฺต สตฺถุ ธมฺมเทสนํ สุตฺวา ปสนฺนมานโส จีวรสิพฺพนตฺถาย สูจิทานมทาสิ, เตน ปุเญฺญน ทิพฺพสมฺปตฺติํ อนุภวิตฺวา อปรภาเค มนุเสฺสสุ อุปฺปโนฺน จกฺกวตฺตาทโย สมฺปตฺติโย จ อนุภวโนฺต อุปฺปนฺนุปฺปนฺนภเว ติกฺขปโญฺญ วชีรญาโณ อโหสิฯ โส กเมน อิมสฺมิํ พุทฺธุปฺปาเท นิพฺพโตฺต วุทฺธิปฺปโตฺต มหทฺธโน สทฺธาชาโต ติกฺขปโญฺญ อโหสิฯ โส เอกทิวสํ สตฺถุ ธมฺมเทสนํ สุตฺวา ธมฺมานุสาเรน ญาณํ เปเสตฺวา นิสินฺนาสเนเยว อรหา อโหสิฯ
Kammārohaṃ pure āsintiādikaṃ āyasmato sūcidāyakattherassa apadānaṃ. Ayampi purimabuddhesu katādhikāro antarantarā kusalabījāni pūrento vipassissa bhagavato kāle antarantarā katena ekena kammacchiddena kammārakule nibbatto vuddhimanvāya sakasippesu nipphattiṃ patto satthu dhammadesanaṃ sutvā pasannamānaso cīvarasibbanatthāya sūcidānamadāsi, tena puññena dibbasampattiṃ anubhavitvā aparabhāge manussesu uppanno cakkavattādayo sampattiyo ca anubhavanto uppannuppannabhave tikkhapañño vajīrañāṇo ahosi. So kamena imasmiṃ buddhuppāde nibbatto vuddhippatto mahaddhano saddhājāto tikkhapañño ahosi. So ekadivasaṃ satthu dhammadesanaṃ sutvā dhammānusārena ñāṇaṃ pesetvā nisinnāsaneyeva arahā ahosi.
๑๙. โส อรหา สมาโน อตฺตโน ปุพฺพกมฺมํ สริตฺวา โสมนสฺสชาโต ปุพฺพจริตาปทานํ ปกาเสโนฺต กมฺมาโรหํ ปุเร อาสินฺติอาทิมาหฯ ตตฺถ กมฺมาโรติ อโยกมฺมโลหกมฺมาทินา กเมฺมน ชีวติ รุหติ วุทฺธิํ วิรูฬฺหิํ อาปชฺชตีติ กมฺมาโร, ปุเพฺพ ปุญฺญกรณกาเล กมฺมาโร อาสิํ อโหสินฺติ อโตฺถฯ เสสํ สพฺพตฺถ อุตฺตานเมวาติฯ
19. So arahā samāno attano pubbakammaṃ saritvā somanassajāto pubbacaritāpadānaṃ pakāsento kammārohaṃ pure āsintiādimāha. Tattha kammāroti ayokammalohakammādinā kammena jīvati ruhati vuddhiṃ virūḷhiṃ āpajjatīti kammāro, pubbe puññakaraṇakāle kammāro āsiṃ ahosinti attho. Sesaṃ sabbattha uttānamevāti.
สูจิทายกเตฺถรอปทานวณฺณนา สมตฺตาฯ
Sūcidāyakattheraapadānavaṇṇanā samattā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / อปทานปาฬิ • Apadānapāḷi / ๔. สูจิทายกเตฺถรอปทานํ • 4. Sūcidāyakattheraapadānaṃ
