| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
7. සූචිදායකත්‌ථෙරඅපදානවණ්‌ණනා
7. Sūcidāyakattheraapadānavaṇṇanā
තිංසකප්‌පසහස්‌සම්‌හීතිආදිකං ආයස්‌මතො සූචිදායකත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සුමෙධස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය භගවතො චීවරකම්‌මං කාතුං පඤ්‌ච සූචියො අදාසි. සො තෙන පුඤ්‌ඤෙන දෙවමනුස්‌සෙසු පුඤ්‌ඤමනුභවිත්‌වා විචරන්‌තො උප්‌පන්‌නුප්‌පන්‌නභවෙ තික්‌ඛපඤ්‌ඤො හුත්‌වා පාකටො ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය සත්‌ථරි පසීදිත්‌වා පබ්‌බජන්‌තො තික්‌ඛපඤ්‌ඤතාය ඛුරග්‌ගෙයෙව අරහත්‌තං පාපුණි.
Tiṃsakappasahassamhītiādikaṃ āyasmato sūcidāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle ekasmiṃ kulagehe nibbatto vuddhimanvāya bhagavato cīvarakammaṃ kātuṃ pañca sūciyo adāsi. So tena puññena devamanussesu puññamanubhavitvā vicaranto uppannuppannabhave tikkhapañño hutvā pākaṭo imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajanto tikkhapaññatāya khuraggeyeva arahattaṃ pāpuṇi.
30. සො අපරභාගෙ පුඤ්‌ඤං පච්‌චවෙක්‌ඛන්‌තො තං දිස්‌වා සොමනස්‌සජාතො පුබ්‌බචරිතාපදානං පකාසෙන්‌තො තිංසකප්‌පසහස්‌සම්‌හීතිආදිමාහ. අන්‌තරන්‌තරං පනෙත්‌ථ සුවිඤ්‌ඤෙය්‍යමෙව.
30. So aparabhāge puññaṃ paccavekkhanto taṃ disvā somanassajāto pubbacaritāpadānaṃ pakāsento tiṃsakappasahassamhītiādimāha. Antarantaraṃ panettha suviññeyyameva.
31. පඤ්‌චසූචී මයා දින්‌නාති එත්‌ථ සූචති ඡිද්‌දං කරොති විජ්‌ඣතීති සූචි, පඤ්‌චමත්‌තා සූචී පඤ්‌චසූචී මයා දින්‌නාති අත්‌ථො. සෙසං සුවිඤ්‌ඤෙය්‍යමෙවාති.
31.Pañcasūcī mayā dinnāti ettha sūcati chiddaṃ karoti vijjhatīti sūci, pañcamattā sūcī pañcasūcī mayā dinnāti attho. Sesaṃ suviññeyyamevāti.
සූචිදායකත්‌ථෙරඅපදානවණ්‌ණනා සමත්‌තා.
Sūcidāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 7. සූචිදායකත්‌ථෙරඅපදානං • 7. Sūcidāyakattheraapadānaṃ
