| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៣. សូចិលោមសុត្តំ
3. Sūcilomasuttaṃ
២៣៧. ឯកំ សមយំ ភគវា គយាយំ វិហរតិ ដង្កិតមញ្ចេ សូចិលោមស្ស យក្ខស្ស ភវនេ។ តេន ខោ បន សមយេន ខរោ ច យក្ខោ សូចិលោមោ ច យក្ខោ ភគវតោ អវិទូរេ អតិក្កមន្តិ។ អថ ខោ ខរោ យក្ខោ សូចិលោមំ យក្ខំ ឯតទវោច – ‘‘ឯសោ សមណោ’’តិ! ‘‘នេសោ សមណោ, សមណកោ ឯសោ’’។ ‘‘យាវ ជានាមិ យទិ វា សោ សមណោ យទិ វា បន សោ សមណកោ’’តិ។
237. Ekaṃ samayaṃ bhagavā gayāyaṃ viharati ṭaṅkitamañce sūcilomassa yakkhassa bhavane. Tena kho pana samayena kharo ca yakkho sūcilomo ca yakkho bhagavato avidūre atikkamanti. Atha kho kharo yakkho sūcilomaṃ yakkhaṃ etadavoca – ‘‘eso samaṇo’’ti! ‘‘Neso samaṇo, samaṇako eso’’. ‘‘Yāva jānāmi yadi vā so samaṇo yadi vā pana so samaṇako’’ti.
អថ ខោ សូចិលោមោ យក្ខោ យេន ភគវា តេនុបសង្កមិ; ឧបសង្កមិត្វា ភគវតោ កាយំ ឧបនាមេសិ។ អថ ខោ ភគវា កាយំ អបនាមេសិ។ អថ ខោ សូចិលោមោ យក្ខោ ភគវន្តំ ឯតទវោច – ‘‘ភាយសិ មំ សមណា’’តិ? ‘‘ន ខ្វាហំ តំ, អាវុសោ, ភាយាមិ; អបិ ច តេ សម្ផស្សោ បាបកោ’’តិ។ ‘‘បញ្ហំ តំ, សមណ បុច្ឆិស្សាមិ។ សចេ មេ ន ព្យាករិស្សសិ, ចិត្តំ វា តេ ខិបិស្សាមិ, ហទយំ វា តេ ផាលេស្សាមិ, បាទេសុ វា គហេត្វា បារគង្គាយ 1 ខិបិស្សាមី’’តិ។ ‘‘ន ខ្វាហំ តំ, អាវុសោ, បស្សាមិ សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ, យោ មេ ចិត្តំ វា ខិបេយ្យ ហទយំ វា ផាលេយ្យ បាទេសុ វា គហេត្វា បារគង្គាយ ខិបេយ្យ; អបិ ច ត្វំ, អាវុសោ, បុច្ឆ យទា កង្ខសី’’តិ។ អថ ខោ សូចិលោមោ យក្ខោ ភគវន្តំ គាថាយ អជ្ឈភាសិ – ( ) 2
Atha kho sūcilomo yakkho yena bhagavā tenupasaṅkami; upasaṅkamitvā bhagavato kāyaṃ upanāmesi. Atha kho bhagavā kāyaṃ apanāmesi. Atha kho sūcilomo yakkho bhagavantaṃ etadavoca – ‘‘bhāyasi maṃ samaṇā’’ti? ‘‘Na khvāhaṃ taṃ, āvuso, bhāyāmi; api ca te samphasso pāpako’’ti. ‘‘Pañhaṃ taṃ, samaṇa pucchissāmi. Sace me na byākarissasi, cittaṃ vā te khipissāmi, hadayaṃ vā te phālessāmi, pādesu vā gahetvā pāragaṅgāya 3 khipissāmī’’ti. ‘‘Na khvāhaṃ taṃ, āvuso, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, yo me cittaṃ vā khipeyya hadayaṃ vā phāleyya pādesu vā gahetvā pāragaṅgāya khipeyya; api ca tvaṃ, āvuso, puccha yadā kaṅkhasī’’ti. Atha kho sūcilomo yakkho bhagavantaṃ gāthāya ajjhabhāsi – ( ) 4
‘‘រាគោ ច ទោសោ ច កុតោនិទានា,
‘‘Rāgo ca doso ca kutonidānā,
អរតី រតី លោមហំសោ កុតោជា;
Aratī ratī lomahaṃso kutojā;
កុតោ សមុដ្ឋាយ មនោវិតក្កា,
Kuto samuṭṭhāya manovitakkā,
កុមារកា ធង្កមិវោស្សជន្តី’’តិ។
Kumārakā dhaṅkamivossajantī’’ti.
‘‘រាគោ ច ទោសោ ច ឥតោនិទានា,
‘‘Rāgo ca doso ca itonidānā,
អរតី រតី លោមហំសោ ឥតោជា;
Aratī ratī lomahaṃso itojā;
ឥតោ សមុដ្ឋាយ មនោវិតក្កា,
Ito samuṭṭhāya manovitakkā,
កុមារកា ធង្កមិវោស្សជន្តិ។
Kumārakā dhaṅkamivossajanti.
‘‘ស្នេហជា អត្តសម្ភូតា, និគ្រោធស្សេវ ខន្ធជា;
‘‘Snehajā attasambhūtā, nigrodhasseva khandhajā;
‘‘យេ នំ បជានន្តិ យតោនិទានំ,
‘‘Ye naṃ pajānanti yatonidānaṃ,
តេ នំ វិនោទេន្តិ សុណោហិ យក្ខ;
Te naṃ vinodenti suṇohi yakkha;
តេ ទុត្តរំ ឱឃមិមំ តរន្តិ,
Te duttaraṃ oghamimaṃ taranti,
អតិណ្ណបុព្ពំ អបុនព្ភវាយា’’តិ។
Atiṇṇapubbaṃ apunabbhavāyā’’ti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៣. សូចិលោមសុត្តវណ្ណនា • 3. Sūcilomasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៣. សូចិលោមសុត្តវណ្ណនា • 3. Sūcilomasuttavaṇṇanā
