| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. සූචිලොමසුත්‌තං
3. Sūcilomasuttaṃ
237. එකං සමයං භගවා ගයායං විහරති ටඞ්‌කිතමඤ්‌චෙ සූචිලොමස්‌ස යක්‌ඛස්‌ස භවනෙ. තෙන ඛො පන සමයෙන ඛරො ච යක්‌ඛො සූචිලොමො ච යක්‌ඛො භගවතො අවිදූරෙ අතික්‌කමන්‌ති. අථ ඛො ඛරො යක්‌ඛො සූචිලොමං යක්‌ඛං එතදවොච – ‘‘එසො සමණො’’ති! ‘‘නෙසො සමණො, සමණකො එසො’’. ‘‘යාව ජානාමි යදි වා සො සමණො යදි වා පන සො සමණකො’’ති.
237. Ekaṃ samayaṃ bhagavā gayāyaṃ viharati ṭaṅkitamañce sūcilomassa yakkhassa bhavane. Tena kho pana samayena kharo ca yakkho sūcilomo ca yakkho bhagavato avidūre atikkamanti. Atha kho kharo yakkho sūcilomaṃ yakkhaṃ etadavoca – ‘‘eso samaṇo’’ti! ‘‘Neso samaṇo, samaṇako eso’’. ‘‘Yāva jānāmi yadi vā so samaṇo yadi vā pana so samaṇako’’ti.
අථ ඛො සූචිලොමො යක්‌ඛො යෙන භගවා තෙනුපසඞ්‌කමි; උපසඞ්‌කමිත්‌වා භගවතො කායං උපනාමෙසි. අථ ඛො භගවා කායං අපනාමෙසි. අථ ඛො සූචිලොමො යක්‌ඛො භගවන්‌තං එතදවොච – ‘‘භායසි මං සමණා’’ති? ‘‘න ඛ්‌වාහං තං, ආවුසො, භායාමි; අපි ච තෙ සම්‌ඵස්‌සො පාපකො’’ති. ‘‘පඤ්‌හං තං, සමණ පුච්‌ඡිස්‌සාමි. සචෙ මෙ න බ්‍යාකරිස්‌සසි, චිත්‌තං වා තෙ ඛිපිස්‌සාමි, හදයං වා තෙ ඵාලෙස්‌සාමි, පාදෙසු වා ගහෙත්‌වා පාරගඞ්‌ගාය 1 ඛිපිස්‌සාමී’’ති. ‘‘න ඛ්‌වාහං තං, ආවුසො, පස්‌සාමි සදෙවකෙ ලොකෙ සමාරකෙ සබ්‍රහ්‌මකෙ සස්‌සමණබ්‍රාහ්‌මණියා පජාය සදෙවමනුස්‌සාය, යො මෙ චිත්‌තං වා ඛිපෙය්‍ය හදයං වා ඵාලෙය්‍ය පාදෙසු වා ගහෙත්‌වා පාරගඞ්‌ගාය ඛිපෙය්‍ය; අපි ච ත්‌වං, ආවුසො, පුච්‌ඡ යදා කඞ්‌ඛසී’’ති. අථ ඛො සූචිලොමො යක්‌ඛො භගවන්‌තං ගාථාය අජ්‌ඣභාසි – ( ) 2
Atha kho sūcilomo yakkho yena bhagavā tenupasaṅkami; upasaṅkamitvā bhagavato kāyaṃ upanāmesi. Atha kho bhagavā kāyaṃ apanāmesi. Atha kho sūcilomo yakkho bhagavantaṃ etadavoca – ‘‘bhāyasi maṃ samaṇā’’ti? ‘‘Na khvāhaṃ taṃ, āvuso, bhāyāmi; api ca te samphasso pāpako’’ti. ‘‘Pañhaṃ taṃ, samaṇa pucchissāmi. Sace me na byākarissasi, cittaṃ vā te khipissāmi, hadayaṃ vā te phālessāmi, pādesu vā gahetvā pāragaṅgāya 3 khipissāmī’’ti. ‘‘Na khvāhaṃ taṃ, āvuso, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, yo me cittaṃ vā khipeyya hadayaṃ vā phāleyya pādesu vā gahetvā pāragaṅgāya khipeyya; api ca tvaṃ, āvuso, puccha yadā kaṅkhasī’’ti. Atha kho sūcilomo yakkho bhagavantaṃ gāthāya ajjhabhāsi – ( ) 4
‘‘රාගො ච දොසො ච කුතොනිදානා,
‘‘Rāgo ca doso ca kutonidānā,
අරතී රතී ලොමහංසො කුතොජා;
Aratī ratī lomahaṃso kutojā;
කුතො සමුට්‌ඨාය මනොවිතක්‌කා,
Kuto samuṭṭhāya manovitakkā,
කුමාරකා ධඞ්‌කමිවොස්‌සජන්‌තී’’ති.
Kumārakā dhaṅkamivossajantī’’ti.
‘‘රාගො ච දොසො ච ඉතොනිදානා,
‘‘Rāgo ca doso ca itonidānā,
අරතී රතී ලොමහංසො ඉතොජා;
Aratī ratī lomahaṃso itojā;
ඉතො සමුට්‌ඨාය මනොවිතක්‌කා,
Ito samuṭṭhāya manovitakkā,
කුමාරකා ධඞ්‌කමිවොස්‌සජන්‌ති.
Kumārakā dhaṅkamivossajanti.
‘‘ස්‌නෙහජා අත්‌තසම්‌භූතා, නිග්‍රොධස්‌සෙව ඛන්‌ධජා;
‘‘Snehajā attasambhūtā, nigrodhasseva khandhajā;
‘‘යෙ නං පජානන්‌ති යතොනිදානං,
‘‘Ye naṃ pajānanti yatonidānaṃ,
තෙ නං විනොදෙන්‌ති සුණොහි යක්‌ඛ;
Te naṃ vinodenti suṇohi yakkha;
තෙ දුත්‌තරං ඔඝමිමං තරන්‌ති,
Te duttaraṃ oghamimaṃ taranti,
අතිණ්‌ණපුබ්‌බං අපුනබ්‌භවායා’’ති.
Atiṇṇapubbaṃ apunabbhavāyā’’ti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. සූචිලොමසුත්‌තවණ්‌ණනා • 3. Sūcilomasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. සූචිලොමසුත්‌තවණ්‌ණනා • 3. Sūcilomasuttavaṇṇanā
