| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஸூசிலோமஸுத்தவண்ணனா
3. Sūcilomasuttavaṇṇanā
237. ததியே க³யாயந்தி க³யாகா³மே, க³யாய அவிதூ³ரே நிவிட்ட²கா³மங் உபனிஸ்ஸாயாதி அத்தோ². டங்கிதமஞ்சேதி தீ³க⁴மஞ்சே பாத³மஜ்ஜே² விஜ்ஜி²த்வா அடனியோ பவேஸெத்வா கதமஞ்சே. தஸ்ஸ ‘‘இத³ங் உபரி, இத³ங் ஹெட்டா²’’தி நத்தி², பரிவத்தெத்வா அத்த²தோபி தாதி³ஸோவ ஹோதி, தங் தே³வட்டா²னே ட²பெந்தி. சதுன்னங் பாஸாணானங் உபரி பாஸாணங் அத்த²ரித்வா கதகே³ஹம்பி ‘‘டங்கிதமஞ்சோ’’தி வுச்சதி. ஸூசிலோமஸ்ஸாதி கதி²னஸூசிஸதி³ஸலோமஸ்ஸ. ஸோ கிர கஸ்ஸபஸ்ஸ ப⁴க³வதோ ஸாஸனே பப்³ப³ஜித்வா தூ³ரட்டா²னதோ ஆக³தோ ஸேத³மலக்³க³ஹிதேன க³த்தேன ஸுபஞ்ஞத்தங் ஸங்கி⁴கமஞ்சங் அனாத³ரேன அபச்சத்த²ரித்வா நிபஜ்ஜி, தஸ்ஸ பரிஸுத்³த⁴ஸீலஸ்ஸ தங் கம்மங் ஸுத்³த⁴வத்தே² காளகங் விய அஹோஸி. ஸோ தஸ்மிங் அத்தபா⁴வே விஸேஸங் நிப்³ப³த்தேதுங் அஸக்கொந்தோ காலங்கத்வா க³யாகா³மத்³வாரே ஸங்காரட்டா²னே யக்கோ² ஹுத்வா நிப்³ப³த்தி. நிப்³ப³த்தமத்தஸ்ஸேவ சஸ்ஸ ஸகலஸரீரங் கதி²னஸூசீஹி க³விச்சி²விஜ்ஜி²தங் விய ஜாதங்.
237. Tatiye gayāyanti gayāgāme, gayāya avidūre niviṭṭhagāmaṃ upanissāyāti attho. Ṭaṅkitamañceti dīghamañce pādamajjhe vijjhitvā aṭaniyo pavesetvā katamañce. Tassa ‘‘idaṃ upari, idaṃ heṭṭhā’’ti natthi, parivattetvā atthatopi tādisova hoti, taṃ devaṭṭhāne ṭhapenti. Catunnaṃ pāsāṇānaṃ upari pāsāṇaṃ attharitvā katagehampi ‘‘ṭaṅkitamañco’’ti vuccati. Sūcilomassāti kathinasūcisadisalomassa. So kira kassapassa bhagavato sāsane pabbajitvā dūraṭṭhānato āgato sedamalaggahitena gattena supaññattaṃ saṅghikamañcaṃ anādarena apaccattharitvā nipajji, tassa parisuddhasīlassa taṃ kammaṃ suddhavatthe kāḷakaṃ viya ahosi. So tasmiṃ attabhāve visesaṃ nibbattetuṃ asakkonto kālaṃkatvā gayāgāmadvāre saṅkāraṭṭhāne yakkho hutvā nibbatti. Nibbattamattasseva cassa sakalasarīraṃ kathinasūcīhi gavicchivijjhitaṃ viya jātaṃ.
அதே²கதி³வஸங் ப⁴க³வா பச்சூஸஸமயே லோகங் ஓலோகெந்தோ தங் யக்க²ங் பட²மாவஜ்ஜனஸ்ஸேவ ஆபாத²ங் ஆக³தங் தி³ஸ்வா – ‘‘அயங் ஏகங் பு³த்³த⁴ந்தரங் மஹாது³க்க²ங் அனுப⁴வி. கிங் நு க்²வாஸ்ஸ மங் ஆக³ம்ம ஸொத்தி²காரணங் ப⁴வெய்யா’’தி? ஆவஜ்ஜெந்தோ பட²மமக்³க³ஸ்ஸ உபனிஸ்ஸயங் அத்³த³ஸ. அத²ஸ்ஸ ஸங்க³ஹங் காதுகாமோ ஸுரத்தது³பட்டங் நிவாஸெத்வா ஸுக³தமஹாசீவரங் பாருபித்வா தே³வவிமானகப்பங் க³ந்த⁴குடிங் பஹாய ஹத்தி²க³வாஸ்ஸமனுஸ்ஸகுக்குராதி³குணபது³க்³க³ந்த⁴ங் ஸங்காரட்டா²னங் க³ந்த்வா தத்த² மஹாக³ந்த⁴குடியங் விய நிஸீதி³. தங் ஸந்தா⁴ய வுத்தங் ‘‘ஸூசிலோமஸ்ஸ யக்க²ஸ்ஸ ப⁴வனே’’தி.
Athekadivasaṃ bhagavā paccūsasamaye lokaṃ olokento taṃ yakkhaṃ paṭhamāvajjanasseva āpāthaṃ āgataṃ disvā – ‘‘ayaṃ ekaṃ buddhantaraṃ mahādukkhaṃ anubhavi. Kiṃ nu khvāssa maṃ āgamma sotthikāraṇaṃ bhaveyyā’’ti? Āvajjento paṭhamamaggassa upanissayaṃ addasa. Athassa saṅgahaṃ kātukāmo surattadupaṭṭaṃ nivāsetvā sugatamahācīvaraṃ pārupitvā devavimānakappaṃ gandhakuṭiṃ pahāya hatthigavāssamanussakukkurādikuṇapaduggandhaṃ saṅkāraṭṭhānaṃ gantvā tattha mahāgandhakuṭiyaṃ viya nisīdi. Taṃ sandhāya vuttaṃ ‘‘sūcilomassa yakkhassa bhavane’’ti.
க²ரோதி ஸுங்ஸுமாரபிட்டி² விய ச²த³னிட்ட²காஹி விஸமச்ச²த³னபிட்டி² விய ச க²ரஸரீரோ. ஸோ கிர கஸ்ஸபஸம்மாஸம்பு³த்³த⁴காலே ஸீலஸம்பன்னோ உபாஸகோ ஏகதி³வஸே விஹாரே சித்தத்த²ரணாதீ³ஹி அத்த²தாய பூ⁴மியா ஸங்கி⁴கே அத்த²ரணே அத்தனோ உத்தராஸங்க³ங் அபச்சத்த²ரித்வா நிபஜ்ஜி. ஸங்கி⁴கங் தேலங் அபா⁴ஜெத்வா அத்தனோ உத்தராஸங்க³ங் அபச்சத்த²ரித்வா நிபஜ்ஜி. ஸங்கி⁴கங் தேலங் அபா⁴ஜெத்வா அத்தனோ ஹத்தே²ஹி ஸரீரங் மக்கே²ஸீதிபி வத³ந்தி. ஸோ தேன கம்மேன ஸக்³கே³ நிப்³ப³த்திதுங் அஸக்கொந்தோ தஸ்ஸேவ கா³மஸ்ஸ த்³வாரே ஸங்காரட்டா²னே யக்கோ² ஹுத்வா நிப்³ப³த்தி. நிப்³ப³த்தமத்தஸ்ஸ சஸ்ஸ ஸகலஸரீரங் வுத்தப்பகாரங் அஹோஸி. தே உபோ⁴பி ஸஹாயா ஜாதா. இதி க²ரஸ்ஸ க²ரபா⁴வோ வேதி³தப்³போ³.
Kharoti suṃsumārapiṭṭhi viya chadaniṭṭhakāhi visamacchadanapiṭṭhi viya ca kharasarīro. So kira kassapasammāsambuddhakāle sīlasampanno upāsako ekadivase vihāre cittattharaṇādīhi atthatāya bhūmiyā saṅghike attharaṇe attano uttarāsaṅgaṃ apaccattharitvā nipajji. Saṅghikaṃ telaṃ abhājetvā attano uttarāsaṅgaṃ apaccattharitvā nipajji. Saṅghikaṃ telaṃ abhājetvā attano hatthehi sarīraṃ makkhesītipi vadanti. So tena kammena sagge nibbattituṃ asakkonto tasseva gāmassa dvāre saṅkāraṭṭhāne yakkho hutvā nibbatti. Nibbattamattassa cassa sakalasarīraṃ vuttappakāraṃ ahosi. Te ubhopi sahāyā jātā. Iti kharassa kharabhāvo veditabbo.
அவிதூ³ரே அதிக்கமந்தீதி கோ³சரங் பரியேஸந்தா ஸமாக³மட்டா²னங் வா க³ச்ச²ந்தா ஆஸன்னே டா²னே க³ச்ச²ந்தி. தேஸு ஸூசிலோமோ ஸத்தா²ரங் ந பஸ்ஸதி, க²ரலோமோ பட²மதரங் தி³ஸ்வா ஸூசிலோமங் யக்க²ங் ஏதத³வோச – ‘‘ஏஸோ ஸமணோ’’தி, ஸம்ம, ஏஸ தவ ப⁴வனங் பவிஸித்வா நிஸின்னோ ஏகோ ஸமணோதி. நேஸோ ஸமணோ, ஸமணகோ ஏஸோதி ஸோ கிர யோ மங் பஸ்ஸித்வா பீ⁴தோ பலாயதி, தங் ஸமணகோதி வத³தி. யோ ந பா⁴யதி, தங் ஸமணோதி. தஸ்மா ‘‘அயங் மங் தி³ஸ்வா பீ⁴தோ பலாயிஸ்ஸதீ’’தி மஞ்ஞமானோ ஏவமாஹ.
Avidūre atikkamantīti gocaraṃ pariyesantā samāgamaṭṭhānaṃ vā gacchantā āsanne ṭhāne gacchanti. Tesu sūcilomo satthāraṃ na passati, kharalomo paṭhamataraṃ disvā sūcilomaṃ yakkhaṃ etadavoca – ‘‘eso samaṇo’’ti, samma, esa tava bhavanaṃ pavisitvā nisinno eko samaṇoti. Neso samaṇo, samaṇako esoti so kira yo maṃ passitvā bhīto palāyati, taṃ samaṇakoti vadati. Yo na bhāyati, taṃ samaṇoti. Tasmā ‘‘ayaṃ maṃ disvā bhīto palāyissatī’’ti maññamāno evamāha.
காயங் உபனாமேஸீதி பே⁴ரவரூபங் நிம்மினித்வா மஹாமுக²ங் விவரித்வா ஸகலஸரீரே லோமானி உட்டா²பெத்வா காயங் உபனாமேஸி. அபனாமேஸீதி ரதனஸதிகங் ஸுவண்ணக்³க⁴னிகங் விய தோ²கங் அபனாமேஸி. பாபகோதி லாமகோ அமனுஞ்ஞோ. ஸோ கூ³த²ங் விய அக்³கி³ விய கண்ஹஸப்போ விய ச பரிவஜ்ஜேதப்³போ³, ந இமினா ஸுவண்ணவண்ணேன ஸரீரேன ஸம்படிச்சி²தப்³போ³. ஏவங் வுத்தே பன ஸூசிலோமோ ‘‘பாபகோ கிர மே ஸம்ப²ஸ்ஸோ’’தி குத்³தோ⁴ பஞ்ஹங் தங், ஸமணாதிஆதி³மாஹ. சித்தங் வா தே கி²பிஸ்ஸாமீதி யேஸஞ்ஹி அமனுஸ்ஸா சித்தங் கி²பிதுகாமா ஹொந்தி, தேஸங் ஸேதமுக²ங் நீலோத³ரங் ஸுரத்தஹத்த²பாத³ங் மஹாஸீஸங் பஜ்ஜலிதனெத்தங் பே⁴ரவங் வா அத்தபா⁴வங் நிம்மினித்வா த³ஸ்ஸெந்தி, பே⁴ரவங் வா ஸத்³த³ங் ஸாவெந்தி, கதெ²ந்தானங்யேவ வா முகே² ஹத்த²ங் பக்கி²பித்வா ஹத³யங் மத்³த³ந்தி, தேன தே ஸத்தா உம்மத்தகா ஹொந்தி கி²த்தசித்தா. தங் ஸந்தா⁴யேவமாஹ. பாரக³ங்கா³யாதி த்³வீஸு பாதே³ஸு க³ஹெத்வா தங் ஆவிஞ்செ²த்வா யதா² ந புனாக³ச்ச²ஸி, ஏவங் பாரங் வா க³ங்கா³ய கி²பிஸ்ஸாமீதி வத³தி. ஸதே³வகேதிஆதி³ வுத்தத்த²மேவ. புச்ச² யதா³கங்க²ஸீதி யங்கிஞ்சி ஆகங்க²ஸி, தங் ஸப்³ப³ங் புச்ச², அஸேஸங் தே ப்³யாகரிஸ்ஸாமீதி ஸப்³ப³ஞ்ஞுபவாரணங் பவாரேதி.
Kāyaṃ upanāmesīti bheravarūpaṃ nimminitvā mahāmukhaṃ vivaritvā sakalasarīre lomāni uṭṭhāpetvā kāyaṃ upanāmesi. Apanāmesīti ratanasatikaṃ suvaṇṇagghanikaṃ viya thokaṃ apanāmesi. Pāpakoti lāmako amanuñño. So gūthaṃ viya aggi viya kaṇhasappo viya ca parivajjetabbo, na iminā suvaṇṇavaṇṇena sarīrena sampaṭicchitabbo. Evaṃ vutte pana sūcilomo ‘‘pāpako kira me samphasso’’ti kuddho pañhaṃ taṃ, samaṇātiādimāha. Cittaṃ vā te khipissāmīti yesañhi amanussā cittaṃ khipitukāmā honti, tesaṃ setamukhaṃ nīlodaraṃ surattahatthapādaṃ mahāsīsaṃ pajjalitanettaṃ bheravaṃ vā attabhāvaṃ nimminitvā dassenti, bheravaṃ vā saddaṃ sāventi, kathentānaṃyeva vā mukhe hatthaṃ pakkhipitvā hadayaṃ maddanti, tena te sattā ummattakā honti khittacittā. Taṃ sandhāyevamāha. Pāragaṅgāyāti dvīsu pādesu gahetvā taṃ āviñchetvā yathā na punāgacchasi, evaṃ pāraṃ vā gaṅgāya khipissāmīti vadati. Sadevaketiādi vuttatthameva. Puccha yadākaṅkhasīti yaṃkiñci ākaṅkhasi, taṃ sabbaṃ puccha, asesaṃ te byākarissāmīti sabbaññupavāraṇaṃ pavāreti.
குதோனிதா³னாதி கிங்னிதா³னா, கிங்பச்சயாதி அத்தோ²? குமாரகா த⁴ங்கமிவொஸ்ஸஜந்தீதி யதா² குமாரகா காகங் க³ஹெத்வா ஒஸ்ஸஜந்தி கி²பந்தி, ஏவங் பாபவிதக்கா குதோ ஸமுட்டா²ய சித்தங் ஒஸ்ஸஜந்தீதி புச்ச²தி?
Kutonidānāti kiṃnidānā, kiṃpaccayāti attho? Kumārakā dhaṅkamivossajantīti yathā kumārakā kākaṃ gahetvā ossajanti khipanti, evaṃ pāpavitakkā kuto samuṭṭhāya cittaṃ ossajantīti pucchati?
இதோனிதா³னாதி அயங் அத்தபா⁴வோ நிதா³னங் ஏதேஸந்தி இதோ நிதா³னா. இதோஜாதி இதோ அத்தபா⁴வதோ ஜாதா. இதோ ஸமுட்டா²ய மனோவிதக்காதி யதா² தீ³க⁴ஸுத்தகேன பாதே³ ப³த்³த⁴ங் காகங் குமாரகா தஸ்ஸ ஸுத்தபரியந்தங் அங்கு³லியங் வேடெ²த்வா ஒஸ்ஸஜந்தி, ஸோ தூ³ரங் க³ந்த்வாபி புன தேஸங் பாத³மூலேயேவ பததி, ஏவமேவ இதோ அத்தபா⁴வதோ ஸமுட்டா²ய பாபவிதக்கா சித்தங் ஒஸ்ஸஜந்தி.
Itonidānāti ayaṃ attabhāvo nidānaṃ etesanti ito nidānā. Itojāti ito attabhāvato jātā. Ito samuṭṭhāya manovitakkāti yathā dīghasuttakena pāde baddhaṃ kākaṃ kumārakā tassa suttapariyantaṃ aṅguliyaṃ veṭhetvā ossajanti, so dūraṃ gantvāpi puna tesaṃ pādamūleyeva patati, evameva ito attabhāvato samuṭṭhāya pāpavitakkā cittaṃ ossajanti.
ஸ்னேஹஜாதி தண்ஹாஸினேஹதோ ஜாதா. அத்தஸம்பூ⁴தாதி அத்தனி ஸம்பூ⁴தா. நிக்³ரோத⁴ஸ்ஸேவ க²ந்த⁴ஜாதி நிக்³ரோத⁴க²ந்தே⁴ ஜாதா பாரோஹா விய. புதூ²தி ப³ஹூ அனேகப்பகாரா பாபவிதக்கா தங்ஸம்பயுத்தகிலேஸா ச. விஸத்தாதி லக்³கா³ லக்³கி³தா. காமேஸூதி வத்து²காமேஸு. மாலுவாவ விததா வனேதி யதா² வனே மாலுவா லதா யங் ருக்க²ங் நிஸ்ஸாய ஜாயதி, தங் மூலதோ யாவ அக்³கா³, அக்³க³தோ யாவ மூலா புனப்புனங் ஸங்ஸிப்³பி³த்வா அஜ்ஜொ²த்த²ரித்வா ஓததவிததா திட்ட²தி. ஏவங் வத்து²காமேஸு புதூ² கிலேஸகாமா விஸத்தா, புதூ² வா ஸத்தா தேஹி கிலேஸகாமேஹி வத்து²காமேஸு விஸத்தா. யே நங் பஜானந்தீதி யே ‘‘அத்தஸம்பூ⁴தா’’தி எத்த² வுத்தங் அத்தபா⁴வங் ஜானந்தி.
Snehajāti taṇhāsinehato jātā. Attasambhūtāti attani sambhūtā. Nigrodhasseva khandhajāti nigrodhakhandhe jātā pārohā viya. Puthūti bahū anekappakārā pāpavitakkā taṃsampayuttakilesā ca. Visattāti laggā laggitā. Kāmesūti vatthukāmesu. Māluvāva vitatā vaneti yathā vane māluvā latā yaṃ rukkhaṃ nissāya jāyati, taṃ mūlato yāva aggā, aggato yāva mūlā punappunaṃ saṃsibbitvā ajjhottharitvā otatavitatā tiṭṭhati. Evaṃ vatthukāmesu puthū kilesakāmā visattā, puthū vā sattā tehi kilesakāmehi vatthukāmesu visattā. Ye naṃ pajānantīti ye ‘‘attasambhūtā’’ti ettha vuttaṃ attabhāvaṃ jānanti.
யதோனிதா³னந்தி யங் நிதா³னமஸ்ஸ அத்தபா⁴வஸ்ஸ தஞ்ச ஜானந்தி. தே நங் வினோதெ³ந்தீதி தே ஏவங் அத்தபா⁴வஸங்கா²தஸ்ஸ து³க்க²ஸச்சஸ்ஸ நிதா³னபூ⁴தங் ஸமுத³யஸச்சங் மக்³க³ஸச்சேன வினோதெ³ந்தி. தே து³த்தரந்தி தே ஸமுத³யஸச்சங் நீஹரந்தா இத³ங் து³த்தரங் கிலேஸோக⁴ங் தரந்தி. அதிண்ணபுப்³ப³ந்தி அனமதக்³கே³ ஸங்ஸாரே ஸுபினந்தேபி ந திண்ணபுப்³ப³ங். அபுனப்³ப⁴வாயாதி அபுனப்³ப⁴வஸங்கா²தஸ்ஸ நிரோத⁴ஸச்சஸ்ஸத்தா²ய. இதி இமாய கா³தா²ய சத்தாரி ஸச்சானி பகாஸெந்தோ அரஹத்தனிகூடேன தே³ஸனங் நிட்ட²பேஸி. தே³ஸனாவஸானே ஸூசிலோமோ தஸ்மிங்யேவ பதே³ஸே டி²தோ தே³ஸனானுஸாரேன ஞாணங் பேஸெத்வா ஸோதாபத்திப²லே பதிட்டி²தோ. ஸோதாபன்னா ச நாம ந கிலிட்ட²த்தபா⁴வே திட்ட²ந்தீதி ஸஹ ப²லபடிலாபே⁴னஸ்ஸ ஸரீரே ஸேதகண்டு³பீளகஸூசியோ ஸப்³பா³ பதிதா. ஸோ தி³ப்³ப³வத்த²னிவத்தோ² தி³ப்³ப³வரது³கூலுத்தராஸங்கோ³ தி³ப்³ப³வேட²னவேடி²தோ தி³ப்³பா³ப⁴ரணக³ந்த⁴மாலத⁴ரோ ஸுவண்ணவண்ணோ ஹுத்வா பு⁴ம்மதே³வதாபரிஹாரங் படிலபீ⁴தி. ததியங்.
Yatonidānanti yaṃ nidānamassa attabhāvassa tañca jānanti. Te naṃ vinodentīti te evaṃ attabhāvasaṅkhātassa dukkhasaccassa nidānabhūtaṃ samudayasaccaṃ maggasaccena vinodenti. Te duttaranti te samudayasaccaṃ nīharantā idaṃ duttaraṃ kilesoghaṃ taranti. Atiṇṇapubbanti anamatagge saṃsāre supinantepi na tiṇṇapubbaṃ. Apunabbhavāyāti apunabbhavasaṅkhātassa nirodhasaccassatthāya. Iti imāya gāthāya cattāri saccāni pakāsento arahattanikūṭena desanaṃ niṭṭhapesi. Desanāvasāne sūcilomo tasmiṃyeva padese ṭhito desanānusārena ñāṇaṃ pesetvā sotāpattiphale patiṭṭhito. Sotāpannā ca nāma na kiliṭṭhattabhāve tiṭṭhantīti saha phalapaṭilābhenassa sarīre setakaṇḍupīḷakasūciyo sabbā patitā. So dibbavatthanivattho dibbavaradukūluttarāsaṅgo dibbaveṭhanaveṭhito dibbābharaṇagandhamāladharo suvaṇṇavaṇṇo hutvā bhummadevatāparihāraṃ paṭilabhīti. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஸூசிலோமஸுத்தங் • 3. Sūcilomasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஸூசிலோமஸுத்தவண்ணனா • 3. Sūcilomasuttavaṇṇanā
