| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੩. ਸੂਚਿਲੋਮਸੁਤ੍ਤવਣ੍ਣਨਾ
3. Sūcilomasuttavaṇṇanā
੨੩੭. ਤਤਿਯੇ ਗਯਾਯਨ੍ਤਿ ਗਯਾਗਾਮੇ, ਗਯਾਯ ਅવਿਦੂਰੇ ਨਿવਿਟ੍ਠਗਾਮਂ ਉਪਨਿਸ੍ਸਾਯਾਤਿ ਅਤ੍ਥੋ। ਟਙ੍ਕਿਤਮਞ੍ਚੇਤਿ ਦੀਘਮਞ੍ਚੇ ਪਾਦਮਜ੍ਝੇ વਿਜ੍ਝਿਤ੍વਾ ਅਟਨਿਯੋ ਪવੇਸੇਤ੍વਾ ਕਤਮਞ੍ਚੇ। ਤਸ੍ਸ ‘‘ਇਦਂ ਉਪਰਿ, ਇਦਂ ਹੇਟ੍ਠਾ’’ਤਿ ਨਤ੍ਥਿ, ਪਰਿવਤ੍ਤੇਤ੍વਾ ਅਤ੍ਥਤੋਪਿ ਤਾਦਿਸੋવ ਹੋਤਿ, ਤਂ ਦੇવਟ੍ਠਾਨੇ ਠਪੇਨ੍ਤਿ। ਚਤੁਨ੍ਨਂ ਪਾਸਾਣਾਨਂ ਉਪਰਿ ਪਾਸਾਣਂ ਅਤ੍ਥਰਿਤ੍વਾ ਕਤਗੇਹਮ੍ਪਿ ‘‘ਟਙ੍ਕਿਤਮਞ੍ਚੋ’’ਤਿ વੁਚ੍ਚਤਿ। ਸੂਚਿਲੋਮਸ੍ਸਾਤਿ ਕਥਿਨਸੂਚਿਸਦਿਸਲੋਮਸ੍ਸ। ਸੋ ਕਿਰ ਕਸ੍ਸਪਸ੍ਸ ਭਗવਤੋ ਸਾਸਨੇ ਪਬ੍ਬਜਿਤ੍વਾ ਦੂਰਟ੍ਠਾਨਤੋ ਆਗਤੋ ਸੇਦਮਲਗ੍ਗਹਿਤੇਨ ਗਤ੍ਤੇਨ ਸੁਪਞ੍ਞਤ੍ਤਂ ਸਙ੍ਘਿਕਮਞ੍ਚਂ ਅਨਾਦਰੇਨ ਅਪਚ੍ਚਤ੍ਥਰਿਤ੍વਾ ਨਿਪਜ੍ਜਿ, ਤਸ੍ਸ ਪਰਿਸੁਦ੍ਧਸੀਲਸ੍ਸ ਤਂ ਕਮ੍ਮਂ ਸੁਦ੍ਧવਤ੍ਥੇ ਕਾਲ਼ਕਂ વਿਯ ਅਹੋਸਿ। ਸੋ ਤਸ੍ਮਿਂ ਅਤ੍ਤਭਾવੇ વਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤੋ ਕਾਲਂਕਤ੍વਾ ਗਯਾਗਾਮਦ੍વਾਰੇ ਸਙ੍ਕਾਰਟ੍ਠਾਨੇ ਯਕ੍ਖੋ ਹੁਤ੍વਾ ਨਿਬ੍ਬਤ੍ਤਿ। ਨਿਬ੍ਬਤ੍ਤਮਤ੍ਤਸ੍ਸੇવ ਚਸ੍ਸ ਸਕਲਸਰੀਰਂ ਕਥਿਨਸੂਚੀਹਿ ਗવਿਚ੍ਛਿવਿਜ੍ਝਿਤਂ વਿਯ ਜਾਤਂ।
237. Tatiye gayāyanti gayāgāme, gayāya avidūre niviṭṭhagāmaṃ upanissāyāti attho. Ṭaṅkitamañceti dīghamañce pādamajjhe vijjhitvā aṭaniyo pavesetvā katamañce. Tassa ‘‘idaṃ upari, idaṃ heṭṭhā’’ti natthi, parivattetvā atthatopi tādisova hoti, taṃ devaṭṭhāne ṭhapenti. Catunnaṃ pāsāṇānaṃ upari pāsāṇaṃ attharitvā katagehampi ‘‘ṭaṅkitamañco’’ti vuccati. Sūcilomassāti kathinasūcisadisalomassa. So kira kassapassa bhagavato sāsane pabbajitvā dūraṭṭhānato āgato sedamalaggahitena gattena supaññattaṃ saṅghikamañcaṃ anādarena apaccattharitvā nipajji, tassa parisuddhasīlassa taṃ kammaṃ suddhavatthe kāḷakaṃ viya ahosi. So tasmiṃ attabhāve visesaṃ nibbattetuṃ asakkonto kālaṃkatvā gayāgāmadvāre saṅkāraṭṭhāne yakkho hutvā nibbatti. Nibbattamattasseva cassa sakalasarīraṃ kathinasūcīhi gavicchivijjhitaṃ viya jātaṃ.
ਅਥੇਕਦਿવਸਂ ਭਗવਾ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਤਂ ਯਕ੍ਖਂ ਪਠਮਾવਜ੍ਜਨਸ੍ਸੇવ ਆਪਾਥਂ ਆਗਤਂ ਦਿਸ੍વਾ – ‘‘ਅਯਂ ਏਕਂ ਬੁਦ੍ਧਨ੍ਤਰਂ ਮਹਾਦੁਕ੍ਖਂ ਅਨੁਭવਿ। ਕਿਂ ਨੁ ਖ੍વਾਸ੍ਸ ਮਂ ਆਗਮ੍ਮ ਸੋਤ੍ਥਿਕਾਰਣਂ ਭવੇਯ੍ਯਾ’’ਤਿ? ਆવਜ੍ਜੇਨ੍ਤੋ ਪਠਮਮਗ੍ਗਸ੍ਸ ਉਪਨਿਸ੍ਸਯਂ ਅਦ੍ਦਸ। ਅਥਸ੍ਸ ਸਙ੍ਗਹਂ ਕਾਤੁਕਾਮੋ ਸੁਰਤ੍ਤਦੁਪਟ੍ਟਂ ਨਿવਾਸੇਤ੍વਾ ਸੁਗਤਮਹਾਚੀવਰਂ ਪਾਰੁਪਿਤ੍વਾ ਦੇવવਿਮਾਨਕਪ੍ਪਂ ਗਨ੍ਧਕੁਟਿਂ ਪਹਾਯ ਹਤ੍ਥਿਗવਾਸ੍ਸਮਨੁਸ੍ਸਕੁਕ੍ਕੁਰਾਦਿਕੁਣਪਦੁਗ੍ਗਨ੍ਧਂ ਸਙ੍ਕਾਰਟ੍ਠਾਨਂ ਗਨ੍ਤ੍વਾ ਤਤ੍ਥ ਮਹਾਗਨ੍ਧਕੁਟਿਯਂ વਿਯ ਨਿਸੀਦਿ। ਤਂ ਸਨ੍ਧਾਯ વੁਤ੍ਤਂ ‘‘ਸੂਚਿਲੋਮਸ੍ਸ ਯਕ੍ਖਸ੍ਸ ਭવਨੇ’’ਤਿ।
Athekadivasaṃ bhagavā paccūsasamaye lokaṃ olokento taṃ yakkhaṃ paṭhamāvajjanasseva āpāthaṃ āgataṃ disvā – ‘‘ayaṃ ekaṃ buddhantaraṃ mahādukkhaṃ anubhavi. Kiṃ nu khvāssa maṃ āgamma sotthikāraṇaṃ bhaveyyā’’ti? Āvajjento paṭhamamaggassa upanissayaṃ addasa. Athassa saṅgahaṃ kātukāmo surattadupaṭṭaṃ nivāsetvā sugatamahācīvaraṃ pārupitvā devavimānakappaṃ gandhakuṭiṃ pahāya hatthigavāssamanussakukkurādikuṇapaduggandhaṃ saṅkāraṭṭhānaṃ gantvā tattha mahāgandhakuṭiyaṃ viya nisīdi. Taṃ sandhāya vuttaṃ ‘‘sūcilomassa yakkhassa bhavane’’ti.
ਖਰੋਤਿ ਸੁਂਸੁਮਾਰਪਿਟ੍ਠਿ વਿਯ ਛਦਨਿਟ੍ਠਕਾਹਿ વਿਸਮਚ੍ਛਦਨਪਿਟ੍ਠਿ વਿਯ ਚ ਖਰਸਰੀਰੋ। ਸੋ ਕਿਰ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਸੀਲਸਮ੍ਪਨ੍ਨੋ ਉਪਾਸਕੋ ਏਕਦਿવਸੇ વਿਹਾਰੇ ਚਿਤ੍ਤਤ੍ਥਰਣਾਦੀਹਿ ਅਤ੍ਥਤਾਯ ਭੂਮਿਯਾ ਸਙ੍ਘਿਕੇ ਅਤ੍ਥਰਣੇ ਅਤ੍ਤਨੋ ਉਤ੍ਤਰਾਸਙ੍ਗਂ ਅਪਚ੍ਚਤ੍ਥਰਿਤ੍વਾ ਨਿਪਜ੍ਜਿ। ਸਙ੍ਘਿਕਂ ਤੇਲਂ ਅਭਾਜੇਤ੍વਾ ਅਤ੍ਤਨੋ ਉਤ੍ਤਰਾਸਙ੍ਗਂ ਅਪਚ੍ਚਤ੍ਥਰਿਤ੍વਾ ਨਿਪਜ੍ਜਿ। ਸਙ੍ਘਿਕਂ ਤੇਲਂ ਅਭਾਜੇਤ੍વਾ ਅਤ੍ਤਨੋ ਹਤ੍ਥੇਹਿ ਸਰੀਰਂ ਮਕ੍ਖੇਸੀਤਿਪਿ વਦਨ੍ਤਿ। ਸੋ ਤੇਨ ਕਮ੍ਮੇਨ ਸਗ੍ਗੇ ਨਿਬ੍ਬਤ੍ਤਿਤੁਂ ਅਸਕ੍ਕੋਨ੍ਤੋ ਤਸ੍ਸੇવ ਗਾਮਸ੍ਸ ਦ੍વਾਰੇ ਸਙ੍ਕਾਰਟ੍ਠਾਨੇ ਯਕ੍ਖੋ ਹੁਤ੍વਾ ਨਿਬ੍ਬਤ੍ਤਿ। ਨਿਬ੍ਬਤ੍ਤਮਤ੍ਤਸ੍ਸ ਚਸ੍ਸ ਸਕਲਸਰੀਰਂ વੁਤ੍ਤਪ੍ਪਕਾਰਂ ਅਹੋਸਿ। ਤੇ ਉਭੋਪਿ ਸਹਾਯਾ ਜਾਤਾ। ਇਤਿ ਖਰਸ੍ਸ ਖਰਭਾવੋ વੇਦਿਤਬ੍ਬੋ।
Kharoti suṃsumārapiṭṭhi viya chadaniṭṭhakāhi visamacchadanapiṭṭhi viya ca kharasarīro. So kira kassapasammāsambuddhakāle sīlasampanno upāsako ekadivase vihāre cittattharaṇādīhi atthatāya bhūmiyā saṅghike attharaṇe attano uttarāsaṅgaṃ apaccattharitvā nipajji. Saṅghikaṃ telaṃ abhājetvā attano uttarāsaṅgaṃ apaccattharitvā nipajji. Saṅghikaṃ telaṃ abhājetvā attano hatthehi sarīraṃ makkhesītipi vadanti. So tena kammena sagge nibbattituṃ asakkonto tasseva gāmassa dvāre saṅkāraṭṭhāne yakkho hutvā nibbatti. Nibbattamattassa cassa sakalasarīraṃ vuttappakāraṃ ahosi. Te ubhopi sahāyā jātā. Iti kharassa kharabhāvo veditabbo.
ਅવਿਦੂਰੇ ਅਤਿਕ੍ਕਮਨ੍ਤੀਤਿ ਗੋਚਰਂ ਪਰਿਯੇਸਨ੍ਤਾ ਸਮਾਗਮਟ੍ਠਾਨਂ વਾ ਗਚ੍ਛਨ੍ਤਾ ਆਸਨ੍ਨੇ ਠਾਨੇ ਗਚ੍ਛਨ੍ਤਿ। ਤੇਸੁ ਸੂਚਿਲੋਮੋ ਸਤ੍ਥਾਰਂ ਨ ਪਸ੍ਸਤਿ, ਖਰਲੋਮੋ ਪਠਮਤਰਂ ਦਿਸ੍વਾ ਸੂਚਿਲੋਮਂ ਯਕ੍ਖਂ ਏਤਦવੋਚ – ‘‘ਏਸੋ ਸਮਣੋ’’ਤਿ, ਸਮ੍ਮ, ਏਸ ਤવ ਭવਨਂ ਪવਿਸਿਤ੍વਾ ਨਿਸਿਨ੍ਨੋ ਏਕੋ ਸਮਣੋਤਿ। ਨੇਸੋ ਸਮਣੋ, ਸਮਣਕੋ ਏਸੋਤਿ ਸੋ ਕਿਰ ਯੋ ਮਂ ਪਸ੍ਸਿਤ੍વਾ ਭੀਤੋ ਪਲਾਯਤਿ, ਤਂ ਸਮਣਕੋਤਿ વਦਤਿ। ਯੋ ਨ ਭਾਯਤਿ, ਤਂ ਸਮਣੋਤਿ। ਤਸ੍ਮਾ ‘‘ਅਯਂ ਮਂ ਦਿਸ੍વਾ ਭੀਤੋ ਪਲਾਯਿਸ੍ਸਤੀ’’ਤਿ ਮਞ੍ਞਮਾਨੋ ਏવਮਾਹ।
Avidūre atikkamantīti gocaraṃ pariyesantā samāgamaṭṭhānaṃ vā gacchantā āsanne ṭhāne gacchanti. Tesu sūcilomo satthāraṃ na passati, kharalomo paṭhamataraṃ disvā sūcilomaṃ yakkhaṃ etadavoca – ‘‘eso samaṇo’’ti, samma, esa tava bhavanaṃ pavisitvā nisinno eko samaṇoti. Neso samaṇo, samaṇako esoti so kira yo maṃ passitvā bhīto palāyati, taṃ samaṇakoti vadati. Yo na bhāyati, taṃ samaṇoti. Tasmā ‘‘ayaṃ maṃ disvā bhīto palāyissatī’’ti maññamāno evamāha.
ਕਾਯਂ ਉਪਨਾਮੇਸੀਤਿ ਭੇਰવਰੂਪਂ ਨਿਮ੍ਮਿਨਿਤ੍વਾ ਮਹਾਮੁਖਂ વਿવਰਿਤ੍વਾ ਸਕਲਸਰੀਰੇ ਲੋਮਾਨਿ ਉਟ੍ਠਾਪੇਤ੍વਾ ਕਾਯਂ ਉਪਨਾਮੇਸਿ। ਅਪਨਾਮੇਸੀਤਿ ਰਤਨਸਤਿਕਂ ਸੁવਣ੍ਣਗ੍ਘਨਿਕਂ વਿਯ ਥੋਕਂ ਅਪਨਾਮੇਸਿ। ਪਾਪਕੋਤਿ ਲਾਮਕੋ ਅਮਨੁਞ੍ਞੋ। ਸੋ ਗੂਥਂ વਿਯ ਅਗ੍ਗਿ વਿਯ ਕਣ੍ਹਸਪ੍ਪੋ વਿਯ ਚ ਪਰਿવਜ੍ਜੇਤਬ੍ਬੋ, ਨ ਇਮਿਨਾ ਸੁવਣ੍ਣવਣ੍ਣੇਨ ਸਰੀਰੇਨ ਸਮ੍ਪਟਿਚ੍ਛਿਤਬ੍ਬੋ। ਏવਂ વੁਤ੍ਤੇ ਪਨ ਸੂਚਿਲੋਮੋ ‘‘ਪਾਪਕੋ ਕਿਰ ਮੇ ਸਮ੍ਫਸ੍ਸੋ’’ਤਿ ਕੁਦ੍ਧੋ ਪਞ੍ਹਂ ਤਂ, ਸਮਣਾਤਿਆਦਿਮਾਹ। ਚਿਤ੍ਤਂ વਾ ਤੇ ਖਿਪਿਸ੍ਸਾਮੀਤਿ ਯੇਸਞ੍ਹਿ ਅਮਨੁਸ੍ਸਾ ਚਿਤ੍ਤਂ ਖਿਪਿਤੁਕਾਮਾ ਹੋਨ੍ਤਿ, ਤੇਸਂ ਸੇਤਮੁਖਂ ਨੀਲੋਦਰਂ ਸੁਰਤ੍ਤਹਤ੍ਥਪਾਦਂ ਮਹਾਸੀਸਂ ਪਜ੍ਜਲਿਤਨੇਤ੍ਤਂ ਭੇਰવਂ વਾ ਅਤ੍ਤਭਾવਂ ਨਿਮ੍ਮਿਨਿਤ੍વਾ ਦਸ੍ਸੇਨ੍ਤਿ, ਭੇਰવਂ વਾ ਸਦ੍ਦਂ ਸਾવੇਨ੍ਤਿ, ਕਥੇਨ੍ਤਾਨਂਯੇવ વਾ ਮੁਖੇ ਹਤ੍ਥਂ ਪਕ੍ਖਿਪਿਤ੍વਾ ਹਦਯਂ ਮਦ੍ਦਨ੍ਤਿ, ਤੇਨ ਤੇ ਸਤ੍ਤਾ ਉਮ੍ਮਤ੍ਤਕਾ ਹੋਨ੍ਤਿ ਖਿਤ੍ਤਚਿਤ੍ਤਾ। ਤਂ ਸਨ੍ਧਾਯੇવਮਾਹ। ਪਾਰਗਙ੍ਗਾਯਾਤਿ ਦ੍વੀਸੁ ਪਾਦੇਸੁ ਗਹੇਤ੍વਾ ਤਂ ਆવਿਞ੍ਛੇਤ੍વਾ ਯਥਾ ਨ ਪੁਨਾਗਚ੍ਛਸਿ, ਏવਂ ਪਾਰਂ વਾ ਗਙ੍ਗਾਯ ਖਿਪਿਸ੍ਸਾਮੀਤਿ વਦਤਿ। ਸਦੇવਕੇਤਿਆਦਿ વੁਤ੍ਤਤ੍ਥਮੇવ। ਪੁਚ੍ਛ ਯਦਾਕਙ੍ਖਸੀਤਿ ਯਂਕਿਞ੍ਚਿ ਆਕਙ੍ਖਸਿ, ਤਂ ਸਬ੍ਬਂ ਪੁਚ੍ਛ, ਅਸੇਸਂ ਤੇ ਬ੍ਯਾਕਰਿਸ੍ਸਾਮੀਤਿ ਸਬ੍ਬਞ੍ਞੁਪવਾਰਣਂ ਪવਾਰੇਤਿ।
Kāyaṃ upanāmesīti bheravarūpaṃ nimminitvā mahāmukhaṃ vivaritvā sakalasarīre lomāni uṭṭhāpetvā kāyaṃ upanāmesi. Apanāmesīti ratanasatikaṃ suvaṇṇagghanikaṃ viya thokaṃ apanāmesi. Pāpakoti lāmako amanuñño. So gūthaṃ viya aggi viya kaṇhasappo viya ca parivajjetabbo, na iminā suvaṇṇavaṇṇena sarīrena sampaṭicchitabbo. Evaṃ vutte pana sūcilomo ‘‘pāpako kira me samphasso’’ti kuddho pañhaṃ taṃ, samaṇātiādimāha. Cittaṃ vā te khipissāmīti yesañhi amanussā cittaṃ khipitukāmā honti, tesaṃ setamukhaṃ nīlodaraṃ surattahatthapādaṃ mahāsīsaṃ pajjalitanettaṃ bheravaṃ vā attabhāvaṃ nimminitvā dassenti, bheravaṃ vā saddaṃ sāventi, kathentānaṃyeva vā mukhe hatthaṃ pakkhipitvā hadayaṃ maddanti, tena te sattā ummattakā honti khittacittā. Taṃ sandhāyevamāha. Pāragaṅgāyāti dvīsu pādesu gahetvā taṃ āviñchetvā yathā na punāgacchasi, evaṃ pāraṃ vā gaṅgāya khipissāmīti vadati. Sadevaketiādi vuttatthameva. Puccha yadākaṅkhasīti yaṃkiñci ākaṅkhasi, taṃ sabbaṃ puccha, asesaṃ te byākarissāmīti sabbaññupavāraṇaṃ pavāreti.
ਕੁਤੋਨਿਦਾਨਾਤਿ ਕਿਂਨਿਦਾਨਾ, ਕਿਂਪਚ੍ਚਯਾਤਿ ਅਤ੍ਥੋ? ਕੁਮਾਰਕਾ ਧਙ੍ਕਮਿવੋਸ੍ਸਜਨ੍ਤੀਤਿ ਯਥਾ ਕੁਮਾਰਕਾ ਕਾਕਂ ਗਹੇਤ੍વਾ ਓਸ੍ਸਜਨ੍ਤਿ ਖਿਪਨ੍ਤਿ, ਏવਂ ਪਾਪવਿਤਕ੍ਕਾ ਕੁਤੋ ਸਮੁਟ੍ਠਾਯ ਚਿਤ੍ਤਂ ਓਸ੍ਸਜਨ੍ਤੀਤਿ ਪੁਚ੍ਛਤਿ?
Kutonidānāti kiṃnidānā, kiṃpaccayāti attho? Kumārakā dhaṅkamivossajantīti yathā kumārakā kākaṃ gahetvā ossajanti khipanti, evaṃ pāpavitakkā kuto samuṭṭhāya cittaṃ ossajantīti pucchati?
ਇਤੋਨਿਦਾਨਾਤਿ ਅਯਂ ਅਤ੍ਤਭਾવੋ ਨਿਦਾਨਂ ਏਤੇਸਨ੍ਤਿ ਇਤੋ ਨਿਦਾਨਾ। ਇਤੋਜਾਤਿ ਇਤੋ ਅਤ੍ਤਭਾવਤੋ ਜਾਤਾ। ਇਤੋ ਸਮੁਟ੍ਠਾਯ ਮਨੋવਿਤਕ੍ਕਾਤਿ ਯਥਾ ਦੀਘਸੁਤ੍ਤਕੇਨ ਪਾਦੇ ਬਦ੍ਧਂ ਕਾਕਂ ਕੁਮਾਰਕਾ ਤਸ੍ਸ ਸੁਤ੍ਤਪਰਿਯਨ੍ਤਂ ਅਙ੍ਗੁਲਿਯਂ વੇਠੇਤ੍વਾ ਓਸ੍ਸਜਨ੍ਤਿ, ਸੋ ਦੂਰਂ ਗਨ੍ਤ੍વਾਪਿ ਪੁਨ ਤੇਸਂ ਪਾਦਮੂਲੇਯੇવ ਪਤਤਿ, ਏવਮੇવ ਇਤੋ ਅਤ੍ਤਭਾવਤੋ ਸਮੁਟ੍ਠਾਯ ਪਾਪવਿਤਕ੍ਕਾ ਚਿਤ੍ਤਂ ਓਸ੍ਸਜਨ੍ਤਿ।
Itonidānāti ayaṃ attabhāvo nidānaṃ etesanti ito nidānā. Itojāti ito attabhāvato jātā. Ito samuṭṭhāya manovitakkāti yathā dīghasuttakena pāde baddhaṃ kākaṃ kumārakā tassa suttapariyantaṃ aṅguliyaṃ veṭhetvā ossajanti, so dūraṃ gantvāpi puna tesaṃ pādamūleyeva patati, evameva ito attabhāvato samuṭṭhāya pāpavitakkā cittaṃ ossajanti.
ਸ੍ਨੇਹਜਾਤਿ ਤਣ੍ਹਾਸਿਨੇਹਤੋ ਜਾਤਾ। ਅਤ੍ਤਸਮ੍ਭੂਤਾਤਿ ਅਤ੍ਤਨਿ ਸਮ੍ਭੂਤਾ। ਨਿਗ੍ਰੋਧਸ੍ਸੇવ ਖਨ੍ਧਜਾਤਿ ਨਿਗ੍ਰੋਧਖਨ੍ਧੇ ਜਾਤਾ ਪਾਰੋਹਾ વਿਯ। ਪੁਥੂਤਿ ਬਹੂ ਅਨੇਕਪ੍ਪਕਾਰਾ ਪਾਪવਿਤਕ੍ਕਾ ਤਂਸਮ੍ਪਯੁਤ੍ਤਕਿਲੇਸਾ ਚ। વਿਸਤ੍ਤਾਤਿ ਲਗ੍ਗਾ ਲਗ੍ਗਿਤਾ। ਕਾਮੇਸੂਤਿ વਤ੍ਥੁਕਾਮੇਸੁ। ਮਾਲੁવਾવ વਿਤਤਾ વਨੇਤਿ ਯਥਾ વਨੇ ਮਾਲੁવਾ ਲਤਾ ਯਂ ਰੁਕ੍ਖਂ ਨਿਸ੍ਸਾਯ ਜਾਯਤਿ, ਤਂ ਮੂਲਤੋ ਯਾવ ਅਗ੍ਗਾ, ਅਗ੍ਗਤੋ ਯਾવ ਮੂਲਾ ਪੁਨਪ੍ਪੁਨਂ ਸਂਸਿਬ੍ਬਿਤ੍વਾ ਅਜ੍ਝੋਤ੍ਥਰਿਤ੍વਾ ਓਤਤવਿਤਤਾ ਤਿਟ੍ਠਤਿ। ਏવਂ વਤ੍ਥੁਕਾਮੇਸੁ ਪੁਥੂ ਕਿਲੇਸਕਾਮਾ વਿਸਤ੍ਤਾ, ਪੁਥੂ વਾ ਸਤ੍ਤਾ ਤੇਹਿ ਕਿਲੇਸਕਾਮੇਹਿ વਤ੍ਥੁਕਾਮੇਸੁ વਿਸਤ੍ਤਾ। ਯੇ ਨਂ ਪਜਾਨਨ੍ਤੀਤਿ ਯੇ ‘‘ਅਤ੍ਤਸਮ੍ਭੂਤਾ’’ਤਿ ਏਤ੍ਥ વੁਤ੍ਤਂ ਅਤ੍ਤਭਾવਂ ਜਾਨਨ੍ਤਿ।
Snehajāti taṇhāsinehato jātā. Attasambhūtāti attani sambhūtā. Nigrodhasseva khandhajāti nigrodhakhandhe jātā pārohā viya. Puthūti bahū anekappakārā pāpavitakkā taṃsampayuttakilesā ca. Visattāti laggā laggitā. Kāmesūti vatthukāmesu. Māluvāva vitatā vaneti yathā vane māluvā latā yaṃ rukkhaṃ nissāya jāyati, taṃ mūlato yāva aggā, aggato yāva mūlā punappunaṃ saṃsibbitvā ajjhottharitvā otatavitatā tiṭṭhati. Evaṃ vatthukāmesu puthū kilesakāmā visattā, puthū vā sattā tehi kilesakāmehi vatthukāmesu visattā. Ye naṃ pajānantīti ye ‘‘attasambhūtā’’ti ettha vuttaṃ attabhāvaṃ jānanti.
ਯਤੋਨਿਦਾਨਨ੍ਤਿ ਯਂ ਨਿਦਾਨਮਸ੍ਸ ਅਤ੍ਤਭਾવਸ੍ਸ ਤਞ੍ਚ ਜਾਨਨ੍ਤਿ। ਤੇ ਨਂ વਿਨੋਦੇਨ੍ਤੀਤਿ ਤੇ ਏવਂ ਅਤ੍ਤਭਾવਸਙ੍ਖਾਤਸ੍ਸ ਦੁਕ੍ਖਸਚ੍ਚਸ੍ਸ ਨਿਦਾਨਭੂਤਂ ਸਮੁਦਯਸਚ੍ਚਂ ਮਗ੍ਗਸਚ੍ਚੇਨ વਿਨੋਦੇਨ੍ਤਿ। ਤੇ ਦੁਤ੍ਤਰਨ੍ਤਿ ਤੇ ਸਮੁਦਯਸਚ੍ਚਂ ਨੀਹਰਨ੍ਤਾ ਇਦਂ ਦੁਤ੍ਤਰਂ ਕਿਲੇਸੋਘਂ ਤਰਨ੍ਤਿ। ਅਤਿਣ੍ਣਪੁਬ੍ਬਨ੍ਤਿ ਅਨਮਤਗ੍ਗੇ ਸਂਸਾਰੇ ਸੁਪਿਨਨ੍ਤੇਪਿ ਨ ਤਿਣ੍ਣਪੁਬ੍ਬਂ। ਅਪੁਨਬ੍ਭવਾਯਾਤਿ ਅਪੁਨਬ੍ਭવਸਙ੍ਖਾਤਸ੍ਸ ਨਿਰੋਧਸਚ੍ਚਸ੍ਸਤ੍ਥਾਯ। ਇਤਿ ਇਮਾਯ ਗਾਥਾਯ ਚਤ੍ਤਾਰਿ ਸਚ੍ਚਾਨਿ ਪਕਾਸੇਨ੍ਤੋ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ। ਦੇਸਨਾવਸਾਨੇ ਸੂਚਿਲੋਮੋ ਤਸ੍ਮਿਂਯੇવ ਪਦੇਸੇ ਠਿਤੋ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍વਾ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋ। ਸੋਤਾਪਨ੍ਨਾ ਚ ਨਾਮ ਨ ਕਿਲਿਟ੍ਠਤ੍ਤਭਾવੇ ਤਿਟ੍ਠਨ੍ਤੀਤਿ ਸਹ ਫਲਪਟਿਲਾਭੇਨਸ੍ਸ ਸਰੀਰੇ ਸੇਤਕਣ੍ਡੁਪੀਲ਼ਕਸੂਚਿਯੋ ਸਬ੍ਬਾ ਪਤਿਤਾ। ਸੋ ਦਿਬ੍ਬવਤ੍ਥਨਿવਤ੍ਥੋ ਦਿਬ੍ਬવਰਦੁਕੂਲੁਤ੍ਤਰਾਸਙ੍ਗੋ ਦਿਬ੍ਬવੇਠਨવੇਠਿਤੋ ਦਿਬ੍ਬਾਭਰਣਗਨ੍ਧਮਾਲਧਰੋ ਸੁવਣ੍ਣવਣ੍ਣੋ ਹੁਤ੍વਾ ਭੁਮ੍ਮਦੇવਤਾਪਰਿਹਾਰਂ ਪਟਿਲਭੀਤਿ। ਤਤਿਯਂ।
Yatonidānanti yaṃ nidānamassa attabhāvassa tañca jānanti. Te naṃ vinodentīti te evaṃ attabhāvasaṅkhātassa dukkhasaccassa nidānabhūtaṃ samudayasaccaṃ maggasaccena vinodenti. Te duttaranti te samudayasaccaṃ nīharantā idaṃ duttaraṃ kilesoghaṃ taranti. Atiṇṇapubbanti anamatagge saṃsāre supinantepi na tiṇṇapubbaṃ. Apunabbhavāyāti apunabbhavasaṅkhātassa nirodhasaccassatthāya. Iti imāya gāthāya cattāri saccāni pakāsento arahattanikūṭena desanaṃ niṭṭhapesi. Desanāvasāne sūcilomo tasmiṃyeva padese ṭhito desanānusārena ñāṇaṃ pesetvā sotāpattiphale patiṭṭhito. Sotāpannā ca nāma na kiliṭṭhattabhāve tiṭṭhantīti saha phalapaṭilābhenassa sarīre setakaṇḍupīḷakasūciyo sabbā patitā. So dibbavatthanivattho dibbavaradukūluttarāsaṅgo dibbaveṭhanaveṭhito dibbābharaṇagandhamāladharo suvaṇṇavaṇṇo hutvā bhummadevatāparihāraṃ paṭilabhīti. Tatiyaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੩. ਸੂਚਿਲੋਮਸੁਤ੍ਤਂ • 3. Sūcilomasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੩. ਸੂਚਿਲੋਮਸੁਤ੍ਤવਣ੍ਣਨਾ • 3. Sūcilomasuttavaṇṇanā
