| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. សូចិមុខីសុត្តំ
10. Sūcimukhīsuttaṃ
៣៤១. ឯកំ សមយំ អាយស្មា សារិបុត្តោ រាជគហេ វិហរតិ វេឡុវនេ កលន្ទកនិវាបេ។ អថ ខោ អាយស្មា សារិបុត្តោ បុព្ពណ្ហសមយំ និវាសេត្វា បត្តចីវរមាទាយ រាជគហេ បិណ្ឌាយ បាវិសិ។ រាជគហេ សបទានំ បិណ្ឌាយ ចរិត្វា តំ បិណ្ឌបាតំ អញ្ញតរំ កុដ្ដមូលំ 1 និស្សាយ បរិភុញ្ជតិ។ អថ ខោ សូចិមុខី បរិព្ពាជិកា យេនាយស្មា សារិបុត្តោ តេនុបសង្កមិ; ឧបសង្កមិត្វា អាយស្មន្តំ សារិបុត្តំ ឯតទវោច –
341. Ekaṃ samayaṃ āyasmā sāriputto rājagahe viharati veḷuvane kalandakanivāpe. Atha kho āyasmā sāriputto pubbaṇhasamayaṃ nivāsetvā pattacīvaramādāya rājagahe piṇḍāya pāvisi. Rājagahe sapadānaṃ piṇḍāya caritvā taṃ piṇḍapātaṃ aññataraṃ kuṭṭamūlaṃ 2 nissāya paribhuñjati. Atha kho sūcimukhī paribbājikā yenāyasmā sāriputto tenupasaṅkami; upasaṅkamitvā āyasmantaṃ sāriputtaṃ etadavoca –
‘‘កិំ នុ ខោ, សមណ, អធោមុខោ ភុញ្ជសី’’តិ? ‘‘ន ខ្វាហំ, ភគិនិ, អធោមុខោ ភុញ្ជាមី’’តិ។ ‘‘តេន ហិ, សមណ, ឧព្ភមុខោ 3 ភុញ្ជសី’’តិ? ‘‘ន ខ្វាហំ, ភគិនិ, ឧព្ភមុខោ ភុញ្ជាមី’’តិ។ ‘‘តេន ហិ, សមណ, ទិសាមុខោ ភុញ្ជសី’’តិ? ‘‘ន ខ្វាហំ, ភគិនិ, ទិសាមុខោ ភុញ្ជាមី’’តិ។ ‘‘តេន ហិ, សមណ, វិទិសាមុខោ ភុញ្ជសី’’តិ? ‘‘ន ខ្វាហំ, ភគិនិ, វិទិសាមុខោ ភុញ្ជាមី’’តិ។
‘‘Kiṃ nu kho, samaṇa, adhomukho bhuñjasī’’ti? ‘‘Na khvāhaṃ, bhagini, adhomukho bhuñjāmī’’ti. ‘‘Tena hi, samaṇa, ubbhamukho 4 bhuñjasī’’ti? ‘‘Na khvāhaṃ, bhagini, ubbhamukho bhuñjāmī’’ti. ‘‘Tena hi, samaṇa, disāmukho bhuñjasī’’ti? ‘‘Na khvāhaṃ, bhagini, disāmukho bhuñjāmī’’ti. ‘‘Tena hi, samaṇa, vidisāmukho bhuñjasī’’ti? ‘‘Na khvāhaṃ, bhagini, vidisāmukho bhuñjāmī’’ti.
‘‘‘កិំ នុ, សមណ, អធោមុខោ ភុញ្ជសី’តិ ឥតិ បុដ្ឋោ សមានោ ‘ន ខ្វាហំ, ភគិនិ, អធោមុខោ ភុញ្ជាមី’តិ វទេសិ។ ‘តេន ហិ, សមណ, ឧព្ភមុខោ ភុញ្ជសី’តិ ឥតិ បុដ្ឋោ សមានោ ‘ន ខ្វាហំ, ភគិនិ, ឧព្ភមុខោ ភុញ្ជាមី’តិ វទេសិ។ ‘តេន ហិ, សមណ, ទិសាមុខោ ភុញ្ជសី’តិ ឥតិ បុដ្ឋោ សមានោ ‘ន ខ្វាហំ, ភគិនិ, ទិសាមុខោ ភុញ្ជាមី’តិ វទេសិ។ ‘តេន ហិ, សមណ, វិទិសាមុខោ ភុញ្ជសី’តិ ឥតិ បុដ្ឋោ សមានោ ‘ន ខ្វាហំ, ភគិនិ, វិទិសាមុខោ ភុញ្ជាមី’តិ វទេសិ’’។
‘‘‘Kiṃ nu, samaṇa, adhomukho bhuñjasī’ti iti puṭṭho samāno ‘na khvāhaṃ, bhagini, adhomukho bhuñjāmī’ti vadesi. ‘Tena hi, samaṇa, ubbhamukho bhuñjasī’ti iti puṭṭho samāno ‘na khvāhaṃ, bhagini, ubbhamukho bhuñjāmī’ti vadesi. ‘Tena hi, samaṇa, disāmukho bhuñjasī’ti iti puṭṭho samāno ‘na khvāhaṃ, bhagini, disāmukho bhuñjāmī’ti vadesi. ‘Tena hi, samaṇa, vidisāmukho bhuñjasī’ti iti puṭṭho samāno ‘na khvāhaṃ, bhagini, vidisāmukho bhuñjāmī’ti vadesi’’.
‘‘កថញ្ចរហិ , សមណ, ភុញ្ជសី’’តិ? ‘‘យេ ហិ កេចិ, ភគិនិ, សមណព្រាហ្មណា 5 វត្ថុវិជ្ជាតិរច្ឆានវិជ្ជាយ មិច្ឆាជីវេន ជីវិកំ 6 កប្បេន្តិ, ឥមេ វុច្ចន្តិ, ភគិនិ, សមណព្រាហ្មណា ‘អធោមុខា ភុញ្ជន្តី’តិ។ យេ ហិ កេចិ, ភគិនិ, សមណព្រាហ្មណា នក្ខត្តវិជ្ជាតិរច្ឆានវិជ្ជាយ មិច្ឆាជីវេន ជីវិកំ កប្បេន្តិ, ឥមេ វុច្ចន្តិ, ភគិនិ, សមណព្រាហ្មណា ‘ឧព្ភមុខា ភុញ្ជន្តី’តិ។ យេ ហិ កេចិ, ភគិនិ, សមណព្រាហ្មណា ទូតេយ្យបហិណគមនានុយោគាយ 7 មិច្ឆាជីវេន ជីវិកំ កប្បេន្តិ, ឥមេ វុច្ចន្តិ, ភគិនិ, សមណព្រាហ្មណា ‘ទិសាមុខា ភុញ្ជន្តី’តិ។ យេ ហិ កេចិ, ភគិនិ, សមណព្រាហ្មណា អង្គវិជ្ជាតិរច្ឆានវិជ្ជាយ មិច្ឆាជីវេន ជីវិកំ កប្បេន្តិ, ឥមេ វុច្ចន្តិ, ភគិនិ, សមណព្រាហ្មណា ‘វិទិសាមុខា ភុញ្ជន្តី’’’តិ។
‘‘Kathañcarahi , samaṇa, bhuñjasī’’ti? ‘‘Ye hi keci, bhagini, samaṇabrāhmaṇā 8 vatthuvijjātiracchānavijjāya micchājīvena jīvikaṃ 9 kappenti, ime vuccanti, bhagini, samaṇabrāhmaṇā ‘adhomukhā bhuñjantī’ti. Ye hi keci, bhagini, samaṇabrāhmaṇā nakkhattavijjātiracchānavijjāya micchājīvena jīvikaṃ kappenti, ime vuccanti, bhagini, samaṇabrāhmaṇā ‘ubbhamukhā bhuñjantī’ti. Ye hi keci, bhagini, samaṇabrāhmaṇā dūteyyapahiṇagamanānuyogāya 10 micchājīvena jīvikaṃ kappenti, ime vuccanti, bhagini, samaṇabrāhmaṇā ‘disāmukhā bhuñjantī’ti. Ye hi keci, bhagini, samaṇabrāhmaṇā aṅgavijjātiracchānavijjāya micchājīvena jīvikaṃ kappenti, ime vuccanti, bhagini, samaṇabrāhmaṇā ‘vidisāmukhā bhuñjantī’’’ti.
‘‘សោ ខ្វាហំ, ភគិនិ, ន វត្ថុវិជ្ជាតិរច្ឆានវិជ្ជាយ មិច្ឆាជីវេន ជីវិកំ កប្បេមិ, ន នក្ខត្តវិជ្ជាតិរច្ឆានវិជ្ជាយ មិច្ឆាជីវេន ជីវិកំ កប្បេមិ, ន ទូតេយ្យបហិណគមនានុយោគាយ មិច្ឆាជីវេន ជីវិកំ កប្បេមិ, ន អង្គវិជ្ជាតិរច្ឆានវិជ្ជាយ មិច្ឆាជីវេន ជីវិកំ កប្បេមិ។ ធម្មេន ភិក្ខំ បរិយេសាមិ; ធម្មេន ភិក្ខំ បរិយេសិត្វា ភុញ្ជាមី’’តិ។
‘‘So khvāhaṃ, bhagini, na vatthuvijjātiracchānavijjāya micchājīvena jīvikaṃ kappemi, na nakkhattavijjātiracchānavijjāya micchājīvena jīvikaṃ kappemi, na dūteyyapahiṇagamanānuyogāya micchājīvena jīvikaṃ kappemi, na aṅgavijjātiracchānavijjāya micchājīvena jīvikaṃ kappemi. Dhammena bhikkhaṃ pariyesāmi; dhammena bhikkhaṃ pariyesitvā bhuñjāmī’’ti.
អថ ខោ សូចិមុខី បរិព្ពាជិកា រាជគហេ រថិយាយ រថិយំ, សិង្ឃាដកេន សិង្ឃាដកំ ឧបសង្កមិត្វា ឯវមារោចេសិ – ‘‘ធម្មិកំ សមណា សក្យបុត្តិយា អាហារំ អាហារេន្តិ; អនវជ្ជំ 11 សមណា សក្យបុត្តិយា អាហារំ អាហារេន្តិ។ ទេថ សមណានំ សក្យបុត្តិយានំ បិណ្ឌ’’ន្តិ។ ទសមំ។
Atha kho sūcimukhī paribbājikā rājagahe rathiyāya rathiyaṃ, siṅghāṭakena siṅghāṭakaṃ upasaṅkamitvā evamārocesi – ‘‘dhammikaṃ samaṇā sakyaputtiyā āhāraṃ āhārenti; anavajjaṃ 12 samaṇā sakyaputtiyā āhāraṃ āhārenti. Detha samaṇānaṃ sakyaputtiyānaṃ piṇḍa’’nti. Dasamaṃ.
សារិបុត្តសំយុត្តំ សមត្តំ។
Sāriputtasaṃyuttaṃ samattaṃ.
តស្សុទ្ទានំ –
Tassuddānaṃ –
វិវេកជំ អវិតក្កំ, បីតិ ឧបេក្ខា ចតុត្ថកំ;
Vivekajaṃ avitakkaṃ, pīti upekkhā catutthakaṃ;
អាកាសញ្ចេវ វិញ្ញាណំ, អាកិញ្ចំ នេវសញ្ញិនា;
Ākāsañceva viññāṇaṃ, ākiñcaṃ nevasaññinā;
និរោធោ នវមោ វុត្តោ, ទសមំ សូចិមុខី ចាតិ។
Nirodho navamo vutto, dasamaṃ sūcimukhī cāti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. សុចិមុខីសុត្តវណ្ណនា • 10. Sucimukhīsuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. សូចិមុខីសុត្តវណ្ណនា • 10. Sūcimukhīsuttavaṇṇanā
