| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೧೦. ಸೂಚಿಮುಖೀಸುತ್ತಂ
10. Sūcimukhīsuttaṃ
೩೪೧. ಏಕಂ ಸಮಯಂ ಆಯಸ್ಮಾ ಸಾರಿಪುತ್ತೋ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ। ಅಥ ಖೋ ಆಯಸ್ಮಾ ಸಾರಿಪುತ್ತೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ರಾಜಗಹೇ ಪಿಣ್ಡಾಯ ಪಾವಿಸಿ। ರಾಜಗಹೇ ಸಪದಾನಂ ಪಿಣ್ಡಾಯ ಚರಿತ್ವಾ ತಂ ಪಿಣ್ಡಪಾತಂ ಅಞ್ಞತರಂ ಕುಟ್ಟಮೂಲಂ 1 ನಿಸ್ಸಾಯ ಪರಿಭುಞ್ಜತಿ। ಅಥ ಖೋ ಸೂಚಿಮುಖೀ ಪರಿಬ್ಬಾಜಿಕಾ ಯೇನಾಯಸ್ಮಾ ಸಾರಿಪುತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಸಾರಿಪುತ್ತಂ ಏತದವೋಚ –
341. Ekaṃ samayaṃ āyasmā sāriputto rājagahe viharati veḷuvane kalandakanivāpe. Atha kho āyasmā sāriputto pubbaṇhasamayaṃ nivāsetvā pattacīvaramādāya rājagahe piṇḍāya pāvisi. Rājagahe sapadānaṃ piṇḍāya caritvā taṃ piṇḍapātaṃ aññataraṃ kuṭṭamūlaṃ 2 nissāya paribhuñjati. Atha kho sūcimukhī paribbājikā yenāyasmā sāriputto tenupasaṅkami; upasaṅkamitvā āyasmantaṃ sāriputtaṃ etadavoca –
‘‘ಕಿಂ ನು ಖೋ, ಸಮಣ, ಅಧೋಮುಖೋ ಭುಞ್ಜಸೀ’’ತಿ? ‘‘ನ ಖ್ವಾಹಂ, ಭಗಿನಿ, ಅಧೋಮುಖೋ ಭುಞ್ಜಾಮೀ’’ತಿ। ‘‘ತೇನ ಹಿ, ಸಮಣ, ಉಬ್ಭಮುಖೋ 3 ಭುಞ್ಜಸೀ’’ತಿ? ‘‘ನ ಖ್ವಾಹಂ, ಭಗಿನಿ, ಉಬ್ಭಮುಖೋ ಭುಞ್ಜಾಮೀ’’ತಿ। ‘‘ತೇನ ಹಿ, ಸಮಣ, ದಿಸಾಮುಖೋ ಭುಞ್ಜಸೀ’’ತಿ? ‘‘ನ ಖ್ವಾಹಂ, ಭಗಿನಿ, ದಿಸಾಮುಖೋ ಭುಞ್ಜಾಮೀ’’ತಿ। ‘‘ತೇನ ಹಿ, ಸಮಣ, ವಿದಿಸಾಮುಖೋ ಭುಞ್ಜಸೀ’’ತಿ? ‘‘ನ ಖ್ವಾಹಂ, ಭಗಿನಿ, ವಿದಿಸಾಮುಖೋ ಭುಞ್ಜಾಮೀ’’ತಿ।
‘‘Kiṃ nu kho, samaṇa, adhomukho bhuñjasī’’ti? ‘‘Na khvāhaṃ, bhagini, adhomukho bhuñjāmī’’ti. ‘‘Tena hi, samaṇa, ubbhamukho 4 bhuñjasī’’ti? ‘‘Na khvāhaṃ, bhagini, ubbhamukho bhuñjāmī’’ti. ‘‘Tena hi, samaṇa, disāmukho bhuñjasī’’ti? ‘‘Na khvāhaṃ, bhagini, disāmukho bhuñjāmī’’ti. ‘‘Tena hi, samaṇa, vidisāmukho bhuñjasī’’ti? ‘‘Na khvāhaṃ, bhagini, vidisāmukho bhuñjāmī’’ti.
‘‘‘ಕಿಂ ನು, ಸಮಣ, ಅಧೋಮುಖೋ ಭುಞ್ಜಸೀ’ತಿ ಇತಿ ಪುಟ್ಠೋ ಸಮಾನೋ ‘ನ ಖ್ವಾಹಂ, ಭಗಿನಿ, ಅಧೋಮುಖೋ ಭುಞ್ಜಾಮೀ’ತಿ ವದೇಸಿ। ‘ತೇನ ಹಿ, ಸಮಣ, ಉಬ್ಭಮುಖೋ ಭುಞ್ಜಸೀ’ತಿ ಇತಿ ಪುಟ್ಠೋ ಸಮಾನೋ ‘ನ ಖ್ವಾಹಂ, ಭಗಿನಿ, ಉಬ್ಭಮುಖೋ ಭುಞ್ಜಾಮೀ’ತಿ ವದೇಸಿ। ‘ತೇನ ಹಿ, ಸಮಣ, ದಿಸಾಮುಖೋ ಭುಞ್ಜಸೀ’ತಿ ಇತಿ ಪುಟ್ಠೋ ಸಮಾನೋ ‘ನ ಖ್ವಾಹಂ, ಭಗಿನಿ, ದಿಸಾಮುಖೋ ಭುಞ್ಜಾಮೀ’ತಿ ವದೇಸಿ। ‘ತೇನ ಹಿ, ಸಮಣ, ವಿದಿಸಾಮುಖೋ ಭುಞ್ಜಸೀ’ತಿ ಇತಿ ಪುಟ್ಠೋ ಸಮಾನೋ ‘ನ ಖ್ವಾಹಂ, ಭಗಿನಿ, ವಿದಿಸಾಮುಖೋ ಭುಞ್ಜಾಮೀ’ತಿ ವದೇಸಿ’’।
‘‘‘Kiṃ nu, samaṇa, adhomukho bhuñjasī’ti iti puṭṭho samāno ‘na khvāhaṃ, bhagini, adhomukho bhuñjāmī’ti vadesi. ‘Tena hi, samaṇa, ubbhamukho bhuñjasī’ti iti puṭṭho samāno ‘na khvāhaṃ, bhagini, ubbhamukho bhuñjāmī’ti vadesi. ‘Tena hi, samaṇa, disāmukho bhuñjasī’ti iti puṭṭho samāno ‘na khvāhaṃ, bhagini, disāmukho bhuñjāmī’ti vadesi. ‘Tena hi, samaṇa, vidisāmukho bhuñjasī’ti iti puṭṭho samāno ‘na khvāhaṃ, bhagini, vidisāmukho bhuñjāmī’ti vadesi’’.
‘‘ಕಥಞ್ಚರಹಿ , ಸಮಣ, ಭುಞ್ಜಸೀ’’ತಿ? ‘‘ಯೇ ಹಿ ಕೇಚಿ, ಭಗಿನಿ, ಸಮಣಬ್ರಾಹ್ಮಣಾ 5 ವತ್ಥುವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ 6 ಕಪ್ಪೇನ್ತಿ, ಇಮೇ ವುಚ್ಚನ್ತಿ, ಭಗಿನಿ, ಸಮಣಬ್ರಾಹ್ಮಣಾ ‘ಅಧೋಮುಖಾ ಭುಞ್ಜನ್ತೀ’ತಿ। ಯೇ ಹಿ ಕೇಚಿ, ಭಗಿನಿ, ಸಮಣಬ್ರಾಹ್ಮಣಾ ನಕ್ಖತ್ತವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತಿ, ಇಮೇ ವುಚ್ಚನ್ತಿ, ಭಗಿನಿ, ಸಮಣಬ್ರಾಹ್ಮಣಾ ‘ಉಬ್ಭಮುಖಾ ಭುಞ್ಜನ್ತೀ’ತಿ। ಯೇ ಹಿ ಕೇಚಿ, ಭಗಿನಿ, ಸಮಣಬ್ರಾಹ್ಮಣಾ ದೂತೇಯ್ಯಪಹಿಣಗಮನಾನುಯೋಗಾಯ 7 ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತಿ, ಇಮೇ ವುಚ್ಚನ್ತಿ, ಭಗಿನಿ, ಸಮಣಬ್ರಾಹ್ಮಣಾ ‘ದಿಸಾಮುಖಾ ಭುಞ್ಜನ್ತೀ’ತಿ। ಯೇ ಹಿ ಕೇಚಿ, ಭಗಿನಿ, ಸಮಣಬ್ರಾಹ್ಮಣಾ ಅಙ್ಗವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತಿ, ಇಮೇ ವುಚ್ಚನ್ತಿ, ಭಗಿನಿ, ಸಮಣಬ್ರಾಹ್ಮಣಾ ‘ವಿದಿಸಾಮುಖಾ ಭುಞ್ಜನ್ತೀ’’’ತಿ।
‘‘Kathañcarahi , samaṇa, bhuñjasī’’ti? ‘‘Ye hi keci, bhagini, samaṇabrāhmaṇā 8 vatthuvijjātiracchānavijjāya micchājīvena jīvikaṃ 9 kappenti, ime vuccanti, bhagini, samaṇabrāhmaṇā ‘adhomukhā bhuñjantī’ti. Ye hi keci, bhagini, samaṇabrāhmaṇā nakkhattavijjātiracchānavijjāya micchājīvena jīvikaṃ kappenti, ime vuccanti, bhagini, samaṇabrāhmaṇā ‘ubbhamukhā bhuñjantī’ti. Ye hi keci, bhagini, samaṇabrāhmaṇā dūteyyapahiṇagamanānuyogāya 10 micchājīvena jīvikaṃ kappenti, ime vuccanti, bhagini, samaṇabrāhmaṇā ‘disāmukhā bhuñjantī’ti. Ye hi keci, bhagini, samaṇabrāhmaṇā aṅgavijjātiracchānavijjāya micchājīvena jīvikaṃ kappenti, ime vuccanti, bhagini, samaṇabrāhmaṇā ‘vidisāmukhā bhuñjantī’’’ti.
‘‘ಸೋ ಖ್ವಾಹಂ, ಭಗಿನಿ, ನ ವತ್ಥುವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇಮಿ, ನ ನಕ್ಖತ್ತವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇಮಿ, ನ ದೂತೇಯ್ಯಪಹಿಣಗಮನಾನುಯೋಗಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇಮಿ, ನ ಅಙ್ಗವಿಜ್ಜಾತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇಮಿ। ಧಮ್ಮೇನ ಭಿಕ್ಖಂ ಪರಿಯೇಸಾಮಿ; ಧಮ್ಮೇನ ಭಿಕ್ಖಂ ಪರಿಯೇಸಿತ್ವಾ ಭುಞ್ಜಾಮೀ’’ತಿ।
‘‘So khvāhaṃ, bhagini, na vatthuvijjātiracchānavijjāya micchājīvena jīvikaṃ kappemi, na nakkhattavijjātiracchānavijjāya micchājīvena jīvikaṃ kappemi, na dūteyyapahiṇagamanānuyogāya micchājīvena jīvikaṃ kappemi, na aṅgavijjātiracchānavijjāya micchājīvena jīvikaṃ kappemi. Dhammena bhikkhaṃ pariyesāmi; dhammena bhikkhaṃ pariyesitvā bhuñjāmī’’ti.
ಅಥ ಖೋ ಸೂಚಿಮುಖೀ ಪರಿಬ್ಬಾಜಿಕಾ ರಾಜಗಹೇ ರಥಿಯಾಯ ರಥಿಯಂ, ಸಿಙ್ಘಾಟಕೇನ ಸಿಙ್ಘಾಟಕಂ ಉಪಸಙ್ಕಮಿತ್ವಾ ಏವಮಾರೋಚೇಸಿ – ‘‘ಧಮ್ಮಿಕಂ ಸಮಣಾ ಸಕ್ಯಪುತ್ತಿಯಾ ಆಹಾರಂ ಆಹಾರೇನ್ತಿ; ಅನವಜ್ಜಂ 11 ಸಮಣಾ ಸಕ್ಯಪುತ್ತಿಯಾ ಆಹಾರಂ ಆಹಾರೇನ್ತಿ। ದೇಥ ಸಮಣಾನಂ ಸಕ್ಯಪುತ್ತಿಯಾನಂ ಪಿಣ್ಡ’’ನ್ತಿ। ದಸಮಂ।
Atha kho sūcimukhī paribbājikā rājagahe rathiyāya rathiyaṃ, siṅghāṭakena siṅghāṭakaṃ upasaṅkamitvā evamārocesi – ‘‘dhammikaṃ samaṇā sakyaputtiyā āhāraṃ āhārenti; anavajjaṃ 12 samaṇā sakyaputtiyā āhāraṃ āhārenti. Detha samaṇānaṃ sakyaputtiyānaṃ piṇḍa’’nti. Dasamaṃ.
ಸಾರಿಪುತ್ತಸಂಯುತ್ತಂ ಸಮತ್ತಂ।
Sāriputtasaṃyuttaṃ samattaṃ.
ತಸ್ಸುದ್ದಾನಂ –
Tassuddānaṃ –
ವಿವೇಕಜಂ ಅವಿತಕ್ಕಂ, ಪೀತಿ ಉಪೇಕ್ಖಾ ಚತುತ್ಥಕಂ।
Vivekajaṃ avitakkaṃ, pīti upekkhā catutthakaṃ;
ಆಕಾಸಞ್ಚೇವ ವಿಞ್ಞಾಣಂ, ಆಕಿಞ್ಚಂ ನೇವಸಞ್ಞಿನಾ।
Ākāsañceva viññāṇaṃ, ākiñcaṃ nevasaññinā;
ನಿರೋಧೋ ನವಮೋ ವುತ್ತೋ, ದಸಮಂ ಸೂಚಿಮುಖೀ ಚಾತಿ॥
Nirodho navamo vutto, dasamaṃ sūcimukhī cāti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೦. ಸುಚಿಮುಖೀಸುತ್ತವಣ್ಣನಾ • 10. Sucimukhīsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧೦. ಸೂಚಿಮುಖೀಸುತ್ತವಣ್ಣನಾ • 10. Sūcimukhīsuttavaṇṇanā
