| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. སཱུཙིམུཁཱིསུཏྟཾ
10. Sūcimukhīsuttaṃ
༣༤༡. ཨེཀཾ སམཡཾ ཨཱཡསྨཱ སཱརིཔུཏྟོ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཨཐ ཁོ ཨཱཡསྨཱ སཱརིཔུཏྟོ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ རཱཛགཧེ པིཎྜཱཡ པཱཝིསི། རཱཛགཧེ སཔདཱནཾ པིཎྜཱཡ ཙརིཏྭཱ ཏཾ པིཎྜཔཱཏཾ ཨཉྙཏརཾ ཀུཊྚམཱུལཾ 1 ནིསྶཱཡ པརིབྷུཉྫཏི། ཨཐ ཁོ སཱུཙིམུཁཱི པརིབྦཱཛིཀཱ ཡེནཱཡསྨཱ སཱརིཔུཏྟོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ སཱརིཔུཏྟཾ ཨེཏདཝོཙ –
341. Ekaṃ samayaṃ āyasmā sāriputto rājagahe viharati veḷuvane kalandakanivāpe. Atha kho āyasmā sāriputto pubbaṇhasamayaṃ nivāsetvā pattacīvaramādāya rājagahe piṇḍāya pāvisi. Rājagahe sapadānaṃ piṇḍāya caritvā taṃ piṇḍapātaṃ aññataraṃ kuṭṭamūlaṃ 2 nissāya paribhuñjati. Atha kho sūcimukhī paribbājikā yenāyasmā sāriputto tenupasaṅkami; upasaṅkamitvā āyasmantaṃ sāriputtaṃ etadavoca –
‘‘ཀིཾ ནུ ཁོ, སམཎ, ཨདྷོམུཁོ བྷུཉྫསཱི’’ཏི? ‘‘ན ཁྭཱཧཾ, བྷགིནི, ཨདྷོམུཁོ བྷུཉྫཱམཱི’’ཏི། ‘‘ཏེན ཧི, སམཎ, ཨུབྦྷམུཁོ 3 བྷུཉྫསཱི’’ཏི? ‘‘ན ཁྭཱཧཾ, བྷགིནི, ཨུབྦྷམུཁོ བྷུཉྫཱམཱི’’ཏི། ‘‘ཏེན ཧི, སམཎ, དིསཱམུཁོ བྷུཉྫསཱི’’ཏི? ‘‘ན ཁྭཱཧཾ, བྷགིནི, དིསཱམུཁོ བྷུཉྫཱམཱི’’ཏི། ‘‘ཏེན ཧི, སམཎ, ཝིདིསཱམུཁོ བྷུཉྫསཱི’’ཏི? ‘‘ན ཁྭཱཧཾ, བྷགིནི, ཝིདིསཱམུཁོ བྷུཉྫཱམཱི’’ཏི།
‘‘Kiṃ nu kho, samaṇa, adhomukho bhuñjasī’’ti? ‘‘Na khvāhaṃ, bhagini, adhomukho bhuñjāmī’’ti. ‘‘Tena hi, samaṇa, ubbhamukho 4 bhuñjasī’’ti? ‘‘Na khvāhaṃ, bhagini, ubbhamukho bhuñjāmī’’ti. ‘‘Tena hi, samaṇa, disāmukho bhuñjasī’’ti? ‘‘Na khvāhaṃ, bhagini, disāmukho bhuñjāmī’’ti. ‘‘Tena hi, samaṇa, vidisāmukho bhuñjasī’’ti? ‘‘Na khvāhaṃ, bhagini, vidisāmukho bhuñjāmī’’ti.
‘‘‘ཀིཾ ནུ, སམཎ, ཨདྷོམུཁོ བྷུཉྫསཱི’ཏི ཨིཏི པུཊྛོ སམཱནོ ‘ན ཁྭཱཧཾ, བྷགིནི, ཨདྷོམུཁོ བྷུཉྫཱམཱི’ཏི ཝདེསི། ‘ཏེན ཧི, སམཎ, ཨུབྦྷམུཁོ བྷུཉྫསཱི’ཏི ཨིཏི པུཊྛོ སམཱནོ ‘ན ཁྭཱཧཾ, བྷགིནི, ཨུབྦྷམུཁོ བྷུཉྫཱམཱི’ཏི ཝདེསི། ‘ཏེན ཧི, སམཎ, དིསཱམུཁོ བྷུཉྫསཱི’ཏི ཨིཏི པུཊྛོ སམཱནོ ‘ན ཁྭཱཧཾ, བྷགིནི, དིསཱམུཁོ བྷུཉྫཱམཱི’ཏི ཝདེསི། ‘ཏེན ཧི, སམཎ, ཝིདིསཱམུཁོ བྷུཉྫསཱི’ཏི ཨིཏི པུཊྛོ སམཱནོ ‘ན ཁྭཱཧཾ, བྷགིནི, ཝིདིསཱམུཁོ བྷུཉྫཱམཱི’ཏི ཝདེསི’’།
‘‘‘Kiṃ nu, samaṇa, adhomukho bhuñjasī’ti iti puṭṭho samāno ‘na khvāhaṃ, bhagini, adhomukho bhuñjāmī’ti vadesi. ‘Tena hi, samaṇa, ubbhamukho bhuñjasī’ti iti puṭṭho samāno ‘na khvāhaṃ, bhagini, ubbhamukho bhuñjāmī’ti vadesi. ‘Tena hi, samaṇa, disāmukho bhuñjasī’ti iti puṭṭho samāno ‘na khvāhaṃ, bhagini, disāmukho bhuñjāmī’ti vadesi. ‘Tena hi, samaṇa, vidisāmukho bhuñjasī’ti iti puṭṭho samāno ‘na khvāhaṃ, bhagini, vidisāmukho bhuñjāmī’ti vadesi’’.
‘‘ཀཐཉྩརཧི , སམཎ, བྷུཉྫསཱི’’ཏི? ‘‘ཡེ ཧི ཀེཙི, བྷགིནི, སམཎབྲཱཧྨཎཱ 5 ཝཏྠུཝིཛྫཱཏིརཙྪཱནཝིཛྫཱཡ མིཙྪཱཛཱིཝེན ཛཱིཝིཀཾ 6 ཀཔྤེནྟི, ཨིམེ ཝུཙྩནྟི, བྷགིནི, སམཎབྲཱཧྨཎཱ ‘ཨདྷོམུཁཱ བྷུཉྫནྟཱི’ཏི། ཡེ ཧི ཀེཙི, བྷགིནི, སམཎབྲཱཧྨཎཱ ནཀྑཏྟཝིཛྫཱཏིརཙྪཱནཝིཛྫཱཡ མིཙྪཱཛཱིཝེན ཛཱིཝིཀཾ ཀཔྤེནྟི, ཨིམེ ཝུཙྩནྟི, བྷགིནི, སམཎབྲཱཧྨཎཱ ‘ཨུབྦྷམུཁཱ བྷུཉྫནྟཱི’ཏི། ཡེ ཧི ཀེཙི, བྷགིནི, སམཎབྲཱཧྨཎཱ དཱུཏེཡྻཔཧིཎགམནཱནུཡོགཱཡ 7 མིཙྪཱཛཱིཝེན ཛཱིཝིཀཾ ཀཔྤེནྟི, ཨིམེ ཝུཙྩནྟི, བྷགིནི, སམཎབྲཱཧྨཎཱ ‘དིསཱམུཁཱ བྷུཉྫནྟཱི’ཏི། ཡེ ཧི ཀེཙི, བྷགིནི, སམཎབྲཱཧྨཎཱ ཨངྒཝིཛྫཱཏིརཙྪཱནཝིཛྫཱཡ མིཙྪཱཛཱིཝེན ཛཱིཝིཀཾ ཀཔྤེནྟི, ཨིམེ ཝུཙྩནྟི, བྷགིནི, སམཎབྲཱཧྨཎཱ ‘ཝིདིསཱམུཁཱ བྷུཉྫནྟཱི’’’ཏི།
‘‘Kathañcarahi , samaṇa, bhuñjasī’’ti? ‘‘Ye hi keci, bhagini, samaṇabrāhmaṇā 8 vatthuvijjātiracchānavijjāya micchājīvena jīvikaṃ 9 kappenti, ime vuccanti, bhagini, samaṇabrāhmaṇā ‘adhomukhā bhuñjantī’ti. Ye hi keci, bhagini, samaṇabrāhmaṇā nakkhattavijjātiracchānavijjāya micchājīvena jīvikaṃ kappenti, ime vuccanti, bhagini, samaṇabrāhmaṇā ‘ubbhamukhā bhuñjantī’ti. Ye hi keci, bhagini, samaṇabrāhmaṇā dūteyyapahiṇagamanānuyogāya 10 micchājīvena jīvikaṃ kappenti, ime vuccanti, bhagini, samaṇabrāhmaṇā ‘disāmukhā bhuñjantī’ti. Ye hi keci, bhagini, samaṇabrāhmaṇā aṅgavijjātiracchānavijjāya micchājīvena jīvikaṃ kappenti, ime vuccanti, bhagini, samaṇabrāhmaṇā ‘vidisāmukhā bhuñjantī’’’ti.
‘‘སོ ཁྭཱཧཾ, བྷགིནི, ན ཝཏྠུཝིཛྫཱཏིརཙྪཱནཝིཛྫཱཡ མིཙྪཱཛཱིཝེན ཛཱིཝིཀཾ ཀཔྤེམི, ན ནཀྑཏྟཝིཛྫཱཏིརཙྪཱནཝིཛྫཱཡ མིཙྪཱཛཱིཝེན ཛཱིཝིཀཾ ཀཔྤེམི, ན དཱུཏེཡྻཔཧིཎགམནཱནུཡོགཱཡ མིཙྪཱཛཱིཝེན ཛཱིཝིཀཾ ཀཔྤེམི, ན ཨངྒཝིཛྫཱཏིརཙྪཱནཝིཛྫཱཡ མིཙྪཱཛཱིཝེན ཛཱིཝིཀཾ ཀཔྤེམི། དྷམྨེན བྷིཀྑཾ པརིཡེསཱམི; དྷམྨེན བྷིཀྑཾ པརིཡེསིཏྭཱ བྷུཉྫཱམཱི’’ཏི།
‘‘So khvāhaṃ, bhagini, na vatthuvijjātiracchānavijjāya micchājīvena jīvikaṃ kappemi, na nakkhattavijjātiracchānavijjāya micchājīvena jīvikaṃ kappemi, na dūteyyapahiṇagamanānuyogāya micchājīvena jīvikaṃ kappemi, na aṅgavijjātiracchānavijjāya micchājīvena jīvikaṃ kappemi. Dhammena bhikkhaṃ pariyesāmi; dhammena bhikkhaṃ pariyesitvā bhuñjāmī’’ti.
ཨཐ ཁོ སཱུཙིམུཁཱི པརིབྦཱཛིཀཱ རཱཛགཧེ རཐིཡཱཡ རཐིཡཾ, སིངྒྷཱཊཀེན སིངྒྷཱཊཀཾ ཨུཔསངྐམིཏྭཱ ཨེཝམཱརོཙེསི – ‘‘དྷམྨིཀཾ སམཎཱ སཀྱཔུཏྟིཡཱ ཨཱཧཱརཾ ཨཱཧཱརེནྟི; ཨནཝཛྫཾ 11 སམཎཱ སཀྱཔུཏྟིཡཱ ཨཱཧཱརཾ ཨཱཧཱརེནྟི། དེཐ སམཎཱནཾ སཀྱཔུཏྟིཡཱནཾ པིཎྜ’’ནྟི། དསམཾ།
Atha kho sūcimukhī paribbājikā rājagahe rathiyāya rathiyaṃ, siṅghāṭakena siṅghāṭakaṃ upasaṅkamitvā evamārocesi – ‘‘dhammikaṃ samaṇā sakyaputtiyā āhāraṃ āhārenti; anavajjaṃ 12 samaṇā sakyaputtiyā āhāraṃ āhārenti. Detha samaṇānaṃ sakyaputtiyānaṃ piṇḍa’’nti. Dasamaṃ.
སཱརིཔུཏྟསཾཡུཏྟཾ སམཏྟཾ།
Sāriputtasaṃyuttaṃ samattaṃ.
ཏསྶུདྡཱནཾ –
Tassuddānaṃ –
ཝིཝེཀཛཾ ཨཝིཏཀྐཾ, པཱིཏི ཨུཔེཀྑཱ ཙཏུཏྠཀཾ།
Vivekajaṃ avitakkaṃ, pīti upekkhā catutthakaṃ;
ཨཱཀཱསཉྩེཝ ཝིཉྙཱཎཾ, ཨཱཀིཉྩཾ ནེཝསཉྙིནཱ།
Ākāsañceva viññāṇaṃ, ākiñcaṃ nevasaññinā;
ནིརོདྷོ ནཝམོ ཝུཏྟོ, དསམཾ སཱུཙིམུཁཱི ཙཱཏི༎
Nirodho navamo vutto, dasamaṃ sūcimukhī cāti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. སུཙིམུཁཱིསུཏྟཝཎྞནཱ • 10. Sucimukhīsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡༠. སཱུཙིམུཁཱིསུཏྟཝཎྞནཱ • 10. Sūcimukhīsuttavaṇṇanā
