| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ஸுசிமுகீ²ஸுத்தவண்ணனா
10. Sucimukhīsuttavaṇṇanā
341. த³ஸமே ஸுசிமுகீ²தி ஏவங்னாமிகா. உபஸங்கமீதி தே²ரங் அபி⁴ரூபங் த³ஸ்ஸனீயங் ஸுவண்ணவண்ணங் ஸமந்தபாஸாதி³கங் தி³ஸ்வா ‘‘இமினா ஸத்³தி⁴ங் பரிஹாஸங் கரிஸ்ஸாமீ’’தி உபஸங்கமி. அத² தே²ரேன தஸ்மிங் வசனே படிக்கி²த்தே ‘‘இதா³னிஸ்ஸ வாத³ங் ஆரோபெஸ்ஸாமீ’’தி மஞ்ஞமானா தேன ஹி, ஸமண, உப்³ப⁴முகோ² பு⁴ஞ்ஜஸீதி ஆஹ. தி³ஸாமுகோ²தி சதுத்³தி³ஸாமுகோ², சதஸ்ஸோ தி³ஸா ஓலோகெந்தோதி அத்தோ². விதி³ஸாமுகோ²தி சதஸ்ஸோ விதி³ஸா ஓலோகெந்தோ.
341. Dasame sucimukhīti evaṃnāmikā. Upasaṅkamīti theraṃ abhirūpaṃ dassanīyaṃ suvaṇṇavaṇṇaṃ samantapāsādikaṃ disvā ‘‘iminā saddhiṃ parihāsaṃ karissāmī’’ti upasaṅkami. Atha therena tasmiṃ vacane paṭikkhitte ‘‘idānissa vādaṃ āropessāmī’’ti maññamānā tena hi, samaṇa, ubbhamukho bhuñjasīti āha. Disāmukhoti catuddisāmukho, catasso disā olokentoti attho. Vidisāmukhoti catasso vidisā olokento.
வத்து²விஜ்ஜாதிரச்சா²னவிஜ்ஜாயாதி வத்து²விஜ்ஜாஸங்கா²தாய திரச்சா²னவிஜ்ஜாய. வத்து²விஜ்ஜா நாம லாபு³வத்து²-கும்ப⁴ண்ட³வத்து²-மூலகவத்து²-ஆதீ³னங் வத்தூ²னங் ப²லஸம்பத்திகாரணகாலஜானநுபாயோ. மிச்சா²ஜீவேன ஜீவிகங் கப்பெந்தீதி தேனேவ வத்து²விஜ்ஜாதிரச்சா²னவிஜ்ஜாஸங்கா²தேன மிச்சா²ஜீவேன ஜீவிகங் கப்பெந்தி, தேஸங் வத்தூ²னங் ஸம்பாத³னேன பஸன்னேஹி மனுஸ்ஸேஹி தி³ன்னே பச்சயே பரிபு⁴ஞ்ஜந்தா ஜீவந்தீதி அத்தோ². அதோ⁴முகா²தி வத்து²ங் ஓலோகெத்வா பு⁴ஞ்ஜமானவஸேன அதோ⁴முகா² பு⁴ஞ்ஜந்தி நாம. ஏவங் ஸப்³ப³த்த² யோஜனா காதப்³பா³. அபி செத்த² நக்க²த்தவிஜ்ஜாதி ‘‘அஜ்ஜ இமங் நக்க²த்தங் இமினா நக்க²த்தேன க³ந்தப்³ப³ங், இமினா இத³ஞ்சித³ஞ்ச காதப்³ப³’’ந்தி ஏவங் ஜானநவிஜ்ஜா. தூ³தெய்யந்தி தூ³தகம்மங், தேஸங் தேஸங் ஸாஸனங் க³ஹெத்வா தத்த² தத்த² க³மனங். பஹிணக³மனந்தி ஏககா³மஸ்மிங்யேவ ஏககுலஸ்ஸ ஸாஸனேன அஞ்ஞகுலங் உபஸங்கமனங். அங்க³விஜ்ஜாதி இத்தி²லக்க²ணபுரிஸலக்க²ணவஸேன அங்க³ஸம்பத்திங் ஞத்வா ‘‘தாய அங்க³ஸம்பத்தியா இத³ங் நாம லப்³ப⁴தீ’’தி ஏவங் ஜானநவிஜ்ஜா. விதி³ஸாமுகா²தி அங்க³விஜ்ஜா ஹி தங் தங் ஸரீரகொட்டா²ஸங் ஆரப்³ப⁴ பவத்தத்தா விதி³ஸாய பவத்தா நாம, தஸ்மா தாய விஜ்ஜாய ஜீவிகங் கப்பெத்வா பு⁴ஞ்ஜந்தா விதி³ஸாமுகா² பு⁴ஞ்ஜந்தி நாம. ஏவமாரோசேஸீதி ‘‘த⁴ம்மிகங் ஸமணா’’திஆதீ³னி வத³மானா ஸாஸனஸ்ஸ நிய்யானிகங் கு³ணங் கதே²ஸி. தஞ்ச பரிப்³பா³ஜிகாய கத²ங் ஸுத்வா பஞ்சமத்தானி குலஸதானி ஸாஸனே ஓதரிங்ஸூதி.
Vatthuvijjātiracchānavijjāyāti vatthuvijjāsaṅkhātāya tiracchānavijjāya. Vatthuvijjā nāma lābuvatthu-kumbhaṇḍavatthu-mūlakavatthu-ādīnaṃ vatthūnaṃ phalasampattikāraṇakālajānanupāyo. Micchājīvena jīvikaṃ kappentīti teneva vatthuvijjātiracchānavijjāsaṅkhātena micchājīvena jīvikaṃ kappenti, tesaṃ vatthūnaṃ sampādanena pasannehi manussehi dinne paccaye paribhuñjantā jīvantīti attho. Adhomukhāti vatthuṃ oloketvā bhuñjamānavasena adhomukhā bhuñjanti nāma. Evaṃ sabbattha yojanā kātabbā. Api cettha nakkhattavijjāti ‘‘ajja imaṃ nakkhattaṃ iminā nakkhattena gantabbaṃ, iminā idañcidañca kātabba’’nti evaṃ jānanavijjā. Dūteyyanti dūtakammaṃ, tesaṃ tesaṃ sāsanaṃ gahetvā tattha tattha gamanaṃ. Pahiṇagamananti ekagāmasmiṃyeva ekakulassa sāsanena aññakulaṃ upasaṅkamanaṃ. Aṅgavijjāti itthilakkhaṇapurisalakkhaṇavasena aṅgasampattiṃ ñatvā ‘‘tāya aṅgasampattiyā idaṃ nāma labbhatī’’ti evaṃ jānanavijjā. Vidisāmukhāti aṅgavijjā hi taṃ taṃ sarīrakoṭṭhāsaṃ ārabbha pavattattā vidisāya pavattā nāma, tasmā tāya vijjāya jīvikaṃ kappetvā bhuñjantā vidisāmukhā bhuñjanti nāma. Evamārocesīti ‘‘dhammikaṃ samaṇā’’tiādīni vadamānā sāsanassa niyyānikaṃ guṇaṃ kathesi. Tañca paribbājikāya kathaṃ sutvā pañcamattāni kulasatāni sāsane otariṃsūti.
ஸாரிபுத்தஸங்யுத்தவண்ணனா நிட்டி²தா.
Sāriputtasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஸூசிமுகீ²ஸுத்தங் • 10. Sūcimukhīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஸூசிமுகீ²ஸுத்தவண்ணனா • 10. Sūcimukhīsuttavaṇṇanā
